الهيئة العامة للأبحاث الجيولوجية: الهزة الارضية ناتجة عن تأثير خارجي ربما يكون بشري!!!

Quote: الخرطوم في 9/7/ 2010 (سونا) تعرضت بعض أنحاء الخرطوم اليوم لهزة ارضية خفيفة بلغت 3 درجات علي مقياس ريختير في الساعة الثانية وثمانية وأربعين دقيقة ولمدة ثانيتين وقال د. يوسف السماني المدير العام للهيئة العامة للأبحاث الجيولوجية (لسونا ) أن الهزة التي رصدتها أجهزة الهيئة تشير إلي أنها من نوع الأهتزاز الموضعي ( محلي ) وهي ناتجة عن تأثير خارجي ربما يكون بشري واضاف أن هذه الهزة ليس لها أي تأثير ولم يكن لها أي تتابع باعتبار أنها خفيفة مبينا أن الهزات التي يحدث بعدها تتابع عادة ما تصل إلي 6-7 درجات علي مقياس ريختر وبالتالي فإنه من غير المتوقع أن تحدث أي هزات ارتدادية كما أنها لم تسجل أي خطورة تذكر وأوضح د. السماني أن الهيئة تعمل حاليا علي الإتصال بأقرب المراكز خاصة في حلوان وبعض المراكز الإقليمية لتبادل المعلومات والتنسيق في مثل هذه الأحداث ومعرفة المركز الرئيسي للهزة

الحبيب واصل علي عبد الرحمن علي طه
لك الود الجزيل والامتنان والتحية

طبعا لا زال الكلام غير (محدد) رغم (وضوح اشاراته)

ويبدو أن المصدر قرر أن يرتكب ما تردد من تخرصات شاذة بشأن ما حدث في هاييتي قبل أشهر !!

ودون أن نتمدد في تكذيب أو تصديق هذا الارتكاب وهذه التخرصات .. نقول ... كل شيء جائز

طالما أن (اسرائيل والأمريكان) موجودون



اللهم الطف بعوام السودانييين وصالحيهم وصغارهم ونسائهم وضعفائهم
أما المستكبرين والفاسدين والـ.... فما شئت بهم فافعل

بالله ده كلام ده
حلوان شنو وتنسيق شنو؟؟
يا واصل كلم اوكامبو يخت ناس الهيئة العامة للابحاث الجيولوجية في قائمة المطلوبين
ياخي حصلت خجة عديل يجي يقولوا في ناس سووها...ياتو ناس ممكن يكون عندهم قدرة يعملوا فايبريشن في امدرمان والخرطوم وشرق النيل؟؟؟

اتصلحوا معانا يا هيئة ابحاث البتاع،ما ممكن كدة...ذكرتونا لما ضربوا مصنع الشفا ع .م . حسين وزير داخلية ولا دفاع قال سمعت في الس ان ان انو الطيارات جات من اتجاه الشمال


هسة الليل ده ننومه في ركن غرفة ولا عديل نودي سرارينا الفسحات ولا الفكرة شنو

سلام يافتحي

دا كلام غريب جدا جدا..

تعرف كلام زي دا لو اتقال هنا في أمريكا تلقى محطات التلفزيون والصحافة معسكرة قدام باب الباحث دا من قولة تيت
لحدي ما يوضح قاصد شنو بالكلام دا.



عرفنا خج الصناديق كمان جابت ليها خج واطا!!
وزي ماقال قمر بوبا

Quote: .ياتو ناس ممكن يكون عندهم قدرة يعملوا فايبريشن في امدرمان والخرطوم وشرق النيل؟؟؟

Quote: الهيئة العامة للأبحاث الجيولوجية: الهزة الارضية ناتجة عن تأثير خارجي ربما يكون بشري!!!

التأثير البشري ياهو حرمنتكم وعمايلكم السوداء ..

Quote: ربما يكون بشري

لم اجد هذه الجملة فى الخبر المنشور على سطح سونا

يا جماعة ما تظلموا ناس الهيئة ديل ساي اول حاجة اليوم جمعة والامة مجتمعة
البلد يكون انتخابات مسخنة ولا حاجة زي كدة والجماعة ادوها خجة ما ممعيرة كدة

يا اهل الله خارجي دي مقصود بيها غير مرتبط بباطن الارض وحركات طبقات الارض
وحقو الناس تضع الامور ضمن نطاقها العلمي وبعيدا عن السياسة... واعتقد انو المقصود هنا اقول ربما يكون تجارب او تفجيرات تحت سطح الارض داخل السودان ليس بالضرورة تكون يد خارجية وراها والاتصال بمرصد حلوان اعتقد المقصود منو ايضاً معرفة مركز الزلزال واجراء Cross check
والله اعلم
بالمناسبة سيدة اثق جدا في حديثها اكدت لي حدوث هزة خفيفة مماثلة امس الاول وفي نفس الوقت تقريباً

الاخ علي ميرغني سلام

Quote: يا اهل الله خارجي دي مقصود بيها غير مرتبط بباطن الارض وحركات طبقات الارض

طيب في كل علومك العسكرية الدرستها انت هل من سلاح يمكن ان يخج اركان العاصمة التلاتة؟؟؟ده سؤال مباشر وبعيد عن السياسة..سؤال تاني في نطاقك العلمي القلته،هو شنو السلاح الممكن يجربو تحت الواطة ويعمل كدة.... وبعيد عن السياسة هل ممكن قبل تجربة السلاح انا كمواطن من حقي في دولة السودان اكون عارف من الاعلام انو في خجة حتحصل..والحكومة تنورنا وتورينا؟؟ ولا اقعد اتهوزز كدة ساي كمواطن عوير؟

استاذ القمر بوبا سلام
عليك الله اسع انا جبت سيرة سلاح ولا ملاح بوبا زي ما بقول الصادق الرضي (في شنو)

Quote: نوع الأهتزاز الموضعي ( محلي ) وهي ناتجة عن تأثير خارجي .

دا كلام سونا وكدا اقراء تاني حكاية "اهتزاز موضعي (محلي) ناتجة عن تأثير خارجي " تلقى الأمر واضح خاصة اذا اضفت للحتة دي حكاية (بشري) التي حذفت بفعل فاعل كما قال الاخ واصل
لك مودتي
ـــــــــــــــــــــــ

Quote: في كل علومك العسكرية الدرستها

بالمناسبة انا درست علوم عسكرية ، مش (علومي العسكرية)
تاني لك مودتتي

السبب واضح .. دبر عنز


دا كلو من الأمريكان والعدو الصهيوني


ولا نامت اعين الجبناء

Quote: Quote: ربما يكون بشري لم اجد هذه الجملة فى الخبر المنشور على سطح سونا

ولا انا

!

Quote: الهزة التي رصدتها أجهزة الهيئة تشير إلي أنها من نوع الأهتزاز الموضعي ( محلي ) وهي ناتجة عن تأثير خارجي ربما يكون بشري

Quote: ربما يكون بشري

دي لقيتها وين؟


!

هزة أرضية أم زلزال !!!؟؟؟

Quote: قبل اسابيع كان في هذا المنتدي خبر عن هزة في شندي ولكن يبدو ان الامر كان عن حغريات او تفجيرات ارضية بفعل الانسان فلم تسجل الاجهزة العالمية اية اشارات واليوم هزة في الخرطوم وفي منطقة معينة ولا توجد اية اشارات في كل المواقع المتخصصة فمعرفة الهزات الطبيعية صار متاحا بتقدم تقني واقمار صناعية واجهزة دقيقة تغطي مناطق العالم كله تسجل كل الحركات والهزات ..

انا نقلت الخبر من سونا كما هو وواضح انه فبما بعد تم حذفها من قبل الوكالة

Quote: انا نقلت الخبر من سونا كما هو وواضح انه فبما بعد تم حذفها من قبل الوكالة

اردت ان اتاكد ياواصل
من ان سونا تحدث اخبارها بتلفون من الخارج

الحادثة تكررت معى شخصيا

عملوها فينى قبل عامين بذات الطريقة
وكانو دايرين يلحقونى امات طة
لكن ربك ستر

أوكيه انا عرفت لقيتها وين

الراكوبة

وقد إنفردت بجملة (ربما يكون بشري)

في حين خلا من تلك الجملة النص الوارد في كل من

الشروق

رماة الحدق

سونا


!

انا نقلت الخبر من موقع سونا مباشرة فور نشره وليس من اي موقع آخر وكانت هذه العبارة في حينها موجودة

Quote: انا نقلت الخبر من موقع سونا مباشرة فور نشره وليس من اي موقع آخر وكانت هذه العبارة في حينها موجودة

I dont judge

!

Quote: I dont judge

I am not saying you are. I am just clarifying to you and the readers of this post that this portion of the report was in SUNA when they first published it and it was not an addition made by anyone else but the agency.

صلاح الدين كيفنك
المؤكد حتي الآن في هزة ارضية حصلت
والمؤكد اكتر انو الهيئة العامة للأبحاث الجيولوجية اقرت بالموضوع
يهمني كمواطن هل حدثت هزة ام لم تحدث وكم كانت درجة الهزة...والاهم تعاطي الهيئة الحكومية المختصة مع الامر بشفافية تقنع المواطن

شخصيا لا مصلحة لي في تكذيب الراكوبة والاخ واصل علي واصدق سونا..خاصة ان التعديل علي البورتال الاخباري أسهل شي

Quote: شخصيا لا مصلحة لي في تكذيب الراكوبة والاخ واصل علي واصدق سونا

like wise يا قمر, بس الواحد تعود يتبين قبل ما يبصم, من قبيل بحاول اعرف ياتو نشاط (بشري) ممكن
يسبب هزه أرضية بقوة 3 على مقياس ريختر؟

مسوح زلزالية؟ مناورات أو تجارب عسكرية؟ مم مم شنو يعني؟

--------------

إزيك؟


!

Quote: وهي ناتجة عن تأثير خارجي ربما يكون بشري

يعني تم تغير الوضع الي هزاز
دة كلام ياجماعة

واصل هل نقلت الخبر عن سونا؟

Quote: واصل هل نقلت الخبر عن سونا؟

نعم

انا ماعارف الجهات التي عليها تقديم تفسيرات علمية والدولة خاتاها للحاجة الزي دي بتمرمط روحها وتتمرط السودان كده ليييييه..؟؟
البلد تخشها طيارات تضرب من طرف ومافي زول قادر يعرفها جاية من وين
البلد تتهزهز كلها ومافي زول ايضا في استطاعته تقديم تفسير مقنع عن اسباب هذه الهزهزة..
حلوان بتاعة فنيلتكم يا ابحاث الجيولوجية

د. عبدالله جمعة
أستاذ الجيوفيزياء بجامعة الخرطوم
تحدث قبل قليل عبر النيل الأزرق حول الهزة
مقللا من خطورتها دون أن يوضح أسبابها وماهيتها
والله بعد ده الا نسأل فكي أب قنقرة أو فكي كديس ......

القول الفصل من بورف معاوي شداد في قناة الشروق عرض اخبارالساعة التاسعة وكدا

Quote: 4- الزلازل الاصطناعية وهي الزلازل الناتجة لتخريب الوضع الطبيعي للتربة نتيجة النشاطات الإنسانية المختلفة كتجارب التفجيرات النووية أو ملأ الخزانات الكبيرة خلف السدود . كما حدث في سد koyna بالهند حيث ترافقت عملية إملاء الخزانات إلى حدوث زلازل وتصدع السد وقتل 177 شخص في 10/12/1968 . 0 في صحراء نيفادا الأمريكية … حيث نتج عن تفجير نووي تحت سطح الأرض حدوث زلزال قوي بتاريخ 19/12/1968 .

كدي ياجماعة الاخوة الجيولوجيين في المنبر يفيدونا في الكلام الفووق بتاع السدود ده

Quote: القول الفصل من بورف معاوي شداد في قناة الشروق عرض اخبارالساعة التاسعة وكدا

ياعمك منتظر الترجمة



وش مقرقر

يا علي ميرغني
بعد شوية ممكن اقول ليك علوب...زحنا من حتة استاذ دي ؟؟نحن قاعدين في ضل سودانيز نناقش للبلد
في مداخلتك جا مصطلح تفجيرات

Quote: اعتقد انو المقصود هنا اقول ربما يكون تجارب او تفجيرات تحت سطح الارض داخل السودان

يا حبوب انا مواطن وملكي لما تقول تفجيرات طواااالي بمشي علي السلاح...لا اعتقد ان هنالك مصانع اسمنت تحت الارض بكسروا فيها الحجارة بالديناميت في اركان العاصمة الثلاثة ولا تحارب نووية ولا غيرها

اها معاوية شداد خريج فيزيا ...وانا خريج فيزيا..قال شنو..يا اقتنعت يا ما اقتنعت


بالنسبة لقولي ( علومك) العسكرية..اعتذر ولك العتبي



تحياتي

يا ريت تقول لي علوب لانها بالجد بتقرب المسافات رغم انو سني اكبر من علوب
بروف شداد لسع ما قال حيقول بعد شوية في قناة الشروق
لك ودي

Quote: القول الفصل من بورف معاوي شداد في قناة الشروق عرض اخبارالساعة التاسعة وكدا

لو في قول فصل في السودان سوف ياتي من الدكتور عبدالله جمعة فروة استاذ العلوم بجامعة الخرطوم
والدكتور الكبير معاوية شداد دكتور بتاع فلك وموسوعة رهيبة دون شك

النرجي شداد بعد عشرة دقايق ونشوف

Quote: الهزة التي رصدتها أجهزة الهيئة تشير إلي أنها من نوع الأهتزاز الموضعي ( محلي ) وهي ناتجة عن تأثير خارجي ربما يكون بشري

بعض العوامل (البشرية) للهزات الارضية:

1. السدود (سد مروي) لانها تغير خارطة الضغط المسلط على الصفائح الارضية السفليةالتكتونية
ليس بالضرورة حدوث الزلزال عند نفس موضع السد يمكن حدوثه عند نهاية الصفيحة التكتونية

2. اعمال الحفر العميق في باطن الارض المصحوب بتفجيرات المناجم (زلزال استراليا العام 1989)

3. ضخ او سحب المياه الى داخل الارض (حادثة ضخ الجيش الامريكي لاطنان من المياه الملوثة في جبال الروكي 1961)

4. استخراج الغاز الطبيعي و البترول و عمليات الحفر المصاحبة (اوزبكستان و روسيا حدثت زلالزل صغيرة نتيجة لذلك )

5. بناء المباني العالية بحيث تشكل ضغطا محوريا على نقطة معينة في القشرة الارضية (مبنى تايبه 101)


للمزيد

Top 5 Ways to Cause a Man-Made Earthquake

سلام واحترام

لا اشك مطلقاً في خبر ياتي عن طريق واصل

وحقوا الناس تحترم مصداقية هذا الرجل

ياواصل

هل لديك اي معلومة عن وجود اي تجارب عسكرية في الاراضي السودانية

لحدي هسة مافي شي
9 ونص ولحدي هسة الشروق ما جابت شداد والقنوات السودانية شغالة منوعات



طالع حفلة عرس وبرجع ونشوف البحصل

Quote: طالع حفلة عرس وبرجع ونشوف البحصل

Copy Paste ال ح أعملو انا

كان طلعنا ماشين نفس الحفل أبقى سلم علي
ح أكون لابس قميص رمادي

D:

!

Quote: لحدي هسة مافي شي 9 ونص ولحدي هسة الشروق ما جابت شداد والقنوات السودانية شغالة منوعات

انتو يا قمر بوبا
الجاكم في الخرطوم ده زلزال ولا رمضان الراجين ليهو دكتور شداد ده

Quote: الجاكم في الخرطوم ده زلزال ولا رمضان الراجين ليهو دكتور شداد ده

النجيضة: إنو البروف ما عارف الحاصل شنو بالضبط


!

Quote: النجيضة: إنو البروف ما عارف الحاصل شنو بالضبط

جابوه يا صلاح الدين..؟؟
وياريت ياخي لو حصل تلخص لينا كلامو

نفس الكلام الكنا بنقول فيهو يا كيكي .. لا جديد

النجيضه اخونا واصل يبلع كلامه النكروهو ناس سونا ده ويحتسبه عند الله

Quote: نفس الكلام الكنا بنقول فيهو يا كيكي .. لا جديد

صعب وما بقدر يا منتصر يفتي سسسساكت فالبلد قاعدة ميطي من الاجهزة والمعدات التي تفترض كبلد في السودان تكون موزعة بصورة منهجية وعلمية ومدروسة عشان ترصد تحركات الارض ودي ما قروش كثير وشوية اهتمام بالاشياء الاساسية والتطوير كان حيساعد مثل الهيئة العامة انها تواكب الحصل شنو..؟؟
في اثناء تشييد سد مروي انا قريت ورقة مهمة وخطيرة تم اهمالها حتي عندما عرضت في هذا المنبر في هذا المنبر افادت تلك الورقة بنقص بالدراسات الاساسية المربوطة بجيولوجيا المنطقة التي اقيم فيها السد وكانت في اختبارات اساسية ومهمة مفروض تتعمل وفي اطار سياسة القطر قام الحكومية تم فط هذه الجزئية الاساسية..
وعموما الله يستر

الناس ديل واحد فيهم يخطف رجلو و يمشى المانيا و يجيب معاهو الاخطبوط بول

Quote: وقال د. يوسف السماني المدير العام للهيئة العامة للأبحاث الجيولوجية (لسونا ) أن الهزة التي رصدتها أجهزة الهيئة تشير إلي أنها من نوع الأهتزاز الموضعي ( محلي ) وهي ناتجة عن تأثير خارجي ربما يكون بشري

الزول ده شكلو كان نايم وصحى مخلوع لقى الدنيا مقلوبه فخانه التعبير

يا وطن ياما فيك محن!


...................

سلامات يا واصل...

ايران قامت بتجربة قنبلة نووية ناجحة. دى السبب يا جماعة.

Quote: يا واصل كلم اوكامبو يخت ناس الهيئة العامة للابحاث الجيولوجية في قائمة المطلوبين

Quote: الجاكم في الخرطوم ده زلزال ولا رمضان الراجين ليهو دكتور شداد ده

ما عان كدة قلت ليكم راجي الزول ده انا...اهو قال ما قدر يغطي الموضوع

صلاح الدين

Quote: Copy Paste ال ح أعملو انا

فتشت المكان كلو ما كان في زول لابس رمادي غير العريس...عرست يالاخو انت

يا اخونا ادو الموسيقار ناذر(حمد) بن خليفة حقو
اول من جاب خبر الخجة دي الساعة 3 ظ وهي حصلت تلاتة ال ربع
يعني من دوب ما ربط اللابتوب وفتح لو العليقة
كان 15 دقيقة
بعد داك الأخبار بقت تتطاقش
ادو الراجل حقو الأدبي

هزة شنو ياجماعة قولوا بسم الله الرحمن الرحيم
رقصت من عدله طربا الخرطوم وبس لانه الايقاع كان خفيف
جايايكم الدلوكة وامكن اكون فيها عرضة جعليين والله يستر

الاخ زكريا،

Quote: ايران قامت بتجربة قنبلة نووية ناجحة. دى السبب يا جماعة.

تعرف الكلام دا خطير جداً وماعندنا قدرة ليهو، العلاقة العسكرية بين الطرفين لا يستطيع احد إنكارها لكن تصل الى انه يجربوا سلاحهم النووي عندنا فتأكد انه الضربة التي ستوجه الى ايران حناخد زيهااذا في ناس قرت كلامك دا وصدقتوا والامريكان ديل قبل كدا احتلوا العراق بالشبهة بس.
تحياتي

من الصحافة اليوم


كمان جابت ليها كردفان

الأخبار

هزة أرضية مركزها شمال كردفان وتأثرت بها الخرطوم والجزيرة

الدفاع المدني :لا خسائر في المباني ولا بلاغات عن ضحايا

تعرضت بعض أنحاء ولاية الخرطوم امس الجمعة لهزة ارضية خفيفة بلغت 3 درجات على مقياس ريختر عند الساعة 2:48 ظهرا ولمدة ثانيتين.
وأفادت الهيئة العامة للأبحاث الجيولوجية بانها تجري اتصالات بمراكز إقليمية لتبادل المعلومات والتنسيق ومعرفة المركز الرئيسي للهزة.
وشعر العديد من سكان الخرطوم نهار أمس بالهزة عبر اهتزاز قطع الأثاث التي امامهم او عن طريق الشعور بها في البنايات المتعددة الطوابق.
من جانبه ، قال الخبير الجيولوجي الدكتور محمد جلال ، ان مرصد حلوان رصد هزة الخرطوم، واكد ضعفها.
ودعا جلال، في حديث مع «الصحافة»، الجهات المختصة لاتخاذ خطوات تمكن من التعامل مع مثل هذه الظواهر، وطالب بمراجعة الاعتقاد السائد بان السودان بعيد عن مناطق الخطر الزلزالي.
وقال البروفيسور معاوية شداد، لقناة «الشروق» ، ان مركز الهزة كان في شمال كردفان، كما ان مناطق اخرى وصلتها الهزة في ولاية الجزيرة.
من ناحيتها، قالت الشرطة ان الهزة الارضية التى ضربت مناطق متفرقة من ولاية الخرطوم لم تحدث اي اضرار او خسائر في الارواح والمباني.
وقال المدير العام للهيئة الدكتور يوسف السماني، ان الهزة التي رصدتها أجهزة الهيئة تشير إلي أنها من نوع الأهتزاز الموضعي «محلي» وهي ناتجة عن تأثير خارجي.
واضاف أن هذه الهزة ليس لها أي تأثير ولم يكن لها أي تتابع باعتبار أنها خفيفة، مبينا أن الهزات التي يحدث بعدها تتابع عادة ما تصل إلى 6ـ7 درجات على مقياس ريختر ، وبالتالي فإنه من غير المتوقع أن تحدث أية هزات ارتدادية كما أنها لم تسجل أية خطورة تذكر.
وأوضح السماني أن الهيئة تعمل حاليا على الاتصال بأقرب المراكز خاصة مركز حلوان المصري وبعض المراكز الإقليمية لتبادل المعلومات والتنسيق في مثل هذه الأحداث ومعرفة المركز الرئيسي للهزة.
وحسب شبكة الشروق، فان السكان في أنحاء متفرقة من العاصمة الخرطوم، شعروا بهزة أرضية طفيفة ظهر يوم أمس الجمعة ، وكان أكثر الذين شعروا بها القاطنون في الطوابق العليا.
وأفاد الأهالي في منطقتي جبرة وبري بأنهم أحسوا بالهزة.
وأكدت مصادر موثوقة لشبكة الشروق ، ان السلطات هبت إلى إحدى داخليات الطالبات في بري بعد حالة من الذعر، حيث تم احتواء الموقف بتهدئة الطالبات.
وقال مدير الدفاع المدني بولاية الخرطوم اللواء عبدالله عمر الحسن، انه في حوالي الساعه الثانية وثمانية واربعين دقيقة ظهر امس الجمعة، ضربت هزة ارضية ارجاء متفرقة من ولاية الخرطوم، ووردت بلاغات من مناطق بري والعمارات والمقرن وجبرة والصحافة والكلاكلة.
واضاف ،انه بعد الرجوع لمراصد الهيئة العامة للجيولوجيا تمت قراءة الحركة، والتي بلغت قوتها «3» درجات بمقياس ريختر بمرصد السليت.
واكد عدم حدوث اي تأثيرات بالمباني ولم توجد بلاغات عن خسائر او ضحايا، وقال ان السودان خارج منطقة الحزام الزلزالي، معلنا متابعة الجهات المختصة المستمرة لمستجدات الحدث بواسطة المراصد، ودعا المواطنين للاطمئنان.
وكانت تقارير صحفية أكدت وقوع هزة أرضية بمنطقة شندي بولاية نهر النيل في يناير من العام الجاري، لم تسفر عن أي خسائر في الأرواح أو الممتلكات، إلاّ أن غالبية المواطنين في نواحٍ واسعة من المدينة شعروا بالهزة من خلال حركة الأثاثات والأواني في المنازل.
وحسب مختصون في الجيولوجيا، فإن الهزات الأرضية في أواسط السودان متوقّعة بسبب تجدد الانزلاقات في الصدوع التي كوَّنت الأحواض الرسوبية.
وتوجد ثلاث محطات لرصد الزلازل بالسودان، أولها السليت 30 كلم شمال الخرطوم بحري، والمرخيات بغرب النيل، ومنطقة جبل الأولياء جنوب الخرطوم، وهي موصولة بمركز بهيئة الأبحاث الجيولوجية التابع لوزارة الطاقة.

http://www.alsahafa.sd/details.php?articleid=9898

شوفوا دا كمان من الرائ العام

ضربت بري والعمارات والمقرن وجبرة والصحافة والكلاكلة
الدفاع المدني: الهزة الأرضية بلغت (3) درجات بمقياس ريختر ..لا خسائر في الأرواح والممتلكات واستبعاد زلازل ارتدادية

ضَرَبت هزة أرضية مناطق متفرقة من ولاية الخرطوم بلغت ثلاث درجات بمقياس ريختر، دون أن تتسبب في خسائر في الممتلكات والأرواح، ووصف اللواء حمدنا الله آدم مدير الإدارة العامة للدفاع المدني، الهزة بأنها طبيعية وأكد عدم وجود أيّة خسائر في الأرواح أو الممتلكات أو المنشآت، وأوضح لـ «الرأي العام» أمس، أن مثل هذه الهزة حدثت أكثر من «40» مرة في منطقة دنقلا دون أن يشعر بها أحد، وأشار الى أن السودان خارج حزام الزلازل، غير أنه قال: هنالك بعض الظواهر تحدث في بعض المناطق مثل جبل مرة والرجاف ومنطقة البحر الأحمر، واستبعد أن تكون الهزة بسبب تضاغط أو تباعد لقشرة الأرض، وقال ربما يكون ذلك من الآليات الثقيلة التي تعج بها الخرطوم.من جهته قال د. يوسف السماني المدير العام للهيئة العامة للأبحاث الجيولوجية لـ (سونا) إن الهزة التي رصدتها أجهزة الهيئة تشير إلى أنّها من نوع الاهتزاز الموضعي (محلي)، وقال إنها ناتجة عن تأثير خارجي. وقال اللواء عبد اللّه عمر الحسن مدير الدفاع المدني ولاية الخرطوم، إنّه حوالي الساعة الثانية وثمانية وأربعين دقيقة من ظهر أمس، ضربت هزة أرضية أرجاءً متفرقة من ولاية الخرطوم، وقال: وردت بلاغات من مناطق بري والعمارات والمقرن وجبرة والصحافة والكلاكلة، وأضاف (للمكتب الصحفي للشرطة) أنه بعد الرجوع لمراصد الهيئة العامة للجيولوجيا تمّت قراءة الحركة، وأشار إلى أنها بلغت ثلاث درجات بمقياس ريختر بمرصد السليت، مُؤكِّداً عدم حدوث أيِّ تأثيرات بالمباني، ودعا، المواطنين للاطمئنان وعدم الإلتفات للشائعات. وأضاف أنها ليس لها أيِّ تأثير ولم يكن لها أيِّ تتابع باعتبار أنها خفيفة، مبيناً أن الهزات التي يحدث بعدها تتابع عادةً ما تصل إلى (6 - 7) درجات على مقياس ريختر واستبعد حدوث أيّة هزات ارتدادية.
وأوضح د. السماني أن الهيئة تعمل حالياً على الاتصال بأقرب المراكز خاصة في حلوان وبعض المراكز الإقليمية لتبادل المعلومات والتنسيق في مثل هذه الأحداث ومعرفة المركز الرئيسي للهزّة.