Post: #1
Title: حســــن ( المســـــــغفاتي )
Author: ياسر بيناوي
Date: 07-06-2010, 04:01 PM
عينة الزول قاااااعد في البلد
واكيد لاقيتوهو
في الحله
في الشغل
في الجامعة ( طبعا في الجامعات قاعد بكثرة )
طبعا الزول دا قدر السغافة الملقطا جايب بي اضانو وضراعو ( اقصد بي ايدو ضراعو )
اول ما يلاقيك يكون لاقط ليهو كلمة كلمتين من النوع الاخرن اولجي ديك
زي ابستمولجي وفيسيولجي والنضم الكبار داك
طوالي يقوم كابيها ليك حتي لو ماكان في ايي داعي ليها
ياخي دا مرة قاعدين نتونس عن حوادث المرور طوالي قام ناطي
_ أٍٍٍٍسمع انت لو عايز تقطع الشارع مافي داعي تعاين للعربات يمين وشمال
انت تقرأزاكرة السواق
_ ( انا طبعا الموضوع حرقني ) كدي جرب اعملا والله يلم فيك بتاع هايس يعملك كفته
نواصل القصص المثيرة لهذا المسغفاتي
|
Post: #2
Title: Re: حســــن ( المســـــــغفاتي )
Author: خضر حسين خليل
Date: 07-06-2010, 04:05 PM
Parent: #1
والله يا ياسر انا شايف انو كلام حسن في المسألة بتاعت قطع الزلط وقراية ذاكرة السواقين سليمولجي بالحيللوجي
|
Post: #4
Title: Re: حســــن ( المســـــــغفاتي )
Author: ياسر بيناوي
Date: 07-06-2010, 08:10 PM
Parent: #2
خدر حسين يافردة
| Quote: والله يا ياسر انا شايف انو كلام حسن في المسألة بتاعت قطع الزلط وقراية ذاكرة السواقين سليمولجي بالحيللوجي |
ايعني ما استقراء ايهامي
خالص الود
|
Post: #3
Title: Re: حســــن ( المســـــــغفاتي )
Author: ياسر بيناوي
Date: 07-06-2010, 04:17 PM
Parent: #1
ياخ دا مرة جا نشاط الجامعة من الصباح
اتاريهو امبارح حضر ليك مناقشة عن الدين والاساطير والخرافات والتفاصيل دي
جايي وممني نفسو بضحية صباحية
لقي ليك واحد صاحبنا قافلة معاهو قاعد بشرب في الجبنة ويقرأ في الجريد
_ تعرف يا ( ..... )
صاحبنا طوالي قاطعو وقال ليهو هسسسسسس ولا كلمة عايز حبنة اطلب عيز سجارة او سفة هاك
لكن انا ماعايز ولا كلمة
الراجل قعد مستني ضحية اخري
اها جاء واحد سواق حافلة ركن حافلتو في النمرة وقال يمشي يشرب القهوة ويقرأ الدار ويعاين للبنات السمحات في نشاط الجامعة
حظو العاثر قعدو جنب الجماعة ديل
بعد شوية زولنا مشي عليهو
_ لو سمحت يا ابو الشباب .... اسمك منو ..؟
_ قال ليهو عز الدين ( وطبعا متوقع منو مجامله علي شكل عاشت الاسامي وكده )
_ تعرف اسمك دا فيهو ميثيولجي .... ؟
( هنا طوالي صاحبنا الزهجان داك قام علي حيلو وهتف باعلي صوتو )
ياخ حرا عليك ياخ مالك بتشتم الزول ... يا ابو الشباب الزول دا قصتو معاك شنو ...؟
هسه ميثيولجي انت عارف معنها شنو ...؟
الزول شتمك قال ليك انت ( في معيرة هنا ) عديييييييل
والشكلة دورت
وبرضو نواصل
|
Post: #5
Title: Re: حســــن ( المســـــــغفاتي )
Author: ياسر بيناوي
Date: 07-06-2010, 11:41 PM
Parent: #3
ياخي دا مرة كان راكب في الحافلة قاعد في مقعد النص وخالف كراعو وماسك طرف شعرو يبرم فيهو
والدنيا رمضان والساعة 3 عز الحر الجماعة الفي الحافلة ينقنقوا سااااااااااااكت
الحافلة دى مالا ماشة براحة
وعليك الله يالسواق خرم من الشوارع الفيها زحمة
وهاك يا نقة
اها صاحبنا نط طوالي وعايز ينظر
_ افتكر السلحفائية بتاعة المواصلات دي .....
قبل يتم نضمو عمك قاعد وراهو
طوالي قام عليهو
اسكت يا عواليق
علي الطلاق فاطر
|
Post: #6
Title: Re: حســــن ( المســـــــغفاتي )
Author: صديق عبد الجبار
Date: 07-06-2010, 11:50 PM
Parent: #5
أسكت يا بيناوي ...
علي الهناي ...
مسطول ...!!
|
Post: #7
Title: Re: حســــن ( المســـــــغفاتي )
Author: ياسر بيناوي
Date: 07-07-2010, 00:20 AM
Parent: #6
Quote: أسكت يا بيناوي ...
علي الهناي ...
مسطول ...!! |
تعرف يا ابو الكباتن والله انا لامصطول ولا حاجة لكن بالجد الشخصية دي
عايزة دراسة
|
Post: #8
Title: Re: حســــن ( المســـــــغفاتي )
Author: احمد محمد الحاج
Date: 07-07-2010, 00:37 AM
Parent: #7
والكتّاب والأدباء والفنانين، والمهتمين بالقراءة والمعرفة، والذين هم، الآن، مُجرَّد "مثقّفاتيّة"، لا يهشِّون ولا ينشّون، وهم الذين (يَفتَكِرون) ويُبرِّمون شُعورهم، وهم، بعد تاريخهم الطويل في العمل الصحفي، الفئة المُهمَّشة والمَسخُور منها، ظاهراً وباطناً، لانعدام شَغَلَتها، بالتأكيد، وفراغ زمنه لدرجةٍ تُمكِّنها من قراءة كتاب!.
تنقيب الظلام
مأمون التلب
نُشر بملف سديم الثقافي بصحيفة الأخبار - الخميس
1 يوليو 2010م
|
Post: #10
Title: Re: حســــن ( المســـــــغفاتي )
Author: ياسر بيناوي
Date: 07-07-2010, 00:53 AM
Parent: #8
سلامات يا استاذ احمد
انا فقط اقصد المثقفاتية
ويخيل لي الفرق واضح بين المثقفين والمثقفاتية
|
Post: #28
Title: Re: حســــن ( المســـــــغفاتي )
Author: ياسر بيناوي
Date: 07-29-2010, 01:51 AM
Parent: #10
***
|
Post: #9
Title: Re: حســــن ( المســـــــغفاتي )
Author: نورالدين صلاح الدين
Date: 07-07-2010, 00:40 AM
Parent: #7
ا
ي
هـ
ا
ب
صح ....؟؟؟؟
غصباً عنكـ صح
|
Post: #11
Title: Re: حســــن ( المســـــــغفاتي )
Author: ياسر بيناوي
Date: 07-07-2010, 00:59 AM
Parent: #9
يجازي محنك يانور الدين
والله ضحكت جنس ضحك
انا والله ما قاصد زول بالاسم
لكن عليك الله وانت ماشي في الشارع ايي زول تلقي الطاقية دي قدرو لبسا ليهو
|
Post: #12
Title: Re: حســــن ( المســـــــغفاتي )
Author: ياسر بيناوي
Date: 07-07-2010, 02:59 AM
Parent: #11
اها مرة جيت لقيتو قاعد يتونس مع بنية سمييييييييييييحة
وقامت سألتو انت بتسف ليه ....؟
قال ليها والله الواحد لمن يخت السفة بيحس بي احاساس مفارق
انا هنا طوالي قمت علي حيلي وطلعت كيسي من جيبي وجدعتو
البنية عايتن لي باستغراب شديد
وقالت لي مالك عملت كدة
قلت ليها : والله يابت الناس انا بسف لي تسعطاشر سنة عشان افك الخرمة
اتاريهو صعوط السجم دا بيجيب احساس مفارق
الله يكفينا شر المفارقة
في سري قلت يمكن المفارقة دي ( هنا برضو في معيرة )
ونواصل
|
Post: #13
Title: Re: حســــن ( المســـــــغفاتي )
Author: ياسر بيناوي
Date: 07-07-2010, 10:45 AM
Parent: #12
*
|
Post: #14
Title: Re: حســــن ( المســـــــغفاتي )
Author: نورالدين صلاح الدين
Date: 07-07-2010, 02:13 PM
Parent: #13
ياسر بيناوي ..
إنت قاصدو .. وأنا عارف إنت قاصدو
وأولاد النيلين الما بغبوك وعلى رأسهم نادر حدثوه
وأرجا الراجيكـ
بالمناسبة أنا شاهد على العصر زي هيكل
حكاية الراجل بتاعة الحافلة سبب الأذية فيها نادر
.. الله يجازي محنو .. اليم داكـ اتكيفت منو كيف
وبتاع ذاكرة السائق ...
دي حصلت في دكان شريف في شارع الصحافة زلطـ
آسف على الأحراج ..
بس لقيتها فرصة ......
الراجل دا قبل كم السنة بالتناظير بتاعتو دي
فشل لي منشط مركزي في شمبات السودان
|
Post: #15
Title: Re: حســــن ( المســـــــغفاتي )
Author: ياسر بيناوي
Date: 07-08-2010, 09:46 AM
Parent: #14
نور الدين يافردة
Quote: ياسر بيناوي ..
إنت قاصدو .. وأنا عارف إنت قاصدو
وأولاد النيلين الما بغبوك وعلى رأسهم نادر حدثوه
وأرجا الراجيكـ
|
انا قاصدو ( شرف لا ادعيه .... وتهمة لا انكرها)
بس انا ماقصدو هو براهو
امثالو كثر وانا اصلا شاني عليهم حرب لاهودة فيها ....
وبعدين نادر دا بدل القولات دي
ما كان يجي يدلي بدلوه هنا
ومال نحن عملنا نائب رئيس جمعة مكافحة المسغفاتية ليه
|
Post: #35
Title: Re: حســــن ( المســـــــغفاتي )
Author: ياسر بيناوي
Date: 08-07-2010, 01:51 PM
Parent: #15
****
|
Post: #40
Title: Re: حســــن ( المســـــــغفاتي )
Author: manal eltahir
Date: 08-18-2010, 06:13 PM
Parent: #12
Oh my god YASIR u doing drugs,safa ya yasir I'm disappointed in u ,I thought u could do better
|
Post: #16
Title: Re: حســــن ( المســـــــغفاتي )
Author: ياسر بيناوي
Date: 07-08-2010, 03:55 PM
Parent: #6
**
|
Post: #17
Title: Re: حســــن ( المســـــــغفاتي )
Author: ياسر بيناوي
Date: 07-09-2010, 04:29 AM
Parent: #3
****
|
Post: #18
Title: Re: حســــن ( المســـــــغفاتي )
Author: حاتم شناب
Date: 07-09-2010, 11:20 AM
Parent: #17
المسغفاتي دة زكرني واحد ما بعرفو امبارح
قاعدين في (مكان طيب) كدة والناس قرفانة وزهجانة
وفلس وشغل مافي يقوم يجي المسغفاتي دة ويقول
لو سمحتو سفة بالله؟؟
الجماعة طبعا كلهم قاطعين صعوت ردو ليو بصوت واحد
ياريــــــــــــت والله....
صاحبك شاف نفسو زي اتحرج كدة
ومتتحسس يمشي طوالي!!
قام قالينا انتو عارفين بيل غيتس دة غبي خلاص
.....
ثم إختفى
تاركا الدهشة في وجوه المفلسين
حسي يابيناوي
انت بيل غيتس دة غبي
كدة لييييه؟؟؟
|
Post: #19
Title: Re: حســــن ( المســـــــغفاتي )
Author: ياسر بيناوي
Date: 07-09-2010, 11:03 PM
Parent: #18
Quote: حسي يابيناوي
انت بيل غيتس دة غبي
كدة لييييه؟؟؟ |
ايوه غبي ......
هسه ثروتو دي في زول عاقل بيعملا
|
Post: #20
Title: Re: حســــن ( المســـــــغفاتي )
Author: ياسر بيناوي
Date: 07-10-2010, 02:45 AM
Parent: #19
اها الراجل دا قرر انو يتزوج فقام قال يمشي يخطب
استاذة سعيدة زميلتو في الجامعة
وطبعا هو زول شين شناه ما عادية
دق الباب فتحت ليهو ام البت
اتفضل اتفضل دخل البيت
اها طوالي قام دخل في الموضوع توشك
_ والله ياحاجة الواحد زي قرر يكمل نصف دينو وكدةوهسه انا اطلب يد كريمتكم سعيدة
ام البت : طيب ياولدي خير لكن ما وريتني
انت شغال وين وعندك شنو ...؟
_ والله ياحاجة انا راجل عصامي
ام البت : عصامي كيفن يعني
_ والله زي ماتقولي انا بنيت نفسي بي نفسي
ام البت كوالله ياولدي مافاهماك
_ ياجة صراحة كدة انا زي خلقت نفسي وكدة
ام البت : والله يا ولدي انت من جيت داخل وانا بعاين لي شكلك دا
وفي سري دي مي خلقت ربنا
ونواصل
|
Post: #21
Title: Re: حســــن ( المســـــــغفاتي )
Author: بشرى محمد حامد الفكي
Date: 07-10-2010, 02:58 AM
Parent: #20
هذا عمود أكتبه بجريدة المهاجر لربما له صلة بالموضوع
Quote: مقدّر الظروف
كان صديقي يتحدث بحنق شديد وهو يلعن سلسفيل أهل الثقافة والمثقفين، وتحدث عن أزماتنا كسودانيين وعزاها لأنصاف المثقفين الذين يفترضون في أنفسهم أنهم يفهمون كل شيئ وهم لا يفهمون أي شيئ، وزاد أن الثقافة الحقة هي السبيل الوحيد للخروج من تلك الأزمات، وددت في تلك اللحظة أن أرد عليه حتى أشعره أنني متابع لما يقول، ولكن فيما يبدو في تلك اللحظة اختزلني عقله في أذن، أي والله مجرد أذن، فأسلمته أذني حتى يقضي وطره من الحديث وسرحت في مصطلح ورد في حديثه وهو الدياليكتيك.
يبدو أن صديقي وقع فريسة سائغة لأحد الذين يجوز فيهم المثل السوداني( زي ابل الرحيل شايلة السقا وعطشانة)، تجدهم يحملون الكتب على أك########م وليس في عقولهم، ولذا أجد له العذر، ولكن ما الذي حشر الدياليكتيك هنا؟ لا أدري ولكن هذا المصطلح قيل أن من أستخدمه هو هيجل وقد كان مقلوبا على رأسه على حد قول الماركسيين الى أن جاء ماركس وعدله، أي أوقفه على رجليه، ومنذ أن وقف على رجليه وقطع تلك الأصقاع الى بلادنا أصبح حاضرا بقوة في جلسات تثاقفنا، لا نرحمه ولا يرحمنا، واذا كان ماركس أوقفه على رجليه، مع الأخذ في الاعتبار كل عبقرية ماركس، فمثقفينا قاموا بترقيصه الاذاعة (رقصة الاذاعة هذه تشبه رقصة رئيس الجمهورية تلعب فيها الرقبة والمؤخرة دورا عظيما)، فلم يزل مثقفينا يحشرونه حشرا في نقاشاتهم حتى لتتمنى روح هيجل لو أنه قبر معها.
حاولت التركيز أكثر في المحاضرة التي يتحفني بها صديقي، وجدته يتحدث عن البنية الفوقية، وضعت يدي في راسي في حركة لا ارادية تحسبا أن تقع فيه البنية الفوقية فتهشمه، وقد انتابني احساس ان عيناي افترقتا أي واحدة في اتجاه، يبدو أنني أحوليت، أغمضت عيناي وتهت في التفسير المادي للتأريخ، والبنية التحتية وعلاقات الانتاج، والبنية الفوقية وحاولت الربط الدياليكتيكي ما بينهم و أرباع المثقفين الذين يتحدث عنهم صديقي، لم أجد سوى الاستسلام خصوصا انني لاحظت أن لذة الحديث أوصلته مرحلة اللهاث، وعبرت به حد النشوة، وتهت أنا في غياهب مفرداته.
هنالك مؤسسة عبقرية انتجتها الأزمة الاقتصادية الطاحنة في السودان، بعد سيطرة غول الاسلام السياسي علي امور البلاد والعباد، هذه المؤسسة الاقتصادية الهامة تتمثل في دكاكين أو أكشاك صغيرة تسمى مقدّر الظروف، تتيح هذه المؤسسة لأي شخص أن يجد احتياجاته الآنية بالمقدار والثمن الذي يريده، مثلا يمكن أن تكون ذاهبا الى موعد مهم فتذهب لمقدّر الظروف حتى تتعطر بأفخر أنواع العطور بسعر في متناول يدك، أو تستطيع شراء ملعقة صلصة بدلا ان تشتري علبة كاملة، وكله على حسب ظروفك، وأصبح السودانيون كل يقدر ظروف الآخر.
دلف صديقي بالحديث الى العولمة والنظام العالمي السائد، وتكلم عن الكارثة الاقتصادية وحتمية التحول الاشتراكي، وحقيقة خفت أن تصرّج احدى كلماته فتصيبني، ولكنني تمالكت نفسي وابتسمت له بمسكنة عسى أن تأخذه بي الشفقة، ولكنه فهم أنني استمتع بمضاجعته لأذني، شعرت أن جسمي يتحور متخذا شكل الأذن وعدت للسرحان.
سألت نفسي من يا ترى أول من فكر في مقدّر الظروف؟ لابد أنه من أصحاب الخيال الواسع، نعم لأن عمل دراسة جدوى اقتصادية لمشروع ما يحتاج لبعض الخيال، فما بالك بفكرة جنونية كهذه، حقيقة شيئ مدهش.
سألني صديقي مباغتا عن رأيي فيما قال، يبدو أنه فطن في النهاية الى أن ( الونسة مقولبة كلام)، لهنيهة ساد الصمت ثمّ جعلت أبحث عن صوتي الذي أظنه راح في سبات عميق لطول ما ظل عاطلا، وهممت أن أتكلم ولكن الحكمة قد ألجمتني فقلت بعد التنحنحات اللازمة جيد، فقد بدا لي أن صديقي وكأنه نهل حظه من الثقافة، من كشك مقدّر الظروف قبل أن يلتقيني ذلك اليوم |
|
Post: #22
Title: Re: حســــن ( المســـــــغفاتي )
Author: بشرى محمد حامد الفكي
Date: 07-10-2010, 02:59 AM
Parent: #21
شنو يا ياسر سلامات
وين معاوية
ما لميت فيهو
تسلم يا حبيب
|
Post: #24
Title: Re: حســــن ( المســـــــغفاتي )
Author: ياسر بيناوي
Date: 07-11-2010, 07:18 AM
Parent: #22
Quote:
وين معاوية
ما لميت فيهو
تسلم يا حبيب |
معاوية في عطبرة يا حبيبنا واكيد حتلقي اخبارو قريب
خالص الود
|
Post: #36
Title: Re: حســــن ( المســـــــغفاتي )
Author: ياسر بيناوي
Date: 08-17-2010, 05:59 PM
Parent: #24
()
|
Post: #29
Title: Re: حســــن ( المســـــــغفاتي )
Author: أبو عبيدة البصاص
Date: 07-29-2010, 02:12 AM
Parent: #22
Quote: شنو يا ياسر سلامات
وين معاوية
ما لميت فيهو
تسلم يا حبيب |
أحييييي انا ياياسر
تعضي في اضانه ولا اجي اغضيه واعضيك معاهو
هسي الجاب معاويه ده هنا شنو ؟
واصل المغايس بتاعتم
|
Post: #23
Title: Re: حســــن ( المســـــــغفاتي )
Author: ياسر بيناوي
Date: 07-10-2010, 04:38 PM
Parent: #21
شكرا يابشري علي المرور
وجاييك برواقة
خالص الود
|
Post: #26
Title: Re: حســــن ( المســـــــغفاتي )
Author: ياسر بيناوي
Date: 07-20-2010, 11:20 PM
Parent: #18
*
|
Post: #27
Title: Re: حســــن ( المســـــــغفاتي )
Author: ياسر بيناوي
Date: 07-27-2010, 08:05 AM
Parent: #18
****
|
Post: #25
Title: Re: حســــن ( المســـــــغفاتي )
Author: ياسر بيناوي
Date: 07-12-2010, 06:54 PM
Parent: #1
***
|
Post: #30
Title: Re: حســــن ( المســـــــغفاتي )
Author: تبارك شيخ الدين جبريل
Date: 07-29-2010, 03:44 AM
Parent: #25
Quote: قام قالينا انتو عارفين بيل غيتس دة غبي خلاص
.....
ثم إختفى
تاركا الدهشة في وجوه المفلسين |
... المهم ....
|
Post: #31
Title: Re: حســــن ( المســـــــغفاتي )
Author: ياسر بيناوي
Date: 07-30-2010, 09:48 AM
Parent: #30
***
|
Post: #32
Title: Re: حســــن ( المســـــــغفاتي )
Author: ياسر بيناوي
Date: 08-05-2010, 02:11 PM
Parent: #31
***
|
Post: #33
Title: Re: حســــن ( المســـــــغفاتي )
Author: عيسي ابراهيم
Date: 08-05-2010, 04:57 PM
Parent: #32
الجماعة تاكلين في شارع المين وضاربهم ليك جوعة الساعة 2ديك
المهم جا ليك صاحبنا وفرش الجريدة وهاك ياتكلي اتلفت يمين شمال
ويااااااااااخالة واحد جبنة سكرااااااااا خفيف زنجبيلها زي التقول ما قاصدة كدة (كتير يعني)
صاحبك بعد ما شرب ليك مضادات الجوع ولع ليع ليك سجارة قول ...
اتلفت لي الجنبو لقا برلوم ....وتوش طوالي ياااااااشاب انت كوز ....
الود اندهش ..
لا انا ما كوز ...
صاحبنا رد........ لانك انسان ....
|
Post: #34
Title: Re: حســــن ( المســـــــغفاتي )
Author: ياسر بيناوي
Date: 08-05-2010, 07:20 PM
Parent: #33
| Quote: الود اندهش .. لا انا ما كوز ... صاحبنا رد........ لانك انسان .... |
يازول متلخبت الكيمان
دا ما حسن المسفاتي
دا طلال نقة
خالس الود
|
Post: #37
Title: Re: حســــن ( المســـــــغفاتي )
Author: sari_alail
Date: 08-17-2010, 06:29 PM
Parent: #34
يا ياسر بيناوي ...
كيفك يا رجل ..؟؟
ياخ كلامك دا بيذكرني بالمكان داك في الخرطوم اتذكرتو ...... ؟؟؟؟
ناس عينة سكر خفيف .... و يا اخ سجارة بالله ..
|
Post: #38
Title: Re: حســــن ( المســـــــغفاتي )
Author: ياسر بيناوي
Date: 08-17-2010, 07:47 PM
Parent: #37
Quote: ياخ كلامك دا بيذكرني بالمكان داك في الخرطوم اتذكرتو ...... ؟؟؟؟
ناس عينة سكر خفيف .... و يا اخ سجارة بالله .. |
حكمة الله يا ستري الليل هسه جايي من هناكـ
وينك ياراجل مشتاقين ياخ
خالص الود
|
Post: #39
Title: Re: حســــن ( المســـــــغفاتي )
Author: sari_alail
Date: 08-17-2010, 10:21 PM
Parent: #38
يا سيد ..
بالاكتر والله ...
اخوك داخل ليهو في حالة عزلة ما معروف سببا شنو ... لكن لي خير كدا .. على آخر السنة ح اكون في الخرطوم ...
ياخ المكان داك اتعرفتا فيهو على ناس ظريفين و اتوظدت علاقتي بيهم ...بالرغم من انو بجي فيهو ساعتين ترانزيت يوميا ...
ياخ كل مرة باتذكر المكان الوديتوني ليهو داك الجمب ال british council
عمك بتاع الدكوة و السلطة و البطيخ الكارب المعاهو الشاي الأحمر .....اللهم اني صائم ...مالكم دايرين تقلبو المواجع .....
تخريمة تانية .... متذكر الزول داك البعد ما بيرسم بيدفق الشاي في اللوحة .؟؟؟؟؟
تحياتي للمسغفاتية (الراقين منهم )
اينما وجدو ....لوووووووووووووووووووووووووووول
ما زي زولك القال ..انا خلقتا نفسي براي ... دا كان يقطعو فيهو سوطين يعدلو ليهو راسو ..
|
|