Post: #1
Title: نقاش مع شابة يهودية ما ناقشة حاجة
Author: Osman Musa
Date: 07-04-2010, 11:50 PM
فى مطعم فلافل فى شارع
البرودوى السمح .
شالوم :
شالوم :
أنت بتتكلم اسبانيولى ؟
لا لا .
أنا بتكلم عربى عديل .
بس أنت أسود؟
و مالو طيب السواد .
جدنا عنتر قال :
لئن أك أسودا فالمسك لونى ... وما لسواد جلدى من دواء
ولكن تبعد الفحشاء عنى ... كبعد الأرض عن جو السماء
أنت عربى أفريقى ؟
بالحيل يا تمرهندى .
بس أنتم الأفارقة كسلانيين .
القالك نحنا كسلانيين منو ؟
أنتى ماشفتى كورة غانا ؟
والعرب .
اها العرب كمان شن قولك فى أهلنا العربان ؟
صورة العرب عندى أنا وفى ذهن اليهود الأمريكيين . هم شعب غنى ومتخلف
وبدائى وغير متحضر .
أقيفى أقيفى .
..
نتابع النقاش .. بعد لبع الفلافل
|
Post: #2
Title: Re: نقاش مع شابة يهودية ما ناقشة حاجة
Author: Osman Musa
Date: 07-05-2010, 03:38 AM
Parent: #1
الشابة اليهودية الجميلة أسمها تمر
وده أسم عربى T. H. Abraham
31 سنة
تخرجت فى جامعة نيويورك .. تعلمت ال Real Estate
والبنت تمرهندى تفهم فى شغلات ال Mortgage
والكلامات الزى دى .
تمر وسيط عقارى مافيها كلام .
بس عن العرب وعن أفريقيا ما ناقشة حاجة . ولا أبو النوم
قالت : العربى يحب سفك الدماء . ويسىء معاملة المرأة .
ده كلام يا تمر ؟
أنتى ما سمعتى بى الشاعرة ليلى الأخيلية ؟
أصلو ما سمعتى ؟ الزولة القالت :
نحن الأخايل ما يزال غلامنا ... حتى يدب على العصا مذكورا
نحن العرب نكرم المرأة ونحترمها ونكتب عنها .
المطبوع فى أذهانكم ده خبوب ساكت .
.. ونتابع النقاش مع الفلافل بى ال Tomato Ketchup .
|
Post: #3
Title: Re: نقاش مع شابة يهودية ما ناقشة حاجة
Author: Osman Musa
Date: 07-05-2010, 05:43 AM
Parent: #2
تذكرت كلام أسماعيل حسن .
لونك أبهى لون ... وكفاك العيون .
يا تمر أنتى لونك ده حلو كدى السبب شنو ؟
ضحكت .
ضحكت وقالت : بس الجرجير وال Natural Omega - 3
سألتها تانى .
دى الحبوب حقت زيت السمك ؟
قالت : نعم ياهو زاتو ال Fish Oil .
البنت ذكية وبتحب تنطط فى الكلام .
بس نرجع للحديث عن المطبوع فى دقنوسك ده .
نرجع للصورة القلتى غير مشرقة .
نرجع لحديثك يا تمر عن عدم حضور العرب أدبيا فى حياة الأمريكيين .
أنا والله يا تمر أحب جامعة نيويورك حب كتير .
وزى ما بقول أخونا محمد المرتضى . ديل ناسنا تب .
جامعة نيويورك جامعة ليها شنة ورنة .
يعنى دى ما زى الجامعات ال ... فى العشرين سنة الفاتت .
الجامعات الجخ والقصب الفخ .
جامعة نيويورك تاريخ طويل وفهم .
عشان السبب ده لابد فهمك للشعوب يكون فهم كامل .
معليش الأنجليزى بتاعى أنجليزى مكعوج وما زى أنجليزى ناس دكتور صلاح الزين
الا برضو شويتين كدى ناقش .
( ونتابع النقاش مع تمر )
|
Post: #4
Title: Re: نقاش مع شابة يهودية ما ناقشة حاجة
Author: Osman Musa
Date: 07-05-2010, 03:03 PM
Parent: #3
والله غايتو .
جد يا تمورتى كلامك يجيب وجع الركب .
دقنوسك مليان صور جميلة للاغريق بس .
أفريقيا عندك تماسيح وجمال وجداد وأدى .
حكايتك شنو ؟
يا تمر . رى شارلس قال الموسيقى السمحة دى كلها طلعت من أفريقيا .
أنتى فى جامعة نيويورك يا سجم الرماد ما كنتى بتمشى أركان النقاش ؟
وكمان فى ركن نقاش فى ال 34 مع برودوى برضو . وده ركن حار زى ركن
ناس د / أحمد القرشى فى جامعة الخرطوم فى الزمن الاحسن من الزمن ده .
يا تمر .
يا تمر صور الاغريق متفوقة فى رأسك . الاغريق تم نقل التراث حقهم
وتترجم الى لغاتكم .
بس الغرب لم يتعرف علي حضارة الاغريق الا بعد مشوار
عبر الأندلس يا تمورتى العزيزة .
يعنى الشغل ده قام على نتايج الحضارة العربية فهمتى ؟
ولا فهمك كلو فلافل وزيت زيتون ؟
النهضة عربية يا بنت الحلال .
حصل قراتى كتاب موسم الهجرة الى الشمال ( للطيب صالح )
موجود فى أى ملف فى البلد دى .
وبرضو كتاب The Prophet ( لجبران )
وبرضو كتاب أمين الريحانى ( The Book Of Khalid )
البنت شديدة شدة الككو فى قصة وظيفة الوسيط العقارى دى وعندها بال طويل
للنقاش .
ونتابع .
|
Post: #5
Title: Re: نقاش مع شابة يهودية ما ناقشة حاجة
Author: Osman Musa
Date: 07-05-2010, 05:40 PM
Parent: #4
أنت أسمك MUSA ؟
نعم .
أقولك يا موشا . كتاب جبران The Prophet كتاب
ممتاز .
وحتى كتاب بربارة يونغ This Man From Lebanon المكتوب عن جبران .
.. بس اقوليك ...
ونتابع
|
Post: #6
Title: Re: نقاش مع شابة يهودية ما ناقشة حاجة
Author: خدر
Date: 07-05-2010, 07:08 PM
Parent: #5
والله يا ابن عمي الله يديك طولة البال ساي مع النوع ده
لاقاني كتير هنا . تعرف البيغيظ فيهم انو بقولوا كلامهم
عن جهل كبير جدا و بإيمان تام مع انو كتير من الحقائق
الغايبة عليهم موجودة في تراثهم و قرآنهم
الله يديك طولة البال قدر العندك و تحياتي لاسرتك الجميلة يا جميل
|
Post: #7
Title: Re: نقاش مع شابة يهودية ما ناقشة حاجة
Author: Osman Musa
Date: 07-05-2010, 09:49 PM
Parent: #6
خدر
الزول الفنان
سلامات يا أخوى ليك والأسرة الكريمة
وشايف المنتخب الهولندى معكلت و حالو ماشى .
والله يا أستاذ خدر
انا زعلان من كل السفارات الأفريقية والعربية فى الغرب .
الناس ديل شغالين تجديد جواز سفر بس .
يعنى هسع شوف زى البنت تمر دى سألتنى أكبر مساحة
السودان ولا جيبوتى ؟
هههههها
جيبوتى ؟
أنشاءالله يجيبوك للضبح .
ناس بتفهم بالناكوسى يا خدر .
تحياتى
|
Post: #8
Title: Re: نقاش مع شابة يهودية ما ناقشة حاجة
Author: Osman Musa
Date: 07-06-2010, 04:24 AM
Parent: #7
يا تمر
يا بنت الحلال .
أنتى مالك بتمشى وتانى ترجعى
لقصة عدم حضور العرب أدبيا وثقافيا فى حياة الأمريكيين ؟
كم عدد الأمريكيين العارفين جبران خليل جبران عربى
وبينتمى للثقافة العربية ؟
كم ؟
قليل .
قليل مش كدى ؟
نعم .
جبران يا عزيزتى اعتصر التراث العربى وأخرجه انجيلا جديدا يقرأ فى المعابد
والمحافل ومناسبات الزواج الأمريكية .
الحضور العربى يا تمر موجود بس أنتى أفتحى ذهنك .
.. أسمع يا MUSA أنا ده تلفونى ... بجى المطعم ده يوماتى .
بعد ما سألت عن نوع الزيت المستعمل للفلافل عرفتو زيت Canola Oil زيت كويس
ال Cholesterol Free .
.. اها ونتابع
|
Post: #9
Title: Re: نقاش مع شابة يهودية ما ناقشة حاجة
Author: Osman Musa
Date: 07-06-2010, 03:20 PM
Parent: #8
يا تمر يا عزيزتى
العربى والأفريقى فى هادى البلاد
حقو رأيح ساكت . يا تمر جبران خليل جبران
أنتج الكتير الكتير من الروائع فى أمريكا وبعد ده كلو
مافى عنو الا لوحة تذكارية مقتضبة الكتابة يا تمر . واللوحة لا يشاهدها
الا من يقصد ذلك قصدا . اللوحة توجد فى ركن فى حديقة بوسطن .
تمر زعلت فى كلامى .
وقالت : بس الرئيس بوش عمل أحتفال ضخم لجبران ووصف جبران بالفذ .
أنتم يا موسى كسلانيين . السفارات العربية والحكومات العربية لم تدعم
الفرصة .
الرئيس بوش اتاح لكم فرصة والفرصة ما وجدت مبادرات .
يا موسى الفرصة ديك كان ممكن تحسن الصورة .
( ونتابع ) يا أخى بعض كلام البنت يعجب _ نتابع
|
Post: #10
Title: Re: نقاش مع شابة يهودية ما ناقشة حاجة
Author: Osman Musa
Date: 07-07-2010, 00:00 AM
Parent: #9
يا موسى .
سمعت من حوالى 11 سنة
حديث فى الجامعة عن التفكير
فى قيام موسسات عربية أمريكية تعنى
بمن عاشوا فى أمريكا وأنتجوا فيها تراثا أدبيا .
نعم يا تمر .
وأنا سمعت بنفس الشىء .
وسمعت عن التفكير فى قيام معهد . الهدف
منه تحسين التفاهم بين الشرق والغرب . .
..
ونتابع
|
Post: #11
Title: Re: نقاش مع شابة يهودية ما ناقشة حاجة
Author: Osman Musa
Date: 07-12-2010, 00:39 AM
Parent: #1
نعود للنقاش فى مطعم الفلافل
|
Post: #13
Title: Re: نقاش مع شابة يهودية ما ناقشة حاجة
Author: rani
Date: 07-12-2010, 01:49 AM
Parent: #12
Quote: مدة الفيلم 18 دقيقة
مع ترجمة عربية
عن ذكر نبينا صلى الله عليه وسلم في التوراة
الرابط اضغط هنا
ويمكن تنزيل الفيلم على جهازك |
اوعكم تضغطو الرابط مفورس...
البضغط جهازو بيحصل امات طه..
|
Post: #14
Title: Re: نقاش مع شابة يهودية ما ناقشة حاجة
Author: اشرف السر
Date: 07-12-2010, 02:37 AM
Parent: #13
عذرا لدقسة المعلم اعلاه
هنا الرابط
من هنا رابط المشاهدة
|
Post: #15
Title: Re: نقاش مع شابة يهودية ما ناقشة حاجة
Author: rani
Date: 07-12-2010, 02:44 AM
Parent: #14
Quote: عذرا لدقسة المعلم اعلاه
هنا الرابط
|
عادي يا حبيب
ودي
|
Post: #16
Title: Re: نقاش مع شابة يهودية ما ناقشة حاجة
Author: اشرف السر
Date: 07-12-2010, 02:44 AM
Parent: #14
خالص اعتذاري للاخ راني
ولصاحب البوست
|
Post: #17
Title: Re: نقاش مع شابة يهودية ما ناقشة حاجة
Author: اشرف السر
Date: 07-12-2010, 02:46 AM
Parent: #16
مكرر
المخ تخين يا رامي
عذرا لصاحب البوست ولك
|
Post: #18
Title: Re: نقاش مع شابة يهودية ما ناقشة حاجة
Author: rani
Date: 07-12-2010, 02:46 AM
Parent: #16
Quote:
خالص اعتذاري للاخ راني
ولصاحب البوست
(عدل بواسطة اشرف السر on 12-07-2010, 01:50 ص) |
تسلم اشرف..
.
.
.
.
.
.
.
اعف لي
|
Post: #19
Title: Re: نقاش مع شابة يهودية ما ناقشة حاجة
Author: rani
Date: 07-12-2010, 02:48 AM
Parent: #18
Quote: مكرر
المخ تخين يا رامي
عذرا لصاحب البوست ولك
(عدل بواسطة اشرف السر on 12-07-2010, 01:52 ص)
(عدل بواسطة اشرف السر on 12-07-2010, 01:53 ص) |
وعذراً لكم ايضا يا حبيب
ودي
|
Post: #20
Title: Re: نقاش مع شابة يهودية ما ناقشة حاجة
Author: اشرف السر
Date: 07-12-2010, 03:00 AM
Parent: #19
هنا وردة لسارة
---
---
عثمان موسى
عذرا للخرمجة..
ولو كان في طريقة حذف كامل المداخلة لحذفتها....
ارجع بينا لمطعم الفلافل
|
Post: #21
Title: Re: نقاش مع شابة يهودية ما ناقشة حاجة
Author: rani
Date: 07-12-2010, 03:26 AM
Parent: #20
Quote:
هنا وردة لسارة
---
---
عثمان موسى
عذرا للخرمجة..
ولو كان في طريقة حذف كامل المداخلة لحذفتها....
ارجع بينا لمطعم الفلافل
(عدل بواسطة اشرف السر on 12-07-2010, 02:10 ص) |
ياحبيب ما لك عليك انت مدي الشغلة دي اكتر من حقها؟؟ عادي ياصديق.
وسارة بنيتي قبلت وردتك وقالت ليك نحن ( انا وامها) جايبنها الشهر البعد الجاي لندن ولو بقيت مااااك بعيد من لندن بنتقابل انشاء الله.
حبي و ودها
راني السماني
|
Post: #22
Title: Re: نقاش مع شابة يهودية ما ناقشة حاجة
Author: اشرف السر
Date: 07-12-2010, 03:36 AM
Parent: #21
خلاص يا راني دا اعتبرو وعد بالزيارة
انا واسرتي في ويلز - سوانزي-- سفرا في المملكة المتدة ما بعيد
|
|