هزيمة فى حلايب.. ضربات جزاء فى دارفور .. كرت احمر فى الجنوب ... والله يستر من الباقى

بلغة الايام دى المسيطر عليها الهوس بكاس العالم ولغة الاهداف وضربات الجزاء والكروت الحمراء عاوزين ننزل الكلام ده على الواقع السياسى فى بلدنا فى ظل حكومة الجبهة الاسلامية

طلعنا بالنتائج الاتية

1/ فى الماتش حق حلايب الفريق كان بيلعب بعدم انسجام ومن البداية نزل الى ارض الميدان وهو مضطرب وركبه سايبة وكل مرة يعاين لاثيوبيا وحسنى مبارك يبرق ليهم بعيونو . اها بعد الجهجهة فى الشوط الاول استسلم تيمنا فى الشوط التانى واصبحت شبكتنا مرتع للاهداف المصرية شئ مستشفيات وشئ مدارس وشئ خدمات مختلفة كلها فتحت فى حلايب لاغراء اهلنا الطيبين ولانه فريقنا لم يكن لديه كوتش محنك ولا روية واضحة اخدنا 4/ صفر زى حقة المانيا فى الارجنتين .

2/ اما فى الماتش التانى المدور فى استاد دارفور حدث ولا حرج فريقنا ( المقصود فريق حكومتنا ) نزل الملعب وكل همه انه يقع كسر فى الناس ديل بدون تفاهم لحدى ما تدخل الفيفا اقصد المجتمع الدولى وانتقلت المبارة الى ملعب ابوجا ومن ثم الى ملعب انجمينا مرورا بملعب القاهرة وطرابلس ثم اخيرا فى الملاعب المكندشة الباردة فى قطر والجماعة قالو نخليها من 10 اشواط طالما المكيفات الباردة دى شغالة المسعجلنا شنوا ولو المبارة ما اتحسمت فى الشوط العاشر نعمل ضربات جزاء والحشاش يملا شبكة التانى ويملا خشمنا نحن بالتراب .

3/ اما الماتش التالت فده شرحة يطول لكن نحاول نختصر بعد ما وافق الفريق اياه على شروط اللعبة قام خرخر وزمزغ لحدى ما الحكم ( غريشن ) اداه الكرت الاصفر وهدده بالكرت الاحمر وانه حا يشيل منه العدة وطبعا المدرب بتاع الفريق اياه كل شئ ولا يشيلو منه العدة لحدى هسع ماشى فى اللعبة كويس لكن اللعيبة المعاه ما عندهم لياقة ووقعو فى الجنوبيين لعب غير نضيف بلغة الفيفا لعب بتهور لذلك من المنتظر قريبا ان يشهر لهم الكرت الاحمر .

وبكده فى المباريات التلاته دى نكون انفضحنا فى المونديالات العالمية كلها .

اما فى مبارة الوضع الاقتصادى الراهن الواهن اترك لكم الاندياح

الماتش الاول بتاع حلايب الكوتش زمزغ وخرخر

واحتمال كبير يعيدوه

النقاش مسخن اليومين دى

لكن السؤال هل لو اعيد الماتش حكومتنا تستطيع ان تكسب ؟