عندما تكون الصلاة ازعاجا...!!!

" target="_blank">


رائعة ودالرضي


مثال للزوجة الصالحة والزوج الوفي



الرمية:
قالت وداع لي قلوبنا صاح .. اتبكمو الناس الفصاح
الجن صحا وجنو النصاح.. الجاهلة مي جاهلة نصاح
جات من تقوم ترعى الضنى.. الربرباي يا حسبنا
تــنت الكتيف في الانبنا.. الجاهلة يحفظا ربنا
قلت ليه رف قال لي بعيد لوكان قريب يوم الوعيد
قلت ليه درني اكون سعيد .. قال لي ولا في كل عيد
يا جميل حي .. الليلة هوي ليلنا




ست البيت


اريدا براها ترتاح...... روحي كل ما اطراها



قالت جارتا مجاوراها..... تجي شايله وتجي مزاوراها

تلحظ احتياجنا براها..... نشكر سعيها بي وراها

ربنا بالجمال كافاها..... لامن قال قواما كفاها

المسروره مي تافاها...... ياحلاة الكلام في فاها


راقيه سكوته من ميلادا..... مو سكاتاً تنوبو بلاده

نضيفه منظمين اولادا...... برضها عندي حلوه جلاده

تتلاصف سرور وجناتا....... الراقيه الكتار حسناتا

طيبة عشره مي غلاتا...... ماسابت الشباب لي بناتا

مابتحسب علي كليا........ تكرم كل منسوب لي

اطوع من بناني الي ......واشفق من جنايا علي


ماقالت بقيت حبوبه...... وتركت بوخته المحبوبه

لوجات من رياحا هبوبه.... بتحيي عروقك المهبوبه


ان صابحتها وماسيتا...... طاعمه وناعمه لومسيتا

ماقاستني ماقاسيتا....... وتشكر فضلي كل ماكسيتا


مي العزايه دايما ًساقده... ومي الغبشه المغبره حاده

مي اللهفانه بي ورا الماده... دي اللي شبابا ديمه مواده


فاضي البال حليللا جنابو....... مااتغضبن لمس اشنابو

ولا يوم سوء تفاهم نابو........ دي الامثالا نتغنابو

لو كان يوم حبيب واصلي .......الكرم العريض يوصلي

منها قط خلاف ماحصلي ..... ..بس ازعاجا لي قوم صلي

ليه ما أشكرا مطاوعاني....... وحافظه لمتعتي وحافظاني

حاويه من الانوثه معاني....... ومهما ابقى مر بالعاني

العزيز معاذ ،

تحياتي ..

كل ما تلاقيك غنية حقيبة سمحة شدييييييد ، وما تعرف سيده منو .. أسأل ، أكيد حيكون ود الرضي !

ود الرضي ده زول ما نصيح ، كلامو البكتبو ده ما كلام نصاح .. إبداع فايت الحدّ !

وبي المناسبة ،في الغنا البعد الحقيبة برضو لو لاقتك غنية بي نفس الوصف الفات ده ، تأكد إنو سيده عبد الرحمن الريح !

بجيك راجع ..

Quote: ود الرضي ده زول ما نصيح ، كلامو البكتبو ده ما كلام نصاح .. إبداع فايت الحدّ !

صدقت يابكري

والبيت ده يؤكد كلامك


الجن صحا وجنو النصاح.. الجاهلة مي جاهلة نصاح




شكرا
بانتظارك

والله دي من اروع ماسمعت..
من الاغاني القليله المابتقدم ولا تمل سماعها..
سمحه ساااي كده بدون تفصيل..


____
شكرا يا حبيب

تحياتي يا معاذ ،

انا عندي اعتقاد جازم بأن منطقة شرق النيل ( العيلفون ، أم ضوا بان ، الدبيبة ، قرى العسيلات ... ) هي منطقة قطع شك مسكونة بي الابداع ..
شوف معاي الشعراء والفنانين المن المناطق دي:

ود الرضي
الجاغريو
خلف الله حمد
مبارك حسن بركات
احمد المصطفى
سيد خليفة

وغيرهم !

كلهم تركوا بصمة في تاريخ الغنا في السودان.

بي المناسبة قصيدة ست البيت دي واحدة من عدة قصائد كتبها ود الرضي في زوجتو الثانية الحاجة ( بتول ) ، وبرضو كتب فيها القصيدة البيقول مطلعها :

المرنوعة ، زي شمس الغمام في طلوعه ..



ــــــــ

تعرف ود الرضي ده قالو كان بكتب الشعر حوالين سريرو وهو نايم ، وبيقوم الصباح حتى يدونو !

هسة ده زول نصيح !؟



ـــــــــــــــــــــــ
التعديل لتصحيح خطأ مطبعي في كلمة الدبيبة

Quote: والله دي من اروع ماسمعت.. من الاغاني القليله المابتقدم ولا تمل سماعها.. سمحه ساااي كده بدون تفصيل.. ____ شكرا يا حبيب

تسلم يانعيم

الفكرة الجديدة في القصيدة دي

انو الشاعر بغني

ل زوجته وام اولادو

وده ضد الفكرة بتاعت انو الرجل السوداني بخيل في عرض مشاعره لزوجته

Quote: تحياتي يا معاذ ، انا عندي اعتقاد جازم بأن منطقة شرق النيل ( العيلفون ، أم ضوا بان ، الدبّة ، قرى العسيلات ... ) هي منطقة قطع شك مسكونة بي الابداع .. شوف معاي الشعراء والفنانين المن المناطق دي: ود الرضي الجاغريو خلف الله حمد مبارك حسن بركات احمد المصطفى سيد خليفة وغيرهم !

سلام يا ود البكري

القرية اللي اتا قاصدها هي الدبيبة

اضافة لما ذكرتهم
يمكننا اضافة

ا.صلاح ابن البادية

وثنائي الدبيبة



فعلا منطقة زاخرة بالابداع

ولاتنسى ام ضوا بان ودورها في تعليم القران ونشره في سائر انحاء السودان

والجدير بالذكر ان ودالرضي

حفظ القران كاملا بخلاوي ام ضوا بان

Quote: بي المناسبة قصيدة ست البيت دي واحدة من عدة قصائد كتبها ود الرضي في زوجتو الثانية الحاجة ( بتول ) ، وبرضو كتب فيها القصيدة البيقول مطلعها : المرنوعة ، زي شمس الغمام في طلوعه ..

تسلم يا ود بكري

اليك النص

المرنوعة

المَرْنُوعَة زَىْ شَمْس الغَمَامْ فِى طِلُوعَه
إتْنَينْ

المَفْدُوعَة رُخْصَة وبَالوَضِيبْ مَرْدُوعَه
البَى سَنَاهَا مَى مَخْدُوعَة عِنْد الصَّالِحَاتْ مَودُوعَه
بَانَه وَبُرْتُكَانَه قُطَيْفَه مُهْرَة وَعَسْجَدَة وَخُشَيْفَه
تَابْرَه وَهَادْلَة فَاقْلَة وَهَيْفَا يَانُسَيْم الصَّبَا الفِى الصَّيْفَ
مَتْبُورَة الجِّدَلْ مَلْفُوفَه أنْعَمْ مِنْ قَطِيفَة كِفُوفَه
بِى الهَيْبَة أمْ عَفَافْ مَحْفُوفَه تَتَلَونْ بِلَونْ شَفُوفَه
كَالعِهْن النُفِشْ قَدَمَاهَا بَى مَسُّه الحَرِيرْ أدْمَاهَا
تُوبْ الحُسْنِ رَاقْ عَمَّاهَا مُرْنَاعَة الرِّدِفْ هَمَّاهَا
كَالمُوزَة المِوَرْشِلْ مَاهَا بَوَّظْ للِقِلُوبْ مَرْمَاهَا
حِصُونْ صَبْر العِبَادْ هَادْمَاهَا الصَّادَة النِّفُوسْ صَادْمَاهَا
جَلَّ الصَّانِعْ الرَّيَّاهَا هَفْهَفَه صَفِّى لُونْ زَيَّاهَا
هَدَّمَه ورَدَّمَه نَيَّاهَا إيَّاهَا الفَرِيدَة إيَّاهَا
نَاضِرْ لُونَه زَايْنَه الحِفْلَه هِىَّ المَاخْدَه كَاسْ الحَفْلَه
بِالرُّوعْ والرُّعُبْ مِكْتَفْلَه دِى البَيهَا البِدَايَة وَقَفْلَه
شُوفْ لَيكْ يَا حَبِيبِى طِفَيلَه رَاسَه مِوَسِّدَاهو كِفَيلَه
نَاصْلَه الكَتْفْ مِنْ سِنْ فِيلَه شَرَفْ الأمَّهّاتْ تَنْفِيلَه
غَاصَّة وقَاضِى بَصْبَاصْ عَينَه والفَاطِرْ برَيقْ العَينَه
تَمْشِى الرَّنْعَه مِنْ دِرْعَينَه قَاصْدَه هَلاَكْنَا الله يَعِينَه
تَتْرَنَّعْ تَفَنِّنْ دَيرَه فُوقْ للعَيبَه جَادْعَه بِدَيرَه
زَىْ المُوجْ تَلاَعْبُه إسْمَ الله عَلَيكْ يَا بِدَيرَه



اتنين: رقم اثنين وهو يعادل في الحروف الهجائية حرف الباء ،وهي بتول زوجة الشاعر

رحم الله ود الرضي

وغفر للمتعجلين


الم تسمع بالمدح بما يشيه الذم ؟



ود الرضي تجد النفس الديني في كل قصائده وتشبعه بروح الصوفيه

فقد نهل شرابا صافيا من معين اهله

شكرا جزيلا

Quote: ود الرضي تجد النفس الديني في كل قصائده وتشبعه بروح الصوفيه فقد نهل شرابا صافيا من معين اهله

تسلم
ود الخليفة

الامثلة كثيرة اذكر منها

من قصيدة احرموني ولاتحرموني...سنة الاسلام السلام

البيت الاخير

من تعاطى المكروه عمدا ..غير شك يتعاطى الحرام

Quote: ماقالت بقيت حبوبه...... وتركت بوخته المحبوبه لوجات من رياحا هبوبه.... بتحيي عروقك المهبوبه

إنا لله !

إستفتاح جيد لي ربع جديد يا دكتور

ازيك تاني يا معاذ

قصيده احرموني ولا تحرموني ممكن نشوف فيها الاثر الديني لود الرضي من مطلعها

سنه الاسلام السلام مرورا بالبيت البقول فيه لو معنعن قول كلموني


والعنعنه احدي مصطلحات علم حديث والمقصود بها علي ما اظن اتصال السند عن فلان عن فلان والله اعلم


وفي دعائه

ربي اغفر للعكروني



والصوره في البيت ادناه واضحه واشاراته في اجمل تعبير


ما تنفس صبح او ضحالي الا غاب هدهد فكري ووحالي



والقصيده طويله وجميله

Quote: إنا لله ! إستفتاح جيد لي ربع جديد يا دكتور

تسلم

ود ابارو


امسك دي وصلة(جرح)..

الطابق البوخة
قام ندي يهتف
نام من الدوخة
إيُدو عَاقباهُو
الجدّلة مَمْلوخة
لي معالق الجوفْ
مُوسُو مْجلوُخة

حاشية:الوصلة او الجرح هي الزوادة في المطاعم الشعبية
ومرات بتكون اكتر من الطلب الرئيسي(اته وحنكك)..

Quote: ما تنفس صبح او ضحالي الا غاب هدهد فكري ووحالي والقصيده طويله وجميله ]

والله ياود الخليفة مبالغة عدييل

تنفس الصبح

الضحى

غياب الهدهد

الوحي
فعلا الانسان ابن بيئته(وحفظه للقران واضح في كتاباته)

شكرا للتحليل الجميل

معاذ ،

شكرا على التصحيح والذي حدث نتيجة خطأ مطبعي .

تمّ التعديل.

شكراً يامعاذ ولك الف تبركات وسوف يجزيك الله خيراً ان منحت حياتنا اوراقاً في خريف الحقيبة بعد
ان شبعت تصحراً وجفافا.انها قصيدة صدق ووفاء رائع لزوجة أروع . رويت هذه القصيدة بصدق عال
وعوفيت من تلزف ونفاق. فطوبي لك وطوبي لكل اهل الكلمة والطيب .

Quote: انها قصيدة صدق ووفاء رائع لزوجة أروع . رويت هذه القصيدة بصدق عال وعوفيت من تلزف ونفاق. فطوبي لك وطوبي لكل اهل الكلمة والطيب .

تسلم يا ابراهيم

هي كما ذكرت فعلا

Quote: اطوع من بناني الي ......واشفق من جنايا علي

دكتور معاذ الهادي
تحياتي

Quote: عندما تكون الصلاة ازعاجا.

بوستيك دا من يوم نزولو هنا وانا
اعاين ليهو واضحك وامشي واجيهو راجع
وما قادر افتحو اتحسست منو شوية في شان العنوان جنني في راسي دا
ولكني الان وجدت نفسي امام لوحات ادخلتني في حالة سكر ولا ولا سكرا ترى
وزادت حيرتي في العنوان
يظهر انه اعمق مما تتحسسه قشرة فاخورتي التي بدأت تشيخ

Quote: بوستيك دا من يوم نزولو هنا وانا اعاين ليهو واضحك وامشي واجيهو راجع وما قادر افتحو اتحسست منو شوية في شان العنوان جنني في راسي دا ولكني الان وجدت نفسي امام لوحات ادخلتني في حالة سكر ولا ولا سكرا ترى وزادت حيرتي في العنوان يظهر انه اعمق مما تتحسسه قشرة فاخورتي التي بدأت تشيخ

ودبوش سعيد برؤيتك هنا

البيت الذي اوردته

اعاين ليهو واضحك وامشي واجيهو راجع
من قصيدة ود الرضي الشهيرة انا في التمني

الذي احاول ان اتناول بعض ابداعاته في هذا البوست

اليك كامل القصيدة


أنا في التمني

ود الرضي

::::::::::

أنـا فــي التمـنـي ديـمـه هديـلـي سـاجـع
مـا لقيـت لـي مغيـث ولا لقيـت لـي مـراجـع
******
داير أشوف حبيبي اليوم داك .. شفته رايق ودمعه ناقع
أسـود شعـرو حالـك .. أمــا صـفـاره فـاقـع
تتلاصـف خــدودو .. لا حـجـاب ولا بـراقـع
أشوف لعسـو ونواعسـو .. جـل البـاري صانـع
أشوف في خدو شخصي .. وفي صـدري المضـارع
******
يفـر خيـت بسمـه يشبـه .. برقـا ً ليلـو هاجـع
يرفـع لـي رشاشـو .. يسـبـل نـظـره واقــع
دايـر أشوفـو غافـل .. ودايـر أشوفـو جــاذع
يتغطـى بـي سواعـدو .. ويحنـو كأنـه واجــع
ويلتجـى بـى مرافقـو .. وأطــراف المضـاجـع
وتتلـب فــوق شفاهـهـو .. لـؤلـؤة المـدامـع
يـردد لـي نغيمـا ً .. تشـتـاق لــه المسـامـع
******
أعاين فيهو وأضحـك .. وأجـري وأجيهـو راجـع
أقيـس بالليـل شعـرو .. ألقـى الفـرق شـاسـع
أقيـس الفـم بودعـة .. الـقـى الــودع واســع
ده مـا بيلقـاهـو زول .. زي انا صـيـدو نـاجـع

Quote: دي مـا بلقـاهـا زولا .. زي انا صـيـدو نـاجـع

الأخ معاذ

سلام

ممكن نجدع معاكم يد..



أنة المجروح
كلمات : سيد عبد العزيز
الحان : الحاج محمد أحمد سرور

يا أنة المجروح يا الروح حياتي تروح
الحب فيك يا جميل معني الجمال مشروح
للحب لهيب فى الجوف زيو الزناد مقدوح
منه الجبابرة تلين لصوت بلابل الدوح
تصاحبو النسمات تفضل معاها تدوح
من نغمة الأشواق ومحاسن الممدوح
الناس تحب رؤياك بالخاطر المشروح
يا ملفت الأنظار يابسمة المفروح
حوريه فى السودان بحبى ليكى أبوح
عنب جناين النيل أتمنى منه صبوح
وانشد فؤادى الضال بين الرياض مذبوح
أرى الهلال فى ظلال تلك الخميلة يلوح
أنا لو ضمنتو رضاك اكون سعيد ممنوح
يا من تسر رؤياك تفرح تنسى النوح
تكسو النهار بجمال خديك جمال ووضوح
منو الغزالة تقف فى موقف المفضوح
من الوله للقاك دمعى العزيز مسفوح
ناقم على الأيام مع أنه طبعى صفوح
انا والخيال فى جدال وانت بنداك منفوح