أرشح الماتدور الأسباني للفوز بكأس العالم ..

وأتوقع خروج البرازيل من الدور ربع النهائي ..
ملاحظة :
هذا البوست هو بديل لبوست بديل (الإتنين ضاعو في حق الأرشفة).
يتبع.......

واتوقع وصول منتخبات كل من أسبانيا وأوروجواي وهولندا و(الأرجنتين أو ألمانيا ) لنصف النهائي
فيما يلتقي في النهائي أسبانيا بالفائز من الأرجنتين أو ألمانيا ..
ولكن لا أستبعد وصول البرازيل لنصف النهائي لتكون مكان هولندا إلا أنني لا أتوقعها في النهائي ..
يتبع ........

اتوقع خروج المانيا
بعد ملاقاتها الارجنتين
ومقابله اسبانيا والارجنتين في النهائي

Quote: اتوقع خروج المانيا بعد ملاقاتها الارجنتين ومقابله اسبانيا والارجنتين في النهائي

معقولة جدا والله يا دوما
وشاكرين المرور والمشاركة .

المعروف أن المنتخبات الثمانية المتأهلة لربع النهائي هي :
هولندا - ألمانيا - اسبانيا - البرازيل - الأرجنتين - باراغواي - غانا - أوروغواي
يتبع .........

وستبدأ مباريات دور الثمانية بعد غد الجمعة بلقاء هولندا والبرازيل وأتوقع أن بفاجىء منتخب
الكرة الشاملة السامبا البرازيلية ليخرج أبطال العالم من المونديال الأفريقي ..
لكن هذا يظل مجرد إحتمال لا يتخطي نسبة 50% بالنظر لخبرة و(حظ) المنتخب البرازيلي والذي سبق له
وأن خرج من هذه المرحلة ( ربع النهائي) ثلاث مرات في أعوام 54 و86 و2006 ، فيما خرج مرتين
من الدور الثاني في أعوام 82 و90 وثلاث مرات من الدور الأول في أعوام 30 و34 و1966 ..
يتبع .......

وسيلتقي أيضا في نفس اليوم أوروجواي وغانا ..
اتمني بالطبع الفوز لمنتخب النجوم السوداء ولكن أتوقع العكس فمنتخب أورغواي المشارك عشر مرات
في كأس العالم والفائز باللقب مرتين 1930 و 1950 ورغم انه تأهل لهذه النهائيات عن طريق
الملحق إلا أنه فرض وجوده بجنوب أفريقيا مستعيدا الكثير من بريقه وهيبته العالمية ومقدما
عروضا كروية قوية أكدت عزمه على إستعادة مجده الهارب منذ حصوله على لقب البطولة قبل ستة
عقود من الزمان .
أما أحبابنا ممثلو القارة السمراء فحتما يتطلعون لتكرار مشاهد مونديال 2006 عندما قلبوا
الطاولة على الرؤوس وحجزوا لأنفسهم مكانا ضمن أقوياء دور الستة عشر بعد عروضا مثيرة قبل
أن يحطم البرازيليون أحلامهم بالفوز عليهم بثلاثية نظيفة أسقطتهم من ثمن النهائي بعد أن
رفعوا رؤوس الأفارقة عاليا حينذاك رغم أنهم يشاركون لأول مرة في النهائيات العالمية .
اتوفع للنجوم السوداء لمعانا أخاذا أمام الأورجواي لكن أعتقد ان الخبرة سترجح كفة الأخير
لتقوده لنصف النهائي.

المباراة الثالثة المقررة يوم السبت تجمع الأرجنتين وألمانيا وهما يملكان نفس الحظوظ للتأهل
للدور قبل النهائي من المونديال العالمي لكن اتوقع أن ينجح أخوان ليونيل ميسي وجونزالو هيجوين
في تعطيل الماكينات الألمانية وإبعادها من هذا الدور خاصة وأن أسطورة الكرة العالمية دييغو أرماندو
ماردونا الحاصل مع منتخب بلاده على الكأس العالمية 86 يحلم بتحقيق إنجاز نظيره فرانز بكنباور
الذي حصل مع منتخب ألمانيا على اللقب كلاعب ومدرب ، ومع الوضع في الإعتبار حداثة تجربة ماردونا
كمدرب إلا أن قائمة منتخب التانجو التى تضم عناصر طيبة من اللاعبين الخبرة والشباب قادرة على إحداث الفارق.
أما المنتخب الألماني فقد جاء إلى جوهانسبيرج بطموحات تحقيق اللقب للمرة الرابعة في تاريخه بعد
ان صعد منصات التتويج العالمية ثلاث مرات من قبل في سويسرا عام 54 وعلى أرضه عام 74 وفي إيطاليا
عام 1990 .
والحقيقة أن الألمان بقيادة المدرب يواكيم لوف يملكون الإمكانات والمقومات التى تؤهلهم للحصول
على اللقب العالمي لكن أعتقد انهم سيعانون كثيرا في مواجهة طموحات شباب التانجو والتى ربما
قذفت بأمانيهم ووضعت حدا لطموحاتهم ليكون الدور ربع النهائي هو المحطة الأخيرة لهم .

المباراة الرابعة في ربع نهائي المونديال تجمع الماتادور الأسباني بنظيره باراجواي وهي
مبارة تعتبر سهلة إلى حد ما بالنسبة للثور الأسباني رغم الشراسة المعلومة لمنتخب الباراغواي
بيد أن منتخب أسبانيا الذي لم يتخلف عن كأس العالم منذ بطولة ألمانيا في عام 1974 ظهر بطريقة
متميزة جدا في التصفيات وإستطاع ان يفوز في جميع مبارياته العشر ليحصل على لقب أفضل خط هجوم
وأقوي خط دفاع ، وذلك أمر طبيعي كونه يمتلك قائمة منسجمةوبدلاء في مستوي الأساسيين بقيادة إيكر
كاسياس أحد أفضل حراس المرمي في العالم وروح الفريق تشابي هرنانديز، فضلا عن الثنائي الرهيب
دافيد فيا، وفرناندو توريس .
من جهته فإن منتخب الباراجواي المشارك للمرة الرابعة على التوالي في المونديال العالمي يأمل
في الذهاب بعيدا في مونديال جنوب أفريقيا بقيادة مدربه الأرجنتيني خيراردو مارتينو ، لكنه حتما
سيواجه عقبة عاتية جدا لا أعتقد أنه بمقدوره تخطيها إلا إذا مارست كرة القدم جنونها وحدثت عن إحدي
معجزاتها ، وهذا ليس تقليلا من شان هذا الفريق الذي إستطاع وللمرة الأولى منذ إقرار نظام التصفيات
الحالي من تجاوز حاجز 30 نقطة بحصولها على 33 نقطة من عشرة انتصارات ، لكن واقع الحال والمعطيات
الماثلة ترجح كثيرا من كفة منافسه الأسباني المرشح للفوز باللقب .

خلاص قمت تنظّر

يا عمّك ...

إذا ما تأهلت البرازيل لنصف النهائي فإنها ستواجه الفائز من أروجواي × غانا ...

وهذا يعني أنها ستصل بنسبة كبيرة إلى النهائي ...

بمعنى من استبعدتها من النهائي هي أقرب فريق للوصول ....

ولا تستهين بالبراغواي أمام إسبانيا ... الفرق اللاتينية عندما تتقابل ضد بعض طعمها برا ...

يعني زي راجل المره !!!



دمت بود ،،،

يا صبري طه سلامات
صدقني صغب على البرازيل تخطى ربع النهائي وأصعب منه بالنسبة لها الوصول للنهائي
البرازيل ليس البرازيل التى نعرف ، فضلا عن تعطش بقية المنتخبات لمعانقة ذهب المونديال
ما يضاعف من صعوبة مهمة السامبا هذه المرة .
تحتاج البرازيل لجهود كبيرة وحظ وافر جدا لبلوغ مراميها بالحصول على الكأس للمرة الخامسة
في تاريخها .
بالنسبة للماتادور الأسباني فهو يعيش أفضل أيامه من إستقرار كامل في التشكيلة إلى جانب معنويات
عالية بعد الوصول لمرحلة ربع النهائي ولا أعتقد ان الثور الأسباني سيفرط هذه المرة في فرصة
الصعود لمنصات التتويج .
واهو كلو توقعات يا عمك .

Quote: خلاص قمت تنظّر

اها عيب لى التظير بس ..

الاخ طلحة

سلام من الله عليك

لماذا استبعدت غانا من هذه الإحتمالات

فالبرغم من اننى أميل الى أن الكأس فى هذه المرة سيذهب الى الأرجنتين كما قال أخونا حيدر قاسم

إلا أننى أعتبر أن كاس العالم مجنون فى هذا العام و لذلك أرجح و أتمنى أن نجد غانا فى المبارأة النهائية

فمبارأتها القادمة ربما تكون ساهلة و إن تأهلت ستدخل مبارأة دور الأربعة بروح إيطاليا حينما أقصت البرازيل فى 82 و نالت الكأس رغم أن فريقها لم يكن أفضل الفرق فى ذلك الزمن

Quote: وأتوقع أن بفاجىء منتخب الكرة الشاملة السامبا البرازيلية ليخرج أبطال العالم من المونديال الأفريقي ..

مريخابي و بتشجع ضد البرازيل ؟ بعد ده يا طلحه ما فضل ليك إلا شراب السجاير !!

Quote: مريخابي و بتشجع ضد البرازيل ؟ بعد ده يا طلحه ما فضل ليك إلا شراب السجاير

أصلهم المريخاب كده ما بيعترفوا بالأسياد

و دائما بحللوا حسب أمنياتهم.

يعني هسع المريخ الان إيه فرقو من مريخ 2009 طيش افريقيا؟
بدل ما يعترفوا إنو تسجيل النفطى لم يحل مشكلة المريخ الاساسية وهي الدفاع، هللوا و كبروا لتصدرهم الدورة الاولي من الدوري العام و ظنوا انهم سوف يقدرون على سيد البلد بالرغم من ان فريق الهلال هو نفسه الذي أذاقهم الهزيمة المنكراء في موقعة 11 سبتمبر.

منذ متى هولندا بتقدر على البرازيل؟


البرازيل دائما جاهزة للموجهات الكبرى ، إذا سقطت يكون عامل الجظ فقط. أما من ناحية ترشيح فإن البرازيل سوف تلحق بإسبانبا الهزيمة الاولى لها و تخرجها.
دونقا يلعب بنفس إسلوب 1994 عندما كان كابتن الفريق الذي نال الكأس و مبدأه الاول هو انضباط الدفاع لذلك لم يجد اي هجمات إلا نادرة ضده.


النهائي : البرازيل ضد المانيا

الكأس للبرازيل

البرازيل ضد الارجنتين

والكاس برازيلى ويمكن غانا تعمل مفاجاة وتفوز بكاس العالم

طلحة سلام عليكم
توقعاتك منطقية وموضوعية, لكن ظلمت منتخب السامبا

Quote: صدقني صغب على البرازيل تخطى ربع النهائي وأصعب منه بالنسبة لها الوصول للنهائي البرازيل ليس البرازيل التى نعرف

صحيح ان البرازيل بقيادة دونقا لاتلعب بنفس طرق لعب جميع المنتخبات البرازيلية السابقة تحت قيادة افذاذ من المدربين السابقين ,والمتابع لمنتخب السامبا قد يصيبه الضجر من غياب ايقاعات السامبا واستعراض المهارات الفردية المدهشة .. وهذا هو لسان حال معظم البرازيليين وخاصة قدامى لاعبي المنتخب فى العهود السابقة.
ولكن فى كاس العالم 2002 م (كوريا / اليابان) بقيادة اسكولاري لم يقدم المنتخب البرازيلي نفس الاداء الاستعراضى ويركز على الهجوم متناسيا الدفاع ( عملاً بمبدأ اذ سجل احدهم هدفاً فسنرد بهدفين ) وهي قاعدة اضاعت كأس العالم فى اسبانيا على اعظم منتخب للبرازيل بعد منتخب 1970م فى التشكيلة التي ضمت سقراط وفالكاو وزيكو وإيدر وسيرجينهو وبقية العقد الذهبي ..بل قدم اسكولاري فى 2002م منتخباً متوازنا واخضع مهارات رونالدينهو ورونالدو وريفالدو لصالح تحقيق الفوز وكان له ما اراد وحمل منتخب السامبا الكأس حينها.
ودونقا فى رايي نجح فى جعل المنتخب الرازيلي يلعب لتحقيق النتيجة بغض النظر عن جماليات الاداء والدليل فوز البرازيل فى 34 مباراة متواصلة تحت قيادته.
ولهذا اعتقد ان النهائي سيكون بين البرازيل و اسبانيا باعتبار ان الفائز فى مباراة الارجنتين والمانيا سيكون متهالكا وفاقدا لجزء كبير من قدراته ولياقة لاعبيه لان مباراتهما ستكون اصعب بكثير وتحتاج لمجهود خرافى من الطرفين للفوز بنقاط المباراة.
ويوم الجمعة والسبت سنعرف
لك ودي

إسماعيل سلامات يا أستاذ

Quote: صحيح ان البرازيل بقيادة دونقا لاتلعب بنفس طرق لعب جميع المنتخبات البرازيلية السابقة تحت قيادة افذاذ من المدربين السابقين ,والمتابع لمنتخب السامبا قد يصيبه الضجر من غياب ايقاعات السامبا واستعراض المهارات الفردية المدهشة .. وهذا هو لسان حال معظم البرازيليين وخاصة قدامى لاعبي المنتخب فى العهود السابقة. ولكن فى كاس العالم 2002 م (كوريا / اليابان) بقيادة اسكولاري لم يقدم المنتخب البرازيلي نفس الاداء الاستعراضى ويركز على الهجوم متناسيا الدفاع ( عملاً بمبدأ اذ سجل احدهم هدفاً فسنرد بهدفين ) وهي قاعدة اضاعت كأس العالم فى اسبانيا على اعظم منتخب للبرازيل بعد منتخب 1970م فى التشكيلة التي ضمت سقراط وفالكاو وزيكو وإيدر وسيرجينهو وبقية العقد الذهبي ..بل قدم اسكولاري فى 2002م منتخباً متوازنا واخضع مهارات رونالدينهو ورونالدو وريفالدو لصالح تحقيق الفوز وكان له ما اراد وحمل منتخب السامبا الكأس حينها. ودونقا فى رايي نجح فى جعل المنتخب الرازيلي يلعب لتحقيق النتيجة بغض النظر عن جماليات الاداء والدليل فوز البرازيل فى 34 مباراة متواصلة تحت قيادته. ولهذا اعتقد ان النهائي سيكون بين البرازيل و اسبانيا باعتبار ان الفائز فى مباراة الارجنتين والمانيا سيكون متهالكا وفاقدا لجزء كبير من قدراته ولياقة لاعبيه لان مباراتهما ستكون اصعب بكثير وتحتاج لمجهود خرافى من الطرفين للفوز بنقاط المباراة.

كلام مقنع ودقيق جدا حتى ولو لم يتحقق في النهاية
لا تعليق لانو بصراحة ما خليت لي فرقة ..
لكن اتمسك فقط بترشيحي للماتادور بطلا للعالم

.

Quote: مريخابي و بتشجع ضد البرازيل ؟ بعد ده يا طلحه ما فضل ليك إلا شراب السجاير

مريخابي دا كان زمان
وما بشجع ضد البرازيل دي مجرد توقعات وليست امنيات
أما شراب السجاير فدي حاصلة أصلا .
وانتا عامل كيف يا امين ..؟

سلامات يا حيدر بشير
ربما كان للخبرة دورها في تغييب منتخب النجوم السوداء من نصف نهائي البطولة العالمية
في ظل وجود منتخبات عريقة ومتمرسة وتعرف جيدا مسالك ودروب المنافسة عندما تدخل مراحلها
الأخيرة .
ما فعلته غانا بوصولها لهذه المرحلة من المونديال هو بلا شك فخر لكل الأفارقة حتى ولو خرجت
من ربع النهائي ، والحقيقة أن المنتخب الغاني أثبت جدارته وعلو كعبه وسط المنتخبات العالمية
الكبيرة وكان خير ممثل للقارة السمراء من خلال ما قدمه في مراحل البطولة المختلفة .

سلام يا طلحه:
في واحد من بوستاتك السابق كتبت ليك انو الفرق الاوربيه لا تفوز بكاس العالم خارج اوربا ولا اعتقد انو المره دي حيكون استثناء
البرازيل لو تخطت هولندا الكاس حقها بنسبه تزيد علي ال 90%. طبعاالسيناريو البرازيل وهولندا مكرر للمره التالته في نفس الدور والمرتين السابقتين الغلبه كانت للبرازيل لكن بعد طلوع الروح ووحده فيهم بركلات الترجيح. عشان كده البرازيل لو تخطت هولندا فهي بنسبه 100% حتلعب النهائي لانو لا غانا ولا الاورغواي عندهم القدره يوقفوها واذا وصلت النهائي 90% حتشيل الكاس
لو لاقت الارجنتين, الارجنتين لا تستطيع هزيمه البرازيل في النهائيات (كوبا امريكا 2003 و2007 وكاس العالم للقرات 2005) احدث امثله لو لاقت اسبانيا او المانيا, الفرق الاوربيه لا تفوز بالكاس خارج اوربا

عمار يسن النور
سلامات
قلت أنو المريخاب بحللو حسب امنياتهم
أنا حاليا ما مريخابي والمريخ طاير في السماء

اها رايك شنو في تحليلي دا بعيد عن أنو انا مريخابي .؟

سنادة سلامات
توقعاتك معقولة برضو

Quote: في واحد من بوستاتك السابق كتبت ليك انو الفرق الاوربيه لا تفوز بكاس العالم خارج اوربا ولا اعتقد انو المره دي حيكون استثناء البرازيل لو تخطت هولندا الكاس حقها بنسبه تزيد علي ال 90%. طبعاالسيناريو البرازيل وهولندا مكرر للمره التالته في نفس الدور والمرتين السابقتين الغلبه كانت للبرازيل لكن بعد طلوع الروح ووحده فيهم بركلات الترجيح. عشان كده البرازيل لو تخطت هولندا فهي بنسبه 100% حتلعب النهائي لانو لا غانا ولا الاورغواي عندهم القدره يوقفوها واذا وصلت النهائي 90% حتشيل الكاس لو لاقت الارجنتين, الارجنتين لا تستطيع هزيمه البرازيل في النهائيات (كوبا امريكا 2003 و2007 وكاس العالم للقرات 2005) احدث امثله لو لاقت اسبانيا او المانيا, الفرق الاوربيه لا تفوز بالكاس خارج اوربا

سلامات يا بوب
وكلامك صحيح من الناحية النظرية كون ان المنتخبات الأوربية لا تفوز خارج أوربا
ولكن أعتقد ان الثور الأسباني سيكون له رأيا مختلفا هذه المرة من واقع معطيات عديدة
أهمها الوضع الفني الممتاز الذي يعيشه المنتخب الأسباني مقارنة ببقية المنتخبات
كما ان المنتخب المرشح للفوز باللقب العالمي وهو البرازيل ليس هو منتخب السامبا
الذي نعرفه والقادر على إبتداع خطط وطرق لعب جديدة في كل مباراة ما يجعل أسلوبه تحت
مجهر الخصوم لاعداد الترياق المضاد له وأري أن منتخبات مثل هولندا وأسبانيا قادرة على
التعامل مع الأسلوب البرازيلي كونها تمتلك لاعبين أقوياء بدن وعقل .
عموما لا أستبعد كليا وجود البرازيل رغم توقعاتي لها بالخروج من ربع النهائي
لكنني مصر على ان أسبانيا ستصعد منصات التتويج هذه المرة .

......
يتبع ...

Quote: وأتوقع خروج البرازيل من الدور ربع النهائي ..

وهو ما حصل ليلة أمس حيث راحت البرازيل ضحية لأنانية مدربها دونقا الذي تعامل
بفوقية مع الهولنديين وهو يعتمد أسلوبه البدائي في التعامل مع مثل هذه المباريات الكبيرة
وأما منتخب إشتهر بمرونته في إرتجال الخطط والخطط البديلة إثناء سير اللعب .
بحت دونقا عن مجده الشحصي منذ بداية مونديال جنوب أفريقيا ليسجل إسمه ثاني مدرب يحصل على
كأس العالم كلاعب ومدرب مثلما فعل فرانز بكنباور مع ألمانيا من قبل ، ولكنه بدلا من ذلك سجل
أسمه ضمن القلائل الذين فشلوا في الوصول مع السامبا البرازيلية صاحبة السحر الكروي الإستثنائي
لنصف نهائي المونديال الذي ناله من قبل وأربع مرات .

Quote: واتوقع وصول منتخبات كل من أسبانيا وأوروجواي وهولندا و(الأرجنتين أو ألمانيا ) لنصف النهائي

وقد صدقت التوقعات بنسبة 5% حيث وصلت هولندا على حساب البرازيل وأوروجواي على حساب غانا
ولم يتبق إلا أسبانيا والأرجنتين او ألمانيا لتصدق التوقعات تماما فيما يخص نصف النهائي في إنتظار
وصول الماتادور الأسباني للنهائي وحصوله على اللقب الذي أصبح قريبا منه.

يتبع ...........

وإذا قابلت أسبانيا الأرجنتين في نصف النهائي فأنها ستتغلب عليه لتلاقي الفائز من هولندا والأوروجواي
في النهائي لتكون مهمتها أسهل في الحصول على الكأس العالمي .
يتبع .......

يا سلام يا طلحة

والله كلامك صدق تماما

البرازيل خزلتنا

لكن يا رب يا رب المانيا تزعمط الارجنتين

كلام القصير يا خليل
كلام القصير أبوي *
















*الحقوق في الحفظ والصون يا جرجرة .

طلحة تحياتي

Quote: بحت دونقا عن مجده الشحصي منذ بداية مونديال جنوب أفريقيا ليسجل إسمه ثاني مدرب يحصل على كأس العالم كلاعب ومدرب مثلما فعل فرانز بكنباور مع ألمانيا من قبل

الصحيح أنه كان يبحث كثالث مدرب بعد زيجالو 1970 مع البرازيل كمدرب و لاعب في عام 1958 و بكنباور 1974 و 1990

دونقا كان يبحث كثاني لاعب كابتن (1994) و مدرب مثل بكانبور 1974 كابين و 1990 مدرب.

شكرا يا عمار يس وهاردلك خروج البرازيل التى راحت ضحية رجفة دونقا .

الماتدور قريبك طلع محظوظ يا طلحه ، ما كان مفروض يمرقو سالمين الليله، أمر الله غلب بس !! !!

Quote: واتوقع وصول منتخبات كل من أسبانيا وأوروجواي وهولندا و(الأرجنتين أو ألمانيا ) لنصف النهائي

وقد صدقت توقعات نصف النهائي بتفاصيلها الدقيقة .
ولم يتبق إلا هذا :

Quote: أرشح الماتادور الأسباني للفوز بكأس العالم ..

يتبع ....

سلامات يا أمين

Quote: الماتدور قريبك طلع محظوظ يا طلحه ، ما كان مفروض يمرقو سالمين الليله، أمر الله غلب بس !! !!

الصحيح أنو ناس البارغواي ديل ناس عكاليت شديد جدا وهي سمة متوفرة في منتخبات واندية أمريكا الجنوبية
بسبب اللياقة البدنية العالية التى لا يضاهيهم فيها إلا منتخبات شرق آسيا ذوي العيون الدقيقة كاليابان وكوريا
للدرجة التى جعلت أحد المدربين الكبار في العالم ( لا أستحضر أسمه ) يصرح بقوله أنه إذا درب منتخب تتوفر فيه مهارات
البرازيليين وقوة الألمان ولياقة البارغواي والأوروجواي لإحتكر كل بطولات العالم .
لا أبالغ يا أمين إذا قلت ليك أنو العقبة الكبيرة في طريق الأسبان لمنصات التتويج العالمية قد إنزاحت بتخطي
هذا الفريق العكليت عكلتة مبالغ فيها .
......................
كفارة للبرازيل ياخ وصراحة كأس العالم بلاها مسيخ ولكن خروجا كان متوقع لمعطيات وأسباب كثيرة .

أما الثور الأسباني مهمة صعبة جدا تتمثل في تعطيل الماكينات الألمانية في الطريق
إلى نهائي البطولة لمقابلة الفائز من أورجواي وهولندا ..
يراودني إحساس بأن الأوروجواي ستطيح بحلم الطواحين الهولندية لتقابل أسبانيا في
النهائي .

Quote: يراودني إحساس بأن الأوروجواي ستطيح بحلم الطواحين الهولندية لتقابل أسبانيا في النهائي .

يا طلحة

طبعا المانيا مطب ابن ستين جزمة لاسبانيا في كاس العالم ومعظم فرق اوربا تتقعد من المانيا

ولكن مستوي اسبانيا فعلا يوهلها ان تكون بطلة العالم

تحياتى استاذ طلحة النهائى بين المتادور الاسبانى والطواحين الهولندية والكاس لاسبانية

Quote: أرشح الماتدور الأسباني للفوز بكأس العالم ..

الحبيب طلحة تحياتي
نصيحة للأسبان انهم يبلوا راسهم عشان الحلاقة تكون ساهلة وما تجيب ليها جرّيح ..
الآلمان ديل اصلي ما بريد كورتم وما بدورم كلو كلو لكن بي طريقتم الشايفا دي
الله يستر على الاسبان بالجد .. وطبعا الالمان اكتر المنتخبات فرحاً بخروج اسياد
العالم لان البرازيل هي المنتخب الوحيد البخوّف الالمان وبزعمطم في كل المناسبات
فخروج السيلساو كان بردا وسلاما على الالمان ومهّد لهم الطريق تماما لنيل البطولة
وهم احتفلوا بها فور خروج ابطال السامبا على يد الهولنديين النحس ديل ..
النهائي المانيا وارجواي .. وكلوزة بعد نهاية المباراة النهائية حا يكون عمل 17 هدف متزعما
هدافي كؤوس العالم ومتوجاً منتخب المانشافت ببطولة مونديال افريقيا .


التحايا لغانا .. ولو احرز جيان ضربة الجزاء كان حا يكون افضل مهاجمي المونديال .. لكنه الحظ التعيييييييييس .


تحياتي للجميع واعمل حسابك من توقعات خليل ده ..

Quote: نصيحة للأسبان انهم يبلوا راسهم عشان الحلاقة تكون ساهلة وما تجيب ليها جرّيح .. الآلمان ديل اصلي ما بريد كورتم وما بدورم كلو كلو

اسه يا امير يا ولدي الناس ديل كورتهم عيبها شنو؟؟؟!!
والله لعبوا كوره تمام بس نصيبتهم مع السودانيين يعزو فيها
الالمان ديل ناس تمام لووووووووول ما تجاملوني حبه يا اخي

Quote: نصيحة للأسبان انهم يبلوا راسهم عشان الحلاقة تكون ساهلة وما تجيب ليها جرّيح .. الآلمان ديل اصلي ما بريد كورتم وما بدورم كلو كلو لكن بي طريقتم الشايفا دي الله يستر على الاسبان بالجد .. وطبعا الالمان اكتر المنتخبات فرحاً بخروج اسياد العالم لان البرازيل هي المنتخب الوحيد البخوّف الالمان وبزعمطم في كل المناسبات فخروج السيلساو كان بردا وسلاما على الالمان ومهّد لهم الطريق تماما لنيل البطولة وهم احتفلوا بها فور خروج ابطال السامبا على يد الهولنديين النحس ديل .. النهائي المانيا وارجواي .. وكلوزة بعد نهاية المباراة النهائية حا يكون عمل 17 هدف متزعما هدافي كؤوس العالم ومتوجاً منتخب المانشافت ببطولة مونديال افريقيا .

هلا يا أمير
الكلام دا كان ممكن يكون مليون في المية لو كانت ألمانيا دي حتلاقي فرنسا أو بلجيكا أو واحد
من المنتخبات البتتعامل مع المباريات الكبيرة بخوف وتحفظ يجعلها في دوامة من الإرتباك
على مستوي جميع الخطوط بما ينتج عنه الاخطاء التى يجيد الألمان استثمارها على خير نسق مثلما
فعلوا مع الأرجنتين حيث فأجأوهم بهدف مبكر أربك حساباتهم وجعلهم يندفعون بكلياتهم لتعديل
النتيجة ما أحدث فراغات واسعة إستفاد منها زملاء كلوزة في الهجمات المرتدة ليضاعفوا غلة
اهدافهم مثني وثلاث ورباع .
بالنسبة للأسبان فالوضع يختلف تماما ففضلا عن الخيارات المتاحة لمدربهم لاعتماد الخطة والتشكيلة
المثالية للمباراة بسبب وفرة البدلاء فلاعبي المنتخب الأسباني بقيادة الحارس الأمين كاسياس كل واحد
فيهم نجم في موقعه وبارع في أداء مهامه ويبحث عن التألق ولفت الأنظاء بأداء واجبه المنوط به كأفضل ما يكون .
وربما ساعدت رباعية ألمانيا في الأرجنتين منتخب أسبانيا على فرض أفضليته كون ان الألمان سيدخلون
اللقاء وهم اكثر ثقة بما يمكن أن يقلل كثيرا من نسبة التركيز التى كانوا عليها أمام التانجو
والأسبان لا يقلون مهارة في إستغلال والإستفادة من اخطاء خصومهم وترجمتها لمصلحتهم .
عموما المباراة تعتبر ديربي أوربي كبير وفي مثل هذه الديربيات فالغلبة تكون لأقلهم أخطاء وأكثرهم
إستفادة من الفرص والسوانح المتاحة .
وإذا وضعنا في الإعتبار أن اللياقة البدنية والقدرات المهارية لصالح الثور الأسباني فأن نسبة فوز
هذا الأخير ترتفع إلى ما فوق ال60% .
والله أعلم طبعا.

هلا يا سنادة

Quote: النهائى بين المتادور الاسبانى والطواحين الهولندية والكاس لاسبانية

ودا توقع منطقي ومعقول جدا وإن كنت شامي لي ريحة اوروجواي في النهائي مع أسبانيا
والماتادور شايل الكاس شايلو.

يا خليل صحيح ما قلته بخصوص العقبة الألمانية لكن الأسبان ما بغلبوا حيلة في تعطيل المكنات الألمانية
وبعدين الأوربيين ديل بعرفوا بعض كويس .

أخونا العزيز طلحة

لك التحية

يظهر انه معالم الطريق اتضحت و الماكينة الألمانية لن تتوقف حتى تتوج بكاس العالم فى هذا العام

قول ربنا يستر و ما تلحق اسبانيا الانجليز و الارجنتين و تاخد الاربعة الحايمة فى جنوب افريقيا دى

الجماعة ديل عندهم سرعة خيالية خاصة فى الهجمات المرتدة و يمتازون باللعب الضاغط على حامل الكرة و يجيدون الضربات الراسية

و تفكيرهم كله منحصر فى تسجيل الاهداف مستفيدين مما قاله كارلوس البرتو فى نهائيات امريكا حينما قال جئنا للكس و لا مجال للفنيات و المهارات

ووظف لذلك روماريو فكان كل تركيزه على المرمى و نالوا بها الكأس

الألمان ما بيرجعوا بغير الكأس و على اسبانيا البحث عن الترتيب الثالث

Quote: الألمان ما بيرجعوا بغير الكأس و على اسبانيا البحث عن الترتيب الثالث

يعني ح يسكنوا في جوها يا حيدر بشير ..؟
مالازم يرجعوا كان بالكأس كان بدونا ..
غايتو ترشيحاتك جايز تصيب لكن ما أعتقد .

والله يا طلحة لو اسبانيا بتاعتك شالت الكأس..
نبني ليك قبة في البشاقرة جنب المشرع..

Quote: والله يا طلحة لو اسبانيا بتاعتك شالت الكأس.. نبني ليك قبة في البشاقرة جنب المشرع..

يا أيمن أنت منو .؟؟؟؟؟؟؟
عارفك متنكر ..

وبعدين يا أيمن اخوك ما عايزلو قبة
كفاية قبة جدو أرباب العقائد
شفت كيف ..
غايتو انت من :
البشاقرة ذاتا لكن متنكر ( دا ما أسمك)
البشاقرة شرق
التكينة
فضل
التكلة
عديد البشاقرة
والفوق ديل كلهم بشملن البراري وإمتداد ناصر وام درمان .
وإحتمال تكون زميل مرحلة من المراحل
دراسة او عمل
وإحتمال آخر
كنت بتلعب كورة وردمتك أو ردمتني ذات مباراة دافوري .

لا هذا ولا ذاك ولا أي شيء مما ذكرت..
ياخي انت ذاكرتك بقت خربانة شديد..
أكلت معاك لقيمات في زقاق الرأي العام لما قلت كفى..
وضربت معاك بوش في مطعم الفول باللفة بتاعت السفارة..

على كل.. أحتفظ بعلاقات مميزة مع مجموعة طيبة من أهل البشاقرة..
ناس عمك الطيب حمد بتاع الأراضي، وعلم الهدي الطيب..
وعبداللطيف وأبوعبيدة وطارق (أقرباء عمك الطيب حمد)..

بعدين ياطلحة مالك وقفت عند التكلة..
أمشي على مدني شوية..
الترابي والكسمبر والحليلة وكلكول
والكاملين والعبدلاب وود الماجدي وأم دقرسي وأبوعشر..
أنا غايتو في واحد من ديل..

المهم ما نطلع من الموضوع..
الكأس بين ألمانيا واسبانيا..

والله شكلنا بنجهز الطوب للقبة..

Quote: أكلت معاك لقيمات في زقاق الرأي العام لما قلت كفى.. وضربت معاك بوش في مطعم الفول باللفة بتاعت السفارة..

فعلا والله يا أمين أكلت لقيمات أكل شديد في زقاق الرأي العام
يا حليل ناس خالتي حواء والاخت عشة والمرحومة خادم الله ربنا يدخلا جناتو ويعوضا شبابا.
بس يا أيمن لو إتفضلت على بمزيد التوضيح والتفصيل عشان أتذكرك أكتر تكون ما قصرت
لأنو زي ما قلت الذاكرة خربانة خراب شديد خلاص .

Quote: أحتفظ بعلاقات مميزة مع مجموعة طيبة من أهل البشاقرة.. ناس عمك الطيب حمد بتاع الأراضي، وعلم الهدي الطيب.. وعبداللطيف وأبوعبيدة وطارق (أقرباء عمك الطيب حمد)..

أنا من البشاقرة غرب يا أيمن
والجماعة الفوق ديل كلهم من البشاقرة شرق على ما اعتقد لانو ما فيهم
زول من غرب .
لكن المحيرني عرفت كيف القبة والمشرع والتفاصيل الما بعرفا إلا زول بلد دي .؟؟؟
عموما ليك التحية والشوق العظيم يا زول .

طلحة تنظير وحقوق تنظير محفوظة لود البشرى عشان ما يجى واحد يطلعنا حرامية فى اواخر عمرنا > لووووووووووووووووووولا

شوف يا تنظير انا بعد الارجنتين و البرازيل اتخارجوا بفيت فراجه سااااكت


لكن فعلا بتمنى لقاء اسبانيا و هولندا فى النهائى
لانهما فريقان كبار و لم يحقق اى منهما كاس
العالم من قبل .............

وترشيحى و امنياتى لاسبانيا اكبر
لسبب بسيط ما لاقى لى حتة عشان
اتعاطف بيها مع الالمان ديل رغم انهم ناس زعماطين > زعمطة حقوقها محفوظة لود الصائم > لووووووووووووووووووووووووولا
+ الاسبان عندهم لاعبين من العيار التقيل


بس ربك يستر ما تتشلفط ويشمت فينا ود البشرى > لوووووووووووووووووووووولا

:
:
:
اخيرا انا وانت بنشجع فريق واااحد > دنيا و طحنية بالزلابية يا طلوح > لووووووووووووووولا

طلحة هات ايميلك..
انا جهزت ليك رسالة طويلة أسه برسلا ليك..

هاك يا أيمن دياب
[email protected]

هلا يا كوتش طارق

Quote: لوووووووووووووووووووووولا

لووووووووووووووووووووووووولا لو عندك حاجة قووووووووووووووووولا
أو كما قلنا ساعة سمر تحت القمر (ههههههه)
اها تشجيعك لأسبانيا إن شاء الله يكون فاتحة خير وبداية طريق صحيح لتشجيع الفريق الصاح ( أبو الهل ليس نموذجا).
وبعدين صاحبك جرجير دا زول مليان بالحسادة وأشارطك أنو لابد للبوست دا من أول يوم إنفتح فيهو
ومستني بس واحدة من الترشيحات الفوق دي تجلي عشان يجىء ناطي هنا يجر ويمط ويتمج مج في الكلام
لكن خاب فالو الأسود وظلت التوقعات تتحقق بالمسطرة والكربون .( ناس كأس العالم ديل شافنها مني أكيد)
وبعد دا كلو وبدل يلبد منزويا في خجلو نط من الشباك يكورك الصدفة والحظ وكراع الورل .
أها ومن هذا البوست أعلنا ليهو وللكل أنو حتى ولو ما فازت أسبانيا بالكأس فيكفيني وصولي لنصف
النهائي بالنمرة الكاملة... (ما جلت ولا حتة ترشيحايا واحدة)
وليتزعمط من في قلبه حسد .

راجع الايميل ياطلحة.. ومنتظرنك

روجع يا أيمن وتم التنفيذ .

بالمناسبة ترشيحاتى فى بوست كيكى كانت كلها صحيحة
فقط جلت الارجنتين لانى كنت اشجع منك ووثقة فى مارادونا و الشجاعة تطير يا تنظير

هولندا
اوراقواى
اسبانيا كانت ترشيحاتى و خزلتنى الارجنتين







ياخ > انيستا + تشافى > ديل نجاااااااااضة ومتعة يعلم الله
تعرف تشافى فى مباراة دور ال 16 لاول مرة فى العالم
ومنذو اختراع كرة القدم يستلم الكرة 176 و يمررها كلها صحيحة >
بمعدل نص دقيقة تقريبا ........... بالجد اسبانيا قوية من حيث النجوم
لكن الالمان تكتيكهم عالى جدا

مباراة اسبانيا و المانيا هو النهائى الحقيقى لكاس العالم

وياريت الناس تشوفها بعيون محايده مع ميول قليلة حسب العشق عشان تستمتع > لانو التعاطف الكتير احيانا بقلل من المتعة


تحياتى

>

Quote: >

دا شنو أسّي ؟

<

Quote: دا شنو أسّي ؟

شربوت كبكبي
الظاهر انو لفة البقرة الوالدة هسع ما جابت نتيجة
أيه رأيك في ناقة سعرانة ..؟

العزيز طلحه والمتداخلين الأعزاء
أولا أرجع بيكم شويه لي كلام الخاله دومه، وإنو الناس حقو تجاملها وبالتالي تجاملني والكثير من بورداب ألمانيا
بالرغم من أن ألمانيا لا تعتبر بلاد هجرة مثل أمريكيا وكندا، إلا أنه لأول مرة في تاريخ ألمانيا، يتدافع المهاجرين عامة وخاصة ذوي الأصول الإفريقية والتركية لتشجيع الفريق الألماني، والإحساس لأول مرة بأن الفريق الألماني يعبر عن فسيفساء المجتمع الألماني والمهاجرين بنوعيهما (الجيل الثالث والأجيال الأولى).
الواقع الذي أفرزته التشكيلة الأخيرة للمنتخب الألماني إستطاع أن يؤسس لشراكة حقيقية حول مفهوم الوطن الذي تذوب فيه الفواصل العنصرية، ويتحد فيه الإنتماء للوطن المبني على المصالح المتبادلة، أو هذا على الأقل ما تحلم به الجموع المهاجرة بخلفياتها المتنوعة.
فلأول مرة في تأريخ المنتخب الألماني، يتواجد ضمن تشكيلته أحد عشر من ذوي الأصول المهاجرة، بل يدخل على الأقل خمسة من هؤلاء ضمن التشكيلة الرئيسية (الأحد عشر لاعبا) وهم كالتالي:-
* ميروسلاف كلوزه أصوله بولندية
* لوكاس بودولسكي أصوله بولندية
* جيرمي بواتينغ أصوله غانية
* سامي خضيره أصوله تونسية
* مسعود أوزيل أصوله تركية
وأيضا
* كاكاو وأصوله برازيلية
* ماريو قوميز وأصوله إسبانية
* سردار تاسكي أصوله تركية
* ماركو مارين أصوله بوسنية
* دينيس آوقو أصوله نيجيرية
* بيوتر تروخوفسكي أصوله بولندية

عموما في إعتقادي أن فوز ألمانيا وبهذه التشكيلة بكأس العالم الحالي سيكون منعطفا تأريخيا، يمثل من خلاله ضربة موجعة لليمين المتطرف، وبالتالي تعلو الأصوات المنادية بإقصاء العنصرية والعنصريين، كما سيرتفع إحساس الإنتماء عند أغلبية ساحقة من المهاجرين، وبالتالي تزول إحدى العقبات الرئيسية في وجه الإندماج الإيجابي.

إذا ما نرجوه منكم أخي طاحه وضيوفك الكرام أن تقفوا بقلوبكم مع هذا الفريق الشاب الذي لا يلعب فقط بإسم ألمانيا القديمة، بل بإسم ألمانيا المستقبل

على الأقل ياخي إسبانيا دي ما فيها أي اضان زرقا ياخي

Quote: اسبانيا و المانيا هو النهائى الحقيقى لكاس العالم

فعلا يا كوتش ونظام القرعة حجم كثيرا من متعة النهائي
الألمان أذكياء في تنفيذ التكتيك لكن المطلوب منهم التركيز طوال زمن المباراة
لأن أي خطأ مع الأسبان سيكلفهم خروجا تراجيديا.
على الألمان الحرص على أن تصل المباراة لركلات الترجيح فربما وقف الحظ إلى جانبهم .

الأخ طلحه عبدالله وضيوفه

الكأس ألماني بحسب المعادله الجاتني في الأميل دي

Quote: This world cup is already determined by the numbers.... 1. Brazil won the World Cup in 1994; before that they also won in 1970.Adding1970 + 1994= 3964 2. Argentina won its last World Cup in 1986; before that they also won in 1978. Adding 1978 + 1986= 3964 3. Germany won its last World Cup in 1990; before that they also won in 1974. Adding 1974 + 1990= 3964 4. Brazil also won the World Cup in 2002; before that they also won in 1962. Adding 1962+ 2002= 3964 5. Therefore if you want to know what nation is going to win the World Cup in 2010, you only have to subtract 2010 from the magic number that we have determined: 3964.3964 minus 2010 = 1954... In 1954 the World Cup was won by Germany!!! Probably not scientific.. . but pretty interesting.

معقولة بس يا فدياس
يعني لو أسبانيا جابت أقوان ما بحسبوها ليها واللا ح تنسحب من البداية
ويعتبروا ألمانيا فائزة واللا الاسبان ح يدخلوا أقوان في نفسم واللا الح
يحصل شنو بالضبط .؟
عموما لأرقامهم ترشيحاتا ولنا ترشيحاتنا.

العزيز كمال حسن
شكرا للمرور والإضافة الدسمة لمادة البوست وأرجو لأهلك الألمان التوفيق والسداد
وبالمناسبة ترشيحي لأسبانيا لا يعني تشجيعي لها وهي توقعات صابت أو خابت .
عموما ألمانيا أو أسبانيا أو هولندا فكلو عندنا صابون أوربي .
الخوف تعملا الأوروجواي .
لك التحية والود .

العزيز طلحة
حسب مشاهدتي للمباريات أعتقد أن فريق اسبانيا هو الأفضل ، لذا سيفوز بالكأس.

تحياتي

عزيزي جعفر

Quote: حسب مشاهدتي للمباريات أعتقد أن فريق اسبانيا هو الأفضل ، لذا سيفوز بالكأس.

دا بالضبط المقياس اللي رشحنا بي موجبو الماتادور
شكرا للمرور الكريم .

Quote: وبالمناسبة ترشيحي لأسبانيا لا يعني تشجيعي لها وهي توقعات صابت أو خابت .

حي أنا
ما قلت متعشّي رجلة

Quote: حي أنا ما قلت متعشّي رجلة

Quote: حي أنا ما قلت متعشّي رجلة

الجن الكلكي

فخامة الدكتور أمين محمد سليمان
أشكر لك تواضعك النبيل بالتواجد في دياري
لك كامل الود وتحية معطرة برائحة الفل .
( أصلو في بت إسمها ياسمين أدتني شاكوش فبقيت معقد من حكاية الياسمين دي )

Quote: الألمان أذكياء في تنفيذ التكتيك لكن المطلوب منهم التركيز طوال زمن المباراة لأن أي خطأ مع الأسبان سيكلفهم خروجا تراجيديا. على الألمان الحرص على أن تصل المباراة لركلات الترجيح فربما وقف الحظ إلى جانبهم .

وقد فشل الألمان في الوصول لركلات الترجيح وتعطلت ماكيناتهم في الوقت الأصلي للمباراة بل
و أنقذهم حظهم من هزيمة ساحقة قياسا على الفرص العديدة التى أضاعها الماتادور الأسباني
خاصة في الحصة الثانية من المقابلة الراقية فنيا وتنظيميا وتكتيكي .
اخلال الشوط الثاني لعب المنتخب الألماني بأسلوب دفاعي بحت معتمدا على الهجمات المرتدة والتى
تعامل معها الدفاع الأسباني ومن خلفه العملاق كاسياس بيقظة وفدائية لكنهم ( أي الألمان) لم
ينجحوا في إنهاء المباراة بالتعادل الذي كانوا ينشدوه كما وضح من خلال تنظيمهم في الحصة
الثانية وهو ذكاء من المدرب الألماني الذي أقلقه الهجوم الأسباني الكاسح فلجأ لإحكام منطقته
الدفاعية وتمويت اللعب في أحايين كثيرة إلا أن الضغوط الأسبانية الكبيرة وجهودهم الواضحة في
الوصول للمرمي أثمرت عن هدف رأسي كفل للماتادور الذهاب للنهائي حيث سيلاقي الطاحونة الهولندية
يوم الأحد المقبل .

***********


التنظير لتق يا مان .... فضل سنت واحد ولا أقول ليكم حاجة اسبانيا وهولندا ديل كلهم صعبين
لكن قطع شك اسبانيا تخلى ليك هولندا دى طير طير .... وتدقها ليك دقة عيش .....والنشوف اخرتا



**********

Quote: التنظير لتق يا مان

قصدك الترشيح يا بصيلي
شكرا للمرور والمتابعة .

T&T
عندي لستة ترشيحات ممكن ارسل ليك وتوريني الحيفوز منو؟؟



ـــــــــــــــــــــــــــــــــــ

بقيت لي زي الاخطبوط الجابو في الاخبار والبيختار الفائز في كل مباراة

سارة علي
ما عندك أشكال طب
بس أبعديني من ود عمك ( ود البشري ) الحاقد الحاسد الكريه العواليق المجرجراتي دا .

طلعت اخطبوط خالص يا طلحة ...

نشوف يوم 11 حيحصل شنو ...











... المهم ....

اكان اسبانيا فازت حاتغابا ليك فيهو العرفة زي الما حصل شئ..
بس اتوصى لي بي لستتي دي ..


ــــــــــــــــــــ
ود عمي , عاد الغاية تبرر الوسيلة وكلك فهم ..

يا تبارك
أنا حفيد ناسا ما هينين
وبعد شوية ح أسخط ليك ناس ود البشري ديل .

يا سارة ما عندك قشة مرة
بس عايزك تقولي لجرجير اللعيم الحقود الحسود الزفتوت
الترشيحات دي علم وخبرة وقراءة ذكية موش ضربو رمي ساي
وبالمرة قولي ليهو قوم لف كدا واللا كدا لفتك ك ل ب ة جيرانكم .

الفرق بين طلحه و الأخطبوط بول إنو طلحه بيحلل المباره قبل ما تبدا حتي يديك النتيجه !!!
--------------------------
(هولندتنا ) يا البشري هي أخر خط دفاع ليك ، لانو لو أسبانيا زعمطتنا : إنت أخير تضاير !!!

Quote: الفرق بين طلحه و الأخطبوط بول إنو طلحه بيحلل المباره قبل ما تبدا حتي يديك النتيجه !!!

حتى يقرأ من هم على شاكلة جرجير أب تفكيرا فطير
شكرا فخامة الدكتور

Quote: الترشيحات دي علم وخبرة وقراءة ذكية موش ضربو رمي ساي

بالله يا تنظير ما تخوتنا ساي
صدقت معاك زيّك وزي أي اخطبوط
ما تستغل الصدفة المحضة و كجّاجين أون لاين الناشدناهم يرفعوا ايديهم من المانيا بس ما بسمعوا الكلام
وتعمل فيها الود خطير ومحلل فاهم

سرور ...

Quote: ود عمي , عاد الغاية تبرر الوسيلة وكلك فهم

متفهّم مافي مشكلة
لكن نصيحة أخوية ليك , اخير تثقي في أي أخطبوط حايم من تثقي في تنظيرات تنظير لأنهابالإضافة لكونها صدفة و احتمال ضعيف انها تلفق كل مرة
فهي مليئة بالتنظير و الحشو و الفارغة المملة الفاقعة للمرارة

د.أمين ...(الواحد حاسي بروحو مزوراتي مزوراتي كدا)

Quote: الفرق بين طلحه و الأخطبوط بول إنو طلحه بيحلل المباره قبل ما تبدا حتي يديك النتيجه

الفرق بين تنظير والأخطبوط إنو الأخير بديك النتيجة من سكات و يتيسّر أهلو
طلحة تنظير بملاك فقر و تنظير ما امكن قبل الترشيح
و يملاك فقر و تنظير و يفقع مرارتك لو لفقت معاه

Quote: الفرق بين تنظير والأخطبوط إنو الأخير بديك النتيجة من سكات و يتيسّر أهلو

وهل تنبأ الأخطبوط بخروج البرازيل من ربع النهائي ..؟؟
هل رشح الاربعة المتأهلين لنصف النهائي ..؟
هل رشح المتادور للفوز بكأس العالم قبل بداية دور الثمانية ..؟
وقد قيل في المقام :
عين الحسود فيها عود
قال مصدر خبير مطلع :
وايم الله أنه جرجرة
وكان مكوعا فقمز وظل يرددها حتى قلنا ليته قالها مرارا وتكرارا .

Quote: أنا حفيد ناسا ما هينين

يمين ياطلحة أمس بالليل كلو أفتش في تلفونك عايز اتصل عليك..
ياخي الحفيد غلب الجدود.. ونحنا دفعنا عربون الطوب عشان نبني ليك القبة
في المشرع مقابل النيل.. ويا شيخ طلحة تلحقنا..


بعيداً عن أي هظار: طلعت زول شاطر وتحليلك مبني على علم وفهم..
لو اسبانيا فازت بالكأس.. كلنا بنطلب من بكري يخلي البوست ده أربعة سنين..
لحدي كأس العالم 2014 في البرازيل..!!

Quote: يمين ياطلحة أمس بالليل كلو أفتش في تلفونك عايز اتصل عليك.. ياخي الحفيد غلب الجدود.. ونحنا دفعنا عربون الطوب عشان نبني ليك القبة في المشرع مقابل النيل.. ويا شيخ طلحة تلحقنا.. بعيداً عن أي هظار: طلعت زول شاطر وتحليلك مبني على علم وفهم.. لو اسبانيا فازت بالكأس.. كلنا بنطلب من بكري يخلي البوست ده أربعة سنين.. لحدي كأس العالم 2014 في البرازيل..!!

وانا ح أعلق الشهادة وسام على صدري لمية سنة يا أيمن العزيز
وتلفوني في إيميلك .

طلحة الخبير بتاعي
يا زول رسل عنوانكـ نرسل ليكـ البياض
بيني وبينكـ كنت خايف من ( الكجَة)
عشان كدي جيت متأخر

سلامات يا عمران
وبدون بياض حاجتك مقضية طب بإذن الله ..
حيييييييييييييي

Quote: حيييييييييييييي

حسي في داعي للإحراج ده ؟؟

يا طلحة
الأنطون قال يساعدوه بالشوت في الزوايا محل يرِك الطير

وناس إسبانيا بفنياتهم العالية ما بقصِروا

يا طلحه

والله من زمان شايف البوست ده

واقول ياخي الزول ده بهترش ساكت

لكن لمن حصل الحصل وناس دوما ادوهم بكعب الكداره

قالت اخش اشوف الحاصل شنو

والله ياكا الفيهم

ياخي ما تجي نلعب توتو كوره ؟؟؟

..
.

انت كجور ولا فكى

------
كجيتنا يا طلحة

Quote: الأنطون قال يساعدوه بالشوت في الزوايا محل يرِك الطير وناس إسبانيا بفنياتهم العالية ما بقصِروا

إتا عارف يا جعفر
زمان أيام المريخ ضارب الهلال تمانية مرات على التوالي
واحد من الهلالاب قال الناس ديل عاملين كجور ولازم نشوف ليهم طريقة
قام مشي فتش ليهو فكي كارب جابو ، اها قام عزم الجماعة شاي لبن
في المغرب ومعاهم الفكي .
وأثناء ما بشربوا في الشاي قام قال للفكي عليك الله أقنع لي الجماعة
ديل بحركة حركتين عشان يآمنوا .
الفكي طوالي قام شال شاي اللبن وسيييييت جر اللبن وخلى الشاي سادة
أحمر .
الجماعة نططوا عيونم وبحلقوا في الحركة العجيبة دي ..
اها الفكي التفت لأقرب زول جنبو وقال ليهو :
وه مالو تعاين لي كدا والله كان ما مصدقاني أسي ناكلي كوباية نخلي
شاي واخف براخو الله ورخبتو .( اخلي الشاي واقف براهو الله ورقبتو)

Quote: والله من زمان شايف البوست ده واقول ياخي الزول ده بهترش ساكت لكن لمن حصل الحصل وناس دوما ادوهم بكعب الكداره قالت اخش اشوف الحاصل شنو والله ياكا الفيهم ياخي ما تجي نلعب توتو كوره ؟؟؟

يا طارق ميرغني
القلنا وصدق كتير لكن الجماعة الهنا ديل مستجهلني حسادة ساي ..
دحين إن عندك حاجة معصلجة عليك وعايزة الفك زورنا في المسيد
وما بناخد بياض .. لله ساي ..
بس ختيني البورة وعرق المحبة والذي منو .

سلامات يا تبلدينا

Quote: انت كجور ولا فكى

حسب متطلبات المرحلة وظرف الحاجة
مرات بكون فكي جاري سبحة اللالوبة ومرات بكون كجور طالق بخورو

فوق حتى يتألم المجرجراتي الحسود ود البشري أكثر وأكثر ..

Quote: ما تستغل الصدفة المحضة و كجّاجين أون لاين الناشدناهم يرفعوا ايديهم من المانيا بس ما بسمعوا الكلام وتعمل فيها الود خطير ومحلل فاهم

هسع ياود البشرى ماكان اخير تعترفوا بمقدرات طلحة وتعينوه بدل ميشو?
اهو برضو ودعمكم وبراعى ظروفكم.

Quote: هسع ياود البشرى ماكان اخير تعترفوا بمقدرات طلحة وتعينوه بدل ميشو?

مقدرات شنو يا فاضلابي الله يرضى عليك!!!
طيب ما نجيب الأخطبوط أريح وأوفر وما بنظّر

حقيقة تحليل لا يحتاج الى تعليق خاصة و أنه قد تنبأ بهذا السيناريو قبل بداية التصفيات فى الربع السابق

شكرآ لك على هذا الجهد المقدر

إحم
بغم
يتبع ......

يا طلحة

رايك شنو في كلام الاخطبوط بوول دا

قال الكاس هولندي

سلامات يا خلي

Quote: رايك شنو في كلام الاخطبوط بوول دا

هذا هو ردي لكيكي هناك :
أنه من المؤسف والله أن يكون إن يكون إهتمامك وضيوفك بمخلوق ممسوخ مسخوط
يتبع بطنه لإختيار المنتخبات الفائزة فيتبعه الحظ حيث توقع ، فيما يبدأ يقينكم
بالتصدع فيما يشبه التشكيك بالمقدرات والإمكانات التحليلية وبعد النظر فيمن صابت
توقعاته وترشيحاته وتحققت بالمسطرة والكربون من قبل أن تبدأ التصفيات المونديالية
هذا البوست أرشح الماتدور الأسباني للفوز بكأس العالم .. .. مكتوب
قبل ان يعرف البورداب هذا الكائن الرخو المدعو بول (ياله من إسم نجس) وعليه
أطالب سيدي الرئيس بكري أبو بكر تعليقه اعلأ المنبر ليكون شاهدا على المقدرات
الرهيبة التى يتمتع بها أحد بوردابه (رغم انف المدعو جرجير المعروف بود البشري)
وذلك حتى ولو تحقق معجزة هذا القرن و لم يفز الماتادور بالكأس العالمية .
أتحدي مخلوقكم سلالة أشعب الأكول هذا بلا بول بلا أم فت فت .

Quote: حقيقة تحليل لا يحتاج الى تعليق خاصة و أنه قد تنبأ بهذا السيناريو قبل بداية التصفيات فى الربع السابق شكرآ لك على هذا الجهد المقدر

وشكرا ليك انت يا حيدر بشير وربنا يخليك لقولة الحق
ولا نامت الأعين الحاسدة الساخطة التى لا تري غير الباطل (.... جير نموذجا)

Quote: أتحدي مخلوقكم سلالة أشعب الأكول هذا بلا بول بلا أم فت فت .

يا طلوح

جات اخبارية تاني من cnn

انه بول قد رشح اسبانيا

بختك يا طلحة ممكن تتجدع تاني اربعة سنين

لكن شوف موضوع دور الترضية

ما عائزين كاس دور الثمانية بس

يا أبو الخل
ما تبقوا طماعين كمان
أي توقعات تاني إلا بالكأش ..

Quote: مقدرات شنو يا فاضلابي الله يرضى عليك!!! طيب ما نجيب الأخطبوط أريح وأوفر وما بنظّر

عين الحسود فيها عود
وعين جرجير فيها طن مسامير

أتمني أن يلتفت الريس بكري أبو بكر لهذا البوست ليعلقه اعلي المنبر ..
تضامنا مع صديقي جرجير المعروف هنا بود البشري والذي تنبأ بأن صاحب
البوست سيندرع فيهو اذا فازت أسبانيا بالكأس ..
أعتقد أن صاحب البوست سيندرع في المجرجراتي الحقود ود البشري حتى ولو
لم تفز اسبانيا بكأس العالم لأنه يكفي فقط أن الترشيح شمل أيضا خروج
البرازيل من ربع النهائي فضلا عن ترشيح منتخبات نصف النهائي وقد صدقت جميع
هذه التوقعات ولم يتبق إلا صعود مروضي الثيران لمنصات التتويج العالمية والذي
أصبح قريبا جدا .
لهذا وذاك أرجو من الباشمهندس تعليق البوست عاليا..
يتبع ...

Quote: حتى ولو لم تفز اسبانيا بكأس العالم

دا نظام خط رجعة من اسي ولاّ شنو؟
ما عامل واثق من ترشيحك وقرايتك, عشان تعرف الحكاية ما اكتر شختك بختك وصدقت معاك ساي
زيّك وزي أي أخطبوط دني أكل مما يليه

ثم تعال هنا يا تنظير
دي مش المداخلة التانية في البوست دا

Quote: واتوقع وصول منتخبات كل من أسبانيا وأوروجواي وهولندا و(الأرجنتين أو ألمانيا ) لنصف النهائي فيما يلتقي في النهائي أسبانيا بالفائز من الأرجنتين أو ألمانيا .. ولكن لا أستبعد وصول البرازيل لنصف النهائي لتكون مكان هولندا إلا أنني لا أتوقعها في النهائي ..

دي فاتت عليك كيف؟
اقتنعت انها محض شختك بختك لا تستاعل الضجة و السكليب العاملو و الح تعملو

وإذا كان الكائن الرخو الاخطبوط المدعو بول أصبح حديث كل العالم ومحط إهتمام
وسائل الاعلام والقنوات الفضائية لمجرد أن ترشيحاته صدقت مرة ومرتين فلماذا
لا ينال هذا الإهتمام بوردابي من سودانيز أون لاين وهو الذي بدأت ترشيحاته
وتوقعاته حتى قبل بداية التصفيات وتحققت بالمسطرة والكربون حتى لحظتها..
صحيح أن منبر سودانيز اون لاين يعتبر أحد أكبر المنابر الإسفيرية وأشهرها
لكن كما قال المثل ( البحر ما بيابا الزيادة) وعليه فإن إهتمام صاحب المنبر
بهذا البوست وتعليقه عاليا هو في الحقيقة دعاية أضافيةللمنبر في حال انصفته
وسائل الإعلام العالمية وإهتمت به كما إهتمت بالكائن الرخو الاخطبوط المدعو
بول .
يتبع ..
.................
ما رأي جرجير المعروف هنا بود البشري بهذه الدرعة العلي أصولا ..
إتا شفت حاجة ..؟

جرجرة
ح تتعب معاي شديد يا للخو لو حاولت تصرف الأنظار عن نجاح ترشيحاتي وتوقعاتي ..
عنوان البوست هو (أرشح الماتدور الأسباني للفوز بكأس العالم) وبدايته اتوقع
(خروج البرازيل من ربع النهائي) زايدا ترشيح تلاتة منتخبات على الأقل للوصول
لنصف النهائي وهو ما تحقق بالمسطرة والكربون فلماذا تلهث خلف شبه إحتمال
لم يصدق .
واضح جدا أن المدعو جرجير يتألم ويئن ويقيم الليل متوجعا بسبب ترشيحاتي الناجحة
ولهذا يحاول خائبا صرف الأنظار عما تحقق من نجاح مذهل بخصوص هذه الترشيحات
التى ولدت من رحم تحليلات فنية دقيقة وقراءة ذكية للمعطيات الماثلة وليس كما في
حالة الكأئن الرخو الاخطبوط المدعو بول الذي يتبع بطنه في ترشيحاته وتوقعاته.
إن الحسكنيت المدعو جرجير والمعروف هنا بود البشري يمارس الحسد والحقد جهارا
نهارا ولا يخجل من الإفصاح عنه بمثل الترهات التى ينثرها هنا من حين إلى آخر
محاولا التشكيك وصرف الأنظار عن النجاح المذهل الذي تحقق بخصوص الترشيحات .
أعلاه ..
يتبع ....

أتمني والله ان أدرك كنه الضيق والزعل الذي يعاني منه أخونا الحسكنيت جرجير الذي
تجاهل كل ما يدور ويقال في هذا المنبر وأصبح لا هم له سوي تبخيس وتحقير النجاحات
المذهلة لترشيحاتي وتوقعاتي التى تأسست على قاعدة صلبة من التحليلات الفنية المدعومة
بخبرة واسعة في هذا المضمار .
على العكس تماما دخل لهذا البوست المثير أكثر من زميل بورد مهنئا ومباركا بهذا النجاح
الذي يعتبر نجاحا للبورد ، فيما واصل الحسكنيت المدعو جرجير ترهاته وأناته التى يطلقها
متألما من نيران الحقد والحسد التى ظل يحترق في أتونها منذ أول يوم رأي فيه هذا البوست
النور بالمنبر .
صحيح إنني لا أنتظر من شاكلة المدعو جرجير مباركة وتهنئة على هذا النجاح النادر المذهل
لكنني في ذات الوقت لم اكن اتوقع كل هذا المقت النابع من دواخل مترعة بالحقد والحسد ..
يتبع ...........

إنني لم اطرح هذا البوست نكاية في الحسكنيت المدعو جرجير المعروف بود البشري
ولم أقل أن ترشيحاتي وتوقعاتي الناجحة هذه لإثارة زعله وغضبه وحسده ..
بل أن هذا المخلوق الغريب لم يكن في بالي أصلا عندما شرعت في كتابة الموضوع
ولذلك أستغرب جدا لثورته ومساككته الغبية لهذا الموضوع للدرجة التى جعلته
ضيفا فضوليا على كل بوستات الزملاء المتعلقة بكأس العالم حاملا معه عبارته
العبيطة التى تفيد بخوفه من ان يندرع صاحب هذا البوست فيه .
ومن المفارقات المضحكة جدا أن يتحول المدعو جرجير لحسكنيت لاصق في صاحب البوست
محاولا الإستهزاء بترشيحاته وصرف النظر عن نجاحه بحجة أنه يخاف أن يندرع فيه
صاحب البوست .
يتبع .....

اعصابك يا تنظير ما تنفعل ساي

أبدا وحاتك يا جرجرة
دي بس عشان نثبت حاجة لا اكتر ولا أقل .

طيب اتفضل واصل
بس اختصر و حاول تتجنب التكرار ما امكن

أواصل شنو يا جرجرة ..؟

والله يا البشري ما شايف ليك حل إلا بكره قرايبنا أبان صلع يتسترو و يبلو الأسبان ديل ، لانو لو ده ما حصل معناتو طلحه ده بيري بنور الله زيي واحد !!!!

Quote: لانو لو ده ما حصل معناتو طلحه ده بيري بنور الله زيي واحد

فخامة الدكتور
الله يخليك لتحميس وإثارة غبن الحسكنيت المدعو جرجير المعروف بود البشري
هو بلا كدا مندرع لي في صنقوري ..

Quote: فخامة الدكتور الله يخليك لتحميس وإثارة غبن الحسكنيت المدعو جرجير المعروف بود البشري هو بلا كدا مندرع لي في صنقوري

>

يا فخامة الدكتور أمين
ياخي بدل تقعد تحمس لي في الزول الحسنكيت دا وتجىء آخرتا تضحك
طالب معاي الريس أنو يعلق البوست الفلتة دا أعلي المنبر فقد سكبت
فيه عصارة علمي وعبقريتي التحليلية .

حتى يبقي عاليا...

>

Quote: طالب معاي الريس أنو يعلق البوست الفلتة دا أعلي المنبر فقد سكبت فيه عصارة علمي وعبقريتي التحليلية .

لا حوجه لبكري : فالبوست و صاحبه معلقان كالماذن في قلوبنا يا طلحه !!!

Quote: لا حوجه لبكري : فالبوست و صاحبه معلقان كالماذن في قلوبنا يا طلحه !!!

فخامة الدكتور
روح يا شيخ وإلهي يخليك
بس لكن النصيحة ليك
الليلة شوف ليك بلدا تانية ما تنتظر الحسكنيت مع كلامك دا .

>

المهمة لن تكون سهلة أمام الماتادور الأسباني عندما يواجه مساء اليوم الطاحونة
الهولندية في نهائي كأس العالم على ملعب سوكر سيتي بجوهانسبيرج وهو يأمل في الدخول
إلى التاريخ من بابه الوسيع بالصعود لأول مرة في تاريخه لمنصات التتويج العالمية .
لكن الفرصة تبدو مواتية إلى حد مطمئن بالنسبة لمروضي الثيران لتحقيق الإنجاز العالمي
الكبير قياسا على المقومات الفنية والمعنويات الكبيرة التى يمتلكها زملاء ديفيد فيا
أصحاب المهارات الفردية والجماعية البديعة .
يتبع .......

وإذا كان المنتخب الهولندي يمتلك سلاح شمولية الأداء وقدرة لاعبيه على تنفيذ المهام المؤكلة
لهم من قبل مدربهم بما يعقد كثيرا من مهمة الخصوم في حال صدرت تعليمات المدرب الهولندي
بمراقبة مفاتيح لعب الماتادور وتحجيم خطورة هجومه فأن هذا الأخير يمتاز بخاصية خطيرة تتمثل
في قدرة نجومه على إرتجال خطط بديلة أثناء سير المباراة بفضل مهارات معظم لاعبيه وإنسجام
خطوطه الثلاثة على نحو يجعل أيا من لاعبيه قادر على التحول من الدفاع للوسط والهجوم وتاليا
تسجيل الأهداف وهو الأمر الذي يجعل مههمة المنافس أكثر صعوبة في تنفيذ خطة المراقبة اللصيقة.
يتبع .....

قوم لف بلا ماتادور بلا أخطبوط معاك

Quote: قوم لف بلا ماتادور بلا أخطبوط معاك

يا ود البشري

الاخطبوط دجال قولي كيف

ودالبشري يجيب كيف يا خليل


يقول الخليل

سنقوم بنفس الحركة بتاع العضة بتاعة الاخطبطوط

ونجيب علم السودان وجزر القمر

الاخطبوط سيتحرك نحو احد العلمين

معناها اخطبوط فشنك ساكت وشيطان سحسوح وبتاعة قزاز


المجد والخلود لقسطنطين معبود الرياح

جرجرة
شجع أسبانيا وإستسلم لحقيقة أنها الفائزة بكأس العالم
عندك فرصة اخيرة تعمل حاجة صاح في الحوش دا ..
بطل حركات الجر والمط والزعط البتعمل فيها دي .

يا خلي
أختبوت بتاع الساعة كم
دا كائن بتاع عضة ساي

يا هكر
رجاء رجاء رجاء
أعمل أية حاجة عايزا إن شاء الله ترجع جرجير دا محل غرف الشات الجا منها تاني
بس بوستيني دا أبعد منو لأنو ساكب فيهو عصارة عصارة عصارة خبرتي ومقدراتي .

................
يتبع ........

Quote: لأنو ساكب فيهو عصارة عصارة عصارة خبرتي ومقدراتي

هههههههههههااااااااايكا
عصا ... إيه؟ .. عصارة ... ههههههههههههههههههههاااااي






تنظير ياخي خلينا نشتغل عليك الله

جرجرة

Quote: عصا ... إيه؟

لو قلتا ليك بتزعل والناس الهنا ديل بقولوا الزول دا...........
ما عندو رحمة.

ما بزعل ... قول

Quote: ما بزعل ... قول

لا بتزعل ...
أها كمان عايز تغالطني في دي ؟

طيب

جرجرة
عايز تغالط ليك زول ترشيحاتو وتوقعاتو كلها صدقت بالمسطرة والكربون ..
ياخ إتا زول شليق وبتاع مغالطات وبصراحة حقو تمش تفتح محل بتاع بليلة
قمح واللا تبيع فحم بالكيمان وإلا حتى إن شاء الله تشرك للطير في الخلا .

Quote: ترشيحاتو وتوقعاتو كلها صدقت بالمسطرة والكربون ..

يا زووول ؟!!

Quote: يا زووول

أيوة معاك
قول.. عايز شنو ..؟؟
بس سريع وإختصر عشان ورانا مشغوليات أهم .

>

ألف مبروكـ يا عمكـ
رشّ لينا جرجير دا لمن يفهم حاجة زاتو!

حبيبنا الزمااااااااااااان طلحة
أخر مداخلة لي في البورد دا يمكن قبل سنة

مبروك يا عزيزي. أول مرة أشترك معاك في تشجيع فريق

أسبانيا من التاريخ وللتاريخ
اندريس انييستا للتوثيق ...
يتبع ...

مبروك يا تنظير والف مبروك لاسبانيا وليك بصورة شخصية

وان لك الاوان ان تعضي صحبك جرجيرة في راسو

Quote: أسبانيا من التاريخ وللتاريخ اندريس انييستا للتوثيق ...

وكذلك البوست دا للتاريخ والتوثيق ..
أطالب الريس بكري أبو بكر برفعه عاليا
كما وأطلب من زميل البورد محمد البشري الخضر أن يشوف ليهو بلد تاني ...
يتبع ..

مبروك يا طلحه وفريق اسبانيا فريق كبير وجيله الحالى رهيب ويستحق الفوز بكاس العام الف مره

طلحة مبروك ياخ
راهنت علي الحصان الرابح

1000000000 مـبرووووووووووك لحبيبتنا إســبانيـــا

إنتصــرت إســبانيـــا لأنــها الأفضــــل و خســـر المــلاكمــين الهولنديون ....

و الحمد للله أن خسر أعداء العرب و الإسلام عبيد الصهاينة الذين إقتربت نهايتهم !!!!

فالبحر الذي يقف علي شفا حفرة من سواحلهم سيغرقهم حتي يكونوا عظه لمن يعادي الإسلام و رسوله

و الله أكبر و النصر لله و للإنسانية

يا البشري ، عملت ليك لجوء إسفيري في بورد بتاع جماعه أصحابنا من تسمانيا الشقيقه : أقعد معاهم لحدي مع طلحه الأخطبوط ينسي الموضوع ده !!!

يا جماعة والله أنا فعلا داخل في مفاجأة كبيرة جدا ..( كلام جادي جدا والله )
أعرف أن منبر سودانيز أون لاين منتشر وشائع ولديه كارزيما عالية جدا وسط القراء
لكنني لم أتوقع أن يكون موضوع هذا البوست محط إهتمام عريض على نحو ما يحدث لي الآن
فقد وصلتني عشرات الرسائل في الموبايل والإيميل من السودان والسعودية وقطر والبحرين
وعمان ومصر تبارك وتهنىء بنجاح الترشيحات ..
المفاجأة تمكن في أن هناك بعض المباركين لا يعرفون رقم تلفوني ولا أعرف من أين حصلوا
عليه ...
يتبع ....

Quote: يا جماعة والله أنا فعلا داخل في مفاجأة كبيرة جدا ..( كلام جادي جدا والله ) أعرف أن منبر سودانيز أون لاين منتشر وشائع ولديه كارزيما عالية جدا وسط القراء لكنني لم أتوقع أن يكون موضوع هذا البوست محط إهتمام عريض على نحو ما يحدث لي الآن فقد وصلتني عشرات الرسائل في الموبايل والإيميل من السودان والسعودية وقطر والبحرين وعمان ومصر تبارك وتهنىء بنجاح الترشيحات .. المفاجأة تمكن في أن هناك بعض المباركين لا يعرفون رقم تلفوني ولا أعرف من أين حصلوا عليه ... يتبع ...

اذن فالنودع اخونا ود البشرى الذى قرر هجر البوست و التوجه لمنتديات عكس الريح
ونرجو من الجميع المساهمة فى انجاح حفل الوداع >>>>>>>>>>>>>>>>> ودمتم

يا كوتش

Quote: اذن فالنودع اخونا ود البشرى الذى قرر هجر البوست و التوجه لمنتديات عكس الريح

البع بع راجيهو بي هناك ..

كتب أخطبوطنا هذا الكلام يوم ٣٠/٦

Quote: وأتوقع خروج البرازيل من الدور ربع النهائي ..

Quote: واتوقع وصول منتخبات كل من أسبانيا وأوروجواي وهولندا و(الأرجنتين أو ألمانيا ) لنصف النهائي

Quote: وستبدأ مباريات دور الثمانية بعد غد الجمعة بلقاء هولندا والبرازيل وأتوقع أن بفاجىء منتخب الكرة الشاملة السامبا البرازيلية ليخرج أبطال العالم من المونديال الأفريقي ..

Quote: ولا أعتقد ان الثور الأسباني سيفرط هذه المرة في فرصة الصعود لمنصات التتويج

و ده في أول مداخلتين في البوست ده !!
البلد دي لو فيها ناس بتفهم ، طلحه ده مفروض يكون قاعد في حوض قزاز كبير و يجيبو توقعاتو علي الهواء مباشرة قبل المباريات !!!

طلحة
تحياتي لك و لضيوفك الكرام
مبروك الفوز المستحق لإسبانيا

Quote: اها رايك شنو في تحليلي دا بعيد عن أنو انا مريخابي .؟

فعلا تحليلك كده

إسبانيا تستحق البطولة
لعبت كرة جميلة طيلة البطولة.
اليوم كنت بإستمع للإستديو التحليلي لقناة SBS و قد أجمع المحللون على فرحتهم بفوز فريق يلعب كرة قدم إيجابية.
يعنون بالإيجابية هو إعتمادهم على قوة الهجوم و الوسط في الفوز. معظم الفرق في البطولة كانت تعتمد على كرة القدم السلبية وهي إحكام الدفاع و الإستفادة من الهجمات المرتدة.
المدهش انهم قالوا ان هنالك 3 فرق كانت تلعب كرة إيجابية وهي إسبانيا و ألمانيا و غانا. حتى البرازيل كانت تلعب بسلبية غريبة لذلك إستحقوا الخسارة من فريق الملاكمين و الممثلين هولندا.

يا فخامة الدكتور
اخجلت عبقريتنا
وجائيك
ويا طارق الكوتش جرجرة لا يعدم وسيلة في الزوغان
ويا بقية الأعزاء المتداخلين والمباركين إستنوني واحد واحد ..

مبرووك يا طلحة

اسبانيا هي الافضل علي الاطلاق

الخطا الوحيد

في نبواتك هو ان البرازيل خرجت من ثمن النهائي

وليس ربع النهائي

Quote: الخطا الوحيد في نبواتك هو ان البرازيل خرجت من ثمن النهائي وليس ربع النهائي

يا خلي ، الأخطبوط طلحه كلامو كلو صاح ، البرازيل طلعت من ربع النهائي (كانو ٨ فرق ) !!

Quote: الخطا الوحيد في نبواتك هو ان البرازيل خرجت من ثمن النهائي وليس ربع النهائي

أبدا يا خليل مافي أي خطأ
البرازيل لاقت هولندا في ربع النهائي وخرجت على يدها
وأظنك ملخبط في ثمن وربع النهائي
ربع النهائي هو دور الثمانية
وثمن النهائي هو دور ال16 .

Quote: يا خلي ، الأخطبوط طلحه كلامو كلو صاح ، البرازيل طلعت من ربع النهائي (كانو ٨ فرق )

لا يا امين

البرازيل لعبت مع هولندا في دور الستاشر

وهو ثمن النهائي وليس ربع النهائي

اعتذر بشدة

صحيح يا طلحة انت صاح

البرازيل لعبت في ثمن النهائي مع شيلي


اسف جدا

انت البرنجي

ولا يهمك يا خلي
المنتخبات التى لعب ربع النهائي كما هو موضح في هذا البوست هي :
هولندا - ألمانيا - اسبانيا - البرازيل - الأرجنتين - باراغواي - غانا - أوروغواي

البرازيل فازت علي شيلي في دور الستاشر و وصلت لدور التمانيه مع هولندا - ألمانيا - اسبانيا - الأرجنتين - باراغواي - غانا - أوروغواي
بالله يا خلي إعتذر للاخطبوط والا حا نتهمك من انك مدفوع من جهات معاديه !!!

Quote: بالله يا خلي إعتذر للاخطبوط والا حا نتهمك من انك مدفوع من جهات معاديه !!!

لازم يا دكتور امين

اعتذرت بشدة للرياضي المطبوع طلحة عبد الله

شداد يعزف لحن الوداع مرغماً

___

غايتو يا البشري موقفك أخير منو موقف سيد صبري مع بورداب الخرطوم !!
بقيت تشتت في الكوره ؟!

Quote: بقيت تشتت في الكوره ؟!

يا فخامة الدكتور حسكنيت المجرجراتي دا التشتيت ذاتو ما بعرفو كيف
شكيتو لخالقو .

طلحة تنظير
كمخرج لحبيبنا ود البشري أقول أن أسبانيا لم تحرز الكاس و لكن برشلونة هي من أحرزته أو كما قال ..





* بعدين يا تنظير تعال هنا أنا ما رشحت أسبانيا دي معاكـ من بداية البوست .. مداخلاتي و ينها ؟؟ خجيتوها و لا شنو ؟

Quote: طلحة تنظير كمخرج لحبيبنا ود البشري أقول أن أسبانيا لم تحرز الكاس و لكن برشلونة هي من أحرزته أو كما قال .. * بعدين يا تنظير تعال هنا أنا ما رشحت أسبانيا دي معاكـ من بداية البوست .. مداخلاتي و ينها ؟؟ خجيتوها و لا شنو ؟

هوي يا خالد هوي !!!
محاولاتكم لحذف البوست عن مساره مرصوده إلينا كما يقول الظلامي فيصل الرشيد
مليون زول قال مرشح إسبانيا : فقط طلحه الأخطبوط هو من تنبأ بكل المباريات من دوري ال ١٦ و عمل تحليل للاسباب و كلامو كلو طلع صاح !!!

المدعو أمين و الشهير بدكتور أمين نوتة بطل تقلب الحقائق ...
توقعات طلحة تنظير توقعها قبله كائن حي له 8 أذرع يعني طلحة تنظير زيو و زي أي رخويات حايمة ما تفكوها فينا ساكت ..
ترشيحاتنا كانت لأسبانيا حتى قبل أن يعلم طلحة تنظير أن هناكـ كأس عالم سيقام هذا العام !!



* طلحة تنظير لو كان يفهم في أحوال الكرة و تحليلاتها لما كان مريخي الهوي يا عمكـ

Quote: طلحة تنظير كمخرج لحبيبنا ود البشري أقول أن أسبانيا لم تحرز الكاس و لكن برشلونة هي من أحرزته أو كما قال ..

الدليل :

Quote: ترشيحاتنا كانت لأسبانيا حتى قبل أن يعلم طلحة تنظير أن هناكـ كأس عالم سيقام هذا العام !!

مبروك استاذ طلحة بفوز الماتدور رشحنا معاك المتادور الاسبانى والطواحين الهولنديةفى النهائى وكمان قلنا الكاس لاسبانيا

الاخطبوط طلحه ..سلام

فعلا كانت اسبانيا هي التي تستحق اللقب لهذا العام خاصة بعد تخطي الشبح الاماني بجداره..

كانت المباراه عنيفه ولكن النتيجه عادله..

مبروك لاسبانياالفوز المستحق ومبروك ليكم ياطلحه ...

الفكي طلحة:
ألف مبروك لاسبانيا.. ومبروك ليك انت التوقعات والترشيحات..
بس عشان الأمة دي تعرف حاجة.. لازم تدخلنا معاك شوية في الصورة..
كأس العالم كانت فيهو منتخبات من الوزن الثقيل..
الارجنتين والبرازيل وألمانيا وانجلترا وهلمجرا..
أسباب ترشيحك للماتادور كانت شنو.. وهل جات عليك لحظة حسيت أنك
ممكن تتخذل في توقعك وترشيحك..
انت بعد كده بقيت شخصية مشهورة وعالمية.. وعلى أسوأ الفروض
ممكن تعيش تاني أربعة سنوات على حس البوست ده..
وزول تاني ممكن يرد ليك كلمة مافي.. زول يتفاصح عليك مافي..
ونافست الاخطبوط بول اللي قال ألمانيا بتفوز بكأس العالم..

د. أمين
ما تشتيت كورة لكن تنظير دا مأجز اليومين ديل و ح يقوم يبرمج بينا لغاية رمضان كدا شكلو
فقلنا نشدهو بموضوع شداد شوية

__________________

بالله ياخوانا روبن دا عاقل
مرتين انفراد كامل يضيّعها و يضيّعنا معاه
بلا ياخدو عامل صلعتو كيف كيف

Quote: لكنني لم أتوقع أن يكون موضوع هذا البوست محط إهتمام عريض على نحو ما يحدث لي الآن فقد وصلتني عشرات الرسائل في الموبايل والإيميل من السودان والسعودية وقطر والبحرين وعمان ومصر تبارك وتهنىء بنجاح الترشيحات ..

ياخي تخ

يا طلحه يا حبيب

مبروك الكاس

وبعدين عاوزين نلاقيك انا وود البشري

بعد صلاه العشاء بنتصل عليك

أعتذر للتأخير عن الرد على الأحباء والأعداء أعلاه
كنت مشغولا باقي ليل أمس وصباح اليوم بمقابلات مع محطات تلفزيونية عالمية
بسبب النجاح الكامل الذي أحرزته توقعاتي وترشيحاتي التى إستندت على قاعدة
صلبة من الخبرة الطويلة والقراءة الذكية لملعب المونديال منذ بداية النهائيات .
وكنت أغضب وأثور على الهواء مباشرة في وجه حسناوات المحطات الفضائية بسبب مقارنتهن
لي بالكائن الرخو المدعو (بول ) لأن هذا الأخير كان يتبع بطنه في ترشيحاته بينما
كنت أتبع تحليلا شاملا كاملا للمباريات والمنتخبات لأخلص للنتائج في النهاية
وهو ما أكسب ترشيحاتي وتوقعاتي علمية ودقة ومصداقية لا مقارنة بينها وخزعبلات
الكائن الرخو سليل أشعب الأكول .
.....
لماذا لم يعلق سيدي الريس بكري أبو بكر هذا البوست على صنقور البورد رغم أن
هذه الخطوة كانت ستجلب للحوش شهرة عالمية أكبر ..؟
يتبع ...

أبدأ من الآخر

Quote: مبروك الكاس وبعدين عاوزين نلاقيك انا وود البشري

عباس يا حبيب
الله يبارك فيك
وبالنسبة للمقابلة فاللاسف لازم تحدد معياد مسبق مع السكرتيرة .
باي نق تربيع .

ودو كماين ياعمك

Quote: ألف مبروكـ يا عمكـ رشّ لينا جرجير دا لمن يفهم حاجة زاتو!

الله يبارك فيك
وقد ثبت أن هذا الحسكنيت المدعو جرجير المعروف بود البشري جلدو تخين
وعينو قوية ولا تنفع فيه أقوي مضادات وعقاقير الخجل .
والدليل أنه مازال متواجدا بهذا البورد فيما يفترض أن يكون شاف ليهو
بلد من زمان خالص وذلك بعد تحدياته الكرتونية ومغالاطاته الحقودة الحسودة
التى تنم عن دواخل مترعة بالسوء والسواد .

Quote: لماذا لم يعلق سيدي الريس بكري أبو بكر هذا البوست على صنقور البورد رغم أن هذه الخطوة كانت ستجلب للحوش شهرة عالمية أكبر ..؟

سلامات يا طارق احمد
ليك وحشة وشوق عظيم يا بلد
وينك ووين أراضيك

Quote: مبروك يا عزيزي. أول مرة أشترك معاك في تشجيع فريق

الله يبارك فيك
ولو تابعتني بدخلك الجنة تووووووش ..

شكرا يا كيكي ما بتقصر يا وحش

Quote: وان لك الاوان ان تعضي صحبك جرجيرة في راسو

صاحبي دا كان زمان أيام الجاهلية
وبعدين وينو هو راسو البعضوهو فيهو
دا زول ماشي أم فكو ساي بلا راس

Quote: مبروك يا طلحه وفريق اسبانيا فريق كبير وجيله الحالى رهيب ويستحق الفوز بكاس العام الف مره

سلامات يا كوتش
الناس ديل أنا متابعم من التصفيات
ما عندهم حل نوهائي ...
حق لهم الأفراح وطول الليالي الملاح .

,

الأخ الكريم أُستاذ طلحة
تحيّة طيّبة

تابعت عنوان البوست منذ فترة
ودلفت الآن لأعبّر عن إعجابي بهذه القراءة الدّقيقة للأحداث الكأسعالميّة






لك التّحيّة والوُد

هلا باللدود محمد الطيب يوسف

Quote: طلحة مبروك ياخ راهنت علي الحصان الرابح

يبارك فيك يا زول
وأحصنتي في الحلبة دي كلها رابحة صدقني ..
بس إتا قول خير وأفهمني في المواضيع التانية وما تكابر ..

سلامات يا عصام الحاج

Quote: 1000000000 مـبرووووووووووك لحبيبتنا إســبانيـــا إنتصــرت إســبانيـــا لأنــها الأفضــــل و خســـر المــلاكمــين الهولنديون .... و الحمد للله أن خسر أعداء العرب و الإسلام عبيد الصهاينة الذين إقتربت نهايتهم !!!! فالبحر الذي يقف علي شفا حفرة من سواحلهم سيغرقهم حتي يكونوا عظه لمن يعادي الإسلام و رسوله و الله أكبر و النصر لله و للإنسانية

زملاء إنييستا واللورد حق لهم أن يتحكروا على العرش العالمي
ملوكا متوجين بالأوسمة والنياشين تلمع في جباههم تيجان المجد وتبرق بإيديهم صولجانات
العز والفخر ..
لهم الحب والإعجاب كله.

الأخ الفكي طلحة
عليك الله شوف لينا الأستفتاء مخجوج ولا لا؟
واذا كان ما مخجوج النتيجة كم لي كم؟؟؟

قخامة الدكتور

Quote: يا البشري ، عملت ليك لجوء إسفيري في بورد بتاع جماعه أصحابنا من تسمانيا الشقيقه : أقعد معاهم لحدي مع طلحه الأخطبوط ينسي الموضوع ده

مافي ليهو طريقة حتى لو إعتكف في جحر ضب عندو بواسير
والبوست دا معلق هنا لغاية كأس العالم 2022

الاخ طلحة سلامات ومبروك يعلم الله الاسبان متعونا متعة ازالت الغم الذى اصابني بخروج الرازيل
وكنت قد تداخلت معك في الصفحة الاولى وده جزء منها...

Quote: ودونقا فى رايي نجح فى جعل المنتخب الرازيلي يلعب لتحقيق النتيجة بغض النظر عن جماليات الاداء والدليل فوز البرازيل فى 34 مباراة متواصلة تحت قيادته.

وعليه أنا اقتنعت ان الاسبان فازوا بالكأس لتوفر اللعب المتوازن دون تناسي الاداء الجميل
اشد على يدك واقول ليك هزمت الاخطبوط الخربوط...وتوقعاتك مية المية...

هلا يا فخامة الدكتور

Quote: البلد دي لو فيها ناس بتفهم ، طلحه ده مفروض يكون قاعد في حوض قزاز كبير و يجيبو توقعاتو علي الهواء مباشرة قبل المباريات

أمبارح المذيعة الأسبانية الحسناء جدا خلال مقابلتا معاي ع الهواء مباشرة
أقترحت أنو يتم تكريمي بالقصر الملكي الأسباني بمدريد جنبا إلى جنب مع منتخب الماتادور
باعتبار أن ترشيحاتي صدقت بالمسطرة والكربون من قبل حتى أن تبدأ التصفيات ..
وأردفت : بلا أختبوت بلا ويكة
وأضافت :
يا أبو الطلوح الما بعرفك يجهلك ويقول كبكبي .
وقد شكرتها وقلت ليها تحياتي لجلالة الملك الأسباني الأعظم وقولي ليهو بيناتنا تلفون
لكن صراحة كدا أنا ما بوعدك لانو برنامجي مزحوم شديد.

عمار يسن النور

Quote: إسبانيا تستحق البطولة لعبت كرة جميلة طيلة البطولة. اليوم كنت بإستمع للإستديو التحليلي لقناة SBS و قد أجمع المحللون على فرحتهم بفوز فريق يلعب كرة قدم إيجابية. يعنون بالإيجابية هو إعتمادهم على قوة الهجوم و الوسط في الفوز. معظم الفرق في البطولة كانت تعتمد على كرة القدم السلبية وهي إحكام الدفاع و الإستفادة من الهجمات المرتدة

أشكرك يا عزيزي
وعبقرية الأداء الأسباني تكمن في اللامركزية التى يعتمدها في مواجهة الخصوم بما يتيح له
إرتجال الخطط والخطط البديلة خلال مجريات اللعب يساعده على ذلك الإمكانات والمقدرات العالية
التى يتمتع بها كل نجومه تقريبا بحيث لا تتاح للخصم فرصة فرض الرقابة وإغلاق مفاتيح اللعب
لأنه عادي جدا ان يتحول لاعب من الدفاع للوسط ومنه إلى الهجوم لتسجيل هدف كما حدث أمام
ألمانيا حيث سجل قلب الدفاع هدف الفوز ، وكما حدث أمس أمام هولندا حيث سجل هدف الفوز
لاعب الوسط انببستا .
وكنت قد قلت أمس قبل بداية المباراة:

Quote: وإذا كان المنتخب الهولندي يمتلك سلاح شمولية الأداء وقدرة لاعبيه على تنفيذ المهام المؤكلة لهم من قبل مدربهم بما يعقد كثيرا من مهمة الخصوم في حال صدرت تعليمات المدرب الهولندي بمراقبة مفاتيح لعب الماتادور وتحجيم خطورة هجومه فأن هذا الأخير يمتاز بخاصية خطيرة تتمثل في قدرة نجومه على إرتجال خطط بديلة أثناء سير المباراة بفضل مهارات معظم لاعبيه وإنسجام خطوطه الثلاثة على نحو يجعل أيا من لاعبيه قادر على التحول من الدفاع للوسط والهجوم وتاليا تسجيل الأهداف وهو الأمر الذي يجعل مههمة المنافس أكثر صعوبة في تنفيذ خطة المراقبة اللصيقة.

وهو ما حدث بالضبط

Quote: أمبارح المذيعة الأسبانية الحسناء جدا خلال مقابلتا معاي ع الهواء مباشرة أقترحت أنو يتم تكريمي بالقصر الملكي الأسباني بمدريد جنبا إلى جنب مع منتخب الماتادور باعتبار أن ترشيحاتي صدقت بالمسطرة والكربون من قبل حتى أن تبدأ التصفيات .. وأردفت : بلا أختبوت بلا ويكة وأضافت : يا أبو الطلوح الما بعرفك يجهلك ويقول كبكبي . وقد شكرتها وقلت ليها تحياتي لجلالة الملك الأسباني الأعظم وقولي ليهو بيناتنا تلفون لكن صراحة كدا أنا ما بوعدك لانو برنامجي مزحوم شديد.

كلّو من روبن أب صلعة

جرجرة

Quote: شداد يعزف لحن الوداع مرغماً

محاولة أعبط من أبو الدرداق
أعد وقابلني .

أبو الخلد

Quote: كمخرج لحبيبنا ود البشري أقول أن أسبانيا لم تحرز الكاس و لكن برشلونة هي من أحرزته أو كما قال ..

وهي يعني برشلونة دي فريق في رابطة أم الطيور واللا المسرحية شنو يا بلد ..؟

Quote: بعدين يا تنظير تعال هنا أنا ما رشحت أسبانيا دي معاكـ من بداية البوست .. مداخلاتي و ينها ؟؟ خجيتوها و لا شنو ؟

الا تكون كاتبا بالحبر السري ..
أنا شايف أحسن تقوم تاخد ليك لفة لفتين .

Quote: طلحة تنظير لو كان يفهم في أحوال الكرة و تحليلاتها لما كان مريخي الهوي يا عمكـ

لا في دي إحتمال تكون محق يا أبو الخلد أخوي
أصلو زمن الجاهلية كنت مريخي الهوي والأفظع من كدا كنت بكتب عن أبو الهل المهلهل المكع كع
زيك وزي الحسكنيت المدعو جرجير المعروف بود البشري .
لكن دا كان زمان وهسع بقيت عالمي ويستحيل أن أعود القهقري ( القهقري دي براها المفروض تخليك تآمن)

Quote: هوي يا خالد هوي !!! محاولاتكم لحذف البوست عن مساره مرصوده إلينا

دي يشموها قدحة يا فخامة الدكتور

Quote: مليون زول قال مرشح إسبانيا : فقط طلحه الأخطبوط هو من تنبأ بكل المباريات من دوري ال ١٦ و عمل تحليل للاسباب و كلامو كلو طلع صاح !!!

الناس دي عاطفية وإنطباعية جدا يا فخامة الدكتور ولما كانت النهائيات في بدايتها
كانت في منتخبات البرازيل والأرجنتين وإيطاليا وفرنسا وألمانيا عشان كدا إستبعدوا وإستكثروا
على الماتادور الكأس دا ..
شفت طريقتم العاطفية دي هي ذاتا الغطست حجر الكورة السودانية وودتا أسفل السافلين .

Quote: الناس دي عاطفية وإنطباعية جدا يا فخامة الدكتور ولما كانت النهائيات في بدايتها كانت في منتخبات البرازيل والأرجنتين وإيطاليا وفرنسا وألمانيا عشان كدا إستبعدوا وإستكثروا على الماتادور الكأس دا ..

الحبيب طلحة ، أشواق وتحايا زي المطر!!


أهنيك على التحليلات الواقعية المعهودة فيكم ، وفعلا كنت أخشى
أنو كلامك يطلع صحيح لكراهيتي للنظرة العنصرية عند شعب قاطلونيا،،

==

استحق الماتادور عن جدارة لأن ديل بوسكي لم يضع أي إعتبار للأصوات
التي تنادي بخلق التوازنات الاقليمية في الفريق ، وتجانس لاعبي
برشلونة طيلة العامين الماضيين هو من خلق أبهة الاسبان،،

==
كاسياس كان فريقاً بحاله ، وبكاؤه يقطع نياط القلوب: ماهذا الحب لأسبانيا؟؟
كيف تنسى للاعبين وهم في غمرة الحرابة (مدريد - برشلونة) (كاستيلا - قاطالونيا-
اندولسيا- فالنسيان - باسك، .....)، كيف أخلصوا لهذا الشعار وكيف تعانقوا
متناسين كل هذه الخلافات التي عما قريب ستودي بإقليم قاطلونيا للإنفصال من أسبانيا؟؟


أين نحن ولاعبينا ومدربينا ومنظرينا الشداد من هذا الفهم العالي للرياضة؟؟


مبروك ياطلحة ، وتستاهل تقدل في الساحة ، وعقبال تنبؤات مشابهة لسوداننا المشاتر!!

سلامات يا سنادة

Quote: مبروك استاذ طلحة بفوز الماتدور رشحنا معاك المتادور الاسبانى والطواحين الهولنديةفى النهائى وكمان قلنا الكاس لاسبانيا

الكلام دا صحيح وموثق ويشهد عليهو البوست دا
مبارك ليك كمان نجاح ترشيحاتك الواقعية جدا
ولا نامت أعين ناس قريعتي راحت ( جرجير نموذجا)

سلام يا أسامة الخليفة

Quote: فعلا كانت اسبانيا هي التي تستحق اللقب لهذا العام خاصة بعد تخطي الشبح الاماني بجداره.. كانت المباراه عنيفه ولكن النتيجه عادله.. مبروك لاسبانياالفوز المستحق ومبروك ليكم ياطلحه ...

الماتادور فريق كامل والكمال لله
يملك كل المقومات التى تجعل منه ملكا متوجا على عرش الكرة العالمية
فريق يلعب باسلوب اللامركزية لانه يملك في صفوفه بدلاء لا يقلون أبدا عن الأساسيين
ولان الأساسيين كل واحد فيهم نجم لامع في وظيفتو الميدانية يتمتع بإمكانات بدنية
وفنية ومهارية مدهشة جدا كما لا حظت في الدوري الأسباني .
هذا المنتخب ظل في حالة إستقرار فني وثبات مستوي منذ بداية التصفيات الأوربية
وحتى قدومه لجنوب أفريقيا ولذلك كان طبيعيا أن يعتلي منصات التتويج التى عمل
لأجلها منذ وقت مبكر وفي عالم كرة القدم لكل مجتهد نصيب لأن الكرة تعطي من يعطيها
ولا مكان فيها إلا للأجدر والأقدر .

رسلتا ليك اللستة يا طلحة ..

وما تخاف اللستة مرفقة بي سندوتشات بيرقر

بلاي ادينا النتيجة سرررريع



ـــــــــــــــــــــــــــــــــــ

ههههههههههههههه وينك يا الاسابيع

هلا يا دياب

Quote: الفكي طلحة:ألف مبروك لاسبانيا.. ومبروك ليك انت التوقعات والترشيحات.. بس عشان الأمة دي تعرف حاجة.. لازم تدخلنا معاك شوية في الصورة.. كأس العالم كانت فيهو منتخبات من الوزن الثقيل.. الارجنتين والبرازيل وألمانيا وانجلترا وهلمجرا.. أسباب ترشيحك للماتادور كانت شنو.. وهل جات عليك لحظة حسيت أنك ممكن تتخذل في توقعك وترشيحك.. انت بعد كده بقيت شخصية مشهورة وعالمية.. وعلى أسوأ الفروض ممكن تعيش تاني أربعة سنوات على حس البوست ده.. وزول تاني ممكن يرد ليك كلمة مافي.. زول يتفاصح عليك مافي.. ونافست الاخطبوط بول اللي قال ألمانيا بتفوز بكأس العالم..

واول حاجة وين القبة القلتها ؟
قلت لي لو أسبانيا فازت بنبني ليك قبة ونمش نتبرك فيها ذات كل جمعة وعيد ..
إتصلت بالجماعة قالوا لي يا دوبك نزلوا الطوب اللحمر ودا تقاعس منكم ممكن يوديكم
في داهية ..
والغريبة نفس أسئلتك دي سألتني لها المذيعة الحسناء من قناة مايوركا أمس وكان
ردي عليها أنو أنا بثق في إمكاناتي ومواهبي التقديرية لأنو ما ضربو رمي ساي
ولما شفتها فتحت خشما مشدوهة قلتا ليها:
لو ما مصدقاني هسع دي بطلع ليك من شاشة التلفزيون دي وأديك شرف أنك قاعدة جنبي
ولما لمحت على وجهها الجميل إبتسامة خجولة وقريت في عيونا التمني ولسان حالا يقول
ياريت قلت ليها :
ما تصدقي .. وتبعتها بضحكة إهتز لها القمر الصناعي البصور في اللقاء دا لدرجة أنو
الصورة أصبحت مشوشة ولم تروق وتصفي إلا لما إستعنت بقواي الخفية .
المهم كانت كل إجاباتي مقنعة تماما كما ترشيحي للماتادور في هذا البوست للدرجة التى
جعلت المذيعة الحسناء تقول وقد سبلت عينيها الجميلتين :
في الختام لا يسعني إلا أن اتقدم بشكري الرقيق مصحوبا بدعوتي لأبي الطلوح أن يشرب معاي
شاي مغرب بي لقيمات طالعة هسه دي من الطاجن .
وطبعا اعتذرت عن الدعوة لانو برنامجي مزدحم .

الحسكنيت جرجرة

Quote: بالله ياخوانا روبن دا عاقل مرتين انفراد كامل يضيّعها و يضيّعنا معاه

عشان اتا نحس ودواخلك مسودة ونياتك أسود من السكن عشان كدا لو ماشة على القون بتلف منو .

يا ود دياب

Quote: لماذا لم يعلق سيدي الريس بكري أبو بكر هذا البوست على صنقور البورد رغم أن هذه الخطوة كانت ستجلب للحوش شهرة عالمية أكبر ..؟

وأضيف كمان :
لماذا لم يتخارج الحسكنيت المدعو جرجير المعروف بود البشري حتى الآن ..
على هذا المجرجراتي الحقود ان يشوف ليهو بلد غير البلد دي ..
والليلة قبل بكرة .

الكريم لؤي

Quote: تابعت عنوان البوست منذ فترة ودلفت الآن لأعبّر عن إعجابي بهذه القراءة الدّقيقة للأحداث الكأسعالميّة

شاكر ليك جدا المرور والإطراء يا عزيزي
كل المؤشرات والمعطيات كانت ترجح كفة الثيران لدخول التارخ من بوابة جوهانسبيرج .

الصفوة طلحة
خربت كلامك بـ حاجتين:
الأولى انك رديت على كل الناس بمن فيهم الرشاشات. واطارشت مداخلاتى رغم انها كانت بغرض مناصرتك ضد ودالبشرى.
التانية انك سخرت من اهلى ناس ام الطيور حين قلت:

Quote: وهي يعني برشلونة دي فريق في رابطة أم الطيور واللا المسرحية شنو يا بلد ..؟

يعنى هسع الفرق بينك وبين طارق دياب شنو?
ام الطيور دى فيها فرق الوطن والصحراء يمين لو لقوا القروش الـ عند المريخ والهلال كان يوم الليلة اخطبوطك ده يعضى علم السودان.
ياود البشرى عليك بطلحة ولن تشفع له صفويته عندنا بعد اليوم.
ياخ ياريتك لو شاركت فى مسابقة كان ربنا فتحها عليك لكن ملحوقة فى البرازيل.

Quote: بعدين ياطلحة مالك وقفت عند التكلة.. أمشي على مدني شوية.. الترابي والكسمبر والحليلة وكلكول والكاملين والعبدلاب وود الماجدي وأم دقرسي وأبوعشر.. أنا غايتو في واحد من ديل..

يا أيمن جهجهت الراجل ياخ ..
كان تقول ليهو من القلقالة


طلحة سلام ..
مبروك لإسبانيا ونهنيك على ترشيحك لها ..

مثلك أحب الكرة الإسبانية وهي المنتخب الوحيد في البطولة الذي كان يرتفع أدائه من مباراة لأخرى ..
وكنت أشفق عليه أحياناً لأن الكرة تعتمد على السرعة خصوصاً أمام مرمى الخصم وهذا ما ينقص الفريق ولأن أسلوب اسبانيا يعتمد على تناقل الكرة حتى داخل الصندوق مما يجعل دفاعات الفرق التي تواجههم تعود بسرعة لإفساد هجماتهم والدليل إحراز الفريق لتسعة أهداف فقط في البطولة كلها ..
الحاجة الثانية وهي جماعية الفريق مما يقلل من الأخطاء وتغطية العيوب في الفريق ..
دافع الفريق كان أكبر خصوصاً بعد خسارتهم لمباراتهم الأولى والدرس الذي تلقوه وكذلك وقفة جماهيرهم معهم فقد أعطتهم جرعة كبيرة للمضي قدماً حتى الكأس ..
عن نفسي تمنيت أن تصل إسبانيا وهولندا للكأس والفائز فيهم يسعدني وذلك لأن إسبانيا لديها منتخب كبير وتستحق أن تنال الكاس خصوصاً وأنها لأول مره تصل النهائي ..
أما هولندا فهذه هي المره الثالثة التي تصل للنهائي لذلك كانت أحق به كذلك أنها لم تخسر جميع مبارياته في البطولة إلا الأخيرة والتي كلفتهم الكثير ..

تحياتي يا قريبي ..

محمد الشيخ

Quote: الأخ الفكي طلحة عليك الله شوف لينا الأستفتاء مخجوج ولا لا؟ واذا كان ما مخجوج النتيجة كم لي كم؟؟؟

السياسة والاعيبا عند الفكي طلحة من الموبقات لا أقرب منها
ولا أجيب سيرتا في لساني .
تحياتي .

Quote: واول حاجة وين القبة القلتها ؟ قلت لي لو أسبانيا فازت بنبني ليك قبة ونمش نتبرك فيها ذات كل جمعة وعيد .. إتصلت بالجماعة قالوا لي يا دوبك نزلوا الطوب اللحمر ودا تقاعس منكم ممكن يوديكم في داهية ..

والله بدينا.. بس جهجنا الخريف.. السنة دي الظاهر عليهو جاي تقيل..
أهلك ناس أنور التكينة.. بتاعين الكماين.. زادو علينا الطوب..
والاسمنت في المسيد وصل 700 ألف للطن.. والبطانة غرقانة مافي طريقة للرملة..
اصبر علينا شوية.. عشان القبة تطلع مجيهة..

هلا بالفاضل عبد العزيز الفاضلابي

Quote: واطارشت مداخلاتى رغم انها كانت بغرض مناصرتك ضد ودالبشرى.

وفعلا والله ليك حق لكن صدقني غير مقصودة فليست أنت من يتجاهلوا مداخلاتو فمعليش كبيرة ياعزيزي

Quote: سخرت من اهلى ناس ام الطيور حين قلت: وهي يعني برشلونة دي فريق في رابطة أم الطيور واللا المسرحية شنو يا بلد

في دي ما معاك حق يا فاضلابي لانو مافي حتى شبه سخرية في كلامي الفوق دا ..
أبو الخلد قال الشالت الكأس برشلونة ما أسبانيا فحبيت أؤكد ليهو أن برشلونة دي
فريق أسباني ما من حتة تانية ، والحتة التانية كان ممكن تكون البشاقرة (قريتي)
واللا الخرتوم واللا أية حتة .

تهانينا باللقب الأول للماتادور يا طلحة
وتهانينا ليك بحسن التقدير

, و حق لنا ان نهنىء أنفسنا قبل أسبانيا بأن من بيننا طلحة

شكرآ لك على هذا التحليل الجميل الراقى الموزون

سلامات يا إسماعيل حسن
ومرة أخري هاردلك خروج البرازيل ولكن الأمر كان متوقع قياسا على النهج التجاري الذي إنتهجه المدرب
دونقا للحصول على النتيجة قبل كل شىء وهو ما حجم كثيرا من خطورة نجوم السامبا الذين إعتادوا على
اللعب المهاري في تنفيذ خطط المدرب دون التقيد بمهام وواجبات محددة على المستطيل إلا في حالات نادرة
ولذلك كان متوقعا أن يخسر البرازيل متي ما واجه منتخب يجيد تنفيذ المهام والواجبات وللأسف واجه المنتخب
الهولندي مبكرا وحدث ما حدث .

Quote: وعليه أنا اقتنعت ان الاسبان فازوا بالكأس لتوفر اللعب المتوازن دون تناسي الاداء الجميل اشد على يدك واقول ليك هزمت الاخطبوط الخربوط...وتوقعاتك مية المية...

وكذلك من الإسباب المباشرة التى قادت الأسبان للتفوق هو الانسجام الكامل بين لاعبيه الذين
لعبوا مع بعضهم البعض لفترات طويلة سواء كان في المنتخب او في الدوري الأسباني ، ومع |ستصحاب مقومات
أخري مثل المقدرات والمهارات الفردية لمعظم اللاعبين فان الماتادور يصبح كرت رهان رابح جدا وصاحب
حظوظ وافرة في التتويج باللقب .

العزيز الحبيب عبداللطيف بكري
لك التحايا والشوق العظيم وجبر الله كسركم
صدقني مشاعري سلبية جدا تجاه الأسبان لكن هذا لم يمنعني من الشغف بالدوري الأسباني أحد أقوي
الدوريات العالمية وأكثرها متعة وإثارة وتشويق ، وقد حملني هذا الشغف لمتابعة منتخب الماتدور
منذ بداية تجمعه إستعدادا للتصفيات الأوربية المؤهلة لجنوب أفريقيا وأثناء التصفيات ، وقد إكتشفت
أن الماتادور فريق كامل متكامل ومنسجم في جميع خطوطه ويملك دكة بدلاء لا تقل أبدا عن الأساسيين ولذلك
فهو المنتخب الوحيد الذي لم يتأثر بالغيابات والإصابات التى حدثت له خلال الفترة السابقة ، ما ضاعف
من يقيني أن هذا المنتخب الرهيب سيكون الحصان الأسود في المونديال الأفريقي وقد راهنت عليه وأنا
متأكد أنه سيمضي بنجاح لمنصات التتويج العالمية مالم تحدث مفأجات لا تخطر على بال .

Quote: أين نحن ولاعبينا ومدربينا ومنظرينا الشداد من هذا الفهم العالي للرياضة؟؟

للأسف لا وجود لنا ولا ننتظر وجودا عالميا أو حتى قاريا في ظل الفوضي الضاربة بأطنابها
كل قطاعات الوسط الرياضي بلا إستثناء و في هذا المقام يطول المقال.
تواجدنا الكثيف سيظل دائما وأبدا على مقاعد المتفرجين ما لم تتغير أشياء كثيرة تحتاج لعزيمة وإجتهاد
وغيرة كتلك التى أبكت الحارس كاسياس فرحا بالتتويج العالمي .

تسمع بالمعيدي .... إلخ
__

الأخ طلحة
الماتادور حقا كرت رهان رابح جدا وصاحب حظوظ وافرة في التتويج باللقب لذلك كسب الكأس. ...تقديرك كان في محله.

فوووق

Quote: رسلتا ليك اللستة يا طلحة .. وما تخاف اللستة مرفقة بي سندوتشات بيرقر

بت عم المدعو جرجير سارة علي
رسلت ليك النتيجة حتى قبل أن تصلني لستتك
دي أسهل حاجة عندي .
حييييييييي

Quote: وكنت أشفق عليه أحياناً لأن الكرة تعتمد على السرعة خصوصاً أمام مرمى الخصم وهذا ما ينقص الفريق ولأن أسلوب اسبانيا يعتمد على تناقل الكرة حتى داخل الصندوق مما يجعل دفاعات الفرق التي تواجههم تعود بسرعة لإفساد هجماتهم والدليل إحراز الفريق لتسعة أهداف فقط في البطولة كلها ..

سلامات يا معتصم
والحقيقة أنو كل المنتخبات التى قابلت المنتخب الأسباني لجأت للأسلوب الدفاعي البحت معتمدة على
الهجمات المرتدة لإدراكها القوة الهجومية الكأسحة للماتادور والدليل أن فوز أسبانيا في النهاية غالبا ما
يكون بهدف واحد أو بهدفين مقابل هدف كما حدث أمام شيلي .
إعتماد خصوم أسبانيا على الأسلوب الدفاعي أجبرها على إرتجال أساليب وخطط بديلة خلال سير المباراة
بعد ان يحكم الخصوم إقفال مفاتيح اللعب والرقابة على المهاجمين للوصول للمرمي عبر منافذ ووسائل
أخري ، ورغم أن الأمر كان شاقا وصعبا على الفريق الأسباني إلا أنه كان دائما ما يجد حلولا في نهاية
المطاف بفضل المقدرات الفنية والمهارات الفردية الكبيرة لجميع نجومه بلا إستثناء .
قلة الأهداف التى سجلها بطل العالم في شباك الخصوم لا تعني ضعف هجومه أو خلل في تكتيكاته الفنية
خلال المباراة إنما تعني لجوء خصومه لتقفيل مناطقهم والحرص على الناحية الدفاعية حذر القوة الهجومية
الكاسحة للفريق الأسباني ، وفوز الماتادور في نهاية الأمر رغم كل شىء يؤكد على قدرة هذا الأخير
وأحقيته بالكأس العالمية .

Quote: يا أيمن جهجهت الراجل ياخ .. كان تقول ليهو من القلقالة

أبدا يا معتصم فخبرتي عريضة وإلمامي واسع بتلك المناطق وأعرفها جيدا .

هلا يا أيمن

Quote: أهلك ناس أنور التكينة.. بتاعين الكماين.. زادو علينا الطوب..

وناس أنور التكينة ديل ماعرفوا أنو القبة دي ح تتعمل لمنو ..؟؟؟؟؟؟
قول ليهم أعملوا حسابكم ..
حيييييييييييي

سلامات يا أشرف

Quote: تهانينا باللقب الأول للماتادور يا طلحة وتهانينا ليك بحسن التقدير

شكرا للمرور
والحقيقة أنو الماتادور فرس رهان رابح لكل من يراهن عليه .

سلامات يا حيدر بشير

Quote: حق لنا ان نهنىء أنفسنا قبل أسبانيا بأن من بيننا طلحة شكرآ لك على هذا التحليل الجميل الراقى الموزون

عاجز عن الشكر يا عزيزي
والماتادور منتخب من العيار الثقيل لا يخيب من راهن عليه .

Quote: فوووق

سلامات يا جعفر

Quote: الأخ طلحة الماتادور حقا كرت رهان رابح جدا وصاحب حظوظ وافرة في التتويج باللقب لذلك كسب الكأس. ...تقديرك كان في محله.

دي حقيقة
وأنت برضو شايفك راهنت على الفرس الرابح
تحياتي وتقديري .

Quote: تسمع بالمعيدي .... إلخ

للأسف ما بعرف الراندوك يا صاحب ..

تلقت بعثة المنتخب الاسباني اليوم الاثنين استقبالا رسميا في مدريد من جانب الملك خوان كارلوس ورئيس الوزراء خوسيه لويس رودريجيز ثاباتيرو بعد العودة من جنوب أفريقيا حاملين معهم كأس العالم للمرة الأولى عقب الفوز في المباراة النهائية أمس على هولندا بهدف أندريس انيستا في نهاية الوقت الإضافي.
وتأخرت رحلة الطائرة الأسبانية ثلاث ساعات في جوهانسبرج ، وخرج الآلاف من المشجعين السعداء إلى مطار باراخاس لاستقبال الأبطال ، ولكن سرعان ما توجه أندريس أنيستا ورفاقه إلى قصر زارزويلا الملكي لحضور مراسم الاستقبال الرسمي من جانب الملك خوان كارلوس.
ولم يتمكن الملك ، الذي يعد عاشقا للرياضة ، من حضور المباراة النهائية لأنه مازال في مرحلة التعافي من عملية جراحية في الرئة.
وقال الملك للاعبون "أنتم قدوة لنا جميعا ، قدوة لجيل جديد من النبل ، للعمل كفريق والروح القتالية ، نشكركم أيها الأبطال ، باسم العائلة المالكة وجميع أفراد الشعب الأسباني ".
وبعد مراسم الاستقبال في القصر الملكي توجه اللاعبون إلى مانكلوا ، مقر الحكومة للقاء رئيس الوزراء خوسيه لويس رودريجيز ثاباتيرو ووزراءه.
وقال ثاباتيرو "الكأس تخص جميع الشعب الأسباني واللاعبين الذين حاولوا تحقيق الفوز لأجيال عديدة".
وأشاد ثاباتيرو بشكل خاص بانيستا ، ليس فقط لتسجيله هدف الحسم أمس ، بعد كتب على القميص التحتي له ، رسالة وداع لمدافع اسبانيول دانيل خاركي الذي توفى بأزمة قلبية في آب/أغسطس الماضي عن عمر يناهز السادسة والعشرين.
ورد انيستا بالقول "شكرا لك على استقبالك لنا ، أنني فخور كوني جزء من هذا الفريق ، كأس العالم يخص الجميع".
وكذلك أشاد ثاباتيرو بالمدرب فيسنتي دل بوسكي ، الذي قال "هذه الجائزة لجميع أفراد أسرة كرة القدم الأسبانية ، للأندية الصغيرة وكذلك الأندية الكبيرة".
ومن جهته قال الحارس ايكر كاسياس "اسم أسبانيا سيصبح في أعلى مكان ممكن طوال أربعة أعوام ، هذا الكأس لكم جميعا".

المصدر :http://www.kooora.com/default.aspx?showarticle=73954&obj=0

.

Quote: .

قاليك الواحد لما ايكتشف انو ما عندو جديد و يبدأ يكرر في روحو
برفع بوستيهو بنقطة

جرجرة
البوست دا أصلا ما عايز ليهو تجديد لأنو متجدد منو وفيهو لغاية نهاية الربع دا
وبعدين ياخ لو عايز أضيف للبوست دا عادي جدا ممكن أتلح عم قوقل وأجيب الأخبار
المرتبطة بتتويج الماتادور زي ما عملت فوق .
وغير كدا :
عيب لي الرفع بي نقطة ..
ثم :
لفتك جاموسة راحت تلاقي جاموس وما لقتو .

ود البشري
أنت الناس بتهنئ في تنظير بمناسبة فوز أسبانيا على أي أساس ؟؟ ياهو داكـ الأخطبوط زول واحد فتح ليهو بوست تهنئة مافي ؟؟


تنظير ده يكون مناسب العائلة المالكة في أسبانيا و نحن ما عارفين !!

اسالني تاني عليك الله يا خالد
غايتو اللهم إلاّ لو بهنوا فيه على نجاته من السيرة و الكيتة الكنت مجهزها ليه حال روبن ابصلعة الفقر دا كان جاب واحد من الإنفرادين

Quote: اسالني تاني عليك الله يا خالد

خالد دا لو سالك مية سنة ما ح تلقي ليهو إجابة يا جرجرة
لأنو وببساطة شديدة إستحق التهنئة على هذه الترشيحات الدقيقة العبقرية جدا
والتى بدأت قبل بداية النهائيات بجنوب أفريقيا وتحققت بالمسطرة والكربون
وكأنو ناس كاس العالم ديل شافنها مني .
وموت بغيظك وقيظك أيها الحقود الحسود

Quote: وموت بغيظك وقيظك أيها الحقود الحسود

غيظك عرفناها قيظك دي شنو؟
بتلغلغ ساي انتا ؟ ما بتقرا البتكتبو

Quote: أنت الناس بتهنئ في تنظير بمناسبة فوز أسبانيا على أي أساس ؟؟ ياهو داكـ الأخطبوط زول واحد فتح ليهو بوست تهنئة مافي ؟؟

أبو الخلد يا زكي
ومنو الفتح لي أنا بوست تهنئة هنا ...؟؟؟؟؟؟؟؟؟
دا بوستيني براي خدمة ضراع وعبقرية تحليل ..
مافي جنس مخلوق فتح لي بوست رغم أني أستحق أكتر من عشرين بوست للتهنئة
باعتبار الدقة في الترشيح والمبنية على تحليل عميق وقراءة غاية في الذكاء .

Quote: قيظك دي شنو؟

القيظ هو الحر الشديد يا جهلول الجاهلين .

حسكنيت المدعو جرجير المشهور هنا بود البشري
واصل كلوجتك وعورنتك هنا عشان بعد شوية تلقي نفسك أجهل من جهل .
يا جهلول الجهاليل .

Quote: القيظ هو الحر الشديد يا جهلول الجاهلين .

كدا عبارتك الاولى تبقى:
(موت بغيظك و حرك الشديد أيها الحقود الحسود)
معقولة بس؟!!
تنظير انت بتحضر سبيس توون كتير ولاّ شنو؟

ههههههههه
أخجل ليك واللا تخجل بي معرفتك
يعني خلاص عرفت القيظ معناتا شنو وعايزلك مراقة ..؟
الغيظ والقيظ الاتنين بحرقن يا جهلولي المجهلل .

الإتنين بحرقن!!!
يعني دي العلاقة ؟
طيب كان تقول موت بغيظك ونارك مثلا أو موت بغيظك وكهرباءك عالية الضغط !

ثقافة سبيس توون ظاهرة يا تنظير
عرفتها من لقيت كلامك زي كلام حتوت

تلحة ...


ما تتجاهلني


رد على مداخلتي ,,
ولا خلااااص بعد ما فازت اسبانيا عليت سعرك؟؟



رد والا...

ساموت بقيظي غيظي as well

بت عم الحسكنيت المدعو جرجير المعروف بود البشري
رديت ليك وحاتك ودا كان ردي ليك :

Quote: بت عم المدعو جرجير سارة علي رسلت ليك النتيجة حتى قبل أن تصلني لستتك دي أسهل حاجة عندي . حييييييييي

مبروك عليكم



لكن كلام باكنباور وتصريحاته النارية حول كأس العالم ما تديها واطة .

Quote: لكن كلام باكنباور وتصريحاته النارية حول كأس العالم ما تديها واطة

هلا يا سيدح
الله يبارك فيك
ولكن ماذا قال باكنباور حول كأس العالم ..؟

حسكنيت الجهلول الدعو جرجير المعروف بود البشري
عوارتك يتحجوا بيها عليك الطلاق
.................
حتوت دا خليهو نايم أسي وتعال هناك
أنا ماشي .

Quote: أمبارح المذيعة الأسبانية الحسناء جدا خلال مقابلتا معاي ع الهواء مباشرة أقترحت أنو يتم تكريمي بالقصر الملكي الأسباني بمدريد جنبا إلى جنب مع منتخب الماتادور باعتبار أن ترشيحاتي صدقت بالمسطرة والكربون من قبل حتى أن تبدأ التصفيات .. وأردفت : بلا أختبوت بلا ويكة وأضافت : يا أبو الطلوح الما بعرفك يجهلك ويقول كبكبي

أنا شفت المقابلة دي
و أظنها قالت:

يا أبو الطلوح الما بعرفك يجهلك ويقول خجاج

لان الكلمة التي إستعملها تقبل الترجمتين و لكن خجاج هي الأقرب من صياغ المفهوم

سلامات يا عمار
المذيعة الأسبانية تقصد الكبكي لانها كما قالت لا تحب بليلتو وخاصة في رمضان
وقد ذكرت لي أنها ذات يوم كانت بتعمل في طعمية من الكبكي مع أمها في الراكوبة
فأنكشح فيها الزيت وشوه يدها ولذلك فهي تكن له كراهية شديدة .

Quote: المذيعة الأسبانية تقصد الكبكي لانها كما قالت لا تحب بليلتو وخاصة في رمضان وقد ذكرت لي أنها ذات يوم كانت بتعمل في طعمية من الكبكي مع أمها في الراكوبة فأنكشح فيها الزيت وشوه يدها ولذلك فهي تكن له كراهية شديدة .

خلّي بالك تنظير سحلب ... او على وشك

Quote: خلّي بالك تنظير سحلب ... او على وشك

إتكلم عربي أو فلتصمت ..
صامولة تفجخك .

عربي لتمت بـ(قيظك) دا خليتو ليك ياخوي

جهلول أفندي المدعو ود البشري
اتا بتتذاكي وتجرجر كدا على منو ..؟؟
في البداية ما كنت عارف ذاتو (قيظ)دي مفردة عربية وعندها معني في القاموس ولما
وريتك أنو معناها شنو عايز تنطط في حتة تانية....؟
طيب تعال يا شاطر افندي وريني الخطأ اللغوي واللا النحو واللا البلاغي في
تموت بقيظك شنو ..؟؟؟؟؟؟؟؟
مرة تانية:
القيظ هو الحر الشديد ( ما حلاوة لكوم) ..
الحر الشديد ممكن يقتل زي ما الغيظ ممكن يقتل .
اها الخطأ وين يا بتاع قطيع الطير إتا ..
موش قبل كدا شبكتنا قطيع بط ووز وبجع واللا نسيت ..؟؟

Quote: موش قبل كدا شبكتنا قطيع بط ووز وبجع واللا نسيت ..؟؟

نسيت

Quote: نسيت

وتيييييييب ياخ

.

طلحه ياعمك

جمعة مباركة

والف مبروك فوز الماتدور

توقعات في السلك.....

وياريت تتوقع لينا فوز الزعيم بكره....!!

هلا يا هارون دياب
شكرا على المرور
وبصراحة كدا في المريخ اخطاء وفوضي وعشوائية ومجاملات
من شانها أن تهلك النادي تماما ولا اتوقع له مستقبلا أفضل
طالما بقيت هذه المسالب تنخر في كيانه حد الإنهيار .

Quote: وبصراحة كدا في المريخ اخطاء وفوضي وعشوائية ومجاملات من شانها أن تهلك النادي تماما ولا اتوقع له مستقبلا أفضل طالما بقيت هذه المسالب تنخر في كيانه حد الإنهيار .

كلام تمام ياطلحه

عايد من السودان بعد اجازة شهرين

كنت قريبا جدا من المريخ.......

الفوضي اصبحت هي السمة البارزة

المريخ اصبح ضحية لبعض المنسوبين اليه....!!!!!

الوالي موجود....اذن المريخ موجود

وهذه ام الكوارث....لان المريخ علي

مدي تاريخه لم يكن اشخاص انما كان كيان

منضبط بالمؤسسية والعمل الجماعي

اتمني صادقا فوز المريخ اليوم

فربما تكون بداية لعودة صحيحة في

كل المجالات .

مودتي

غايتو يا هارون دياب مرات ( كثيرة ) بتعجبني شديد والله .. (كلامك الفوق دا مثال ) .
ومرات ( قليلة جدا) غير كدا ..

.

في مداخلة بهذا البوست لكنها ضلت طريقها إلى مكان آخر كتب جرجير الشهير بود البشري :

Quote: زوووووووووووط ثم زوووووووووط اخري

يقصد هزيمة مريخ الفوضي والعشوائية بهدفين حتى لحظتها.
وكنت قد قلت للأخ هارون دياب :

Quote: بصراحة كدا في المريخ اخطاء وفوضي وعشوائية ومجاملات من شانها أن تهلك النادي تماما ولا اتوقع له مستقبلا أفضل طالما بقيت هذه المسالب تنخر في كيانه حد الإنهيار .

وهكذا تصبح زوووووووووط المدعو جرجرة مجرد تحصيل حاصل .