Post: #1
Title: تجمع المهنيين السودانيين: الخميس تعالوا العربي من كل حتة
Author: بيانات سودانيزاونلاين
Date: 02-06-2019, 04:17 PM
03:17 PM February, 06 2019 سودانيز اون لاين
بيانات سودانيزاونلاين-فنكس-امريكا
مكتبتى
رابط مختصر
عشان الشهداء
وعشان نعدل الحال وعشان ضحايا المعتقلات الخميس للوطن وللجميع ما لي ناس العاصمة بس
تعالوا من الريف القريب يوم الخميس للسوق العربي كل الثوار من شمال الجزيرة القري القريبة ( باقير .. الجديد..المسعودية...النوبة ..) وناس النيل الابيض القراب جامعة بخت الرضا والدويم القطينة ..) ناس شمال الخرطوم نهر النيل القريبة ) وكل مدن وأحياء العاصمة بحري وشرق النيل وسوبا وام درمان وامبدات والجيلي والخرطوم بري صحافات اركويت مايو والازهري والكلاكلات .
تعالو من اي حتة قريبة وتعالو بدري مع الموظفين الصباح تحسبا لأي طارئ وعشان ما تلفتو انتباه ممكن تتصرفو كالآتي :-
١/ الموظف أكيد بكون في مكتبه ومحل شغلو لحد قريب انطلاق صافرة البداية وكده ما بلفت انتباه .
٢/ الجايين مخصوص من الثوار للمظاهرة في خيارات كتيرة ممكن يعملوها بدون ما يلفتوا انتباه
- كل ثلاثة اربع اصدقاء ممكن يخشو المطاعم الكافتيريات ستات الشاي الاسواق .. الدكاكين مول الواحة. ..عمارة الدهب..برج البركة....اسواق ودكاكين الموبايلات...المساجد....البنوك ال في السوق يعمل عاوز يصرف شيك يحول يعمل اي معاملة...
خشو الخطوط الجوية..وكالات السفر...المكاتب الحكومية... المستشفيات العامة والخاصة زيارة مريض أو ممكن يعملوا شيرنق يدخلو وأحد للكشف و٥ مرافقين...
- الحدائق العامة في شارع النيل وتحت كبري الحديد لناس بري ومستشفى المعلم والحدائق والمواقف الجنبو عشان يكونو قراب من شارع النيل أو القصر أو الحرية أو السيد عبد الرحمن .
- مواقف المواصلات العامة في جاكسون وأبو جنزير وجنب الجامع منتظرين مواصلات .
- الجامعات القريبة جامعة الخرطوم والنيلين ومعهد الكليات وكليات الطب وكافتيريا الكليات أو الجامعات جايين زيارة لي صحبانا.
_ خشو الدوائر الحكومية زاتها القريبة من السوق ومن الشوارع الرئيسية كل مجموعة عندهم صحبان هناك يمشو يزوروهم وينتظروا .
كده بتملوا كل الخرطوم السوق العربي وبتكونوا قريبين من الشوارع الرئيسية المتوقع السير فيها ولحظة الهتاف بتطلعوا من كل حتة زي يوم الحشر وبتخلعو النظام زاتو .
كده بتجو بدري وبتلقوا الشوارع كلها ثوار في الوكت المناسب ولا يقدر أمن لا كجر يحاصر كل القيامة دي وح تقوم قيامتهم
وان شاءالله القيامة تقوم
ارح مارقة
موت وحياة بقت ما فارقة
ارح
Ok
|
|