دعـوة خاصة لبورداب الخرطوم.

بورداب الخرطوم انتو الروعة.. وانتو أحلى ناس
ناذر الخليفة ....سفيان.....الطاهر ساتي ...تبلدينا..... نجوان....عبد المنعم سليمان...وليد الشفت...سامي عبد الوهاب...وواسطة عقدكم الفريد الأستاذة إحسان عبد المتعال وبقية حبات العقد الفريد.

هذه دعوة مني لكم لحضور زواجي المقرر إقامته في الصيف الجاي بالتزامن عرس ناذر الخليفة ,,والذي سوف أقدكم به كأنني أول واحد يتزوج في المنبر دا ..ولكن قبل ذلك وبما إنو الدنيا نهاية أسبوع.. تعالوا نحن أخوانكم الوطولين من البلد عندنا استفسارات مهمة شديد ....طولوا بالكم معانا.
الاستفسار الأول:
في نهايات القرن الماضي كان يجوب شوارع الخرطوم رجل ضخم الجثة ..نظيف الملبس يسير ببطء شديد .. يعرج قليلا في مشيته يحمل (سبت) أبيض يحوي بضاعته التي كان يعلن عنها أثناء سيره بصوت جهور قوي وبلغة عربية فصحى بقوله :-

عَنْبَرْ خَامْ... وكُحْلِ طَََشاش العيون...
ديهان الرطوبة.... وديهان الحساسية.... وديهان البهق.

هل منكم من رأى هذا الرجل مؤخرا.فقط أتمنى أن يكون بخير ولا يزال يمارس تجارته..لأني ارغب في شوية من( كحل طشاش العيون).

ولكم الشكر
أخوكم: أنا حسن.

زقاق الفول الكائن تحت فندق النخيل بالسوق العربي حيث اكبر مجمع لمطاعم الفول في العالم ..حيث يتعين عليك أولا أن تدفع قيمة الوجبة..ثم تحمل (الماركة) وتمشي تكابس بالشباك لبتاع (القدره) وبعد داك تكابس فوق صحن الشطة..وبعد تضمن فطورك في إيدك تقوم تكابس في الطاولات عشان تلقى ليك فرقة تخت صحنك وتضرب فولك واقف على حيلك وتتخارج كأنو ما حصل حاجة وبراءة الأطفال في عينيك.المحلات دي لسه موجودة؟

السؤال أعلاه مهم جدا لأنو عندي (ماركة) طلب فول مدفوع قيمته لا تزال في جيبي محتفظ بيها من سنين وعايز اجي اصرفا.

يا شباب عبرونا بنظرة دا أنا بحبكم والله واليومين دي راكب موجة حنية كدا ومتلبس في حالة شفافية ما مفهومة .
زقاق القراصة

الزقاق الشهير بزقاق القراصة في قلب السوق العربي بجوار أبراج بنك الخرطوم الكائنة به المطاعم الوحيدة في العالم التي تقدم نفس الصنف على مدار اليوم (فطور ..غداء ..عشاء) نفس الأصناف: قراصة (تخينة) بالروب.... قراصة بالدمعة... قراصة بالتقلية... هل لا تزال أبوابه مشرعة لتعاطي القراصة.؟؟

Quote: في نهايات القرن الماضي كان يجوب شوارع الخرطوم رجل ضخم الجثة ..نظيف الملبس يسير ببطء شديد .. يعرج قليلا في مشيته يحمل (سبت) أبيض يحوي بضاعته التي كان يعلن عنها أثناء سيره بصوت جهور قوي وبلغة عربية فصحى بقوله

معاذ الراجل ما زال يجوب شوارع الخرطوم بس اصبح نحييييف الجسم وسسسسسخ الثياب بالكاد

يستطيع السير يمد يده كثيرا صوته خجول وخفيض ويتحدث باللغه مكسرة ويقول كرامة لله ..

معاذ قال:

Quote: في نهايات القرن الماضي كان يجوب شوارع الخرطوم رجل ضخم الجثة ..نظيف الملبس يسير ببطء شديد .. يعرج قليلا في مشيته يحمل (سبت) أبيض يحوي بضاعته التي كان يعلن عنها أثناء سيره بصوت جهور قوي وبلغة عربية فصحى بقوله

وردّ منعم:

Quote: معاذ الراجل ما زال يجوب شوارع الخرطوم بس اصبح نحييييف الجسم وسسسسسخ الثياب بالكاد يستطيع السير يمد يده كثيرا صوته خجول وخفيض ويتحدث باللغه مكسرة ويقول كرامة لله ..

يا زول إنت مطول خلاس...شوف زولك ده ما لحق امات طه؟؟

اواخر القرن الماضي؟؟؟؟؟

أحسن لك أرجع قبل ما تظهر الحاجة تسأل عنك في تلفزيون أم درمان ...

Quote: معاذ الراجل ما زال يجوب شوارع الخرطوم بس اصبح نحييييف الجسم وسسسسسخ الثياب بالكاد يستطيع السير يمد يده كثيرا صوته خجول وخفيض ويتحدث باللغه مكسرة ويقول كرامة لله ..

الظريف عبد المنعم
يا اخوي نحن على الهبشة بالله ما تدينا معلومات مغلوطة..دا ما زولي ولا حاجة.

تعرف يا منعم شحادين الخرطوم كنت تقريبا عارفم كلهم وعارف اماكن تواجدهم التي لم تكن تتغير وحافظ الاسطوانات بتاعتم ..وفيهم جزء كبير كانوا مستهبلين ولا محتاجين ولا حاجة اكتر من مرة صادفتهم في السينما...أظرف شحادين كانوا ثلاثي عميان تلقاهم واقفين صف وينشدوا باصوات جميلة جدا ..
يا منعم خلينا من الكيزان ما عندي اي قصد سياسي والله بس عايز اتونس معاكم بنبض المدينة زمان وهسي.

Quote: اواخر القرن الماضي؟؟؟؟؟

الارباب ابو حريرة..
ياابو حريرة انا قصدي القرن بتاع الانجليز والاستقلال والحاجات دي مش القرن بتاع المهدية الزمان داك .

يا معاذ ...

صدقني إنت خلاااااااااااص فقدت حنان وبقيت تهضرب !!

يا زول أثبت وبطل الجرسة .. عرس هو ولا عيد ؟!!

Quote: يا معاذ ... صدقني إنت خلاااااااااااص فقدت حنان وبقيت تهضرب !! يا زول أثبت وبطل الجرسة

يا ابو النيز ناس الخرطوم ديل الظاهر عليهم كلهم بقوا برجوازيين وما قاعدين يمشوا في أسواق البوليتاريا.جيب ليك كباية شاي وخليك معاي نتونس شوية.
بمناسبة الشحادين
أتذكر وهمة كان تقلي واحد دجال ملتحي لامي الناس حوله ويتكلم عن الموت والجنازة وكيفية غسل الجنازة..حتى يستحوذ على اكبر عدد من الناس ثم في صورة مسرحية يطلب من احد الحاضرين التبرع بتمثيل الجنازة, فينبري واحد يكون واقف في الصف في حين انو في واقع الامر شريك للدجال. يتبرع وينبطح في الارض ويمثل دور الجنازة...وعندما ينتهي الشيخ الدجال من الدرس ويكون قد اوصل الجمهور لدرجة عالية من الروحانية والايمان ويكون البكى بكي والقاعد يمسك في دميعاتو بالقوة ..في هذه اللحظة يفتح الشيخ شوال بجانبه ويقول مخاطبا الجمهور ..وعندنا يا اخوننا مجموعة كتب عن الاخرة والموت والجنازة وسعر الكتاب الف جنيه وممكن نديك تلاتة كتب بالفين. فيتخطف الجمهور الكتب في لحظات.!!!
الزول الدجال دا لسه قاعد؟

معاذ


هسع انا بعرف 3 بس في السوق العربي كله ال ما شحادين

!!!!!

Quote: في هذه اللحظة يفتح الشيخ شوال بجانبه ويقول مخاطبا الجمهور ..وعندنا يا اخوننا مجموعة كتب عن الاخرة والموت والجنازة وسعر الكتاب الف جنيه وممكن نديك تلاتة كتب بالفين. فيتخطف الجمهور الكتب في لحظات.!!! الزول الدجال دا لسه قاعد؟

قااعد بس بدل الكتب إتطور وبقى يوزع دي في دي ..

Quote: قااعد بس بدل الكتب إتطور وبقى يوزع دي في دي ..

يا ابو النيز زولك ده ما عندو حاجة لي سلمى حايك؟

Quote: قااعد بس بدل الكتب إتطور وبقى يوزع دي في دي

طيب يا ابو النيز
كان في واحد دجال تاني برضو ملتحي وتبدو عليه علامات التقوى والورع اول ما البص السياحي يقفل يركب ويقيف مواجها الركاب ويعرض مجموعة كتب دينية للاطفال ويلقي على الركاب خطبة عصماء عن ضرورة شراء هذه الكتب للاطفال وفي النهاية يزعم ان قيمة الكتاب الواحد (500) جنيه الا انه مستعد لبيع الخمسة منها بالف جنيه فقط عملا بمقولة اعمل المعروف واريمه في البحر!!!!.
ما تقول لي برضو قلب سيديهات!!
انت الليلة مالك بقيت قطيم كدا؟

عمر الفاروق
من قبيل اقول يا ريت يجي صاحبي عمر مافي زول في ناس السودان فاضي يتونس معاي

بمناسبة الجشع في الحصول على الكاش.
في واحد بتاع كافتيريا عندكم في امدرمانكم دي. ما تسألني اسم الكافتيريا شنو.
الراجل دا جشع وطماع بصورة رهيبة والغريبة محلو شغال لدرجة شوف عيني اخر اليوم بشيل القروش في شوال عشان يمشي يحسبها في البيت.
أها عمك دا ما عندو ثقة في العمال البشتغلوا معاهو اخر الشغل بعد يقفل المحل يقوم بتفتيش العمال تفتيش دقيق جدا قبل الانصراف.لو تصدق والا ما تصدق بيصل معاهم لدرجة يطلب منهم يملصوا كل الملابس ويقيفوا قدامو (ملط) لزوم التاكد وكدا..ومن ثم ينصرفوا مكسوفين.

صنفرة:-
عشان ما تمشي بعيد لم يسبق لي العمل معه لكن حدثني بذلك ناس كانوا شغالين عندو.

Quote: هسع انا بعرف 3 بس في السوق العربي كله ال ما شحادين

يطلعوا مين دول؟.
يا منعم كنت قافل عليك في البوست دا شديد
لانو عارفك راجل ظريف ووناس.
بس الظاهر مش في كامل المود تبعك.

يا معاذ ياابني انت داير تزوج تاريخ الخرتوم في العقد الماضي وبتسال عن اهلو ؟ العرس ما بقي زي الفاست فوود بالكرديت كارد وانت شايل ماركات الفول وحايم لليوم ؟ بعدين ناذر دة بيتزوج في الصيف ليه هو داير يعزم السحائ ؟

Quote: العرس ما بقي زي الفاست فوود بالكرديت كارد وانت شايل ماركات الفول وحايم لليوم

أبو بكر ..سلام
مش في فيلم اسمو (الرصاصة لا تزال في جيبي)
برضو ماركة الفول لا تزال في جيبي بس المصيبة يكون مطعم الفول بقى شغالة بالاسبان.
انعل ابو العولمة ذاتو.. يعني كل حاجة اتغيرت!!؟؟

يا تماضر الخنساء صباح الورد
شكرا.... عقد الجلاد إبداع .
لهم التحية.

ابلغ شحاد أقابله في حياتي في احد مساجد اركويت.
هو اصلا شحاد في شكل مجنون..وأغلب الظن كان مدرس لغة عربية والا شاعر وحصلت ليهو مصيبة
وقف بعد الصلاة على باب المسجد وخطب المصلين أتذكر من خطبته العصماء قوله :
أنا رجل ابيت على الطوى
أفترش الارض والتحف السماء
تارة اجد جيفة اشارك فيها كلبا ضالا وتارة لا اجد.
غايتو ينفع مذيع بس البلد ضيقة ..

الحبيب معاذ
لك التحية

والله اقول معجب بث ..

وتعليقى خلى يكون بليل بعد العشاء

قول كويس

تسلم

عاصم ماش..صباح الورد
انت حاليا في السودان والا في مصر؟
لو في مصر زور عني الست ام هاشم وسيدنا الحسين
واتذكرني لما يكون قدامك قدح الكشري.

في الخرتوم..
جامعة النيلين..
كلية العلوم..
قسم الجيولوجيا..
ده كان أكتر قسم بتاع فوضى
الداير يخلط كلو يجي هناك في الكافتيريا فوق..
الأساتذة..الدكاترة ناس مرحة كده وظريفة..
دكتور عبدالله ..ياربي لسه قاعد في مكتبو والطلبة داخلين مارقين ..


معاذ ..أنا كمان واحشاني الخرتوم ..والمكان ده بالذات كده..

Quote: دكتور عبدالله ..ياربي لسه قاعد في مكتبو والطلبة داخلين مارقين .. معاذ ..أنا كمان واحشاني الخرتوم ..والمكان ده بالذات كده..

تماضر الخنساء
تعرفي الجامعات دي ما في حاجة بتتغير بسهولة نفس الحاجات في جامعة الخرطوم الكان بحكوا لينا عنهاالخريجين القبلينا لقيناها وخلينا زي ما هي.
هسي الدكتور الظريف بتاعكم دا تلقيهو قاعد في مكتبو وملخوم اللخمة بتاعة الدكاترة ديك ونفس الناس مارقة وداخلةونفس الفوضى الجملية دي.

يا معاذ ياخوي الله يبسطك زي ماتبسطنا وتفرج علينا هموم وتفك تكشيرة وش المكنة الشايلنو دا.

أما عن سؤالكـ عن الجماعة ديلـ والله علمي علمك.

وتعال نبراك(من براية) شوية الليلة.

تصدق يا معاذ أنا ساقط خرطوم وباصيت بحري بالحركروكـ لكن مقفل امدرمان(القديمة) يعني اي حاجة حايمة ولا قايمة ولا نايمة في الخرطوم ماتسالني منها لو شحاد لو رئيس وزراء.

لي يومي ويومك دا وحياة اولادي ما بميز اسامي الشوارع البسمعا دي عبيد ختم والسيد عبد الرحمن وهلم جراااااا.

يعني بطلع من صباح الرحمن من مكي لي شارع ازهري لي كوبري شمبات للكبري التاني بتاع الحديد داك لي شارع الجامعة واخرم بي مركز تطوير الادارة دي شارعا قريت اسموا قبل شهر تقريباً مع اني شغال هنا لي سنوات(عبد الله النور) والعكس.

لكن لو بتسأل عن (شحاد) ولا (شماشي) اي والله بعرف معظم الشماشة بتاعين امدرمان هسي ماشا الله بقوا في البلدية وربنا فتحا عليهم حتى لو عاوز( جزار) او (تشاشي)في سوق امدرمان بجيب ليك خبرو قطع شكـ. بس حلة ناس عمر الفاروق دي اعفيني منها كلها غبار (وبعر) ما قاعد امشي هناكـ( ابداً)

بتاع الكافتريا دا والله اعلم جوار السينما انا اقول من زمان شايفك وين(ماتنكر) لليلة مذكر شكلك وانت بترمي في قشر البرتكان في الخلاطة والمريلة مرسوم فيها خريطة العالم(مامتاكد) جات كدا ولا من اثار الشغل!!

ماتنكر عشان التفتيش!!

عادي عمك على بتاع الدكان الفي حلتنا زمان كان بيحلف (الحبشي) الشغال معاه في الدكان في المصحف(مع انو الحبشي مسيحي) عشان كدا عمك علي فلس ومات والحبشي فتح دكان في الموردة قالو(سيوبر ماركت)

اقول ليك حاجة لو عاوز تسأل من بيت عطرون ظاااااااااااطو بوريك ليه.

لكن التخصص امدرمان.

ناس عمر الفاروق ديل ممكن يفتوك ناس كانو بتاعين لف ودوران تقول شنو طبع رشاشات.

يا رشاشة.

من عرفت انك هلالابي بقيت اقرا كتاباتك بي عين واحدا...زيك وزي احمد الريح اكتر زول بقرا ليهو لكن برضو بي عين واحدي.

ملحوظة..

في بوست الذين بدأوا العمر اسفاراً مكيفني وصف الكتاحة وصوت الطشاطا.

يا مسطول على طول.

اخ معاذ
كان في واحد ظريف جداً في السوق العربي كان بقعد جنب مواصلات الشعبيه وكان في كشك بقدم عرديب ظرييييف و(رخيص) الراجل تقريباً من سكان بحري وبلبس نضارات وبكون شايل مكرفون صغير كده وبتكلم في الكوره والبنات البايرات ...

حقيقه الراجل ظريف جداً جداً ومرح لدرجه مبالغ فيها لكن إختفى في الفتره السابقه وإن شاء الله يكون بخير


برضو في راجل لذيذ جداً بكون واقف في الشهداء واعتقد سامي بكون بعرفو لنو(مقفل) أمدرمان إسمو (أبودقن) بقيف جوار مواصلات بحري أو (ودالباشا للعماري) ودائماً ماتلقاهو في حوار مع الرئيس بوش في الموبايل وبتناقشوا في مشكاة الشرق الأوسط وعنده قفشات كده بوزعها لمن يشتغل كمسنجي لي حافلات بحري .. ومرات يشتغل ليمون وبيسمي ليمونو بـ(ليمون تل) ..
الراجل لذيذ جداً ومرح لدرجه لاتوصف .. الحمد لله الرجل إلى الان موجود ويمارس هوايته في رسم البهجه على كل من يمرون بموقف الشهداء ...

وألف مبروك مقدماً وإن شاء الله بيت مال وعيال

Quote: اخ معاذ كان في واحد ظريف جداً في السوق العربي كان بقعد جنب مواصلات الشعبيه وكان في كشك بقدم عرديب ظرييييف و(رخيص) الراجل تقريباً من سكان بحري وبلبس نضارات وبكون شايل مكرفون صغير كده وبتكلم في الكوره والبنات البايرات ...

يا محمد فرح.دا ما عمك الخزين الله يرحمو مات قبل 3 سنة كان راجل ظريف.

أتذكر يا محمد لما مطعم يكون فاتح جديد في واحد متخصص دعاية للمطاعم بس ما عندو مكرفون زي الخزين تلقاهو قاعد قدام باب المطعم وشغال اعلام: مطعم ود البلد اتفضوا...بامية ..بطاطس ..مفروكة,..شريفة...

Quote: برضو في راجل لذيذ جداً بكون واقف في الشهداء واعتقد سامي بكون بعرفو لنو(مقفل) أمدرمان إسمو (أبودقن) بقيف جوار مواصلات بحري أو (ودالباشا للعماري) ودائماً ماتلقاهو في حوار مع الرئيس بوش في الموبايل وبتناقشوا في مشكاة الشرق الأوسط

ههههههههههه

Quote: وتفك تكشيرة وش المكنة الشايلنو دا

هههههههه
دا شنو يا سامي !!!

Quote: يعني بطلع من صباح الرحمن من مكي لي شارع ازهري لي كوبري شمبات للكبري التاني بتاع الحديد داك لي شارع الجامعة

تعرف يا سامي والله أنا بحسدك عديل كدا في مشوارك دا.

Quote: عادي عمك على بتاع الدكان الفي حلتنا زمان كان بيحلف (الحبشي) الشغال معاه في الدكان في المصحف(مع انو الحبشي مسيحي

الظريف سامي
تعرف هنا في السعودية في حبش بس للاسف اتعلموا العربي بالطريقة السعودية
اول مرة قابلت حبشي هنا فتحت معاهو بالعربي بتاع حبش السودان الظريف داك لقيت ليك زولك ما فهام حاجة!!!

عمر الفاروق ...

Quote: يا ابو النيز زولك ده ما عندو حاجة لي سلمى حايك؟

ألداً بيوزع ديفيديهات كلها أغاني ملطوشة من اللقاءات بتاعت تلفزيون النيل الأزرق ..

معاذ

مالك عليك الله مقلب علينا المواجع , المنظر بتاع الزول الدجال والجنازة كان من المناظر الثابته لدي في بحري قدام الكنيسة , وموقف الحاج يوسف
, يعني بكون قاعد في الشباك وبعاين من فوق.

بعدين في مشهد تاني ما عارفك متذكرو ولا لا ؟؟ في مواصلات المحطة الوسطي بحري : في شاب مفتل كده يجي طالع في الحافلة وبصوت عالي
يقول: السلام عليكم , قال رسول الله (ص) أعطي السائل ولا جاءك علي ظهر فرس. ويقوم يمر علي الناس واحد واحد ......... المهم مرة في موقف
مواصلات تاني بعيد من بحري, وانا قاعد جا ليك نفس الزول , أول ما طلع في الحافلة كدة : في واحد من ورا قال : أعطي السائل ولو جاءك علي
ظهر فرس !!! طبعن الناس دي كلها قرقرقرقر لحدي ما زولنا اتعقد ونزل جري.

يا زول خليك صنديد خلي السكلي والجرسة قوم أرجع تم العرس ده........ أمال انا أقول شنو؟؟؟؟ مبروك وبيت مال عيال. ما تنسي شهر العسل
عندنا في هونولولو.



محمد عبد المطلب

Quote: زقاق الفول الكائن تحت فندق النخيل بالسوق العربي حيث اكبر مجمع لمطاعم الفول في العالم ..حيث يتعين عليك أولا أن تدفع قيمة الوجبة..ثم تحمل (الماركة) وتمشي تكابس بالشباك لبتاع (القدره) وبعد داك تكابس فوق صحن الشطة..وبعد تضمن فطورك في إيدك تقوم تكابس في الطاولات عشان تلقى ليك فرقة تخت صحنك وتضرب فولك واقف على حيلك وتتخارج كأنو ما حصل حاجة وبراءة الأطفال في عينيك.المحلات دي لسه موجودة؟

قرأتك وأنت تكتبني . والله أمتعتني وأنصفتني أعلاه بشكل شخصي حيث أنني أحد مدمني زقاق الفول وهكذا حال الدنيا ( ناس يدمنو زقاق المدق وحاري سان فرانسسكو وناس زي وزيك يدمنو زقاق فول) بتلك المواصفات التي أجدت في وصفها .
ثم دعني أضيف بأن زقاق الفول وبالرغم من أنه قابع في مكانه الا أن ستات الاكلات الشعبية زحفن الي هناك بمعني أنك فور دخولك الي هناك ربما ستستغني عن الذهاب الي حيث مطعم سلوي بتاع الرائب والتقلية لانو كلو موجود وأكلات طاعمة لاتقل عن مطعم سلوي .

ياخي سعيد والله بهذا البوست وواصل

خضر

مشكور على الدعوة يا معاذ.. رغم أني للأسف لست من بورداب الداخل...
وآخر مرّة عشت هناك ارجح أنه كان قبل ميلاد الشبكة العنكبوتية..

لكن ألف مبروك لك مقدما..
وتغلبها بالمال.. وتغلبك بالمال والعيال..