هذا البوست برعاية ملاح أم رقيقه

شارك أحد الأغبياء في مسابقة ثقافية وابتدأت المسابقة بالسؤال الأول الذي يقول

السؤال الأول: كم استمرت حرب المئة عام؟؟
أ- 116
ب- 99
ج- 100
د- 150
فكر هذا الشخص كثيراً ثم اختار تخطي هذا السؤال لعدم تمكنه من إجابته
وانتقل إلى السؤال الثاني


السؤال الثاني: أين تصنع قبعات بنما؟؟
أ- البرازيل
ب- تشيلي
ج- بنما
د- الاكوادور
اختار هذا الشخص أن يستعين بأصدقائه في الجامعة للإجابة على هذا السؤال أيضا


السؤال الثالث: في أي شهر يحتفل الروس بثورة أكتوبر؟
أ- يناير
ب- سبتمبر
ج- أكتوبر
د- نوفمبر
لم يستطيع هذا الغبي الإجابة وطلب مساعدة الجمهور

السؤال الرابع: أي هذه الأسماء هو الاسم الأول للملك جورج السادس؟
أ- ون
ب- ألبرت
ج- جورج
د- مانويل
طلب الغبي حذف إجابتين وبعد جهد جهيد توصل للإجابة

السؤال الخامس: ***** أخذت منه جزر الكناري اسمها؟؟
أ- طائر الكناري
ب- الكونغر
ج- الجرو
د- الفأر

عندها انسحب ذلك الشخص من المسابقة ولم يستطع إكمالها ، فمن أراد أن يشارك ولديه معرفة بالإجابات فبالتأكيد هناك جائزة قيمة غير أن الإخفاق في الإجابات يصنف من يشارك ضمن كوكبة أذكي أذكياء العالم والمشاركة قطعاً تقع مسئولياتها على عاتق المشارك كاملة.

السؤال الاول:
116

السؤال الثانى:
الاكوادور

السؤال الثالث:
نوفمبر

السؤال الرابع:
البرت

السؤال الخامس:
ممكن استعين بالجمهور؟؟؟؟؟؟؟؟؟؟

وجدتها ... وجدتها...

لكثرة الكلاب فيها فكلمة كلب عند الرومان تعنى (كناريا) .. وهم من اطلقو عليها هذا الاسم..

كدا خلاص بوستيك اتحرق واستنفذ غرضو ..

نزل بوست تانى ...

الله يخلى "القوقل"

الأخت العزيزة
راندا

بالله هو القوقل دة المثقف
كنت قايلاك أنت...

لوول


كل الود لك
و لصاحب الدار

غادة

هو طبعا يعنى انا المعلومات دى كلها كنت عارفاها لكن بس اتاكدت منها فى القوقل ما اكتر ...



صدقى الكلام الفوق دا "عشان بريستيجى ما ينضرب .. سمح)

أنزل بوست تاني يا رندا أنا جنيت يعني ولا سؤال تجاوبيهو صاح مبروك عليك معزومة غدا في زاد الخلا ولو عاوزه أم رقيه أو أم تكشو تيك أوي أدينا عنوان القوقل الجبتي منو الإجابات.

Quote: هو طبعا يعنى انا المعلومات دى كلها كنت عارفاها لكن بس اتاكدت منها فى القوقل ما اكتر ... صدقى الكلام الفوق دا "عشان بريستيجى ما ينضرب .. سمح)

هسى عليك الله يا لنا فى داعى غادة تزنقنى جنس الزنقه دى

الكلام الاجتهاد ...

(الكلام الاخلاق) على قول ......

الاخ ALMUMOR تحياتي:
ممكن يا اخوي تناولني ملاح ام رقيقة دا كأمانة الى ان تنتهي المسابقة وامكن ارجع لييك الحَلة؟؟

يا محمود يا أخوي أم رقيقة دي الراعي الرسمي للبوست لو ناولتك ليها الحكاية بتطرشق وإنت ما جاري سلك من جيرانكم زي أخوك الملا كل خميس نحرس ليك قناة النيل الأزرق في السهرة وخليك سوداني والله مرات كده أقرب أرجع السلك لي سيدو.

Quote: وخليك سوداني والله مرات كده أقرب أرجع السلك لي سيدو.

يازول السلك بنجر لكن امرقيقة دي في اوروبا من بندوقاالا من رمضان لي رمضان، وعشان قلنا ليك ادينا الملاح امانة داير ترجع السلك؟؟ لكن وبما انو الثقة انعدمت تب، الملاح ما دايرو وفي الفيك انعرفت،

يا محمود يا أخوي المسألة ما مسألة إنعدام ثقة و ضيق ماعون ، الموضوع يا أخوي بقي أشعة أكس ومعسكر إكس وكلو بسبب الإرهاب ، إنت في أوروبا يعني أم رقيقة يرسلوها ليك كيف دي لمن يفحصوها ويعيدو الفحص فيرتد إليهم فحصهم خاسئاً وهو حسير حا يقولو طوالي ده سلاح سري متطور والباقي إنت عارفو براك ، وما أظن يرضيك أمشي جوانتانامو عشان ملاح ويكه – طبعا ما أمشي بي مزاجي – يمشوني زي ما إنت عارف.
المهم في حاجات كده هلامية الشكل بتطلع من بعض المحار في أعالي البحار يمكن أن تكون زي أم رقيقة شكلاً والطعم عليك إنت أنا جني وجن الضواقه مكجنها في مويات رمضان أيام الجاهلية الأولى لمن كنت بدك رمضان و6 من شوال زاتو والليالي البيض. المهم لو عاوز وجبه مماثلة خليك في البيتزا على أن تكون thin كما نقلها إلى لغة الفرنجة أخونا عمر الفاروق ، وبرضو ضروري تنسي حكاية الجوانب المحشيه جبنه وخليها سوبريم أو بان بيتزا لا فرق والدفع 4 x 4. وبالمناسبة دي في السودان هنا عندنا بيتزا من شدة ما بلدية أنا قايله قراصه ده كلو عشان يوم كده سافرت بره البلد وللتعترني أكلت بيتزا وعملت مقارنة وخسرت الجولة كالعادة
وحدي يشعر بالسعادة ويمشي يختار البعاد
ناس بتلحس في ام رقيقة وناس بتلهط في الجداد
وبعد إنفلونزا الطيور دي الجداد بقي رخيص وإن شاء الله تجي قحة الخرفان وعمي الغنم ووجع بطن السمك

ولله يا خوي اسمك زاتو هوى خلييك من امرقيقة، هسع يكتبو كيف؟؟ نرجع لامرقيقة، ممكن ترسل خام يعني في شكل بودرة، لالالاللا يا اخوي بودرة بتودينا التوج، طيب..طيب..طيب.. شوف ليك فكي خليهو يعمل لامرقيقة كادوك ممكن تستعين بحبيب نورا لانو هو ذاتو شكلو كدا شكل فكي من قعدتو في الصورة، والفكي بواسطة اهل الخطوة بتصلني تب، لكن شايفك يا(.....) اسمك كتاحة عديييييل، شايفك زي بقيت تغاتت علي اظن ناس الخليج حا يقومو بالملاح، وانا اكون منتظر رمضان الجااااااي اكان الله سبحانه وتعالى مد في الاجل.

يااااااااااااااااااي انا بمووووووت في ال Thin Mother ده ..
اها يا الملا عمر ما وريتنا شعار الشركة الراعية ؟؟
بس أوعك تبقا لي زي باقي الناس وتجيب لي البت الحلبية ديك تغني وترقص وهي شايلة ليها ملاح أم رقيقة وبتغني ..
أم رقييييييييييقة .. وانا بطني ضيقة ..

عمر الفاروق
البت ياتا يا أخوي بتاعت حنة التاج وعصير أورنجا وشوفي ناس البيت كان ملاحي يبيت ، والله دي تعبوها تعب وعملت جنس قروش الله يزيدها ونمسك الويكه زاتها ونركب الهوا عشان ما نسحرها

قلت لى ام رقيقه تيك اوى ؟؟؟
وام تكشو كمان !!!

ياسيدى ما بنختلف ..
بس عليك الله البوست الجاى اعملو لينا برعاية صحن شية من سوق الناقه..

والله جنس بلادة
المفروض يكون عارف أم رقيقة أختراع حقنا
الحصة الأولي فطور في مدرسة التُكُل السوداني!!
وانا ما داير أتلايق معاك
عشان أثبت ليك أني فاطر بيها الصباح دة
خايفك تقوم (توايك) لي الأمور
زي عوايدك كلما تلقاني نسيت مفراكتي في الكيبورد
المرة الفاتت الماوس أنزلق وخلاني ليك معتمد أعتماداً كلياً
علي الطعمية و الذي منو

يا أخوي سلام

هييييع حبيب نورة، فكي كورة بس من قعدتك دي،قهقهقهق، ياخ ما تتوسط لينا لمولانا المُلا ممكن تقعنو؟ تقبل تحياتي.

أخي حبيب نوره
اليوم السعيد الليلهخ جابك يا فريع البنان
في كبوشية مشينا ذات مرة والممرات قليلة والنور قاطع وبالليل شديد جابو لينا ملاح فيهو صفيحه ونص ماء مطلق ، أها كل ما ندخل الكسره في الصحن تطلع معطونه ونبلع دون أن نلوك ، وفجأة إنتفض أخونا حمزة كأرشميدس وصاح وجدتها ، فقد تعمق في الغوض داخل الماعون ووصل إلى قاع الصحن وقبض على الجوكر الوحيد في اللعبة.

Quote: وام تكشو كمان !!!

ووووواووووو رندا بتعرف ام تكشو

قالوا مسطول لاقى وليد 500 .. طخاهو طلقه وقال ليه..
للعلم .. انت بقيت وليد 499 ...

ياااي .. انا اعرف ملاح مش عارفه شنو ديا (سورى اصلى قبيل عملت ليهو كوبى وبيست صراحه ما قدرت اكتب اسمو)

دا مللا عمر هوا اللى جاب الاسم الغرييييب ديا..

تعرفى يا رندوية..
حاولت أظهى انو انا مثقفة "زيك"
و قدر ما فتشت فى القوقل على ام تكشو دى...
و حااااات الله ما لقيتها...
.
.
.

فكدى بينى و بينك بث
.
.
.

ام تكشو دى يعنى شنو

جاء في كتاب أبله نظيرة في الصفحة ما قبل الأخيرة أن أم تكشو هذه عبارة عن طعام – بالغت أبله نظيره وقلبت الهوبه كمان مش كده – المهم تري نظيره وهي التي تفوق زرقاء اليمامة نظراً وتكحيلا أن أم تكشو تعتبر وجبة غذائية متكاملة وغالباً ما تحتوي على (الماء، الكربوهيدرات، البروتينات، الدهون، الكولسترول، الأملاح المعدنية، والفيتامينات).
هذه العناصر الثمينة من الأهمية بمكان للجسم فهي تشكل (الهموجلوبين وكريات الدم الحمراء والهرمونات والأنزيمات ونشاط الغدد والخمائر الضرورية لعملية الهضم وبناء الأنسجة الجديدة وعزل الجراثيم والسموم الناتجة عن الشرايين الدموية.
غير أن الحاجة ست النفر تري ما لا تراه أبله نظيره وتقول ست النفر ممازحة أن النفر في المطعم طلب واحد ويمكن أن يكون ساده أو مصلح ، وأن إضافة شي من العدس لطلب الكبده يطلق عليه جرحها ويجوز العكس بأن تطلب عدساُ فيجرح بشي من دمعة الكبدة ولا بأس بأن تخطي الكمشة فيصيب صحنك قطعة أو قطعتين بلاش دون كاش – تقول ست النفر هذه أن أم تكشو هي في الأصل كلمة مركبة من "رقيقة" بنت الملاح المعروف لدي جميع السودانيين والراعي الرسمي لهذا البوست وتكشو وهي مشتقه من الكشنة ببصل كانت أو بدون ، وإلتقاء ساكن بساكن كما يقول أهل اللغة كانت نتيجته هذا المنتج.
وتري بت اللباب لتخصصها الواضح من إسمها (من البابا للباب على طريقة مكاتب الشحن) ومن واقع خبرتها في الدليفري أن أم تكشو هذه بعيداً عن مكوناتها تؤدي بالقوم إلى العراك والشجار ، فقد قال الشاعر الكبير قصيدة عصماء مطلعها:
أكلوا أم تكشو وقاموا إتنتشوا
فقد جاء في الصحاح في شأن صواني الغدا وصحون الملاح أن عبارة إتنتشوا هي المرادف لي تناوشوا وتهاوشوا والنتش هو العض بالنواجز أو الخطف على حين غرة بحسب اللقمة وموقعها من الصحن وبعدها من فم المخطوفة منه على أن يكون فيها إرتداد يحاكي إرتداد الهزات الأرضية في الزلازل أو شد شريط مطاط.

من الروايات أعلاه نجد أن أم تكشو هي أكلة بدائية شأنها شأن الكثير من أكلاتنا لم يطالها التطوير أو التحوير فبقيت أم بالرغم من مرور أكثر من ثلاثمائة عام على إكتشافها. والمعني بين والله أعلم

أم رقيقة أكل الشباب
أحلى أحلى من الكباب
وين يا أم رقيقة

قرر قرر قرر شديد

واقترح البوست الجاي برعاية شية الجمر

نفسي في شية جمر
شطة من حولك تمر
وانت عارف انو
عارف انو
جوعي فات حد الصبر


تحياتي الملا عمر

نهال الطيب
انتي زولة حقارة شديد
هسي مداخلتي التحت دي ما قبل مداخلتك.
ليه تجي تعملي مداخلتك الجات بعد مداخلتي فوق من مداخلتي.
عالم عايزا شبك بس.

الملاعمر عن إذنك
معاذ حسن ياخ انت أم رقيقة دي لازم معها نخلي البوست يتلايق شوية ولا كيف

بعدين انا أتشبك معاك كيف يعني عشان تهوجني بقصيدة محل ما أطير يغلبني

اها اقص الفستان لعرسك ولا ما معزومة

رندا
واحد سالو بتعرف ام تكشو
قال ليهم هى قالت بتعرفنى!!!!!!!!

الملا عمر
امبارح بس نجحت في امتحان رخصة القيادة(انجاز مش)
المهم واحد مصري رسب في الامتحان بسبب السؤال الاتي:

عندالدوار(الصينية بلهجة السعوديين) لمن تكون الافضلية؟
1- لمن بداخل الدوار.
2- لمن بخارج الدوار.

وبما ان (الدوار) الوحيد الذي يعرفه المصري هي (الدار او البيت) فلم يتردد في الاجابة ان الافضلية لمن بخارج الدوار. وعلل ذلك بانه لا دخل لمن هو بداخل دواره و جالس في بيته بافضلية السير في الطريق.

الله يطراك بالخير يا شيري
والحدق يفهم!!!

هنا الامريكان عندهم نكت فى "غباء" الشقراوات ...اللهم لا اعتراض على حكمك ..

قالو فى واحده شقرا عندها حصانين ما بتعرف تفرزهم من بعض اشتكت لى صاحبتا الشقرا

قالت ليها اقطعى نص ضنب واحد وتعرفيه انه عنده نص ضنب والتانى ضنب كامل ..قامت عملت كده وبقت تفرزهم واحد بى نص ضنب والتانى ضنب كامل

للتعترو ابو ضنب كامل نط فى السور قطع جزء من ضنبو

تانى اتلخبطت ..رجعت لى صاحبتها قالت ليها الاتنين ضنبهم مقطوع

قالت ليها ما ممكن يكونو الاتنين ضنبهم بنفس الطول قيسيهم

لما قاستهم لقتهم مختلفين ..ضربت ليها قالت ليها كلامك صاح ..الاسود ضنبو اطول من الابيض...


ولا شماتتا

فاتني أن أحي الرائعة شيري في من إبتدع عبارة هذا البوست برعاية ... وأذكر أن ول وآخر بوست بهذه الرعاية الكريمة كان برعاية دهن الكركار إن لم تخني الذاكرة.
التحية لشيري أينما كانت والتحية أيضاً موصوله للأخ خالد العبيد وللأهل بقرية الشهيناب وأم كتي والأخ العزيز المبارك بالإمارات العربية المتحدة وشكراً الغساله وصلت بس ما طلعت LG زي ما قلت وبرضها ما حداشر كيلو وويل للمطففين

الحبيب ملاح عمر
سلام بطعم أم رقيقة وأم فتفت وأم فرقاً عراض

إنت عارف عملية فتح (البواسيت) دي ما ساهلة فأهنئك على فتح البوست أعلاه

وصدق المثل البقول
البوست البجيب تماضر أفتحو وأستريح

عندنا قريبتنا بتحاول تلقط الإنجليزي من خشوم الناس

تقول ليك
الموضوع دا أنا (كلصنتو) وتقصد كنصلتو
ولا تقول ليك
والله ولدي إنتهى من (السيوتر) الأول وتقصد (السمستر)

تحياتي ليك ولجميع النفر الكريم المود هنا

عليك الله يا ملا عمر ....

علاقة البنات الحلوات ديل بام رقيقة شنو ....

عزيزي الوقور الملاعمر

بالأول هات ملاح الرعاية و بعدين نجاوب.

عنوان البوست هداني إلى أفكار جميلة.
يعني ليه في السودان ما تقوم جمعيات نسوية لإعادة الهيبة و السمعة الحسنة لكل أكلاتنا الشعبية و تطويرها ..
فيقمن بعمل عدة أعمال خيرية و إنسانية برعاية :
أم رقيقة ( و كل مشتقات البامية )
كل أنواع العصائد
كل ما تتم عواسته على الصاج
الحلو مر ( هذا الإختراع الفنجري الذكي ) : و لا أدري لماذا لم تدخل مخترعته موسوعة غينيس
و أشياء أخرى تدخل في باب التجميل و إعداد العروس

دمتم

الرائع جلال بن داؤود
مشكلة مشاكلنا أخي الكريم الـ marketing والـ Packing فكلا الأمرين لا نجيدهما بالرغم من جودة بضاعتنا في الكثير من الأحيان ، فلك أن تتخيل عمليات التدوير التي تطال الكثير من علب النيدو والفورمست على إختلاف أحجامها وأيضاً علب النيفيا أيام أن كان التمباك كيفاً لا كماً فقط ناهيك عن الكراتين والعبوات البلاستيكية لمختلف زيوت العربات.
صحيح أن في الأمر شئ من إصحاح البيئة لكن مع شديد الأسف وفي كثير من الأحيان يكون على حساب صحة الإنسان ، فلك أن تتخيل فول بي زيت شل أو موبيل.
المشكلة الأخرى التي أدت إلى تحجيم رواج المائدة السودانية هو أننا لا نملك روح المغامرة ، فيمكن لأي ست أن تقوم بإكتشاف خليط جديد من ملاح تقليه على سبيل المثال مع ملاح رجله وليكن الناتج رجليه أو أى إسم يتم تسجيله رسمياً ولا يقتصر الأمر على هذا فقط بل يمكن أن يكون الملاح مجففاً وجاهزاً للإستخدام شأنه في ذلك شوربة ماجي ومرقة ماجي وأن لا تتجاوز طريقة الإستعمال أن تغلي الماء ثم تضيف الخليط وبالهناء والشفا.

Quote: عليك الله يا ملا عمر .... علاقة البنات الحلوات ديل بام رقيقة شنو ....

الأخ ياسر نجيله
الرقة في الكل والمعني بين والله أعلم

أخي الشين بدر الدين حلا
قريبتكم هذه تحاكي أو قل looks like واحده جارتنا جار عليها الزمن والمجتمع فهي في العقد الرابع أو ربما approaching الخامس من عمرها المديد بإذن الله فتنطلق على سبيل المثال كلمة دولار "دونار".
أشاطرك الرأي أخي أبو أواب أن عملية فتح البواسيت وتبسيتها في المنتديات أمر جد عسير وعصي ، وهذا ما جعل معظم مشاركاتي ها هنا تقتصر في كثير من الأحيان على التعليق على الأنباء أو على البوستات لأنني كنت حتى قبل دخول الإنترنت قريتنا وإستبدالنا للشبشه والعنكبوت بالشبكة العنكبوتية ؤمن إيماناً لا يخالطه شك في أن كل شاة معلقة من عصبتها ، غير أن سرعة إيقاع العصر جعلت معظم الشياه إن لم تكن كلها تعلق من خطاف في أى جزارة ، فحق لى أن أعلق وجاز لي ذلك
التحية كل أهلنا الحلاوين الذين ينحدر من نسلهم بدر الدين والتحية كل الذي مروا من هنا والتحية للزهر رد التحية أم عمل نايم.

جارتنا عربسات السرور بتها المدرسة المصرية قشطتها كف المرة طوالي مشت زعلانة المدرسة قالت للمدرسة كيف تدي بتي بأم كف علي حسب قولها
طبعا المصرية قالت ليها أنا ما اديتهاش بأم كف أديتها باللألألأم
فلانة طوالي قالت ليها هو القلم بسوي كده عايني لوش البت دي هسه ده قلم

Quote: جاء في كتاب أبله نظيرة في الصفحة ما قبل الأخيرة أن أم تكشو هذه عبارة عن طعام – بالغت أبله نظيره وقلبت الهوبه كمان مش كده – المهم تري نظيره وهي التي تفوق زرقاء اليمامة نظراً وتكحيلا أن أم تكشو تعتبر وجبة غذائية متكاملة وغالباً ما تحتوي على (الماء، الكربوهيدرات، البروتينات، الدهون، الكولسترول، الأملاح المعدنية، والفيتامينات). هذه العناصر الثمينة من الأهمية بمكان للجسم فهي تشكل (الهموجلوبين وكريات الدم الحمراء والهرمونات والأنزيمات ونشاط الغدد والخمائر الضرورية لعملية الهضم وبناء الأنسجة الجديدة وعزل الجراثيم والسموم الناتجة عن الشرايين الدموية. غير أن الحاجة ست النفر تري ما لا تراه أبله نظيره وتقول ست النفر ممازحة أن النفر في المطعم طلب واحد ويمكن أن يكون ساده أو مصلح ، وأن إضافة شي من العدس لطلب الكبده يطلق عليه جرحها ويجوز العكس بأن تطلب عدساُ فيجرح بشي من دمعة الكبدة ولا بأس بأن تخطي الكمشة فيصيب صحنك قطعة أو قطعتين بلاش دون كاش – تقول ست النفر هذه أن أم تكشو هي في الأصل كلمة مركبة من "رقيقة" بنت الملاح المعروف لدي جميع السودانيين والراعي الرسمي لهذا البوست وتكشو وهي مشتقه من الكشنة ببصل كانت أو بدون ، وإلتقاء ساكن بساكن كما يقول أهل اللغة كانت نتيجته هذا المنتج. وتري بت اللباب لتخصصها الواضح من إسمها (من البابا للباب على طريقة مكاتب الشحن) ومن واقع خبرتها في الدليفري أن أم تكشو هذه بعيداً عن مكوناتها تؤدي بالقوم إلى العراك والشجار ، فقد قال الشاعر الكبير قصيدة عصماء مطلعها: أكلوا أم تكشو وقاموا إتنتشوا فقد جاء في الصحاح في شأن صواني الغدا وصحون الملاح أن عبارة إتنتشوا هي المرادف لي تناوشوا وتهاوشوا والنتش هو العض بالنواجز أو الخطف على حين غرة بحسب اللقمة وموقعها من الصحن وبعدها من فم المخطوفة منه على أن يكون فيها إرتداد يحاكي إرتداد الهزات الأرضية في الزلازل أو شد شريط مطاط. من الروايات أعلاه نجد أن أم تكشو هي أكلة بدائية شأنها شأن الكثير من أكلاتنا لم يطالها التطوير أو التحوير فبقيت أم بالرغم من مرور أكثر من ثلاثمائة عام على إكتشافها. والمعني بين والله أعلم

مبالغة
.
.

و لا أزيد