بوست بدل فاقد عن تجربة الفنان التشكيلي أبوشريعة أحمد

بوست بدل فاقد عن تجربة الفنان التشكيلي أبوشريعة أحمد


03-27-2007, 07:22 PM


  » http://sudaneseonline.com/cgi-bin/sdb/2bb.cgi?seq=msg&board=3&msg=1175019742&rn=41


Post: #1
Title: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-27-2007, 07:22 PM
Parent: #0

والله يا جماعة أمبارح بديت لي في بوست عن تجربة الصديق الجميل الفنان التشكيلي أبو شريعة أحمد...
ووضعت فيهو صورته ونموذج من أعماله...
الليلة وأنا في المكتب حاولت بس أشيل كلمة واحدة يعلم بي الله...فت كلمة...البوست اتكوجن لي واتبعزق جنس بعزقة في الدنيا دي...
أها زاتو هسي خليتو...
أقوم أعمل ليكم واحد جديد عن أبو شريعة؟؟


تحياتي ومودتي الكثيرة..

Post: #2
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-27-2007, 11:30 PM
Parent: #1

أبو شريعة ذلك الجميل....


والله مشتاقين ياأبشريعة ياااااااااخ


غايتو ديل حاجات كتاااااااااار...وكمان في قطعة واحدة بس.... طرب شديد خالص والله

ونواصل إن شاء الله

Post: #3
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-27-2007, 11:41 PM
Parent: #1

الدعوة موجهة للأخوة والأخوات التشكيليين والتشكيليات والمهتمين والمهتمات...لمزيد من الإضاءة على تجربة الفنان الجميل أبو شريعة أحمد...

ودونكم هذا الألق...



وهنا المزيد...



مودتي الشديدة...
ونواصل إن شاء الله

Post: #4
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-28-2007, 01:35 PM
Parent: #1

ريد أونلي ولا شنو؟؟؟

Post: #5
Title: Re: بوست بدل فاقد عن تجربة الفنان التشكيلي أبوشريعة أحمد
Author: Tagelsir Elmelik
Date: 03-28-2007, 02:51 PM
Parent: #4

ابو شريعة الدفعة
كان اول من استأنست بصداقته فى كلية الفنون الجميله, انست فيه التهذيب و الرقى
و شهدت خطواته التلوينية الثابتة المبدعة و تواضعه الجم
التحية لأخى و زميلى و صديقى الفنان ابو شريعة
تاج السر الملك

Post: #6
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-28-2007, 10:10 PM
Parent: #1

الفنان الجميل تي إس الملك...
تحية إعجاب وتقدير..
بالله طلعنا قرايب وأهل في خوة أبشريعة؟؟
وأنا وأقول الإحساس الغريب البشدني تجاهك دا شنو يا ربي؟؟
الآن فقط عرفت أن هذا البوست إز نوط ريد أونلي...
وخليك متابع معانا بي جاي..عشان تشوف سماحة الزول دا ساكت...





تحياتي لكل تلك الدفعة الجميلة...أحمد سعد،، نورين..الشفيع..أبشريعة..وكل العقد الجميل...

مودتي الكثيرة لك

Post: #7
Title: Re: بوست بدل فاقد عن تجربة الفنان التشكيلي أبوشريعة أحمد
Author: محمد المختار الزيادى
Date: 03-28-2007, 10:37 PM
Parent: #6

العزيز م م م عليك الله ما تشحتفنا بالقطاعي ارفع لينا كل الروعه دي دفعه واحده عشان ما يحصل لينا (كت) بوستات زي بوستاتك وبوستات دكتور شهاب بتخلي الواحد يستغرق فيها زمن طويل ,طمعانين في الزياده وتحياتي لهذا الرائع

Post: #8
Title: Re: بوست بدل فاقد عن تجربة الفنان التشكيلي أبوشريعة أحمد
Author: محمد المختار الزيادى
Date: 03-28-2007, 10:39 PM
Parent: #6

العزيز م م م عليك الله ما تشحتفنا بالقطاعي ارفع لينا كل الروعه دي دفعه واحده عشان ما يحصل لينا (كت) بوستات زي بوستاتك وبوستات دكتور شهاب بتخلي الواحد يستغرق فيها زمن طويل ,طمعانين في الزياده وتحياتي لهذا الرائع

Post: #9
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-29-2007, 01:59 PM
Parent: #1

الأخ الكريم محمد المختار الزيادي...
والله يا سيدي حضورك قاعد يفرحنا...ويا ريت لو الواحد بيقدر يرفع الأعمال كلها حتة واحدة...لكن مجابدة الدنيا دي ...بس خليها على الله...
أعدك إن شاء الله برفع المزيد من اللوحات ...
أشكر حضورك الدافئ...ودمت أخاً جميلاً..

محمود

Post: #10
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-29-2007, 02:43 PM
Parent: #1

أها..هاك الزيادة يا ود الزيادي...



وكمان دي برضها ..



وهنا المزيد..



وهنا...




ونواصل إن شاء الله..

مودتي الشديدة.

Post: #11
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-29-2007, 08:53 PM
Parent: #1

يا جماعة الحكاية بعد ما ريد أونلي ،،، أظنها بقت سي أونلى...



والله ما خسارة فيكم...شوفوا ساكت طيب

مودتي الشديدة.

Post: #12
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-29-2007, 09:16 PM
Parent: #1

نديها قشرة صغيرونة؟

للذين لا يعرفون وهم كثر...الأخ الجميل أبو شريعة...عازف مجيد على آلة الأورغن..وكان فردة العبد لله...ياما معطنا غنا لما قلنا بس.. أيام مفتوحة في نادي المكتبة القبطية بالخرطوم...ورحلات ناس المعهد..والجامعات ..وخاصة الفراعة..الله على ذلك الزمان..
(الكلام دا طبعاً حا يعجب ليك ناذر الشقي...) ،، لكن والله يا ناذر فكت عديل...هسي والله الواحد قرب يبقى بابا فزاري...قاعد أعزف لأولادي عشان يرددوا بعض الأناشيد في البيت....وعلى رأسها بكل فخر: أنا سوداني...وصه يا كنار...شفت الوطنية دي كيف؟؟ المهم...

بالله يا أبشريعة تتذكر لما معطنا ليك أغنية إبراهيم حسين ديك؟؟؟ خلاص يا قلبي كان خاصم..تتذكر الكان معانا منو في القروب الصغيروني داك؟؟؟ كمنجة واحدة والله واحد...لكن كمنجة عاصم الطيب دحين دايرة ليها زيادة؟؟ وأبو سريع عازف الباص جيتار المعروف ...وناجي حسن قاسم بتاع الجيتار العزاف داك ياخ ود شندي البقى يعزف مع ناس نمارق...

هسي دا تلوين ولا عزف؟؟ ما شاء الله عليك والله..



الله الله الله يا أبشريعة...

الجن الـ.... ياخ دا شنو دا يااااااااااااخ...



تسلم إيدك يا ولد...


مودتي لكم جميعاً..

Post: #13
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-29-2007, 11:58 PM
Parent: #1

قال ليك: لقد تم رفع صورتك بنجاح...

لكن هي صورة نصاح؟؟ عيني باردة والله..




يا سلام يا سلام

محبتي الكتيرة..

Post: #14
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-30-2007, 03:22 PM
Parent: #1

وعدنا بالمواصلة ..



شوف شديد خالص..



وكدا كيف؟؟



مودتي الشديدة..

Post: #15
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 03-31-2007, 09:13 PM
Parent: #1

يا جماعة العتالة دي حارة خلاص...
يعني في داعي هسي أقوم أعتل اللوحات دي من الصفحة التانية؟؟
قلة الذوق دي شنو يعني؟؟

محبتي

Post: #16
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-01-2007, 02:57 PM
Parent: #1

مشاهدة ممتعة



التحيات

Post: #17
Title: Re: بوست بدل فاقد عن تجربة الفنان التشكيلي أبوشريعة أحمد
Author: الجندرية
Date: 04-01-2007, 06:54 PM
Parent: #1

النبي شوفو العربي الحنكوش دا

هسي دي عتالةَ بتفتر
ولا دي عتالة من أساسو
دي لوحات مجنحة
دي فراشات

غايتو جنس الألوان

قال عتالة قال

الملافظ سعد

اها متيمنة ما تعتل وتشيل لينا وش البورد العكر دا بي الوان اب شريعة دا
الا كان اشيكك علي النادر

Post: #18
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-01-2007, 08:21 PM
Parent: #1

ها جماعة عليكن الله شوفوا لذاذة المرا دي...

أماني وتراث والعيال .. والله بيتنا نوَّر..
إطلالتك دائماً عذبة كما النسيم...
عيلا مرات مرات كدي متل سحابة الصيف..
تجافي بلاد وتسقي بلاد...

عليك الخوة يا أماني ما تطولي الغيبة...
وأكان الله هدى لينا تماضر بت عم شيخ الدين دي جات بي جاي
أدت لينا البوست دا تلة كدي وأخدتلها قدلة ..والله أكان دربنا مرق..





عدم المعروض قالوا جفا آآآبت أمي..



مودتي وتشكراتي الكتار..

Post: #19
Title: Re: بوست بدل فاقد عن تجربة الفنان التشكيلي أبوشريعة أحمد
Author: مجدي شبندر
Date: 04-02-2007, 07:02 AM
Parent: #18

الصديق العزيز ابو شريعة


ابوشريعة أحد بناء الضؤ الذين اثروا الحياة التشكيلية بابداعه الوافر وهو احد رواد تلك التظاهرة التشكيلية في السودان في منتصف التسعينات ومنهم احمد شريف عبود ,الطيب ضو البيت بوص.حسين عبد الرحيم ,اسلام زين العابدين .صلاح عمار ,نعمان فارس ,وأخرون .

المركز الثقافي الفرنسي ومعهد جوتة الالماني والمركز البريطاني كانت هذه الدور صاحبة القدح المعلي في احتوائها لهؤلاء المبدعين الذين بزلوا جهدا عاليا في نشر الثقافة التشكيلية مما اسهم في عملية فك طلاسم اللوحة التشكيلية التي كانت تعتبر شيئا مبهما وذلك بتصدير ادوات القراءة وعملية التلقي للوحة التشكيلية ,لهم تقديري العظيم.

ابو شريعة احد المبدعين الذين يمتلكون جراءة عالية في أظهار تجربتة التشكيلية فهو فنان ثائر وقلق دوما تجده متمردا علي الان ,وهذه سمات المبدعين .

تحياتي لكل تشكيلي المهجر في كينيا وتمنياتي لهم بنجاحات ظافرة..

حبيبي محمود (تي)...شوق شديد وسلام شديد ...منذ تلك اللحظة تولد شوقا عظيما ....

سوف اعود مرة اخري للكتابة عن تجربة ابوشريعة خصوصا واني كنت شاهدا علي بعض تجاربة في السودان ..خليني شوية اتجول في المعرض واجيك.

راجعيييييييييييييين

مجدي شبندر


Post: #20
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmed Madni
Date: 04-02-2007, 09:09 AM
Parent: #1

ما الذي يمكن أن يفعله الأصل إذا كان بدل الفاقد قادراً على أن يكون:

* "تايم آوت" لجماعة اللت والعجن والبيضة قبل الدجاجة و...

* الذهاب بالفن التشكيلي إلى الناس بلا مشاكل مواصلات وسندوتشات وعصائر وقهوة "حريفة على الجيب".

* إمتاع للبصر وتحفيز للبصيرة.

* تأثيرات تنطوي على إحالات ذات تناسبات طردية وعكسية مع اسم الفنان.

أما أنت يا محمود فأحيلك ثانيةً إلى كلام "أم يسار".

تخريمة:

شبندر
أشوفك بكرة في "المولد"!!

Post: #21
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-02-2007, 03:46 PM
Parent: #1

الصديق الجداوي الهميم مجدي شبندر....

وين أراضيك يا معلم؟؟ أوعك تقول لي في الصالحة...

المهم ...مرورك كعادته جميل وخفيف ومرور العارفين الذواقين كمان...

وحيث أنك قلت:


Quote: سوف اعود مرة اخري للكتابة عن تجربة ابوشريعة خصوصا واني كنت شاهدا علي بعض تجاربة في السودان ..خليني شوية اتجول في المعرض واجيك.


فلك أن تعرف أنني سوف أكون في الانتظار.. محتاجين أقلام جميلة وعيون شوافة...وإحساس حقيقي بالجمال...





لك الود يا مجدي...
وأبقى أسأل عن قلوبنا.. تلقى فيها (دروب) محبة

Post: #22
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-02-2007, 04:16 PM
Parent: #1

الأستاذ الشاعر الرقيق والمثقف الحصيف والمناضل الصلب...
وقبله وبعده الصديق الجميل محمد مدني..
تحيات إعجاب وامتنان ... وصلوات شكر على مجيئك الكريم من على هذه المساحة....

قلت في رشيق الحرف وحلو العبارة:

Quote: * الذهاب بالفن التشكيلي إلى الناس بلا مشاكل مواصلات وسندوتشات وعصائر وقهوة "حريفة على الجيب".


فنقلتنا فلاش باك إلى ذلك الزمان... والمكابسة والمكابدة عشان نشوف معرض أو نكتل حفلة بعقد الجلاد أو عركي وذكريات من خواء البطن والجيب... لا ينطفئ معهما - على جبروتهما - ذلك الشوق والنهم إلى الجمال واللهث وراءه أينما كان...

وقلت بلسان الحكمة:

Quote: * إمتاع للبصر وتحفيز للبصيرة.

* تأثيرات تنطوي على إحالات ذات تناسبات طردية وعكسية مع اسم الفنان.


فجعلتني - سامحك الله - أرجع البصر كرتين لذات اللوحات طمعاً في المزيد من المتعة البصرية وبحثاً عن ما يحفز بصيرتي (أم حمد)...


كدي يا ود مدني هاك قزقِز بالجمال دا:



وخرَّمْتَ فقلت:

Quote: شبندر
أشوفك بكرة في "المولد"!!


فكان أن ضجت حواسي كلها وكأنها (حلقة شيخ يرجحن...يضرب النوبة ضرباً فتئن..)

غايتو بالطريقة دي يوم بتعوق ليك زول...
يا سيدي...

دمت جميلاً....وربنا يزيدك جمال وجمال..

Post: #23
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-02-2007, 08:10 PM
Parent: #1

والله العظيم اللوحة دي تحديداً أطربتني طرب رسمي




خريف العين...
تسلم يدك يا أب شريعة...

Post: #24
Title: Re: بوست بدل فاقد عن تجربة الفنان التشكيلي أبوشريعة أحمد
Author: شهاب الفاتح عثمان
Date: 04-02-2007, 08:33 PM
Parent: #23

سمو سمو سمو

Thank u It is nice.

Post: #25
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-02-2007, 11:37 PM
Parent: #1

العزيز دكتور شهاب الفاتح...
تحية وتقدير...
سعدت كثيراً بإطلالتك البهية..
ابتسامتك الجميلة أضافت كثيراً من الجمال لهذه المساحة...

ودونك المزيد:



وهذه فيها ما فيها من سحر...



سمو سمو سمو إنت يا دكتور يا: ذوق ذوق ذوق...

دمت أخاً كريماً...

Post: #26
Title: Re: بوست بدل فاقد عن تجربة الفنان التشكيلي أبوشريعة أحمد
Author: معتصم دفع الله
Date: 04-03-2007, 03:20 PM
Parent: #1

تحياتي محمود ..

أعشق الفنون التشكيلية وتشدني اللوحات وتسافر بي عبر ألوانها الجذابة ..
وكثيراً ما كنت أذهب لكلية الفنون الجميلة وأشاهد الناس ديل وهم يرسمون عالم رائع وفنان ..
لم ألتقي أبوشريعة ولكن سمعت عنه الكثير بحكم علاقة أهل منطقتنا وشهرته التي تعدت الحدود ودا في حد زاته إنجاز على المستوى الشخصي وعلى مستوى السودان ..
نتمنى ليهو التوفيق في مسيرته الفنية ..

ولك أخي محمود كل الشكر ..

Post: #27
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-03-2007, 06:30 PM
Parent: #1


العزيز المرهف الحاج معتصم دفع الله...

سعدت كثيراً بمرورك وتواجدك هنا...إيه الجمال دا كله؟؟

والله يا بلديات...أبو شريعة دا لو عايز تقابله بس تتخيل إنك في عز الهجير
والزحمة والعرق...قامت جاتك نسمة جميييييييييلة...مليانة ريحة زهور ومشبعة بريحة مطر كمان
وأنا حسب متابعتي لمعتصم دفع الله هنا وفي المنابر الأخرى..والله معتصم ياهو زول أب شريعة تب..

مرورك أكرم هذه المساحة بسخاء الطلة ومهذب العبارة وندي الحروف...

ياخي دمت أخاً جميلاً..

محمود عربي من حلة عباس

Post: #28
Title: Re: بوست بدل فاقد عن تجربة الفنان التشكيلي أبوشريعة أحمد
Author: الطيب بشير
Date: 04-03-2007, 09:14 PM
Parent: #1

.

Quote: مرورك كعادته جميل وخفيف ومرور العارفين الذواقين كمان...


فما بالك بالمسطحين (الزواغين)

نحن جينا و كية للمابينا
و الليلة يوووهي..و يبلالي يووهيي
الأخي محمود ..كيف حالك
من حلة عباس للمعيلق..لعموم (عرب) الجزيرة
تحية ليك و للفنان ود أب شريعة
و دي غشوة سريعة

.

Post: #29
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-03-2007, 09:38 PM
Parent: #1

أبو بشير ...
كيف حالك آآحبوب...

Quote: فما بالك بالمسطحين (الزواغين)


حرَّم حاشاك...والله لاك مسطح ولاك زواغ..
البوست دا أنا فكرت فيهو مخسوس للناس الزي الطيب بشير..
ناس تتدفق فناً وجمالاً...تقول لي مسطحين وشنو؟؟؟

وغنيت حماساً والكتاحة تلوي:

Quote: نحن جينا و كية للمابينا
و الليلة يوووهي..و يبلالي يووهيي


هو نان البياباكم دا دحين مو غلتان؟
أبقى لا داخل...أتوهط وفعلاً..الكلم "الطيب" يرفعه..

ريدتي الشديدة لموحى النوامة..
وتحياتي لبشير والعائلة..

Post: #30
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-04-2007, 03:11 PM
Parent: #1

يا جماعة في ناس وأقلام من الوزن العالمي معزومين يشوفوا البوست (المعرض) دا....
Please keep it up


تشكرات

Post: #31
Title: Re: بوست بدل فاقد عن تجربة الفنان التشكيلي أبوشريعة أحمد
Author: الطيب بشير
Date: 04-04-2007, 04:30 PM
Parent: #30

up

Post: #32
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-04-2007, 05:35 PM
Parent: #1

الطيب أخوي العديل...
كتر خيرك على الرفعة السمحة دي...
وأنت من الأقلام الأنا قاجي ليها الشرك..
أها شوف جنس اللداحة دي..لول..

محبتي الكثيرة..

Post: #33
Title: Re: بوست بدل فاقد عن تجربة الفنان التشكيلي أبوشريعة أحمد
Author: Tumadir
Date: 04-04-2007, 05:53 PM
Parent: #32

محمود مصطفى محمود...(اسمك ده عندو أى مغزى؟)


شكرا للدعوة الكريمة..

والحقيقة انه الملافظ سعد فعلا...

الراجل ابو شريعة صاحبك ده ما ساهل ياخ..

حقيقة الفن التشكيلى السودانى متطور اكتر من الفنون التانية فى السودان..

فن ناضج وعارف روحو رسالتو شنو، يعنى تركيبة الالوان الانتجتها عبقرية الفنانين التشكيليين السودانيين دى ..ما بشوفا الا عندهم ..ألوان مركبة ...ومعقدة ..وفى تعقيدها وتركيبا ده جذابة وما مملة كلو كلو ...

شفت رسم كتير لفنانين كتار ..كل تجربة مشاهدة أعتبرها متعة بصرية ما بتتعوض ...

ياخى ابو شريعة ده ..ابو منو تانى ..غير شريعة ...بس دايرين نتعرف عليه أكتر ..لانه برسمو السمح ده (بيمعط) اورغن فى الحفلات ...ده ميزة زيادة ..كمان

حسة يمعط دى ...الزول ما يمعطها ليك من البوست ده ..ويريحك منها؟

الملافظ سعد

تحياتى لابى شريعة (رايك شنو فى قواعد النحو)

وسأحتفظ ببعض لوحاته فى مستنداتى الخاصة ..لأتفاخر بها قليلا مع أولادى بما هو سودانى ...كما أفعل دائما ...(الغبيانين)...عشان يمسكوا الدرب ..

شكرا للدرب الجابك لينا ...

Post: #34
Title: Re: بوست بدل فاقد عن تجربة الفنان التشكيلي أبوشريعة أحمد
Author: Raja
Date: 04-04-2007, 05:53 PM
Parent: #1

العزيز مصطفى..

سلام وتحية..

بجد بوست جميل للغاية.. يعجبني فيك تعريفنا بالفنانين وأعمالهم بصورة رائعة..

التحية لفناننا أبو شريعة أحمد.. ولريشته البديعة..

..

ومعكم نتابع ونستمتع..

دمت

Post: #35
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-04-2007, 08:08 PM
Parent: #1

اللييييييييييييييييييييييييييييييييييييلة...
أمممممممممممممممممممممممممممممممك...
الشَّرَك قَبَضْ...
لكن قدر دا؟؟؟؟
يعني بس اتخيلو...تكون رامي ليك جبادة صغيرونية...تقوم تقبض كنز من الكنوز العالمية الكبيرة قدر تماضر دي الله يخليها...
عشان تقوم تجيك بما لا قِبَلَ لك به...من الفن والشوف الما خمج...والتعليق البخلي الزول معلق ما بين الدهشة والمتعة..
الروب والله..

هسي شوفوا جنس السؤال المفاجئ دا:


Quote: محمود مصطفى محمود...(اسمك ده عندو أى مغزى؟)


لكن آآآتماضر النزيدك من الشعر بيت آآختي..
وليدي دا حتو اسمو مصطفى محمود مصطفى محمود...غلوتية موش؟؟


وشهدتي:
Quote: الراجل ابو شريعة صاحبك ده ما ساهل ياخ..


دي شهادة لا تقل في أهميتها عن أي شهادة أكاديمية...


Quote: حقيقة الفن التشكيلى السودانى متطور اكتر من الفنون التانية فى السودان..

فن ناضج وعارف روحو رسالتو شنو، يعنى تركيبة الالوان الانتجتها عبقرية الفنانين التشكيليين السودانيين دى ..ما بشوفا الا عندهم ..ألوان مركبة ...ومعقدة ..وفى تعقيدها وتركيبا ده جذابة وما مملة كلو كلو ...

شفت رسم كتير لفنانين كتار ..كل تجربة مشاهدة أعتبرها متعة بصرية ما بتتعوض ...


أها دي بقى شهادة للفن التشكيلي والتشكيليين بلا فرز...ميدالية من تماضر...على صدوركم جميعاً...وواحدة على صدر الوطن..

Quote: ياخى ابو شريعة ده ..ابو منو تانى ..غير شريعة ...بس دايرين نتعرف عليه أكتر ..لانه برسمو السمح ده (بيمعط) اورغن فى الحفلات ...ده ميزة زيادة ..كمان


أبو شريعة أحمد محمد أحمد أبو حليمة...اسم الدلع بتاعو (الشيخ)...عليك الله عايني الدلع ده ساكت كيف؟ وحالياً هو أبو أحمد ومقيم في يوغندا...يا ربي عندو كفيل متل ناس هشام شيخ الدين ديل؟؟ وأكان دايرة (المباري) الليلو بديك ليهو في المااااااسنجر..المباري يعني الموبايل ..مباري دي قالتها أم صديقاً لينا..ما أفضله عليكم...(أضحكي ...شايفك آآآتماضر)...هسي بعد أب شريعة خلا السودان من سنة 95 بقى معط الأورغن عندو زي لايف ميوزيك في معارضه القاعد يسويها أكان في كينيا ولا في يوغندا..يعني (أسنا ما تشوف الرسم حق أب شريعة ، أسنا ما تسمع مِسِيقا سودانية حية..) أسنا دي حلوة؟؟ عليك الله أمعطيها برضها..في إطار هجمتكن إنتي والجندرية على الملافظ...تهجمكن السعادة والأيام العديلة وسمحة..

قال الملافظ قال..


Quote: وسأحتفظ ببعض لوحاته فى مستنداتى الخاصة ..لأتفاخر بها قليلا مع أولادى بما هو سودانى ...كما أفعل دائما ...(الغبيانين)...عشان يمسكوا الدرب ..


يعني هسة دا استئذان؟ والله اللوحات هسي تلقيهن اتشاكلن..كلهن دايرات يتحفظن في المستندات الخاسة بتاعة تماضر شيخ الدين..
أب شريعة ياخ ما ترسمني أنا صاحبك وتتقل لي الرشرش..أكان الله يقسم لي (حفظة) في مستندات زولة كدي بدون ذكر أسماء.. لول من القلب
حاشاهم أولادك من الغبا وفكة الدرب...أمهم شيخة عندها (طريقتها) في سودنة وجدانات الناس حتى الخواجات...تقولي لي ما يمسكوا الدرب؟


دعوة:
الجميع مدعوين لكرامة كبيييييرة...
المناسبة:
عشان ربنا فتح علي وقدرني أرد على تماضر شيخ الدين...هذه الفنانة والقامة السامقة..
والله العظيم ما قايل روحي بقدر أرد...

شكري الجزيل ومحبتي أظنها ظاهرة..موش؟؟

Post: #36
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-04-2007, 08:25 PM
Parent: #1

لا لا لا لا ...مستحيل طبعاً...
أنا أمرق من تماضر بقدرة قادر...أتفاجأ بالسنيوريتة راجا أباسي حتة واحدة؟؟
دي جبادة شنو دي أصلو؟؟
أجمل لوحة في المعرض دا إطلالتك السمحة ...
إن شاء الله ربنا يقدرنا نجيكم كل مرة بشئ من جمال الإنسان السوداني..
كلك ذوق والله يا رجاء..
وبجيك صادي أكان ربنا فتح علي ..

شكراً لوقفتك الجميلة وتأملاتك العميقة..وشكراً لكلامك عن صاحبي أبو شريعة..

ودمتي قريبة..

Post: #37
Title: Re: بوست بدل فاقد عن تجربة الفنان التشكيلي أبوشريعة أحمد
Author: نيازي مصطفى
Date: 04-04-2007, 08:44 PM
Parent: #36

لك كل التقدير اخي محمود مصطفي وانت تهدينا هذا الجمال لاخي العزيز ابوشريعة الفنان المبدع
المهذب قطعا.. ستكون شهادتي مجروحة في ابوشريعه حتى لا يقال لانه ابن قريته ..

تحياتي للاخ الكريم ابوشريعه ولكم مع جزيل الشكر.

Post: #38
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-04-2007, 11:13 PM
Parent: #1



العزيز نيازي مصطفى...
تحياتي واحترامي وشكري على المرور والتعليق..
يا خوي أشهد ساكت..وأنصف أبو شريعة الزول الجميل..
إنت قايل شهادتك حا تكون مجروحة أكتر من شهادتي أنا؟؟
ياخ ناس التكلة أبشر كلهم أهلنا وأصحابنا..
هسي والله أقوم أقول ليك سلم على الآتية أسماؤهم:
محمد صالح أبو حليمة
النعمان ومحي الدين
عثمان البخيت
النذير أخو أبو شريعة
وناس الحلة كلهم...
تتذكر فريق الكورة بتاع حلة عباس داك...الجولان ياخ..
موش كان فريق محترم بالله في مباريات استاد الكاملين والنجيلة والزليق..

تحياتي ومحبتي...ولا شكراً على واجب...
ودمت..

Post: #39
Title: Re: بوست بدل فاقد عن تجربة الفنان التشكيلي أبوشريعة أحمد
Author: مجدي شبندر
Date: 04-05-2007, 12:13 PM
Parent: #38

بحب الزول المشلخ تي

أبوشريعة فنان متعدد المواهب يمتلك شحنة عالية من الخيال ..دوما تجد الابتسامة علي شفتية اعلم ان هنالك مخيلة تحاول ان تخيط شيئا من النصوص ...

تجدة يمارس موسقة اللون في درجاتة المختلفة ولك ان تسمع لحنا شعبيا من تلك العلامية والدلالات التي والشخوص الريفية التي يشحن بها النص التشكيلي مما لها الاثر العالي في اعلان هوية النص المحلية والعالمية .

ومن خلال اللوحات المعروضة اعلاة نجد ان النص التشكيلي للاستاذ ابو شريعة يمتاز بالتعددية داخ النص الواحد بمعني ان نص ابو شريعة يحتوي علي اكثر من لوحة تشكيلية كل هذا التعدد الداخلي للنص لم يعمل علي تفتييت اللوحة انا يضيف الي وحدتها عاملا جماليا .

ابو شريعة تتعدد تجاربة بين الواقعية والتجريدية وفي هذا المعرض نجده كثيف باللوحات الشبة تجريدية مما له الاثر العالية في ادهاش عين المتلقي واخراجها من النمط العادي الي نمط اخر يمكن عبرها مساهمة المتلقي في اعادة تركيب اللوحة واستيعابها ...مستفيدا من علاقات الخط واللون والظل ..وهذه بمثابة اثراء ذاكرة المتلقي بادوات قراءة النص التشكيلي تدريجيا نحو التجريدية التي تسمع بعدة قراءات .

يا سلام عليك يا محمود ده بوست رائع وخليتنا نرجع لي حوارات قديمة فلسفية مع خواننا التشكيليين اني احبهم جدا .

برضو نرجع للزمن مرة ونقراء اللوحات تاني .....

سلام

مجدي شبندر



Post: #43
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-05-2007, 11:45 PM
Parent: #39

شبندر مجدي...
كيفك يا حبيب...يا (مسغَّف) إنت..

طبعاً كعادتك ،، لم تخذلني...وعدتنا بالعودة فعدت...
لكن بصراحة وأنت زول أخو...أنا ما كنت قايل بطلع منك جنس الكلام دا:


Quote: ان النص التشكيلي للاستاذ ابو شريعة يمتاز بالتعددية


وواصلت الهجايم والرجايم:
Quote: ان نص ابو شريعة يحتوي علي اكثر من لوحة تشكيلية


وأضفت:
Quote: كل هذا التعدد الداخلي للنص لم يعمل علي تفتييت اللوحة انما يضيف الي وحدتها عاملا جماليا .


وكمان:
Quote: ابو شريعة تتعدد تجاربه بين الواقعية والتجريدية وفي هذا المعرض نجده كثيف باللوحات الشبه تجريدية



الله يجازي محنك...عارف دا كللللللو وساكت؟؟ والله أنا قايلك مغترب ساكت..يا مجدي أنا حالتي دي كايس للأقلام التشكيلية العالمية..والله أتحدى أي واحد بعد كدا يجي يقول كلام أجمل من كلامك دا...موش قلت ليكم مرور مجدي مرور (العارفين الذواقين)؟؟

ياخ حاولو نسقوا لينا لقاء إنت ومحمد مدني وعالم عباس والطيب برير والناس الجميلين كلهم..

دمت جميلاً يا مجدي...وخلينا نشوفك..
مودتي الكثيرة..

Post: #40
Title: Re: بوست بدل فاقد عن تجربة الفنان التشكيلي أبوشريعة أحمد
Author: يازولyazoalيازول
Date: 04-05-2007, 12:17 PM
Parent: #38

وبالطبع لا يأتى من الجميل إلا كل جميل ، فهذا والحق يقال من أعظم البوستات التى أطلعت عليها هنا فى سودانيزاونلاين ، تشكر أخى وحبيبى محمود مصطفى محمود (أبومحمود) (الشى شنو؟)

أمتعتنا وأسعدتنا ودخلتنا فى أضافرينا من شدة الجمال والفرحة

تصدق لوحة واحدة من لوحات أبشريعة تعادل ملحمة لى أبو الأمين أو سمفونية أو جلسة على شاطى النيل أو رمية لى مهلب أو فوز المريخ والهلال ، يعنى باختصار كده ، إختزال للجمال وللحواس وللمباهج ، والله أى لوحة تعادل قصيدة أو معلقة أو قطعة أدبية ، يعنى ربنا سبحانو وتعالى أدى التشكيليين أكتر شوية مما أدى الموهوبين الآخرين فى كل مجال والمتلقى الزيك يا محمود يسعد أيما سعادة عندما يطالع هذا الجمال

محمود اليوم إتأكدت أنك زول فنان زى زولك ابشريعة ده ، ياخ ربنا يخليك رغم غزلك الصريح لأختى تماضر ، وإن شاء الله ربنا يقدرنى أقوم أتغزل فى أى واحدة من أخواتك عشان إنتو تستاهلو الغزل المريح



ياخ إن شاء الله تسلم ويسلم كل البريدوك يا زول يا أصيل

نفسى ألاقيك كمان وكمان لأنك ساكن (الرويس) الحى وساكن (الرويس) حقى ورويسات تانية كتيرة بتحبك وتضمك حنان

ياخ الرويس من الشرفية يفصل بينهما (طريق المدينة) طريق ناس أبشريعة الجد جد



أحبك يا محمود حبا لا حدود له عشان (رويسك) البيجيب لينا زى المحن دى ، وكل المحن الإنت بتجيبها بتكون مغلفة بى (محنة)

أحب حنانك زاتو ويارب تهون علىّ أقطع طريق المدينة


Post: #41
Title: Re: بوست بدل فاقد عن تجربة الفنان التشكيلي أبوشريعة أحمد
Author: arif elsawi
Date: 04-05-2007, 03:03 PM
Parent: #40

يامحمد ينصر دينك

اها ابو شريعة ده فناااااااااااااااااااااااااااااااااااااااااااااااااااااااااااااان,ولو عايزين نتكلم عنو ,ورونا بتعرفوا شنو عن الاطفال ؟ ونجيكم



عندي اقتراح سبق ورسلت ايميل لبكري من نيروبي عشان يدي بعض الاصدقاء حق الدخول هنا
وانا اكرر الدعوة ياجماعة عليكم الله ناس شرق افريقيا ديل اهتموا بيهم شوية وخلونا نشوفم بيجاي

وبالمناسبة تجربة فناني المنافي في افريقيا تستحق ان تحكي بالجد كده
___________
تخريمة كده.اها يا ابوشريعة مبروك ,عرست البت الجميلة ديك صاح,ومن كيغالي كمان ينصر دينك
وتاني ما تقول لي لو الله جابنا يوغندا حياة العذوبية ديك مافي
تسلم ياجميل وابقا عشرة علي الغنا
ومتذكر انو في وعد بيناتنا لو مريت بيجاي

Post: #42
Title: Re: بوست بدل فاقد عن تجربة الفنان التشكيلي أبوشريعة أحمد
Author: الطيب بشير
Date: 04-05-2007, 05:18 PM
Parent: #1

.

Salam ya Sahib

Quote: ولدي إسمو .. مصطفى محمود مصطفى محمود


يعني أنا ولدي إسمو Mike?

ما تراث ترعة واحدة



.

Post: #44
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-06-2007, 03:18 PM
Parent: #1



من الفقير إلى الله محمود مصطفى محمود بالرويس..
إلى عمدة الشرفية ونور عماير الإسكان سيدي ووسيلتي إلى كل ما هو جميل
العارف بالحب والحنان هشام شيخ الدين جبريل..

السلام عليكم ورحمة الله...أما بعد،،
فإني لا أجد في نفسي حرجاً من أن أبادلكم الحب العلن... خالصاً لشخصكم الوطن..

والله مرورك أخجلني عدييييييل...وكلامك السمح فوق أب شريعة يصله إن شاء الله
تحياتي لك وللأسرة الكر يمة
نلتمس عندكم السماح يا السمح...وخلي قطعة طريق المدينة علينا نحن ..

بجيك صادي إن الله أدانا العافية..

مودتي الكثيرة..

Post: #45
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-06-2007, 03:30 PM
Parent: #1


العزيز عارف الصاوي...
تحياتنا لك
وشكرنا الخالص لمرورك واهتمامك بي ناس أبو شريعة وشباب المنافي...

قلت:


Quote: بالمناسبة تجربة فناني المنافي في افريقيا تستحق ان تحكي بالجد كده


والله يا عارف أنا غايتو بديت ليكم بصاحبي أب شريعة..والباقي عليكم إنتو..
تعالوا اتكلموا عن ناس ضو البيت وحسن ود الكاملين وأسرته..وصلاح المر..وزوارهم ناس حسين ميرغني وحسن النور وغيرهم من المترددين في محراب ذلك الجمال..

تحياتي ثانية وخليك قريب..

دمت جميلاً...

Post: #46
Title: Re: بوست بدل فاقد عن تجربة الفنان التشكيلي أبوشريعة أحمد
Author: Mahmoud Mustafa Mahmoud
Date: 04-06-2007, 03:47 PM
Parent: #1



الطيب أخوي...يابا يسندوك وليداتك قول آمين..والله سندتنا سندات سمحات خلاس....


Quote: يعني أنا ولدي إسمو Mike? .... ما تراث ترعة واحدة


فقطعت مصاريني بالضحك...
لكن آآلطيب أخوي..الترع دي والله علمتنا حاجات كتيرة خلاص..
ليس أقلها الغناء وكتابة المحاولات الشعرية الأولى...
وليس آخرها رؤية الأشياء الجميلة
التي تتناثر أمام أعيننا في عفوية ذلك الريف الجميل..ما جعل أخيلة الكثيرين تكون في خصوبة تلك الأرض الطيبة..

بالمناسبة ... الفنان الجميل حسن النور كان وربما لا يزال في رحلة مع ناس أبو شريعة... معاك خبر؟؟؟ بالله يا أبو بشير لو عندك معاهو إتصال بلغه السلام... وقول ليهو أظهر...


خليك قريب آآلطيب..محبتي التي لا تنضب..

Post: #47
Title: Re: بوست بدل فاقد عن تجربة الفنان التشكيلي أبوشريعة أحمد
Author: انعام عبد الحفيظ
Date: 04-06-2007, 04:33 PM
Parent: #1

Quote: دي جبادة شنو دي أصلو؟؟


دي جبادة أبو شريعة الفنان الجميل

أبو شريعة دا فنان بجد وكوم براااااااااااهو

وكمان زيادة على عزف الأورغ بيغني

استمعت ليهو في نيروبي في حفل

شارك فيهو بالغناء صوتو كمان جميل





شكراً يا محمد مصطفى لفتح هذه النافذة المضيئة

Post: #48
Title: Re: بوست بدل فاقد عن تجربة الفنان التشكيلي أبوشريعة أحمد
Author: عصام عبد الحفيظ
Date: 04-06-2007, 04:46 PM
Parent: #47

سلامات محمود




http://www.sudaneseonline.com/u/abo22.jpg
من اللوحات الجميلة




وشكرا
ابو شريعة
ومجموعة شرق افريقيا
من التشكيليين المميزين
وساهموا فى ابراز التشكيل
السودانى فى كينيا ويوغندا وتنزانيا


واصبح لهم مجموعة من المقلدين للوحاتهم هناك
من رسامى كينيا ويوغندا


من كوكبة التشكيليين المقيمين هناك
رغما عن هجرة كجور وانضمام ياسر ( طبزا )

الطيب ضو البيت وكجور وصلاح عمار
وحسن وحسين حلفاوى

ومازالوا يواصلون العطاء هناك


ــــــــــــــــــــــــــــــــــــــــ
ابوشريعة له اسلوبه المميز وفيه اضافةوجده