لغــــة الجســـد... سودانية ميّة الميّة....

ســــــلام..
الشغل كتير .. وماليهو أول ولا آخر..
لن أدمدم وأنوم كما يقولون...
ولكن سأقضي هذه الإستراحة بينكم ومعكم ..
وفي رحاب تعبيراتنا السودانية... والتي أفتقدتها كثيرا..
بعضها له معاني واضحة.. والبعض الآخر يحمل أكثر من معنى..
لطالما غبطت سودانيتنا على هذا الإرث التراثي المذهل..
رغم محدودية ما تحمله بضعة أميال مربعة ..من مليون..
وبالتالي.. جهلي بالكثير..

.. ومرحبا بإسهاماتكم.. ما تبخلوا ..

الرأس والوجه :
مكبّر راسه... راسه كبير (مغرور)..
راسه خفيف (يتأثر بسهوله بما يقوله الآخرون... وكذلك بالمنبهات والمسكرات)..
راسه مليان.. (مطلّع).. وعكسها رأسه فاضي..
وإن تمّ ملء الراس بواسطة آخرين (محرّش )...
مقوّي ... منشّف راسه (الإصرار على رأي أو موقف)..
مخّو خفيف... مخّو تخين... مخّو كبير (عاقل)... مخّو صغير (عكسها)
مخّو مافي... ما عندو مخ..
أعصابه بايظة.. (من القلق والتوجس)..
عندو أعصاب.. (مضطرب الشخصية.. أو ينفجر بسهولة)..
صارّي وشّو.......طارح وشّو..
مغسّل وشو بى موية (ماخد موقف صريح في مسألة يُتوقّع فيها المجاملة)
شايل وش القباحة.. (مبادر بالهجوم أو الدفاع السافر دونا عن البقية)...

منطّط عيونو....مطيّر عيونو....مبحلق عيونو..
مقوّي عينو (غير مهتم بالعواقب... أو مسنود من آخرين)... وأيضا عينو قوية...
عينو مليانة (قنوع).. وعكسها عينو ناشفة..
عينو طايرة.. زايغة (بصباص)..
عينو حمرا (مهاب)... عينو حارة ...
عينو نجيضة (لمّاح)..
رامي أضانو.... شايل أضانو (لزوم تجميع الأخبار).. والأخيرة فيها جهد أكثر..
مادّي بوزو....مادّي قدّومو
فاتح خشمو (مترقّب)..
ماسك خشمو (ممتنع عن التعليق).... والأخيرة إستراتيجية مريحة جدا أحيانا..
ريقو ناشف (مجهد... أو مخلوع)..
سالّي لسانو...
لسانو خفيف (لا يؤتمن على سر)...
لسانو فالت (لا يحسب كلماته.. وأيضا لا يؤتمن على سر)..
لسانه طويل (لاذع.. أو كثير الإنتقاد)
لسانو متبرّي منو (مفرط في طولة اللسان)..
لسانو مقطوع (لا يستطيع التعليق.. الفاع.. الهجوم.. لسبب أو لآخر)..
حاشر نخرتو في كل شئ... رافع نخرتو في السما...
شامّيهم.. أي مكجنهم (وهذه جديدة نسبيا)...

الرقبة.. الصدر.. والظهر:
كاسر رقبتو.. (تعبان ومجتهد في أمر ما)...
مطوّل رقبتو (فخور بأمر ما)...
شايف رقبته.. (مفلهم)..
داقّي سدرو (متحمّس.. أو هايش)..
نافخ سدرو... مفتخر أو متبوبر..
نفسو حار (سريع الغضب).. .. نفسو بارد.. طويل (عكسها)..
كاسر ضهرو (تعبان في ناس.. وقد يكونوا النسابة )..

الأطراف :
ماسك إيدو (ممتنع عن صرف الفلوس)... وايضا قابض إيدو..
قطع إيدو (منصرفات أو مناسبة فلّست به)..
مدّ إيدو (على ممتلكات الغير... أو تعدي بالضرب... أو طلب حسنة)...
إيدو بيضا (كريم)..إيدو ناشفة (بخيل.. عنيف)..
إيدو سايبة (مسرف)..
ماسك كراعو.. (ممتنع عن الذهاب لبعضهم)... وأيضا قاطع كراعو... وموقّف كراعو..
كراعو حارّة.. (إنصرف الحضور حال قدومه)..
كراعو لينة (أتى الخير والرزق معه)...
كراعو كعبة أو ناشفة... (جاء النحس معه)...
عافص ليهم... (متجاهلهم)...

الأحشاء:
دمو حار (هميم... مرح)..
دمو بارد... تقيل.. (عكس السابقة)..
شرب دمّ أحدهم (ضايقه)...
شايل بطنو.. (مخطّط لوجبة على حساب أحدهم.. وغالبا في بيت)..
بطنه طامّة (محبط في شئ... أو في بعضهم)..
بطنه غريقة... (غامض... غتيت... أو يكتم السر)..
هارد قلبو... كبدتو.. مصارينو... فشفاشو... (متحمّل أذي جسيم.. من شئ أو ناس)..
محرّر قلبو... (هميم في أمر ما).... وأيضا قلبو حار...
كاتل قلبو.. (لا يعبأ)... وأيضا قلبو ميّت..
كتل قلبو... بواسطة شخص آخر (وقع ضحية كلام حلو من أحد ما)..
فاتح قلبو (ودود.. أو صريح)..
مقوّي قلبو (غير جزع... مطمئن لسبب ما)..
قلبه قوي... دون مجهود او سبب (شجاع... أو جافي)...



ونعود....

عليك الله يا نجوان ديل قعدتي لقطيهم كيف ومتين

عالم فاضيااااااااااااااـ بس حلوة

طيب هاك مساهمتنا إضافة للعيون ديل

Quote: منطّط عيونو....مطيّر عيونو....مبحلق عيونو.. مقوّي عينو (غير مهتم بالعواقب... أو مسنود من آخرين)... وأيضا عينو قوية... عينو مليانة (قنوع).. عينو طايرة.. زايغة (بصباص).. عينو حمرا (مهاب)... عينو حارة ... عينو نجيضة (لمّاح)..

عينها بيضاء (ما بتخجل ـ مطلوقة)

أفتح عينك قدر الريال أب عشرة (خلي بالك شديد ـ أعمل حسابك مني)

دي إضافة للضهر

Quote: كاسر ضهرو (تعبان في ناس.. وقد يكونوا النسابة )..

قصّت ضهرهم (جابت ليهم العار) خصوصا حال عدم علمهم

نجوان لك التقدير
لغة الجسد ربانية مية المية
أول درس قدم للبشرية كان بلغة الجسد
حين قتل هابيل قابيل وأتى الغراب
وقام بذلك المشهد الدرامى الجسدى
وكل العبادات والصلوات لغة جسد
وكل الضوارى من الحيونات تروض جسديا
لكى يسأنس بها الانسان والأ لاه التى تسبح الله هى اجساد
السؤال الاهم ليه اختار الانسان السودانى لغة الجسد لتعبير
عن انسانيته ونفعالاته ؟
والعلنى اضيف لما ذكرتيه بعض الامثال السودانية والمثل ببساطة
يعنى اختصار لكم كبير من قصص التجربة والتجريب وعلى سبيل ذلك تقول
أمثلتنا:
*جلدا ما جلدك جرو فى الشوك
*بعد ماكانت فى الكرعين تبقى فى الوش
*غلفاء وشايلة موسها تطهر
* جضما معلم على الكفيت
*الما بتلحقو جدعو
*الجاتك فى مالك سامحتك
*شكارتا دلاكتا
*سمحة وراقصة
*العرجا لمراحها
*أب سنينة يضحك على اب سنيتين
* انشاءالله يوم شكرك مايجى


ولى عود حول الشتايم السودانية الجسدية
مثلا : أرجع ترجع الموية من حلقك

وشكرا لهذه النجوى يانجوان

قدره خارقه

ٍســـلام معتز..
دي مجموعة قديمة.. نفضنا عنها الغبار..
شكرا ليك...
بالمناسبة بوستك لحفل محجوب شريف.. معبّر جدّا
ويترجم الكثير.. تسلم..

__
ود الأمير..
شكرا على الإضافات..
وعالم الأمثال عموما.. والسودانية خاصة.. مدهش
وفيه حكم وخلاصة تجارب..

Quote: بعد ماكانت فى الكرعين تبقى فى الوش

دي دايما باقية علينا مع المشغوليات
وأمسحها لي في وشّي..

ومنك نستفيد

شكرا شهاب على المرور..
شرّفت يا أخوي..

___
هلا بعاصم..
ألف شكر على الطلّة..

لسانو فلقه

أضاني طرشاء

الجمل ما بشوف عوجة رقبتو

عندو ضهر

ايدو طويله

كراعو خضراء

يفقع المرارة

عيون غزال

دمو بقري
دمو تقيل
دمو شربات
دم دكاتره

قلبو حجر
قلبو ميت
قلبو كبير

سلام يا نجوان
والتفاتة ذكية وضروية والعامية السودانية فصحية ولماحة
وممكن نضيف
الروح
روحو سلبة(الروح الطويلة)
روحو روح كديس

...
ويقال للوش ايضا
وشو زي الكبك
وش زي محل الشكلة
وش زي تربيزة اللحام
وش زي القايم من النوم
وش زي المتسلفوا..
......

إزيك يا كيكي ..

Quote: روحو سلبة(الروح الطويلة)

روحه طالعة..
روحه وصلت حلقومه..
روحه محرّقاهو..
ما طايق روحه..

Quote: عندو ضهر

اضافات خطيرة يا معاوية
ألف شكر..

وأزيدك من الشعر بضعة أبيات:

Quote: دمو بقري دمو تقيل دمو شربات دم دكاتره

دمو محروق... دمو فاير..
(ودم دكاترة دي كضبوا فيها على ما أعتقد.. والزعل مرفوع )

Quote: قلبو حجر قلبو ميت قلبو كبير

قلبو مكسور.. قلبو محروق...
قلبو ماكلو... قلبو رهيف...
قلبو أسود (عنصرية شديدة)..

الأخت نجوان ..

لك التحية ..

إضافة لسانية:

Quote: سالّي لسانو... لسانو خفيف (لا يؤتمن على سر)... لسانو فالت (لا يحسب كلماته.. وأيضا لا يؤتمن على سر).. لسانه طويل (لاذع.. أو كثير الإنتقاد) لسانو متبرّي منو (مفرط في طولة اللسان).. لسانو مقطوع (لا يستطيع التعليق.. الفاع.. الهجوم.. لسبب أو لآخر)..

لسانو فلقة

وإضافة (عينية):

Quote: منطّط عيونو....مطيّر عيونو....مبحلق عيونو.. مقوّي عينو (غير مهتم بالعواقب... أو مسنود من آخرين)... وأيضا عينو قوية... عينو مليانة (قنوع).. وعكسها عينو ناشفة.. عينو طايرة.. زايغة (بصباص).. عينو حمرا (مهاب)... عينو حارة ... عينو نجيضة (لمّاح)..

عينو نية
عينو مكسورة

وواحدة (إيدية)

Quote: ماسك إيدو (ممتنع عن صرف الفلوس)... وايضا قابض إيدو.. قطع إيدو (منصرفات أو مناسبة فلّست به).. مدّ إيدو (على ممتلكات الغير... أو تعدي بالضرب... أو طلب حسنة)... إيدو بيضا (كريم)..إيدو ناشفة (بخيل.. عنيف).. إيدو سايبة (مسرف)..

إيدو طويلة (حرامي)


كان إتذكرت حاجة تانية برجع ليك

بوست (دمه خفيف)

هلا محمد أبو العزائم..
مشكو على الإسهامات..

Quote: لسانو فلقة

لسانو زفر (يفحش في القول)..
حلو لسان (بيّاع كلام)..

Quote: إيدو طويلة (حرامي)

إيدو ماكلاهو..
إيدو خفيفة (سريع).. وعكسها إيدو تقيلة..
إيدو لاحقة.. (لزوم الكرامات)..

وما تطول الغيبة..

وعن الولادة والمواليد

أضان الحامل طرشا

ووحمى مقابلو

جنا الوز عوام

وعن الوصايا

ما تتوصى
وأبقى 10

وعن الولائم

بليلة مباشر ولا ضبيحة مكاشر

قد عرض الناس

قد(بفتح القاف والدال مع تشديد الأخيره) عرض (بفتح العين وكسر الراء)

أى أكل أكلهم كلو ( حينما يكون معزوم) مما سبب لهم الحرج

وعن البشريات السعيدة

خشمك فوقو السكر

والمريح جدا للفضوليين

بيعفن وينشم

نجوان صباح الخير ( عليك الله خليتي شنو للحبوبات ؟؟؟ )

شكراً علي إجتهادك في تجميع كل هذه العبارات السودانية .

سلام ود العجمي..

Quote: ووحمى مقابلو

ألف شكر..
__
مشكور على الطلّة أخوي هاشم..
حاسّة بنفسي قاعدة في راكوبة ..

واحدة تبع (الجوف)
قلبو كبير (خواف) بس أنا والله ما عارف العلاقة شنو بين حجم القلب والخوف. والمفارقة أنها برضو بتتقال للإنسان المتسامح.

وواحدة تانية: رافع نخرتو (متكبر)

إيدو طرشا (ضربه موجع)

Quote: عينو مليانة (قنوع).. وعكسها عينو ناشفة..

دي يا نجوان أظن عكسها (عينو فارغة) مش؟

سلام محمد أبو العزائم.. ومشكور..
أيضا إستغربت أول مرّة سمعت قلبو كبير بمعنى خوّاف..

Quote: دي يا نجوان أظن عكسها (عينو فارغة) مش؟

سمعت ناشفة..
لكن فارغة أكيد تعطي نفس المعنى..

Quote: إيدو طرشا (ضربه موجع)

إيدو مربوطة.. (لا يستطيع فعل شئ.. مغلوب على أمره)..

___
مرحبا ممكونة..
وشكرا على الحضور..

بوست كامل الدسم يا نجوان!

ومن الامثلة والحكم
التسوى كريت فى القرض تلقا فى جلدا
وفى نفس الوقت القرض بداوى المرض
وايضا هذا المثل العجيب الذى يدعو للقبح
بلدا ما بلدك أمشى فيها عريان

Quote: منطّط عيونو....مطيّر عيونو....مبحلق عيونو.. مقوّي عينو (غير مهتم بالعواقب... أو مسنود من آخرين)... وأيضا عينو قوية... عينو مليانة (قنوع).. عينو طايرة.. زايغة (بصباص).. عينو حمرا (مهاب)... عينو حارة ... عينو نجيضة (لمّاح)..

الفاضلة نجوان
سلام ... مقدر مجهودك في لغة مهمة تعبر دون الإفصاح بالمقصود اعلناً وبياناً

لُغة العيون
العين تتكلم وتعرب عن نفس صاحبها أو صاحبتها ... بالومضة والغمزة والإيماء

فالإشارة بمؤخرة العين فهي عن أمر

وغمضها برهة إعلان بالقبول والرضى

إدامة النظر دليل على التوجع والأسف

وكسر النظر دليل على الفرح

رفة العين إعلان رجعة غائب

قلب العين إلى جهة ومن ثم صرمها بسرعة تنبيه

سلام خالد المنسي..

ملاحظاتك جميلة للغاية..
عن لغة العيون في التواصل..
وكلنا نتذكّر نظرات الوالدين في الصغر
وإدراكنا تماما لمعانيها المختلفة


ألف شكر على المساهمة..

سلام ود الأمير..
الأمثال دي بحــر ماليهو آخر..

Quote: بلدا ما بلدك أمشى فيها عريان

أعتقد يمكن أن يعني قلة القيود الإجتماعية في الغربة..

ألأخت /نجوان

السلام عليكم


وشكرآ على هذه الواحة الجميلة


شكلك كده عايزه تحضرى فى الكلمات دى..

وما ننسى (عينى رفتنى ) وكراعى خدرت


والله إن شاء الله يخضر ضراعك وتدينا زيادة


يا سلام عليك /إسماعيل محمد أحمد عباس

مرحبا إسماعيل ..

مشكور على الطلة.. والكلمات الطيبات..
ويا ريت الواحد يحضّر في حاجات زي دي
مليانة محنّة.. وريحة حبّوبات..

نجوان......تحياتي

ده بوست مرجع والله

مودتي

نجوان
بوست ممتع ومفيد وغني

تاملوا ما كتب الامير

Quote: لغة الجسد ربانية مية المية أول درس قدم للبشرية كان بلغة الجسد حين قتل هابيل قابيل وأتى الغراب وقام بذلك المشهد الدرامى الجسدى وكل العبادات والصلوات لغة جسد وكل الضوارى من الحيونات تروض جسديا

يا نجوان سلمى دي قدرك ولا لحم سدرك؟!

مالى يدو

عينو ملانة