سندباد في بلاد السجم والرماد

> سيد أحمد الحردلو >> سندباد في بلاد السجم والرماد


سندباد في بلاد السجم والرماد




إلى الشقى .. جَنَا الشقى .. المصطفى جَنَا سعيد ،

الله لا كَسَبُه دُنيى . . وآخرِى ..

-1-

ملعون أبو الغُربه

وملعون أبو عِلانْ ،

القالْ تهاجر .. يجيكْ

شِيتاً كتيرْ . . بلحيلْ

شِيتاً يجيكْ بالوَعَا ..

وشيتاً يجيكْ بالليلْ

ناساً يجوكْ طاشينْ

وواحدين يجوك ْ نازلينْ

من السَما العشرينْ ،

زىّ الخِدرْ .. داجينْ

شايلين كلامَ الكتابْ

وشايلين كتابَ الكلامْ ،

وشايلينْ . . كمان شايلين

كلّ السَمحْ .. والزينْ ،

-2-

سمِعْ كلام السَفِيهْ

وقُمتَ دَجيتَ

ومشيتْ وراكْ يا سرابْ

ناماً .. أنا حِفيتَ ،

كُلْ ما أدور أرتاحْ ..

أشم دُعاشَكْ قريبْ

وأتابعَ السِكة ،

يا سكة آخرِك وين

يا سكه وين الوصول

داير لى ضلا زين

وزول يقول لى الزين

يقعد حداى يكب الجبنه .. فنجانين

وأقول كفاى .. ويقول .. تدفنى .. تانى .. اتنين

يا حليل ضلول الضحا

ويا حليل بيوت الطين

ويا حليلن الطيبين

العندهم حقك .. حتى ولكان ملين

-3-

يا حليلْ نسايم الليلْ

فى مقرن النيلين

وحليوة الحلوينْ

عينيها براقين

شايلين خريف وشتا

وصابين علينا . . حنينْ

-4-

يا حليلْ أهلنا الكتار

والمو أهَل . . وكتار

يجوك وكت الفرح

ويجوك ساعة الترح

وبينن ساعة الترح

وبينن اللتنين

يجوك خفاف وسراع

ويقولو ليكا .. سلام

ويجيك معاهم سلام

-5-

يا حليلْ كَبوبنا وعَجاجنا

ويا حليل سجمنا ورمادنا

وزعلنا دون أسباب

وفرحنا دون أسباب

وبُكانا دون أسباب

يا حليلو هُه الما غابْ

راقد تقول تمساح

حارس العقاب بالناب

راقد تقول محدود

فى الدنيا . . من غير حد

طيب . . وزين . . وفقير

وغروره فايت الحد

يا اخوانا – بالله

قولو لى كيف الزول

يقدر يخون بلده

مهما تكون بلده

تعبانه . . فايته الحد ،

سيد أحمد الحردلو >> (( حصل ))


(( حصل ))





يا جَنَا .. أبداً جَرَالَكْ أمرْ مِن هَذَا القبيلْ ،

إنك مسافر فى بلاد بره .. وزول عابر سبيلْ

تلقاك بنية حليوة .. زى موية السبيلْ ،

والدنيا حرْ ..

والجوف عليلْ ،

تنده عليكْ

يا ماشى زى الغابة .. يا زولْ .. يا جميلْ

وَقفْ .. وهاكنى معاكْ .. وسافِرْ .. يا جميلْ ،

- أيوه حَصَلْ ،

بس المطرْ كان قاجى .. والليل كان جميلْ

والبندقية .. جزيرة الطِليان ..

يمين . . مليانة شيلْ

والبحرِ رايقْ .. والمزاجْ . .

والجيب تقيلْ ،

وشربنا . . ناماً شُفنا ايطاليا مدنقرة فى المحيطْ،

وتقول ياليلْ

ويمين – حلفنا – نعومْ .. وكان الكيفْ تقيلْ

وا ليلْ ،

يا زول حَصَلْ .. زى ما حَصَل . .

ما الدنيا ليلْ

والزول مسافرْ

والطلايناتْ ديكْ . . يا ليلْ ،

- أيوه حَصَلْ

. . . بَس المطر كان قاجى .. والليل كان جميلْ

البندقية –مارس –1975