عبد الله الطيب لك السلام في غيابك...... الشوق غلب

شقيقي عبد الله الطيب رائد في القوات المسلحة أسر في 1998 مايو
لك السلام في غيابك
ولك السلام أينما تكون...
تري هل حسبت كم غبت عنا فلقد شارفت المدة علي العشرة سنوات والكل مشغول بك وعنك ولم ينقطع الأمل ....
ولو تذكر كان آخر تواصل بيننا في خطاب ارسلته من رمبيك في العام 1996 وحينها انا ممتحن للشهادة السودانية والآن علي مشارف ان أنتهي من الماجستير لقد سرقنا الزمن يأخي أو سرقك منا....
هناك الكثير من التفاصيل التي لم تحضرها فبعد ان وصلنا خبر أسرك في مايو 1997 لم ينتظر الوالد كثيرا فذهب الي أب كريم ورب رحيم في فبراير 1998 بالبركل وقبل وفاته بقليل وذات جمعة من جمع التركين والقراصة في الصالون ومعه عمي احمد وعمي الطيب الامين ويوسف الهاشمي دخل عليهم سر الختم محمد خليفة لوداعهم لأنو ماشي لندن للعلاج وبشئ من الهظار الوالد قال ليهو لندن شنو يالسر بعدين تسوي الاولاد في نقل جثمان والسر قال ليهو انا أصغر منكم كلكم ماشي فحوصات ساي وشاغلوا بعض وضحكوا بعداك الوالد إتعدل في قعدتو وقال ليهم السنة دي ما بنفوتها انا ويوسف والسر والطيب وأحمد اخوي ده إحتياطي وبالفعل إنتقلوا الي بنفس الترتيب وتوفي سر الختم في لندن ونقل جثمانه الي الخرطوم.....
لهم جميعا الرحمة والمغفرة وطبعا عمي أحمد إتوفي في الخرطوم ودفن في الكلاكلة الوحدة في غرة رمضان 98 ....
باقي الناس طيبين وُشداد إلاّ امرك ده شاغلهم شديد وخصوصا الوالدة قايمة وقاعدة صاحية ونايمة كان بتصلي والله تسبح تلاهي بيك وتسوي يامهون القواسي .....
حيدر في أمان الله ولي يومو ده في الدمام وكمان خالد ورغمة الله معاهو هناك والطيب ولدو إنت ما حاضرو ومحمد الخير عافية تب ابو التومات والطيب وإعتدال وأمل .......
ومبارك يحمد ربو عندو كمان الطيب والبراء ومحمد وإسراء وليهم أخو في الدرب عليّّ لمو في خواجات ومعاهم سودانيين بنالهم قرية سياحية جمب الجبل ومارضو يدوه قروشو والمحاكم تقوم وتقع 3 قضايا حكموهن ليه والرابعي قربت وينتهي منهم بس انا موجعني السودانيين الشهدو مع الخواجات بي الكضب ديل والعجب كمان فيهم واحد شيوعي بتاع الطبقة العاملة وشنو ماعارف أكل المصحف زي القراصة دحين الموضوع ده خلو هسه .....
القرني طبعا إتزوجت اخت زوجة محمد الخير وجاب أسيل وأويس....
زلفي وفواهيما راقين وياوالله مهاد السنة دي دخلت كلية الطب في الزعيم الازهري ....
الخال طه طوالي يسأل من خبرك .....
وعمتنا الروضة إتزوجها ناجي ود الفكي (المحس الفي البركل فوق)..... قبل وفاة أمها بي شهر ....
بجي راجع وأكمل لك باقي القصص دحين لي الوقت داك بنبقي في رجاك .....