زياره واحده لاتكفي!!!

بدون سبب لقيت روحي افتح النبر واتحكر في قلبه رغما عنه وعني انا زاتو المقاطع
المنبر دي بالسنين وبعد طلقته بي التلاته مش لعيب فيه لكن ظروفي ما بتسمح اقعد فيه كتير المهم جيت
اكتب شنو؟؟؟
اكتب شنو؟؟
ولي كل الرغبة دي في الكتابة ؟؟
وانا اصلا ما محدده موضوع اكتب فيه؟؟
يا زول(( دا غير يا زول داك دا زول تاني)) حاله الزهج دي تخليني اعمل اي حاجه
(( يعني ما اي حاجة اي حاجة)) لكن انشاء الله اكتب في المنبر
وانشاء الله هترشات (( طبعا ما زي حقت البت شيري)) انشاء الله تكون لسع بتهرش
دحين هترشته كان مكسره صاحبي رومانسي الاساسي لكن مشكلته انه كان بسف صعوط
وكمان كان سمين لكن حبوب والله ما علينا
والمشكلة هسع الولد قعد ابكي والمدام في المطبخ اكيد حا تقول قوم شوف مصطفي ببكي ماله(( مصطفي دا باكورة انتاجي وكدا))
والمشكلة التانية انه لسع ما عرفته اسمي عنوان البوست شنو؟؟
قلت اسميه زهج ابو لستك لكن بالمناسبة ابو لستك دي يعني شنو؟؟؟
اقول ليك كدي اولع لي سجارة لكن دي زاته مشكلة تالته التدخين في الشقة ممنوووع
التقول معرس لي طرمبة بنزين لازم اطلع بره اشرب السيجارة واجي راجع امكن بعد داك القي عنوان للبوست او اكون لقيت الفكره كله وطلعت من المنبر لكن الباندوث الهامل دا
اخليه ساي بكري زمان كان معزبنا فيه وكمان قال احدد البوست بعدد الحروف عشان الباندوث صاحبي داك ما بجيب اسمه(( ما بامسيكا طبعا)) قال البانودث دا يعني شنو
والله ما عرفته اقول ليه دا شنو لكن قلت ليه يا صاحبي دا شفته زي بيت الجداد لمن اتملي لازم تفضيه عشان الجداد اعيش كويس ههههههههههه الغريبه انه اقتنع بالفكره
والله الوقت داك كنا بنستهلك جنس جداد اقصد جنس باندوث بالمناسبة دي ود عزه وين
كان من كبار المستهلكين وهنا المستهلك كان منتج والله كل ما اكتب استهلك
لكن الظاهر لي الباندوث فائض بقي الناس قلت ولا الكتابة بقت شويه والله بكري مشي محل السرفيرات الغالية وخلي محلات ابو الرخي
المدام قالت لي قوم شوف مصطفي ماله

>>>>>>>>> يتبع

شيري و بامسيكا و ود عزة .. غايتو قديم قدم
و طولت طول يا حبيب الكل ..

____
يا زول وين الحي بيك؟!!

...
بالتبادي.. مبروك الطرمبة،
وربنا يحفظ مصطفى..


أنا كمان من غير سبب لقيت روحي متحكر في بوستك ده لأنو ذكّرني الزمن الجميل..
كنا ناس مصاطب وبنتفاعل من بعيد مع اللعبة الحلوة..
نشيل (أفضال الضال في سلاح الإمداد)، نقرأ ونطبع ونهدي الحبّان..
نتسطل مع هترشات شيري ونتابع (موت الدهشة في عين الكديسة)!!
ياخ داك زمن والله..
بعدين كان الواحد فينا بي سهولة بيَحشِّش على البشرية بي كلام من نوع (باندويث) و(سيرفا) وهَلُمّ قيقا!!


(كلمة) سودانيز نفسها كانت (ليبُل) فوق الجبين بتدلّل على علو كعب مستهلكها ومواكبته لشؤون الثقافة ومستجدات الكون.. هسّة بقت سودانيز في القواميس مرادفة لمفردات العويل والدوشمان!!
إلهي هذا حالنا لا يخفى عليك.. وضعفنا ظاهر بين يديك.. فعاملنا بالاحسان إذ الفضل منك واليك.. قيل عتراتنا وآمن روعاتنا.. ورجّع لينا المكان زي ما كان
...

ملاسي
يا حبي الأساسي
لو عايزنا نرجع زي زمان قول للزمان ارجع يا زمان
تتفتكر اكون من شنو؟؟

الرائع وديدي
والله يا حليل زمان زمن المنبر كان بشتغل بالفحم والنت كان زي كورة الشراب
المشجعين ساي كانوا حرفين في اللعبة
لكن نقول شنو في عصر الانفتاح دا

حبيب الكل..

مرحبتين حبابك..

وفعلا.. زيارة واحدة لا تكفي..

ليك الود

العزيزه
raja
والله لو علينا نسكن في الحلة دي عديل كدا لكن ظروف كدا
وحاجات تانية حامياني

عرست يا حبيب الكل؟؟

وعملت مصطفي كمان

ما شاء الله
تبارك الله
لكن والله جبتها مصرجة
غايتو انا زاتي عرست ومصطفي قرب يشرف
والله كبرنا يا حبيبو
يا حليل كلزيوم

اساسي
والله مشتاقين شوقنا زي ماسورة مكسروة في نص السوق العربي
انا في الماسنجر تعال بي الطاقة لو لسع قاعد
وصحي يا حليل زمن كلزيوم

حبيب الكل

سلامي ، يازول علك طيب ، هل لا زالت ترواح بين العلمانية والاسلام ، ولا زلت معجب بعلمانية سيدنا عمر عليه السلام ، الشوق الي ذلك الزمن الجميل .

شكرا مع حبي

معتصم

حبيب الكل

سلامي ، يازول علك طيب ، هل لا زالت ترواح بين العلمانية والاسلام ، ولا زلت معجب بعلمانية سيدنا عمر عليه السلام ، الشوق الي ذلك الزمن الجميل .

شكرا مع حبي

معتصم