بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع

كلمات الأستاذ الشاعر السر عثمان الطيب.. عزف وأداء صديق منصوري

الشكر موصول للأخ الفاضل المرجع في هذا التراث الكبير
الأخ أبو الحسين لمدنا بهذه الكلمات الخالدة

القدم كان ليهو رافع
قاسي فرقك يوم اوادع
لو فضل في العمر ثانيه
تاني لابد ليكي راجع
تاني راجع يا بلادي

ان نسيت ماب انسي مرة
كيف فى بعدك ضقت مرة
كان اخير لى اقعد هناك
اعيش ولو بى كسري مرة
تبقي حلوى في بلادي

عشت يوت فى الغربة امنح
ابكى طول الليل وانوح
كل ساعه اتمنى ارجع
امشي اشد رحلي واروح
امشي اروح لى بلادي

شان اشوف دار الأحبه
اصطفاها القلب وحب
فيها اترعرع تربي
بين حنان خلانو شب
شب عاشقك يا بلادي

إن عطش يسقيهو نيلك
أكلو من ثمرات نخيلك
ياحلاتك ويا حليلك
والقمر يلصف في ليلك
وين مثيلك يا بلادي

يا حبيبه تعالي شوفي
شوفي كيف حالى وظروفي
شوقي نار توقد في جوفي
حار على فراق ولوفي
خوفي تنسي يا بلادي

خوفي تنسي حنان وليدك
فاكري إنو مرق من إيدك
راح جفاك واختار سواك
وقلبو تب ما عاد يريدك
حاشا حاشاى يا بلادي

انت لى عيني نورا
بهجة الروح كل سرورا
جنتي الغنت طيورا
زهرتي الفاحت عطورا
والفؤاد عابدك عبادي.
ـــــــــــــــــــــــ

قال الماء والخضرة.. والوجه الحسن)

ونسة في قطر كريمة بين محطة الكاسنجر وأم رهو.
عند ابو غربان وابوحراز.. كان هناك نقد علمي لتجربة حسن الدابي وحسونة شاعر الشايقية
كانت متشددة تقودها واحدة كانت آداب جامعة الخرطوم..
............
درجة ثالثة كلها كانت تسمع ومشدودة
........
لمان وصلنا محطة الكاب.. كانت فعلاً كاب.. حيث الشاي الصاموتي بالحرجل.. شاي النعيم حمد الملك ود البكيرة..
..........
صفر القطر.. والسر عثمان الطيب كان في سنة ثانية مغهد المعلمين العالي.ز كان رفيع الحسم والبنية ولكن عيونه متقدة بالزكاء .. وفكره ثاقب.. عليه أثر عجاجة محطة الدغفيلي.. كنت لا أعرفه وكنت صغيراً جداً.. أولى وسطى.. بنت الآداب كانت لاذعه.. ولكن نقدها للتجارب كان دقيق دقة شعر حسن الدابي..
واحدة ..

والونسة مستمرة والنقد مستمر..
واحدة ركبت من كريمة قاعدة جنب الشباك خرتت سفتها بي أصبعها ورمتها بي شباك القطر وقشت باقي السفة في محل الشباك وحبل القربة
وقالت تب.. بس.. البت دي شعوعية.. أهلا ماربوها.. هسع من قبيل رافعي صوتا فوقكم.. حسن الدابي قال. حسونة قال.. وحات سيدي الحسن مارقي من الليد رافعي صوتا فوق الولاد..
كانت تجلس جمبها واحدة أخري زميلة هذه المتحدثة دافعت عنها.ز سكتت العجوز وغيرت نغمة الحديث وقالت اصلي أنا بجلس في الكلبان دا بين الشباك والكنبة من جوة عشان أسند ضهري عليهو وأبزق السفة.ز وأشم الهواء..
السر كان في درجة تانية يدوهم تذاكر في معهد المعلمين درجة تانية والبت ذاتا.. لكن الربة هنا كانت عامرة.. وكان معانا محمد جبارة لابس بنطلون وقميص عليهو فنيلة بلون كبدي كان ماشي عطبرة..ذكرت محمد جبارة بي حفلة عملها في عطبرة وقتها كان يقلد النعام آدم.. قلت ليهو لما حصلت الشكلة واحد ضرب المايك بتاع مسجل أخوي عمر كسروا والمايك كان أمامك..بعدين جبناك في بيت العذابة في الحصاية تاني يوم تميت لينا التسجيل.. تذكر.. وضحك .. كان بسيط ومجامل..
بس لما جاء الأمارات في عام1989 واشترك في عيد الإتحاد وغنى على الكورنيش.. منع تسجيل كميرات الفيديو..أولاد الشايقية زعلوا شديد.. بعضهم قال كلام لاذع..لكن لم يختلفوا في محبته وتطريبه بالطنبور..

لما القطر وقف في محطة الكاب.كنت متابع حركة السر من بعيد لى بعيد.. اصلو الحاجات دي كانت تستهويني... كان يلبس قميص أبيض نص كم.. وبنطلون أسود ويحمل بشكير على ضهرو.. نزل في محطة الكاب اشترى معجون وفرشة..وراح يفتش في محل الشاي.. القطر قطر بخار.. أكثر محطة يقيف فيها كتير هي محطة الكاب ليتزود بالفحم والماء..الكلام دا كان سنة68 تقريبا وأنا لم أراجع هذه المعلومات منذ ذلك التاريخ آمل أن تكون مضبوطة..

الزمن كان صافي وقلوبنا كانت صافية صفاء الفطرة.. مشكلة واحدة في دواخلنا مافي
.........................
والحياة كانت رغيدة.. والناس كانت رايقة وهادية..
ابن عمتنا سليمان على الأمين عليه رحمة الله.. كان ترزي في السوق العربي الخرطوم..كان يتلقى علوم تجويد القرآن في الجامع الكبير بالخرطوم.. وطالب منتسب في معهد أم درمان العلمي..كان عامل كيس لى مصحف ومعلقو في شباك القطر جنبو..قال نختم النقاش بي تلاوة قالوا لابأس.. كنا صغار لانودي ولانجيب ولانشارك.. نسمع ونهضم ونجتر..
البنت الكانت في ثانية آداب جامعة الخرطوم اسمها شادية..من منطقة القرير..

السر عثمان الطيب مرة قال في السعودية لواحد من أولادنا
قال ليهو أنا بقيت مركب دفتا مقلوعة بلا ريس في قلب البحر)
..........
هذه العائلة معجونة بالفن والطيبة.. والإحساس

القدم كان ليهو رافع دي ظهرت أول ماظهرت في اواخر السبعينات.. المهم وصلتنا في ريفي مروي في نهاية السبعينات..
أول مرة أسمعا..
أنا كنت في هندسة هلتون الخرطوم.. كان هناك فنان صوته لابأس من منطقتنا من جزيرة شرري إسمو( كارة) صوته لابأس ولكنه عازف بارع في الطنبور كان عيان باليرقان راقد في السلاح الطبي..وشايل طنبورو معاهو عامل ليهو كيس.. كنت شغال وردية ليل في الهلتون طلعت جيت أزورو جنبنا في السلاح الطبي.. لقيت معاهو مجموعة من أولاد البلد وبعضهم من كريمة.. قلت ليهو إنت جاي فرش من البلد الجديد شنو؟ في الفن
قال لى ( القدم كان ليهو رافع) رابة رب في البلد.. وصلت قبل اسبوع.. كان يعزفها أحسن من أي فنان في البلد كلها... شال طنبورو وطلعنا جنب البحر في العنابر العلى البحر في السلاح الطبي قالها لينا.. كانت صورة متفردة

قطر كريمة
ديمة مكسر
لاتمحنا ولا تبلينا
قطر كريمة الديمةمكسر
مره إتكسر في الكاسنجر
..............
كان في واحد يردد في هذا المقطع

بعد الزمن البعيد داك تجددت معرفتنا بالسر ووالدتهم واهلهم.. عندما كان يمشي ويجي من السعودية.. مرات في نوري.. ومرات في الثورة..
أصلاً نحن جيران أختهم.. في الثورة.. وجيران لعدد آخر من أولاد نوري..عشنا أحلي الأيام..
...

يا سلاااام عليك ياخ
عارف قبل كده انت نزلت اغنية يا دهب الفرنسا الصافي طوالي انا عملت ليها حفظ في الجهاز و رسلتها لي ابوي في السودان.
البلد انا مشيتها مرتين مره و انا صغير كان عرس محمد عمي و مره بعدما اتخرجت من الجامعه.
طبعا انا في الحستب من مناصير لندن زي ما يقولو ناس البلد لكن يمكن قعادي مع عمي عثمان فتره طويله خلاني اتعرف و الاقي ناس كتيره من ناس البلد.ياخي اقول ليك حاجه انا الوحيد في اخواني البعرف الاربل و الاشميق و ازمان الساقيه
الفجراوي و العشاوي و منازل المطر.
المهم ما اطول عليك لكن عندي طلب عليك الله اغنية محمد بروي انا قتلو وين ماشي (طبعا قتلو دي ما خطاء لكن اصلا نطقها كدي)
ربنا يديك العافيه.

يا سلام ولدنا أباذر كيف الصحة..تمام التمام
..........
شكرا ليك على المرور بي جاي تسلم
........
ما تقول عمي عثمان..قول سعادة اللواء مهندس طيار..
هل تعلم هذه المعلومة
أن عمك عثمان قبل أن يدخل هندسة المعهدالفني زمان كان مدرس .. مرحلة متوسطة درسني في ابوحمد الوسطى.. زمان في حاجة كان اسمها الرقعة في الشهادة السودانية يقول ليك دا راقع.. بس وقتها عثمان كان راقع واشتغل مدرس لمدة سنة
........
الشكر لك يديك العافية
طلبك ان شاء الله مجاب بخصوص أعنية محمد بروي

تمنياتنا القلبية الحارة للشاعر المرهف السر عثمان الطيب بدوام الصحة والعافية والمعافاه الدائمة في الدين والدنيا..

هل كل الناس تعرف أن أغنية
ما شفتي الزمن يايمة ساقني بعيد خلاص
جرعني كاس
دردرني واتعذبت واتغربتا يايمة وريني الخلاص؟
هل يعرف كل الناس هنا
أنها من كلمات هذا الشاعر المرهف
السر عثمان الطيب

Quote: ان نسيت ماب انسي مرة كيف فى بعدك ضقت مرة كان اخير لى اقعد هناك اعيش ولو بى كسري مرة تبقي حلوى في بلادي عشت يوت فى الغربة امنح ابكى طول الليل وانوح كل ساعه اتمنى ارجع امشي اشد رحلي واروح امشي اروح لى بلادي

حمدلله على شفاء الاستاذ السر عثمان


وتشكر منصورى على هذا الابداع

أخونا أوسلي
مرورك بي جاي يشرفنا ويضيف..
أوسلي ومساوي
يا حلات البص لمان يجي بي فوقن من الخرطوم وتشوف رؤوس النخيل والبحر

عندما تلهج ألسنة الخلق للخالق بالدعاء لطلب الشفاء لعزيز مثل
تاج السر عثمان الطيب..

الغالي جداً صديق منصوري...

يا سلام عليك يا اخوي... وإنت تبحِّت تبحِّت للأُُغنية دي... لامِن لقيتها وصغتها بي طريقتك الخاصة... وإبدااااااااااااع لامِن مسرسر فوق التقنَتْ!!!

عبرك ألف حمداً لله على سلامة الأخ الشاعر السرير...

ولك كميات مودتي... وأتاريك كُت لابِت ليك فوق راي في اليومين الفاتو ديل... من الله ليك ألف عافية يااااااااارب...


أبو الحســـــــــين...

البوست دا... بوست خاص... بمناسبة شفاء عزيز..
عشان كدة العنوان الرئيسي الخارجي ليهو مهم...
وإلا كان ممكن يكون بنت من بنات بوست أخونا أبو الحسين.. أي رافد من روافد بوسته ذاك الرائع الكبير الذي صار مرجعاً لكل باحث..
بس نحن هنا في واجب الحمد والشكر لشاعرنا السر..
........
والشاعر بحسه المرهف يتحسس نعمة الله قبل الآخرين ويشكر..
نعمة الشفاء
..........
في واحد من لواري الشمالية الذي يشق صحراء بيوضة مكتوب عليهو من وراء( سمحة العافية) وعادة بعض الناس عندنا يكتبوا أسماء الأغاني الجديدة..أغاني طنبور طبعاً

Quote: يا سلام عليك يا اخوي... وإنت تبحِّت تبحِّت للأُُغنية دي... لامِن لقيتها وصغتها بي طريقتك الخاصة... وإبدااااااااااااع لامِن مسرسر فوق التقنَتْ!!!

أبو الحسين قال كدة
دا من طيبتك يا أبو الحسين البيعرفا القاصي والداني..
وبعدين ياخ ما إنت ليك أجر المناولة.. الله ان شاء الله يناولوك صحن تمرة مدين من الجنة..

Quote: إن عطش يسقيهو نيلك أكلو من ثمرات نخيلك ياحلاتك ويا حليلك والقمر يلصف في ليلك وين مثيلك يا بلادي

Quote: أبو الحسين قال كدة دا من طيبتك يا أبو الحسين البيعرفا القاصي والداني.. وبعدين ياخ ما إنت ليك أجر المناولة.. الله ان شاء الله يناولوك صحن تمرة مدين من الجنة..[/quote] زي دا... هدية د. ياسين بحوش الشايقية... بشفاء الاُستاذ/ السر عثمان الطيب الجايي داخل عندنا بي غادي... يتناول وهو داخل... وأهديها ليكم بإسمه بي جاي... كميات مودتي... أبو الحســـــــــين...

---

Post: #25 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: osly2 Date: 02-27-2007, 10:16 AM Parent: #24 Quote: هدية د. ياسين بحوش الشايقية... بشفاء الاُستاذ/ السر عثمان الطيب الجايي داخل عندنا بي غادي... يتناول وهو داخل... ابو الحسين كملتوا المدين هناك وجيتنا بالحصحاص والله صورة بديعه

---

Post: #26 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-27-2007, 09:14 PM Parent: #1 أبو الحسين أوسلي ........ سبحان الله تصدق قبل ما تنقل صورة.. التمر هنا.أنا قطعتها وحفظتها في الكمبيوتر بتاعي.. لأنو أول ما شفتها ريقي جرى.. وتذكرت عهد صباي.. لما كنا ما بنتغدى من أكل التمر لمان يمرق.. والسمك في الدميرة الإتنين كان موسمهن مع بعض السمك في الدميرة والتمر يمرق في موسم الدميرة.. نسلت السمك على شوك التمر وفروع الشجر اليابس جنب حجرة البحر ونعوم اليوم كلو..والزلقونيات البي نعملن بالطين جنب البحر..البيت ما بنجيب منو غير( الدقة) والملح والشطة..

---

Post: #27 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-27-2007, 09:48 PM Parent: #1 (وَإِذَا مَرِضْتُ فَهُوَ يَشْفِينِ وَالَّذِي يُمِيتُنِي ثُمَّ يُحْيِينِ وَالَّذِي أَطْمَعُ أَن يَغْفِرَ لِي خَطِيئَتِي يَوْمَ الدِّينِ ) صدق الله العظيم

---

Post: #28 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-27-2007, 10:07 PM Parent: #1 الليلة وين ناس البركل.. ما عطروا البوست دا..

---

Post: #29 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-28-2007, 04:09 AM Parent: #1 وناس القرير حلة الفقرة؟

---

Post: #30 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: أبو الحسين Date: 02-28-2007, 07:59 AM Parent: #1 Quote: ابو الحسين كملتوا المدين هناك وجيتنا بالحصحاص شوف عليك الله الطَمْسَة دي!!! الشئ مبقِّع نص نص تقول لي حصحاص؟؟؟ عليك الله يا منصوري... في أُغنية بيغنيها عوض الجرف... سمحة منصورية من جلدة أبوها... يضوي جبينها بالأنوار كسوها... فيها إيقاع وهجيج مبااااااااااالغة... لو عندك نزلها لينا وننقلها للحوش بي غادي... كميات مودتي... أبو الحســــــــين..

---

Post: #31 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-28-2007, 09:12 AM Parent: #1 Quote: سمحة منصورية من جلدة أبوها... يضوي جبينها بالأنوار كسوها سمعتها عند عوض الجرف هذه الأغنية يا أخونا أبو الحسين.. حملها لي بعض الأخوة في شريط.. ولكن من كثرة الإستلاف ضاع... الإستلاف دي بالمناسبة .. السلكة الرابعة والخامسة من تحت في الطنبور إطلقت عليه في أواسط السبعينات.. عشان جابت صوت في الطنبور محبب.. واحد من جنبنا اسمو( حسن سكينة) راجل طروب وأديب في إيقاع الدليب.. من ما تبدا الحفلة حتى تنتهي هو في الدارة..كلما ترقص بت هو في الدارة.. حسن هذا قال عن نغمة الإستلاف دي..( والله النغمة البي تقول بققوووم دي أنا قاعدة تمزق قلبي وتكتلني عديل كدة) ,,,,,,,,,, ابو الحسين سوف أبحث لك مجددا عن هذا الشريط ......... لكن طبعاً أنا تركت الغناء بصورة مباشرة .. مما كنت في عطبرة الثانوية.. سنة تانية.. الوالد كان ختمي على السكين.. وكان بيفتكر أنا لا أخطأ..ومعه مجموعة من ناس البلد العجايز..وطبعا أنت تعرف نظرة الكبار للفن عندنا وإن كان الآن بدأوا يتفهمونه..واسباب أخرى كثيرة جعلتني اترك الفن بصورة مباشرة في الحفلات.. ولكن عيون أغانينا الجميلة من الشعر الجميل لازالت تستهويني خاصة إذا كان مافيها غزل مباشر.. واصلاً الفنان مسكون بالفن في جوفه لأن الفن وسيلة تعبير اصيله ......... ابو الحسين لقد ذكرت طرفاً من هذا الحديث في بوستك الرائع المرجع ذاك.. وذكرت لك أني لما توقفت عن الغناء لم يخامرني شك أن ابن خالتي عبد الرحمن البركل يوما ما سيتركه. لأني أعرفه إنسانا رائعا نبيلا جميلا متدينا.. وقد تحققت نبوءتي فالآن عبد الرحمن يطيل قيام الليل.. لم يشطب مسيرته الفنية ولم يتنكر لها ولكنه قفز منها الي مرحلة أعلى في التدين.. وصار لايغني الآن.. وكذلك انت يا شيخنا أبو الحسين الآن تستهويك المدائح والأناشيد. فأنت رجل حر المعدن..

---

Post: #32 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: منصوري Date: 02-28-2007, 10:14 AM Parent: #1 يا أبو الحسين وعبدالرحمن البركل أو عبد الرحمن محمد صالح علي المادح تخرج في كريمة الثانوية عام1972 وعمل مدرساً.. في حفل الوداع بمدرسة كريمة الثانوية كان اسمه مسجل في برنامج الحفل يغني.. وكان خجولاً يحترم أساتذته.. وكان هنالك أستاذين يقدرون عبدالرحمن شديد التقدير ويعتبرونه ملاكا وكانوا لايعرفون أنه يغني.. فقال عبدالرحمن والله يا ناس الحفل.. اذا كان أستاذ فلان وفلان حاضرين الحفل اعتبروا اسمي ملغي من الحفلة.. ولكن شاءت الأقدار أن لايحضروا. فغنى عبدالرحمن أغنيتين.. شدت انتباه الجمهور... فعلاً عبدالرحمن رجل حساس ورقيق ومهذب ومتدين.. ولكن مثلي الفن من حيث هو في جوفه ......... لو تلاحظ إختياري الآن لأغنية القدم كان ليهو رافع.. أغنية خالية من الغزل الصراح والضمني حتى.. وقد اخترتها في مناسبة كهذه مناسبة شفاء الشاعر المرهف السر عثمان الطيب.. وفي المرض عوافي مبطنة يكون فيها الإنسان اقرب الى بحر التوحيد وقريباً من الرب بصورة ملموسة.. فلذلك كان إختياري لهذه القصيدة الأشبه بالقصيدة الدينية.. كلها شوق وحنين للبلد.. وقتما ظهرت أغنية القدم كان ليهو رافع في السبعينات كانت أغنية الموسم في الحفلات بدون منازع.. وقد انطمرت بعد ذاك.. فأحببت أن أجددها لأنها أغنية لايجب ولايجوز أن تزول من الوجدان. لأن تعبيرها خالد.. فهي أغنية محبة خالصة وتدفق وجداني رائع، ففي وقت الألم والمعاناه والمرض حينما يتقرب المريض لربه بشئ من وهج المحبة الصافي كمثل هذه القصيدة. يكون الشكر للرب خالصاً بمادة صافية غير مشوبة بالحب المخلوط..

---

Post: #33 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: تاج السر محمد حامد Date: 02-28-2007, 11:03 AM Parent: #32 أخى وعزيزى الاستاذ / السر عثمان الطيب لك التحية أيها الاخ المفضال .. والف حمدلله على سلامتك سائلين المولى أن يمتعك بالصحة والعافيه لكى ترجع أكثر حيوية ونشاطا لعشاق كلمتك المرهفه وكما جاء فى اعلى البوست ( القدم كان ليهو رافع يابلادى أنا جاى راجع .. بمشئية الله أخى السر ترجع وترجع وترجع وداعواتنا معاك أيها العزيز الغالى .

---

Post: #34 Title: Re: بمناسبة شفاءالشاعر المرهف السرعثمان الطيب..القدم كان ليهو رافع يا بلادي أنا جاي راجع Author: أبو الحسين Date: 03-01-2007, 07:13 AM Parent: #1 Quote: فعلاً عبدالرحمن رجل حساس ورقيق ومهذب ومتدين.. ولكن مثلي الفن من حيث هو في جوفه الغالي المنصوري... رأيت الرجل مرة واحدة في حياتي في زواج وقيع الله الخضر عبد الله... وحقيقة الرجل فيه كل الصفات التي ذكرتها... رجل مهذب لغاية ما تحمل الكلمة من معنى... وصوته جميل... نادر أن يتكرر في زمننا هذا... ولو قرأت قصتي مع نانسي عجرم في كريمة إجازتي الصيفية الفاتت... ذهبت مخصوص لتسجيلات الكمالي وإشتريت منه كمية من أشرطة ود البركل الناااااااادرة... (السمحة وقيافة يا السكنتي جوارنا نورتي الصحافة ولة عاجباني)... وحا أحاول إنزال الأُغنية هذه في الحوش بي غادي لو سهل لي الله ونزلتها... للأُستاذ/ المعلم المربي عبد الرحمن البركل... كل مودتي... كل أهل البركل الأخيار... مننننننن شيخنا محجوب جعفر (اللهم أرضى عنه) إلى أصغر طفل مولود ببركل الخير والرضا... كميات مودتي... أبو الحســــــــين...