ماشي أحضر ليكم إفتتاح معرض الفنان التشكيلي الطيب الحضيري

يا حليلكم....

في إحدى فعاليات جدة الجميلة.... سيتم بعد قليل افتتاح معرض الفنان التشكيلي الطيب الحضيري برعاية السفير/ أحمد التيجاني - القنصل العام لجمهورية السودان بجدة.. وذلك بقاعة بيت الفنون الجميلة.....

أنا ماشي الافتتاح....وجاييكم إن شاء الله

الكلام على الصور...إنجليزي قدر كدا ما عندنا...إلا أقوم أجيب الصور وأرسلها لأهل المعرفة يقوموا يعلقوها ليكم هنا...أنا يبقى لي بي نار أكان قلت ليكم بعرف أعملها براي...


الدعوة لكم إلى عوالم من الدهشة والجمال....
لمن يريد التواصل:
هاتف الصالة: 0096626614651
جوال الطيب حضيري 00966569475357

الافتتاح كان رائعاً....محضوراً ... فيه تمثيل دبلوماسي عالي كمان...
القنصل..ونائبه ...ورئيس الجالية...وسكرتيرها الثقافي أظن...
ولفيف من المهتمين والأسر...والله فاتتك حاجات يا سجيمان..
والشفع جنس قلة حياء....
بس غايتو ..المعرض جميل فعلاً...
والأعمال الفنية عالية الثراء من ناحية الفكرة واللون....
أنا باعتباري صاحب العريس..بسم الله صاحب الفنان...جبت ليك داك يا شريط زانفير.. والمزيكة الختيرة ديك....
الطيب الحضيري كان إصراره شديد على إن الموسيقى الخلفية لازم تكون غنا سوداني عدييييل... من عثمان حسين وإنت طالع....

غايتو جنس جن وجنس ملاواة في الدنيا دي....

المهم ... الصور جاياكم...

مودتي

أب زرد

بعد التحية والتقدير الشديد للولد النجيض علاء تمبس...نقوم نعمل محاولة لرفع الصور بعد روحنا انسلت عديل كدا...

أول حاجة نبدأ بالطيب الحضيري في رقبتو دي....عليكم النبي شوفوا الزول دا سمح كيفن...

وبعد كدا الصور تتحدث..أليست هي أبلغ من أي كلمات...

شوفوا جنس الجمال دا....

واللوحة دي تحديداً أنا مراهن عليها...ومعروضة للبيع الآن لأفضل سعر...

والله سماحة شديدة خلاس...

واللوحة دي ومعها قطعتين تاني ....والله أرشحها بشدة لمكتب سعادة النائب الأول الفريق سلفاكير...



وكله بالكوميشن ياصديقي الطيب الحضيري...

أها أمسكوا دي...أتمتعوا ساااااااااكت في الدنيا دي


ولا يزال العرض مستمراً...

تحياتي وحالة كون الواحد طربان تشكيلياً...

.

ياسلاااااااام يا محمود يا أخوي

و الله ليك وحشة ما بتعرف رسايل

أريتك و العيال طيبين

الليلة جبت سيرة راجل

و تعال ...مالو الطيب الحضيري اتملا شيب كدة؟؟

هسع بعد عاوز اقول انو دفعتي اتراجعت

هو في الحقيقة دفعة خالنا حسن النور عيسى في كلية الفنون الجميلة و التطبيقية في زمن الديمقراطية الحلو..أنا كنت بحضر (الدبلوما) أو معارض التخريج لمدة خمسة عشر عامآ!! و كان بالطبع لي هناك أصدقاء و حبيبات لووول..كان عصمت بورتوبيل و اسامة الحويرص و شريف و عبدالغني و عيييييييييييييك..
ذكرتنا زمن سمح
يا دووووووبك عشرين سنة لي وراء
ما كتيرة على الحي
كان الأستاذ الطيب الحضيري يكتب على الحائط (جرعات : ود الحضيري)
ردآ على (كبسولات) ..
و كان طعم الديمقراطية في الخشم
سلام للفنان الراقي الطيب الحضيري و لأعماله و لضيوفه
بعدين القنصل بتاعكم دة اسمو يشابه اسم صاحبنا المقدم شرطة حسن التجاني..يكون أخوهو؟

.

الطيب أخوي...كيفنك آآآخوي... على الحرام مشتاقين لدرجة القَرْيَفَة..شايف التشكيل دا كيف؟؟ نحن ناس كيبورداتنا عربية حرة...الحروف ما بنلقطها زي لقيط الهناي بتاع البتاعة البنصقعوا بيها المصاقيع الدمهم خفيف ديل..

أبشرك...والله نحمد الله نحن والعيال في أمان الله..أها إنت وعيالك طيبين؟؟
سألت:

Quote: و تعال ...مالو الطيب الحضيري اتملا شيب كدة؟؟

الطيب الحضيري الصورة دي قبضناهو ليها قبض..أظنه كان بيتأمل في طاحونة...ولأجل ذلك يا أخي الكريم لعلنا نحسب أن هذا ليس شيباً...وإنما دقيق ناااااااااااااااعم....والله أعلم..

Quote: هسع بعد عاوز اقول انو دفعتي اتراجعت

لا بالله أحسن ما تتراجع..الطيب طيب الليلة ولا أمس؟؟

Quote: هو في الحقيقة دفعة خالنا حسن النور عيسى في كلية الفنون الجميلة و التطبيقية في زمن الديمقراطية الحلو..أنا كنت بحضر (الدبلوما) أو معارض التخريج لمدة خمسة عشر عامآ!! و كان بالطبع لي هناك أصدقاء و حبيبات لووول..كان عصمت بورتوبيل و اسامة الحويرص و شريف و عبدالغني و عيييييييييييييك.. ذكرتنا زمن سمح

والله ياأبو بشير فعلاً كان زمن جميل..ياخ الناس ديل كلهم بعرفهم حد المعرفة..لكن الحبيبات ديل ما قدرت أخمن ولا واحدة...ها زول نعل ما كنت مداقرني في واحدة ...والوكت داك إت ظابت في البوليص؟؟ وأنا أقول مالو الرماد كايل كل محاولاتي (النبيلة)؟؟

Quote: بعدين القنصل بتاعكم دة اسمو يشابه اسم صاحبنا المقدم شرطة حسن التجاني..يكون أخوهو؟

المقدم صاحبكم ولا دفعتكم؟؟ غايتو أنا العارفو إنه دفعتكم عمداء عدييييييييييل...أكان شردت من شيب الطيب...(الرُّطَب) دي بتطير منها ويييييييين؟؟؟ لووول.

ياخي حضورك هنا كان بهياً وجميلاً كما رائحة المسيد...
ودمت أخاً عزيزاً

كدي بالله شوفوا جنس السماحة دي



القطعة دي تم بيعها بسرعة البرق...مع الافتتاح طوالي

(ان الله جميل يحب الجمال)

دي واحدة من أمهات القطع...جدارية معروضة للبيع لأعلى سعر...ومن جانبي أرشح تلفزيون النيل الأزرق ..أو سوداتل

كورجة .. وزخم لونى حار .. والحلة نافره .. ياربى الناس ديل مارقين
كده يطالعوا شهر رمضان والله شنو..؟؟؟ والنسوان ديل ،
بجهزو للآبره والحلو مر أنا بتوارا لى كدى ...
ياناس ...... الحله دى ما براها قطع شك بكره العيد !!!!!! ..

ألوان حارة وريحتها طالعة جت .. تجدد فى رؤية جمالية
أخرى مأخوزه من أصول بنائها فى أفكارإبداعية قائمة
بذاتها ، مظهرة لقيمها الجمالية فى تشكيل لونى متعدد
عمل يستحق الإشادة والتهنئة ..

أخى / محمودمصطفى .. لك الشكر والثناء على الإهتمام يا ظريف ..
محمود بشير / كيف حالك يارجل والشكر موصول لكل من تذوق شيئا
من هذا الطعم والنخب الجميل .. شكرا وتحيتى ...
محمد مختا جعفر ..

الأستاذ الفنان القدير محمد مختار جعفر
تحياتي وتقديري....
مرور العارفين قطعاً ليس كمرور الكرام...ولو إني ما عارف ليش الناس بيقولوا الكرام للمرور السلبي أو السطحي..
لقد كان مرورك كريماً ...وكلماتك ليست كالكلمات..كلام الزول العارف الحاجات وحاسي بيها..كلام من سبر أغوار اللون والرؤية والتكنيك والموضوع...والله إني لا أدعي أهلية الرد على مداخلة من هذا العيار...ومن شخصية بهذا الوزن...

شاكرين تلطفكم الكريم ببهاء الحضور هنا...

Quote: محاضر ... ( فنان تشكيلي .. مخرج صحفي ، وإعلامي )

ودمت أخاً جميلاً ....أيها الفنان الأصيل...

وهذه إحدى الروائع...

الاستاذ الطيب الحضيري..
رافقنا في رحلة الدراسات الميدانية لمنطقة جبال النوبة ..ونحنا طلاب بالسنة التانية بالكلية 94..
كانت فرصة جيدة للزول البيلقى طريقة ويطلع مع الطيب يلوّن..بلا شك تستفيد من تجاربه..
بداية من تقنيات إعداد الورقة للتلوين..مروراً بإختيار الزاوية والمشهد ..ثم تقنيات إستخدام الالوان..
لازلت أذكر كيف ان الطيب نهاية كل يوم- وبالذات في منطقة "الرشاد" الجميلة-..ينادي الشباب ويرصو الاعمال قدام القُطية ..ويبدا يعلق عليها ..

" بعداك طبعاً بيتفرغ لي جر سبحتو .."

قبل هذا كله الطيب الحضيري عمل أستاذا لمادة الفنون بمدينة ود مدني ..ردحاً من الزمن ..
بلا شك ساهم في إخراج كثير من التشكيليين والتشكيليات بمدينة ود مدني ..بالإضافة الى مشاركاته في المشهد التشكيلي في مدني والجزيرة عامة..


لك ياالطيب كثير التحايا..وتمنياتي بمزيد من المعارض والالوان ..واهو ناس جدة شكلهم عامريين..


وسلام وتحايا يا مصطفى ..

االشكر لكن أخى محمود وأنتم تكحلون نواظرنا بهذا الجمال

ونقول: على أيام الطلب بمعهد الكليات التكنولوجية – جامعة السودان للعلوم والتكنولوجيا – لاحقاً، كان الشتاء يرتبط فى أذهاننا بالجمال حيث تقام معارض البكالوريوس لطلاب (فنون) – ونكون موعودون بشرحبيل وعقد الجلاد - وكانت تصادف إجازة نهاية العام، فكنا نقطع الاجازة ومعها مئات الكيلومترات لنوافى ذلك البهاء والجمال.
ومضت السنوات انقطعنا خلالها عن تلك العوالم، فأبت إرادة الله إلا أن تسخر لنا الأخ الفنان/الطيب الحضيرى، لينقل لنا صورة مصغرة عن الريف السودانى الشاخص عبر عدد من اللوحات الناطقة بالبهاء والجمال.
فالحضيرى هو نموذج للسودانى فى بساطته وثقافته وتدينه وكذا جاءت لوحاته البهية الوضيئة بطيبة وجمال ريف السودان.

(هذا ما جاش بنفسى وأنا أتنقل بين اللوحات فى صالة الفنون الجميلة بمدينة جدة ودونته فى سجل الزوار).

ونرجو أن توالى هذه الامتاع

شكراً جميلاً الأخ الفنان قيسان

والله أنا قايلك عصام قيسان بتاع الخزف داك..أتاريك إنت سنة 94 كنت في تانية؟؟ عصام قيسان الوقت داك كان حبوبة

مرورك المقدر ووقوفك المتأمل .. كان مطلوباً لأنه يثري هذه المساحة .. وشكراً لكلماتك المنصفة في حق حضيري..

ودمت أخاً جميلاً..

الأخ العزيز أبوعبيدة...
تحياتنا لك ولأسرتك الكريمة...وأنت كما العهد بك.. حاضراً في حراك الإنسان السوداني بهذه المدينة...عروس البحر (طبعاً البحر عنده عروس سودانية بهناك..غنى لها إبنها حيدر)..

Quote: ومضت السنوات انقطعنا خلالها عن تلك العوالم، فأبت إرادة الله إلا أن تسخر لنا الأخ الفنان/الطيب الحضيرى، لينقل لنا صورة مصغرة عن الريف السودانى الشاخص عبر عدد من اللوحات الناطقة بالبهاء والجمال.

شكراً على هذا الكلام العذب...وماك مشحود عليهو...فأنت فنان ومثقف مطبوع..

وتتواصل هذه الروائع...

شوفوا..أشبعوا شوف

ولا كلمة

يغني المغني بس..

وكدا كيف؟

hello son

how are you

i hope you and all family are well

love

dad

Dear Dr. Mustafa Mahmoud
Hope you are OK and welcome back after being away for some time
Me and the family are fine..thank you for asking
I thought for a while that you're gonna drop some words
for my friend the Artist Tayeb Hedairi as an appreciation for his wonderful works

Thank you for being here

Mahmoud

صورة مع الطيب الحضيري في معرض جماله...ونعتذر لرداءة الصورة ...طبعا الصورة بموبايل عادي ....

ونواصل؟..


وكمان

العزيز محمود..

سلام ومحبة..

طبعا ما ممكن المعرض يكون في خشم الباب وما ندخل نتفرج ونهدي روحنا بعض من جمال..



تحياتي للفنان الطيب الحضيري..

وكل الأمنيات بالتوفيق في كل أعماله..

وشكرا ليك كتير على الحضور والتغطية المحترفة..

ودي

معقولة بس؟؟؟
رجاء هنا؟؟
يا جماعة دا جمال شنو دا؟؟
يا الطيب الحضيري هووووووووووووووووووي.... ألحقنا...
رجاء جابت الجمال كلو وجاتك...

شكراً لك وأنت دائماً سباقة لكل جميل...
والله مرورك أسعدنا غاية السعادة...وقاصدين شفاعتك في عوالم الجمال..عشان كدا تكلنا ليك البوست في يومياتك اللذيذة..

وشكراً على الإطراء...الحضور كان بدافع الحب...أما التغطية فهي عفوية خالص..يا ربي عشان كدي أعجبتي بيها؟؟

مودتي التي لا تنتهي..

وهنا برضو


الزيادة هنا

الأخ محمود
تحية الجمال
شكرا أن أتحت لنا هذا الحضور
ومزيدا من الجمال أخي الطيب
سأعود لمزيد من التحليل

أخوك
نورالهادي

الأخ الأستاذ نور الهادي...

حضورك هنا يثري هذه المساحة السمحة سماحة الإنسان السوداني الجميل.. وأنا يكفيني أجر المناولة...
العودة بمزيد من التحليل هي الوعد؟؟؟ كلام سمح من زول سمح يجعلنا نطمع في المزيد من الإضاءة على هذا البراح..

دمت أخاً كريماً ودام فؤادك امتداداً وماعوناً ينضح نقاء وجمالا..

الاخ م م م اعجز عن شكرك وتكبدك مشاق الطواف بنا في هذا المعرض الجميل الرائع لك كل الود وللرائع صاحب الريشه الذهبية

الاخ م م م اعجز عن شكرك وتكبدك مشاق الطواف بنا في هذا المعرض الجميل الرائع لك كل الود وللرائع صاحب الريشه الذهبية

الأخ العزيز محمد المختار...
بل أشكر لك أنت حضورك هنا...وتحيتك للأخ الفنان الطيب الحضيري ستصله إن شاء الله..
ودونك المزيد من الجمال هنا:



ودمت أخاً عزيزاً..

ونواصل....طرب الألوان..


رؤى عجيبة

المزيد؟؟

والله الواحد خايف يتوه التوهان الواحد دا

(ان الله جميل يحب الجمال) up

يا سلام عليك يا محمد المختار ياخ...
إنت يا يابا تتعلى وما تتدلى على قول رجاء
يا جماعة البوست دا مليان لوحات تقيلة خلاص...أوعكم تنزلوهو لينا تحت...العتالة دي إنتو قايلينها باردة؟؟

دمتم سالمين

مودتي الشديدة

.



نحن صورة الموبايل ما عندنا عليها اعتراض
عمامة المقيم ما عندنا عليها تعليق
لكن دبارة تخليك تعمل خلفية لصورتكم السمحة دي باللوحة السمحة دي ما عندك!!
استعنت بصديق؟؟
تحياتي يا سمح
هل أبلغت الفنان أني لا زلت أحبه؟
و لا هو نسانا حبيبنا؟

.

الطيب أخوي اللذيذ...
ياخ والله بتدور تقطع مصارينا ديل بالضحك...
قلت لي:

Quote: لكن دبارة تخليك تعمل خلفية لصورتكم السمحة دي باللوحة السمحة دي ما عندك!! استعنت بصديق؟؟

إت هسع أكان (استعنت) بالكتمان..ما كان أخير لينا كلنا؟؟
الله يجازي محنك...
والله يشهد الله سلامك وكلامك السمح دا والقبلو..بلغناها للفنان الطيب الحضيري...وأرجو أن تقبل تحياته وتقديره الشديدين..

غايتو ناس صعبين خلاص...بالله الزول يستكتروا عليهو الخلفية؟؟ ياخ زول رفع ليكم اللوحات ديل كلهن..تقول لي ما بعرف؟؟
(التقول رافعن فوق كتفي)..لول..

تحياتي لأسرتك الكريمة وسلام خاس جداً (للأخي) محمود بشير..

لست أجيد الكتابة
ولأنكم هنا في معية أخي الحضيري
فمجبر أخاكم لابطل
كانت ولادته كما هو حاله مختلفة
امتنع خروجا حتى أكمل سنة كاملة ببطن أمه
وجاءنا هكذا مدوزن بالمحنة والحميمية
وكأنه كان يعلم أن لاثمة حنين
وبدأ عراكه مع الحياة
صبي فران عجان وتعجنة الحياة في أوارها
عرف كم هي الحياة قاسية وجسده الرهيف لايقوى
لهذا كان يترك الدراسة ليعود إليها
عمل بالتدريس
عرفه أهل كل دار قصدها لأنه مسكون بحب الناس
وكان لابد له من روما
فدخل كلية الفنون فاتحا
تخضب بحناء اللون فكان عرس الجمال
درويش مسافر في تلافيف التباريح
لاغرو فهو سليل مانجل
عرفته ردحا فسكن الخاطر والذاكرة
سأعود حينما تحضرني ما يتوجبه حرفي
ولبعض التحليل
عن تحربة الحضيري البصريه
وشكرا مجددا أخي محمود أن أتحت لنا كل هذا
أتمنى أن توصل إيميلي للأخ الطيب
[email protected] om
وسأعود
ودي
نورالهادي

الأخ الفنان نور الهادي..
والله الطيب الحضيري فرح فرحة كبيرة خلاص بمداخلتك المنصفة...(قريتها ليهو بالتلفون ساكت)...

وقلت:

Quote: وكان لابد له من روما فدخل كلية الفنون فاتحا تخضب بحناء اللون فكان عرس الجمال درويش مسافر في تلافيف التباريح لاغرو فهو سليل مانجل عرفته ردحا فسكن الخاطر والذاكرة

فأنصفت..وكفيت ووفيت على قول خليجيينك ديل..

وقلت:

Quote: سأعود حينما تحضرني ما يتوجبه حرفي ولبعض التحليل عن تحربة الحضيري البصريه وشكرا مجددا أخي محمود أن أتحت لنا كل هذا أتمنى أن توصل إيميلي للأخ الطيب [email protected] om

سمح آآخوي..لكن لو متوقع الطيب يراسلك بالإيميل...تكون بالغت..غايتو موبايلو أنا كاتبو ليكم فووووووق...
ويبقى الوعد بالعودة هو أحلى الوعود...
لك الود الكنا بنشيلو زمان..
محمود

يا ناس الكورة ما تكسروا اللوحات ديل

أها شوفوا جنس المدافرة دي...إنتو قايلين رفع الصور دا بارد؟؟؟
كمان جابت ليها عتالة من الصفحة التانية؟؟
لول...
تحياتي والما شاف يشوف

*

هذه من الروائع فعلاً...الطيب الله يخضر ضراعك

نواصل بعد انقطاع



ولا تعليق إلا مودتي الشديدة

محمود الجميل
سلام جميل
لقاية مايجي الكلام
ممكن نسمع شوية في حضرة الزول الجميل


نورالهادي

نور الهادي السمح....
والله إنصاف دي من أجمل الأغاني فعلاً..وشكراً على الذوق العالي
الأداء رفيع وجميل..
الرحمة لأستاذنا التاج مصطفى
وقد كان لي شرف الغناء معه في برنامج الأستاذ علم الدين حامد (صالة العرض)
ذلك البرنامج الناجح في ذلك الزمن السمح...والغريبة نفس الأغنية..
دي طبعاً ما قشرة ولا حاجة...
هسي يجي ناطي لينا ناذر يقول لي عايز شريط...
لول
مودتي العميقة

!!!!!!!

Quote: وقد كان لي شرف الغناء معه في برنامج الأستاذ علم الدين حامد (صالة العرض)

داير شريط يا محمود

الواحد مما بدا البوست دا بيتاوق ساكت ويتفرج لكن مادام طلعت فنان وبتغني قلت النخش ونسمع الغنية ..

منتظرك ..

الفنان اللذيذ ناذر
ياخي نورت الحتة والله

Quote: الواحد مما بدا البوست دا بيتاوق ساكت ويتفرج لكن مادام طلعت فنان وبتغني قلت النخش ونسمع الغنية

ومتاوقة الفنانين ذاتها فن ...شكراً للمتاوقة الجميلة
أما الطلة الحلوة فهي قطعاً إضافة تستحق الضبيحة...
بركة الجيت يا عشاي..

لكن الشريط دا حكايتو حكاية..
كدي شوف لي موضوع قطعتي الفي صالحة...أرسل ليك عشرة مليون وشريط كمان...
إنت يا ناذر سمعت النكتة بتاعة أدروب العسكري؟؟؟ هسي يقولوا لينا دي عنصرية وشنو وشنو...ياخ خليتها ذاتو

مودتي الشديدة

تحياتنا للفنان الطيب الحضيرى، زميلنا فى كلية الفنون.

الأخ الفنان خالد كودي...
تحياتنا...
شكراً..
ولو إنه الواحد كان عشمان عشمان إنه يكون عندك إضافة أكتر من مجرد تكلفينا بتبليغ التحية للأخ الفنان الطيب الحضيري زميلكم في كلية الفنون..

ياخي كشكرة ساكت ما بتعرفها؟

!!!!!!

Quote: تحياتنا للفنان الطيب الحضيرى، زميلنا فى كلية الفنون.

يبلغ إنشاء الله !

ناذر الحبيب...ياخ والله إنت زول كدا...(وش عامل شرط للأرض)..
قلت لي استلمت البوست...
وقاعد توصل المطايبات والتحيات ساااااااكت...حركة بتاع ناس جدعان والله..
أخو أخوان والله...
دمت يا حبيب

من باب رفع البوستات ،، فقد تحدثت اليوم في مكالمة سعيدة جداً مع الأخ الفنان التشكيلي أبو شريعة أحمد محمد أحمد أبو حليمة...مقيم حالياً في يوغندا..وهو صاحب تجربة مشهود لها بالتفرد...
يمكن للمهتمين الإطلاع على أعماله هنا:

http://www.abushariaa.net

مودتي الكتيرة لكم جميعاً..

أها عاينوا عليكم الله أبشريعة دا سمح كيفن؟



والعينة السمحة دي كيف معاكم؟



والله مشتاقين يا أبو شريعة ياااااااخ