محل عصاية قال كع.

وافق عمنا ود حمودة على اصطحابى للفاشر مؤكدا لى اننى سازور مكركا...محل عصاية قال كع. استمتعت بهذا الامتياز الكبير وبدات انسج مغامرات خيالية عن ذاك المكان الاسطورى, مستوحيا مادتها من حكايات عمنا ود حمودة احكيها لاصحابى معطيا بطل تلك المغامرات اسما وهميا حتى لا اقبض متلبسا بالكذب. عمنا ود حمودة قرر ان الرحلة ستبداْ فور فراغه من تزويج احدى بناته , وهنا بدأت مأساتى.
بين عجوز ام النصر و عمنا ود حمودة عداء العن من عداءها ل "سيدنا" , لم نكلف انفسنا تعب ان نفهمه, لكنهم لم يخفوه ابدا. بالرغم من ان نصيب عجوز ام النصر من هبات عمنا ود حمودة وخيرات سفره الكثيرة اكبر من غيرها, الا انها لم تكف عن شتمه بانه" نى, بلدى بنات بس", وكثيرا ما تفترى العجوز على عمنا ود حمودة بانه " وليد نجس ملى دنيا عيال حرام" ملمحة بخبث لغزواته النسائية التى يحكيها لها ود عمتنا متوددا للعجوز لياْمن شرها.
فرض عمنا ود حمودة عنوسة اجبارية على بناته بزعم انه " يقعدو زى دة بس اخير ليهم من نجوزيهم لمقطع وليد مساكين", وكان يصيح فى اسماعين مساعده فى التيمس عندما يهم بتسخين اللورى " سمائين ..شخرى خلى ايال مساكين يسمعو". لكن عجوز ام النصر الداهية استدرجت افندى مقطع وليد مساكين واقنعته بالزواج من كبرى بنات عمنا ود حمودة املا فى هدايا ود حمودة وزوجته التى قتلها الياْس من زواج كبرى بناتها. لعبت عجوز ام النصر براْس الام حتى وافق عمنا ود حمودة على الافندى المقطع على مضض وزادت كراهيته لعجوز ام النصر.
فى ترتيبات زواج بت عمنا ود حمودة افتعلت عجوز ام النصر سلسلة من المعارك لتعكير الجو , بسبب ان ود حمودة رفض شراء توبين زراق وجلباب وبرطوش للعجوز حسب اتفاقها مع زوجته, وهو صاحب المقولة المشهورة التى رددها الكثيرين من بعده"عجوز ام النصر شنو وطنبور شنو؟". ام المعارك اشتعلت وكت طالبت العجوز باْن يشترى عمنا ود حمودة اردب دخن للمريسة. امتعض اهلنا الانصار من عجوز ام النصر وكادوا ان يفتكوا بها, لكنها قالت بثبات" زى ما تسوو حلة كمونية وحلة شعيرية, سوو مريسة كلو". تلقف المتهتكين من الشباب امثال ود الدومة وابكرمنصور وارنق "الذى تتهمه العجوز بانه رباط" كلام العجوز وطالبو عمنا ود حمودة بشوال بلح وشوال عيش فتريتة للعرقى. علا غبار المعركة وهدد الانصار بطرد العجوز نهائيا وارجاعها قسرا لدارفور قائلين " امشى هناك ابقى فدادية سهى سهى, لكن ورب الامام المهدى تسوى شخاليتك دة هنا نضبحوك تقول فروج وندفنوك فى قتينك دة". كل هذا لم يجعل العجوز تتراجع عن مطالبها قيد انملة " ام نملة؟"محتمية بارنق وشلة السفهاء والمتهتكين الذين انضم لهم لوبا وحسب الله.

شاءت ظروف مرتبة الا ازور فاشر ابو زكريا ابدا, لكن هذه الظروف نفسها رتبت لان يكون اعز اصدقائى من ابناء الفاشر.
ونرجع لوراء شوية, وكت جدنا سامحه الله بايع عبدالرحمن المهدى على الا يرجع ابدا, وسرت البيعة على ولده, فاصبح من المستحيل الحديث عن زيارة الفاشر ولا غيرها فى دارفور. كون الممنوع يولد الرغبة العارمة فيه ,بدا هوسى الفاشرى...
وصل الهوس مرحلة انو يا تودونى الفاشر يا ننجع" نطش براى يعنى" ودى ما مضمونة العواقب, وكان هذا مصدر تهديد دائم لشيوع حالات النجعان, مرة هروبا من خلوة فكى محمد خميس, ومرات حبا فى المغامرة واكتشاف شئ ما. زاد الهوس انو ابن عمتنا شغال تجارة فى الغرب, وفى كل رحلة عودة كنت اكثر من يستنطقه عن تفاصيل الرحلة, ما بفوت ولا فتفوتة تفاصيل, وكان سخيا لدرجة ان يتمها مبالغات لالهاب خيالى الغض. جارنا وعمنا ايضا ذو تجارة دارفورية, لكنه محاصر اجتماعيا لزندقة احسها اهله الانصار فيه, حيث لا تفارق زجاجة الشرى العربية ولم يروه فى ظهر جمعة ما ولا تبرع بلوريه التيميس بنقلهم لجامع الكون حين تهيج بهم اللواعج. قيل عنه, وهو لا يثق فى اى سواق, بسوق عربيتو براهو, انو مرة اختلف مع الكمسارى فى كوستى وقال ليهو يلا انزل من عربيتى, وكانت محملة بالبضاعة املا ان يجد كمسارى فى الطريق, لكن لسؤ حظه قبل ما يصل الابيض العربية خسرت, صنقر فى الارض وخاطب ربنا: انت بطلت شخاليتك كلو وقبلت لود حمودة ولا شنو!
للسبب دة كانت قصصه وطريقته فى الحكى شبه محظورة لزندقة فيها, ولا يمكن اصطياده الا بعد نوم الجميع ومنادمته, بعد استغفاله بجقمة جقمتين من الشرى طبعا, وكل قصصه كانت عن فاشر ابوزكريا.
بعد ضربة جزيرة ابا خفت قبضة جناح الهادى المهدى المتزمت على حياة ناس الحى, بعد ضربة حلة الحسانية اصبح من الطبيعى ان يجادل الابن ابوهو ويحدد خياراته بصلف احيانا, فالهزائم المتتالية هزت مكانة الكبار .

لعمنا ود حمودة ولع عظيم بالفشخرة والمسخرة, ما دفعه للسفر لامدرمان قبل زواج ابنته بشهر لحجز الفنانين, وكان يقسم باغلظ الايمان ويردد" الله ينعلنى كان ما جبتا هوانات اذاعة غنو لبتى دة", وتتساءل عجوز ام النصر بخبث" هو الله لسة ولا نعلاك؟". بمهارة سوى ود حمودة خلافه مع شلة المتهتكين, لكنه اشترط استبعاد ارنق.
فى ليلة العرس زحف الناس من كل الحلال, فالدعاية سبقت العرس بزمن ليس بالقصير, جاء ناس الفردوس وزينوبا, لمونة وقفا, الجزيرة مصران وكريكرة, عسكر ناس جزيرة ابا والمرابيع ود اللبيح قبل العرس باسبوع, حتى بعض اهل كوستى خدعتهم دعاية فنانى الاذاعة فاتوا تسبقهم عطورهم المسكرة وازياءهم الزاهية, فانكمشنا نحن لابسى العراريق والبردلوبات ننظر اليهم بحسد مكتوم .

أحب مثل هذه الحكايا ، هى هواتف للذاكرة الشعبية الوفية.
دمت محى الدين.
تحايا جمّة

العزيز عبدالله
سلامات وشكرا لك
وهل نحن الا من هذا الشعب؟

الاخ محي الدين ابكر سليمان


اخوك متابع جيد ومنتظر هذا السرد الممتع

ما تعملي ذى بريمة ناداني بالرزيقي ودي معناها عنصرية وقبلية فجة

الاخ عبدالمنعم الرزوقى "كدة صاح"
شكرا لمرورك ومتابعتك وجاييك راجع للحكى بعد مشوار قصير.

Quote: ما تعملي ذى بريمة ناداني بالرزيقي ودي معناها عنصرية وقبلية فجة

بريمة دا يا خوى طايرة ليهو قبلية وقبايل عربية, والرزيقات واحدة من اعرق القبائل العربية فى دارفور, ناس كرم وشجاعة وتاريخهم ما اظن بريمة بعرفو زاتو, بيحشرهم لتكبير الكوم, كوم خزعبلاتو.

ود ابكر

تحياتي واحترامي

كعادتك سرد جميل من جوه ملامحنا السودانية بطعم عمنا ودحمودة وعمك فضل.

محي الدين ابكر

امتعتنا

محي الدين
السلام عليكم
تصدق لو قلت ليك أنا كنت بخش النيو سودان كل يوم مخصوص كايس باقي حكيك دا
و بصراحة بعد السخف الحصل أمس , نويت إني تاني رجلي ما بشيلها و أختها بي غادي
و جد كنت حا أفتقد المركركا
الله يفتح عليك
واصل و متعنا

محمد الخضر بشرى سلام
وياخى مصدقك وهناك كانت واجهتنى مشكلة بسيطة انو جزء من الحكاية ضاع منى ولقيتو بعد ما قنعتا منو, وزيك كدة تانى هناك بى التكسر كمبيوترى.
واعتذر عن التاخير لظروف كالعادة خارجة عن الارادة!

فيصل محمد خليل سلام وشكرا للمرور والتعليق
وتقبل اعتذارى على التاخير
مودتى

هنادى بت الفضل سلامات وتحايا
وليت ملامحنا ظلت بطعم عمنا حمودة وعمنا فضل.

هنادى بت الفضل سلامات وتحايا
وليت ملامحنا ظلت بطعم عمنا حمودة وعمنا فضل.

" عرس جابا ناس يعقوب اب تفة المسخوت الله ولا بطرح فيهو بركة". هكذا عبرت العجوز عن قنعها من خيرا فيها. ويعقوب هذا هرب بشبابه الى دار صباح من زيجة لم تكن له رغبة فيها. وكانت غنية الفنانة" ويناديها يعقوب خنية" تعنيه تماما عندما تمط باستمتاع اغنية يعقوب الاثيرة" اب قجيجة الرسول تتم الريدة...", لكن العجوز شاءت ان تحرمه من صفة اب قجيجة الدالة على الوسامة والوجاهة وتناديه باْب تفة, لتذكره باْنه مجرد سفيه. كره يعقوب الحى وعجوز ام النصر ونجع للبقعة, تسبب نجعانه لغنية باْسى مزمن وتركت الغناء فى الحفلات و كانت تكتفى بالرد على طلبات المعجبين" كنتا نخنى لياقوب وهو خلاص خرطمت".
حشد عمنا ود حمودة عددا من الترلات مثمنا نصيحة ابكر منصور للعازفين والفنان الامدرمانى الذى لم يخفى تاْففه من هذاالخليط غير المتجانس من البشر, لم ياْبه مقدم الحفل المتفاصح لاستثقال الحضور لقصيدته الركيكة, لوح حسب الله بعصاه قائلا" شوف ليك قنيت دة قال بكلم كلام ناس امدرمان!!!" نزل مقدم الحفل سريعا متفاديا اى نوع من الصدام. قبل ان يكمل الفنان الامدرمانى الانيق مقطع" عيونى عيونك اسباب...." تصاعد دخان كثيف ولهب اشد كثافة من ناحية حوش عمنا ود حمودة, ظن الناس, وجلهم سكارى ان الحريق فى قطية عجوز ام النصر, هرولوا تاركين الفنان الامدرمانى يشرح اسباب لوعته وكاْنها لا تعنيهم فى شئ, همهم بعضهم وهو يهرول ان الله انتبه لدعائهم اخيرا و انتقم لهم من عجوز ام النصر, ليفاجاْوا باْن لورى عمنا ود حمود التيمس لم يتبقى منه سوى هيكل.

يا ود ابكر



رائع

متعتنا

شكرا

ومتاوقين القصة متلهفين نشوف اخرتها

Quote: ومتاوقين القصة متلهفين نشوف اخرتها

د.بشارة
تحياتي

محي الدين جاي بس مشغول شديد الايام دي بقضايا وطنا الما بتخلص ولا بتكمل.

الاخ محى الدين

لك التحية وانت دائما فى
ذاكرة كل الوطن رغم التزام جدك
بعدم الرجوع الى هذه المدينة التاريخية

والرائعة بروعة اهلها الطيبين

اعتقد ان جدك حرمك من متعة حقيقية فى

هذه الزيارة التى قدر الله عدم اتمامها
ولكن ....

لمكركا وقع خاص جدا فى

زهنية سكان ابو زكريا

كما يحلو لمعظمهم ان يسميها
مكريكو سيتى
فهى رمز اصيل فى

تلك الجغرافية وبها تفاصيل
جميلة ولنا بها زكريات
اجمل
فلك التحية ولابنك
المشاغب باغة من الورد
ولوالدته الرائعة كذالك


محمد الطيب

يا سلام يا محي الدين على هذا الادب الرفيع .يا ريت لو يتبنى ادبائنا وكتابنا هذا الاسلوب من الكتابة بلهجاتنا المحلية الجميلة المعبرة.
شفت مذكرات عمك يوسف ميخائيل التي كتبها بلهجة كردفانية خالصة وكانت من اروع واصدق ما تكون الكتابة ,حتى اخطائه الاملائية كانت جميلة ومعبرة.

شكرا يا محي الدين

تعرف ياود ابكر لي زمن بدخل المنبر ده وبقرأ الحاصل شنو من بعيد بعيد
في كتابتك دي إنغمست لاجوة لامين قربت أدخل جوة الجهاز . ياخينا علي الايمان
عجبتني اللغة السميحونة دي وذكرتني ايام زمان وقصص الليل .
قلت لي ياسمائين شخر اللوري خلي عيال مساكين يسمعو ... علي الايمان دي بالغتا فوكا

سلام للبني وساي ياصديق

خضر

صديقى العزيز خدر
ياخى حكاوى انصاص الليالى ديك ما تذكرنا ليها, باقى اليومين ديل فى شوية حنين للبلد ومساكينها خلينا نقمعو لحين.
شكرا يا صاحبى

تعرف ياود ابكر لي زمن بدخل المنبر ده وبقرأ الحاصل شنو من بعيد بعيد
في كتابتك دي إنغمست لاجوة لامين قربت أدخل جوة الجهاز . ياخينا علي الايمان
عجبتني اللغة السميحونة دي وذكرتني ايام زمان وقصص الليل .
قلت لي ياسمائين شخر اللوري خلي عيال مساكين يسمعو ... علي الايمان دي بالغتا فوكا

سلام للبني وساي ياصديق

خضر

معروف سند سلام وشكرا للمرور والتعليق واعتذر عن تواجدى بالقطاعى
للاسف الشديد لم اقراْ مذكرات عمنا يوسف ميخائيل وساسعى للحصول عليها.

Quote: يا ريت لو يتبنى ادبائنا وكتابنا هذا الاسلوب من الكتابة بلهجاتنا المحلية الجميلة المعبرة.

دى غايتو عملها اديبنا اسحق ابراهيم واتمنى ان يجد الاخرون الجراْة للكتابة بلهجاتنا المحلية واذكرك برضو بالاديب الكينى نقوقى واثنقو الذى ترك الكتابة بالانجليزية وكتب بلهجة Gikuyu
مودتى

محمد الطيب سلام وتحايا
وشكرا كتير لمرورك واضافتك حول مكركا, وقد سمعت مؤخرا ان اسم الحى قد تم "تأصيله" ولا ادرى اى تأصيل هذا الذى يجتثنا من الجذور!
بلغنا تحاياك وبدورهم يسلمون عليك.

دكتور بشار سلامات ومتشكرين على الحضور وكمان متاسفين على غيابنا, بس انت قطعت اخبارك ياريت لو تعاود مراسلتنا.

محى الدين

هذا عمل أدبى رفيع,

أكتب يامحى الدين عنهم (ملح الأرض)

هذه نصوص شاهقة الجمال

الجيلى سلامات وشكرا للطلة

ظاهر انك وليد حبوبات

Quote: ظاهر انك وليد حبوبات

زول واحد سلام
دى معاك حق فيها
شكرا للمرور

ود ابكر


ماخاتي المعز ادم النور وكت صاحبك

انتا ماك هين ..
وكتاااااااااااااااب تب..
ابقه عافية

يا محيو واصل القصة ما تخلينا مقطوعين!!!!!!!!!!!!!!!

Quote: يا محيو واصل القصة ما تخلينا مقطوعين!!!!!!!!!!!!!!!

كابو ازيك, وياخوى الحكاية كملت. ذكرتنى الواحد وكت تاخدو حمى النكات, ويقول نكتة بايخة, وانت عارف بعض السودانيين غتيتين, ما بضحكو مجاملة, يكونو الجماعة منتظرين نهاية النكتة, وهو منتظرهم يضحكو, يرفع راسو ويقول بارتباك: النكتة انتهت!
ياخوى رسل لى ايميلك فى المسنجر لو غيرتو.

العزيز دكين
شكرا ليك والمعز ياخى بقى يانكى خلاص, يكون مفتون هسع بقصص الكاوبويز تانى وين يلقى وكت لناس ود حمودة.
مودتى