Post: #1 Title: من التركين ما قتل ... Author: ود الباوقة Date: 01-17-2007, 04:05 PM
اخونا عبد القادر نقد( نعمل معا في شركة واحد ) دنقـلاوي على السكين يعشق التركين حــــد الجنون يتناوله مريتن في اليــوم فطورا وعشاءا . فطوره بعد صلاة الفجر مباشرة وبعده كباية حليب ثم الى الدوام .
وكما هو معروف يحتاج التركين بعد اكله الى كميات من المياه حتى تظفئ الابخرة التي تتصاعد بغعلــه عمموما اخونا عبد القادر اظنه قد تكاسل في شرب الماء المطلوب بعد الفطور لتبدا الابــخرة فـــــي التصاعد رويدا رويدا لتبلغ مداها عند الساعة الثامنةصباحا وحيث ان بيني وبينه جدار رفيع بدأت في سماع صوت خافت يخرج منه ثم بدا الصوت في الارتفاع رويدا رويدا . هرعت من مكتبي فزعـا للتأكد فاذا بي اجده صوت ( ابو الشهيق ) هكذا اخبرني به الاخ عبد القادر طلب من ان احضر له ثلاثة كيزان مليئة بالماء والصوت يواصــــل في الارتفاع المزعـــــج هرولت مسرعا احضرت له الاول والثاني دفعة واحدة فشربهماوطلب منى سرعة احضار الثالث فشربه وكان يتمتم بكلمات فهمت منها ان كان يقــــول الموت حق والحياة باطلة .. الله يجازيك يا التركين .. حمدت الله على سلامته وحمدت الله ان المدير لم يحضر بعد والا كان خروجه النهائي قاب قوسين او ادني.
ود الباوقة
Post: #2 Title: Re: من التركين ما قتل ... Author: welyab Date: 01-17-2007, 04:13 PM Parent: #1
ود الباوقا تحية وسلام اعتقد ان الاسم ( تاركين) له علاقة بالخروج النهائي !!! تاركين البلد !!!
Post: #3 Title: Re: من التركين ما قتل ... Author: حيدر حسن ميرغني Date: 01-17-2007, 04:26 PM Parent: #2
ود الباوقة
انت بس جرَب اكلو مرة في حياتك
صدقني لن تظمأ بعدها أبداً
ما يغشوك اهلنا الرطانة ديل
موش قالوا إنهم سحاحير .. وطلعت الشغلانة كذبة كبيرة
Post: #4 Title: Re: من التركين ما قتل ... Author: ود الباوقة Date: 01-17-2007, 04:41 PM Parent: #2
Quote: ود الباوقا تحية وسلام اعتقد ان الاسم ( تاركين) له علاقة بالخروج النهائي !!! تاركين البلد !!!
اخي الكريم ولياب ..
الخروج من البلد ساهل . زولنا لولا لطف الله والاسعافات الاولية كان خرج من الدنيا كلها ..
لك الود
ود الباوقة
Post: #7 Title: Re: من التركين ما قتل ... Author: Emad Abdulla Date: 01-17-2007, 05:16 PM Parent: #4
ود الباوقة .. يمسيك بالخير ..
إنتو شن خبركم بعبقرية غذائية زي دي ياخ ؟؟ التركين هو جزء من عبقريتنا النوبية في علم التحنيط , و زي ما عارف نحنا حنطتنا الفراعنة .. لامن السمك ؟؟ ده يا ناس قريعتي راحت شغل أعلى من إنكم تضوقوا خبايا مذاقاتو و أسرارها , إسمو ( تحنيط غذاءي : و هو علم من ضروب الصحة الغذائية و كلام بالشكل ده , و بيدرس في الجامعات الماخمج ) .. و لو مغالطني أسأل صديق الموج . صديق لأنه عندو امية غذائية طبعا ( شأن كل سكان الوسط و شمال الوسط حتى منطقة الباوقة ) كان ما يجيني ود الموج في البيت إلا يطلب تركين , و ندلعو ليهو طبعا بصحن بصل بالشطة و بعدها التمر القنديلة الماخمج , العربي كان يغرّز في القراصة إتنين بوصة و يزدرد حتى تتفشخ خواشيمه من اللذة , و نحنا نساعدو بالمناديل , و مايرجع تاني إلا معدتو غلطانة و عايز يعالجها بالتركين .. شفت العبقرية الطبية دي ؟؟ أبو الشهيق الجه لقريبي ده يكون من عينك يا ود الباوقة .. قربت تجيب أجله ( الله أكبر على العين الشافت و الأضان السمعت و ما قالت ما شا الله ) . الزول قاعد في صمة خشمو و يحكي ليك أسرار زي دي , ما بنقولها بالساهل و بأخوي و أخوك لأنها تعتبر من أسرار الكون المحفوظة في تاريخنا النوبي و إهراماتنا و معابدنا , و المسكين حاسبك صديق .. تقوم تجي تحسدو على هذه النعمة التركينية و الفضل العظيم الذي نناله نحن الشعوب الرطانة , تجازيهو بعين حارة زي دي ؟؟؟ .
بعدين شوف الإنتاج التركيني الإبداعي جنبك .. في الرياض بس : أبوجهينة / ولياب / دكين / عزاز و غيرهم و غيرهم .. مافيش أحلى من كده .. يا حاسد
يحيا التركين ..
تسقط المعلبات .. و بالمرة يسقط معاها أكل اللواييييق بتاع ناس الوسط لغاية الباوقة .. بس
Post: #16 Title: Re: من التركين ما قتل ... Author: ود الباوقة Date: 01-17-2007, 11:51 PM Parent: #7
Quote: التركين هو جزء من عبقريتنا النوبية في علم التحنيط
اخي الكريم عماد عبد الله ...
برضو انا سمعت بستعملوه في دباغة الجلود وفي صناعة ( البمبان )....
Quote: الزول قاعد في صمة خشمو و يحكي ليك أسرار زي دي , ما بنقولها بالساهل و بأخوي و أخوك لأنها تعتبر من أسرار الكون المحفوظة في تاريخنا النوبي و إهراماتنا و معابدنا , و المسكين حاسبك صديق .. تقوم تجي تحسدو على هذه النعمة التركينية و الفضل العظيم الذي نناله نحن الشعوب الرطانة , تجازيهو بعين حارة زي دي ؟؟؟ .
يا اخوي انا الزول قدمت ليهو الاسعافات الاولية وفي طريقي الى تلقينه الشهادة لولا شربه للكــــوز الثالث يعنى انا شاهد شاف كل حاجة ...
ب
Quote: عدين شوف الإنتاج التركيني الإبداعي جنبك .. في الرياض بس : أبوجهينة / ولياب / دكين / عزاز و غيرهم و غيرهم .. مافيش أحلى من كده ..
دكين دا فعلا زول تركين ظاهر لكن الجماعة الباقيين يعني شوية شوية ..
برجع ليك يا العمدة..
ود الباوقة
Post: #8 Title: Re: من التركين ما قتل ... Author: welyab Date: 01-17-2007, 05:41 PM Parent: #4
ود الباوقا لك المودة والف حمدالله على سلامة اخونا .. !!
انا قصدي البلد ديك !!! تاركين البلد !!! ما تاركين....!!! التركين
Post: #18 Title: Re: من التركين ما قتل ... Author: ود الباوقة Date: 01-17-2007, 11:57 PM Parent: #8
Quote: والف حمدالله على سلامة اخونا .. !!
الله يسلمك يا ولياب ..
Quote: انا قصدي البلد ديك !!! تاركين البلد !!! ما تاركين....!!! التركين
غايتو لو شفت يا ولياب الحصل لي عبد القادر كان تركت التركين دون رجعة . ورجعت البلد ..
ود الباوقة
Post: #11 Title: Re: من التركين ما قتل ... Author: تماضر الخنساء حمزه Date: 01-17-2007, 10:23 PM Parent: #4
ود الباوقة ..في حاجة مهمّة .. التركين ...أو الملوحة نوعان ..( جوداد ) & ( كوداد ) الأول غير مطبوخ ( ني) والتاني ( مطبوخ ) ولكل طعم خاص .... وصاحبك شكلو بلّ ريقو بالأوّل .. وطالما البوست عن التركين ..فلي عودات كتارات .. أبقى عافية ..
Post: #19 Title: Re: من التركين ما قتل ... Author: ود الباوقة Date: 01-18-2007, 00:02 AM Parent: #11
فعلا ان سألتو عن نوعية التركين الاتناولو قال لي خليط من الجوداد والكوداد بس الظاهر كتر مـــــن الجوداد ..
وطالما البوست عن التركين ..فلي عودات كتارات ..
حبابك عشرة بس اعملي حسابك من ابو الشهيق ..
ود الباوقة
Post: #20 Title: Re: من التركين ما قتل ... Author: ود الباوقة Date: 01-18-2007, 00:06 AM Parent: #19
اها يا جماعة ماش انوم عشان عبد القادر دا يمكن بكرة تجيوه ( كومة )حقت تركين وزول غـــيري ما بيعرف علاجو ..
تصبحو على خير ..
ود الباوقة
Post: #6 Title: Re: من التركين ما قتل ... Author: تماضر الخنساء حمزه Date: 01-17-2007, 05:02 PM Parent: #1
مثل صادف أهله .. فكما أن من ( الحب ) مايقتل فكذلك التركين .. حقيقي أكلة جميلة جربها بس مازي صاحبك في الوكت المبكر داك أو آخر الليل .. يعني ..فطور متأخر كده ..ومافي داعي لي كباية اللبن ..
Post: #9 Title: Re: من التركين ما قتل ... Author: ابو جهينة Date: 01-17-2007, 05:57 PM Parent: #6
بسم الله الرحمن الرحيم
يسلم فمك يا عماد
فأعلم يا أبوالنسب ود الباوقة أن التركين كما أخبرتك من قبل هو الطعام الوحيد في العالم الذي لا ( تاريخ إنتهاء صلاحية له ) .. و هذه خاصية إحتار الفرنجة في كيفية تفتق العقلية النوبية عنها و إكتشافها. و هو طعام يبقى واقفاً كعمود الكونكريد حتى إنتهاء صلاحية الصفيحة التي تحتويها و تتداعى أركانها بفعل الصدأ و كأن لسان حال التركين يقول : الصفيح بُلِيَ و نحن لم بُلِينا ). كما أن التركين له فن و قواعد لأكله. ففي الفطور يجب أن تأكله على الريق .. ثم تتبعه بتمرات من البركاوي أو القنديلة .. و إن لم تجد فمن تمر المدينة. و إن لم تجد فقطعة من الحلوى. ثم يجب أن لا تشرب الماء بعد الوجبة مباشرة ز. بل إنتظر حتى يهجد التركين في البطن لأن به كمية من الفسفور الذي يتفاعل مع أنزيمات الإمعاء المخلوطة بالماء.
ثم بعد مرور وقت تقيسه بالعطش الشديد .. إشرب نصف كوز من الماء. ثم بعد قليل إشرب ما أردت من الماء و إحذر من شرب اللبن أو الحليب بعده ، لأنه يورِث البهق و قيل البرص. أما في الليل .. فيستحسن أكله بعد صلاة العشاء إن كنت من أعداء السهر .. إما كنت من شاربي المنكر .. فيستحسن أكله خفيفاً أو مخففاً بالماء مع إضافة كمية من الدقيق الأسمر للخلطة و عمل قراصة سماكة ربع بوصة على أقل تقدير. ثم أتبع الوجبة بكوب من الشاى السادة المعطون زنجبيل أو قرفة ثم تسوك أو تمعجن جيداً قبل أن تأوي إلى مخدعك ( حلوة مخدعك دي ) ..
و التركين له خاصية البنج .. خاصة إذا أكلته مع كثير من البصل .. فتجد نفسك تخلط بين أحلام البقظة و الهضربة اللذيذة .. خاصة في الصيف .. أما أجمل أوقات أكله فبعد مطرة في الضحى و رائحة الدعاش تموسق الجوع .. فإن أكل التركين يشبه أكل الكافيار في فندق خمسة نجوم مع كأس من النبيذ الأحمر القاني ( إستغفرتك يا مالك روحي ) ..
و التركين أنواع : نوع من سمك ( البساريا ) و هو أجوده نوع من سمك كبير الحجم و هو يحتاج إلى أزيار قناوية و كمية من الملح و كتمة من نوع غتيت. نوع من سمك البلطي و هو أكثر الأنواع سواداً و يمتاز بليونته عندما يكتال منه الناس بعكس الأنواع الأخرى التي تكون متماسكة نوعاً ما. تحذير من Side Effects
التركين ككل الأكلات السودانية سيئة السمعة عالمياً ، فإن له آثار جانبية غير مرغوبة لذا من الأحسن أن يبقى كل من أكل في غرفة منفصلة جيدة التهوية حتى إشعار آخر بزوال الخطر.
و دمتم ( من كتاب : التركين و الكَوَل .. من الحب ما قتل ) تأليف : سيد أحمد سمَّاكة
Post: #24 Title: Re: من التركين ما قتل ... Author: ود الباوقة Date: 01-18-2007, 08:10 AM Parent: #9
Quote: ففي الفطور يجب أن تأكله على الريق .. ثم تتبعه بتمرات من البركاوي أو القنديلة .. و إن لم تجد فمن تمر المدينة. و إن لم تجد فقطعة من الحلوى
فان لم اجد ؟؟؟
Quote: ثم بعد مرور وقت تقيسه بالعطش الشديد .. إشرب نصف كوز من الماء. ثم بعد قليل إشرب ما أردت من الماء و إحذر من شرب اللبن أو الحليب بعده ، لأنه يورِث البهق و قيل البرص.
صبرنا علي ابو الشهيق كمان جابلو بهق وبرص شوفو الشقاوة دي ..
Quote: أما في الليل .. فيستحسن أكله بعد صلاة العشاء إن كنت من أعداء السهر ..
طيب اذا كنت من اهل السهر اكلو متين ...
Quote: إما كنت من شاربي المنكر
يا لطيف جاب ليها منكر كمان ..
Quote: و التركين له خاصية البنج .. خاصة إذا أكلته مع كثير من البصل .. فتجد نفسك تخلط بين أحلام البقظة و الهضربة اللذيذة
Quote: لأن به كمية من الفسفور الذي يتفاعل مع أنزيمات الإمعاء المخلوطة بالماء.
يعني باختصار يمكن الاستفاده منه في تصنيع القنابل العنقودية الانشطارية ..
Quote: التركين ككل الأكلات السودانية سيئة السمعة عالمياً ، فإن له آثار جانبية غير مرغوبة لذا من الأحسن أن يبقى كل من أكل في غرفة منفصلة جيدة التهوية حتى إشعار آخر بزوال الخطر.
يعني من كلامك دا يا ابو النسب اسالك سؤال لو قدر لي اكله يلزمني ( غسل الجنابة )
شكرا على المعلومات القيمة ..
ود الباوقة
Post: #23 Title: Re: من التركين ما قتل ... Author: ود الباوقة Date: 01-18-2007, 07:58 AM Parent: #6
Quote: حقيقي أكلة جميلة جربها بس مازي صاحبك في الوكت المبكر داك أو آخر الليل ..
الاخت الخنساء ..
اجربو علي مسؤوليتك ؟؟ انا والله نفسي قصير واقل ابو الشهيق بوديني التوج ...
فتك بي عافية .. تابعي معنا ..
Post: #10 Title: Re: من التركين ما قتل ... Author: عزاز شامي Date: 01-17-2007, 06:01 PM Parent: #1
أرفعوا ايدكيم عن التركين!
أخوي ود الباوقة، ما تخلي التركين يبقى بيناتنا
انا التركين ده ما بقبل فيهو كلمة!
وزي الحب ما بيسهرنا ليالي، ما كثير على التركين يجيب لينا ابو الشهيق!
Post: #12 Title: Re: من التركين ما قتل ... Author: ABDELMAGID ABDELMAGID Date: 01-17-2007, 10:40 PM Parent: #10
يا عالم ارحمونا ! مجممين خشمنا من الصباح مالكم !!! هو دحين فى أعظم من التركين ?????
Post: #26 Title: Re: من التركين ما قتل ... Author: ود الباوقة Date: 01-18-2007, 08:25 AM Parent: #12
Quote: يا عالم ارحمونا ! مجممين خشمنا من الصباح مالكم !!!
انت يا عبد الماجد برضو من جمعية اصدقاء التركين ...
ود الباوقة
Post: #13 Title: Re: من التركين ما قتل ... Author: رأفت ميلاد Date: 01-17-2007, 10:42 PM Parent: #10
إتحاد النوبة التركينى . والله كان قالو لى آخر زادك ما بهبشـو
هسـة مسـتغرب فى عماد و أبو جهينة وتماضر وعزار الكلام السـمح ده بتجيبوا من وين وإنتو تخمانين تركين بعد التركين الواحد بكون طافى لمبه
على كل حال التركين ظاااااااهر فى حاج دكين .
Post: #15 Title: Re: من التركين ما قتل ... Author: عمار عبدالله عبدالرحمن Date: 01-17-2007, 11:21 PM Parent: #13
لعابي سال منظر الليمون بتعصر فوق البصل والشطة والدخاخين طالع من القراصة في شكل هرمي وناس عمي عبدالرحيم ابنعوف حواتي متحلقين حولين القدح والخشوم بتنفتح وتنقفل والجموع مثل الساعاته قاطعين النفس ما تسمع الا صوت البلع ,,,,
اقيف لحد كده لا تهيج مصاريني وابقى زي العندها الوحم ما تقول الدنيا شتاء وباص البلد ليه اسبوعين واقف في قوز ابو ضلوع عطلان
Post: #30 Title: Re: من التركين ما قتل ... Author: ود الباوقة Date: 01-18-2007, 05:00 PM Parent: #15
Quote: ما تسمع الا صوت البلع ,,,,
وبعدين هاك يا ابو الشهيق ...
شكرا اخي عمار ..
ود الباوقة
Post: #27 Title: Re: من التركين ما قتل ... Author: ود الباوقة Date: 01-18-2007, 08:30 AM Parent: #13
Quote: والله كان قالو لى آخر زادك ما بهبشـو
اخي الكريم رأفت .. يا اخوي مدارات المؤمن لي نفسو حسنة ابعد من التركين وغنيلو ...
ود الباوقة
Post: #25 Title: Re: من التركين ما قتل ... Author: ود الباوقة Date: 01-18-2007, 08:20 AM Parent: #10
الاخت الكريمة عزاز ..
Quote: أرفعوا ايدكيم عن التركين!
سمح رفعناها ..
زي الحب ما بيسهرنا ليالي، ما كثير على التركين يجيب لينا ابو الشهيق!
والله لو وقف على ابو الشهيق ما مشكلة .. المشكلة جاب ليهو برص وبهاق ...وتفريــق في المضاجع عند اكله ليلا . يعني دي شهادة شاهد من اهله ...
ود الباوقة
Post: #14 Title: Re: من التركين ما قتل ... Author: saadeldin abdelrahman Date: 01-17-2007, 11:01 PM Parent: #1
سلام
Quote: ثم يجب أن لا تشرب الماء بعد الوجبة مباشرة .. بل إنتظر حتى يهجد التركين في البطن لأن به كمية من الفسفور الذي يتفاعل مع أنزيمات الإمعاء المخلوطة بالماء.
غايتو الكلام دا كان صاح يا استاذنا كان اهلنا النوبة ديل ما فضل فيهم نفر!.. الفسفور (براهو) كدي شيتن صعب خلاص!
ود الباوقة ياخ اصحابي النوبة مشهني التركين من قبل ما امرق من السودان عايز تطيرنا منو قبل ما نجربو مالك?
كدي يا اخوانا الطعم كيف حادق .. حلو ولا قريب من الفسيخ ? محباتنا
Post: #31 Title: Re: من التركين ما قتل ... Author: ود الباوقة Date: 01-18-2007, 05:09 PM Parent: #14
Quote: ياخ اصحابي النوبة مشهني التركين من قبل ما امرق من السودان عايز تطيرنا منو قبل ما نجربو مالك?
شوف يا سعد الدين لو شفت حالة عبد القادر قدامك تاني او قالو ليك اخر زادك ما بتمشي عليهو زي ما قال اخونا رأفت ميلاد .. لكن اذا انت مصر تجربو ذنبك على جنيك .
هس كلام ابو جهينة دا انت مش مصدقو قال ليك فيهو فسفور يعني لــو طلعت منو سلامةممكن يجــــري في دمــــك مجري البسفور ..
ود الباوقة
Post: #17 Title: Re: من التركين ما قتل ... Author: عزاز شامي Date: 01-17-2007, 11:57 PM Parent: #1
لكاتب البوست و مستهجن هذا الولع و لكل من استكثر على التركين حبنا له ....
يسألوننا عنك يا تركين! ماذا اقول لهم ؟
لم يروا لونك الالذي يشبه لون ابناء نيلنا نيل جاد بسمك (أبينا) سمكه لنصنعك منه ...
لم يروك وأنت سميك/رقيق القوام تزهو فوقك قطع البصل المقلية بعناية ولم يروك و الفقاعات تشق سطحك الفائر صحنك رحب كبيوت أهلنا تتوسده بحنان قراصة ذهبية سميكة قلبتها اياد محترفة احتفتك بك كما تستحق بعد سكبك بمهل و رج الصحن ليستوي بك المقام تهرع إليك الأيادي بالسلام ناثرة الفلفل الأخضر والبصل الأبيض في طريق اللقمات الشهية .. وياه! و لقمة تلو لقمة، ومش حتغمض عينيك!
و بفراق آخر لقمة منك ، امسح بها على جنبات الصحن و اتبعها بقضمة من بصل مملح، اغمض عيناي و أبدأ بالتفكير في اللقاء القادم بيننا! ليت كل ايامي تركين!
نأكلك و لسان حالنا (نحمد اللهم على فضلك ونعمك، اللهم أحفظها من الزوال) وبنهاية وليمة انت ضيف شرفها الوحيد، تراق كاسات من (الشاي) بالقرنفل والحبهان لتجلي ما علق من رائحة البصل و تترك لنا جوفا حامدا شاكرا للنعم و يفوح بأطيب الروائح .............
انه التركين، ليس كباقي الأكلات!!!
طعمك رهيب مذاقك عجيب انت من يشبهك انت من زيك! انت يا ألذ حبيب! ********** انت لا سمك لا جداد لا فاصوليا بالفرن لا عصيدة انت وحدك فريد حاجة كده براااها! انت ممكن اكتب فيك قصيدة! ********** انت فريد انت غايتو! اللي بياكلك سعيد لا أبو الشهيق لا ريحة فايحة لا اعتراض ممكن يبعدني عنك و شوقي ليك بيزيد! ********** سألوني الناس طعمك ايه قلت لهم سيبوا حبيبي انتو مالكم بيه! ************* لاموني اللي غاروا مني قالوا اش عاجبك فيها قولت لهم: خدوا عيني شوفوا بيها!
**يجب على الناطقين بالعربية مراعاة فروق التقاليد و العادات الغذائية المبنية على الظروف البيئية المحيطة و عدم الخلط من قريب أو بعيد مع المدعو فسيخ! ولذلك وجب التنويه!
Post: #32 Title: Re: من التركين ما قتل ... Author: ود الباوقة Date: 01-18-2007, 05:20 PM Parent: #17
Quote: لكاتب البوست و مستهجن هذا الولع
لا والله يا عزاز انا ما مستهجن التركين بس كان امامي عارض صحي لاحد الزملاء كان السبب فيهو التركين .
ولم يروك و الفقاعات تشق سطحك الفائر
ما هي المصيبة في الفقاعات دي ...
صحنك رحب كبيوت أهلنا انه التركين، ليس كباقي الأكلات!!!
طعمك رهيب مذاقك عجيب انت من يشبهك انت من زيك! انت يا ألذ حبيب! ********** انت لا سمك لا جداد لا فاصوليا بالفرن لا عصيدة انت وحدك فريد حاجة كده براااها! انت ممكن اكتب فيك قصيدة! ********** انت فريد انت غايتو! اللي بياكلك سعيد لا أبو الشهيق لا ريحة فايحة لا اعتراض ممكن يبعدني عنك و شوقي ليك بيزيد! ********** سألوني الناس طعمك ايه قلت لهم سيبوا حبيبي انتو مالكم بيه! ************* لاموني اللي غاروا مني قالوا اش عاجبك فيها قولت لهم: خدوا عيني شوفوا بيها!
يا جماعة اخونا مصطفى محمود ماعندو شعر في التركين ...
Quote: تهرع إليك الأيادي بالسلام ناثرة الفلفل الأخضر والبصل الأبيض في طريق اللقمات الشهية .. وياه!
والله بعد الكلام دا يا عزاز حقو الواحد يجربو المحي الله والكاتل الله ..
ود الباوقة
Post: #21 Title: Re: من التركين ما قتل ... Author: بكري الصايغ Date: 01-18-2007, 00:28 AM Parent: #1
الـتيـن والـتركيـن وطـور سـينيـن !
Post: #33 Title: Re: من التركين ما قتل ... Author: ود الباوقة Date: 01-18-2007, 05:23 PM Parent: #21
سعدنا بمروركم اخي بكري الصايغ ..
ود الباوقة
Post: #22 Title: Re: من التركين ما قتل ... Author: saadeldin abdelrahman Date: 01-18-2007, 02:42 AM Parent: #1
لو لم اكن مصريا لتمنيت أن أكون مصريا* قيل أن صاحبها مصطفى كامل (اكيد لافحا) .................
اعجبني وصف و رسم التركين و طور سينين (على رأي الاستاذ الصايغ) و طقوسه.
و لو كنت قد اكلت التركين لتمنيت أن لا اكون اكلته حتى آكله الآن...(لو فهمتو حاجة ابقو قابلوني) ثم أن هذا الكائن الجميل المدعو (فسيخ) نفسه لم ينج من النقاد حيث يقول المصاروة ( .. يعمل من الفسيخ شربات) و كأن هذا الفسيخ اسوأ من الشربات التي قد تودي باصحاب السكري الى التهلكة! ده كلو كوم و الجاي كوم براهو لأن ما اذهلني و طير النوم من عيني هو:
Quote: ولم يروك و الفقاعات تشق سطحك الفائر
بكرة نبقى في WMD و امم متحدة و مفتشين!
مع ذلك! لن يفت هذا من عضدي في النيل من السيد المذكور عند اول سانحة بس ورونا طعمو شنو لأنو نسينا وصف الصحاب زمان عافيلقو عزاز
Post: #28 Title: Re: من التركين ما قتل ... Author: Mohamed Abdelgaleel Date: 01-18-2007, 11:00 AM Parent: #22
لم يكن للخال حمزاوي أن يصبح خالاً لبورداب الرياض لولا إعلانه من على ظهر هذا المنبر أنه سيدعو الاعضاء على عشاء تركين .. الأمر الــــذي أخرج منافسه وقتها صديق المـــوج عن أطواره ليصاب بالهسترة وهي حالة تنتاب من يتيقن أنه مهزوم لا محالة وهو كما ذكر أبوجهينة يتعتق بالتقادم الأمر الذي يؤهله لأن يطلق عليه وجبة باخوس النقية
Post: #37 Title: Re: من التركين ما قتل ... Author: ود الباوقة Date: 01-20-2007, 08:01 PM Parent: #28
لم يكن للخال حمزاوي أن يصبح خالاً لبورداب الرياض لولا إعلانه من على ظهر هذا المنبر أنه سيدعو الاعضاء على عشاء تركين ..
الاخ محمد عبد الجليل .. يا اخوي هو من ديك وعيك لا حس لا خبر .. يا جامع يا رقيب تجمعو . التركين يطير ان شاء الله .. الخال وين ..
ود الباوقة
Post: #34 Title: Re: من التركين ما قتل ... Author: ود الباوقة Date: 01-18-2007, 05:32 PM Parent: #22
هاتفني قبل قليل الاخ الكريم احمد صالح من بلجيكا التي استقر فيها لاكثر من ثلاثة وعشرين عاما قال لي ان ابنته التي ولدت هناك ولم تشاهذ السودان تحب التركين حبا جنونيا ووجه نداء الى جمعيــــة اصدقاء التركين بالرياض ان يرسلوا لابنته صفيحة تركين من المقاس المتوسط وبذلك تكون دعاية مجانية لكم في بلجيكا ..
ود الباوقة
Post: #29 Title: Re: من التركين ما قتل ... Author: رأفت ميلاد Date: 01-18-2007, 04:04 PM Parent: #1
تعرف يا ود الباوقة صحبك دة يكون قام بيو التركين
Post: #35 Title: Re: من التركين ما قتل ... Author: تماضر الخنساء حمزه Date: 01-18-2007, 06:08 PM Parent: #29
رأفت ..ود الباوقة ..إتفضلوا ..
Post: #36 Title: Re: من التركين ما قتل ... Author: welyab Date: 01-18-2007, 07:17 PM Parent: #35
التركين ومركبات الفسفور
يعني كده في مفاعل نووية داخل بطون اكلة التركين !!! الخوف تقوم جهات تبلغ الامم المتحدة ومجلس الامن!!! لا بوش .. و..الامريكان .. ولا القوات الاممية تقدر تهود من ناحيتنا !!!!
Post: #38 Title: Re: من التركين ما قتل ... Author: ود الباوقة Date: 01-20-2007, 08:10 PM Parent: #35
Quote: رأفت ..ود الباوقة ..إتفضلوا ..
غايتو يا تماضر رأفت دا قال اصلوا ما بمشي عليهو . الا انا بعد الكلام السمح دا ان شاء الله اخد لي منو لقمة لقمتين ..
ود الباوقة
Post: #39 Title: Re: من التركين ما قتل ... Author: تماضر الخنساء حمزه Date: 01-20-2007, 08:25 PM Parent: #1
بقية ..
والتركين ( الملوحة ) إن شاء لك السعد أن تنعم بمتعة أكله في البلد ( بلاد النوبة أقصى الشمال ) فأنت من الذين إختصهم الله بفضله ونعمه التي يجب أن تقضي بقية عمرك حامداً شاكراً له عليها ..
وهذا المدعو ( الجوداد ) لايحتاج لكثير زمن ..أكلة صالحة في هذا الزمن الذي يرفع شعار السرعة والإتقان .. تحضر الملوحة من علبتها أو صفيحتها حسب مايصادفك وتحلها بموية وماأعذب مياه النيل الذي إن أخرجت يدك من ال(قسيبة ) تجدها تعانق مياهه.. ولاتحتاج للنار ثم البصل على شكل مربعات صغيرة كمربعات الكلمات المتقاطعة وإن إختلفت الألوان إلى أحمر وأبيض ! ثم الكثير جداً من التوم ..ولابأس بالقليل من الدكوة ..والشطة الخضراء وذرات من الزيت ..ثم هنيئاً مريئاً بالقراريص الملهلبة ..
Post: #41 Title: Re: من التركين ما قتل ... Author: عبدالغفار محمد سعيد Date: 01-20-2007, 09:17 PM Parent: #39
ود الباوقه انت بس جربو
وحتغير رايك
قال من التركين ماقتل
يقتل شنو ياخ ... ده التركـــــــــــــــــــــين
الود
Post: #40 Title: Re: من التركين ما قتل ... Author: Salah Waspa Date: 01-20-2007, 09:16 PM Parent: #1
ود الباوقه سلام من الله عليك
طبعا أنا بما إني حلفاوي من أقصى الشمال أعشق التركين ولا تنازعه
عندي وجبه وخصوصا مع اللمه والرفقة الطيبة ومن نكات التركين :
بذكر إنه واحد دنقلاوي سافر الى القاهرة لزيارة أقاربه
وكان يحمل علبة صفيح تحتوي على تركين سوبر وعند تفتيش ضابط
الجمارك المصري له سأله العلبة دي فيها إيه يا سماره
فأجاب السوداني فيها أكلة سودانية وشكك الضابط في أمره وأصر
أن يفتح الصفيحة وما أن فتحت حتى إنطلقت الريحة الإنتا عارفها
ديك في أرجاء الصالة وما كان من الضابط أن صرخ لا شعوريا :
إيه يا بني ده ? إنتو بتاكلو ده ? أمال بت..... إيه ?
) كان ما يجيني ود الموج في البيت إلا يطلب تركين , و ندلعو ليهو طبعا بصحن بصل بالشطة و بعدها التمر القنديلة الماخمج , العربي كان يغرّز في القراصة إتنين بوصة و يزدرد حتى تتفشخ خواشيمه من اللذة , و نحنا نساعدو بالمناديل , و مايرجع تاني إلا معدتو غلطانة و عايز يعالجها بالتركين .. شفت العبقرية الطبية دي ؟؟
) . 