Post: #1
Title: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-17-2007, 01:34 PM
وصلتي رسالة معادة الارسال من احد الاقرباء مرسلةمن شركة الاتصالات السعوديةكالأتي :
CONGRADULATION !
Today is the anniversary of SAWA, So foward this sms to 10 other pepole you will get free balance of SR.100/ =(All SAWA user
قلت يا عمي خلاص اتحلت ، تخسر ليك ريالين ونصف و تكسب 97.5 ريال (قيمة الرسالة 25 هللة) و ماصدقت ارسلت ليك عشرة رسائل لعدد من الاصدقاء ، قلت يا عم خليهم يستفيدوا زي ما انت ح تستفيد و ما تنسي فيها رسالة مرسلة للمدام قلت اهو تكون وفرت يا عبد ال 100 ريال مصروف الاتصال الشهري لاهلهاو تكون كده طالع من العيد ده ب 197.5 ريال . وبعد ذلك انتظرت ليك 5 دقائق 10 دقائق ساعة مافي شي ظهر ولا رصيد نزل ولا يحزنون ولا حظ معاي خلال هذه الفترة وصلتني عدد من الرسائل تحمل نفس المضمون ، صدقوني وصلتني رسالة 3 صباحاً،
قلت يا كابتن ربما يكون الرصيد ده ضل الطريق اتصل على شركة الاتصالات و شوف الحاصل و بالفعل قمت بالاتصال على شركة الاتصالات السعودية خدمة العملاء و تهت عشرة دقائق ما بين جهاز الرد الالي و الرسائل الصوتية و التوجيهية حتى وصلت للسيد مسئول خدمات العملاء و بادرته بالتحية و كلي امل وتفاؤل :
ازيك يا ريس
وعليكم السلام
يا اخي في الحقيقة وصلتني منكم رسالة او بالاحري وصلتني رسالة من صديق و مضمون الرسالة كيت و كيت ، ويا اخي لحدي الان الرصيد ما نزل في حسابي عل المانع خير .
رسالة ايه رد علي .
قلت ليه رسالة لندن ( ماقلت ليك مضمون الرسالة)
قال لي الرسالة هذه مرسلة بالخطأ .
قلت ليه مرسلة بالخطأ كيف ؟ وبدء الاحباط يتسلل الي دواخلي .
اعدت عليه نفس السؤال كيف ارسلت بالخطأ و ملاين الناس وصلتها هذه الرسالة وقامت بأعادة ارسالها لملاين الناس و كم الربح سوف تجنوه من هذا تقول لي ارسلت بالخطأ؟
ما كان لديه من اجابة غير ذلك ؟ وادركت في لحظتها ان كل الحسابات تلخبطت و كل ما خطط له خلال ساعات من احلام و برنامج مجدول حسب الاولية للاتصال على الاهل قد تلاشى في دقائق معدودة .و ما كان امامي الا ان اتصل على الاخوة الذين ارسلت لهم و الذين ارسلوا لي و اخبرهم بالحاصل حتى اقلل عدد الضحايا .
فقلت في نفسي يا ناس الاتصالات ما تنفعكم فلوسي انشاء الله و انشاء الله تدخل عليكم بالساحق والماحق
|
Post: #2
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: abuguta
Date: 01-17-2007, 01:45 PM
Parent: #1
ها ها ها ها
صديقى الصادق..
الجماعة مقلبوك...
لو 1000 شخص ارسلو هذه لبعضهم..ريح شركة الاتصالات 25000 فى كل نصف ساعة..
ياخى السرقة كترت..تعرف دى عملوها ناس سوا..عشان يعوضو حلى 150 تلك ولائم العيد
الاتصالية..عموما الله يعوضك فى 2.25
والمتضررين كتار..
|
Post: #3
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-17-2007, 02:04 PM
Parent: #2
حبيبنا ابوقوته
كيف يا عريس
دول والله مش عوضوا حلى وبس دول اخدوها مضاعفة .
اتمنى ان لاتكون من ضمن المتضررين .
|
Post: #4
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: محمد حسن العمدة
Date: 01-17-2007, 02:08 PM
Parent: #2
الاحباب الصادق وابوقوته
سلام تصدقو الشباب ماسكين الجوالات ومنتظرين المية ريال لحدي حسع
ده نصب واحتيال ويجب ان تعاقب عليها شركة الاتصالات السعودية
|
Post: #5
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-17-2007, 02:14 PM
Parent: #4
ووووووووووواو
حبيبنا ود العمدة أحد الضحايا
كيف يا رجل
| Quote: ده نصب واحتيال ويجب ان تعاقب عليها شركة الاتصالات السعودية |
يالله شوفوا لينا اجراء قانوني عشان نتخذوا ضد الشركة يا عمدة .
|
Post: #6
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: معاذ حسن
Date: 01-17-2007, 03:50 PM
Parent: #5
الصادق والله من العنوان عرفت الموضوع
تخيل اخوك الوهم دا مرسل 13 رسالة بدل 10 قال للضمان!!
عالم وهم!!
|
Post: #8
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: خالد عبد الله محمود
Date: 01-17-2007, 04:05 PM
Parent: #6
و لد خالي رسل لي الرسالة دي و قال لي بعد الساعة 12 بالليل حينزلو لي 100 ريال رصيد
قعدت أقنع فوقوا الليل كلو إنو دة إحتيال و إنو نفس العملية دي عملوها في السودان بدون فايدة
قال لي بكرة الصباح بعد تجيني المية ريال بتصل بيك عشان أغيظك...
الكلام دة أول أمس بالليل و لحدي الآن خجلان مني و ما داير حتي يرد على تلفوناتي..
عالم وهم زي ما قال معاذ
|
Post: #10
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-18-2007, 07:10 AM
Parent: #8
Quote: ولد خالي رسل لي الرسالة دي و قال لي بعد الساعة 12 بالليل حينزلو لي 100 ريال رصيد
قعدت أقنع فوقوا الليل كلو إنو دة إحتيال و إنو نفس العملية دي عملوها في السودان بدون فايدة |
الأخ خالد
لا يلدغ المؤمن من الاتصالات مرتين . اللدغة الاولى نفعتك الظاهر .
|
Post: #9
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-18-2007, 07:05 AM
Parent: #6
الاخ معاذ
بالله عليك تسببت في اصابة 13 من بني البشر (عالم طماعة )
انت عارف عشان رسلت 13 رسالة الرصيد ما نزل ليك لانك خالفت التعليمات.
|
Post: #7
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: ghariba
Date: 01-17-2007, 04:01 PM
Parent: #1
كملت رصيدي
12 رسالة وواحدة رسلتها للمدام بالقاهرة علشان هي بدورها تكمل الناقصة عبر القارات
المهم :
واحد معاي في الشركة مصر على ان الرصيد حيدخل بس عاوز ليهو وقت ...
واهو منتظر وكل ما تجيه رسالة يقول خلاص فرجت وتطلع فشنك
بالمناسبة كان قصرنا الحكاية دي لو اتصلنا طوالي بالاتصالات بدل نشيل ونخط في الرسائل اليوم كلوا
صلاح غريبة - الرياض
|
Post: #11
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-18-2007, 07:15 AM
Parent: #7
1| Quote: 2 رسالة وواحدة رسلتها للمدام بالقاهرة علشان هي بدورها تكمل الناقصة عبر القارات |
الاخ غريبة
دولة القضية يااخ .
|
Post: #12
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: abuguta
Date: 01-18-2007, 07:27 AM
Parent: #11
الصادق
بالله دى مش زى شركة بزناس التى سرقت الناس ومشت
وممكن يكون جاءت فى شركة كويست
عموما الحرامية كترو
انتو عارفين سبب عدم نزول الرصيد الناس الطماعة
اسى معاد دا عشان ينزل ليه رصيد لازم يرسل سبعة تانى
|
Post: #14
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-18-2007, 08:10 AM
Parent: #12
حبيبنا ابوقوته
انت عارف في شركة اسمها اد مارك ولا ماركر مش عارف ظهرت جديدة يبدو لي
لان واحد من اصدقائي ارسل لي اللينك تبعها و قال شوف الحاصل فيها، و فيها ضربات كثيرة بالاف الدولارات في وقت وجيز
قلت ليه يا معلم خلينا نشوف فيك انت اول :
يلزمك نرسل ليك اللينك يا ابوقوته ؟
|
Post: #13
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: Basheer abusalif
Date: 01-18-2007, 07:53 AM
Parent: #1
ابو أحمد يا صاحبي...
الجاتك في رياليينك سامحتك.. و عيدك مبارك.
معاذQuote: تخيل اخوك الوهم دا مرسل 13 رسالة بدل 10 قال للضمان!!
|
دي بالغت فيها..كل سن و انت طيب
|
Post: #15
Title: Re: ضربة العمر (ريالين ونصف ريالي تدخل عليكم بالساحق و الماحق)
Author: الصادق خليفة
Date: 01-18-2007, 08:15 AM
Parent: #13
حبيبنا الغائب الحاضر ابوسالف
شوق اييييييييييييييييك خليه ساكت .
طلعوك رجيلك يا اخ و لو كنت معانا هنا كان خسرنا فيك ال25 هللة و كنت اول الضحايا.
تسلم يا صاحبي وسلام مربع لام البنية و البنية الفنجرية
|
|