Post: #1
Title: بين الرمال مذبوح .. رحم الله ابوصلاح
Author: أحمد طراوه
Date: 01-14-2007, 09:43 AM
Parent: #0
... مودتي لكل من وآفانا و آلفنا في البرهة القليلة , وهي كلمات لعبيد عبد الرحمن الذي عرف بعدم احتماله وعدم تماسكه امام تلك الظاهرة المسماة بالذوق و بالجمال عموما, اذ هو يقول : انا الفي حالي ماك سائل , انا المني الفِِؤاد مضنى , انا المني الدمع سايل ! اعاني عذابي الهائل ! اخذ مني الفراق مأخذ و نال مني الهوى نائل .. غزال البر يا راحل .. حرام من بعدك الساحل ! ( وقصدي هنا كل من مروا علي البوست السابق و قبلوا شفاعة ود الرضي و ادرجوني تحت ظلها مترامي الاطراف ) , و يا بكري وهشام و الكل بدون استثناء و فرز , اقول لكم قول ابوصلاح : دام عليك الهنا و السرور .. و هو قول جاء ضمن كلماته يوم زواج صديقه و صفيه ربيع منسوب حي البيان و السيد المكي بامدرمان : ياربيع في روض الزهور .. عيش منعم طول الدهور .. ! و لان الشي بالشي يذكر , فان عمر البنا وهو مثل عبد الرحمن الريح و عبد الكريم الكابلي , اذ هم جميعا يكتبون و يلحنون و يغنون , كان قد شاهد حسناء امدرمانية اسمها نفيسة تسكن عند محطة ودارو المجاورة لمحطة السيد المكي فقال عنها كلامه ذاك : يا خلاصة حسن الغانيات في ام در .. ملكني هواك يا نفيسة الدر ! شوفتك لخاطري تسر .. و تقلب لي العسر يسر ! اقول قولي هذا بسبب ان يس قد ذهب بنا بعيدا حين اتى الينا ببكائية ابوصلاح تلك المسماة : قلبي همالوا ! وجعلها شعارا غنائيا له من الاهمية و الاثر و البعد الجمالي ما يضاهي شعار الاصلاح الزراعي في السودان ! وقيل ان ابوصلاح قد شاهد صبية جميلة من قبائل الصبحة او دويح او ما الي ذلك , مستلقية عند رمال بحر ابيض وذلك بعد ان توقفت بهم باخرة النقل النهري في محطة نيلية لما بعد القطينة , كعادته فان ابوصلاح رواصده كانت قوية و انتباهته عالية مثله كما العبادي الذي رافقه في تلك الرحلة , سمع رفيقاتها ينادون عليها يا فريع , فذهب سريعا في تأويله العاطفي - الشعري للموقف قائلا: يا فريع ياسمين .. متكي في رماله .. قولو عاشقك وين ضاعت آمالو ! رحم الله صالح عبد السيد الذي دارت عليه دوائر الجمال عند رمال بحر ابيض وهو لم يكن قد انفك بعد من نوابل حسناء حي القلعة بامدرمان التي اربكت اوزانه يوم حفلة زواج صديقه عبد الرحمن فقال عنها في صدى غناء سرور و مزيكة وهبة : حال محاسنك مين الفسرا.. يا الثريا الفوق اهل الثرا ! يا اهل الفن و الكلمة و الايقاع و اللحن , و يا عاشقي وطن جري فيه قديما (اللير/الطمبور) بين يدي الكوشيين وسلالاتهم التابعة من مستعربة السودان , ثم انتقل ذات الطمبور في سلاسة و قبول تام الي ادروب , و منقو , ثم تحور في دار قمر الي ما عرف بام كيكي فصار رمزا لوحدة ارضه و وجدان شعبه .. لكم محبتي , و اقبلوا بيعتي , و تجاوزوا عن سهواتي .. تكسبون في ذلك اجر دون شك ! يا فاروق لك الشكر , و كثير علي امر البردى هذا , وكان السيد عبد الرجمن المهدي قد قذف بعبايته الكريمة فوق سيد عبد العزيز يوم ان قال فيه قصيدته التي وصفه فيها بنيل القراب و بعاد , وقيل ان المرة الثانية يوم ان سأل ابنه السيد الصديق عن امر وفد السودان للامم المتحدة في شأن االاستقلال ,فقال الصديق ليس لدينا المال الكافي , فخلع عبايته ايضا وقال له خذ هذه بعها ! لك شكري يا عادل و وعدي بالعودة وياليتك تتمكن من سماع الفي العصر مرورو بصوت الراحل خلف الله حمد .. و يا بت طلحة : قال المتنبي في مدح علي بن منصور الحاجب وهو ممن شابهوا اولاد الشلهمة اخوالك : نلومك يا علي لغير ذنب .. و يواصل حتي يقول .. ولما جئته اعلى مكاني , و اجلسني علي السبع الشداد .. سلامي للزبير و عمر و عموم احفاد البامسيكا بطرفكم .
|
Post: #2
Title: Re: بين الرمال مذبوح .. رحم الله ابوصلاح
Author: أبو الحسين
Date: 01-14-2007, 09:51 AM
Parent: #1
| Quote: و يا بكري وهشام و الكل بدون استثناء و فرز , اقول لكم قول ابوصلاح : دام عليك الهنا و السرور .. و هو قول جاء ضمن كلماته يوم زواج صديقه و صفيه ربيع منسوب حي البيان و السيد المكي بامدرمان : ياربيع في روض الزهور .. عيش منعم طول الدهور .. ! |
وأنا أبو الحســـــين...
أقول ليكم يا جماعة اللللللله أداكم بي قدوم طراوة...
بهذه الطراوة الطالتنا من شواطئ الموردة وأبو روف وهبت نسايمها علي البورد...
يا هلا بيك ومرحب ومدخل جميل يوحي بميلاد عضو جميل جمال أُمدرمان الأصالة والتاريخ...
كميات مودتي...
أبو الحســـــــــين...
|
Post: #3
Title: Re: بين الرمال مذبوح .. رحم الله ابوصلاح
Author: محمد المرتضى حامد
Date: 01-14-2007, 12:32 PM
Parent: #2
يا أبوحميد حمدالله عالطلّه,
الحال ياهو نفس الحال
براك عارف وبي أدرى
بجيك على مهله بعد أكفِّي الضيوف بيغادي.
|
Post: #4
Title: Re: بين الرمال مذبوح .. رحم الله ابوصلاح
Author: شكرى سليمان ماطوس
Date: 01-14-2007, 12:35 PM
Parent: #1
أهلاً وسهلاً ،،،
وحبابك ألف ،،،
د. طراوة ....
ود المرتضى: شنو الخيانات دى ،،،
تخلونا نايمين بهناك نشخـررررررررررر
وتفتحو ليكم بيت بهنا،،،،
حأرجع ليكم
|
Post: #5
Title: Re: بين الرمال مذبوح .. رحم الله ابوصلاح
Author: شكرى سليمان ماطوس
Date: 01-14-2007, 12:57 PM
Parent: #1
| Quote: غزال البر يا راحل .. حرام من بعدك الساحل |
نزل الشعار يـــــا يس (yasiko) ،،،،،،
خلينـا نتكسر وندق الخيم فى البيت (البوست) ده ......
العزيز يس أنا مولود المسالمة و متربى فى شارع الشنقيطى ،،،،
عبد الرحمن الريح ،،
سيد عبد العزيز ،،،
.... .... ....
أجهز و جهز اللعب ،،، يا دوب البورد إتعمر ،،،،
لينا رجعة ......
حاشية:
ود المرتضى كلمت ليك الناس الفى بيتك ،،،
وخليتهم بلبسواااااا جـــاييين هـنا...
Re: أحمد طراوه ...أهلا شكرى سليمان ماطوس 14-01-07, 11:46 ص
أحمد طراوه ...أهلا
لنا عودة
|
Post: #6
Title: Re: بين الرمال مذبوح .. رحم الله ابوصلاح
Author: سمية الحسن طلحة
Date: 01-14-2007, 01:42 PM
Parent: #1
| Quote: غزال البر يا راحل .. حرام من بعدك الساحل ! ( وقصدي هنا كل من مروا علي البوست السابق و قبلوا شفاعة ود الرضي و ادرجوني تحت ظلها مترامي الاطراف ) , |
أى السواحل ؟ فهم كثر
| Quote: يا بت طلحة : قال المتنبي في مدح علي بن منصور الحاجب وهو ممن شابهوا اولاد الشلهمة اخوالك : نلومك يا علي لغير ذنب .. و يواصل حتي يقول .. ولما جئته اعلى مكاني , و اجلسني علي السبع الشداد .. سلامي للزبير و عمر و عموم احفاد البامسيكا بطرفكم |
د. أحمد طراوة
مرحبا بك فى هذه الإطلالة التى تلاقت مع أشواق أناس كثر
تفيأوا ظل تحليلك لهذه الدوحة الوارفة (أغانى الحقيبة)
شكرا لتحاياك والكل هنا يهديك السلام...ومن المصادفة أن الزبير كان يستمع لهذه الإغنية بصوت الفنان /صديق سرحان بمصاحبة الإبن عمر
وعندما قرأ كلامك هنا قال( بس خلاص أنا لقيت الزول البفتفتا لي) ...فهو يهديك إياها لتقوم بتشريحها... ويقول لك (أصبر الغزلان بتجيك واردة ما تستعجل)
غزال البرِّ ياراحل حرام من بعدك الساحل
أنا مجنون هواك لكن أظهر مظهر العاقل
أخاف على حبك أتضمضم أخاف يجد الكلام ناقل
أقبـِّل خدك الزاهي واخاف من طرفك الواقل
يشوفني يمضي تعذيبو تسيبني وتمشي متـّاقل
أنا المن حالي ماك سائل أنا المنـِّي الفؤاد مُضنى
أنا المنـِّي الدمع سايل أعاني عذابي ياالهائل
أخذ منـِّي الفراق مأخذ ونال منـِّي الهوى نائل
حبيبي تبين الأخضر إذا كان يوم يجيك عازل
يريد يوشيك عن أمري فاعلم إنـّو مترازل
أقول ليك الكلام الجد وما أنا بالكلام هازل
ولا أنا للوداد ناسي ولا أنا عن حبي متنازل
سمير الأنجم الزهر وليل بنهاري متواصل
فقدت منامي واحلامي ومابين الألم فاصل
جميع ماإنت ترضاهو جميل منك إلي واصل
تأكد ماكذبتك شيء وحاة روحك هو الحاصل
(بينى وبينكم معنى الجمال مشروح...ولكن ماعلى الرسل إلاالبلاغ)
|
Post: #7
Title: Re: بين الرمال مذبوح .. رحم الله ابوصلاح
Author: mohmmed said ahmed
Date: 01-14-2007, 02:43 PM
Parent: #6
كتابات طراوة الرشيقة هذه
يا ليتها تنثال
خارج عياءة الحقيبة وامدرمان
|
Post: #8
Title: Re: بين الرمال مذبوح .. رحم الله ابوصلاح
Author: علوبه
Date: 01-14-2007, 08:08 PM
Parent: #1
مزيد من الابداع الوصفى
يااحمد امكن زمنك جاء وذهب معهم وتاخرت حتى حركت الحروف
تعرف امدرمان اشبه بدولة داخل دولة وليس تحزبا ولا عنصرية
لو بايدى كان عملنا حركة(بى بركة المشايخ ناسكم) حركة انفصالية لامدرمان
بس ماعندنا اى مطالب نحن ناس امدرمان اللهم يخلوا لينا حقيبة واحدة فى توزيع الحقائب
وهى حقيبة (الفن) وبس !!!!!!!!!!
تحياتى ليك وللمعاك
|
Post: #10
Title: Re: بين الرمال مذبوح .. رحم الله ابوصلاح
Author: محمد المرتضى حامد
Date: 01-14-2007, 09:31 PM
Parent: #8
Quote: بس ماعندنا اى مطالب نحن ناس امدرمان اللهم يخلوا لينا حقيبة واحدة فى توزيع الحقائب
وهى حقيبة (الفن) وبس !!!!!!!!!! |
يا علي أنا أختلف معك منذ الآن وأعلنت انشقاقي عن الحركه، على بياض .
والله ديل لو أدوك حتى حقيبه نسائيه لومني.
|
Post: #11
Title: Re: بين الرمال مذبوح .. رحم الله ابوصلاح
Author: علوبه
Date: 01-15-2007, 02:47 PM
اخى محمد ودالمرتضى
الله يرضى عليك :-
انا لازلت متمسك بانفصال امدرمان ليس (طلاقا) ولكن اطلاقا للحب والفن والجمال
وانا متاكد انك بتجينا راجع (بالعصر) مرورك واضمن ليك حقيبة الفن بتجيب
اى حقيبة تانية (وجزلانة) كمان
عارف قلبك رهيف وحنين صحى بتقدر تفارق امدرمان ما اظنك !!!!!!!!!!!!!!!
|
Post: #9
Title: Re: بين الرمال مذبوح .. رحم الله ابوصلاح
Author: Adil Osman
Date: 01-14-2007, 09:29 PM
Parent: #1
رحم الله ابو صلاح ومبدعى الوجدان الحقيبى
يا بدور القلعة
|
|