العيد في الخبر والدمام *** حاجة تمام

كان العيد
او كانت الاعياد وكانت الفرحةاكبر
عندما كانت هذه الاعياد في ضيافة عدد من الشباب
في الخبر والدمام و كانت احلى الملمات واجمل اللحظات
مع دندنات ابراهيم الماحي ذلك الساورابي العتيق
(غنينا سوى ) غنينا غنى السنين
التحية ليكم جميعا فردا فرد
ونشكركم على الحفاوه الجميلة
وحقيقي خربتوا طبعنا ما قادرين نرجع
للدوام والقصص الصعبة دي بعد الدوز العالي من الفرح
لكم جميعا
الحب كل الحب
واخصك هنا ايها الجميل زهير راسخ
بكل الاحترام

معتصم سيد احمد والاسرة

Quote: العيد في الخبر والدمام *** حاجة تمام

الحِبيّب معتصم والأُسرة...

كل سنة وانتو طيبين...

وشرفتو يا اخوي الدمام والخُبر متشرف بيكم...

أنا غايتو كان لي شرف ملاقاة الإخوة الكرام...

تمبس وشتات...

وحقيقة قضيت معاهُم ساعتين من أجمل الأوقات ضمتنا مع بعض غُرفة تنقو بالخُبر...

تخريمة::

لكن ما تقول لي يا عادل إنت الأربكت عليهم زيارتي في البيت؟؟؟!! لأنهم كانوا بيقولولي بي نجيك لكن ماشين الدمام ونقابل واحد ونجي...

ومن ديك وعيييييييييييك...

قواسيب مودتي... وعبرك للإخوة الكرام تمبس وشتات والحاج صديقي اللدود معتصم دفع الله...


أبو الحســــــــــين...

ازيك يا أبو الشباب
والله الشكر ليك وليكم
كان في نيتي افتح بوست بالموضوع دة من شدة حلاوتو
واكراماً لي عيدكم معانا، حا اكتب المداخلة الكنت مجهزة للبوست والحوش واحد يا حبيب وربنا يديم الأعياد ووالأفراح:

زهير فيصل.. كل سنة وانت البسمة (دا العنوان الكان مقترح)
==============================
كل عام والجميع بألف خير..و
عيد ميلاد مجيد..و
2007 ملئ بكل الفرح والجمال

استقبلنا العام الجديد متحلقين جميعنا حول جميعنا
يتوسطنا الحبيب
زهير فيصل
ويوحدنا شدو وتطريب
ابراهيم الماحي
كم كان بديعاً واصابعه تداعب اوجاع اوتار العود واوتار اوجاعنا
وهو يعبئ ويشحن غناؤه بكل ما أمكن من الحب والجمال

رقص الجميع حتى الثمالة وتعانقت الأحاسيس الدسمة والأمنيات الشحمانة بداية بالحلم الكبير.. الرجوع إلى حيث كلنا ننتمي وانتهاء كل أنواع الكوابيس التي تسدّ طريق عودة كل منا.. ثم حلم استعادة زهير فيصل لصحته وعافيته ولونه البهيج المشتق من جمال حبيبته وأم سهى وسارة وصديقة الجميع اقبال.

الفرح كان محتشداً داخل كل منكم.. و
كلكم كان نجما
لكن اسمحوا لي أن أضع خطاً احتفالياً تحت
معتصم ود الجمّام
كان حمامة المدينة المنورة في الحفل..

لم نتجاوز أوجاع رحيل
مجدي النور
له الرحمة والمغفرة
والحب أينما كان


شكراً حميماً لكم جميعاً..
وابقوا طيبين متعافين


ما عارف نفتح سيرة اليوم التاني كيف؟؟؟
محاول أنزل حتّة من شغل ابراهيم (بالصوت) نظام شحتفة وكدة!!

الزول الظريف معتصم واسرته الحبيبة
سيد حوشنا الكبير .. د. امير وحرمه المصون المترعة بالحفاوة والطيبة والبساطة..مزاهر
زمن طويل من الكتابة في هذا المنبر الحبيب لنفسي لظروف يعلمها الجميع والتي اتمنى ان تزول للابد
نرجع للفرح
هو ديدننا اخي معتصم ولولا حبنا الكبير لما تحملنا عذابات الغربة لحظة واحدة... هكذا نحن جمع بيننا الود والحب والهم الكبير ..فقاومناه بالفرح دائما وبتماسكنا فما عاد حزن يشقنا ولا بلوى تكسرنا ... صمدنا في وجعنا الكبير نتحدى ما يعكر صفو فرحنا الجميل.. تفرقنازحمة العمل المرهق في هذا البلد العجيب الذي لا يشبهنا وعند اللمة تزول ارتال المعاناة والتعب
شكرا معتصم ... على الاريحية التي غمرتمونا بها وسعيدة انا بفرح زهير بكم ومشاركته الفرحة التي رايتها ذاك اليوم في عيونه ... حقيقة كانت امسية طربنا فيها وتعانقنا وتفاءلنا بعالم يحمل البشريات والاماني الطيبة
أمير... مزاهر.... محمد حسن.... صفية....كلكم كلكم ماشاء الله وربنا يديم المحبة واللمة الجميلة
مودتي وعميق اعزازي للحبيب ابراهيم الماحي الذي كعادته يخرجنا من قواقع احزاننا ليبث فينا حلم كبير
ودائما غدا افضل واجمل
عميق اعزازي

تمبس - شتات - العريس محمد الشيخ
هكذا انتم تخلقون الدهشة والجمال اينما حللتم .. وجودكم يشعرنا بالدفء العائلي حقيقة وباللمة والحوش الكبير
كنتم مثار دهشة لكل من رآكم ذلك اليوم بدارنا العامرة دوما بكم
ما تنقطعو ومنتظرين الاحتفال بكرامة حاج معتصم
لكم جميعا حبي الاكيد

بالله تمبس كان في الخبر والدمام (مع تقديري للجميع)

كم كنت متشوف لرؤية هذا الفتى (تمبس)
وكل سنة والجميع بخير


أبوفتحية

كتب أبو فتحية...

Quote: كم كنت متشوف لرؤية هذا الفتى (تمبس) أبوفتحية

أوصفه ليك أنا يا أبا فتحية...

من أبي الحسين وصف الغالي تمبس لمن لا يعرفه من قرب...


رجل طيب... مهذب... تعرفو لو شفتو أول مرة...

إنت عارف وأنا جايي داخل عليهم الصباح في بيت الأخ خالد تنقو العامر... أول ما قابلت كان هو الأخ تمبس... فقام تمبس قال لي تعرف دا... على طول وبدون تردد قلت ليهو تمبس...

فهو الكمال لله... ولا أفضلوا على أحد من الشباب المحترمين جداً كما صديقيه تنقو وصلاح شتات...

جمعنا الله بهم في ساعات تاني وأوسع شويي...

كميات مودتي...


أبو الحســـــــــين...

عزيزي الأخ أبوالحسين

Quote: رجل طيب... مهذب... تعرفو لو شفتو أول مرة...

اشكر لك ما تفضلت به عن الأخ تمبس ولأنو أنا عندي إحساس قوي إنو الزول دا زي ما أنت ذكرت عنه ويمكن أكثر بكثير لذا كنت متشوق لرؤيته ومعرفته عن قرب.

أبوفتحية

معتصم
حنفتقدك الخميس الجاي انت والعائلة وبالاخص الجميل مرهف لكن ما تخاف"حنشتغل مسرح زي العجب ونرسل ليك الشريط "للتصحيح"
دمتي صديقي بخير

معتصم
اظهر وبان عليك الأمان
دي حاجة صغيرة كدة من





دا طبعاً بعد اذنك يا ابراهيم وكله من فضلك والله يخليك لينا ويخلي ليك عمر ونسمة.

وعقبال كمان حاجة صغيرة كدة من دراما معتصم المرة الجاية

يا حلوين
ازيكم تركتم فينا اثر لن يروح
عشقنا مسامرتكم لنا صارت تاتينا في النوم
يــــــــــــــــــــاه عبأتم زاكرتي بالفرح
شباب شكرا على المرور
وامير هذا البوست لك ولكل اهل الخبر والدمام نحبكم
وستظل اليومين الجميلين ديل من احلى ايام غربتنا وممكن
يكونوا الحلوات الوحيدات
ام سهى كان نفسي اتونس معاك واعرفك اكتر واعرف زهير اكتر
موش القعده كانت جماعية لكن برضوا جسيت بحميميه قويه تجاه زهير
وتجاهك كاني بعرفكم من سنين التحايا ليكم جميعا
وتاكدوا تماما ما حتمر اجازة والا تلقونا فرتلب ناطين عندكم
امير فاروق سيد القهوه التحايا لمزاهر وللصغار
لكم الحب
معتصم سيد احمد والاسرة

يا شباب
كيف وين يا امير
عاوزين نعرف اخباركم يا شباب
ام سهى وين انت واخبار زهير بالمناسبه
انا لا شلتا تلفوناتكم ولا ايميلاتكم انا ايميلي موجود
في البروفايل رسلو لي ايملاتكم