Post: #1
Title: Curriculum vita سيرتي الذاتية... العطره!!
Author: معاذ حسن
Date: 12-21-2006, 11:01 AM
س
الاسم : معاذ حسن.
الجنسية : سوداني.
الحالة الاجتماعية:أعنس.
الحالة النفسية: أحمق.
الحالة المادية:فلس طيني.
الحالة العاطفية: بكّاي.
المؤهل العلمي: بكالريوس .
المهنة: مثقف,شاعر.
اللون السياسي: ليبرالي,راديكالي.
الحزب: كاديما.
برنامج تلفزيوني: وجه النهار.
المذيع المفضل:أسامة الخليفة,محي الدين جبريل.
المذيعة المفضلة: الأستاذة:سارة فضل الله.المذيعة:تباريح الهوى بقناة النيل الأزرق.
الهوايات: النوم,مشاهدة الأفلام الأمريكية.المغالطة.
الممثل: توم هانكس,الترابي, ليوناردو دي كابريو.
الممثلة:جوليا روبرتس,تماضر شيخ الدين, نورهان.
المطربة: غادة حسن(نجوم الغد) نانسي عجرم ,نانسي عجاج,أم كلثوم الله يرحمها,سيلون ديون.
المطرب: حسين شندك, حوته,ود السافل.
السياسي المفضل:مجذوب الخليفة,عمر البشير.سلوبودان ميلوسوفيتش.
الكاتب الصحفي:الطيب مصطفى.الفاتح جبرا,هشام شيخ الدين.
الكاتبة الصحفية: تماضر شيخ الدين جبريل الله يحفظها.
الخبرات: العمل في طاحونة لمدة شهر.
العمل في تجارة العملة لمدة سنة.
العمل في مركز اتصالات هاتفية.
العمل في محل لبيع الملابس النسائية.
اللغات: عربي سوداني,انجليزي, عربي مصري, عربي لبناني, عربي سعودي,عربي كيرلا.
إقامة قابلة للتحويل.ورخصة قيادة.
حسن المظهر وأجيد التعامل مع الجمهور.
|
Post: #2
Title: Re: Curriculum vita سيرتي الذاتية... العطره!!
Author: معاذ حسن
Date: 12-21-2006, 11:10 AM
Parent: #1
معلومات اضافية عن شخصي الضعيف.
1- الخبث والمكر.
رغم إنني أبدو للناظر لي من الوهلة الأولى إني شخص بريء وساذج إلا إن الحقيقة غير ذلك تماما فاعرف عن نفسي أنني شخص ينطوي على مكر وخبث شديدين ,وقد عرفت هذه الصفة عن نفسي من واقع مراقبتي لسلوكي خلال الثلاثين عاما الماضية.
ولدى في الخبث والمكر طرائق شتى إكتسبتها بالفطرة وطورتها بالممارسة واحدة من هذه الطرق الخبيثة هي محاولاتي معرفة ما تنطوى عليه نفس الشخص الذي يجلس معي وشعوره الحقيقي تجاهي وسأهدي إليك هذه الطريقة المجربة وسوف تبهرك النتيجة.
إذا كنت تجلس مع صديق أو حبيب أو حتى شخص تقابله لأول مرة وأردت أن تعرف شعوره الحقيقي نحوك أو شعوره عن حول رأيك في الموضوع الذي تحدثتما فيه فاتبع الأتي :-افتح موضوع للحوار وبعد دقائق حاول تقفل الموضوع بعبارة من القفلات المعروفة كعبارة ( ياخي خليها على الله ) .
بعدها اختلق صمتا مصطنعا ثم أعقب ذلك بان تاخد راحتك كأنما تجلس وحدك وتدندن بأي أغنية تخطر على بالك لمدة دقيقة أو دقيقتين ثم اصطنع صمت آخر في 99,9% من الحالات ستجد إن الشخص الضحية قد بدا يدندن بأغنية تفضح شعوره تماما وتعريه أمامك فإذا كان سعيد بالجلوس والحديث معك فسيغني على شاكله:-
ما بنسى ليلة كنا تايهين في سمر بين الزهور...
واذا كان حزين لانصرافك عن الحديث معه ولمس بعض القسوة منك فسيغني على شاكلة :-
.......يا حبيبي جفيت لوصالي نفيت مالك......
وإذا كان مغيوظ منك او من ما قلته فسيغني على شاكلة
أتحداك وأتحدى غرورك ...
وإذا كان معجب بعينيك النجلاوين فسيغني على شاكلة
أمسكي عليك عيونك ديل .......دا ما قدر الله جانا عديل......
بقي ان اشير انه لنجاح هذه الطريقة يجي أن تتقن الدور وتكون طبيعي جدا ويحبذ أن تطبقها في وجود شخص أو شخصين بالأكثر.
واحدة أخرى من طرائقي في الخبث والمكر هي توجيه الونسة بمزاجي
عادة في يوم الخميس اذهب إلى جمعية أبناء منطقتي وهي عبارة عن شقة مكونة من مجموعة غرف نتجمع فيها لنتسامر ونتناقل الشمارات فتجد الشباب متجميعن في شلليات في هذه الغرف فادخل إلى إحداها وبعد السلام والمجاملات اختار للمجموعة موضوع من مواضيعي المفضلة وهي في العادة مواضيع فارغة مثلا موضوع العرس والجكس فاختلق مدخلا قويا لجذب الانتباه فاختلق قصة كأن أقول:- ( واحد صاحبنا جاء من السودان أمبارح حكى لينا قصة غريبة جدا..قال السودان بقي فيهو بنات حلوات لمان غلط وقاليك اللبس كيف والأناقة كيف ..بعد شوية تلقى ليك أي واحد في الشباب عايز يعمل مداخلة ويحكي ليك قصة سمعها بعد كدا أقعد بمزاج مستمتع,, شويتين اعمل فيها جاتني مكالمة واطلع من الغرفة امشي الغرفة التانية وافتح موضوع جديد مثلا أقول (واحد الليلة كتب في الجريدة كلام خطر جدا قال ...وقال ) واديليك المقال كوزين تلاتة من عندي وبعد شوية الجماعة يستلمو الموضوع وأقعد أتفرج ,, شويتين اعمل فيها ماشي اشرب موية امشي الغرفة التالتة والرابعة وبعد كدا اعمل مراجعة لو لقيت الموضوع برد شوية في واحدة من الغرف احررو وإلا أغيروا بمزاجي واخلي ليك الجماعة يردحوا...و قمة المتعة عندي لما اشبك ليك الجمعية كلها في مواضيع بمزاجي .
اللهم اغفر لي فلا يحيق المكر السيئ إلا بأهله.
|
Post: #3
Title: Re: Curriculum vita سيرتي الذاتية... العطره!!
Author: Eng. Mohammed al sayed
Date: 12-21-2006, 02:15 PM
Parent: #1
علم
وجاري التنفيذ في الشلة بالشرقية
حول
.......................................................................................
همهمة:-
برنامج الخميس نبداهو كده ولا بلاش
|
Post: #4
Title: Re: Curriculum vita سيرتي الذاتية... العطره!!
Author: معاذ حسن
Date: 12-21-2006, 03:36 PM
Parent: #3
Quote: علم
وجاري التنفيذ في الشلة بالشرقية
حول
.......................................................................................
همهمة:-
برنامج الخميس نبداهو كده ولا بلاش |
الباشمهندس ...
جرب الطريقتين وعلى مسئوليتي..
وأضمن لك خيمسا خبيثا ماكرا.
خاصة وان الحقل المتاح لديك(الشرقية)
شبيه بالحقل الذي اجريت عليه التجارب.
|
Post: #5
Title: Re: Curriculum vita سيرتي الذاتية... العطره!!
Author: Adel Sameer Tawfiq
Date: 12-21-2006, 09:32 PM
Parent: #1
مبالغة معاذ !!
حيطلبوك في المحكمة الجنائية الدولية قريبآ !!
|
Post: #6
Title: Re: Curriculum vita سيرتي الذاتية... العطره!!
Author: Ali Alhalawi
Date: 12-23-2006, 11:40 AM
Parent: #5
معاذ
الوهم ..
الأعنس ..
الأحمق ..
الفلس طيني ..
البكّاي ..
البكلاريوس ..
المثقف ..
الشاعر ..
الراديكالى ..
الليبرالى ..
الكاديما ..
بتاع العملة
بتاع الأتصالات
بتاع النساء
و فوق كل ذلك
الخبيث ..
الماكر ..
و ماخفى كان أعظم
(!_!)
Quote: اللغات: عربي سوداني,انجليزي, عربي مصري, عربي لبناني, عربي سعودي,عربي كيرلا
|
فاجأنى ابنى حين قال انه يتكلم سبعة لغات ..
سورى
مصرى
سودانى
عمانى
اماراتى
انجليزى
فرنسى
الآن أدركت أنه كان على حق
|
Post: #9
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 10:04 AM
Parent: #6
Quote: فاجأنى ابنى حين قال انه يتكلم سبعة لغات ..
|
الصديق العزيز الحلاوي
ربنا يخلي الحلاوي الصغير ويحفظه.
طالع لابوه.
|
Post: #8
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 10:01 AM
Parent: #5
مولانا العزيز
تحية وسلاما
|
Post: #7
Title: Re: Curriculum vita سيرتي الذاتية... العطره!!
Author: محمد عبدالله هارون
Date: 12-23-2006, 07:49 PM
Parent: #1
معاذ / الوجيه الظريف
عليك الله دي سيرة زول داير يعرس من بنات (بمبة)
|
Post: #10
Title: Re: Curriculum vita سيرتي الذاتية... العطره!!
Author: ابو جهينة
Date: 12-24-2006, 10:14 AM
Parent: #7
معاذ
سلام
سيرتك و الله عطرة طب
و لكن دي :
| Quote: المذيع المفضل:أسامة الخليفة,محي الدين جبريل. |
كيْتَن في ود الباوقة
|
Post: #15
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 05:00 PM
Parent: #10
Quote: لكن دي :
Quote: المذيع المفضل:أسامة الخليفة,محي الدين جبريل.
كيْتَن في ود الباوقة |
الاديب ابا جهينة
دي بالذات كيتا في غريبة.
|
Post: #14
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 04:58 PM
Parent: #7
| Quote: عليك الله دي سيرة زول داير يعرس من بنات (بمبة) |
محمد عبد الله هارون..سلام
دي السيرة الذاتية (المهببة) لواحد ماخد بمبة.
|
Post: #11
Title: Re: Curriculum vita سيرتي الذاتية... العطره!!
Author: عاصم ابوبكر حامد
Date: 12-24-2006, 10:32 AM
Parent: #1
اخوى معاذ كيفك
والله انتتحير يا زول مالك الخاصل شنو ....
اسمعنى سيرتك الذاتية ذى الطين عارف ليه
لمن تجاوب بوريك ....
تسلم يا مان
|
Post: #12
Title: Re: Curriculum vita سيرتي الذاتية... العطره!!
Author: Noon3
Date: 12-24-2006, 11:58 AM
Parent: #11
معاذ ازيك ،،،
عندي بت خالتي قالت حتشترك في سودانيزاونلاين عشانك ... يعني محتاجين (As a reference)، بما انك خبير في اللغات ومستشار, كل يوم نحنا في معاذ كتب شنو؟؟ شخصية العام. كل سنة وانت طيب.
|
Post: #17
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 05:06 PM
Parent: #12
| Quote: عندي بت خالتي قالت حتشترك في سودانيزاونلاين عشانك |
noon3
سلام وتحياتي لبنت اختك.
نصيحة خليها تبعد من بوستاتي قدر ما تقدر.
لانو مرات كدا بتحصل شوية لخبطة.
هسي عندي بوست الطريفي دا الله يفكني منو بس.
|
Post: #16
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 05:02 PM
Parent: #11
| Quote: اسمعنى سيرتك الذاتية ذى الطين عارف ليه |
الصديق عاصم ..ليه كدا هسي مولانا عادل عايز يوظفني وطلب مني السيرة الذاتية
أها قلت من باب الفائدة العامة انشرها في المنبر..احبطني ياخ.
|
Post: #13
Title: Re: Curriculum vita سيرتي الذاتية... العطره!!
Author: محمد أبوالعزائم أبوالريش
Date: 12-24-2006, 02:03 PM
Parent: #1
معاذ الوهم .. كيفك
والله ياخوي سيرتك دي عشان تكون عطرة إلاّ تكون كبيت فيها فتيل كلونيا كبير ...
Quote: واحدة أخرى من طرائقي في الخبث والمكر هي توجيه الونسة بمزاجي
عادة في يوم الخميس اذهب إلى جمعية أبناء منطقتي وهي عبارة عن شقة مكونة من مجموعة غرف نتجمع فيها لنتسامر ونتناقل الشمارات فتجد الشباب متجميعن في شلليات في هذه الغرف فادخل إلى إحداها وبعد السلام والمجاملات اختار للمجموعة موضوع من مواضيعي المفضلة وهي في العادة مواضيع فارغة مثلا موضوع العرس والجكس فاختلق مدخلا قويا لجذب الانتباه فاختلق قصة كأن أقول:- ( واحد صاحبنا جاء من السودان أمبارح حكى لينا قصة غريبة جدا..قال السودان بقي فيهو بنات حلوات لمان غلط وقاليك اللبس كيف والأناقة كيف ..بعد شوية تلقى ليك أي واحد في الشباب عايز يعمل مداخلة ويحكي ليك قصة سمعها بعد كدا أقعد بمزاج مستمتع,, شويتين اعمل فيها جاتني مكالمة واطلع من الغرفة امشي الغرفة التانية وافتح موضوع جديد مثلا أقول (واحد الليلة كتب في الجريدة كلام خطر جدا قال ...وقال ) واديليك المقال كوزين تلاتة من عندي وبعد شوية الجماعة يستلمو الموضوع وأقعد أتفرج ,, شويتين اعمل فيها ماشي اشرب موية امشي الغرفة التالتة والرابعة وبعد كدا اعمل مراجعة لو لقيت الموضوع برد شوية في واحدة من الغرف احررو وإلا أغيروا بمزاجي واخلي ليك الجماعة يردحوا...و قمة المتعة عندي لما اشبك ليك الجمعية كلها في مواضيع بمزاجي .
اللهم اغفر لي فلا يحيق المكر السيئ إلا بأهله. |
طبعاً يا وهم دي الطريقة المتبعا معانا هنا في البورد .... تشبكنا بي سيرة قاطعا من راسك ..... وتمشي لي واحد من المواضيع التانية البشبهو الموضوع ده .... وبعدين تجي راجع عشان "تسخن" الموضوع وترفعو أعلى البورد.
نقشتك والا لأ 
|
Post: #18
Title: Re: Curriculum vita سيرتي الذاتية... العطره!!
Author: معاذ حسن
Date: 12-24-2006, 05:09 PM
Parent: #13
Quote: طبعاً يا وهم دي الطريقة المتبعا معانا هنا في البورد .... تشبكنا بي سيرة قاطعا من راسك ..... وبعدين تجي راجع عشان "تسخن" الموضوع وترفعو أعلى البورد.
نقشتك والا لأ |
وألا لأ..
يا عزايم الطريقة دي في البورد ما بتنفع خالص.
بس في المجالس والله مجدية ومجربة وعلى مسئوليتي.
بالمرة جرب الطريقة الاولى واديني نتيجة الاختبار.
|
|