أحمد عوض (عجوز) عطر سمواتنا بالإبداع وأعادنا للزمن الجميل

في ليلة هي الأحلى والأجمل في خلال السنوات الأخيرة كانت ليلة الحقيبة والغناء الجميل
المكان : بيت الفنون ،، بيت طارق الأمين المبدع في كل المجالات
الزمان : الأربعاء الماضي 15 ديسمبر
الحضور : ثلة من المبدعين ومتذوقو فن الحقيبة وعدد قليل من الجدعان ( مبارك جادين
عمار رحمة الله وصالح تبلدينا وشخصي )
جاءتنا الدعوة عبر الرسائل من العزيز الرقيق محمد صديق رغم أنه لم يتمكن من الحضور لظروف خاصة .
أطل علينا المبدع أحمد عوض بطلعته البهية وإذا بي أعود للوراء أكثر من 20 عاماً
وتذكرت عندما رأيته أول مرة في إحدي حفلات التخريج في الزقازيق الحبيبة ،
وكيف كانت المفاجأة للكل عندما أطلق من حنجرته ذلك الصوت الجميل عندما تغنى بإحدى أغنيات الكاشف
ومن يومها صار أحمد عوض مطلوب في معظم حفلات الزقازيق والمدن الأخرى
نعود لبيت الفنون الذى إستقبل المبدع أحمد عوض بصحبة عازف العود المتمكن عوض أحمودي
وإثنين من عازفي الإيقاع المتفوقين .
غنى أحمد عوض كما لم يغنى من قبل ،، وتصاعد أبداعه في كل أغنية غناها
تمايل كل الحضور طرباً وإنتشى كل من داعبت أذناه الألحان والكلمات الجميلة
كلمات عبدالرحمن الريح وأبوصلاح وغيرهم وألحان منسجمة أضاف إليها مبدعنا تطريباً وبعداً خاصاً ،
وتوجها بالإبداع العازف العملاق عوض أحمودي
كل أغنية كانت قصة إبداع بذاتها ،، ولكن عندما صدح بأغنية حليل زمن الصبا ،، كان كل من بالمسرح يردد معه
كأنما عاد بهم إلى زمن صباهم ، أما أنا فعدت إلى زمن الصبا الجميل
عدت إلى الزقازيق والزمن الجميل وتخيلت نفسي في أحد المسارح التي كنا نرتادها
وتذكرت كم كان ذلك الزمن جميلاً وكم كانت الزقازيق مسكونة بالإبداع
في نهاية الحفل إتفق الجميع على أن تكون ليلة الأربعاء هي ليلة الحقيبة
ووافق المبدع الخلوق أحمد عوض على إحياء الليلة إسبوعياً مالم يحدث تعارض مع ظروفه
فعرفنا كم نحن محظوظون ...

بختكم يا عمر
حاسدنكم عديييل
التسجيل وينو ..الصور وينا
حليل زمن الصبا

يا بسكو زي ما قال ليك منص ... وين الصور والتسجيل ... ياخي دي ما حاجة يحكوها ساكت ... ما شحتف الناس ... المرة الجاية لازم تعمل حسابك ...

الاخبار شنو ..؟؟؟

منصور زهير سلامات ومشتاقين
والله فاتت علينا حكاية الصور دي
لكن في تسجيل إتعمل وحنحاول نتحصل عليه
وسنمدكم بالصور للحفلات القادمة إنشاء الله
والله فقدناكم وكنت أتمنى أن يكون اليوم للزقازيقيين دون غيرهم ..
ونرجو أن يكون العدد أكبر في الجلسة القادمة .

الله الله يا بيسكو

اولآ والله مشتاقين يا أخي .

وبعدين يا أخي أحمد عوض ده حكاية برااااها , وكمان العازف أحمودي !!!

طيب وين قنواتنا الفضائية من هذا الحدث ؟

بالله عليك يا بيسكو المرة الجاية كلموا ناس النيل الأزرق ديل خليهم يستمتعوا

ويمتعوا هذا الشعب بإستضافة لهذا الانسان المسكون بالفن والتطريب

( طالما هو إقتنع ورجع يغني ) ,,,

والتحية عبرك لأحمد عوض وكل الجدعان

لك التحية أخي عثمان الخير
وينك يا راجل
حقيقي المبدع أحمدعوض يستحق أن ينال حظه من الإعلام المرئي والمسموع
وأتوقع أن يحدث ذلك قريباً لأنه وبدون مجاملة ليس له مثيل حالياً
وهذه الشهادة منحت له بإجماع كل الحضور.
وقد كان بين الحضور من هم في الإعلام ومنهم من له إهتمام بالحقيبة ومبدعيها
عموماًسيصدح أخونا أحمد عوض مرات ومرات ببيت الفنون ، وأقرب هذه المرات الأربعاء القادم
نتوقع أن يكون اليوم القادم أكثر حضوراً وأكثر تغطية من الإعلام بكل أنواعه
فما زال وطننا مترعاً بالمبدعين ورعاته رغم المعاناة المفرطة

عاد يا بسكو ما اتلومتو واللوم شديد على سعادتو ويا حليل ود الزناتى الكان مكرهنا بالرسائل عن اخبار الشباب والله اخر رسالة وصلتنى عن اى عضو من الرابطة كانت فى رمضان الفات للفطور الجماعى ومن ابوشنب سافر الواحد ما عارف اخبار الناس او يوم زى دا كان الواحد اقلهو يشيل كاميرا ويجى يوثق لعودة الفن الاصيل فى النهاية كان نشرنا الوضوع عشان يجب حضور اكثر برضوا بقول يا حليل ابوشنب

أخي العزيز مجتبى فاروق والله مشتاقين
وينك ياراجل ..
حقيقي يامجتبى التبليغ كان ضعيف
ولكن بسبب غياب أرقام تليفونات الزملاء وعدم توفرها لدى الشخص المبلغ (كوتش محمد صديق)
والأرقام كلها طرف الأخ عابدين المبتعد هذه الأيام
ولكن نتمنى أن يحصل نوع من النشر بواسطة الأعضاء لبعضهم حسب مايتيسر للواحد
والبرنامج حيكون كل أربعاء إذا لم يحدث ظرف للمبدع أحمد عوض
اليوم نحن على موعد مع الإبداع مرة أخرى ونتمنى أن يكون حضورنا أكثر ومشاركتنا أكبر
وذلك لأنها تشكل دعماً وحافزاً معنوياً ضخماًً لعزيزنا أحمد عوض

بسكو يا جميل ، أحمد عوض وعوض احمودى = حنجرة ذهبية وأنامل رقيقة = روعة لى السقف

ياخوى أحمد عوض عاد نهائى للسودان ولا دى إجازة

انا بفتكر أحمد عوض اتخذ القرار الصح ...
وبرجوعو السودان ...
سوف يأخذ وضعه الحقيقي في خارطة الفن ... سريعا
لما يملك من مواهب لا تخطئها الآذان ...
وهناك امثله كثيرة لفنانين دفنتهم الغربه ...
وبرجوعهم استعادو رونق نشاطهم الفني ...
وهم اقل فنا وموهبه من احمد عوض بكثير ...
شويه دعم منكم ياشباب ... ووضعه في الطريق السليم ...
وسوف ينطلق العجوز ... في سماء الفن بسهولة ...



تسلم يا بسكو ... على مدنا بالاخبار الحلوه دي ..
وستجدونا متابعن ...
بس البوست ماحتاج صور وبس ...
عاوزين كمان ... صوت ...

شكرا الأخ عمر بسكو لإلقاء الضوء على إبداع أخونا أحمد عوض لك وله عاطر التحابا

في برنامج نجوم الغد غنت فنانة واعدة للكاشف
أطربت لجنة تحكيم أعتقد أنها من عهد الكاشف ، عندما قارنت بينها
وحبيبنا أحمد عوض هناك فرق شاسع وأعتقد جازم بأن المبدع
أحمد عوض لو ما أحسن من الكاشف ما أقلّ منه وهذه حالة تشبه
دور الشاعر ابي تمام عندما يأخذ بيوت الشعر من شعراء زمانه
يحسنها ويبدع فيها ويخرجها بصورة أجمل وأجيد.

احمد عوض فنان خطير وصوتو جميل ما عندنا فيهو كلام يا بسكو




بس عاوز ليهو شوية نيو لووووك ..... وش غامز

عاد يا عبد الدائم اخوى كان تقول (نيوك باروكة )
وبالنسبة لعودة احمد حسب ما ارعف هى عودةنهائية او هكذا اعترف (عجوز)

سلامات يا ناس

Quote: جاءتنا الدعوة عبر الرسائل من العزيز الرقيق محمد صديق رغم أنه لم يتمكن من الحضور لظروف خاصة

انا يا عمر ما قدرت اجى ..وما قدرت اكلم ناس كتار

متحسر لعدم حضورى

واعتذر للذين لم ادعهم.

عدنا مرة أخرى بعد طول غياب للإبداع
وكان هذه المرة مختلفاً، حيث حلت الأوركسترا مكان العود
وكان الأبداع بأبعاد مختلفة ،، وزاد ألقاً بحضور الرائعين
الريس معتصم ، مبارك جادين ، شريف عباس ، وبعض من أقارب مبارك
إليكم صورة وبعض الفيديوهات :

بعد الحفلة قاعدين تخلطوووو ولا بيجى معاكم الحرس








لنك الحفظ : اضغط بزر الماوس الايمن واختار Save Target As ثم اختار Save


http://www.sudanvoice.net/v2/nnnnnnnnnnnnnnnnnnn9.mp3