ذكرياتى مع ود الماذون ...اوراق لم تنشر عن بكرى الشين

ذكرياتى مع ود الماذون ...اوراق لم تنشر عن بكرى الشين


12-20-2009, 01:51 PM


  » http://sudaneseonline.com/cgi-bin/sdb/2bb.cgi?seq=msg&board=299&msg=1261313518&rn=15


Post: #1
Title: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-20-2009, 01:51 PM
Parent: #0

نعود مرة اخرى وهذه المرة هجوما مباشرا بعد ان افرغ بكرى الشين الشهير حاليا بابوبكر حامد الامين كل اسلحته الهجومية بمعاونة من (الوسخان) زهير الزناتى
هى ذكرياتى مع اشهر والز (ود ماذون ) فى تاريخ الحركة الطلابية فى مصر وربما فى تاريخ الحركة الطلابية السوداينة الرجل الذى حل على مصر (ختميا ) وبات الان (اوباميا) مرورا بلحظات فى الاراضى المقدسة وثم الاراضى (العكرة) امريكا واخيرا الان فى البحرين
الاسم ابوبكر حامد الامين من (ولاد) ود مدنى حى بانت الشهير جدا
ينتمى الى اسرة ضاربة جذورها فى مدنى ومن اى مكان فى المدينة تسال عن ود الماذون او شقيقه الاكبر ( كوراة) ستجد من يدلك بداية من اراضى اخونا زكى صديق مساعد فى دردق
جاء الرجل الى الزقازيق فى منحة ( من سيدى الميرغنى ) وهناك استمر سنوات فى السنة الاولى قبل ان يتحول بمعجزة الى السنة الثانية فى كلية الحقوق
لمن احنا جينا كان ثالثة (رباع ) وكتير خير احمد عمر الباقر (ووليد حقوق ) الماقصرو معاهو
هى قصص سنسردها فى الايام القادمة
القصة الاولى / شيك وزوغة بعد زنقة
القصة الثانية / زيارة فى الانتفاضة
القصة الثالثة / (بخاف) من اداء وليد حقوق
القصة الرابعة / جنائى رابعة ( على الهواء)
وقصص اخرى سنوردها فى حينها
هام جدا جدا
تقبل المساهمات خصوصا من ( هلا)

Post: #2
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-20-2009, 02:27 PM
Parent: #1

Quote: تقبل المساهمات خصوصا من ( هلا)


تعرف يا مجتبى لى حوالى نصف ساعة بحاول اكتب عن هلا أيوب ، كلما كتبت عبارة وجدتها تتقاصر عن وصفها ، فأمسحها وأكتب أخرى وهكذا ، هلا أيوب أكبر من كل الكلمات والكتابة عنها تحتاج لميقات زمانى يدثرك برداء الروعة وإزار الصدق ............. لها عميق مودتى وتقديرى.

Post: #3
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-20-2009, 05:58 PM
Parent: #2

يبقى اللعب ودى مع روعة الذكريات

Post: #4
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-20-2009, 07:36 PM
Parent: #3

Quote: يبقى اللعب ودى مع روعة الذكريات


فى حضرة شقيقة الروح هلا أيوب لا مناص من اجترار حلو الذكريات ، ماعدا ذلك أكره المباريات الودية والمعادة

Post: #5
Title: Re: ذكرياتى مع ود الماذون ...اوراق لم تنشر عن بكرى الشين
Author: عفاف علي ميرغني
Date: 12-20-2009, 11:06 PM
Parent: #4

يا اسرة الخرطوم

يا روعة في سنتر مدني

تحييات حلوات

Post: #6
Title: Re: ذكرياتى مع ود الماذون ...اوراق لم تنشر عن بكرى الشين
Author: عبد الدائم سيد أحمد
Date: 12-21-2009, 09:10 AM
Parent: #5

ازيك يا برلوم وكيف احوالك ومشتاقين
ومعليش لعدم تمكنى من وداعك

وبكور ده بالله اديهو بالتقيل
قابلت هلا ايوب منذ فترة فى صيدلية ابوعلى
اول كلمة قالتها بعد السلام مالكم يا جماعة كبرتو كده
لسه ما زالت فى خفها دمها ،،،،، وصارت رشيقة جدا" جدا"


خالص الود

Post: #7
Title: Re: ذكرياتى مع ود الماذون ...اوراق لم تنشر عن بكرى الشين
Author: عصام دهب
Date: 12-21-2009, 09:14 AM
Parent: #5

يا سلام ياخي ..

يا جماعة القصة دي ناقصة أحمد عمر و وليد مبارك و كمان مصطفى نقد الله ..

مصطفى يا مصطفى .. أنا بحبك يا مصطفى و الله يرحمك ويوسدك الباردة يا مصطفى ..

قريت يا بكور قصة السمك مع المرحوم مصطفى .. و الله كأنها كانت أمس لما بكيت يا مصطفى ..

يا عروة تذكر مصطفى في شارع القومية بينادي في أحمد عمر باللهجة المصرية .. الله يرحمك يا مصطفى ..

و يا مجتبى لما جيناك في المستشفى في القاهرة كنا أنا و سمؤل أبو سن و محمد خير قاعدين في الكنبة الورا في الباص و بنغني ( غني هللي يا حواري شدي ساعدك لي جواري .. شعب صامد في طريقو ما بهاب قانون طوارئ بريدو .. سوداني الجوة وجداني بريدو ) ..
و بعدين اليوم داك ما عرفنا نقطع الظلط تصدق .. فلاحين مساكين فأجأتهم مصر ..
أنتا يا مرتضى البردلوبة بتاعتك بتاعت البرد ديك لسة في ؟؟
و يا أشقائي بكور و يا مجتبى ..
لسة الباقي كتير .. الله يديكم العافية ..

Post: #8
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-21-2009, 09:30 AM
Parent: #7

Quote: و كمان مصطفى نقد الله ..

مصطفى يا مصطفى .. أنا بحبك يا مصطفى و الله يرحمك ويوسدك الباردة يا مصطفى ..


تعرف يا عصام تراودنى فكرة الكتابة عن مصطفى نقد الله فى بوست نجوع الملح ، وكلما جلست للكمبيوتر تتملكنى رعشة وحالة أشبه بالإعياء فأغلق الكمبيوتر على الفور ، مصطفى صاحب حضور مدهش بغنائه (هوى ياجاهلة وطيبك عبق) وبضحكته المجلجلة وبمشاغباته ، لديه طريقة مميزة فى إمالة رأسه وتحريك عينيه حين يطلب منى مرافقته فى مشوار يعلم سلفاً رفضى للفكرة ، لكنك حينها لو طلب منك اقتلاع مقلتيك لما ترددت فى إجابة طلبه ، إنه حقاً وكما قال حميد فى عم عبدالرحيم (كمّين بشر) ، له الرحمة والمغفرة ولنا الصبر وحسن العزاء فسيرتك يامصطفى أغزر من الكل الدموع وأرفع من كان وأمسى وأضحى وكل المفردات المنمطة.

Post: #9
Title: Re: ذكرياتى مع ود الماذون ...اوراق لم تنشر عن بكرى الشين
Author: عصام دهب
Date: 12-21-2009, 09:41 AM
Parent: #8

Quote: مصطفى صاحب حضور مدهش بغنائه (هوى ياجاهلة وطيبك عبق)


بل كان يا بكور حينما يغنيها يغمض عينيه و يرحل إلى ( عوالم زي رؤى الأطفال حوالم ) ..
ما سمعت هذه الأغنية إلا تذكرت مصطفى و ترحمت عليه .. وتذكرت أحمد عوض عجوز يغنيها و مصطفى يتقطع و يذوب طرباً .. الله يرحمك يا مصطفى ..

Post: #10
Title: Re: ذكرياتى مع ود الماذون ...اوراق لم تنشر عن بكرى الشين
Author: طارق جبريل
Date: 12-21-2009, 09:56 AM
Parent: #9

ناس حقوق فرزوا عيشتهم

Post: #11
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-21-2009, 10:17 AM
Parent: #10

شنو شغل الثايردباكات دا يا كابتن احنا اصلا ما بنفرز عيشتنا عليك الله فى الزقازيق كلها لقيت ليك طلبة كلية مشرورين من المساكن للمطبعة احنا ما بنفرز عيشتنا احنا (حايميين طوالى) ومرحب حباب ثيربدباك بيطرة وعلى فكرة وين ناصر بليلة

Post: #12
Title: Re: ذكرياتى مع ود الماذون ...اوراق لم تنشر عن بكرى الشين
Author: منصور عبد الرازق
Date: 12-21-2009, 12:21 PM
Parent: #11

اها يا طارق
قول كده , آمن وصدق
انهم قاموا كده وفرزوا عيشتهم
النحل بخليهم
ادخل وافتح التلاجة يا ولد
قال فرزوا عيشتهم قال

Post: #13
Title: Re: ذكرياتى مع ود الماذون ...اوراق لم تنشر عن بكرى الشين
Author: البادي النور
Date: 12-21-2009, 12:36 PM
Parent: #12

رحم الله أخونا مصطفى ... فقد كان إنسان مميز جدا ...
يا مجتبى خش في الموضوع الفرن سخن ...
والدنيا برد شديد وعايزين الدفئ في حكاويك البكورية ...

Post: #14
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-21-2009, 10:13 PM
Parent: #13

Quote: ناس حقوق فرزوا عيشتهم


جبريلا الجميل .... ناس حقوق زى عيال سيد أحمد وزى عيال جبرين . كلنا أنجبتنا الزقازيق وكلنا بطان مرا واحدة ، هسّى عليك دينك إنت وناصر وجورج وحاتم جبارة وكشرى وكل الناس الحلوين البى هنا ‘ إفصلوكم من بعض كيفن؟ تعرف ياجبريلا كونك تجرى عملية فصل لتوائم سياميين أسهل مليون مرة من تفصل إتنين من الزقازيق لأنو الإلتصاق روحى ، والروح أمرها عند ربك ... وما أوتينا من العلم إلاّ قليلاً.

ياخى راجى ترجمتك بى فارغ الصبر للنص الأمازيقى الكتبتوا داك ، فعجّل بالنصر وبالفرج.

Quote: يا مجتبى خش في الموضوع الفرن سخن ...
والدنيا برد شديد وعايزين الدفئ في حكاويك البكورية ...

قلتَ لى بازهير هو مالو ؟ هههه إجازى محنك يازناتى ، مابقدر أكتب هنا الكلام القلتوا لى فى التلفون

Post: #15
Title: Re: ذكرياتى مع ود الماذون ...اوراق لم تنشر عن بكرى الشين
Author: طارق جبريل
Date: 12-21-2009, 10:20 PM
Parent: #14

ناس حقوق كيفنكم
تصدق يا مجتبى هسي وانا بكتب في المداخلة دي
ناصر قاعد مع احمد عمر في قهوة في الرباط
وضربوا لي وبيغيظوا فيني
شفت الحقارة دي كيف

ناصر استقر في المغرب
وهسي بجهز عشان يجيب العيال

Post: #16
Title: Re: ذكرياتى مع ود الماذون ...اوراق لم تنشر عن بكرى الشين
Author: مبارك جادين
Date: 12-29-2009, 03:15 PM

البوست ده لازم ادخله رجالة حسنة ولاسباب عدة اجملها في النقاط التالية (انجلاخة يا ود الماذون :زمان كان عندي لازمة لمن اتكلم والنقاش يصبح مسخن ان اقول انا بحب اثبت نقطة في الحتة دي الفاتح احمد الطيب الله يطراهو بالخير قال مبارك دة تقول نجار كل مرة يثبت نقطة يثبت نقطة .قلت ليك دي انجلاخة زي بتاعت بشير خفة ديك والذي جاءت سيرتو في القعدة بتاعت عصير القصب اياها )
النقطة الاولى ان المذكور في هذا البوست ود لوتري (على وزن ود حجتي : يعني جانا اللوتري سوا لكن هو كان واسطتو قوية وانا تأمروا علي اولاد العم سام ولم اواصل واكتفيت بحب افلام هوليود وتشجيع اوباما واوبرا وينفري)
النقطة التانية ان الذي ياتي على ذكرهم السيد الصحفي النحرير مجتبى فاروق هم من اعزاء من عرفت على نفسي وليد حقوق ومصطفى نقداللة رحمه الله وطارق جبريل والود ناصر كشري والود ناصر جبريل و سيد الحوش عصام دهب .
النقطة الاخيرة وهي ان هؤلاء الناس افتقودني دائما من ناس وليد وابوبكر حتى الود السمؤال حسان فلهم التحايا والتبريكات في هذه الايام المفترجة .
لزلك تجدني قد دخلت هذا البوست تووشك
فلهم التحايا جميعا
ومن الان انا في صف ود المأذون عليه السلام ولا نامت اعين الجبناء ومن سلك دربهم

Post: #17
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-29-2009, 03:34 PM
Parent: #16

بركة يا حاج
انا كنت قايلك دفعة (بشير على العبيد) طلعت صغنتوتى وما يهم تضامن (الكوامر) سنواصل المعركة حتى النهاية

طيب يا بركة
انت ركزت على ود الماذون
اديك واحدة من حكايت (ود الماذون )
القصة يا اخوانا فى مدنى الجميلة
اخونا كوارة الشقيق الاكبر لبكرى كان ماذون منطقة بانت بالخلافة عن الراحل والدو عليه رحمة الله
المهم فى موسم الاعياد الامور بتكون مولعة نار اى زول داير يعرس وطبعا كوارة ما الرجل الخارق عشان يتواجد فى جميع العقودات فى نفس الوقت وكان مسالة الاستنساخ دى يعنى فيها قولان يعنى لحدى دولى وممكن لكن استنساخ كم ماذون من كوارة كانت صعبة (شرعا)
اخونا كوارة طوالى (عمل ) جمعية للشباب فى البيت بكرى وعثمان وعمر يا شباب الموضوع واضح ( قبلت زواج موكلتك فلانة على موكلى فلان ) والاسماء فى ورقة لحدى ما نجى نطلع الورق الرسمى من الدفتر
وانت بالذات – فى اشارة لبكرى – مفرض تنجز اكثر لانك زول قانون
المهم بكورة طبق شنطة كدا وخشة فى عباية وجدع العمة بى فهم
اتوجه لاقرب عقد والناس منتظرة ودخل الماذون ومع (هيبة ) العباية والعمة الملفوفة ما فى زول عرف انو الاخ (صبى ماذون) الا زى ما بقول حميد (شقى الحال يجى يفلع الواضة يجلى) صاحبنا اتعكش بواسطة (زقازيقى مدنباى ) قعد يكورك وبكرى بضرب فى الكعك دا اخو الماذون يا اخونا دا زول بهجة ساكت عندنا فى الزقازيق على اليمن عرسكم دا باطل يا اخونا دا ( المرة الوحيدة الخطب فيها فى الناس كانت فى ركن نقاش ) شوفو ليكم ماذون تانى عشان القصة تكون شريعة
صاحبك بكورة يا بركة طبعا سريع البديهه بكل شجاعة تم العقد ومشى ليك على الزقازيقى المزعج وبصرة مع ابتسامة مخفية قال ليهو ( يا زول قصر حسك بقسم ليك من حق العقد)
عليك الله يا بكورة الزقازيقى دا منو

Post: #18
Title: Re: ذكرياتى مع ود الماذون ...اوراق لم تنشر عن بكرى الشين
Author: زهير الزناتي
Date: 12-29-2009, 03:49 PM
Parent: #17

يا مجتبي قطع شك الزقازيقي ده زكي صديق ....

Post: #19
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-29-2009, 04:12 PM
Parent: #18

يا زيزو زكى صديق البيجبو من دردق لحدى بانت شنو زكى حدو السوق ونادى الفنانين

Post: #20
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-29-2009, 07:04 PM
Parent: #19

Quote: ومن الان انا في صف ود المأذون عليه السلام ولا نامت اعين الجبناء ومن سلك دربهم


حباب الزعيم ، والله بعد دعمك ده أنا أكاتل الريح ، يا سلام يا زعيم ويا حليل زمن الغنا السمح .... وغرِّد ياكنارى وحاكى العندليب ، حليل زمن إسكدنرية مع ود المصرية وجورج ، زمنّا الكنّا لاندرى .......... بما كان الزمن ضامر

Post: #21
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 12-29-2009, 07:31 PM
Parent: #20

Quote: يا مجتبي قطع شك الزقازيقي ده زكي صديق ....


يا خوى انت زهير ولا صلاح قوش ، فعلاً هو زكى ، مع اختلاف بعض التفاصيل التى تناولتها الصحافة الرياضية بشئ من التحوير ، الحصل إنى مشيت عقد فى بانت وأول مادخلت صيوان العقد كحلتَ ليك شلتى بتاعت الكوشتينة ، عشان أحافظ على ثباتى أديتم ضهرى ، العقد مر بى سلام ، المسا وصل من الخرطوم عماد صالح ود خالة وليد مبارك وهو حضر مخصوص مدعواً لهذا الزواج ، وأصر على لمرافقته لحفل الزواج ، حاولت التهرب لأنه لايستقيم أن تحضر الحفل الذى سبق لى مباشرة عقد قرانه ، أمام إلحاح عماد صالح ذهبت للحفل ووقفن بطرف الخيمة ، شلة الكتشينة أرادت الإنتقام لتطنيشى لهم ساعة العقد وفشلهم فى إرباكى فى ذلك الوقت ، أحاطوا بى من الخلف ودفعونى لساحة الرقص وتحلقوا حولى بشكل دائرى وهم يهتفون ( بى ماذونّا ... وبى ماذونّا ) ساد الهرج والضحك ساحة الحفل ، وشاهدت زكى صديق وكان من أهل العريس .

موقف آخر يا مجتبى حدث لى بجامع بانت حيث باشرت إجراءات عقد قران بعد صلاة المغرب ، شاهدتُ ناصر كشرى بين الحضور وكانت العروس بنت خالته ، وتعمدت عدم مبادلته النظرات ، بعد إنهاء مراسم العقد أتى للسلام على ، كان سلامى عليه جاداً إنسجاماً مع هالة القداسة التى تحيط بالمأذون ، أمسكت بيده فى طريق خروجى من المسجد ، وبعد الإطمئنان ان لا أحد سوانا ، سالمته بالأحضان ، فقال لى : ياولدنا فى الأول شكّيت إنّك ما عرفتنى ، فقلت له : يعنى يا كشرى عاوزنى أسلم عليك بى حرارة عشان تشبكنى فى نص المسجد يوهووووو يا بكور

Post: #22
Title: Re: ذكرياتى مع ود الماذون ...اوراق لم تنشر عن بكرى الشين
Author: عبد الحفيظ عباس
Date: 12-30-2009, 10:27 AM
Parent: #21

إلي ذلك الصحفي الرياضي سلام
تحياتي مجتبى
أنا حقيقة عامل حوامة على الكل
والرحمة لأخونا مصطفي وتصدق أنا بكتب ليك من داخل البص وأنا قادم من رحم المدينة
التي أنجبت ذلك الفارس فله الرحمة
والتحايا إلى هلا أيوب
وبكور وعروة ودهب وبرضو المشوار ده ممتد في العودة من الأبيض
عموما خلوها زيارة صغيرة
لنعاود بعد انتخابات المحاميين غدا .

Post: #23
Title: Re: ذكرياتى مع ود الماذون ...اوراق لم تنشر عن بكرى الشين
Author: منصور عبد الرازق
Date: 12-30-2009, 10:44 AM
Parent: #21

والله عجبتنى الحكاية بشكل
بى روايتها الأصلية المدققة من سيدها عجبتنى
وكمان مع زيادات التوم والشمار بتاعات مجتبى , واستخبارات زهير
عجبتنى زيادة
ما الذى يمنع ان تكون شخصية المأذون , هى شخصية بكرى الحقيقية
بلطافتها وجمالها وعنفوانها
الشخصية الضاجة بالحياة والجمال والبهجة
اليس الزواج امر بهجة اصلا
ما الذى يمنع ان يكون من يبهج الناس مبتهجا اصلا وموضوعا
فى تقديرى , ان شخصية المأذون المفترضة والتى اضطر بكور لتقمصها
ولم يفلح فى (لبس شخصيته الأصلية مرة اخرى )
الا خفاءا ومواربة
مرة مع ناصر كشرى اذ اختلى به جانبا معوضا اياه سلامه المسيخ الأول
بسلامه المعتاد الحار المليان بالحياة
ولكن خلسة ومن وراء حجاب
ومرة فى ساحة الرقص الرابة
بى مأذونا ما همانا
ما دام بكور معانا يا ناس الليلة ما جانا
شخصية المأذون المحورية التى تفترض كونه مكمل الجدية مع الوجه العبوس القمطرير
جاية يتخيل لى كمنتج ثانوى من تداعيات تصعيب الزواج المفترض ان يكون سهلا اصلا
عشان تعرس وتتزوج , ليس فى السودان فحسب بل فى الشرق عموما
لازم تركب وش مختلف , ومكنة مختلفة , وسيستم مختلف , ولبس مختلف , واكل مختلف
وما عارف شنو داك مختلف
تبقى زول جديد اصحابك الا يدققوا فى ملامحك عشان يعرفوك
وكان للعروس , اكثر واحدة بتكون حريصة على تصوير اليوم الطبيعته صناعية داك
عشان ترجع كل شوية وشويتين تقول شفتونى وانا عروس
اجنن وانا عروس
لذا , كان من الطبيعى ان تخرب شخصية بكور المعروفة عندنا رصة الزهور الصناعية المالية اليوم داك
واصبح بكرى منافسا اصيلا لشخصية شفيق يا راجل فى مسرحية عش المجانين
انا اركب دقن
وأؤؤل لأبوكى
هادى دقنى اهو
احبكم

Post: #24
Title: Re: ذكرياتى مع ود الماذون ...اوراق لم تنشر عن بكرى الشين
Author: عفاف علي ميرغني
Date: 12-30-2009, 01:37 PM
Parent: #23

Quote: ده زكي صديق ....





عازف الجيتار الماهر 000

اهدانا جمال الموسيقى في حفلات الزقازيق 000

وكورالات الجبهة الديقراطية 00

(واحمد الحق البيضوي )

ياريت نعرف اخباره؟؟؟؟

(وبى مأذونا ما همانا )

Post: #25
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 12-30-2009, 02:25 PM
Parent: #24

عفة كيف اخبارك
زكى مستقر فى مدنى ويمتهن الموسيقى وحاليا هو السكرتير العام لاتحاد الفانيني فى ولاية الجزيرة واستقر باسرته واطفاله فى الطريق الى مدنى خلال السنة الجديدة وسامر على زكى بان الله واشوف عامل شنو وازى لقيت عندو صورة الواحد بجيبها معاهو على فكرة عليك الله نزلى صورة حاج الركز الحالية عشان الجميع يقتنع بانو ما بقدر على الانفصال

Post: #26
Title: Re: ذكرياتى مع ود الماذون ...اوراق لم تنشر عن بكرى الشين
Author: مبارك جادين
Date: 01-02-2010, 05:37 PM
Parent: #25

والله يا مجتبى ربنا يجازي محنك
انت عندك حاجات تقطع من الضحك وانا لا ازال على موقفي بضرورة دعم
اخونا بكور
واؤيد منص في ان يكون الماذون بتاع بهجة وشبابي
حضرت عقد مرة في امبدة الماذون اول ما انتهى قام طوالي شاغل ليك
ابو العريس وانت يا حاج عرسك التات متين
ابو العريس قال ليهو عليك الله هظاراك البايخ دة خليهو تخرب لينا ساكت


انا ضحكت حتى تفقدني ناس البيت مدمني المسلسلات العربية

Post: #27
Title: Re: ذكرياتى مع ود الماذون ...اوراق لم تنشر عن بكرى الشين
Author: Hatim Gubara
Date: 01-02-2010, 07:53 PM
Parent: #26

البوست دا خطر..
يا بكور انا كان خشيت معاكم الفورمه بانجلخ..
وحكاوي روكسي ولكوظ بتنبهل..

Post: #28
Title: Re: ذكرياتى مع ود الماذون ...اوراق لم تنشر عن بكرى الشين
Author: ميسرة سيد أحمد
Date: 01-03-2010, 08:33 AM
Parent: #27

سلام يا مجتبى ،،، ذكرياتكم دي مختلفة

عن الناس كلها وحكاية المأذون دي حلوه

شديد يا بكري ،،،،

وبعدين ما عارف السبب شنو مسألة بكري الشين

حتى سامية إسماعيل بحكي ليها عن البوست بتاعك

قالت لي هي ده ما بكري الشين ،،،،

بالله عليك يا مجتبى زول مازون وصاحب قلم مميز

مفروض نسمية بكري الجميل,

Post: #29
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 01-03-2010, 11:43 AM
Parent: #28

اوامرك يا ريس نعدل شوية فى الاسم بكرى الجميل وبين قوسين كدا ( بكرى الشين سابقا)

Post: #30
Title: Re: ذكرياتى مع ود الماذون ...اوراق لم تنشر عن بكرى الشين
Author: محمد صديق
Date: 01-07-2010, 08:41 PM
Parent: #29

سلامات يا ناس

Quote: البوست دا خطر..
يا بكور انا كان خشيت معاكم الفورمه بانجلخ..
وحكاوي روكسي ولكوظ بتنبهل..


يا مجتبى ...سلام

ناس حاتم ومن لف لفه ...خليهم بعيد من البوست

بعدين انا مع الريس...يخى الزول كان ماشة عليه

يا استاذ.

Post: #31
Title: Re: ذكرياتى مع ود الماذون ...اوراق لم تنشر عن بكرى الشين
Author: زهير الزناتي
Date: 01-07-2010, 08:45 PM
Parent: #30

Quote: بكري الجميل


تزوير في بوستات رسمية

Post: #32
Title: Re: ذكرياتى مع ود الماذون ...اوراق لم تنشر عن بكرى الشين
Author: كمال الشادي
Date: 01-08-2010, 05:09 PM
Parent: #31

متابع
و
بمزااااااااااااااااااااااااااج

Post: #33
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 08:25 PM
Parent: #32

Quote: عموما خلوها زيارة صغيرة
لنعاود بعد انتخابات المحاميين غدا .


ياعمى عبد الحفيظ راجينك من زمان

Post: #34
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 08:48 PM
Parent: #33

Quote: ما الذى يمنع ان تكون شخصية المأذون , هى شخصية بكرى الحقيقية
بلطافتها وجمالها وعنفوانها
الشخصية الضاجة بالحياة والجمال والبهجة
اليس الزواج امر بهجة اصلا
ما الذى يمنع ان يكون من يبهج الناس مبتهجا اصلا وموضوعا
فى تقديرى , ان شخصية المأذون المفترضة والتى اضطر بكور لتقمصها
ولم يفلح فى (لبس شخصيته الأصلية مرة اخرى )
الا خفاءا ومواربة
مرة مع ناصر كشرى اذ اختلى به جانبا معوضا اياه سلامه المسيخ الأول
بسلامه المعتاد الحار المليان بالحياة
ولكن خلسة ومن وراء حجاب
ومرة فى ساحة الرقص الرابة
بى مأذونا ما همانا
ما دام بكور معانا يا ناس الليلة ما جانا



والله أنا شخصياً يا منص يا حبيب ماعندى مانع ، لكن ناصر كشرى ده لو عرفتو غير مأمون الجانب ، يعنى ممكن إطلع الكيس وإسف وإمدّو ليك بكل أريحية ووين داخل المسجد ، فصرّة الوش لكشرى كانت ضربة إستباقية لما يمكن أن يصدر عنه من إنجلاخ.


Quote: شخصية المأذون المحورية التى تفترض كونه مكمل الجدية مع الوجه العبوس القمطرير
جاية يتخيل لى كمنتج ثانوى من تداعيات تصعيب الزواج المفترض ان يكون سهلا اصلا
عشان تعرس وتتزوج , ليس فى السودان فحسب بل فى الشرق عموما
لازم تركب وش مختلف , ومكنة مختلفة , وسيستم مختلف , ولبس مختلف , واكل مختلف
وما عارف شنو داك مختلف
تبقى زول جديد اصحابك الا يدققوا فى ملامحك عشان يعرفوك
وكان للعروس , اكثر واحدة بتكون حريصة على تصوير اليوم الطبيعته صناعية داك
عشان ترجع كل شوية وشويتين تقول شفتونى وانا عروس
اجنن وانا عروس
لذا , كان من الطبيعى ان تخرب شخصية بكور المعروفة عندنا رصة الزهور الصناعية المالية اليوم داك
واصبح بكرى منافسا اصيلا لشخصية شفيق يا راجل فى مسرحية عش المجانين
انا اركب دقن
وأؤؤل لأبوكى
هادى دقنى اهو
احبكم


أعجبنى جداً عمقك فى الطرح ، ومسألة جديّة المأذون ربما مردّها للقداسة التى نفرضها على الزواج ومن تجرى على يديه طقوسه ، مرّات كتيرة تخنقنى العبرة لمان أشوف القس يأمر الزوجين بتقبيل بعضهما البعض إيذاناً بإعلان زواجهما ، بينما الواحد فينا تلقاهو راجع من السفر وواقع سلام بى الأحضان من أخوانوا لى سيد الدكان ، وقت إجى دور زوجتو إمد يدّو تقول عقد عليها فى نيفاشا ، دعك عن العروس التى تتحوّل لدمية ليلة زفافها خشية أن تتهم بالخفّة ، مروراً بشغل النسابة الذى يشبه الحرب الباردة كيداً وترصداً لنصف هفوة يمكن ان تتسبب فى أبغض الحلال إلى الله .

خلينا نطلع شوية من الجو ده وأحكى لك عن شقيقى محمد الملقّب بكوارة والذى باشر المأذونية بعد رحيل الوالد عليه رحمة الله ، وكوّارة رجل مليان حياة ، كان حريف فى الكورة وعاشق للغناء الجميل ، يحب الطرفة ويطلقها دون أدنى عناء ، فى إحدى المرّات جاهو واحد عشان إسوقوا إعقد ليهم ، كوّارة إتخمخم بى الجلاّبية والعمة والشال ، لمن طلع برا البيت سأل الراجل : وين العربية ، أشار إليه الرجل إلى موتر متوقف خارج منزلنا ، فأنتهره كوّارة ( إنت زول ثقيل ولا شنو ، أنا مأذون ولا حكم عشان تشيلنى بى موتر).

فى إحدى المرّات وبعد إنتهاء مراسم العقد وفوضى الناس التبارك لأهل العروسين ، إنتهز كوّارة هذه الفوضى وأفرغ شيّالة الحلاوة فى جيبو ، لسوء الطالع أن الشخص الذى يقوم بتصوير العقد بالفيديو صديق لكوّارة فركّز العدسة عليه ، كوّارة بعد شاف الفيديو وفضيحتو فى خم الحلاوة إنتهر المصوراتى قائلاً ( إنتَ يا ثقيل متابعنى كده أنا محمود يس)

Post: #35
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 09:07 PM
Parent: #34

Quote: اهدانا جمال الموسيقى في حفلات الزقازيق 000


يا فافى زكى بيشتغل بى الكنجالات كما يسميها ، ما أهدانا و لاحاجة (طبعاً مستغل جهل زكى تقنياً وإستحالة مروره على النت ، ولو حصل وجا أنا من هسى بقول ليكم الباسويرد بتاعى إتهكّر).

زكى مرّة جوهو ناس صيدلة الأزهر عشان إعزف ليهم ، قال ليهم : وين الكنجالات؟ ، الجماعة قالوا ليهو بعد الحفلة ، يبدو أن زكى لدغ من هذا الجحر من قبل ، فأعتذر لهم قائلاً: أوّل مرّة أشوف لى مزّيكا بى الدين .

على ذكر أحمد الحق البيقوّى وهى من كلمات بدرالدين محمد أحمد حمزة وألحان زكى صديق مساعد ، فى واحدة من حفلات التخرج بالزقازيق وكان زكى واقف خلف سيف الجامعة وبدأت الفرقة فى العزف ، إنتهرهم سيف الجامعة بوجه ممتعض قائلاً: ده ما سلِّم الأغنية ، زكى بدون تردد ملص الجيتار من كتفو وقال لى سيف الجامعة : إنتَ يا سيف الأغنية دى لحّنا الوالد؟ ، طبعاً زكى صديق بقدر ما هو لذيد فهو قطيم للحد البعيد ولى معه مواقف ربما أوردها فى نجوع الملح.

Post: #36
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 09:13 PM
Parent: #35

Quote: يا بكور انا كان خشيت معاكم الفورمه بانجلخ..
وحكاوي روكسي ولكوظ بتنبهل..


شوف يا حاتم حسَّك عينك تجيب طارى روكسى وشقّة د.عبدالعزيز ، الفضيحة والسترة متباريات (مثل صينى)

Post: #37
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 09:20 PM
Parent: #36

Quote: وبعدين ما عارف السبب شنو مسألة بكري الشين

حتى سامية إسماعيل بحكي ليها عن البوست بتاعك

قالت لي هي ده ما بكري الشين ،،،،



بالله با ريٍّس سامية ومجتبى أنا فى أسرة حقوق كنتَ رئيس الأسرة وسامية نايبى على ما أذكر ومجتبى أظنو كان السكرتير الرياضى يعنى ايدام وكده.


Quote: بالله عليك يا مجتبى زول مازون وصاحب قلم مميز

مفروض نسمية بكري الجميل,


كل الجمال وهبوهو ليك ، خليك من الصحافة الرياضية وزحمتا تقول نحن فى البرازيل

Post: #38
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 01-27-2010, 09:24 PM
Parent: #37

Quote: تزوير في بوستات رسمية


غايتو التحالف معاك زى التحالف مع إبليس ، أها دى نفضا لى يدى من اى إتفاق.

Post: #39
Title: Re: ذكرياتى مع ود الماذون ...اوراق لم تنشر عن بكرى الشين
Author: منصور عبد الرازق
Date: 01-28-2010, 10:59 AM
Parent: #38

قلت لى تزوير فى بوستات رسمية يا زهير
يمين بالله بكرى ده لا شين ولا حاجة
حتى اسال منى
غايتو انا من هسة اى زول بعرفوا ما جاب ود الماذون فى عرسو او بالعدم محمود ياسين الشهير بى كوارة
بعتبروا لا عقد ولا حاجة
لكن كوارة بالغ فى لمليم الحلاوة وكده
وكمان مصورة فيديو
والعجب على توصيلة الموتر
انتو نسألكم من الخير , الحكام فعلا توصيلاتهم مواتر دائما لى شنو
يعنى هسى الفاضل اب شنب لو جوهو يسوقوهو كورة ولقاهم جايين بى عربية
عادى يقول ليهم
جايبين لى عربية
انتو قايلينى كوارة ولا شنو
اضحكتنى ضحكا احتاجه يوم الخميس
ارفع به معنوياتى
واشياء اخرى
وحاجات تانية , حاميانى

Post: #40
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 01-28-2010, 11:07 AM
Parent: #38

على سيرة اسرة الخرطوم وكان بكورة الرئيس وسامية نائب الرئيس وزكى صديق – تخيلو – سكرتير اكاديمى ومثابة حاج حسن سكرتير ثقافى وماجد سقراط سكرتير مالى والصادق عبدالله دفع الله -ود النور - سكرتير اجتماعى وعمر بشير سكرتير عام واخوكم طبعا سكرتير رياضى
يعنى المسالة برضو كان فيها (ل . س ) وكدا يعنى بعد ما الاتحاديين والجبهة الديمقراطية خطفوا الرئاسة ونائب الرئيس واذكر بان هذا الاقتراح جاء من ممثل الاحباب فى حزب الامة اخونا عمار حلوف الذى اقترح ان يكون الرئيس ونائب الرئيس من - الفلوتر – زى بى ضحكة كدا قلت ليهو اسرة الخرطوم كلها منظمة يعنى حا نلقى فلوتر من وين قام بسرعة شديدة قال بكرى الشين وسامية اسماعيل
كان حضورا فى ذلك الاجتماع اخونا ماجد سقراط عن الجبهة الديمقراطية اذ لم تخنى الذاكرة – فادنى نظرة كدا – يعنى مرر وانسى وطبعا انا بالنسبة لى المسألة ما دايرا شرح مررت ونسيت وسرعت فى تشكيل بقية المجلس وقدمنا منصب السكرتير العام للاحباب فى حزب الامة بسرعة مع التاكيد بان على اننا سنقبل باى مقعد من اجل ان يتم التحالف ونتفرغ للانتخابات داخل الاسرة وكانت اقوى من الصراع على مقاعد الاتحاد فى ذلك الوقت واخونا عمار لم يصدق الحصول على مقعد السكرتير العام ووافق مسرعا معتبرا انه خرج بانتصار وكنا حقيقة نعلم بان بكرى وسامية منظمين لذا باخلاق عالية اقترح ماجد ان يحصل حزب الامة على السكرتير العام وهو منصب دائما ما تقاتل عليه الجبهة الديمقراطية وان كنا لا نملك الا الموافقة على الرئيس ونائب الرئيس
وسارعت بالاتصال ببكرى ليكون على علم بانه تم اخياره للرئيس بصفته – فلوتر- وكذا فعل سقراط مع العزيزة سامية
المهم فى اليوم الثانى جاتنا دعوة من حزب الامة لمراجعة الموقف وتكملت بقية المكاتب ووجدنا ان الممثل فى هذا الاجتماع هو العزيز عبدالحفيظ عباس – يعنى الاحباب عرفو دقستم – وطبعا عبد الحفيظ قال نعيد التفاوض وقبل ما ماجد يكل باقى الزمجرة التى احتجزها بين اسنانه سارعت بالقول – يا حبيب – دا قرار لجنة سياسية مشى والايام جاية
فطالب عبدالحفيظ بالسكرتير الاجتماعى وهو منصب يركز عليه الحزب الاتحادى كثيرا فقلت كمن افرض كلمتى – الصادق عبدالله دفع الله – الصادق ود النور زول ما فيهو كلام ففهم عبدالحفيظ باننى ساواصل الاجتماع ولن اتنازل عن هذا المنصب الا اذا قدم فيه حزب الامة – ود دفعتى الصادق – فاجاز الامر واتفقنا على بقية المكاتب ولم اتمالك نفسى من الضحك عندما اعلن سقراط بان السكرتير الاكاديمى سيكون زكى صديق ولم اكن مشاكسا فى باقى الاجتماع ولكننى اصريت على منصب السكرتير الثقافى بالمقابل لان الشقيقة مثابة حاج حسن عثمان من وجهة نظرى الشخصية وقبل الحزبية كانت انسب من يتولى المكتب فى جميع اسرة الخرطوم فى ذلك الوقت اما بالنسبة للسكرتير الرياضى فشخصيا كنت افضل ان يتولى المنصب الشقيق ادريس تراورى – الذى كان فلوتر فى ذلك الوقت – احترما لمجموعة الفلوتر الداعمين للتجمع بل اننى شخصيا قمت بترشيحه فى الجميعية العمومية ولكنه اصر على ان يدعم قائمة التجمع ويدعمنى شخصيا فى المنصب الذى تنافست فيه مع – ود دفعتى – عماد حسن عن الاتجاه الاسلامى وللتاريخ لقد صوت لعماد ليس لانه يستحق المنصب فقط ولا احتراما للدفعة فقكط ولكن لقناعتى بان المرشح يجب الا يدلى بصوته واذا حدث ذلك يجب الا يدلى بصوته لنفسه وكنا انا وعماد فقط فى السابق على مكتب السكرتير الرياضى
واذكر فى تلك الجمعية ان قدم اقتراحا بادانة العزيز احمد عبدالمطلب ابو جبة – اتجاه اسلامى – لوصفه لحقوقين فى الجمعية العمومية للاتحاد بانهم لا يعرفون القانون وقدم العزيز بدرالدين – الشهير ببدرين وعبدالله – اقتراحا بالادانة وثناه بالطبع عبدالله ود الطلحة وقدم –القون- حسن اقتراحا بمنحه الحق فى الدفاع عن نفسه امام جمعية اسرة الخرطوم قبل ان تتم ادانته وثنيت هذا الاقتراح واصريت على المضى فى تثنيته من قناعة ان المتهم يجب ان ياخذ جميع الفرص للدفاع عن نفسه على الرغم من اصرار الشقيق بشير على العبيد على ان اسحب التثنية الا اننى رفضت ذلك الامر بل وصوت مع اقتراح منح ابوجبة الحق فى الدفاع عن نفسه الذى لم ينال الاغلبية ولكننى لم اتاثر بهذا الامر ولازالت قناعتى راسخة بان الشىء الرئيس فى اية قضية هى الفرص المتساوية
خلال تلك السنة واجهنا العديد من القضايا الشائكة جدا – سياتى يوم ذكرها – ولكننى هنا اذكر موقفا واحدا اننا كنا نبحث عن السيد الرئيس – بكورة الشين – لامر هام جدا وكنت والعزيزة سامية اسماعيل نحاول الوصل اليه بشتى الوسائل وعندما فشلنا خطرت على بالى فكرة يمكن ان تكون مجنونة فتوجهت الى بيت طالبات القومية وقرعت الجرس فحضرت المشرفة المصرية وقلت لها بثقة متناهية – داير بكرى – فلم تستغرب الطلب ولم تسال من بكرى وكيف تسال عنه فى بيت الطالبات بل وبسخرية من عانى كثيرا من تواجد بكرى الدائم فى بيت الطالبات دخلت الى غرفة الاستقبال وقالت لبكورة – عندك زيارة -

Post: #41
Title: Re: ذكرياتى مع ود الماذون ...اوراق لم تنشر عن بكرى الشين
Author: محمد صديق
Date: 01-28-2010, 12:53 PM
Parent: #40

سلامات يا ناس

Quote: دخلت الى غرفة الاستقبال وقالت لبكورة – عندك زيارة


ولما جاك ....مسّكك الشنطة وصلّح توبو ؟؟

Post: #42
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 01-28-2010, 12:59 PM
Parent: #41

هاهاهاهاهاهاهاهاهاهاهاهاهاااهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاههاهاهاهاهاهاهاهاهاه
قوية يا سعادتو

Post: #43
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 02-19-2010, 03:52 PM
Parent: #42

انتخابات وتسجيلات
نعود لقصص ود الماذون وهذه المرة بمناسبة الانتخبابات والاستقطاب الاستقطاب المضاد .. فى مطلع تسعينات القرن الماضى كالعادة حصل انشقاق فى الحركة الاتحادية وكان الموضوع المرة دى جو الحزب الاتحاد يعنى ما زى الانشقاق السابق وطنى اتحادى واتحادى دميقراطى والتيرين كلو واحد بنادى بانو هو الاتحادى الديمقراطى الحقيقيى تيار السيد محمد عثمان الميرغنى رئيس الحزب وتيار الشريف زين العابدين الهندى رحمة الله عليه
وطبيعى ان نتاثر فى الحركة الكطلابية بهذا الانشقاق غيتو انا واخوى احمد عمر وعروة على موسى مشينا طبعا فى تيار الشريف – خلونا من الاسباب – والرائع بشير على العبيد والشقيقة الراقية جدا مثابة حاجة حسن وفتح الرحمن عبد الرحمن مشوا فى تيار السيد محمد عثمان وكان اكبر المساندين وبعنف لتيار السيد محمد عثمان الشقيق الرائع عوض عبدو
طبعا كل تيار بدا يشوف يعمل شنو مع باقى القواعد اها اخونا بكرى ود الماذون كان فى السودان وقت اعلان الانشقاق وكل تيار كان حريص على انو يضم بكرى بقدراتو المعروفة
احنا طبعا كنا واثقين من بكرى ما مسالة حوامة دايمة مع بعض لكن لتطابق فى الافكار الاخوة الختمية رسلو الشقيق حامد دعاك لمساعدة بشير على العبيد فى الحافظ على كوادر الزقازيق والتركيز طبعا – فى انتظار بكرى ود الخلفة الختمى ابا عن جد عن جد
بعد ايام بكرى جدا وطبعا اعلن بوضوح بعد ساعات انو مع تيار الشريف وطبعا بسخريتو المعروفة يحكى الساعات التى تلت وصوله الزقازيق
وانقل على لسان بكرى
--
جيت الزقازيق اول ما وصلت مشيت الجامعة عشان ارتب امورى سنة نهائية وكدا لم فينى احمد عمر وبعبارات فخيمة كدا طبعا يا ود الماذون ما داير كلام اصلا الموضوع الاتناقشنا فيهو قبل كدا تم اعلانو بعنى بثقة احمد بتكلم عن انو بكرى معنا معانا
ويواصل بكرى بعد المحاضرات مرقت من الجمعة ليصلنى بسرعة خارج اسوار الجامعة الشقيق عوض عبدو ومعه حامد داعاك واول كلمة قالة عوض عبدو وبلهجتهو النوبية (طبعا يا بكرى انت ما داير نقاش انت زول (هتمى) يعنى مع السيد
ويختم بكورة
والله يا اخونا (قلة) ذاتو ما حاصروه كدا ناس الهلال والمريخ

Post: #44
Title: Re: ذكرياتى مع ود الماذون ...اوراق لم تنشر عن بكرى الشين
Author: محمد صديق
Date: 02-19-2010, 06:26 PM
Parent: #43

سلامات يا ناس

مجتبى...حمدآ لله على السلامة

Post: #45
Title: Re: ذكرياتى مع ود الماذون ...اوراق لم تنشر عن بكرى الشين
Author: زهير الزناتي
Date: 02-19-2010, 09:27 PM
Parent: #44

Quote: وقالت لبكورة – عندك زيارة


يا مجتبي دي قوية تاخد 10 من 10 علي مسئوليتي

Post: #46
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 02-20-2010, 11:37 AM
Parent: #45

والله زى ما قال بكورة الشين التحالف معاك زى خوة الكاب حدها الباب

Post: #47
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 02-20-2010, 11:42 AM
Parent: #44

الله يسلمك ساعدتك قالو مشغول بترتيب الانتخبات ربنا يعين ان شاء الله القصة ما ساهلة والله

Post: #48
Title: Re: ذكرياتى مع ود الماذون ...اوراق لم تنشر عن بكرى الشين
Author: محمد صديق
Date: 02-21-2010, 07:45 PM
Parent: #47

سلامات يا ناس

مجتبى البرلوم

زكريات لكوز وين؟

Post: #49
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 02-24-2010, 10:24 AM
Parent: #48

Quote: Quote: وقالت لبكورة – عندك زيارة


على اليمين يا زناتى لو البنيات ديل تكلناهن على ناس مجتبى فاروق ، كان ممكن إطالبن بتحويلهن لجامعة أمدرمان الإسلامية ويطالبن بالإنفصال الجندرى لأن الوحدة لم تعد جاذبة ولا ممكنة ، لأنه يستحيل أن تجد ضمن باقات الجزيرة الرياضية برنامج على شاكلة (كلام نواعم) نواعم مين والناس نايمين وناس مجتبى قطعوا المزلقان عند الرابعة فجراً لإلتهام فطيرة تندى لها الجضوم وعند البعض الخّدّين.

إتصل على يا مجتبى محمد عبدالباقى وذكر لى أنه فى إحدى المرات عزمتوهم على وجبة الغداء الذى كان عبارة عن مربّة وطحنية ، قلتُ له أننى ولثقتى فى طهرانية مجتبى مع شغفه بالسكريات والحلويات ، فأغلب الظن أنه يخرجها مولاص.

Post: #50
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 02-24-2010, 11:36 AM
Parent: #49

بكورة
اعدت لى ذكريات ذلك اليوم الجميل الغريب
(داهم ) شقتنا الراحل العزيز مصطفى نقد الله بمعيته رفيق (كبسولته) محمد عبدالباقى وكنا فى ذلك الوقت فى شقة المساكن (الطشيت منها بعد الشيك ودى بجيها مرة تانية ) بعد العصر تقريبا وكنا والعزيز احمد عمر الباقر امورنا ماشة كويس الايم ديك
المرحوم مصطفى اقنع محمد بانو افضل مكان للانتشار فى لك العصر (الفلسى ) هو شقتنا وحضر الثنائى وقبل السلام هتف المرحوم بلهجته المحببة ( يا احمااااد ) اتغيدو ولا لسه فرد الشقيق احمد بالتاكيد على اننا تغدينا لكن الخير باسط والحمد لله ولما كان من مناصر التيك اوى ولا نعرف عن البتوجاز الا الشاى طلب منى العزيز احمد ان انزل الى البقالة القريبة واشوف غدا للشباب وطبعا اخوك بتفكيروا الثابت سالتهم يا شباب جاعانين قدر شنو فقالوا موت اتصرفت بالطريقة البتعامل بيها مع الجوع موت وهى ( كليو طحينة وعلبة مربة من الحجم الكبير ) وجيت شايل عيش سخن من الفرن البلدى بتاع المساكن ودخلت مبسوط
لاتفاجاء بصرة قوية من المرحوم وهو يهتف ( ياخى قلنا ليك دايرين نتغدى قلت ليهو ما دا الغدا فقال وهو يضحك ناس جعانه بتجيب ليهم طحينة ومربة يعنى لو قلنا ليك دايرن نحلى (كان جبت لينا ابو راشد كلو ولو شنو)
رحمة الله على مصطفى نقد الله واسكنه فسيح جناته

Post: #51
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 04-02-2010, 10:58 AM
Parent: #50

شباب بعد انقطاعة كدا الواحد برجع تانى لود الماذون وبمناسبة عمر نملة نديكم واحدة من حاجات ود الماذون مع عمر نملة
طبعا نملة وبكرى من اولاد بانت فى مدنى وساكنيين فى نفس الشارع يعنى اولاد – كورنر واحد ووقفت عمود وكدا-
نملة فى حركة – قردية- قال يمقلب بكرى مستغل انتشار بكورة الشهير فى رمضان فتقدم بعزومة فطور واشاد فى الوصوف واغدق فى الوعود بانها ستكون مكربة جدا
بكورة بسبب الفلس على ما اعتقد تجاوز عن –شكوكه – حول الموقف الحقيقى لنملة وقبل العزومة وهو خاتى فى بالو انو اذا نملوز خالف الوعد شقتى انا واحمد عمر قريبة بحصل فيها الفطور وجاء قبل دقائق من الفطور ونملة كان ساكن فى كبسولة فى زقاق فى المساكن ومنتظر بكورة
اول ما ود الماذون وصل نملة استاذن قال ليهو بس اصل البقالة القريبة دى اجيب بارد وشوية حاجات ندعم بيها الفطور وباقى الامور جاهزة
صاحبك بكورة يا مؤمن يا مصدق انتظر نملوز
ابو النمل مرق من الكبسولة وقفل الباب من برة بالطبلة وخلى بكورة مشحتف جو فى الكبسولة منتظر الفطور
طبعا الكبسولة غير الموية فى الحنفية ما كان فيها حاجة
اها بكورة عرف المقبل لكن ود الماذون ما بسيب حقو
ابتدع فكرة – انتقامية مية المية – الداير يعرفا يضرب لبكرى ولا نملة انا من اليوم داك حالف ما اقول الحصل شنو
اهو بعد زى ساعتين كدا نملة جا وفتح الكبسولة وقف بعيد تفاديا لغضبة ود الماذون واخونا بكورة مرق طوالى وما فتح خشمو لكن نملوز ما قدر يخش الكبسولة – من الريحة – اها الريحة دى الا يشرحا بكورة

Post: #52
Title: Re: ذكرياتى مع ود الماذون ...اوراق لم تنشر عن بكرى الشين
Author: منصور عبد الرازق
Date: 04-03-2010, 09:56 AM
Parent: #51

ديشاااااك يا بكرى
حرقت الكبسولة ولا شنو
انا غايتو ما عارف يا مجتبى
لكن انا الان فى نوبة ضحك وقهقهة
اتمنى انها ما (ترفدنى من شغلى)
بتبالغوا ياخ

Post: #53
Title: Re: ذكرياتى مع ود الماذون ...اوراق لم تنشر عن بكرى الشين
Author: أبوبكر حامد الأمين
Date: 04-03-2010, 05:08 PM
Parent: #52

Quote: ديشاااااك يا بكرى
حرقت الكبسولة ولا شنو


ما تدردقنيش بوعود ..... وكلام معسول وعهود

مجتبى يا لغم بقيت زى إعتماد خورشيد

Post: #54
Title: Re: ذكرياتى مع ود الماذون ...اوراق لم تنشر عن بكرى الشين
Author: مجتبي فاروق
Date: 04-04-2010, 11:02 AM
Parent: #53

ود الماذون من اسى اتجرست عنوان البوست دا ذكرياتى مع ود الماذون اما مسالة اعتماد خورشيد دى كان ترجيها شوية لحدى ما تقراء بوست ( ود الماذون اسرار وخفايا) غيتو شوف ليك درب من اسى

Post: #55
Title: Re: ذكرياتى مع ود الماذون ...اوراق لم تنشر عن بكرى الشين
Author: زهير الزناتي
Date: 04-04-2010, 02:20 PM
Parent: #54

رشوا يا مجتبي ونحن من خلفكم نشد من أزركم ... وكل من يمني نفسه بمعرفة النهاية الدرامية للقصة عليه الإتصال بالرقم المجاني ...