حقوقييين مطبعجية

حقوقييين مطبعجية


12-18-2009, 11:14 AM


  » http://sudaneseonline.com/cgi-bin/sdb/2bb.cgi?seq=msg&board=299&msg=1261131274&rn=17


Post: #1
Title: حقوقييين مطبعجية
Author: مجتبي فاروق
Date: 12-18-2009, 11:14 AM
Parent: #0

شباب تحية بالجملة كدا من منشية السادات لحدى المطبعة ومن الزنكلون حتى هرية وتحية خاصة للرائع بكرى ابوبكر والاروع زهير الزناتى
جيناكم استلمت الباس وورد قبل ربع ساعة دى تحية سريعة لحدى بعد الصلاة وارجى الراجيك يا بكرى الشين ويا الرشيد مربع كاى تبع زراعة لكن برضو احنا ( حقوقيين مطبعيجة )

Post: #2
Title: Re: حقوقييين مطبعجية
Author: عبد القادر بابكر
Date: 12-18-2009, 12:02 PM
Parent: #1

أهلين وسهلين حبيبنا مجتبى

وألف مرحب بيك وانشاء الله باسووردك مبروك ..
كانت لك صولات وجولات ياحبيبنا أيام موقع الزقازيقاب ..
من وقتها ونحن نمني النفس بكلمة منك ..

ألف مرحب بيك وحبابك عشرة في مربع كاي نيابة عن سيد البيت رش
تعال بي هناك ونحن منتظرين ......!!!

Post: #3
Title: Re: حقوقييين مطبعجية
Author: أبوبكر حامد الأمين
Date: 12-18-2009, 12:06 PM
Parent: #1

مجتبى فاروق بى شحمو وجضومو ، ايه النور ده ، ياولدنا آمنا ذاتو ، بعد ربع ساعة بس من استلام الباسوورد جينا طاير آمنا ذاتو على قول حاتم جبارة .
يامجتبى السياسة هنا من الممنوعات وكذلك الكورة (حاصرتك صاح).

Post: #4
Title: Re: حقوقييين مطبعجية
Author: زهير الزناتي
Date: 12-18-2009, 12:22 PM
Parent: #3

مرحب بالبرلوم النجيض ... مجتبي فاروق ... جاء الزقازيق سنيراً .. إنتمي للإتحادي ... بمكنة تقدمية .. إعتزل السياسة بعد التخرج وتزوج الكورة ... أصبح صحفي رياضي من الطراز الفريد .. لم يشتم أو يهاتر طيلة حياته المهنية .. رفع رأسنا عالياً وسط زملاء المهنة .. تدرج حتي أصبح مدير تحرير المشاهد ايام عزها ... والآن مدير تحرير صحيفة سوكر . الصحيفة السودانية الوحيدة المتخصصة في الرياضة العالمية .. ومن أنجح الصحف الرياضية في السودان ، حيث لا شتيمة ، ولا سباب .. لأن الصحيفة لا تهتم علي الأقل بأخبار الهلال والمريخ ... حينما تفوتك مباراة برشلونة أو الإنتر والتي أقيمت ما بعد الثانية عشر ليلاً .. تجد تغطية كاملة لها في سوكر ...

مرحب حباب الولد مجتبي فاروق ... من أوسخ من مر بالزقازيق ... الحمد الله الآن يا بكري مجتبي بقي يستحمي كل إسبوعين ...

Post: #5
Title: Re: حقوقييين مطبعجية
Author: مجتبي فاروق
Date: 12-18-2009, 12:32 PM
Parent: #3

انا جاى وحدد هدفى عديل (قصص من تاريخ بكورة الشين مع الزقازيق ) والقصة الاولى عن قصة بكورة وزكى مساعد و( امعانا فى زلتى)

Post: #6
Title: Re: حقوقييين مطبعجية
Author: مجتبي فاروق
Date: 12-18-2009, 12:38 PM
Parent: #5

يعنى يا زيزو الوسخ مسالة نسبية وكيفاية الدواخل النضيفة يعنى الزقازيق كلها تكون زى عبد الدائم انت ما شايف نفسك زمان واسى
المهم بعد كدا الا تقوموا جاريين انا فى المكتب اسى اتم القرعة بتاعت الابطال على فكرة مانشيستر مع ميلان وتشيلسى ما انتر ميلان يعنى موت عديل كدا بين ايطاليا وانجلترا ويا بكورة الشين الكورة ممنوعة لكن ( قصة بخاف بتاعت وليد حقوق ) برضو ممنوعة

Post: #7
Title: Re: حقوقييين مطبعجية
Author: أبوبكر حامد الأمين
Date: 12-18-2009, 01:34 PM
Parent: #6

Quote: مرحب حباب الولد مجتبي فاروق ... من أوسخ من مر بالزقازيق


عشرة على عشرة يازناتى (على وزن عشرة على عشرة ياست - آهٍ كم أشتاق للبيجو على الطريق الزراعى وآهة من سائق البيجو الذى يكون فى أقصى درجات الإستواء المزاجى ويبربش السجائر السوبر متبوعاً بعبارة : مساء الفل ).

والله يازهير كونوا مجتبى بقى استحم كل اسبوعين مرة ده تطور فى حد ذاتو ، ويبدو أنه تأثر بالإصدارات الصحفية فصار الحمام يصدر (نصف شهرى).
فى إحدى المرّات شاهدت بأم عينى الشغالة أم جمال تستعطف مجتبى لإخراج ملابسه المتسخة ، لأنها مضى عليها أكثر من ثلاثة أشهر وهى تغسل ملابس أحمد عمر فقط دون أن يمر عليها حتى تى شيرت لزميله فى السكن مجتبى فاروق دفع الله المحلاّوى ، سأعود لك مرة أخرى بحكايا عن وسخ مجتبى الذى كنت على يقين أنه سيخرجه من ملّة المؤمنين (أليست النظافة من الإيمان؟).

Post: #8
Title: Re: حقوقييين مطبعجية
Author: أبوبكر حامد الأمين
Date: 12-18-2009, 01:37 PM
Parent: #7

Quote: على فكرة مانشيستر مع ميلان وتشيلسى ما انتر ميلان يعنى موت عديل كدا بين ايطاليا وانجلترا


يامجتبى قلنا الكورة ممنوعة ، كلمنا عن الحب ياخى ههههههههههه

Post: #9
Title: Re: حقوقييين مطبعجية
Author: مجتبي فاروق
Date: 12-18-2009, 02:11 PM
Parent: #8

عاد يا بكورة الشين انت الحب دا ما بتقدر عليهو يعنى نقول شنو يوم (جيانك زيارة فى بيت الانتفاضة ) ولا شنو خيها مستورة

Post: #10
Title: Re: حقوقييين مطبعجية
Author: أبوبكر حامد الأمين
Date: 12-18-2009, 03:54 PM
Parent: #9

Quote: انت الحب دا ما بتقدر عليهو يعنى نقول شنو يوم (جيانك زيارة فى بيت الانتفاضة ) ولا شنو خيها مستورة


يامجتبى أعباء الرئاسة تفرض عليك أن تتفقد الرعية وقد قدر لى رئاسة أسرة حقوق ورابطة أبناء مدنى بالزقازيق ، وفى ظل وجود كادر مثلكم لاتربطه علاقة بأى أنثى سوى (أنثى الأنوفوليس) ، فكان طبيعياً أن نسعى لجسر الهوّة ترفقاً بالقوارير ، عليك الله يامجتبى نفسى ومنى عينى تحكى لى مدخلك للزواج وكيف بديت فى الحب كلامك (بما لايتجاوز خصوصيتك بالطبع).

Post: #11
Title: Re: حقوقييين مطبعجية
Author: الرشيد بابكر
Date: 12-18-2009, 04:50 PM
Parent: #10

Quote: ويا الرشيد مربع كاى تبع زراعة لكن برضو احنا ( حقوقيين مطبعيجة )


مجتبى فاروق مرحب بيك حبابك... يكفي ما قاله لك قدورة و رحب بك نيابة عني في مربع كاي...كان مربع كاي مكان يجتمع فيه ناس زراعة...و لكني الآن أخترته ليجتمع فيه كل الناس...و لا تحتاج لبطاقة الزراعة حتى تدخلة...مرحب بيك مرة أخرى في مربع كاي...

Post: #12
Title: Re: حقوقييين مطبعجية
Author: أبوبكر حامد الأمين
Date: 12-18-2009, 08:44 PM
Parent: #11

سكن مجتبى فاروق بالمطبعة أو مايسمى بمساكن الجوازات برفقة أحمد عمر الباقر وفيصل محمد على "ودبهاى" ، وكنا أنا ووليد مبارك نسكن بلكوظ ، فى إحدى الأمسيات حضر مجتبى وفيصل وقد تملكهم الخوف وزعموا أن شقتهم بالجوازات مسكونة وأنهم يسمعون أصوات غريبة وأبواب توصد من تلقاء نفسها ، لم أقتنع حينها بمسألة الجن هذه ، غير أنى كنت على يقين أن الجوازات التى سكنتها حسان زراعة وبيطرة لاتصلح لهؤلاء ، فقال عقل الطبيعة الذى جعل جور الحبيب مسموح أن عودوا أدراجكم فلا يعقل يامجتبى أن تجاور الحسان وتبريهم بسيرة الكورة ، وهكذا ولّوا الأدبار ولم يعقبوا.

Post: #13
Title: Re: حقوقييين مطبعجية
Author: محمد عيد
Date: 12-18-2009, 08:54 PM
Parent: #12

ترحاب عالى الهمة بانضمام اخونا مجتبى فاروق ...

القلم النظيف _ كيّة فيك يا زهير -

نطمع فى استطعام مساهماتك فى كل اركان البيت الزقازيقى ..

فى الحوش الكبير وفى مربع كاى وفى تعريشة محمد صديق المزهرة ..

وفى صوالين عفاف الادبية ..


Post: #14
Title: Re: حقوقييين مطبعجية
Author: عفاف علي ميرغني
Date: 12-18-2009, 10:30 PM
Parent: #13

مجتبيييات الكتييير 000

سلاااااام كتيييير بحجمك


وانا اقول المنبر النهار دا منور ليه

املانا حكى يا رائع

تحيات للامورات شادن واسيا

Post: #15
Title: Re: حقوقييين مطبعجية
Author: منصور عبد الرازق
Date: 12-19-2009, 10:44 AM
Parent: #14

ترحيب شديد برفيقنا ايام زقازيقاب دوت كوم
مجتبى فاروق
بكرى قال ليك كلمنا عن الحب
بالحيل
دايرين نضميك عن الحبكانة
اما انثى الأنوفيلس
فقاتلها الله انى كانت
عموما
دم جديد ونظيف (رغم اتساخ الوعاء كما قال الشامتون)
يسرى فى شرايين الزقازيق

Post: #16
Title: Re: حقوقييين مطبعجية
Author: جلال عثمان
Date: 12-19-2009, 03:47 PM
Parent: #15

سلام كبير أوي للجدعان
نورت يا مجتبى

Post: #17
Title: Re: حقوقييين مطبعجية
Author: محمد صديق
Date: 12-19-2009, 08:19 PM
Parent: #16

سلامات يا ناس

مرحب بى مجتبى فاروق...الصحفى الرياضى النظيف[ نكاية فى بكرى حامد]

مجتبى ...اضافة الى النظافة فهو مستطعم جيد وخاصة الحلويات...واحد

من المرجفين فى المدينة ..حكى لى ..انو مجتبى واحد اصحابو المستطعمين

كانوا فى بيت الرجال فيهو بيقعدوا فى الصالون بس...رفعوا ليهم صينية

غدا كاربة ..لموا فيها الاتنين ومع الونسة عدموها نفاخ النار..وبعد

رفعوا الصينية بى فوق الحيطة ناولوهم صينية الشاى فيها 10 كبابى..

Post: #18
Title: Re: حقوقييين مطبعجية
Author: أبوبكر حامد الأمين
Date: 12-20-2009, 09:32 AM

Quote: مرحب بى مجتبى فاروق...الصحفى الرياضى النظيف[ نكاية فى بكرى حامد]


لا خلاف ياجورج حول نظافة قلم ولسان مجتبى فاروق فهو والحق يقال علامة مضيئة فى دنيا الصحافة الرياضية التى يمكن وصف أياً من منسبيها بصفة المشجع للهلال أو المريخ ، مجتبى شخص موضوعى لايميل للمهاترة ، يبز عبده قابل فى الإحصائيات والتواريخ ، تصوّر أن مجتبى وهو بعد برلوم كان يحدثنا عن إتحاد 76 ، وهذه الصفة على فكرة متأصلة فيه بحكم الوراثة ، جلست فى أحد الأيام لوالده المغفور له بإذنه تعالى فاروق دفع الله المحلاّوى ، والله ياجورج تحس أنك تجالس شخص تعرفه منذ أمد بعيد ، رجل حيوى وحكّاى ويعاملك بحميمية يندر أن تجدها لدى غيره ، لايشعرك البتّة أنه مهندس طيران ، حكى لى عن (إسنه) حدثت بنادى برى قبل 25 سنة ويذكر إسم زميله وإسمى الشخصين المنافسين وكيف كانت التسمية ومن هو صاحب القبول والبوهية التى لعب بها ، وبوشات زميله ، الراحل فاروق دفع الله عالم من الدهشة أورث بعض صفاته لمجتبى ، وكان الراحل أنيقاً ومهندماً ولم يورث ذلك لمجتبى ، لا أدرى إن كان مرد ذلك لجهة الخؤولة ، أم ماذا؟

Quote: واحد من المرجفين فى المدينة ..حكى لى ..انو مجتبى واحد اصحابو المستطعمين

كانوا فى بيت الرجال فيهو بيقعدوا فى الصالون بس...رفعوا ليهم صينية

غدا كاربة ..لموا فيها الاتنين ومع الونسة عدموها نفاخ النار..وبعد

رفعوا الصينية بى فوق الحيطة ناولوهم صينية الشاى فيها 10 كبابى..


هذه القصة يحكيها مجتبى نفسه ، وقد حدثت بسنار بمنزل الحاج صديق الباقر عم أحمد عمر الباقر وكان بمعية مجتبى هشام عمر الباقر ، ولأن الحاج صديق من جماعة التبيلغ والدعوة فالإختلاط ممنوع بمنزله ، تم إعداد صينية غداء تنوء بحملها العصبة أولو القوّة ، قضى هشام ومجتبى على محتويات الصينية بما فيها الجرجير ، نساء البيت وقياساً على مستوى نظافة الصينية قدرن أن هذا الإبداع هو منتوج لعمل جماعى قوامه عشرة رجال بحد أدنى فأرسلن 10 كبابى شاى ومعها نداء (لو عايزين زيادة كبابى كلمونا)ومابين القوسين من إنتاجى الخاص ههههههههههههه.

Post: #19
Title: Re: حقوقييين مطبعجية
Author: منصور عبد الرازق
Date: 12-20-2009, 10:56 AM
Parent: #18

يخرب مطانكم
الآن انا فى وضع الميت من الضحك
ميت من الضحك مرتين
مرة لى نكتة فاروق وصحبه ماركة (الحسنة بعشرة امثالها )
والمرة التانية
ودى الزودت على الضحك حتى اتهمت نفسى بالغباء
اننى لم افهم النكتة القوية
الا بعد شرح بكرى ليها
مجتبى وصاحبه
اشطبوا صالونا من خريطتكم
لو غلطت وعزمتكم , اعتذروا طوالى وامسحوا لى الغلط ده فى
(وش بكرى )

Post: #20
Title: Re: حقوقييين مطبعجية
Author: مجتبي فاروق
Date: 12-20-2009, 01:49 PM
Parent: #19

شكرا للجيمع واعتقد بان اروع ما يمكن ان يقال عنى هو انكم شرفتمونى بصحبتكم
هى الروح تجبرى الى ابد هى الروح لا تسلا احد
هى تلك اللحظات الرائعة فى رحاب المدينة الاورع والرفقة الاكثر رحمة بك من نفسك
قصص الحب كثيرة لكين عند بكرى الشين ( انا تخصص كورة وسياسة ) وبعد داك صحافة رياضية وحتى زوجتى من مجال الصحافة الرياضية والبنات الكبيرة يا دوب لم نضمت قالت هلالبية اما الصغير لسة عليها شوية

Post: #21
Title: Re: حقوقييين مطبعجية
Author: مجتبي فاروق
Date: 12-20-2009, 02:27 PM
Parent: #19

منص تحياتى
انت قصدك (صنفورو ) بيها وش بكرى

Post: #22
Title: Re: حقوقييين مطبعجية
Author: أبوبكر حامد الأمين
Date: 12-21-2009, 09:15 AM
Parent: #21

Quote: مجتبى وصاحبه
اشطبوا صالونا من خريطتكم
لو غلطت وعزمتكم , اعتذروا طوالى وامسحوا لى الغلط ده فى
(وش بكرى )


صاحبو ده يا منص هو هشام عمر الباقر شقيق أحمد عمر الباقر ، وأغلب الظن أن مجتبى وهشام ينتميان لقبيلة المعضاض بن عمرو الأشعبى ، وهى من أفخاذ دجاج البيك ، أرجو ان تعطيهم توصيف خاطئ لمنزلكم وبالمرة أخبرهم أن محمد عيد ترك الساوث مول وانتقل للدمام (نظام ناس العمرة حدّهم جده) ، محمد عيد عارفك أبوالكرم لكن حسيبك الله لو مجتبى وهشام حطوا الرحال بجده فتأكد أنها موعودة بسونامى لايبقى ولا يذر ، وقد أعذر من أنذر.

Post: #23
Title: Re: حقوقييين مطبعجية
Author: مجتبي فاروق
Date: 12-21-2009, 10:19 AM
Parent: #22

على فكرة يا بكورة هشام الايام دى فى الخرطوم ومن المفترض اننا نتلاقى يوم الجمعة الجاية غيتو ما عارف البحصل شنو انت ملك الخيال اتوقع بس

Post: #24
Title: Re: حقوقييين مطبعجية
Author: منصور عبد الرازق
Date: 12-21-2009, 11:54 AM
Parent: #23

عموما يا بكرى
ويا مجتبى
شكلنا كده حا نعمل مع بعض تحالف استراتيجى
قائم على برنامج عمل مرحلى
لأنو ناس المعضاض ديل قرايبنا من بعييييييد كده
هم مش قلت لى من افخاذ دجاج البيك
انت ما عارف نحن من (صدر المحافل )
بالتحديد من (جوهرها )
ومع انو الحرب قايمة بيناتنا من زمااااان
متشاكلين لينا على
منطقة وسطى
غير موجودة اصلا
بين جنة (لورد ) الفى شارع لكوظ
ونار (الشرقاوى)
الملهلبة
اهلا بيكم انت واصحابك (التسعى )
بس بعد ما تتغدوا يا مجتبى
انت وهشام
تعالوا قزقزوا معانا
هسى انتو معزومين مع ناس زهير يوم الأربعاء فى نادى الشرطة
يا زهير اعمل حساب الجماعة ديل

Post: #25
Title: Re: حقوقييين مطبعجية
Author: البادي النور
Date: 12-21-2009, 12:25 PM
Parent: #24

حباب المجتبى ... إيه النور دا ...
يا مجتبى نورك غطى على الكهربا ...
مليارات التراحيب ... ودقي يا مزيكة ...
يا ناس مجتبى دا ساخر جدا أعملوا حسابكم ...
وكمان حفاظ وبتاع تاريخ يعني ممكن يحكي عن
محمد علي باشا لما أكل الفطائر في الزقازيق سنة 209...
التوأمة والثنائية بين بكوري ومجتبى قمة في الروعة
وهم الإثنين ما شاء الله عليهم لسان طويل وسخرية وشيل حال ...
غايتو أنا خايف على العدة ... عشان كدا حأكون مأدب مع الثنائي
المرح دا ما عشان حاجة بعينها لكن ما معروفة الظروف نكون نسينا
لينا كم حاجة كدا بسبب الزهايمر ويجي مجتبى يطلعها وبالصور كمان
عاد نمشي وين تاني ... وبعدها نقعد في التحانيس وكسير التلج ...
مجتبى ما تنسى تحكي عن محل الفطاطري ... وما تنسى أصحابك التسعة ...
ناس الرشيد وأبوالزوز كانوا فالقننا بي البرشا والريال وهلم جرا ...
مجتبى دا هو الهلم جرا زاته ... يعني من اليوم تحليل الكورة قبل وبعد
متوفر وعلى الهواء مباشرة ...
ويا مجتبى ما تنسانا من عمر النملة وحكاويه النادرة ...
وعرج بينا على أخونا محمدو (السميح) ... ومر بينا بي بكوري ...

Post: #26
Title: Re: حقوقييين مطبعجية
Author: مجتبي فاروق
Date: 12-21-2009, 12:47 PM
Parent: #25

بادددددددددددددددددددددددددى ( يا اجمل زهرة ) وين انت على سيرة (العدة) بالله عليك اسال بكرى الشين عن (عدة ) عمر النملة فى كبسولة المساكن فى رمضان حصل ليها شنو

Post: #27
Title: Re: حقوقييين مطبعجية
Author: ميسرة سيد أحمد
Date: 12-21-2009, 09:05 PM
Parent: #26

أهلاً بالأستاذ الصحفي والزقازيقي البار

مجتبى فاروق والقلم الجميل وبصراحة أنا مبسوط

شديد لدخول هذه النخبة الممتازة من الكتاب والصحفين

ومجتبى قلم رائع وسمعنا سيرتك ويشرفنا وجودكم في بيتك الجديد

ومرحب بيكم مره أخرى وبيتنا نور .

Post: #28
Title: Re: حقوقييين مطبعجية
Author: طارق جبريل
Date: 12-21-2009, 10:15 PM
Parent: #27

مجتبى كيفنك ابوي

Post: #29
Title: Re: حقوقييين مطبعجية
Author: أبوبكر حامد الأمين
Date: 12-21-2009, 10:53 PM
Parent: #28

Quote: مجتبى كيفنك ابوي


يا جبريلا هسّى أمانة فى ذمتك ده سلام ولا مس كول ، غايتو إشبه سلام سلاح بتاع ناس جورج فى الشرطة ، إشيلوا البندقية من اليد الشمال لليد اليمين وادّوها خبتة ورفسة كراع ههههههه