تـمـاضــر وأخـواتـهـا ... يـا حـلـيـلـهـم !!!

يا ناس عروض عروس النيل
والله الخبر مفرح وبسعدنا كثير جدا
ونحن اتفرجنا على الفيديو المصور للعرض السابق بس الصورة ما واضحة بس يعني كمان الاغنيات المختارة ما ماشة مع العولمة والنظان العالمي الجديد

يا حليلكم ليكم زمن من السودان وما عارفين العروس بقوا بيرقصوها بي شنو
يا حليل زمن (ارحكا روما
وناس (ورا ورا ورا
وحجة كولن كولن
ووين وين تلقوا زي ده
دشكة دشكة دشكة أوه دشكة
والكشة جات
يا بلال على
وسيد العربية
والبنسلين يا تمرجي

هسه جات حاجات جديدة
وبقت بالواضح الما فاضح
ومفروض انتو تجددوا الاغاني في العروض القادمة عشان تكونوا مواكبين للتطور (الحضاري) الذي جدد أغاني البنات بتعبيره عن الحال والواقع
عند بنات النيل
يعني الاغاني الزمن ده غير الزمان القديم
والامثلة كثير ومنها على سبيل المثال :
- جاياك جاياك يا اب شرة جايا افتو معاك يا أبشرة
- بختي أن شاء الله راجل أختي
- كان بالضرا انشاء الله راجل مرة
- الزول ده كان زولي
- ركبني عربيتو وعرفني بي بتو الزول ده انا قبلتو
- سجل لي عرباتك وعماراتك (وبوستاتك)
- انتظرتو لما ما جه ... انتظرتو تاني وثالث ورابع
- ومغص مغص يا العزابة
- حبيبي سافر جدة
- المغتربين المفلسين

وغيرها من أغاني البنات الجديدة التي تنبت كل يوم وتخرج زرعا أقصد اغنية تصور الحال الوصلنا ليهو الزمن ده وأنا عارف تصوير الحال من المحال بس اعملوا لينا نقلة في النغمة

وبعدين كمان لاحظنا في العرض السابق أنو ما فيش أقوان ويبدو لي أنو العروسات ديل (طرد) والعرسان بتاعيينهم مغتربين ساكت ما موجودين عشان كدة مافي هناك وقعة أو قعدة في الواطة ونصفق ليهم (قووووووون) أو يعني المبارة اقصد العروسات ديل تمرين ساكت واخير لينا نتفرج في اقوان زيدان في البطولة الاوربية الحارة اليومين دي

المهم العمل كويس وجميل ومعبر عن التواصل الثقافي الشعبي بين دول العالم بعيدا عن قنوات السياسة الرسمية

ويا ريت تقدمو ليهم أغنية مناسبة للفترة الاخيرة وبكتب ليكم أنا مطلعها وانتو (خاصة العزيزة تماضر) تلحنوهابالايقاع الشايقي وتغنوها للأمريكان والترجمة على الشريط :
(لوسمحتو القراية باللهجة الشايقية)

سجن أبو غريب
ماهو غريب
ولا هو عجيب
يا أمريكا
أعز حبيب

سجنا فيهو بتصور
وكل حقايقو تتزور
مرات تقعد وتدور
وكل كلامك يتحور


سجن أبو غريب
ماهو غريب
ولا هو عجيب
من أمريكا
أعز حبيب

وتدخلو ماشي بي كرعيك
وتمرق منو بي يديك
لو تسكت يحلفو عليك
حتتشلخ بدون خــديك

سجن أبو غريب
ماهو غريب
ولا هو عجيب
من أمريكا
أعز حبيب

وترضى وبس تقول اقدار
ومن العسكر يا ستار
اصلهم هم كمان شطار
بيعرفو موضع الاسرار


سجن أبو غريب
ماهو غريب
ولا هو عجيب
من أمريكا
أعز حبيب

وسر السجن خلاص في بير
وعندنا زيو ياما كثير
ولا بنقدر على التصوير
ولا في حرية التعبير


سجن أبو غريب
ماهو غريب
ولا هو عجيب
من أمريكا
أعز حبيب


مع تحايتي



جمال

لا فض فوك يا أستاذى جمال السنوسي

أنور

العزيز انور

والله انت الوحيد البتواصل بتوقيعك الجميل

وبتنور لي البوستات دي

الله يخليك نور دايما

يا حلى تنوري (بالشايقية)

شكرا ليك


جمال

ملاحظات ممتازة فنحن شهيتى للبحث فى الواقع الذى افرز مثل بختى وانشاءالله راجل اختى

وتسلم ويسلمن تماضر واخواتها

اشراقة البورد

لك التحية

وضروري نفهم الحاصل قبل مايحصل

وقبل ما يجي جيل جديد

يلخبط الروابط الاجتماعية الموجودة



مع تقديري واحترامي


جمال

الاخ جمال
بالله واحده تاني على وزن

يا اللونك برتكانه
ويا الجايه من انديانا
فارقتوالبشير ما دام
بش بش معانا

يعني حاجه زي كده زمان غنوا لمنقستو

أستاذ جمال
لك التحية والشكر ، فأنت الآن تنبه لشئ هام للغاية وهو أن رقصاتنا الشعبية ليست مجرد عادة تتم ممارستها بلا هدف أو أنها عادة ميتة نحاول إحياءها كلما وجدنا لذلك فرصة ، إنما هي فن حي ومتجدد ومتطور ولا يقبل الركود ، وهناك البعض الذين يسعون إلى إلغاء بعض فنوننا الشعبية ،، لكنهم لو انتبهوا لكلمة شعبية فقط لعرفوا أنهم إنما يحرثون في البحر ،، فهذه الفنون نابعة من وجدان الشعب ،، وهو تيار جارف يقتلع من يقف في وجهه ،،
آمل أن تهتم المبدعة تماضر بملاحظاتك وأن لا تتردد بالأخذ بأحدث الصيحات في هذا الفن المتجدد ،،
ولتماضر وأخواتها ولك أستاذ جمال ألف تحية وتقدير ،،

ود الشيخ

غنيتك دي حرم علا اكملها
بس بي ياتو اتجاه
ما قادر اعرف
اكتب من اليمين
وللا من اليسار

اقول ليك

شوية وبنولع النار

ونطبخها ليك

وانشاء الله الطعم يعجبك



....

,,

ود قاسم

غنا البنوت في كل زمان ومكان وحول العالم هو رسالة واضحة وبينة تعلن عن حالة اجتماعية معينة في زمن معين لشعب معين وهو نتاج طبيعي لتداخل المناخات السياسية والاجتماعية والاقتصادية
وحقيقة لو عايز تعرف من ماذا تشكو الشعوب والى ماذا تتطلع استمع الى غناهم البسيط بالكلام الدارجي واللهجات المحلية وستعرف كل المستخبي عن القنوات الرسمية

ويكفيك ان تستمع اي غنا عربي جديد (ارجو أن تسمع بعينيك) وستعرف الحالة العربية العامة

حاشية : هناك اختلاف كبير بين الاذن والعين هذه الايام وتشكو الاذن من ان العين تتدخل في اختصاصاتها فصارت منذ فترة تسمع وتنظر وتستمتع
فلم نعد نسمع الغناء من الاشرطة بل صرنا نشاهده وضاعت متعة الاستمتاع بالصوت وبقيت متعة الاستمتاع بالنظر ولا نستطيع الآن التفريق بين هذه او تلك الاغنية الا عن طريق الفيديو كليب



لك الشكر ود قاسم



جمال