Post: #1
Title: لمن كنت صغيرة بلعب في الموكيت ... ماما لبستني الجزمة والتي شيرت !! !!
Author: جمال السنوسي
Date: 01-09-2007, 03:39 PM
Parent: #0
ده نشيد أطفال قدم في التلفزيون السوداني من أحد رياض الأطفال
يبدو أن دارجيتنا تغيرت كثيراًً وكثيرا جداًً
زمان كنا نقول يا زول
هسه ... يا فردة
القروش الكتيرة .. السمينة
فارقنا بالله ... شتت بالله
الوالد بقت من الحاج ثم الجلكيم ثم العجوز
وهلم جرا
حليل زمان نشيدنا كان
لمن كنت صغيرة بلعب بالتراب
ماما لبستني الجزمة والشراب
حليل علب اللبن البنصلحها عربيات
وترتار العربية وترتار العجلة
حليل مشاية الخشب
وبلي فريت (أغطية زجاجات المشروبات الغازية)
حليل أم الحفر وسكج بكج
وحرينا
يا أخوانا زمان كنا بسيطين ومساكين وما عندنا ولا عند أهلنا قروش كتيرة زي هسه
لكن كل السودان كان بيدرس مجان وبياكل 3 وجبات وبيلبس جديد في العيد
ونزوغ ونمشي شارع النيل في العيد ونركب المعدية لي توتي بالدس
ونعوم ونرمي ملابسنا المبلولة ونرجع البيت بالبنطلون والقميص بس
يا اخوانا كنا شطار
وكانت هناك منافسة شديدة وغيرة أكاديمية في الفصل تلاقينا بنعمل النتائج قبال مرشد الفصل
ونعرف الأول منو والتاني وكلهم
كان البينجح فبنا بيودوهوالمدارس الحكومية بحكم مجموعو الكبير
كان ناس الخرطوم بفتخرو بي مدرسة الخرطوم الاميرية المتوسطة واالخرطوم القديمة والخرطوم
الجديدة وناس بحري بي بحري الحكومية وناس امدرمان بالمؤتمر الثانوية وقبلهم كلهم وادي سيدنا وحنتوب وخور طقت
هسه البنجح بيخش المدارس الخاصة والمدارس الحكومية بقت مامرغوبة
يا اخوانا وين نحن هسه من الزمن داك
اتوسع التعليم الخاص وبقى النجاح بالقروش وليس بالمجهود
زمان كل مدارسنا القريناها معانا أولاد الوزرا والسفرا والموظفين الكبار وكنا نتفوق عليهم أكاديمياًيسكنون في القصور ونسكن في الاحياء الشعبية ولكننا لم نشعر اطلاقأً باي نقص تجاههم ، كنا اصحابهم ونتزاور ونذاكر ونحبهم ويحبوننا ولكن هسه ده وين .
كان درس العصر اجباري ومافي مدرس بيدرس في بيت زول دروس خصوصية
ندفع 25 قرش والدروس والمذاكرة في المدرسة
فرق كبير بين لعب التراب ولعب الاتاري
فرق كبير بين زمنا زمان والزمن الهسه
ياربي هل بيرجع الزمن تاني
يا ريت بس عشان الصغار يرجع الزمن الاكاديمي
|
Post: #2
Title: Re: لمن كنت صغيرة بلعب في الموكيت ... ماما لبستني الجزمة والتي شيرت !! !!
Author: جمال السنوسي
Date: 01-10-2007, 08:50 AM
Parent: #1
>>>><<<<<
|
Post: #3
Title: Re: لمن كنت صغيرة بلعب في الموكيت ... ماما لبستني الجزمة والتي شيرت !! !!
Author: ياسر نجيلة
Date: 01-10-2007, 10:05 AM
Parent: #2
العزيز الغالي جمال ،،،
الموضوع مدهش ...
يحرك دواخلك حتي يصيبك الشلل من تزاحم الافكار والذكريات ،،،
مليون فكرة ومليون تعليق
انا واثق كل من قرأ سطورك "اتكهرب" وهاجت به الذكريات
وتزاحمت الأفكار ووصل لنقطة عدم التوازن " من الصح" زمن التراب والشراب ولا زمن الموكيت والتي شيرت ؟؟؟
انا شخصيا اختلف معاك الزمن الآن احسن لانو فيه شويه نظافة وصحة ال{الموكيت والتي شيرت ولعب الاتاري ومافي وساخة ولا تراب ولا وجع عيون (مرض الرمد) ولا جروح واوساخ
بس اوافق معاك في تدني التعليم والنكسه الرهيبة التي المت به،،، ياليت ترجع مجانية التعليم وقوة المدارس الحكومية ،،،
في نقاط كتيرة يا جمال ممكن ان تدخل في صميم موضوعك مثلا وللأهمية - تغير العادات والتقاليد من مواصلة الجيران وترابط اهل الحي واحترام الكبير والصغير ،،،
موضوع فعلا يصيب بالشلل ووجع الدماغ ،،،
يااخ شوف لينا موضوع خفيف ،،، يا ود يا تقيل
|
Post: #4
Title: Re: لمن كنت صغيرة بلعب في الموكيت ... ماما لبستني الجزمة والتي شيرت !! !!
Author: جمال السنوسي
Date: 01-11-2007, 08:49 AM
Parent: #3
الحبيب/ ياسر نجيلة
موضوع زي ما قلت مهم
وبرجع ليك تاني
|
Post: #5
Title: Re: لمن كنت صغيرة بلعب في الموكيت ... ماما لبستني الجزمة والتي شيرت !! !!
Author: عاصم ابوبكر حامد
Date: 01-11-2007, 11:41 AM
Parent: #1
الاستاذ
جمال
لك التحية
اخى هذا شئ بسيط جدا جدا
لسة الجديد قادم واحلى
اخى كل شئ تغر الان فى السودان دعك من الموكيت حتى الروضة بقت غريبة ....
تسلم
|
|