بــيــن قوسـين .....(........) !!!

.....
..

أهازيجك للفرح مسدار
تنور من ملامحك ضي
تزخرف صفحة المنديل
تعطر نسمة الإعصار
عيون عشاق تتاوق ليك
سنين بطَول المشوار
مستفة بالحنان والشوق
مرصعة في الجبين أقمار
قريناها وكتبناها
ورسمناها في الخاطر
ورجعنا نغالط الحاضر
ونزرع في البحر تيار
نشيل الفرحة من ايديك
ونكتب بالرحيق اشعار
نعاين ليك
ونخت عينينا في صورتك
ونسرح بالفرح فيها
نفتش في الشبه ليها
نلاقيك شبه نفسك
شبه القمرة نص الليل
وقت تندس في غيمة
تودي شعاعها ناحيتنا
تضوي الدينا بي بسمة
تخت الصورة فوق النيل
وهناك في الضفة حورية
مفرهدة جوه أحلامنا
وما بتظهر نهارية
تحب الليل
وسمر الليل
وكلام يتقال بين قوسين
(حبايبنا) (ومشتاقين)
توشوش موجة للرملة
وتكتب فيها بالأول
حروف اسمك
وتعود ترجع
وتكتب في سطر تاني
كمان أسمك
عشان الموجة حافظاهو
وحفظنا الاسم زي غنوة
نغني صباح
نغني عصير
نغني معاك طول الليل
تضيع أحلامنا قبالك
نفتش ليها هنا وهناك
نلاقي أحلامنا في جواك
ولما وقفتي قدامنا
يا حليوة
عرفنا الفرق
وكيف ممكن يقول الزول
كلام الحق
وشنو الممكن يخلي الشوق
يولع بق
شنو الممكن يخلي الجوف
يطرشق طق
تجي الأقدار
نقيف قدامك اللحظة
نمد إيدينا فرحانين
نسلم بيها في أيديك
طعم صوتك
يفيض ويبين الأحوال
وحالنا زمان ماهو الحال
أريتنا معاك من أول
عشان الدنيا تتحول
وأريتو الحزن ما طول
عشان في عينيك نتجول
نفتح باب ونقفل باب
ونحن نجيك نتسول
زمن بجمعنا من تاني
في متعة شوق
وإنت الملكة جوانا
وزول معشوق
زمن بيرسمنا في لوحة
زمن أيامو منشرحة

أصلوالقصة دون عنوان
قصة عشق للإنسان
قاب قوسين
وبين قوسين
(حبايبنا)
(ومشتاقين)
.....
..
..
.

جمال السنوسي

جمال

اخبارك كيف كويس

ونخت عينينا في صورتك
ونسرح بالفرح فيها
نفتش في الشبه ليها
نلاقيك شبه نفسك

تاريك تختفى وتظهر وانا اقول الزول ده وين وانت بهناك خاتى الصورة وتعاين

كلامك جميل بدون اى شك لكن الظاهر احنا ماعندنا طريقه نقرا المكتوب بس

(من نسى قديمه تاه )

انا هسه مهتمه بقيت عايزه ابحت عن مابين القوسين الظاهر الفربه عامله عمايل فيكم

انامن دربى بمشى افتش عن العقاب واتبنو نشوفم كمان الحاصل عليهم غايتو كان كان لقيتم

برضو هم بين قوسين تكون دى عدوى انتشرت بين الصحفيين . كور على

العزيزة ماجدة


تحياتي

فعلا ( النسى قديمو تاه)

أنا ما عارف منو العامل عمايلو

الظاهر نحن بقينا نعمل عمايل في الغربة وليس العكس

وبين قوسين ( يا حليل ايام الخرطوم )

يا رب نتلم تاني في هذه الدنيا (كل الشلة )

عشان كل زول يقعد يفتش بين القوسين

لك مني مليون قوس وقوس

وشكرا

جمال

ياااا روعتك
ونحن برضو مشتاقين
مشتاقين والشوق غيمة ومطرتين

طلتك دائما بتجى بالمعتق منك
ليك وحشة قدر جمال حروفك اخى جمال
اتمنى ان لا تحرمنا من روعتك البتشبهك براك
كلامك مارق من الجوف
تسلم يا وريف
شكرا اخى جمال على اللوحة الرائعه
شكرا معطونة فى حروفك

اسماء الجنيد / مسقط

سلامات جمال

انت كويس

عارف من الحاجات الجميله زمان انو الناس ماكانت محتاجه تفتش بين(.......) ولاحاجه

كل حاجه واضحه الناس جميله بتحس ببعضا التفكير كان مختلف الاهتمامات مختلفه والله العظيم الناس

برضو كانت مختلفه ياريت فعلا لوالزمن يرجع بينا تانى كان فى حاجات كتيره اختلفت الشله القديمه

معاى هنا عدد منهم الباقين موزعين فى الدنيا الواسعه دى .

تحياتى

Soma

أختنا العزيزة

أنا لو عارف أقواسي دي بتجيبك بي جاي كان ختيتها زمــــاااااان

أحوالك كيف

لينا زمن من طلتك

الظاهر العام الجديد حنشوفك كتير

ودي تباشير طيبة

بس كتري لينا من حروفك المنمقة

ويا ريت يرجع البورد لي زمنه الجميل وتتفرهد أزهاره من جديد عشان ترجع الفراشات الجميلة بحروفها الزاهية (زي ناس سوما) وتحلق في سماءنا من جديد

تسلمي يا بت الجنيد

ومليون شكر على مرورك وتوقيعك هنا

....

...

..

جمال