Post: #1
Title: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-21-2009, 09:28 PM
رباطابي مسافر للسعودية مشي يقطع تذكرة السفر من الوكالة وكانت الموظفة حنكوشة اخرت عمك اكثر من ساعتين بعد داك قال ليهو ياعمو تذكرتك عايزة ذهاب واياب قال ليها لا خليها بخروج المهزوم يابنيتي
رباطابى راكب جمل وببيع النبق والحرجل جات بت حنكوشة تشتري منو وقالت ليهو عمو جملك ده بضرب؟
قال ليها: لا بعمل مس كول بس
ولد رباطابي قرصتو نمله في بطنو شغال يكرش كرش شديد قامت امو سألتو قالتلو ياود قرصتك نمله
قاليها نان بحك لي في اسكراتش
الرباطابى للشايقي بعد ما اكل خروف السماية: اها التومات سميتن شنو
السنجك: عبير واريج
الرباطابى : الشئ شنو مناديل ورق
رباطابى صلى الجمعة فى مسجد أنصار السنة
الإمام قال السلام عليكم مد يدو للزول الفى يمينو
قال ليهو تقبل الله
أنصارى السنة رفض يمد يدو
قال ليهو دى ماورد فيها نص
الرباطابى فال ليهو
نان الإحراج ورد فيهو نص؟
الرباطابى والجعلى مسافرين سوا
الموية العندهم كملت
قوم يالجعلى انزل فى الواطة حفر
الرباطابى مشى جاب ليهو سعف
وقعد يضفر فيهو
اها الجعلى كمل الحفر والموية مرقت
صاحبنا الرباطبى نزل دلوه فى البير
الجعلى طب مسك ايدو
الرباطابى قال ليهو
هسى ايدى مسكتها ودلوى حميتنى انزلو ، دحين بيرك دى الا كان تتكيها
رباطابية سافرت بالقطر مع ولدها ....و القطر اتعطل فى السكه...
المهم لمن قرب يصل للمحطه جاها الكمسارى ودار بينهما الحوار التالى :
تذاكر يا حاجه
ادتوا تذكره واحده...
سالها وين تذكرة ولدك ...ده
ردت: الوليد ده صغيــــر ما بقطع ليهو تذكرة..
الكمسارى: ده ولد صغير ??? ده شنـــبو قايـــم !!!!!!
الرباطابية: والله...والله شنبــــــو ...قام فى قطــــركـــم ده !!!!!!!!!!
رباطابي في الحرم وبيصلي جنبو واحد بعد ماانتهت الصلاة قال ليهو حرما ياحاج الرباطابي قالو
نان قالولك نحن في استاد المريخ
رباطابى متزوج ليهو 3 حريم لاقاهو واحد صاحبو سالو عامل كيف مع التلاته رد الرباطابى والله زى بتاع البنقز طوالى مع الاتنين الصغار ومره مره بدى الكبيره نقره
واحد بيحكي لرباطابي عن أنواع الثعابين، قال ليهو
في نوع مع عضّتو للزول بيخلّي أسنانو جوّه جسم الزول
الرباطابي: أها وكان لاقاهو زول تاني في نفس اللحظة؟
قال ليهو: ربّنا بيقوّم لو سنون جُداد وتااااني بيغرسن في جسم الزول التاني
الرباطابي: هو الشي ده دبيب وللا دبّاسة؟
واحد رباطابى معزوم عشاء مع واحد صاحبو مشى لقى الكهرباء قاطعة قعدو يتونسو مسافة الرباطابى جاع جوعه شديدة قال لى صاحبو ياخى الزمن فات وانا جيعان ياخى طلع لينا العشاء دا صاحبو قال لية ياخى العشاء ما بطلع الا الكهرباء تجى... الرباطابى قال لى اصلو دا عشاء ولا شريط فيديو
اها قالوا واحد بلدياتنا مسطح في القطر جا العسكري خلا الناس المسطحين كلهم
وساق ليك بلدياتنا اها في القسم الضابط سألو جابوك هنا مالك يازول
قال ليهو والله يا جنابو انا منزلني عينة
جزار رباطابي واحد قال ليهو اديني راس خروف وصلحو فرد ليهو اعمل ليهو نظارة يعني
في الرباطاب جابو ليهم استاذ دنقلاوي وفي اول يوم عايز يستفز الطلبة فكتب في السبورة جاءت محمد و قال
للطلبه اعربوها فرد ليهو واحد شافع جاء فعل ماضي ناقص التاء تاء الدناقله محمد فاعل
رباطابي مشي ينادي الداية لمرتو الساعة 2 صباحا دق ليها الباب جات زهجانة قالت ليه:
مالك داير شنو قاليها: دايرك تطهريني
رباطابي مركبوغرقت مشى يعمل بلاغ العسكري قال ليهو غرقت وين قال ليو في شارع الظلط
بابكر بدري عليه رحمة الله قال لمن فكر في كتاب
امثال سودانية قال احسن ابدأ من اهلو الرباطاب
فمشي هناك وطرح عليهم الفكرة قام واحد قال ليهو
انت هسع تعبان كدي وجايئ من امدرمان عشان الكلام دا
بابكر بدري قال ليهو ايوا
زولو الرباطابي قال ليهو طيب اكتب ( الفايق.......يهمز امه)
رباطاب عندهم بنطون عطلان وقاعدين طول النهار بيعافروا عشان يطلعو البنطون من البحر عشان يصلحو..
جا واحد قاليهم: انتو البنطون دا مطلعنوا من البحر ليه؟
رد عليهم واحد زهجان: والله البحر ما نفع معاهو قلنا نجرب الظلط..
قالوا واحدة من حريم الرباطاب كانت بتبيع زلابية وطعمية للركاب في محطة ابوحمد
الايام ديك شغلوا القطر الاكسبرس وكان ما بيقيف في اي محطة
المهم القطر جا ماشي فيها بووووو
وماباعت اي حاجة قامت رجعت البيت
قام الراجل قال ليهاانشاء الله بعتي كويس الليلة
قامت ردت قالت
بعت شنو الشئ جا ماشي فيني زي ترجمة الفلم الاجنبي
رباطبي عسكري مرور .. بلغوه أنو في باص إنقلب .. مشه مكان الحادث لقى الناس كلها ميتين ماعدا واحد ..
قال ليهو : أه يالصـــــندوق الأســـــود .. الحادث حصل كيف ..
رُباطابي فتح دُكان جاب واحد شيخ قرا فيهو يس
أول شهر الدكان رِبح 4 مليون ..الشيخ سمع جا للرباطابي
قال الا يشيل 2 مليون .. الرباطابي قال ليهو لي إنتَ يس دي من تأليفك
رباطابي بتاع فرن جاءهو واحد قال ليهو العيش في النار رد ليهو لا يااخوي في الجنة
|
Post: #2
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-21-2009, 09:51 PM
Parent: #1
شكرا لمرسل الايميل
ازهري ناجي من دنفر-كلورادو
|
Post: #3
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-23-2009, 07:47 PM
Parent: #2
.
|
Post: #4
Title: Re: نكت رباطاب-هم أحلي ناس ما يزعلوا مننا
Author: Yassir Bainwi
Date: 03-23-2009, 08:30 PM
Parent: #3
Seif Elyazal Burae
تسلم ياخ
وانا جاييك بالتقيل
خالص الود
|
Post: #5
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-23-2009, 09:52 PM
Parent: #4
thanks dear yassir
we wiaitng for you
|
Post: #6
Title: Re: نكت رباطاب-هم أحلي ناس ما يزعلوا مننا
Author: Omayma Alfargony
Date: 03-23-2009, 10:23 PM
Parent: #5
أخي سيف
والله مبالغة,,,
لمابطني وجعتني,,,
لا أحزن الله لك "سنا" ابدا,,,
:)
|
Post: #7
Title: Re: نكت رباطاب-هم أحلي ناس ما يزعلوا مننا
Author: نزار باشري ابراهيم
Date: 03-23-2009, 10:47 PM
Parent: #6
رباطابي قاعد جنب ابوهو تحت راكوبه فوق القيف وجنبهم زير مويه بارد والدنيا صيف الاب قال لولدو يا ولدي كدى أدينى كوز موية من الزير ده الولد ملا الكوز وجابو لابوه الاب بعد ما شرب قالو تعرف ياولدي نحن المويه دي في الصيف ده نبلع فيها ساكت الولد قام قال لابوه أول يا ابوي في الشتاء كنت قاعد تلوكه
رباطاب مغتربين في بلد عربي فيهم واحد نازل اجازة المهم جاهم في بيتهم وقالهم انا مسافر كل زول عندو وصية لاهلهو يجيبها كان قروش كان جوابات كلهم ادوهو وصيتهم العندو قروش والعندو جوابات علا في واحد مطرف براهو على جنب قام سالو يا فلان انت وصيتك لاهلك شنو قال وقت تقاصد اهلنا ادي حمارتك عصا
رباطاب شباب ساكنين عذابه ماجرين ليهم بيت في المايقوما بعدين قاعدين ياخروا الايجار صاحب البيت زهج منهم وقام طردهم ما خلاهم يطلعو عفشهم زى الناس قام جاب جنوبيين اجر ليهم البيت الرباطاب شالو عفشهم ومشوا لقريبهم فى الحلة الجديدة قالهم مالكم بعفشكم قالوا ليهو المايقوما سقطت في يد الخوارج
|
Post: #8
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-24-2009, 02:51 PM
Parent: #6
amen Omayma
|
Post: #9
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-24-2009, 02:52 PM
Parent: #8
thanks for adding dear Nazar
|
Post: #10
Title: Re: نكت رباطاب-هم أحلي ناس ما يزعلوا مننا
Author: Seif Elyazal Burae
Date: 03-25-2009, 02:43 AM
Parent: #9
ياسر بيناوي وينك
نحن في الانتظار
سيف
|
|