أيهما المنتحر ؟ وردي أم نانسي عجاج

الاثنين حيغنوا في مسرح واحد ليلة رأس السنة

لكل منهما نكهة

مرحبا فيصل نوبي

Quote: لكل منهما نكهة

بس لو الجمهور اهتم بنانسي

وهمش وردى

هل الكلام دا برضي صاحب ضمير


وانت عارف جمهور الايام دي

شكلو كيف

حتعتمد نانسي عجاج على سلاح ابراهيم عوض

لمواجهة الامبراطور

والا سوف تطيح بالضربة المميتة

هنا يبرز التساؤل

لماذا قبل وردى بهذا وهو الذي كان لا يرضي أن

يغني معه محمد الامين في حفلة واحدة؟


هل بسبب لياقته التي ربما لا تمكنه من اكمال الحفل لوحده؟


(اتمنى ان يكون هذا هو السبب)

البروتوكول الفني المتعارف عليه هـو ان
ان يكون الفاصـل الاخـير للفنـان الاكـثر جمـاهيرا
والاكـثر شـهـره والاكـثر حـضـورا
أمـا في هـذه الحـاله فاتوقـع ان يكـون العكـس
فمـن يغـني اولا يكـون الاخـر قـد تلقـي الضـربه القـاضـيه
فمن يا تري يغـني اولا

التحية والتقدير للموسيقار والفنان المبدع محمد وردى
سعدت كثيراً بأنه مازال ينثر الفرح بإبداعه الفريد
أسأل الله له الصحة والعافية

لقاء وردى ونانسى عجاج تخطيط ذكى من منظم الحفل
لا أذكر أنى إستمعت لنانسى تغنى لوردى .. يكون
جميلاً أن تشاركه الغناء فى إحدى روائعه

ونانسى مطالبة أمام الأستاذ أن تغنى بعض أغانيها الخاصة
فهو من جيل مبدع أثرى الفن بألحانه وأغانيه ويسعد
بإبداعات الفنانين والفنانات الشباب وإن تقبل إجترارهم
لأغانى أجيال مضت دون تشويه تخليداً لها

وردى كان له حفل ساهر فى رأس السنة قبل الفات فى النادى الدبلوماسي
سبق تربعه على المسرح عرض لفرقة فنية حلمنيشية
و إبتدأ حفله الساعة ١٢ منتصف الليل
و كان قممممممممة الروعة .. و جو طرب خاص
لم يترفع وردي و لم يجامل .. بل قبل راضياً أن يكون الحفل كذلك


محمد وردى و نانسي عجاج لكل منهما جمهوره .. و لن يختلف الأمر عن العام قبل الفائت
يمكن لأي فرد أن يحجز مكانه و يأتي وقتما يشاء .. و سوف تكون أيضاً من الحفلات الخاصة !!
و السبب أن وردى سوف يقدم فيها أغنية جديدة تجرى أواخر بروفاتها الآن

يعنى بعد دا لو قالوا لينا السودان كلووووو حيغني قبل وردى
برضو راضيين
فالطرب سيادة تستوجب السمع و الطاعة!!

وردي ؟
وردي لو كحه ساكت في المايك
برضو هو الأسمح .

يديك العافية يا وردي

الاخ ابو الحسن محمد نور

حبابك

Quote: البروتوكول الفني المتعارف عليه هـو ان ان يكون الفاصـل الاخـير للفنـان الاكـثر جمـاهيرا والاكـثر شـهـره والاكـثر حـضـورا أمـا في هـذه الحـاله فاتوقـع ان يكـون العكـس فمـن يغـني اولا يكـون الاخـر قـد تلقـي الضـربه القـاضـيه فمن يا تري يغـني اولا

رغم أنو الفرق كبير بين الأثنين

بس بتبقى مسألة الجمهور البجي الحفلة

هل الغالبية جاية لوردي أو لنانسي

ومنظم الحفلةح يدخل في حيص بيص لو أكتشف
انو غالبية الجمهور جاي لنانسي مثلا
هل يقدم وردي أولا؟

تكرار

تكرار


مشكلة ارسال

فى كل الاحتمالات نانسى هى المستفيدة



تحياتى اخ حمد

الأخ عبد الدائم سيد أحمد

مرحب بيك

Quote: فى كل الاحتمالات نانسى هى المستفيدة

طبعا مستفيدة كتير ما شوية

لكن برضو خطر عليها تغني مع زول زي وردي

خصوصا لو قال ليها :

ارتعاشاتك بتحكي قصة ايامك معايا

عندها سوف ترتعش فرائصا

سأنحاز لنانسي ..
نعم, سأنحاز لنانسي ..
لى مده كده عاوز اغادر ذاكرتى المعبئه بملايين التفاصيل القديمه ..
اريد أن أصنع لى ذاكرة جديده ..
أريد أن أصنع لى تفاصيل جديده ..
قيل: ثم مضى بعيدا عن بسطام غير عابئا بالموعظة الحسنه
والتى تبذل هنا وهناك للهاربين نحو ذواتهم
وهى نانسي .. هى نانسي
وشقي أنا ومجنون ..
ولوردى ( اقمصتى القديمه, فليمزق ما يشاء )


..
نانسى يا اخوانا مدهشه ..
زى وردى !!!
او الا قليلا .. وربما زى وردى واحد.. وربما أقل
فلنشد جميعا على يدها ..
كى تصنع تأريخا جديدا للغناء
وذاكرات جديدات " لنا, لكم, وللصغار القادمين"
او كما قال الصادق الرضى

الأخ نادر
تسلم

Quote: التحية والتقدير للموسيقار والفنان المبدع محمد وردى سعدت كثيراً بأنه مازال ينثر الفرح بإبداعه الفريد أسأل الله له الصحة والعافية لقاء وردى ونانسى عجاج تخطيط ذكى من منظم الحفل لا أذكر أنى إستمعت لنانسى تغنى لوردى .. يكون جميلاً أن تشاركه الغناء فى إحدى روائعه ونانسى مطالبة أمام الأستاذ أن تغنى بعض أغانيها الخاصة فهو من جيل مبدع أثرى الفن بألحانه وأغانيه ويسعد بإبداعات الفنانين والفنانات الشباب وإن تقبل إجترارهم لأغانى أجيال مضت دون تشويه تخليداً لها

ومعك نحي الهرم وردي وعمر مديد له باذن الله

انا كان عندي رأي سلبي في نانسي
ولكن علمت انها تربت خارج السودان
وكان لها بعض المشاكل مع اللغة في البداية
ولكن اخيرا شعرت بتحسن كبير في ادائها وخصوصا في اغنية المصير (ابراهيم عوض)

ورأيك بتاع انو تغني اغنية اغنيتين لوردى دا سليم 100 %
عشان تخلق شئ من الحميمية في أجواء الحفل
ويبعدها من حتة المقارنةالبتكون في غير صالحها
بس لازم تختار صاح عشان

يا زول إنت ما نصيح؟

شن جاب نانسي عجاج (صاحبة الصوت الضعيف)

لمحمد وردي

و أقول محمد وردي فقط لأن الألقاب في نظري تقلل من شأنه الذي لم يصل إليه أحد من الفنانين

متعك الله بالصحة و العافية يا من يريحنا غناؤك و صوتك

مرحبا ليلي عزالدين

Quote: يعنى بعد دا لو قالوا لينا السودان كلووووو حيغني قبل وردى برضو راضيين فالطرب سيادة تستوجب السمع و الطاعة!!

طبعا حنرضى، ف وردي هو المتوج دوما ونحن دوما نرحب بشوقنا اليه

وبعودته حبيبا ابديا يطربنا حتى نستغيث فهو الجميل المستحيل

الذي يغني كما غنى الخليل.



بس يا ليلي خوفي الأول في محلو

مستمعين الزمن دا ما مضمونين (وجه خائف)

عثمان موسى

مرحبا

Quote: وردي ؟ وردي لو كحه ساكت في المايك برضو هو الأسمح . يديك العافية يا وردي

الله يعينك وردي دا شكلو كدا مجهجهك شديد

هو الأسمح والأفضل في كل الحالات

ولا بتهبش

لا اعتقد ان هناك مجال للمقارنه بين الموسيقار وردي ونانسي عجاج
هذا اجحاف وتقليل في حق هرم الغناء السوداني الشامخ
صاحب الود,وجميله ومستحيله,وارحل,وأسفاي,ونور العين وصدفه والطير المهاجر
ويقظة شعب ونشيد الاستقلال وبناديها ووطنا واكتوبر الاخضر
لا يمكن باي حال وباي منطق ووفق اي معيار ان يوضع في مقارنه مع اي مطرب سوداني
ناهيك عن فنانه مبتدئه ما زالت تتلمس خطوها في جبال الغناء السوداني والتي كان وردي ابرز مشيديها.
محبطٌ انا بان يوضع وردي في هكذا مقارنه.

حمد تحياتى

Quote: هنا يبرز التساؤل لماذا قبل وردى بهذا وهو الذي كان لا يرضي أن يغني معه محمد الامين في حفلة واحدة؟ هل بسبب لياقته التي ربما لا تمكنه من اكمال الحفل لوحده؟ (اتمنى ان يكون هذا هو السبب

والله ياحمد كلامك ده غريب ولايستند على منطق او براهين منو القال
ليك:وردى يرفض الغناء مع ود الامين او رفضه من قبل يا اخوى وردى
ود الامين غنوا ثنائى فى يوبيل وردى الذهبى وغنو ثنائى فى تكريم
محمد الامين بالمسرح القومى وهم اصدقاء اكثر مما تتخيل ويرحبون
بالعمل مع بعضهم فى اى وقت واستاد الهلال شاهد على حفل احيوه
قبل سنوات مع بعض بمناسبة اكتوبر المجيده انت جبت الكلام ده من وين؟
بعدين يا حمد وردى ماعندو قضيه منو البغنى معاه لانو قبلى كده شارك
الكثير من الفنانين الشباب حفلات مشتركه ووردى لمعلوميتك ليس لديه عقد
او مرض المنافسه لانه يعلم تماما من هو والجميع يعلم انه فنان افريقيا
الاول ولو ما متوقع انو حايكون فى كامل لياقته مابجى الحفلة مع انو وردى
بربع لياقتو ممكن يهزم اعتى الفنانين وان كنت لا اعلم ماذا تعنى بكلمة لياقه
انت شكلك لقيت الخبر وجيت بدون اى خلفيه عن وردى قلت اقول اى كلام وخلاص
متناسى انك تتحدث عن فنان عظيم ومعروف غنائيا وشخصيا ارجو ان تمدنا بالمصدر
الذى قال فيه وردى انه لايغنى مع الشباب او حتى محمد الامين واكون شاكر بعدين
غناء الواعده نانسى مع وردى شرف ليها ومافى داعى تحول البوست الى مقارنه
غير منطقيه واعذرنى اذا قلت ليك انها ممكن تكون مقارنة غبية
محبتى

Quote: سأنحاز لنانسي .. نعم, سأنحاز لنانسي .. لى مده كده عاوز اغادر ذاكرتى المعبئه بملايين التفاصيل القديمه .. اريد أن أصنع لى ذاكرة جديده .. أريد أن أصنع لى تفاصيل جديده .. قيل: ثم مضى بعيدا عن بسطام غير عابئا بالموعظة الحسنه والتى تبذل هنا وهناك للهاربين نحو ذواتهم وهى نانسي .. هى نانسي وشقي أنا ومجنون .. ولوردى ( اقمصتى القديمه, فليمزق ما يشاء ) .. نانسى يا اخوانا مدهشه .. زى وردى !!! او الا قليلا .. وربما زى وردى واحد.. وربما أقل فلنشد جميعا على يدها .. كى تصنع تأريخا جديدا للغناء وذاكرات جديدات " لنا, لكم, وللصغار القادمين" او كما قال الصادق الرضى

Quote: سأنحاز لنانسي .. نعم, سأنحاز لنانسي .. لى مده كده عاوز اغادر ذاكرتى المعبئه بملايين التفاصيل القديمه .. اريد أن أصنع لى ذاكرة جديده .. أريد أن أصنع لى تفاصيل جديده .. قيل: ثم مضى بعيدا عن بسطام غير عابئا بالموعظة الحسنه والتى تبذل هنا وهناك للهاربين نحو ذواتهم وهى نانسي .. هى نانسي وشقي أنا ومجنون .. ولوردى ( اقمصتى القديمه, فليمزق ما يشاء ) .. نانسى يا اخوانا مدهشه .. زى وردى !!! او الا قليلا .. وربما زى وردى واحد.. وربما أقل فلنشد جميعا على يدها .. كى تصنع تأريخا جديدا للغناء وذاكرات جديدات " لنا, لكم, وللصغار القادمين" او كما قال الصادق الرضى

يامحمد حيدر تحياتى

والله موضوع انحيازك ده شى بيخصك انت وما من حقنا نتدخل فيه
بعدين حكاية انك عايز تصنع لنفسك تفاصيل جديده برضو مافى
زول بلومك فيها على كيفك اصنع اى تفاصيل انت دايره وممكن
تفرغ ذاكرتك المعبئة فى اى مكان وامضى محل ما انت عايز
لكن انك تحاول تلعب بعقولنا وتقول نانسى زى وردى ده كلام
مامنطقى وماعندو اى اساس من الصحة لا زى وردى ولا اقل ولا فى
اى مقارنه وعليك الله اديها صنه ..انا اقدر اعجابك بنانسى وانا
زاتو معجب بيها لكن ان تضعها مع وردى فى مرتبة واحد ده شى
غريب وتعال يلا ورينى تلاته اغانى بس عمل خاص لنانسى وكم عمرها الفنى وشقى ومجنون
البتستعرض بيها دى ليست ملك لنانسى انما هى للفنان الكبير الكحلاوى
انا ممكن اذكر ليك مائة اغنية للفنان وردى مش كده وبس ومن الحانو
وممكن نمشى لجهابزة الموسيقى والالحان عشان يوروك من يكون وردى ومن تكون
نانسى ياخ الكلام ده لو قلتو لنانسى زاتو حاتزعل منك حرام عليك تضع تجربه
فنية عمرها اكثر من خمسين عاما قدمت كل اشكال الفن مع نانسى فى مرتبه واحده
وهى حتى الان لاتمتلك خمسه اغنيات كامله ....
الصغار القادمين ديل ماممكن نصنع ليهم ذاكرة غناء مشوهة ومزورة يعنى
انت عايز الاجيال الجايه تقصى وردى وتستمع لنانسى لمجرد انو وردى يغنى
منذ خمسين سنه ولا انت قاصد شنو ؟ ياخى لو داير تصنع للاجيال الجايه شى
جميل ومتين لابد اولا ان نشحن لهم ذاكرتهم بمثل وردى وعثمان حسين والكاشف
ومن ثم ندعهم ينطلقون ... ونانسى كان عاشت مليون سنة لن تصنع تاريخ الغناء
الذى صنعه وردى وهى تعلم ذلك والى هذه اللحظه تتغنى لسيد خليفه وابراهيم
عوض وربما تغنت فيما بعد لوردى فمن اين ستصنع التاريخ ...عليك الله ماتكلمو
وتكتبوا كلام ساكت للاستهلاك وبس وخلونا نكون منطقيا فى البورد نحن برضو بنشد
معاك على يد نانسى وبنقول ليها منتظرين منك اعمال خاصة جميله لكن ان نشدد
على يدها كى ننسى وردى فهذا مالن يحدث ولن يحدث الا لزول يكون اصلا لايعرف من
هو وردى ولا اظن ان وردى سيخرج من ذاكرة هذه الامة الا ان يرث الله الارض وماعليها
فلو حاولنا ان نخرج وردى من ذاكرتنا من هو الذى يستحق ان يكون بداخلها نانسى!!
مالكم كيف تحكمون)
مودتى

Quote: مرحبا ليلي عزالدين طبعا حنرضى، ف وردي هو المتوج دوما ونحن دوما نرحب بشوقنا اليه وبعودته حبيبا ابديا يطربنا حتى نستغيث فهو الجميل المستحيل الذي يغني كما غنى الخليل. بس يا ليلي خوفي الأول في محلو مستمعين الزمن دا ما مضمونين (وجه خائف)

خوفك الأول بتاع أن الجمهور يمشي بعد فاصل نانسى عجاج ؟

أصلاً دا اللى حيحصل

لأن جمهور وردى بيمشي الصالة بعد حداشر ونص.. و أنا و أسرتى و ناس كتير بعرفهم حيعملوا كدا ذيما طوالى بنعمل

فما مشكلة أنه جمهور نانسى يتخارج بدرى .. المشكلة شنو؟
و خوفك الأول من شنو؟

الله يرحم .. زمان كان جمهور وردى بينتظر وصول وردى للقاعة ساعات و ساعات على رصيف شارع النيل
جلوساً على الأرض و الله الظيم ..
نجى الليلة نلقى ترابيز و عشاء و فنانة محترمة ذى نانسى عجاج نقوم نتبطر؟
و مااااااالو تغنى نانسي و يغنى السودان كلو على العين و الرأس


بعدين جمهور وردى ما عنده علاقة بستمعين الزمن دا ..
بيمشي كأنه ماشي حصة فى فصل .. تسمع تطرب و تروح روحك عديل كدا هناك
جمهور وردى بيحضر الحفلة عشان وردى ما عشان رأس السنة
و بيكون متابع للجديد اللى حيتقدم ..
منو شغال إيقاع و منو شغال أوكورديون و كمان على أساس العازفين بنخمن و نراهن على إنه حيغنى شنو!!

و أغنية جديدة دى حفلتها إسمها حفل الحفلات

جمهور وردى علاقته الوحيدة بوردى و هى علاقة خاصة جداً يحكمها الطرب و وردى
و بس ..
و من حجز التذاكر .. كنا بنتقسم لجمهور وسط المسرح و جمهور الجوانب .. حسب وضع القعدة البتكيفك
دا قبل عهد الترابيز و العشاء

حفلات وردى دى حكاااااااااية ما بعرفها إلا العاشها جد

تجى تقول لي ضمانات .. ضمانات شنو؟

محمد حيدر المشرف

المتمرد : لقد اتيت بقول يدعو الى الشر فلم نؤمن به

Quote: سأنحاز لنانسي .. نعم, سأنحاز لنانسي .. لى مده كده عاوز اغادر ذاكرتى المعبئه بملايين التفاصيل القديمه .. اريد أن أصنع لى ذاكرة جديده .. أريد أن أصنع لى تفاصيل جديده .. قيل: ثم مضى بعيدا عن بسطام غير عابئا بالموعظة الحسنه والتى تبذل هنا وهناك للهاربين نحو ذواتهم وهى نانسي .. هى نانسي وشقي أنا ومجنون .. ولوردى ( اقمصتى القديمه, فليمزق ما يشاء )

اي أقمصة تريد لودري أن يمزقها اهي بناديها،مرحبا يا شوق،الحبيب العائد،

مافي داعي، جميلة ومستحيلة والمستحيلين واخواتهم

عندها سوف يعصف بك شتاء العواطف ولن تغنيك بردة بن عمير الموجودة بسوق الكاسيت والمسماة
جورا بالغناء

ام تريده يمزق عرس السودان، عرس الفداء ، بلدي يا حبوب، اكتوبر الاخضر ، اصبح الصبح

عندها ايضا سوف تفقد ربيع الثورة وسيفتك بك زمهرير من يسموا بمداح الرسول مجازا

ياخي نحن فقدنا رابط محوري كان يمكن أن يقود عجلة الغناء وهو المرحوم مصطفى سيد أحمد

وبموته ضاعت بوصلة الغناء ولم يكن امامنا غير ملاذاتنا الآمنة

وردي ، محمد الأمين ،عثمان حسين، الشفيع ابوداؤؤد الى ابوعركي وزيدان

ياسلام عليك ياليلى

Quote: حفلات وردى دى حكاااااااااية ما بعرفها إلا العاشها جد تجى تقول لي ضمانات .. ضمانات شنو؟

والله كلامك جميل وخلانى اتنفس شويه من العضب
الاعترانى وانا اقرأ سطور بعض الاخوة والله ده
اخر الزمن كمان بقى فى احتمالات انو نانسى
تهزم وردى جماهيريا والله على الدنيا السلام وعليك يافن الف
سلام

مدثر قرجاج ..
تحياتى ..

المسأله ليست وضع الاستاذ محمد وردى والفنانه نانسي فى كفتى ميزان لمعرفة ايهما أثقل فى موازين الابداع .. ما كان هذا مدخلى لتساؤل " ايهما المنتحر "
فالمسأله محسومه ان كانت كذلك ..
مدخلى, وهو شخصى جدا ولا يستدعى غضبتك المضريه هذه, كان أن أنفتح قليلا على الجديدكبديل لاستغراقى التام - كحال أغلب السودانيين - فى التفاصيل القديمه, توقفت عجلة الابداع طويلا عند تلك المحطات التى ذكرتها أنت, عثمان حسين ووردى وابراهيم عوض وغيرهم.. وكان عركى ومصطفى امتدادا جميلا الا انهما ما كانا ضمن تيار واسع يعبر عن نهوض عام فى مجال الاغنيه السودانيه, وتقف عقد الجلاد غير بعيده عنهما..
وخلاص, اغلقنا على ذائقاتنا بالضبه والمفتاح, وداخل تلك الاسوار القديمه, وانتهى الموضوع
ولكن, تصوري للغناء يحتم تفاعله المباشر مع اللحظه الآنيه, وقدرته على صناعة الدهشه, ولا دهشه ابدا فى القديم, وكيف يدهشنى القديم؟!.. وهكذا, وكل مافى الامر استعدادى الان لسماع نانسي والذى اتوقع ان تقابله بابداع الجديد, وهو ميثاق ما بينى واى فنان يا عزيزي, طالما وجد القبول وامتلك الموهبه والشخصيه والحضور والثقافه والوعى والجمهور, فلا شيء قد يحد من انطلاقه نحو تجاوز الاسوار القديمه ..
هذا كل مافى الامر, وارجو تفهمك يا عزيزي ..

تحياتى

Quote: ياسلام عليك ياليلى Quote: حفلات وردى دى حكاااااااااية ما بعرفها إلا العاشها جد تجى تقول لي ضمانات .. ضمانات شنو؟ والله كلامك جميل وخلانى اتنفس شويه من العضب الاعترانى وانا اقرأ سطور بعض الاخوة والله ده اخر الزمن كمان بقى فى احتمالات انو نانسى تهزم وردى جماهيريا والله على الدنيا السلام وعليك يافن الف سلام..

سلام يا مدثر



و الله جمهور وردى ما بشوف عوائق بينه و بين حفلات وردى
و وردى كمان بيشوف نفسه كما الشمس .. لاااااا يمنع ظهوره شيء

و قبل الحفلة بأسبوع .. بيكونوا عرفوا مين وراء كواليسها و كيف خارطة ترابيزها و متين وردى حيغنى و في كورس و لا لأ
كنا بنكره الكورس لأنه بيغنى بدلنا .. و وردى عارف كدا كويس
عشان كدا كان مرات يسكِت الكورس و الجمهور ينبسط
و نغنى .. و نصفق لروحنا و ليهو

أيااااااااام .. و تفاصيل تستدعي أن يؤرخ لها التأريخ


تفرح نانسي عجاج
و تفخر سبارك سيتى
كما أحتفل المسرح القومي باعتلاء وردى لخشبته بعد ثلاثين عاما بنختلف أو نتفق
و كما بكت القاعة بعودة بناديها

و نطرب نحن ..

جدى دا طوالى رافع راسنا
تسلم لينا يا روعه

ونانسى انا بحبها

سلام على صاحب البوست وضيوفه
والغاليه ليلى عزالدين

اولاً
مافى مقارنه واللى ح تنتحر هى المسكينه دى اكيد
ثانياً
عاوز افتخر بالاغنيه المسموعه الان ..........بانها من تسجيلنا فى القاهره عام1997 فى شريط يحمل اسمها .....جميله ومستحيله
وقد ساهمنا كموسيقيين فى التوزيع الموسيقى.....اه......هذا اجمل شىء افعله فى حياتى
سوررى للمفاخره....لكن.........اه ياله من عمل موسيقى


=====
تحياتى

حمد عبد الغفار سلامات،

وردي أعطى فكفى ووفى،
وصنع لنفسه مكاناً عالياً،
لا اظن بمقدور أي فنان سوداني آخر ببلوغه..
ولكن ولكن ولكن،
لن يستطيع وردي أن يأتي بجديد،
وحتى إن جاء بالجديد لن يكون بقوة القديم..
وزي ما قال ود المشرف: سوف أنحاز لنانسي.
وأيضاً سوف أنحاز لباكر، ولكل واعدٍ..
____
وإن تغنت نانسى بأغاني وردي سوف تطربني أكثر من أن يتغنى بها وردي هيمسيلف الآن..

العملاق الموسيقار محمد وردي في حوار ما قبل التاسع من يناير لـ(الأخبار) (1-2)

غناء الفنانين للوحدة كان سلق بيض و(بالحلقوم ساي) وليس من القلب!!

قصة بشير عباس والحلنقي مع البلابل ضعف في الخلق الفني!!

وردي:ليأخذوا جميع ألقابي ويتركوا لي (محمد وردي).. وهذا زمن التطاول!!

أخاف من تقديم الجديد و(راجل المرا واضربني بمسدسك) جعلت المتلقي شبه (بايظ)!!

(اليدين كلاشنكوف) و(شيل مسدسك وأديني طلقة) انحطاط!!

أجرت الحوار بالخرطوم: نادية عثمان مختار

[email protected]

ذهبت أحمل أسئلتي لأجري حوارا مطولا لـ(الأخبار) مع العملاق الموسيقار الفنان الرقيق والسياسي المحنك الأستاذ محمد وردي، وقد كانت نصف أسئلتي عن السياسة والهم الوطني، لأنني أعلم أن الأستاذ وردي ليس فنانا فحسب، ولا يمكن محاورته دون التطرق للسياسة، وهو الذي يحمل الوطن وهمومه في ثنايا القلب ومجرى الشريان!
أردت أن اسأله عن رأيه حول الراهن وتوقعه لما هو آت من سيناريوهات، خاصة وأن البلاد قد أصبحت (قاب قوسين أو أدنى) من الانفصال، ولكن فاجأني الرجل بامتناعه عن الخوض في أضابير السياسة، وقال لي حرفيا (لن أقول ولا كلمة في السياسة قبل التاسع من يناير)!!
وافقته على السكوت عن الحديث حول (الانفصال)، لكن لم أجد بدءا من أن أحدثه عن (الوحدة الجاذبة) وإخفاق الفنانين في تحقيقها، كما أخفق الشريكان في تحقيق ذلك، فرمقني الأستاذ بنظرة من يفهم محاولاتي لجرجرته للحديث حول السياسة، وقال لي (الوحدة ساكتين عليها خمس سنوات وفي آخر أيام يجوا يقولوا للفنانين اعملوا الوحدة جاذبة) في رأيي أن هذه وحدة (كاذبة) وليست (جاذبة)!. وقال إنه لو كانت الإذاعة قد بثت أناشيده العديدة بدءا من (كان جنوبيا هواها) ومثيلاتها لربما تبدل الحال ولكن..!
وكشف عن أنه كان أول من شجع الفنان أبو عركي للخروج من عزلته الفنية والظهور في الأجهزة الإعلامية مؤخرا، باعتبار أنها (بتاعتنا) وليست ملكا للحكومة!
######ر محمد وردي من محاولات الدولة لفرض اللغة العربية وجعلها اللغة الرسمية في بلد متعدد اللغات واللهجات، واعتبر أن في ذلك إلغاء للآخر! وأكد أن سلوك الفنان الشخصي ليس ملكه، بحسبان أن الفنان نفسه ملك لجمهوره. وأعرب عن كامل قلقه وتوجسه من تقديم لحنه الجديد (الرومانسي) جدا من كلمات الشاعر المصري القامة أمل دنقل، والذي يعكف على بروفاته اللحنية حاليا، وذلك لأن أغنيات مثل (راجل المرا واضربني بمسدسك) وغيرها قد جعلت من المتلقي شبه (بايظ) كما قال..
هذا، وأحاديث عديدة مثيرة كان فيها الأستاذ وردي صريحا كعادته بلا مساحيق تلون أو تجمّل وجه عباراته وآرائه الواضحة حد (الصدمة) أحيانا.. فماذا قال وردي لـ(الأخبار)؟؟ هذا ما ستطالعه عزيزي القارئ في هذه الحلقة الأولى..


تسلموا كلكم ياناس البوست

تحياتي

بعيدا عن موضوع البوست

Quote: والسياسي المحنك الأستاذ محمد وردي،

له اراء متقلبه ومتناقضه احيانا وواضحه ومصادمه احيانا

ولكنه ليس سياسي محنك