بيع منزل الفنان وردى بالمزاد العلنى

اوردت صحيفة (التيار) الصادرة صباح اليوم 21/6 بأن منزل الفنان الأستاذ محمد وردى الكائن بحى (المعمورة) والذى يتواجد هذه الأيام بالعاصمة القطرية الدوحة ان محكمة القسم الشرقى بالخرطوم قد امرت ببيع منزله بالمزاد العلنى وذلك سدادا لشركة مونتاج الهندسية التى قامت بتشييد المنزل وقد قام الفنان وردى بسداد جزء من قيمة تشييد المنزل وعجز عن سداد متبقى العقد . علما بأن قيمة المقاولة كانت 386000 ج وقد سدد الأستاذ وردى معظم القيمة وتبقى عليه مبلغ 163000 ج التى كانت هى محور القضية التى قضت ببيع منزله سدادا لتلك المديونية .
هكذا يتملطش المبدعون فى بلادى .

لا حول ولا قوة الا بالله العلي العظيم

اتصوروا دا وردي
فما بال عامة الشعب !!!!

Quote: اتصوروا دا وردي فما بال عامة الشعب !!!!

واذا نظرت جيدا ستجد جماعة (حرامى القلوب تلب )
يركبون الفاراهات التى لا نشاهدها حتى هنا عند ال سعود
ويسكنون الشاهقات التى تنافس باريس
لكم الله مبدعى بلدى
انها سياسة ومنهج حكومة تسعى لتدمير كل قيمة جميلة فى وطنى

لا حوله ولا قوة إلا بالله ،،، طيب وين صندوق دعم المبدعين، وين إتحاد الفنانين ، وين وزارة الثقافة والإعلام ، طيب وين إتحاد المحس ، طيب وين محبي وعشاق وردي ،،،،
والله لو جمعو من أي واحد بيحب وردي (1000) ألف جنيه بالقديم أراهن على أنهم سيجمعون أكتر من المبلغ المطلوب بكتيييييييييييير .. من منا لا يحب وردي من منا لم يطرب للطير المهاجر أو هدية أو لو بهمسة ، ومن منا لم تشكل أغاني الأستاذ الموسيقار محمد وردي وجدانه وعواطفه ..
لماذا لا يقيم الناس في بلادي الفن والفنانين ..
اسأل الله أن يفرج كربة أستاذنا الكبير محمد وردي ..
تحياتي : ياسر العيلفون

الأخ ياسر السر

Quote: من منا لم يطرب للطير المهاجر أو هدية أو لو بهمسة ، ومن منا لم تشكل أغاني الأستاذ الموسيقار محمد وردي وجدانه وعواطفه

..
مشكلة وردى انه لم يغن (لثورة الأنغاز) ولم يشد الرحال لشريف نيجيريا.

لو كان قيقم كان أبقبورة دفع ليهو!
جنى

Quote: لو كان قيقم كان أبقبورة دفع ليهو!

الأخ جنى ..
وردى غلطان.. كلها كانت اغنية اغنيتين لثورة (الأنغاز) وامورو كانت سلكت .

عامة الشعب يافيصل بيدوهم بالجزمة القديمة ده اذا لم يستعملوا معهم الرصاص الحى مثلما فعلوا مع سكان (سوبا المحطة.)

قلنا من زمان أن بالسودان إنقلاب والقادم غير محدد الملامح

بحيراوي

الأخ حمزاوى
نعم لا حول ولا قوة الا بالله العلي العظيم وحسبنا الله ونعم الوكيل .

Quote: بيع منزل الفنان وردى بالمزاد العلنى

الاخ قلقو

سلام

فنان القرن الماضي.. فنان افريقيا الاول!!
ويكفي اسمه... وردي!!

حرام والله حرام..

Quote: والله لو جمعو من أي واحد بيحب وردي (1000) ألف جنيه بالقديم أراهن على أنهم سيجمعون أكتر من المبلغ المطلوب بكتيييييييييييير

هذه ممكن واقتراح جميل يلزم كل زول..


بس الناس الما بقدروا ديل......
ليش بالصورة دي.. وردي يعملوا ليهوا دفتر!!




تحياتي

Quote: : والله لو جمعو من أي واحد بيحب وردي (1000) ألف جنيه بالقديم أراهن على أنهم سيجمعون أكتر من المبلغ المطلوب بكتيييييييييييير هذه ممكن واقتراح جميل يلزم كل زول..

الأخ عبدالعزيز عيسى..
اثنى معك اتراح الأخ ياسر .

Quote: انها سياسة ومنهج حكومة تسعى لتدمير كل قيمة جميلة فى وطنى

الأخ هشام عباس ,
لقد حاول الأنقاذيون كثيرا كسب تعاطف الفنان وردى او على الأقل تحييده ولكنهم فشلوا...(وآدى النتيجة) .

!!!!!

Quote: انها سياسة ومنهج حكومة تسعى لتدمير كل قيمة جميلة فى وطنى

الدخل الحكومة هنا شنو ؟؟!!!

شركة مقاولات ودايرا حقها .. ما بيهمها كان البيت بتاع وردي ولا بتاع رئيس الجمهورية ..!!

حقها يروح ساي عشان البيت بتاع وردي يعني ولا شنو ؟؟!

ووردي صاحب المقولة (إنتهى عهد التكريم بالدلاقين والخشب) ..!

وين مبلغ الخمسين ألف دولار الإستلما من شركة ليالي والمرحوم حسن ساتي ؟!

الناس طوالي جارية على الحكومة ..!!!

Quote: شركة مقاولات ودايرا حقها .. ما بيهمها كان البيت بتاع وردي ولا بتاع رئيس الجمهورية ..!! حقها يروح ساي عشان البيت بتاع وردي يعني ولا شنو ؟؟!

الأخ ناذر..
انا معك فى ان تأخذ الشركة حقوقها وعلى داير مليم من عملائها, ولكن الم تكن هناك طريقة غير البهدلة وكشف الحال ؟

Quote: انها سياسة ومنهج حكومة تسعى لتدمير كل قيمة جميلة فى وطنى

يا رب ما دخل حكومة السجم والرماد في هذه العملية!!!!!

اذا كان مطلوب منها حل مشكلة وردي فمطلوب حل مشكلة محمد احمد
وكم عدد الذين عليهم مطالبات لم يوفوها
وردي رقم كبير وصعب تجاوزه
لكنه ما كان يغني مجانا
كان يستلم عداده مقدما
وكان مفروض يكون لديه منزل فخم ووضع مادي بحجم سمعته يليق به وبمعجبيه وبسمعة الغناء السوداني
.....................
لكنها فوضي سودانية
وبهدله سودانية
ثم مطلوب من حكومة السجم والرماد أن تتحمل

سبحان الله

Quote: مطلوب من حكومة السجم والرماد أن تتحمل

أيوة يا أخي ... مفروض تتحمل ...
هذه الحكومة التي تدفع ملايين الدولارات لخالد مشعل وعشرات السيارا ت الفارهة لمنتخب كرة قدم ..لماذا لا تتحمل نفقات بناء بيت مبدع سوداني ؟؟

Quote: الدخل الحكومة هنا شنو ؟؟!!! شركة مقاولات ودايرا حقها .. ما بيهمها كان البيت بتاع وردي ولا بتاع رئيس الجمهورية ..!! حقها يروح ساي عشان البيت بتاع وردي يعني ولا شنو ؟؟! ووردي صاحب المقولة (إنتهى عهد التكريم بالدلاقين والخشب) ..! وين مبلغ الخمسين ألف دولار الإستلما من شركة ليالي والمرحوم حسن ساتي ؟! الناس طوالي جارية على الحكومة ..!!!

وهى كل البلاوى الجايه للشعب السودانى الوراها منو؟
اكيد المسأله فيها كيزان, عشان ينتقموا منه لانه رفض يغنى ليهم

انت يا ناذر خليت الهندسه وداير تبقى محامى ولا وكيل نيابه؟
المدعى العام مافى ليك طريقه لانه واحد ومعروف تابع لى وين و داير شنو

Quote: وين مبلغ الخمسين ألف دولار الإستلما من شركة ليالي والمرحوم حسن ساتي ؟!

Quote: وردي رقم كبير وصعب تجاوزه لكنه ما كان يغني مجانا كان يستلم عداده مقدما وكان مفروض يكون لديه منزل فخم ووضع مادي بحجم سمعته يليق به وبمعجبيه وبسمعة الغناء السوداني

يا اخوانا ما تنسوا ان الاستاذ وردى راجل بتعالج الى الآن من تداعيات عملية نقل الكلية ،
والدليل على ذلك ما جاء فى الخبر الذى نقله الاخ قلقو ان وردى متواجد حاليا فى الدوحة لحظة اعلان الحكم ،
وحسب علمى أن وردى يقوم برحلات متعددة بين الدوحة والخرطوم لمتابعة العلاج مع الدكتور الذى اجرى له عملية نقل الكلية فى الدوحة ،
وما يتصل بها من مصاريف سفر وإقامة وإعاشة ومرافقة
وطبيعى أن يستنزف ذلك كل ما لديه من مدخرات .

Quote: وردى غلطان.. كلها كانت اغنية اغنيتين لثورة (الأنغاز) وامورو كانت سلكت .

سلام يا قلقو
عارف بعد ده كلو ما سلم من الألسنة الكثيرة
قالوا وردي طبل للإنقاذ وقالوا وردي ساعد في الحملة الإنتخابية
وهنا في البورد ده فتحوا ليهو كم وكم بوست وكالوه وما فضلو ليهو صفحة يرقد عليها
كانت حينها إبنته جوليا في مسقط وهو ايضا كان في زيارة لها بعد عملية نقل الكلى

اصرت جوليا تدخل البورد وتدافع عن الهجوم الغير صحيح عن والدها
اصر إصرار شديد ان لا تطرق جوليا لأي هجوم لا دليل له , وبعتبر ده كلو كلام فارغ
وقال ليها بالحرف الواحد لو دايره تشتركي في سودانيز بدون ما تطرقي لي نوعية الهجوم المرتد ده , ما مشكلة
غير كده ما تشتركي خالص ولا تكتبي حر ف عن الحملة الما منها فايدة دي
وكنت وقتها موجدة معهم . وجه لي نفس الكلام وإنتي يا سوما ما تكتبي حرف وخلي اي زول يكتب بدون مصداقية وضمير
الكلام اكيد مردود ليه مدام مافي دليل , والناس عندها عقول بتميز ومصيرها الحقيقة تظهر وإن طال الزمن ...
والله على ما اقوله شهيد
وفعلا إشتركت جوليا وتجاهلت كل الهجمات الكاذبة
التحية للقامة وردي ربنا يديه الف صحة وعافية
وربنا يفرجها عليهو
وبإذن الله تفرج بدون ما يتصرفوا في بيته وبيت وليداته

قلقو ...

Quote: انا معك فى ان تأخذ الشركة حقوقها وعلى داير مليم من عملائها, ولكن الم تكن هناك طريقة غير البهدلة وكشف الحال ؟

وينا البهدلة وكشف الحال هنا !!

الشركة لجأت للقضاء لأخذ حقوقا والقضاء أنصفا.. ما وقفت قدام بيت وردي وقعدت تس###### : واااااي الحقوونييي . واااايي ابا يديني قروشي ..!

إذا صحيفة التيار نشرت الخبر الشركة ما مسؤولة ..!

Quote: إذا صحيفة التيار نشرت الخبر الشركة ما مسؤولة ..!

الأخ ناذر,
بل الشركة مسئولة. فكانت هناك الف طريقة وطريقة غير اللجوء للمحاكم وبهدلة المحاكم لنيل حقوقها من وردى .
بعدين ياناذر مالى اراك متحاملا هكذا على وردى ؟ والغريب فى الأمر انت برضو راجل فنان وده واضح من بروفايلك وكان هذا ادعى لأن تقف معه بدلا من ان تتولى الدفاع عن الشركة التى لم يكن يضيرها شيئ ان تصل لأتفاق ودى مع الفنان وردى اتفاق يراعى المكانة الأدبية والتاريخية (والصحية) لفنان مبدع ويحفظ لها حقوقها المادية.

فتحي الصديق ..

Quote: لماذا لا تتحمل نفقات بناء بيت مبدع سوداني ؟؟

طيب هو ما يصبر لحدي ما الحكومة تبني ليهو بيت .. أهو في زي عشرة الف مبدع سوداني لسع منتظرين الحكومة .. ما ينتظر معاهم ..الإستعجال ليهو شنو لو ما عندو قروش ..!

الشركة ذنبها شنو .. أمكن رئيس الشركة أنصار سنة وما بيسمع غناء زاتو ..! ذنبو شنو ؟!

نحسب ليك المبدعين من شعراء وفنانين وموسيقيين الما عندهم بيوت كم ؟!

مورتون كيفك ..

Quote: وهى كل البلاوى الجايه للشعب السودانى الوراها منو؟ اكيد المسأله فيها كيزان, عشان ينتقموا منه لانه رفض يغنى ليهم

هو متين رفض يغني ليهم ؟!

يا مورتون وردي قال لي عمر البشير بعد أول غنية (لو كنت عارف الجبهجية بيحبو غناي كنت جيت من زمان) ..!

ما تفترضو حاجات وتبنوا عليها مفاهيم غلط ..!

عشان ما ينتقموا منو الكيزان بحسب فهمك خليهو يدي الشركة قروشا والموضوع ينتهي .. في أبسط من كدا ؟!

Quote: انت يا ناذر خليت الهندسه وداير تبقى محامى ولا وكيل نيابه؟

عشان كدة الموضوع حارقني يا مورتون .. كل المسألة وردي بنا بيت وتعثر عن الدفع والناس شابكيننا كيزان ومش عارف إيه .. هسي لو سألت شركة المقاولات دي تتبع لي منو وسيدا منو زول حا يجاوب هنا ما في ..!

تسلم ..

Quote: وردي رقم كبير وصعب تجاوزه لكنه ما كان يغني مجانا كان يستلم عداده مقدما

الأخ على الكرار..
نعم وردى لم يكن يغنى مجانا ولكن هل لمثل هذا السبب لا يقف معه الناس فى محنته, وهو الذى طالما اسعدهم بفنه ؟
وبعدين ياكرار المسألة مسألة عدم تقديرنا للفنان السودانى عامة واهمالنا له حين يكبر ويشيخ ..ودونك كثير من الفنانين ولاعبى كرة القدم والممثلين الخ ...الذين تجد الواحد منهم وهو يحمل اوراقه من مكتب لمكتب مثل المتسولين حتى يتعطفوا عليهم بالعلاج او الدعم الأجتماعى .
هل يرضيك هذا ؟

Quote: وعشرات السيارا ت الفارهة لمنتخب كرة قدم

الأخ فتحى الصديق
ياريت لو كان هذا المنتخب هو المنتخب السودان, لقلنا حينئذ خير وبركة , لكن حكومتنا هذى زيها زى ضل الدليب..بترمى بره وبعيد.

No Comments

تحياتي...

المبلغ المتبقي الذي اوردته الصحيفة غير صحيح بل أقل من ذلك بكثير وقد جرت
الترتيبات لسداد المتبقي في الأيام القادمة...

ورب ضارةٍ نافعة، فقد علم الجميع الآن بأن الأستاذ الكبير وردي قد بنى منزله
بحر ماله ولم تبني له الإنقاذ كما كان يُشاع سابقا....

Quote: الشركة لجأت للقضاء لأخذ حقوقا والقضاء أنصفا.. ما وقفت قدام بيت وردي وقعدت تس س ك ب : واااااي الحقوونييي . واااايي ابا يديني قروشي ..!

الأخ ناذر,
انا تدخلت لأصلاح الكلام الكان مشطوب بواسطة بكرى على حسب فهمى من سياق مداخلتك .
لكن بأختصار الكلام ده ما بيشبهك , ولا هو ده اسلوبك الذى اعرفه انا من خلال متابعتى لما تكتب فى المنبر .

Quote: ورب ضارةٍ نافعة، فقد علم الجميع الآن بأن الأستاذ الكبير وردي قد بنى منزله بحر ماله ولم تبني له الإنقاذ كما كان يُشاع سابقا....

ينصر دينك شاعرنا القامة زمراوي
صدقت .... خليهم يعرفوا الحقيقة البحاولوا يطمسوها بأكاذيبهم , لا فض فوك يا ملك...
ريحت بالي والكثيرين من محبي ومعارف فنان افريقيا وردي
ربي يريح بالك ويسعدك وين ما تقبل
تسلم كتير كتير اديبنا الأريب زمراوي
التحايا النواضر عبرك للأستاذ الرقم وردي بلغوا كثير السلام والمحبة والإحترام
وفي حضرة جلالك يطيب الجلوس مهذب امامك يكون الكلام

والتحية للأخ العزيز قلقو لفتح البوست لكي يتنور الجميع ويعرف الحقيقة

انتو جادين ؟؟؟
انا بحححححب وردي لكن وردي لو ما سدد يكون مستنكح ..
القروش البتقولوا الشركة عايزاها من وردي دي تلاتة حفلات بس حقت عرس بتسددها ليهم ..
وردي حفلتو بي 20 لي 30 مليون يعني خميسين وصبحية وحفلة في نادي الضباط الموضوع بينتهي..
كونو وردي ما عايز يدفع وتبقى قضية راي عام والشعب يتدخل ونبقا في تبرع لي وردي وفنان افريقيا وإنهم ناس الإتقاذ فده يبقا كلام ما حبااابو ..
بوست متفرجخ ..

تخريمة :
احمد الصادق ما سدد أقساط الهمر وح يشيلوها منو ..كيف ليكم ؟

Quote: لو كان قيقم كان أبقبورة دفع ليهو! جنى

جني اها قمنا علي التنميط
اكلم ليك تراجي هسع تجي
تزازي بيك.

!!!!!

Quote: والغريب فى الأمر انت برضو راجل فنان وده واضح من بروفايلك وكان هذا ادعى لأن تقف معه بدلا من ان تتولى الدفاع عن الشركة

أنا فنان وفي نفس الوكت صاحب شركة مقاولات .. كدة الأمور بتكون وضحت ..
ولأنو الإشكاليات دي مرت علي كتير .. عشان كدة أنا موجوع ..

شركة مقاولات حقها ما جاها ولجأت لوسيلة محترمة وشرعية وهي القضاء والقضاء أنصفا ..!
شركة المقاولات دي عندها برضو إلتزامات ضرائب وأجور عاملين وسدلد فواتير مواد ..
ما بيفرق معاها لو الزول البنت ليهو محمد وردي أو فتحية الفتيحاب ..!
المهم إنو الجهة دي ما تخل بالإتفاق وتدفع العليها ..

والناس هنا جارة الموضوع ومدخلة طرف تالت اللي هو الحكومة ..!

لي شنو أنا ما عارف ..

Quote: أنا فنان

يعني انت فنان ووردي فنان؟؟
من نفس المستوي؟؟
حقو وردي يعدموهو

بالله ياطير
قبلما تشرب تمر علي بيت صغير
تلقي الحبيبة بتشغل منديل حرير
لحبيب بعيد


كل هذه الروائع
لم تجعلهم
على الاقل يصبروا
عليهم
في زمن المادة
تلقي هسع الغنت وراء
عايشة في قصر
عجبت لك يازمن
الغريبة انه الشركة بتاعت محس

شفتو كيف

لكم ودي
اماني الروح

بالله ياطير
قبلما تشرب تمر علي بيت صغير
تلقي الحبيبة بتشغل منديل حرير
لحبيب بعيد


كل هذه الروائع
لم تجعلهم
على الاقل يصبروا
عليهم
في زمن المادة
تلقي هسع الغنت وراء
عايشة في قصر
عجبت لك يازمن
الغريبة انه الشركة بتاعت محس

شفتو كيف

لكم ودي
اماني الروح

والله انة زمن الهمبتة

يا ناذر صح لسانك (قلمك)

فقد اوفيت فى ردودك


شكرا

اخي قلقو
كنت في جلسه مع ابو امنه حامد في منزله وتفاجأ احد الحضور بان المنزل الذي يسكن في بالايجار

فرد عليه ابو امنه يرحمه الله : حسن عطيه خمسين سنه وما عندو بيت ايه يعني ابو امنه ؟

هذا هو رد الفنان الملتزم اخلاقيا تجاه شعبه ووطنه وقضيته

غض النظر عن الدوله التي ترعي او لاترعي الابداع وهي كما هومعروف اوقفت من قبل الغناء وكسرت التماثيل

وفي نهاية المطاف بدات ترعي الابداع وتقيم الحفلات لتلحق السوق

اخي ناذر

شي مشين انك تقارن بين وردي وفتحيه فتيحاب


اهديكم هذه القصاصة القوقلية عن المناضلة جميله بوحريد

امة لا تحترم مناضليها لا تستحق التضحية


من المؤسف أن نرى ونسمع كثيرا من القصص المحزنة لما يحصل لمناضلي هذه الأمة من تجني في حياتهم ومماتهم


تحترم الأمم مناضليها وتشملهم برعايتها وتكريمها فنرى كيف تحترم جنوب أفريقيا بمناضليها وتشملهم برعايتها


واليوم نسمع نداء المناضلة جميلة بو حيرد تستجدي برسالة ثمن الدواء


هل هذا يجوز هل هذا من شيم الكرام


لا حول ولا قوة إلا بالله


يعجز القلم أن يعبر عن مشاعره في هذه اللحظة


عفوا جميلة بو حيرد فنحن لا نستحق التضحية

جميلة بوحيرد


من ويكيبيديا، الموسوعة الحرة


جميلة بوحريد 1935 في حي القصبة، الجزائر العاصمة


هي مجاهدة جزائرية تعد الأولى عربياً،إبّان الثورة الجزائرية على الاستعمار الفرنسي لها، في منتصف القرن الماضي.


حياتها


كانت البنت الوحيدة بين أفراد أسرتها فقد أنجبت والدتها 7 شبان،


واصلت تعليمها المدرسي ومن ثم التحقت بمعهد للخياطة والتفصيل فقد كانت تهوى تصميم الأزياء.


مارست الرقص الكلاسيكي وكانت بارعة في ركوب الخيل إلى أن اندلعت الثورة الجزائرية عام 1954


حيث انضمت إلى جبهة التحرير الوطني الجزائرية للنضال ضد الاحتلال الفرنسي وهي في العشرين من عمرها


ثم التحقت بصفوف الفدائيين وكانت أول المتطوعات لزرع القنابل في طريق الاستعمار الفرنسي،


ونظراً لبطولاتها أصبحت المطاردة رقم 1. تم القبض عليها عام 1957


عندما سقطت على الأرض تنزف دماً بعد إصابتها برصاصة في الكتف وألقي القبض عليها


وبدأت رحلتها القاسية من التعذيب من صعق كهربائي لمدة ثلاثة أيام بأسلاك كهربائية.


تحملت التعذيب ولم تعترف على أخوانها المجاهدين ثم تقرر محاكمتها صورياً وصدر ضدها حكم بالإعدام


وجملتها الشهيرة التي قالتها آنذاك


أعرف أنكم سوف تحكمون علي بالإعدام لكن لا تنسوا إنكم بقتلي تغتالون تقاليد الحرية في بلدكم ولكنكم لن تمنعوا الجزائر من أن تصبح حرة مستقلة


بعد 3 سنوات من السجن تم ترحيلها إلى فرنسا وقضت هناك مدة ثلاث سنوات ليطلق سراحها مع بقية الزملاء عام 1962.


قصة نضالها ضد الاستعمار


كان الطلاب الجزائريون يرددون في طابور الصباح فرنسا أُمُنا


لكنها كانت تصرخ وتقول: الجزائر أًمُنا،


فأخرجها ناظر المدرسة الفرنسي من طابور الصباح وعاقبها عقاباً شديداً


لكنها لم تتراجع وفي هذه اللحظات ولدت لديها الميول النضالية.


انضمت بعد ذلك الي جبهة التحرير الجزائرية للنضال ضد الاستعمار الفرنسي


ونتيجة لبطولاتها أصبحت الأولى على قائمة المطاردين حتى أصيبت برصاصة عام 1957 وألقي القبض عليها.


من داخل المستشفى بدأ الفرنسيون بتعذيب المناضلة،


وتعرضت للصعق الكهربائي لمدة ثلاثة أيام كي تعترف على زملائها،


لكنها تحملت هذا التعذيب، وكانت تغيب عن الوعي وحين تفوق لتقول الجزائر أُمُنا.


وحين فشل المعذِّبون في انتزاع أي اعتراف منها، تقررت محاكمتها صورياً وصدر بحقها حكماً بالإعدام عام 1957،


وتحدد يوم 7 مارس 1958 لتنفيذ الحكم،


لكن العالم كله ثار واجتمعت لجنة حقوق الإنسان بالأمم المتحدة، بعد أن تلقت الملايين من برقيات الاستنكار من كل أنحاء العالم.


تأجل تنفيذ الحكم، ثم عُدّل إلى السجن مدى الحياة،


وبعد تحرير الجزائر، خرجت جميلة بوحيرد من السجن، وتزوجت محاميها الفرنسي.


من الأشعار التي قيلت فيها:


قالو لها بنت الضياء تأملي

ما فيك من فتن و من أنداء

سمراء زان بها الجمال لوائه

و اهتز روض الشعر للسمراء

Quote: الدخل الحكومة هنا شنو ؟؟!!! شركة مقاولات ودايرا حقها .. ما بيهمها كان البيت بتاع وردي ولا بتاع رئيس الجمهورية ..!! حقها يروح ساي عشان البيت بتاع وردي يعني ولا شنو ؟؟! ووردي صاحب المقولة (إنتهى عهد التكريم بالدلاقين والخشب) ..! وين مبلغ الخمسين ألف دولار الإستلما من شركة ليالي والمرحوم حسن ساتي ؟! الناس طوالي جارية على الحكومة ..!!!

فى بعض الاحيان عندك مداخلات تحير بالرغم من انك فنان تنتمى لهذا الوسط من المبدعين والمواهب!
ياسيدى هذه مداخلة لى فى بوست كتبته مناشدا تقديم العون للشاعر محجوب سراج

Quote: الذين يعرفون ابجديا ت الاعلام يعرفون تكلفة البث الاذاعى للدقيقة والواحدة وكم تساوى قيمة بيعها وما هو الكسب والمردود المادى للاعلانات الناتجة عن ازدياد مستمعى الاذاعة والتلفزيون بسبب ما تقدمه هذه الاجهزة لمواد بث راقية تساهم فى استقطاب اكبر عدد من المستمعين الشئ الذى يرفع قيمة الدقيقة الاعلانية! وحيث ان شاعرنا محمود سراج هو احد هؤلاء القامات السامقة التى ساهمت فى اثراء الوجدان السودانى بالكلم الجميل الذى يساهم فى تشذيب وتهذيب النفوس بارساء قيم الحب العذرى والعفاف والاخلاص والوفاء وخاصة نحن فى زمن الفيديو كليب الذى يوشك ان ينقل ممارسة الحب لا تاوهات المحبين فقط! وبما ان شاعرنا الرقيق والذى صاغ القلائد والفرائد والخرائد المذكورة عاليه والتى ظلت تبثها الاذاعة منذ نهاية الخمسينات الى يومنا هذا وستظل تبثها طالما بقيت الاذن تعشق شأنها شأن العين والقلب والعقل فان الاذاعة السودانية وشقيقها الأصغر التلفزيون مدانان لهذا العملاق بدين لن يوفيه اى مقابل مادى!فأى جحود وأى نكران!الويل لأمة تنسى تاريخها وتتنكر لحداتها وعظمائها ومبدعيها! جنى

فقط ضع اسم وردى بدلا عن محمود سراج لتعرف ليه الناس جارية طوالى على الحكومة التى تدفع لقيقم وحارقى البخور وضاربى الطبول المسبحين بحمدها!
عليك الله يا ناذر ما تحبطنى انا بحترم قبيلة الفنانين وانت منهم!
جنى

ياناذر مافي حد لوم شركة المقاولات
نحن بنلوم سياسة الحكومة الوصلت
الفن و اهل الفن لهذا الدرك. سياسة
الحكومة الخلت وردي يهاجر سنين
في الغربة تاركاً ساحة عمله الخصبة
الفنان السوداني بطلع قروش في وطنه
مافي الغربة ذي باقية المهن. يعني لو
كان قاعد في السودان بدون ملاحقات
ما كان حيجد صعوبة يسدد بيها ديونه
وفي رواية اخرى لما احتاج قرض اساساَ.

المشير أبو قبورة!!!!!!!!!!!!!!!!
يا فاضلابى أبقبورة دى للجلابى أليلنا!
جنى

القصة ما انقاذ وما ادراك ما انقاذ
ووردي الهسي دا قعد وغنا مع عمر البشير وعبدالرحيم محمد حسين يعني حبل الود موصول
السؤال : بيتو بتاع الكلاكلة وين ؟؟؟؟
لما كان وردي جدجد وبين اهلو وناسو
معمورة شنو ؟؟؟
الشئ التاني وردي اكتر فنان لقي قروش من زمن افتتاح الكوكاكولا وجيتو الكرنفالية مرورا بال 50 الف دولار بتاعت لجنة ( منظمة ) السيدة وداد بابكر حرم الرئيس والمرحوم حسن ساتي وربنا يزيدو تاني يعملو ليهو شنو ...
الناس حتزعل بس وردي الليلة ما وردي ( يقظة شعب )
واختلاف الراي لا يفسد للود قضية ووردي الزمان خالد اغنياتو وحكاويهو وتاريخو الجميل وبيتو بتاع الكلاكلة

Quote: القصة ما انقاذ وما ادراك ما انقاذ ووردي الهسي دا قعد وغنا مع عمر البشير وعبدالرحيم محمد حسين يعني حبل الود موصول السؤال : بيتو بتاع الكلاكلة وين ؟؟؟؟ لما كان وردي جدجد وبين اهلو وناسو معمورة شنو ؟؟؟ الشئ التاني وردي اكتر فنان لقي قروش من زمن افتتاح الكوكاكولا وجيتو الكرنفالية مرورا بال 50 الف دولار بتاعت لجنة ( منظمة ) السيدة وداد بابكر حرم الرئيس والمرحوم حسن ساتي وربنا يزيدو تاني يعملو ليهو شنو ... الناس حتزعل بس وردي الليلة ما وردي ( يقظة شعب ) واختلاف الراي لا يفسد للود قضية ووردي الزمان خالد اغنياتو وحكاويهو وتاريخو الجميل وبيتو بتاع الكلاكلة

لماذا هذه القسوة!
هل تعرف كم صرف وردى ويصرف على ادوية الفشل الكلوىوالتى يبتلعها لتثبيط المناعة حتى لا يرفض جسمه الكلية المزروعة!
يا اخى نحن نتحدث عن الدولة الكيان المعنوى المتبلد الاحاسيس وليس عن كائن حى له احساس وشعور انت تقسو على وردى المبدع الفنان الكائن الحى وتدافع عن كيان معنوى!!
جنى

مرحبا يا جني ...
انا ما بدافع ولا بهاجم وانا مفطوم بالحان وردي من الابتدائية ومن وعيت للدنيا وبحبو حتي في الرطانة الما بفهما...
الامور تتخت صح ما اكتر .. ياخي المنبر دا فيهو شطحات ونطحات تحير ...
ياخي وردي مالو ومال البهدلة دي ... كان مستور وملك في الكلاكلة ... وفكرتي انو بيت الكلاكلة اتبدل مع تبديلات كتيرة صاحبت وردي البنعرفو ...
ربنا يسهل وتتحل المشكلة وربنا يشفيه ..
واسف يا جني بس والله تحولات وردي دي ماغصاني من جيتو وكلامو في حفلة العودة في افتتاح الكوكاكولا في ارض المعارض في بري وكلامو بتاع ( الرسامالية البتنمي الذوق ) ...

من هو الأولى بمناشدة البشير لدعمه يا صحافة الزمن ا...لسوء!!سراج أم خليفة!
يا ناذر البوست دا الخالق الناظر!
jini

الاسمو عبد الخالق منو كدة ..

Quote: من نفس المستوي؟؟ حقو وردي يعدموهو

الليلة قبل بكرة ..

Quote: الليلة قبل بكرة ..

يا زول ما تتوهم وتفتكر نفسك بالجد فنان
الفن سلوك قبل اي حاجة

Quote: السؤال : بيتو بتاع الكلاكلة وين ؟؟؟؟ لما كان وردي جدجد وبين اهلو وناسو معمورة شنو ؟؟؟

بالضبط قلت العاوز اقولو...


ما كان ساكن بين اهلو وحبايبو مالو ومال الديون واللعب في الما مضمون


مع اني بحب غناهو جدا.

طارق ميرغني ..

Quote: اخي ناذر شي مشين انك تقارن بين وردي وفتحيه فتيحاب

نا تزح المداخلة من السياق بتاعا ..

مداخلتي :

Quote: شركة المقاولات دي عندها برضو إلتزامات ضرائب وأجور عاملين وسدلد فواتير مواد .. ما بيفرق معاها لو الزول البنت ليهو محمد وردي أو فتحية الفتيحاب ..!

فأنا كشركة لمن أجي أبني بيت لي فتحية الفتيحاب ولي محمد وردي ما حا أفرق بينم الإتنين في التكلفة وما عشان دا محمد وردي حا ابني ليهو مجان ...

وكمان العكس في حالة البنيان بالدين أو بالأقساط أنا بقيم فتحية الفتيحاب أكتر من وردي لأني عارف فتحية بتشتغل تسعة حفلات في الأسبوع أقل شي .. صباح ومساء .. طهور وقيدومة .. نجاح وسماية .. وعدادا رامي قدام عيوني ..! وضامن قروشي بتجيني ..!

اها البيضمن لي وردي شنو ؟!

شفت كيف المقارنة مقبولة ومنطقية ..

براك جبت الكلام لي فتحية الفتيحاب .. هسي ذنبها شنو ؟!

Quote: مرحبا يا جني ... انا ما بدافع ولا بهاجم وانا مفطوم بالحان وردي من الابتدائية ومن وعيت للدنيا وبحبو حتي في الرطانة الما بفهما... الامور تتخت صح ما اكتر .. ياخي المنبر دا فيهو شطحات ونطحات تحير ... ياخي وردي مالو ومال البهدلة دي ... كان مستور وملك في الكلاكلة ... وفكرتي انو بيت الكلاكلة اتبدل مع تبديلات كتيرة صاحبت وردي البنعرفو ... ربنا يسهل وتتحل المشكلة وربنا يشفيه .. واسف يا جني بس والله تحولات وردي دي ماغصاني من جيتو وكلامو في حفلة العودة في افتتاح الكوكاكولا في ارض المعارض في بري وكلامو بتاع ( الرسامالية البتنمي الذوق ) ...

يا اخى كلنا عندنا اخطاءنا وبنحمدالله ليل نهار الناس ما بتعرف عيوبنا يا اخى المشاهير بدفعوا تمن عالى من خصوصياتهم يعنى ما لازم نحن نحزن ونبكيهم عندما يفارقوا الفانيةفقط بالمناسبةهل تعرف الاعراض الجانبية لحبوب تثبيط المناعة حتى لايرفض الجسم الكلية المزروعة!
يا اخى وردى دا عندى زى اهل بدر والله ما زعلت وما بزعل منو ولو زعلت منو بكون غلطان! يا اخى قرار الرحيل وبناء البيت قرار بهم اسرة وردى كلها وليس هو فقط!
يا اخى انا لمن اتذكر ان وردى يسعى نحو الثمانين احزن حزن شديد قبل عدة ايام رايت الكابلى فى التلفزيون حزنت وتالمت لرؤيته وهو يزوى!
يا اخى ديل من وعينا على الدنيا صحينا على اصواتهم!
انا منذ كنت صغيرا كانو ا يرسلونى الى الدكان فى الصباح الباكر لاحضار ربع رطل سكر ووقية شاى كان السودان يومها بخير كل حاجة منقو لون منقة وشكل منقة السكر موجود وليس فى التموين وانا انتظر سيد الدكان ليوزن لى السكر والشاى كنت استمع لراديو الدكان فما كانت اذنى تسمع الا اعذب الاصوات مثل صديق احمد حمدون ومحمد بابكر وعوض عمر وور اق فى التلاوة عبدالله الطيب فى تفسير القران السمانى احمد عالم واولاد حاج الماحى فى المديح احمد المصطفى وعثمان حسين وردى وبن البادية والكاشف فى الغناء ليلى المغربى فى اشراقة الصباح وفى النشرة صالحين وعبدالرحمن احمد وقبانى اخوان وحمدى بدرالدين!
يا اخى ناس وردى ديل نحن مدانين ليهم بترقية اذواقنا!
عليكم الله بيت شنو وقروش شنو!
ديل جيل ما عنده قطع غيار!
اذا فى الاعلان بقولوا زين عالم جميل!
ديل عالم شنو!
ديل عالم ملكوت!
متعك الله ايها العملاق محمد عثمان وردى بالصحة والعافية كم نحس بالعار لوقوفنا مكتوفى الايدى تجاهك!
جنى

سلام يا جني ..

Quote: عليك الله يا ناذر ما تحبطنى انا بحترم قبيلة الفنانين وانت منهم!

وعليك الله يا جني برضو حقو نحترم حق شركة المقاولات دي في إنها لجأت للقضاء وانتزعت حقها وما سكتت أو إتنازلت عشان الدايرة منو قروش هو محمد وردي ..

البوست في مجملو مفروض يتحول لي تقديم شكر للقضاء النزيه العادل الما وضع إعتبار إنو المشكو ضده هو محمد وردي ، وبناء عليه أصدرت حكم ظالم .. بل تساوى عندها وردي مع اي شخص أخر قدام القضاء وأنصفت الشركة الشاكية ..

القضية واضحة والناس جارية تحمل الحكومة المسؤولية ..

دا هو مضمون كل مداخلاتي هنا ..
تسلم ..

سلام ياشباب ..
لؤى محمد عثمان الوحيد البيجيب الخبر اليقين ..
ارجو انو يشوف البوست ..

الاستاذ محمد وردى بيتو قريب من بيت الوالد
والله لو ما شينة الواحد كان مشى سألو ليكم ..

Quote: وعليك الله يا جني برضو حقو نحترم حق شركة المقاولات دي في إنها لجأت للقضاء وانتزعت حقها وما سكتت أو إتنازلت عشان الدايرة منو قروش هو محمد وردي .. البوست في مجملو مفروض يتحول لي تقديم شكر للقضاء النزيه العادل الما وضع إعتبار إنو المشكو ضده هو محمد وردي ، وبناء عليه أصدرت حكم ظالم .. بل تساوى عندها وردي مع اي شخص أخر قدام القضاء وأنصفت الشركة الشاكية .. القضية واضحة والناس جارية تحمل الحكومة المسؤولية .. دا هو مضمون كل مداخلاتي هنا .. تسلم ..

يا ناذر انا مع حق فى شركات المقاولات اخذ حقها من فنان غنائي او صحابى جليل!
هى شركات ربحية وليست خيرية!
انا رديت عليك لاستبعادك دور الحكومة فى معالجة مثل هذه الحالات!
حكومة حتبث اغانى وردى عشرات السنين ومن خلالها تبث اعلانات لماذا لا تدعم هؤلاء المبدعين تكريما لهم على اياديهم السلفت!
جنى

سلام فيصل ..

Quote: ياناذر مافي حد لوم شركة المقاولات نحن بنلوم سياسة الحكومة الوصلت الفن و اهل الفن لهذا الدرك. سياسة الحكومة الخلت وردي يهاجر سنين في الغربة تاركاً ساحة عمله الخصبة الفنان السوداني بطلع قروش في وطنه مافي الغربة ذي باقية المهن

طيب الحكومة دي ما كان تلوموها من زمااااااااان !! ما لقيتو غير البوست دا !!!

لوم الحكومة يا فيصل بيدورلو بوست منفصل .. البوست دا أساسا مفروض يكون لي الغشادة بحكم القضاء الأنصف الشركة ..

تسلم

سلام جني :

Quote: انا رديت عليك لاستبعادك دور الحكومة فى معالجة مثل هذه الحالات

أنا ما أستبعدت دور الحكومة (قداما عشرة الف مبدع ما وردي براهو عشان تعالج حالتو) ..

لكن دور الحكومة دا حقو يتناقش في بوست منفصل لأنو البوست دا ما مكان النقاش ..


اليوست في رايي دا هو تهنئة شركة المقاولات دي على نيل حقها بوسيلة حضارية وتهنئة القضاء العادل الذي لم يحكم لوردي لمجرد أنه الفنان محمد وردي ..

دا لب الموضوع ..

لوم الحكومة وتقديم مقترحات ليها أو حتى شتيمتا هنا ما مكانو .....

معقول الواحد يصدق ان احد قمتي الفن في السودان( وطبعا القمتين هما محمد الأمين ومحمد وردي) ما قادر يسدد دينه ، مفروض الحكومة يبني للأستاذين محمد وزري ومحمد الأمين قصرين منيفين بجانب قصر الشعب... أو على الأقل تديهم قصرين من قصور الضيافة البنوها أيام القمة العربية ولهفوها الناس الكبار والقطط السمان..
واذا كان محمد وردي ما قادر يبني بيت بالكاش فماذا يفعل بقية الشعب... اللهم انجدنا يارب

Quote: معقول الواحد يصدق ان احد قمتي الفن في السودان( وطبعا القمتين هما محمد الأمين ومحمد وردي) ما قادر يسدد دينه ، مفروض الحكومة يبني للأستاذين محمد وزري ومحمد الأمين قصرين منيفين بجانب قصر الشعب... أو على الأقل تديهم قصرين من قصور الضيافة البنوها أيام القمة العربية ولهفوها الناس الكبار والقطط السمان.. واذا كان محمد وردي ما قادر يبني بيت بالكاش فماذا يفعل بقية الشعب... اللهم انجدنا يارب

ضحكتيني يا اميرة وشر البلية ما يضحك
هو محمد الامين لسه ساكن فى بيت ايجار ولا بناء ليهو بيت؟
اها وردي وعرفنا مأساته,.

Quote: بيع منزل الفنان وردى بالمزاد العلنى

العنوان !
يغنى المغنى وكل على ليلاه!
انت من وجه نظر مقاولاتية وانا من وجهة نظر انسانية!
Here we go house is made of cement and steel and home is made of love and mercy
this the difference ya Nazir
jini

http://youtu.be/z6_uN4pg8Zo

الخبر محزن

بالله ناس تسرق جهارا نهارا

وناس يبيعو بيوتها لعدم السداد

وبيت منو ؟؟
بيت وردي العظيم
لك الله يا وطن

Quote: اليوست في رايي دا هو تهنئة شركة المقاولات دي على نيل حقها بوسيلة حضارية وتهنئة القضاء العادل الذي لم يحكم لوردي لمجرد أنه الفنان محمد وردي .. دا لب الموضوع .. لوم الحكومة وتقديم مقترحات ليها أو حتى شتيمتا هنا ما مكانو .....

ومن متين بنصفوا فنان او بحكموا لصالحه فى انظمة عقائدية ترى فى الفن كفرا صراحا بواحا!
هى ما دايرة ليها قاضى عادل ولا يحزنون قضية واضحة وايه حضارية دى يعنى الشركة ممكن كان تجيب ليهو رباطين يمرقوهوا من البيت بالتهديد!
البوست عنوانه بيع منزل الفنان وردى وليس السيد محمد عثمان وردى!
بيوت الفنانين فى الدول المحترمة بعملوها متاحف موش ببيعوها وبهللوا انت فنان يا ناذر مفروض تقدر حجم الاذى النفسى الذى ستتركه هذه العملية فى نفس الفنان وردى!الانهيار فى السودان يتم فى جميع مناحى الحياة للاسف!
جنى

لا حولة ولا قوة إلا بالله
خبر محزن ومؤسف أن يتعرض لهذا الموقف فنان بحجم الوطن نقش إبداعه فى وجدان كل سودانى
نتمنى أن ينتهى الأمر على خير وأن يبقى الفنان الكبير فى منزله معززاً مكرماً


وا آسفاى إرادت المولى رادتنى وبقيت غناى
أسوى شنو مع المقدور براهو الواهب العطاى

وكأن إسماعيل حسن عندما كتب ووردى عندما لحن وغنى
هذه الكلمات كان يعنى هذا اليوم والموقف الذى يتعرض
له الفنان الكبير. .. ولو كان غناياً لشعب آخر لما تعرض
لما يتعرض له اليوم!

قلتها عندما مات الفنان هاشم ميرغنى وأقولها الآن أن الدولة
مسؤوليتها نيابة عن الشعب السودانى من رعاية المبدعين
وتوفير الرعاية والعيش الكريم لهم ولأبنائهم. نحن شعب من عاداته التكافل
الإجتماعى، والإهتمام ومساعدة من نعرفهم. ومحمد وردى يعرفه الأربعون
مليون سودانى. ولذلك الدولة عليها القيام بالواجب نيابة عنهم.
وهو قليل لا يقارن بعطاء محمد وردى الذى لا يقدر بثمن


التحية والتقدير لفنان أفريقيا محمد وردى

حيدر أخوي إنت ساكت قلبك رهيف وحنين
زول مادفع العليهو وحجزوا على البيت
كل الزملاء الافترضوا عدم مقدرة الفنان على الدفع ماعندهم معلومات مؤكدة عن وضعه المادي
ماعاوزة أقول الحكومة ماليها دخل في الموضوع عشان ما أتهم بالكوزنة وموالاة الحكومة
لكن في كل الدنيا أمور زي بتحصل والحكومة ماليها دخل فيها
ولو لي موالاة الحكومة الفنان وردي ماعندو مشكلة والدليل الصورة المنتشرة في النت وهباني فاتح بيها للان كم وخمسين بوست
موضوع آخر ذو صلة
ياريت لو ناس تانية عندهم المقدرة والامكانية يقاضوا الاستاذ وردي بنفس الطريقة ويرجعوا جزء ولو يسير من الخسارة الاتسبب ليهم بيها الاستاذ وردي و خرب بيها بيتوتهم
وببساطة قد تنجو مرة بفعلتك لكن ماكل مرة

في خبر بيقول صلاح ادريس دفع المبلغ المطلوب

وبرضو جمال الوالي التزم بدفع ما دفعه وردي

Quote: ياريت لو ناس تانية عندهم المقدرة والامكانية يقاضوا الاستاذ وردي بنفس الطريقة ويرجعوا جزء ولو يسير من الخسارة الاتسبب ليهم بيها الاستاذ وردي و خرب بيها بيتوتهم

الأخت راوية,
من هم هؤلاء الناس الذين تسبب وردى فى خراب بيوتهم؟ ولماذا لم يلجأوا للقضاء لأسترداد تلك الحقوق مثلما فعلت شركة مونتاج الهندسية؟

يا راوية
يبدو انك غاضبة على وردى
لو الصورة دى كانت من موقف ممالاة للنظام لاعطوهو فيلا رئاسية!
نقد و المهدى والمرغنى فاروق ابوعيسى منصورخالد الطيب صالح الشوش وهلمجر كلهم جلسوا مع البشير ودى حالة السودانيين فى عدم الفجور فى الخصومة عدا هؤلاء الذين لا يعرف أحد من أين أتوا!
وردى رقم فى تاريخ السودان لايمكن تجاهله برغم اختلاف اى شخص معه!
انا اعتفد ان المخلوق الوحيد الذى لايطرب هو التيس اما الاخرين فهم مكابرون اذا ادعوا انهم لا يطربون
الله يخلى لينا وردى وابو اللمين!
شركة المقاولات نحن معها فى اخذ حقها كما قلت من أيا كان فنان او صحابى جليل !شركة المقاولات هنا ليست معنية !
معنية الحكومة التى لا تصرف الا على ناسها وتترك امثال وردى وهو ثورة قومية!
الادعاء او الايحاء بان وردى يملك القدرة المالية هو اتهام لوردى بالانتهازية والاستغلال العاطفى لمشاعر الاخرين ليسددوا بدلا عنه!
مريض فشل كلوى واجرى عملية ويشترى كما هائلا من الحبوب باسعار باهظة لابتلاعها فضلا عن عددم قدرته على الكسب بسبب المرضوالاعراض الجانبية لهذا الكم الهائل من الادوية التى يبتلعها!
جنى

Quote: نقد و المهدى والمرغنى فاروق ابوعيسى منصورخالد الطيب صالح الشوش وهلمجر كلهم جلسوا مع البشير ودى حالة السودانيين وردى رقم فى تاريخ السودانلايمكن تجاهله برغم اختلاف اى شخص معه

شكرا جنى لقد عبرت تماما عن ما كنت اريد ان اقوله .

!!!

Quote: يا زول ما تتوهم وتفتكر نفسك بالجد فنان الفن سلوك قبل اي حاجة

يعني كم سلك كدا مثلاً !!!!

Quote: يعني كم سلك كدا مثلاً !!!!

الأخ ناذر ,
لماذا تصر على ان تلعب دور الخاين فى الفيلم؟
عموما الفيلم انتهى .

الأخ قلقو
تـحيّة طيّبة

لـم أشأ الدّخول والكتابة فـي شأن شخصـي فـي الـمقام الأوّل
لكنّـي والآن أرى الـمداخلات قد تـمدّدت وتنوّعت مضامينها ما بيـن
آسفة ، حزينة ، شامتة ، ناصحة ، متشفّية ، متسائلة ، متندّرة ، ومـحتارة
فقد وجب توضيح أمور مـهمّة جدّاً فـي رأيي
وقد تغيب عن علـم أصحاب الـمداخلات والآراء الـمتباينة
فـي البدء
الـمنزل الـمعنـي أشرفت علـى بنائه بالكامل
الـمرحومة الـخالة علويّة الرّشيدي
زوجة الأُستاذ وردي
وكان ذلك بعد عودته للسُّودان
ووقتها لـم يكن هو علـى علـم تام بتفاصيل بنائه
فالـمرحومة كانت قد عنت أن يتفّرغ وردي تـماماً لعبقريّته
وأن تقوم هـي بتصريف أمور أُسرتـهـما الـحياتيّة
وقد قامت بدورها بـمنتهـى الـنّجاح
عليها رحـمة الله وواسع مغفرته
وقد كانت تضحكنا تعليقات وردي
حينـما كانت الـمرحومة تـجتـمع بالـمصري الـمسؤول عن تفاصيل البناء وقتها
وتتـحدّث معه عن بعض تفاصيل بناء البيت
وكان وردي يعلّق ساخراً :
( هو البيت القّرب يكتـمل دا ما تودّونا تورّونا ليهو )
رحلت الـخالة علويّة
وداوم وردي علـى سداد الأقساط
وتبقّـى وقتها فقط مبلغ ( 130.000 )
ودار نقاش بـخصوص بعض التّفاصيل الـمختلف عليها بشأن حقيقة الـمبلغ الكامل
بيـن وردي والشّخص الـممثّل للشّركة
إنتهـى بتوجيه ذلك الشّخص لعبارات متحدّية وقاسية ومستفزّة لوردي
بأن يدفع من سكات أو أنّ الشّركة سـتلجأ للقضاء
وكـما يعرف معظـم النّاس عن شخصيّة وردي
والتـي جعلته فـي حفل زواج فـي العهد الـمايوي
يردّ علـى النّائب الأوّل وقتها
وعضو مـجلس قيادة الثّورة أبو القاسـم مـحـمّد إبراهيـم
والذي كان مدعوّاً لـحفل زواج كان وردي يغنّـي فيه
فطلب من وردي أن يغنّـي أغانـي مايويّة
فرفض وردي
ليغضب أبو القاسـم ويستفسر وردي قائلاً :
( طيّب إنت جايـي تغنّـي ليه مادام ما بتغنّـي العاوزينّو )
فردّ عليه وردي :
( أنا ما جايـي هـنا أغنّـي للعسكر ، أنا جيت أغنّـي للبِنيّات أُمّات نـهيدات )
وخرج غاضباً من الـحفل حتّـى خلع عصا تروس سيّارته فـي يده
شخصيّة وردي هذه بطبيعتها لا ترضّـى الـتّحدّي والاستفزاز
فتصدّى ( غاضباً ) للرّجل بأن يفعل ما يـحلو له
لـتلجأ الشّركة للقضاء وقتها
ويسافر وردي لقطر كعادته الـمُتّبعة منذ سنوات
لـمتابعة فحوصاته وتـجديد إقامته هناك
وتطول سفرته هذه الـمرّة لظروف أُسريّة
وتـحكـم الـمحكـمة بأن يسدّد وردي للشّركة مبلغ الـ 130.000
زائداً أتعاب الـقضيّة 70.000
وإحتـراماً للقانون وبعد إنقشاع سحابة الغضب مع مرور الوقت
لـم يترّدد وردي فـي دفع مبلغ الـ 130.000 للشّركة كاملاً
ولا يتبقّـى إلاّ مبلغ الأتعاب الـ 70.000
والتّـى قرر وردي تأجيـل سدادها لـحيـن عودته للـخرطوم
حيث أنّه سيعود للـخرطوم يوم الإثنيـن القادم 27-06-2011
وذلك لإرتباطه بتسجيلات لقناة الشّروق
ولقناة أُم درمان
حكـم الـمحكـمة لا يعنـي أنّ الـمنـزل سيباع بالـمزاد اليوم
وإنّـما بعد شهر إن لـم تسدّد الـمبالغ كاملة
والـمبالغ تبقّـى منها الـ 70.000 التـي ستُدفع الأُسبوع القادم
والقضيّة مـحسومة والبيت باقـي كما بقـى وردي عملاقاً رغـم أنوف الزّواحف




تـحاياي

.

كفيت ووفيت يا ابو ابو الورود

Quote: والـمبالغ تبقّـى منها الـ 70.000 التـي ستُدفع الأُسبوع القادم والقضيّة مـحسومة والبيت باقـي كما بقـى وردي عملاقاً رغـم أنوف الزّواحف

إنعــــــــــــل شكلك زاتو ياخ , من أمس لا قادرة اللم فيك ولا في مظفر !!
المداخلة دي ليه ما كتبتها امس وريحتنا , كلي يقين ان البيت باقى بإذن الله, لكن دايرة الناس التانية تعرف
كتيرين مقلقين على الوضع من ناحية المبدأ قبل كل شيء

رسل لي تلفون مظفر في الموبايل
سلام لي وردي السغنوني وامه

Quote: لؤى محمد عثمان الوحيد البيجيب الخبر اليقين ..

كما قلت لكم سابقاً .. شكرا يا لؤى ..

الأخ لؤى..
الف شكر على التوضيح الشافى والكافى ونسأل لزوجة الأستاذ وردى المرحومة علوية الرشيدى ان ينزل الله سبحانه وتعالى شآبيب الرحمة على قبرها وجعل البركة فى ذريتها ونسأله وتعالى ان يسبغ ثوب الصحة والعافية على الأستاذ وردى .
وعلى اولئك المتشككين فى ذمة وردى المالية ان يصمتوا.
اكرر الشكر اخى لؤى .

لؤي يا صديقي
كويس إنكـ هنــا

كفيت ووفيت يا لؤي واتيت بالخبر اليقين
وزاد احترامي وتقديري واعجابي اكثر بالفنان القامة محمد وردي
وقد كنت اعتقد انه ملياردير زيه وزي اسامة داؤود وصلاح ادريس وملياريرات السودان الجدد والذين لا نعرف كيف اتوا بأموالهم
وما زلت على رأيي بأن حكومة السودان يجب ان تسدد كل ديون الفنان وردي وتبني له قصرا بجانب قصر الشعب ومعه الاستاذ الفنان القامة محمد الأمين
وهذا اقل ما يجب ان تفعله الحكومة تجاههما لأن الشعب السوداني يحبهما

Quote: والقضيّة مـحسومة والبيت باقـي كما بقـى وردي عملاقاً رغـم أنوف الزّواحف

ليه كدا يابشمهندس؟
ليه كدا؟
الزواحف حتة واحدة
معقولة ؟ عشرة سنين تقوم بدور المهذب وتجي تطلع من طورك مرة واحدة
والله لو مالايام دي متصاحبة لي على ناس محترمين
ماكنت خليتها تعدي





___________
هسة كدي أدينا إعتذار للربتايل عمر الفاروق

مشكور لؤي علي التوضيح


مشكور قلقو

مشكور جني

البيت لا يبتني الا له عمد

ولا عماد اذا لم ترس اوتاد

تهدي الامور باهل الراي ما صلحت

فان تولوا فبالاشرار تنقاد

Quote: والـمبالغ تبقّـى منها الـ 70.000 التـي ستُدفع الأُسبوع القادم والقضيّة مـحسومة والبيت باقـي كما بقـى وردي عملاقاً

Ya Salam Luai

!!!!

Quote: الزواحف حتة واحدة

والله أنا مصدوم يا راوية !!

ليه كدة بس يا لؤي !!

الرائع طارق ميرغنى,
شكرا على كلماتك الأروع وانا آسف على عدم تمكنى من الرد على مداخلتك الجميلة الأسبق .
فلك العتبى يارجل ياجميل .

الأخت راوية,

Quote: ليه كدا يابشمهندس؟ ليه كدا؟

دى حرقتك ياراوية؟
ما أنا برضو كنت وجهت ليكى سؤآل محدد وانتى صهينتى .
ليه كدا؟

Quote: والبيت باقـي كما بقـى وردي عملاقاً

شكـرا لـؤي .. ويا دار ما دخـلك شـر!

تحياتى
والله ياقلقو
عشان احوالنا باريسية وكده اقوليك ابو الورود ده موش فنان لكل من هب ودب والله فى ناس كده بعلقوهة بادج لزوم القعدات وكده وتفسهم يفتشو اى هفوات ويلا ياطبل وهاك يازمر!!!وقعدت اليشير المهببة مسحت تاريخو بالاستيكه
وردى حبيب الشعب والحب متبادل ولم يبع قضيته ابدا!!
فى الدنيا فى حاجة اسمها الحق وفى حاجة اسمها التعسف فى استخدام الحق!!!والدولة برضو عندها ادوات ان شاءالله شركة مقاولات!!وبرضو فى شخصيات ليها وزن واحترام وتقدير وحماية موش اقل من الآثار!!
kofi

Quote: الدخل الحكومة هنا شنو ؟؟!!!

ود الخليفة ... بالحيل الحكومة ليها دخل

الحكومة التي قامت بتكريم المنتخب المصرى ( مرتين ) وصرفت ملايين الدولارات ثم عادت وقامت باهداء الحكومة المصرية عدد ( 5000 ) راس من الابقار
وكل هذا وذاك في سبيل ان تقف الحكومة المصرية الي جانب المطلوب دولياً المجرم الهارب من العدالة / البشير ...
الدول المحترمة .. تعتني بمبدعيها وتوفر لهم كافة سبل الراحة ليبدعوا ويرفعوا رايات بلادهم .. وفي البلاد التي يكثر فيها اللصوص .. لاتجد هناك من يهتم بالمبدعين
لانهم جميعا مشغولون باللهف !!!!
وبعد دا كلوا انت جاى تقول ( الدخل الحكومة هنا شنو ؟؟؟؟؟؟؟؟؟ من زى ديل وااسفاى !!!

Quote: الحكومة التي قامت بتكريم المنتخب المصرى ( مرتين ) وصرفت ملايين الدولارات ثم عادت وقامت باهداء الحكومة المصرية عدد ( 5000 ) راس من الابقار وكل هذا وذاك في سبيل ان تقف الحكومة المصرية الي جانب المطلوب دولياً المجرم الهارب من العدالة / البشير ... الدول المحترمة .. تعتني بمبدعيها وتوفر لهم كافة سبل الراحة ليبدعوا ويرفعوا رايات بلادهم .. وفي البلاد التي يكثر فيها اللصوص .. لاتجد هناك من يهتم بالمبدعينلانهم جميعا مشغولون باللهف !!!! وبعد دا كلوا انت جاى تقول ( الدخل الحكومة هنا شنو ؟؟؟؟؟؟؟؟؟ من زى ديل وااسفاى !!!

الأخ احمد محمد بشير,
نعم يحدث ذلك فى الدول المحترمة ولاعلاقة لثراء الدولة او فقرها من ان يكون مواطن تلك الدولة محترما.

وجاء لؤى بالخبر اليقين
وكل مقاول يطلع سقالته

دى بس عشان كلمه زواحف حرقت راويه اما ناذر فما عنده مشكله متعود وبيستحمل الزحف الصحراوى
ما شايفين صلعتو زاحفه كيف, كله من عمال البناء والبياض وبتاع الطوب وسعر الاسمنت الطالع ونازل

والله لكن ريحتنا يا لؤى

مشكور يا لؤى
الله يطمنك
الحمد لله الكلامى ما طلع فشوش ساكت فى الرائد وردى
ان الرائد لا يكذب اهله
جنى

بس تعليق على حتة انه وردي قعد مع عمر البشير و لا اي من كان من ناس الحكومة.. قياديين الاحزاب السياسية كلهم جلسوا مع البشير ده غير شيئ

في إنتمائم و للا فكرهم.. وردي ما غنا لثورة الإنقاذ و للا للبشير ما تخلطوا الأمور

راوية و نازر مستغربة في طريقة كتابتكم في الموضوع

شكرا اخ قلقو والحمدلله حبيبنا لؤي جاب الخبر اليقين...

الاخ ناذر انا ماعارف انت ليه دائما بتهاجم الفنانيين وانت فنان ؟؟؟

والله عيب منك وانت تقسو علي فنان قامة مثل وردي !!!

قبل فترة رديت علي بقسوة وانا لم ارد وخرجت من البوست حزين..

من اجل الفن لزمت الصمت ...

متعك الله يامحمد عثمان حسن وردي بالعافيه ويطول عمرك مع العافيه ..

Quote: القضيّة مـحسومة والبيت باقـي كما بقـى وردي عملاقاً

Quote: قبل فترة رديت علي بقسوة وانا لم ارد وخرجت من البوست حزين.. من اجل الفن لزمت الصمت ...

الفنان عماد شمت
سلام
لماذا تخرج من البوست حزينا وتلزم الصمت
يجب ان تقلم مثل هذا حجرا ليعرف قيمتك
لانه يظن انه سيصبح فنانا بمهاجمة الفنانيين
ومثل هذا الفن منه براء


والله كل زول اتصور بعود لو بقي فنان السودان ما كان وسع الفنانيين!!!


قال فنان قال

الاعتذار والرجوع الى الحق فضيلة وهو امر مطلوب فى حقنا وحق الجميع فلماذا نهرب عندما يتوجب الاعتذار بشجاعة وهو سلوك يعلى من قيمتنا ولا ينزل من قدرنا!
الرحاء من الاخوة رفع هذا البوست حتى نمكن الاخوة المعنيين من الاعتذار حتى لا يتم التحجج بحجة عدم تذكر البوست
جنى

اليومـ أكرر اليوم، سُيودع المبلغ المتبقي في خزينة المحكمة ويكون الأستاذ وردي
قد أوفى بكل إلتزاماته المالية ومن ثمّ يسكت كل الخشّامة....

.....
.....
.....

رُفعت الأقلامُ وجفّت الصحف يا جني وكل من أقلقه الحدث ولتهدأ النفوس.....
.....
.....

Quote: دى بس عشان كلمه زواحف حرقت راويه اما ناذر فما عنده مشكله متعود وبيستحمل الزحف الصحراوى ما شايفين صلعتو زاحفه كيف, كله من عمال البناء والبياض وبتاع الطوب وسعر الاسمنت الطالع ونازل

الأخ محمد زكريا,
كنت انتظر من الأخ ناذر ان ينظر للمسألة من زاوية الرجل الفنان , لا ان ينظر اليها بعين رجل البيزنس او المقاول الذى لايفكر الا بمنظور الربح والخسارة . ففى هذه الدنيا هناك اشياء لاتقدر بقيمة او ثمن .
ارجو ان يفهم الأخ ناذر هذه المسألة واذا لا قدر الله وقف هو نفس الموقف ايضا كنا سنقف معه ونتضامن معه بنفس التضامن والروح التى وقفها كثير من الأخوة البورداب والتى ظهرت فى مداخلاتهم ومساهماتهم وسنقف ونتضامن ان شاء الله مع كل فنان ومبدع .

عشان احوالنا باريسية وكده اقوليك ابو الورود ده موش فنان لكل من هب ودب والله فى ناس كده بعلقوهة بادج لزوم القعدات وكده وتفسهم يفتشو اى هفوات ويلا ياطبل وهاك يازمر!!!وقعدت اليشير المهببة مسحت تاريخو بالاستيكه
وردى حبيب الشعب والحب متبادل ولم يبع قضيته ابدا!!
فى الدنيا فى حاجة اسمها الحق وفى حاجة اسمها التعسف فى استخدام الحق!!!والدولة برضو عندها ادوات ان شاءالله شركة مقاولات!!وبرضو فى شخصيات ليها وزن واحترام وتقدير وحماية موش اقل من الآثار!!
kofi
حبيبنا كوفى
كم نفتقد كلماتك المعبرة وتعبيراتك الخرافية

Quote: وهذا اقل ما يجب ان تفعله الحكومة تجاههما لأن الشعب السوداني يحبهما

يااميرة السلطة ضلها زى ضل الدليب بترمى بعيد مثل الأخوة فى حماس (مع كامل احترامى لنضالها) وعلى الفريق المصرى وهلمجرا.وما فايقة لينا.

الاخ قلقو
تحياتي
رغم احترامي للدعوة التي قدمتها وللاستاذ وردي
لكن مثل هذه المشاكل تواجه عشرات بل مئات السودانيين
بل هناك اناس في امس الحاجة من الاستاذ وردي الي يمكنه ان يغطي هذا المبلغ من دخل حفلتين اوثلاثة
على كل ليست هذه دعوة للتقليل من شأن امر مساعدة وردي في تجاوز ازمته ولكن هي خاطرة احببت ان اشارك بها

Here we go house is made of cement and steel and home is made of love and mercy
this the difference ya Nazir
jini
يا سلام طيب الله ثرى الراحلة علوية الرشيدى واسكنها عوالى الجنان
وما اصدق قول الله جل وعل "وجعل بينكم مودة ورحمة"
بيوت الزوجية سداتها الرحمة ولحمتها المودة وعند اهل المقاولات سداتها الاسمنت ولحمتها السيخ!
بنت بيتا لرفيق دربها ولم يسعها الزمن لتشاركه فيه ليلة واحدة!
حنى

Quote: والقضيّة مـحسومة والبيت باقـي كما بقـى وردي عملاقاً

لؤي
الله يريحك دنيا وآخره ياخ

Quote: لكن مثل هذه المشاكل تواجه عشرات بل مئات السودانيين بل هناك اناس في امس الحاجة من الاستاذ وردي

الأخ ناصر ,
نعم ان مثل هذه المشاكل تواجه ملايين السودانيين كل يوم ولكن كم من هذه الملايين من اثرى وجدان الشعب السودانى مثلما فعل وردى ؟
هنا يكمن الفرق يا صديقى .

الأخ قلقو
التّـحيّة مجدّداً


تـمّ قبل قليل تـحويل كامل الـمبلغ الـمتبقّي
والآن استلم الـمحامي الـمبلغ من مندوب عن الأُسرة
تبقّت الآن إجراءات إنهاء هذه القضيّة وإغلاق هذا الـملف








وُدّي

Quote: تـمّ قبل قليل تـحويل كامل الـمبلغ الـمتبقّي والآن استلم الـمحامي الـمبلغ من مندوب عن الأُسرة تبقّت الآن إجراءات إنهاء هذه القضيّة وإغلاق هذا الـملف

الحمد لله يا لؤي ومشتاقين


فليعش وردي في هناءٍ وسرور ....

وردي يدفع مبلغ (البيت) ويعود بالإثنين

Quote: الدوحة: الرأي العام أعلن الفنان الكبير محمد وردي، أنه سيقوم اليوم الخميس بسداد المبلغ المطلوب منه للشركة والبالغ (73) مليون جنيه بـ (القديم)، وأكد في إتصال هاتفي مع رئيس التحرير من العاصمة القطرية الدوحة أمس، أنه سيعود إلى الخرطوم الإثنين المقبل بإذن الله.وشكر وردي كل من إتصل به أو أعلن مبادرته للسداد نيابة عنه وهم كثر، أصدقاء وأهل ومعجبون، وأشار إلى أن هذا الشعور الإنساني النبيل يدل على مكانته في قلوب أهله السودانيين قاطبة وهو ما يعتز به وسيكون دافعه لمزيد من العطاء والإبداع لوطنه السودان.

Quote: دى حرقتك ياراوية؟ ما أنا برضو كنت وجهت ليكى سؤآل محدد وانتى صهينتى . ليه كدا؟

يا أستاذ قلقو
لا سؤالك ولا كلام الاخ جني عن التيس أنا ماقدرت رجعت لارد علبهم
ضمنا هل أعتبر أنك موافق على الاساءة من الباشمهندس ووصف من تكلم بطريقة مختلفة في الموضوع لم ترضه
بالزواحف؟
وماعارفة كلمة (حرقتك) الاترددت مرتين في البوست دا معناتها شنو؟
لو زول أساء ليك وماحرقتك يا أستاذ قلقو تبقى جبلة ومابتحس

أما عن سؤالك
أنا مامندوبة عن الشخص الاتضرر من الفنان وردي
وممكن الباشمهندس لؤي يشرح ليك القضية دي باعتباره متحدث باسم وردي وباعتباره احد المتدخلين لحل الاشكال وباءت محاولاته بالفشل لتعنت وردي والاصرار على رايه
ودا حسب كلامه شخصسا
يا أستاذ قلقو رديت ليك بالرغم من قناعتي التامة بعدم عدالة سؤالك وبانك لاتختلف عن الباشمهندس كونك قبلت إساءة الغير في بوستك


_________________
ناذر بالمناسبة أحسن ليك تكون زاحف من الزواحف ولا تكون womanizer

نرجع لمداخلتك يا أخت راوية حتى نرى من اساء لمن .

Quote: حيدر أخوي إنت ساكت قلبك رهيف وحنين زول مادفع العليهو وحجزوا على البيت كل الزملاء الافترضوا عدم مقدرة الفنان على الدفع ماعندهم معلومات مؤكدة عن وضعه المادي ماعاوزة أقول الحكومة ماليها دخل في الموضوع عشان ما أتهم بالكوزنة وموالاة الحكومة لكن في كل الدنيا أمور زي بتحصل والحكومة ماليها دخل فيها ولو لي موالاة الحكومة الفنان وردي ماعندو مشكلة والدليل الصورة المنتشرة في النت وهباني فاتح بيها للان كم وخمسين بوست موضوع آخر ذو صلة ياريت لو ناس تانية عندهم المقدرة والامكانية يقاضوا الاستاذ وردي بنفس الطريقة ويرجعوا جزء ولو يسير من الخسارة الاتسبب ليهم بيها الاستاذ وردي و خرب بيها بيتوتهم وببساطة قد تنجو مرة بفعلتك لكن ماكل مرة

اولا : لو رجعتى لمداخلة الأخ لؤى قبل الأخيرة لأتضح لك ان الخلاف لم يكن حول مبلغ عقد بناء المنزل .
ثانيا :انتى قلتى فى مداخلتك الأخيرةأ

Quote: انا مامندوبة عن الشخص الاتضرر من الفنان وردي وممكن الباشمهندس لؤي يشرح ليك القضية

وهل كان الباشمهندس لؤى مندوب عن الشخص الأتضرر حتى أسأله؟
انا سألتك انتى لأنك انتى قلتى هذا الكلام وبالتالى انتى المسئولة عن كلامك وليس لؤى.

Quote: تـمّ قبل قليل تـحويل كامل الـمبلغ الـمتبقّي والآن استلم الـمحامي الـمبلغ من مندوب عن الأُسرة تبقّت الآن إجراءات إنهاء هذه القضيّة وإغلاق هذا الـملف

شكرا لؤى .
ولملوك السيخ والأسمنت وكل من اراد رؤية جنازة ليلطم عليها اقول : Hard luck.Game over

Quote: وهل كان الباشمهندس لؤى مندوب عن الشخص الأتضرر حتى أسأله؟ انا سألتك انتى لأنك انتى قلتى هذا الكلام وبالتالى انتى المسئولة عن كلامك وليس لؤى.

كامل الجملة كالاتي

Quote: أما عن سؤالك أنا مامندوبة عن الشخص الاتضرر من الفنان وردي وممكن الباشمهندس لؤي يشرح ليك القضية دي باعتباره متحدث باسم وردي وباعتباره احد المتدخلين لحل الاشكال وباءت محاولاته بالفشل لتعنت وردي والاصرار على رايه

يا أستاذ قلقو ماتنقص الجملة وتختار العاوزو منها
لؤي باعتاباره في البوست دا متحدث بلسان وردي
لؤي باعتباره أحد الوساطات لحل الموضوع
ليه تشيل كلامي من نصه وتبتسره؟
يا أستاذ قلقو مايمنعني من ذكر تفاصيل هو حفظ خصوصية أخرين
لكن لو أنت مصر مافي مشكلة وأظن الموضوع دا عارفينو كمية مقدرة من الناس
بس ماعارفة لما أعلن ليك إسم الشخص منو حتستفيد أنت شنو ؟ وهل هتسعى لانصافه من الفنان وردي ولا حتطاله شتمية من أحد ضيوفك برضو؟
وهل عاوزني أعلن إسم الشخص للتاكد من صدق كلامي فقط؟

Quote: زول مادفع العليهو وحجزوا على البيت

هل تعتبر دي إساءة
طيب نوضيح تاني
يا أستاذ قلقو كل الناس امام القانون سواء
كل الناس تتحاسب بقانون واحد
ومافي زول فوق القانون
دا معنى الجملة دي
ومافيها كلمة زواحف ولا إساءة ولا تقليل لشأن إنسان

لو في غيرها في كلامي إعتبرته إساءة شاور لي عليها وبشرحها ليك برضو

Quote: يا أستاذ قلقو مايمنعني من ذكر تفاصيل هو حفظ خصوصية أخرين

الأخت راوية,
ولا انا من هواة انتهاك خصوصية الآخرين .
وحتى لايخرج البوست من مساره ارجو ان نقفل هذه الجزئية من الموضوع , مع كامل احترامى لوجهة نظرك التى لا اتفق معكى فيها.

جدى زاتوووووووووووووووو بالغ
يبنى بيت بـــ 300 وخشروميت مليووووووووون لشنوووووووووووو
:((((

Quote: الأخت راوية, ولا انا من هواة انتهاك خصوصية الآخرين . وحتى لايخرج البوست من مساره ارجو ان نقفل هذه الجزئية من الموضوع , مع كامل احترامى لوجهة نظرك التى لا اتفق معكى فيها.

اوكي نقفل الجزءية من الموضوع لحفظ مسار البوست
لكن ماقلت لي هتعمل لي شنو في الاساءة الجاتني في بوستك ؟؟؟

أنا أهو واقعة ليك في عرضك لانصافي
ولرد الاساءة عني

Quote: أنا أهو واقعة ليك في عرضك لانصافي ولرد الاساءة عني

جدا ياست راوية امسحيها لى فى وشى .

وانا زااااتي يا قلقو حا تعمل لي شنو ؟؟!

Quote: وانا زااااتي يا قلقو حا تعمل لي شنو ؟؟!

حأعزف ليك مقطوعة الوسيم القلبى رادو .
اها ياناذر قصرت معاك ؟

Quote: يا راوية يبدو انك غاضبة على وردى لو الصورة دى كانت من موقف ممالاة للنظام لاعطوهو فيلا رئاسية! نقد و المهدى والمرغنى فاروق ابوعيسى منصورخالد الطيب صالح الشوش وهلمجر كلهم جلسوا مع البشير ودى حالة السودانيين وردى رقم فى تاريخ السودانلايمكن تجاهله برغم اختلاف اى شخص معه انا اعتفد ان المخلوق الوحيد الذى لايطرب هو التيس اما الاخرين فهم مكابرون اذا ادعوا انهم لا يطربون الله يخلى لينا وردى وابو اللمين! شركة المقاولات نحن معها فى اخذ حقها كما قلت فنان او صحابى جليل شركة المقاولات هنا ليست معنية ! معنية الحكومة التى لا تصرف الا على ناسها وتترك امثال وردى ثورة قومية! الادعاء او الايحاء بان وردى يملك القدرة المالية هو اتها لوردى بالانتهازية والاستغلال العاطفى لمشاعر الاخرين ليسددوا بدلا عنه! مريض فشل كلوى واجرى عملية ويشترى كما هائلا من الحبوب باسعار باهظة لابتلاعه فضلا عن عددم قدرته على الكسب! جنى

يا راوية
التيس مقصود به كيزان الحكومة أهل اللحى الذين لايحترمون الفن واهله ولا يتعاطفون معهم!
جنى

انت يا قلقو ما كان تساعد ناذر في نشر كتابه الذي نشر تفاصيله هنا في موقع سودانيز أون لاين وما تم لينا القصة وشرد، يمكن من دخل الكتاب يقدر يساعد في تسديد ديون الفنانين الكبار الذي تمتنع الحكومة عن مساعدتهم.

ويا ناذر الخليفة عملت شنو في مشروع نشر الكتاب؟ وليه ما تميت القصة

Quote: حأعزف ليك مقطوعة الوسيم القلبى رادو . اها ياناذر قصرت معاك ؟ حأعزف ليك مقطوعة الوسيم القلبى رادو . اها ياناذر قصرت معاك ؟

والله ناذر ده تحديداً كنت داير الناس تسلخوا شويه
لكن بما انه من اهل الفن فانا ح اتنازل عن حقى فى الراس والجلد
بس يوعدنا انه ما يلعب ضدنا فى المستقبل

Quote: لكن بما انه من اهل الفن فانا ح اتنازل عن حقى فى الراس والجلد بس يوعدنا انه ما يلعب ضدنا فى المستقبل

والله انت الفنان يامحمد زكريا.
تسلم ياحبيب .

Quote: والله ناذر ده تحديداً كنت داير الناس تسلخوا شويه لكن بما انه من اهل الفن فانا ح اتنازل عن حقى فى الراس والجلد بس يوعدنا انه ما يلعب ضدنا فى المستقبل

يا محمد زكريا ورونا الزول دة فنان في شنو؟
خلاص الود كبرتو ليهو راسه ويا فنان ويا فنان
بالله انا من هنا لقدام داير اعرف الزول فنه شنو؟

Quote: انت يا قلقو ما كان تساعد ناذر في نشر كتابه الذي نشر تفاصيله هنا في موقع سودانيز أون لاين وما تم لينا القصة وشرد، يمكن من دخل الكتاب يقدر يساعد في تسديد ديون الفنانين الكبار الذي تمتنع الحكومة عن مساعدتهم.

اقتراحك وجيه ياأميرة .
وان شاء الله تتغلب روح ناذر الفنان على روح ناذر البيزنسمان.

Quote: التيس مقصود به كيزان الحكومة أهل اللحى الذين لايحترمون الفن واهله ولا يتعاطفون معهم! جنى

صدقت ياجنى ولو انا اعتقد انك قد ظلمت التيس قليلا .

بعيدآ عن التداخل في السياسة وإتهام الآخرين

الفنان وردي (صاحب الأغاني الوطنية) يستحق

أن تهبه الحكومة فيلا نظيرآ لخدماته الجليلة للوطن

وتضع كمان تاج فوق رأسه ويكرم تكريم الملوك والرؤساء

الراحل المقيم الفنان المبدع عثمان الشفيع ذكر فى لقاء له مسجل وموثق انه كان يغنى فى ايام حكم الانجليز مستجيبا لطلب الجمهور اغنية وطن الجدود وانه كان يعى ويدرك تماما ان الجمهزر سذهب لينام فى بيته فى حين سيذهب هو للمبيت فى السجن فى كل مرة كا ن يغنى هذه الاغنية!
كم تساوى هذه الاغنيات
وطن الجدود
عزة
صه يا كنار
افديك بالروح موطنى
اكتوبريات وابريليات وردى واليوم نرفع راية استقلالنا
العطبراويات
مرحب بيك ياوطنى
بلد الخير
الملحمة
وهلمجرا
جنى

Quote: يا محمد زكريا ورونا الزول دة فنان في شنو؟ خلاص الود كبرتو ليهو راسه ويا فنان ويا فنان بالله انا من هنا لقدام داير اعرف الزول فنه شنو؟

جداً يا حبيب اليك المصدر فيديو كتر خير اليوتوب
والنزل الفيديو ده اسمه nazir2 وعنده فيديوهات كتيره تثبت انه ما جربو ساى


اها داير دليل تلنى انه ناذر ما قاصد وردى الفنان وانما الزبون الما دفع حق المقاول
لكن برضوا ناذر يستحق لطشه بالمسطرينه لانه دقسه المهندس بتهد العمارات الشوامق

======================
والله بيت الكلاكله كان احسن من المعموره والنقه دى

http://www.youtube.com/watch?v=0KkgEhrKirA&fe...mfu_in_order&list=UL
ياهو دة؟؟
يعني زول شغل كاميرة الكمبيوتر وافتكر نفسه فنان!!!
والله الزول فايتنا بقوة القلب

Quote: اها داير دليل تلنى انه ناذر ما قاصد وردى الفنان وانما الزبون الما دفع حق المقاول

ناذر دة مما خش المنبر متخصص يهاجم الفنانين ,,بالجد انا كنت متحسر ومفتكره فنان
بس لو الشايفه دة احسن يهاجم لانه لا ينتمي لهذه القبيلة

الأخوة المتداخلون..
ان كانت فائدة واحدة لهذه الزوبعة هى انها قد اثبتت ان الأستاذ وردى ذلك النوبى الأصيل انه شخص ذو قيم ومبادئ وانه لايباع ولا يشترى من اى نظام او من اى كائن من كان .
وهذا وحده يكفى .

الأخ اشرف مصطفى,

Quote: بعيدآ عن التداخل في السياسة وإتهام الآخرين الفنان وردي (صاحب الأغاني الوطنية) يستحق أن تهبه الحكومة فيلا نظيرآ لخدماته الجليلة للوطن وتضع كمان تاج فوق رأسه ويكرم تكريم الملوك والرؤساْء

اشرف..اهديك مقولة حبيبنا كوفى :

Quote: ءوبرضو فى شخصيات ليها وزن واحترام وتقدير وحماية موش اقل من الآثار!! kofi

فى ناس حيعملوا بارتى وكرامة يوم 30 يونيو بمناسبة أرشفة هذا البوست!
قلنا نرفع البوست عل وعسى ان نتيح الفرصة للارعتذار
جنى

تسلم يا جني

Quote: قلنا نرفع البوست عل وعسى ان نتيح الفرصة للارعتذار جنى

Quote: تسلم يا جني

الأخوان جنى وعبدالخالق,
الأعتذار قيمة اخلاقية عالية.

انا عارفكم قاصدينى

غايتو طالما كلكم قلتو نعتذر فعليه ساعتذر لكل من تداخلت معه واحس بكدر من مداخلاتى
واوجه اعتذارى الى الفنان وردى واسرته الكريمه حيث تداخلت بتعليق فيما يخصهما من خصوصيات
حيث اعترف بانه من شأنهم ان يسكنو بالمعموره او الكلاكله
وعموماً فأن الموضوع كله كان يجب ان يكون امر خاص ولا يجوز لنا التعليق عليه خصوصاً ذات السمه السلبيه منها
واضف الى الاعتذار ان اوجه دعوه الى المعجبين بالداخل ان يهبو لاستقبال الهرم القامه لدى وصوله الى الوطن عقر داره وتكريمه
وربنا يدوم عليه بالصحه والعافيه


===================
اها الداير يعتذر تانى منو

الأخ محمد زكريا..
انت رجل شجاع ولم يمنعك الكبرياء الزائف من تقدم اعتذارك الجميل .
لقد كبرت فى نظرى كثيرا.
مع تحياتى .

سلام مورتون ..

Quote: اها الداير يعتذر تانى منو

ممكن أهدي ؟! هي قصدي أعتذر ؟؟!

إعتذاري موجه للفنانة فتحية الفتيحاب لإقحامي أمراً شخصياً يختص بحفلاتها وعداداتها دون إذن منها مما جعلها ناقمة على شخصي وهي التي تخاف الغل والحسد وجباة الضرائب ..!

بقية مداخلاتي عبارة عن رأي عام ..

كما اشكر القضاء السوداني النزيه الذي رد الظلم عن المظلومين ..

وأهنئ شركة المقاولات والتي صبرت وصابرت وكافحت حتى نالت حقوقها بقوة القانون ..

وأشكر وردي لإمتثاله للقانون ودفعه للمبلغ واهمس له في اذنه أو في أذن من سيوصل له الهمس : (طيب من الأول العناد في شنو وكتين المبلغ عندك ؟ مُدكنو لي متين يعني ؟ هسي قيمة الأتعاب السبعين مليون دي كان في داعي ليها لو دفعت المبلغ من الأول ؟!) ؟! ..


أها الداير يعتذر تاني منو ؟؟!!

Quote: انا عارفكم قاصدينى غايتو طالما كلكم قلتو نعتذر فعليه ساعتذر لكل من تداخلت معه واحس بكدر من مداخلاتى واوجه اعتذارى الى الفنان وردى واسرته الكريمه حيث تداخلت بتعليق فيما يخصهما من خصوصيات حيث اعترف بانه من شأنهم ان يسكنو بالمعموره او الكلاكله وعموماً فأن الموضوع كله كان يجب ان يكون امر خاص ولا يجوز لنا التعليق عليه خصوصاً ذات السمه السلبيه منها واضف الى الاعتذار ان اوجه دعوه الى المعجبين بالداخل ان يهبو لاستقبال الهرم القامه لدى وصوله الى الوطن عقر داره وتكريمه وربنا يدوم عليه بالصحه والعافيه =================== اها الداير يعتذر تانى منو

يديك العافية يا محمد زكريا نحن قاصدين نعتذر للعملاق وردى ونمنع التشويش على ذاكرة الشعب السودانى!
وردى دا ثروة قومية لو كان عند غيرنا لامنوا على صوته بملايين الدولارات!
جنى

الأخ قلقو
اذا سمحت وتكرمت بالايعاز للباشمهندس بتمتديد صلاحية وفاعلية هذا البوست للربع الثالث لرغبتى فى التمدد فى هذا البوست من أجل تكريس مبدا الوفاء لقممنا السامقة لان فى ذاكرتى الكثير من الحكاوى العاطفية المؤثرة عن هؤلاء العمالقة ربما تثرى هذا البوست
جنى

Quote: "التبخيس" 000 صنع خصيصاً للسودان!!!! لا شك أن التمايز في المواهب والتفاوت في القدرات هو جزء من طبيعة الخلق وله مدلولاته العميقة في إثراء وإخصاب الحياة الدنيا بما ينتج عنه من فعل بشري خلاق0 وكذلك من نافلة القول بأن المجتمعات التي عرفت طريقها للتقدم والرقي لم يتحقق لها ذلك إلا بالتفاتها لهذا التمايز والقدرة على توظيفه بأقصى حد تسمح به الطاقة البشرية0 ولكن، الأمر في السودان جد مختلف 0 فالمتتبع للسلوك الجمعي لمجتمعنا وما ينساب من بين ثنايا ثقافته يكتشف أن مجرد التفكير في التفرد أو إبراز الموهبة لهو نوع من المجازفة الخطيرة التي ينبغي لصاحبها الاستعداد نفسيا وبدنيا لدفع ثمنها لأن الأمر قد يبلغ أحيانا درجة التأديب!!0 ولا شك أن الظواهر الشاهدة على ذلك كثيرة بما لا تحصى أو تعد0 ولكن، قبل محاولتنا التدليل على ذلك يجدر بنا تقصي الأسباب إن أمكن ذلك ومن باب الملاحظة التي هي نتاج الممارسة الحياتية اليومية ليس الا0 يخيل للمراقب أن الشخص السوداني – لعدد من الأسباب- لا يطيق أن يكون أقل قدرة أو موهبة عن أقرانه، وقد يشكل ذلك لديه الكثير من العنت والشقاء ويسهم بقدر وافر في تكدير حياته وإكسابها الكثير من السلوك النفسي السالب، لأن تميز الآخر عنه يشعره بدونية وضآلة تذهب بقدر وافر من ثقته بنفسه0 وقد يكون مرد ذلك نوع التنشئة الذي تتبعه الأسر في تربيتها للطفل0 حيث أنه من الملاحظ يكاد يكون ممنوعاً عليه أن يصرح بمحاسن أقرانه أو يعلن عن تفوق أحدهم، وكثيراً ما يكون الرد حاسماً وغاضباً "انت مالك ناقص؟!" أو "انت الما بخليك زيه شنو؟" وغيرها من الالفاظ والتعابير التي تشعر الطفل مبكراً أنه من العيب أن يقر بتفوق الآخر لأن ذلك تسليم بالنقصان وقلة الشأن ، ولعل ذلك أوضح ما يكون في التنافس المحموم "حد الهستريا" في المراحل الدراسية والتقريع الملازم للطفل و خلق جو من الإرهاب في أي لحظة يتخلف فيها الطفل عن بعض أقرانه وخصوصا داخل نطاق العائلة الممتدة0 كل هذا وذاك من أسباب التنافس غير العاقل عزز من حالة التنميط التي يرزح تحتها المجتمع وانصرفت الأسر كلياً عن اكتشاف مقدرات ومواهب صغارها وبحثها عما يميزهم عن الآخرين فيما اتجهوا كلياً إلى المحاكاة حتى أصبح بمرور الوقت أن الهدف الأكاديمي المرتجى لم يتعدى المجال أو المجالين في أحسن الأحوال "طب وهندسة"، وما دون ذلك يندرج في خانة "التعب البلا عوض"!!!0 هذا الخنق القسري لرحابة الحياة معززاً بذلك الغرس غير الحميد لمعنى التنافس غير الشريف واهدار معنى التمايز كان لابد بمرور الزمن أن يخلق نوعاً من من "ثقافة التبخيس" التي تسعى لاحتقار الآخر المتفوق أو الموهوب والعمل دوما للحط من شأنه بغية التوازن النفسي00 ولنا في ذلك أدبيات كاملة وأمثال ليس أقلها "الما بتلحقوا جدعو"!!0 والتبخيس دوما حالة مفارقة للنقد المنهجي، فبينما الأخير يتوسل الموضوعية والمنهجية بغية الإسهام في تنقيح التجارب والدفع بها نحو التطور والارتقاء نجد أن التبخيس لا علاقة له بعقلانية أو منطق كما أنه في مجتمعاتنا بلغ حداً من المباشرة بحيث أنه بات زاهداً في الالتفاف والمناورة لتحقيق أغراضه ولا يعنى في ذلك بأي حد من المعقولية0 والحياة اليومية مليئة بالنماذج الطريفة، فمثلاً يكفي أن تكون في مجلس "ونسة" عامة مفتوحة على كافة النقاشات اليومية من فن ورياضة وثقافة ومجتمع، وعنى لك أن تشيد بلاعب مبرز حين انعطف النقاش نحو الرياضة، فيجيبك أحدهم بصبر نافد "آي هو ما بطال بس مشكلته انه بيقوم بقزازة براه !!" ، أو أن تتحدث باحترام عن تجربة أحد الفنانين فيجيبك أحدهم بامتعاض ظاهر: "صاح هو بغني كويس بس مشكلته بصبغ شنبه !!" وغيرها من مئات التعليقات غير المتماسكة أو ان شئت الدقة المتهافتة التي قد تصادفك يومياً والتي كلها تتفق في أن الذهنية التبخيسية لا تتوخى أدنى حد من الحذر أو تتوسل أية نوع من العقلانية في ما تود نسفه0 الشاهد ان هذه الثقافة تنامت وتجذرت للدرجة التي اصبح فيها التفوق أو التفرد نغمة توجب من صاحبها دفع الثمن كما ابنا لاحقا0 وتبدأ تلك الممارسة منذ بواكير مرحلة الدراسة بتلك التحرشات اليومية التي يواجهها المتفوق من قبل أقرانه، هذا إن لم يتطور الأمر إلى حالة من الابتزاز النفسي بإشاعة أن تفوقه ناتج لعلاقة مشبوهة مع بعض الأستاذة!!! والى غير ذلك من السلوك المسبب للضغوط النفسية التي تذهب بثقته0 ولعل ذلك كان سبباً لأن يترك الكثير مقاعد الدراسة هجراً بعد أن أصبح تفوقهم نغمة عليهم وسبب لجحيم حياتهم0 أو أن يتراجع البعض دراسياً ليأمن شر التفوق وينضم إلى الآخرين للتنكيل بالضحية الجديدة !!0 أما السعي لمحاولة إبراز الموهبة مسرحيا كان أم غنائياً في الجمعيات الأدبية أو الأيام الثقافية المدرسية فالمحاولة هنا تبدو محفوفة بالمخاطر لأن ثقافة الاستهجان والتبخيس جاهزة ومتحفزة للانقضاض والألقاب المحملة بدلالات الاستحقار جاهزة للالتصاق بالمستهدف مرة والى الأبد ليس أقلها "فلان العوير" أو "علان البايخ" وليس آخرها "الثقيل"0 أما إذا كان النبوغ رياضياً هذه المرة فالامر يتحول الى حرب يومية يخوضها صاحب الموهبة حتى يعود سالماً الى بيته " وليست في كل مرة تسلم الجرة" 0 فالموهبة هنا ليست محل استحسان الأقران بل هي تطاول يستحق التأديب والذي يكون في هذه الحالة ركلاً متعمداً وتشليتاً مصاحباًَ بصراخ جماعي "دقوا" 00"كسروا" 00 ما تخليه ينطط فينا" – ولاحظ هنا تعبير "ينطط" – فهو مرادف للموهبة، ولكنه مبتذل في اللاوعي الجمعي بقصد التبخيس0 كل هذا وذاك عزز بشكل أو بآخر من ثقافة التبخيس واستبطانها بقوة في اللاوعي الجمعي الذي يسعى حثيثاً لزجر أي بوادر لموهبة أو تفوق من باب أن الناس متساوية وكلنا "أولاد تسعة"، وهذا أضعف بدوره من قيمة الموهبة وبالتالي سيطرة ذهنية التبخيس متمثلة في لغتها السائدة، فأصبح الفنان "عامل فيها فنان" والشاعر "عامل فيها شاعر" 00كما أن عبارات مثل "ده فاكيها في روحه" أو "براي" 00لها مدلولها الابتزازي الرهيب على النفوس لأنها مشحونة بمعاني تبخيسية واستفزازية ناسفة0 ومصطلح "عامل فيها 00" لهو من الغرابة والطرافة بحيث أنه من المشكوك أن تجد له مقابل في أي لغة أخرى على ظهر البسيطة0 ولكن00 رغم كل ذلك ، ولأن التمايز واختلاف القدرات جزء من طبيعة الأشياء كما أشرنا من قبل، كان لابد للمواهب أن تعلن عن نفسها وللقدرات أن تظهر تفردها بحيث يصبح تجاهلها أو التنكر لها ليس دوماً في الإمكان 0 وهنا للمفارقة يتحول العقل الجمعي الحاضن لثقافة التبخيس الى عقل "دوغمائي" يعتقد فيمن يدين له بالتفرد حد التطرف0 ومن عجب رغم التناقض الظاهري للمفهومين الا أنهما يعملان معاً في الثقافة السودانية بكفاءة نادرة ويمكن اعتبارهم القاسم المشترك في تشكيل بنية العقل الجماعي0 ولعل أوضح ما يكون ذلك على مستوى العقل النخبوي ومراوحته بينهما0 ويتجلى ذلك في غياب ثقافة الاختلاف وشيوع الخلاف كاحد الآليات المنتجة لذهنية التبخيس0 أو سيطرة مفهوم الحواري "درق سيده" عندما يتحول الأمر الى "دوغما"0 وبمعنى أوضح فالأمر عند النخب كما هو الحال في باقي المجتمع هو غياب نسبية الآراء والتمترس خلف حقيقة موهومة تجعل من الآخر "نكرة" أو "جاهل" في أحسن الاحوال، هذا ان لم يستطيل الحال الى أنواع أخرى من الاسلحة الفتاكة ليس أقلها "اغتيال الشخصية"!!0 هذا التزاوج بين التبخيس والدوغمائية لا يخلو في كثير الاحيان من الطرافة لأنه أصلاً مبني على اللاعقلانية 00 وهنا يستحضرني هذا الموقف الطريف: "كان يرافقني يوما ما في السيارة أحد الأصدقاء الذين لا يرون الحياة الا من "خرم" سياسي0 وكان أن تصادف بمسجل السيارة شريط غنائي للفنان مصطفى سيد أحمد، وطلب هذا الصديق تغيير الشريط بحجة أنه لا يحبه، وكان من الممكن أن يكتفي بذلك الطلب محيلاً الأمر الى تباين أذواق 00 ولكنه أردف معقباً "ياخ هو زي ما قال "نقد" : "في فنان شنبه كبير !!!" 00 والتعليق بقدر طرافته فهو يكشف بحق عن ذلك التلازم الحميم بين المفهومين والقدرة على المزاوجة بينهم متى ما استدعى الأمر0 فصاحبنا على ما يبدو لم يكن على ثقة من نفسه لتبخيس مصطفى ولذلك استعان بنموذج "معتقد فيه" - بضم الميم - يضفي على التبخيس بعداً أعمق0 خلاصة الأمر يبدو أنه من الواضح أن التبخيس ساهم بفاعلية حقيقية في "فرملة" تطور المجتمع السوداني في الكثير من مناحي الحياة وعمل بقوة على تنمطيه بحيث صار ايقاع الحياة يسير على وتيرة واحدة لا تحس معها بأي قيمة لتراكم التجارب الحياتية والابداعية 00 فمثلاً: الغناء ليس بغناء ان لم يساير المألوف والتعليم ليس بتعليم ان لم يكن طب وهندسة والدراما ليست دراما طالما أنها ليست مصرية النسق، والكورة ليست كورة طالما أنها لا تلعب بطريقة الخمسينات من القرن الماضي ، وفي هذا الشأن اختزل احد المخضرمين الذين استضافهم التلفزيون السوداني قبل فترة كل علات الكورة السودانية في الأحذية الحديثة والحوافز 00 مشدداً أن الحل الأمثل في العودة فوراً الى "الكدارة الجلد" و"جك الليمون" بديلاً عن الحافز المادي!!0 ومن نافلة القول أن نشير الى أن هذا الجو المشبع بروح "الارهاب التبخيسي" كان وما يزال سبباً لتطاول اقزام الفكر والمتصحرين عقلياً وعاملاً من عوامل شيوع الهرجلة وروح الانتهازية في مختلف مجالات الحياة للحد الذي صبغ كامل حياتنا بسقم وجودي مستدام يتبدى معه الإصلاح أمراً في غاية الاستحالة0 عبد الخالق السر/ ملبورن 29/5/2004م

ماركة تجارية وعلامة فارقة لنا
سك اول الفصل وطيش الفصل فى نفس الوقت!
المابتلحقوا جدعوا فيما يختص بأول الفصل والتكفير عن عقدة الذنب فيما يختص بالطيش!
جنى

الأخ لؤى : والآن قد قطعت جهيزة قول كل خطيب .
الأخ باشمهندس بكرى اضم صوتى لصوت الأخ جنى مع الشكر.

Quote: الأخ قلقو اذا سمحت وتكرمت بالايعاز للباشمهندس بتمتديد صلاحية وفاعلية هذا البوست للربع الثالث لرغبتى فى التمدد فى هذا البوست من أجل تكريس مبدا الوفاء لقممنا السامقة لان فى ذاكرتى الكثير من الحكاوى العاطفية المؤثرة عن هؤلاء العمالقة ربما تثرى هذا البوست جنى

Quote: الأخ باشمهندس بكرى اضم صوتى لصوت الأخ جنى مع الشكر.

يا قلقو انقل المناشدة الى بوست الاررشفة
جنى