د: محمد وقيع الله يهاجم الفنان العملاق (محمد وردى) فى صحيفة الانتباهة

انا طبعا اول مرة فى حياتى اسمع بدكتور محمد وقيع الله ولاعارف الدكتوراه بتاعتو
فى شنو واظنه يحاول ان يبنى له مجد عن طريق مهاجمة فرعون الغناء السودانى فى صحيفة
الانتباهة التى تريد ان يصمت الجميع وتتحدث هى فقط بلسان الشماليين قبل وبعد انفصال
الجنوب!!!!

Quote: محمد وردي مفكر أم فنان؟! «1 ـ 3» د. محمد وقيع الله يعرف السودانيون المحبون للفن الأستاذ محمد وردي باعتباره مطربًا وموسيقارًا. ويعرفون من تاريخه أنه فنان لكل العهود. بمعنى أن أغانيه المعتَّقة ظلت طازجة في كل العهود، وأنه غنَّى لكل العهود، وغنَّى أيضًا ضد كل العهود! وفي عهد الانفصال الذي حل بالوطن أخيرًا شاء البعض أن يُبرزه باعتباره واحدًا من أهل الفطنة والرأي الخطير. فقال أحد المحررين الصغار: شارك الفنان محمد وردي في مراسم واحتفالات ميلاد دولة الجنوب، وشكل حضورًا كبيرًا في هذه المناسبة وبوصفه من الفنانين الذي لهم دور كبير في الدفاع عن وحدة السودان وترسيخ مفاهيم التنوع الثقافي والدعوة لاحترام كل ثقافات وعادات أهل السودان. ولهذه القيمة الفكرية الخاصة لمحمد وردي حرص المحرر اليساري على رؤيته والاستماع إليه واستطلاع رأيه في مستقبل شمال السودان! ويا سبحان الله تعالى الذي لا يُحمد على المكروه سواه!! كيف أصبح مستقبل شمال السودان وقفًا على رأي واحد من المغنين المطربين، لا على آراء المواطنين الحادبين، والسياسيين المحنكين، وعزائم الشباب المجاهدين المخلصين!! ذبح الثيران وقال وردي وهو يعلمنا ويتفلسف علينا: إن انفصال جنوب السودان حدث سياسي في المقام الأول ولكنه لا يخلو من أبعاد ثقافية واجتماعية! ثم وعظ وأغلظ في الموعظة فقال: إن المجموعة الصغيرة التي ابتهجت بانفصال الجنوب، و«ضبحت» التيران في الشوارع، لا تحدِّد هُوية البلاد ولا يمكن أن يقرر البعض في موضوع معقد كهذا بهذه السذاجة والسطحية. ومع أني لست عضوًا بمنبر السلام، كما أني لا أنتمي إلى أي حزب آخر، ومع أن لي اختلاف موقف من منبر السودان، سبق أن عبَّرت عنه في مقام قبل هذا المقام، إلا أني أقول الآن إن منبر السلام قد عبَّر عن آرائه باستفاضة خلال أعوام طويلة بمقالات كثيرة، عبر صحيفته التي أصبحت الأكثر انتشارًا و«مقروئية» وتأثيرًا في السودان، ولم يعبر عنه أمس فقط بذبح الثيران! فإن كان محمد وردي لا يقرأ أو لم يقرأ، أولا يعلم أو لم يعلم، فعليه إذن ألا يتكلم! كما أن الذي قرر أمر الانفصال لم يكن منبر السلام، وإنما قرره الجنوبيون بمحض إرادتهم. فعلى وردي أيضًا أن يتأمل ما يهرف به قبل أن يُفضي به! ما تقوله هو العنصرية يا وردي! ولكنه حالما أوهمه الصحفي اليساري بأنه قد أصبح من أصحاب الرؤية والمقال فقد استطال وقال:« أنا مثلاً شمالي نوبي وهنالك البجة في الشرق والفور، المساليت والزغاوة في الغرب وقبائل النيل الأزرق وغيرها، هؤلاء ليسوا عرب، (يقصد عربًا) والإسلام دين واسع لا يقوم على العنصرية». وظن وردي أنه قد جاء بفكرة محترمة من حصاد اللغط اللفظي اللاغط والتخليط الذهني الخابط الذي خبط به. وإلا فكيف يجرؤ قائل عاقل على الزعم بأن الانتماء إلى الأرومة العربية المجيدة والنطق بلغتها الخالدة يعبِّر عن نزوع عنصري؟! فهل ينطوي نطق أهلنا من النوبة والبجة والفور والمساليت والزغاوة وغيرهم من السودانيين الكرام بلغة الضاد الكريمة على أي مضمون أو معنى عنصري؟ ولندع النطق باللسان العربي الفصيح جانبًا ولنسأل وردي: هل إذا أصبح هؤلاء القوم الأماجد الذين مثلت بهم من أهل السودان عربًا، أو أحسوا يومًا بأنهم عرب، هل في ذلك أي توجه عنصري؟! كلا! وإنما العنصرية هي على النقيض من ذلك. فهي أن يؤاخذ أحد مثلك يا وردي الناس ويعيرهم ويناهضهم ويناجزهم على اختيار ما اختاروه لأنفسهم من انتماءات. ومن جانب العرب الأقحاح والأقوام الناطقة بالعربية فلم يحدث أن ذموا، وهم أغلبية سكان السودان، من تخلف عن التزام اللسان العربي، واتخاذه أداة للتعبير، وبقي على لهجتة المحلية القديمة، ولم يعيروه بلسانه الأعجمي. ولم تقسر الأمة العربية في تاريخها أحدًا من العجم على تعلم لغتها أو تضطره إلى هجر لهجته المحلية. ولكن اقتنع العجم في أكثر البلاد التي دخلها العرب بوحي بتقديراتهم الدقيقة لمصالحهم الشخصية، واستشفافهم لمستقبلهم القريب والبعيد، بأن تعلم اللغة العربية ضرورة من ضرورات الترقي والتحضر. فاندفعوا إلى تعلمها اختيارًا لا اضطرارًا. الحلفاويون ليسوا عنصريين يا وردي وما أظن أن أهلنا الكرام من «الحلفاويين» الذين يحاول وردي أن يتحدث باسمهم، وينصب من نفسه زعيمًا ممثلاً لهم، يشاطرونه نفوره المصطنع من لغة الضاد، أو يشايعونه تشيعه للشيوعيين، الذين ظننا أنه انخلع منهم في انعطافته التي أنجزها في سنواته الأخيرة. ولكنه أبى إلا أن يصدِّق نظريتي القائلة إن سموم التشيع «من الشيوعية ومن الشيعة الباطنية الرافضة سواء» قل أن تبرح نفسية من تلبست به بالكلية. فلابد أن تبقى بقية «باغية» فيها. وهكذا لا تزال هذه الآثار السُّمية المنكرة تُعاور وردي و «تُتاور» وعيه ولا وعيه بين الحين والحين. وآية ذلك أن الشيخ الطاعن في السن محمد وردي الذي يستقبل عامه الثمانين بعد شهور لا يزال يصدر عن نخوة جاهلية قبلية أضحى يعافها عوام السودانيين. وهي نُعرة متخلفة لولا تشجيع زمرة من نخب التقدميين الشيوعيين الآثمين الضالعين في حركات التمرد والتخريب وتمزيق الوطن لها، واستماتتهم في إحيائها، ما كانت لتعد إلا أثرًا من آثار الجاهلية السودانية السحيقة.

Quote: ويا سبحان الله تعالى الذي لا يُحمد على المكروه سواه!! كيف أصبح مستقبل شمال السودان وقفًا على رأي واحد من المغنين المطربين، لا على آراء المواطنين الحادبين، والسياسيين المحنكين، وعزائم الشباب المجاهدين المخلصين!!

الشى المحير ان الدكتور لم يضع الفنان محمد وردى فى قائمة المواطنين الحادبين
وهو يتعجب كيف لامثال محمد وردى ان يدلو بدلوهم فى انفصال الجنوب ويعتبرونه انفصال
سياسى يعنى لو سلمنا ان وردى ليس سياسى محنك ولاهو شاب مجاهد ومخلص اليس من حقه ان
يكون من المواطنين الحادبين !!!!!!

Quote: ثم وعظ وأغلظ في الموعظة فقال: إن المجموعة الصغيرة التي ابتهجت بانفصال الجنوب، و«ضبحت» التيران في الشوارع، لا تحدِّد هُوية البلاد ولا يمكن أن يقرر البعض في موضوع معقد كهذا بهذه السذاجة والسطحية

رأى سديد ولاغبار عليه المشكلة وين
بالتاكيد المجموعة التى خرجت وضبحت لا تحدد
هوية واتجاه البلاد لانها فى الاصل مجموعة صغيرة
تدفعها العنصرية والاقصاء الى الفرح ولانبساط
بانفصال الجنوب

رمضان كريم أخى مدثر
المقال ليس قدحاً فى وردى,بل تقرباً للطيب مصطفى ,او عن طريقه.

تحياتى

محمد مكى رمضان كريم عليك

Quote: المقال ليس قدحاً فى وردى,بل تقرباً للطيب مصطفى ,او عن طريقه. تحياتى

انا اشاركك نفس الرأى ___ يعنى بالواضح كده الدكتور مالقى ليه
شى يقربه زلفى قام قال نشوف وردى ده والغريب انه فى المقال
يحاول ان ينفى انتمائه لمنبر السلام الماعادل
مودتى

مدثر
سلام
والله كلام عجيب.
بعد غناهو بلغة الضاد عمرو كلو قالوا بينفر من لغة الضاد.
وردي غلطان وخليل فرح كمان....
ودي صحيفة حكومية تصدر في الخرطوم وتعبر عن كل الاسلامين الدجالين في السودان.
ونقول لوقيع الله ده
نحن النوبيين مع الزعيم وردي في كل ما قاله.

Quote: انا طبعا اول مرة فى حياتى اسمع بدكتور محمد وقيع الله ولاعارف الدكتوراه بتاعتو فى شنو واظنه يحاول ان يبنى له مجد

جهلك بالبروف محمدوقيع الله... ليس بضاره.. بل هوكاشف عن ضعف حصيلتك

إن كنت تنظر لـ محمد وقيع الله بمقاييس الدنيا فقد عاش 20 سنة في بلاد الغرب

انظر ماذا يقول عنه الإعلامي الكبير/ فهد السنيدي في هذا اللقاء

Quote: مدثر سلام والله كلام عجيب. بعد غناهو بلغة الضاد عمرو كلو قالوا بينفر من لغة الضاد. وردي غلطان وخليل فرح كمان.... ودي صحيفة حكومية تصدر في الخرطوم وتعبر عن كل الاسلامين الدجالين في السودان. ونقول لوقيع الله ده نحن النوبيين مع الزعيم وردي في كل ما قاله.

مدحت رمضان كريم وكل سنة طيب
والله يامدحت النوبيين اكيد حايكونوا مع وردى بل كل هذا الشعب
مع وردى ياخى الدكتور ده منطقو غريب وكلامو جايط يعنى هسه
الكلام القالو وردى ده محتاج ليه مفكر سياسى ياخى ده كلام على لسان
البسطاء من ابناء هذا الشعب واكيد وردى بيتحدث بلسان العامة
من غير فلسفة كما ادعى الدكتور
مودتى

عماد حسين اول شى قول بسم الله ورمضان كريم

Quote: جهلك بالبروف محمدوقيع الله... ليس بضاره.. بل هوكاشف عن ضعف حصيلتك إن كنت تنظر لـ محمد وقيع الله بمقاييس الدنيا فقد عاش 20 سنة في بلاد الغرب انظر ماذا يقول عنه الإعلامي الكبير/ فهد السنيدي في هذا اللقاء

انا اول شى مابعرف الدكتور ده المشكلة شنو ؟ بعدين وين ضعف الحصيلة
ضعف الحصيلة دى بقولوها فى حاجات تانية انت شكلك لقيته فى مكان قمت دخلتها
فى غير مكانه الصحيح لان هنالك الكثيرين من امثالى لايعرفون الدكتور وهذا لايضره
وفى نفس الوقت لايعنى ضعف الحصيلة

عارف ضعف الحصيلة دى عجبتنى شديد ،، طيب لو انا ماكنت بعرف وردى ولابسمع غناها
يقولوا عنى شنو ده ممكن يكون ضعف حصيلة وضعف دم وضعف نظر وضعف فى البنية يعنى
لو الزول مابيعرف وردى ممكن تصيبه كل هذه الاضعاف المضعافه ويخش فى مضاعفات ممكن
تؤدى الى الموت
بعدين عشان ازيدك من الشعر بيت انا الاعلامى الكبير فهد السنيدى ده يطرشنى كان سمعته
عنو ويعمينى كان شفتو قبلى كده (يعنى يطلع منو الاعلامى فهد السنيد) يعنى ممكن يكون
بقامة الطيب صالح ولا ممكن يكون فى منزلة السفير الاعلامى الشاعر صلاح احمد محمد صالح
ديل انا غايتو بعرفهم كويس وممكن امدك بالصور والسيرة الذاتية عشان لمن تمشى تفتح
اليوتيوب تجيب اعلامى كبير بالجد مش تقول لى السنيدى (سنيدى بالسا)

بعدين ياعزيزى انت اول شى كان تورينا رايك شنو فى الكلام الكتبو الدكتور عن وردى
لانو انا مافتحت البوست عشان اقيم الدكتور ،،والله لو بقى منو داك برضو كلماتو عن وردى
فيها افلاس وقلة حيلة ومنطق باهت لايعدو ان يكون بحث عن الشهرة التى لم يجد نصيبو منها
وبعدين يعنى شنو كان عاش عشرين سنة خارج الوطن هنالك من حملتهم المنافى لسنوات اطول من
سنوات الدكتور وهنالك من ضاق بهم الوطن على رحابه فهاجروا لسنوات ناضلوا فيها وقاسوا فيها
والله كلامك غريب يعنى شنو (اذا كنت انظر له بمنظار الدنيا) ويعنى شنو عاش فى الغرب عشرين سنة

رجاء ان تفهم البوست جيد ومن ثم ترد فى صلب الموضوع وكونى اوردت عدم معرفتى للدكتور فى بداية
البوست فهذه حقيقة وليس تهكم وعشان اكون امين معاك انا مافتحته الفيديو الانت مرسلو لى عشان
انا اصلا ماعايز اشوف او اعرف دكتور محمد وقيع الله ولا الاعلامى الكبير بتاعك ده انا يكفينى فخرا
اننى اعرف الدكتور محمد عثمان وردى اخصائى امراض المشاعر وقضايا الوطن
دكتور وردى الذى علمنا كيف ننتصر بعد الانهزام وعلمنا كيف نقف بعد الانكسار علمنا الجلوس
للوطن وردى الذى فتح ابواب الزنازين وحمل الوطن فى حدقات العيون دكتور وردى الذى علمنا
كيف يمكن ان يكون الفنان بقامة وطن

سلام للجميع ...
زول كتب انتقد وردي ... زول عادي لا بروف ولا مشهور ... ايه المشكلة ؟؟؟؟
وردي فنان وغناي والحانو ملهمة دي مافيها اختلاف والزول دا ما اتكلم في دي .. اتكلم في راي سياسي ...
انا متفق مع وجهة نظر الاستاذ وردي جملة وتفصيلا في الموضوع ..
مختلف في تناول الموضوع من زاوية كيف وليه ينتقد وردي ...
مختلف برضو مع حتة نوبيين لانو وردي لو كان قفل نفسو في تراث النوبيين والرطانة ما كان بقي وردي ...

Quote: سلام للجميع ... زول كتب انتقد وردي ... زول عادي لا بروف ولا مشهور ... ايه المشكلة ؟؟؟؟ وردي فنان وغناي والحانو ملهمة دي مافيها اختلاف والزول دا ما اتكلم في دي .. اتكلم في راي سياسي ... انا متفق مع وجهة نظر الاستاذ وردي جملة وتفصيلا في الموضوع .. مختلف في تناول الموضوع من زاوية كيف وليه ينتقد وردي ... مختلف برضو مع حتة نوبيين لانو وردي لو كان قفل نفسو في تراث النوبيين والرطانة ما كان بقي وردي ......

سلام
اول شى الدكتور لايستطيع هو او غيرو ان ينتقدوا وردى فنيا دى حاجه مفروغ منها
الشى التانى زاوية كيف وليه ينتقد وردى ابدا ماوردت فى الموضوع يمكن انت فهمت غلط لان النقاش
يدور حول لماذا انتقد الدكتور وردى فى رأى هو يمثل الحقيقية ولماذا يستكتر الدكتور
على وردى ان يدلو بدلوه فى رأى سياسى يعنى الدكتور حاول فى المقال ان يقول بصحيح
العبارة (ياوردى انت مطرب وبس وخليك فى غناك مالك ومال السياسة) ونسى الدكتور اوربما
تناسى ان وردى ليس مطرب فقط بل هو رجل صاحب قضية ومبادى راسخة ولو سلمنا ان وردى فنان
عادى اليس من حقه ان يقول رأى فى انفصال الجنوب؟!! ،،دى مشكلتنا مع الدكتور
تحياتى

تودد وكسير تلج للخال الرئاسي ليس الا
عالم ما بتختشي

Quote: إن كنت تنظر لـ محمد وقيع الله بمقاييس الدنيا فقد عاش 20 سنة في بلاد الغرب

الأخ عماد
وهل معيشته فى الغرب تبيح له أن يهاجم الآخرين؟
أهو أنا عايش فى الغرب عشرين سنه وما بعرف محمد وقيع الله ولا تشرفنى معرفته.
يبدو أن محمد وقيع الله من المسرورين لتفتيت الوطن.

ما الكلام بصب في حتتك دي يا مدثر ... عشان ما تجي مداخلات تحرف البوست ...
انت فهمت شنو يا حبيبنا ... حيجوا ويقولوا فنان افريقيا ومش عارف شنو ودي ما زاوية نقاشك ...
المداخلة عشان الناس تجي تطرح الزبدة يا حبوب ما تشوت اوف بوينت ...
مع التأكيد علي فطارة طرح البروف مع احترامنا ليهو ...
وبعدين سؤال .. الم تشوب مبادئ وردي هذه اي شائبة ؟؟؟ هل لا زال وردي الذي غني ( هب شعبك يا بلادي ) ؟؟؟؟
تحياتي

وقيع الله مريض واعراض مرضه مناصرته اللامحدودة لانقاذ الفساد والقتل والاقصاء
الانقاذ الذي طارد ويطارد اخوانه في الله وسجن من ارسل رئيسه الى السجن
وقيع الله مريض وممكون ومن احن ومصائب الدنيا عليه ان يرى كادرا امنيا سعي
لحرمانه من رئاسة ولاية (بحجة فساد الامنجي وتهديده له ) وزيرا

Quote: كما أني لا أنتمي إلى أي حزب آخر

بالله عليكم شوفو الكوز نكر حزبو كيف

هل نأمل فى أن يأتي يوم تناقش فيه مقالات الكتاب وافكارهم وآرائهم من غير ان نفتش فى دوافعهم ونتهمهم فى سرائرهم ونلقي عليهم بالسباب والشتائم؟
هذه حالة امامنا أتي فيها صاحب البوست بمقال لكاتب معروف. وحتي الآن لا نري اي محاورة جادة واو نقاش حول ما كتبه هذا الكاتب. كل ما نراه هو ان وقيع الله كتب هذا المقال بحثا عن منصب او كتبه تملقا لخال الرئيس او كتبه لأنه يطمع فى هذا وذاك. طيب المقال نفسه عملنا فيهو شنو؟
وقيع الله كاتب خلافي. احاول ان اقرأه بحياد وبغير تفتيش فى نواياه لانني لا اعرفها. اتفق معه احيانا واختلف معه كثيراوهو ليس من كتابي المفضلين
عموما لنعمل معا لرفع مستوي الحوار فى هذا المنبر. لنتفق علي ان الحوار حول اي كتاب او مقال او مادة منشورة او مذاعة يؤتي بها الي هذا الموقع الغرض من ورائها الفائدة والمنفعة العامة والنقاش الذي يفيد ويزيد الوعي. مسألة الاتيان بالمقالات ثم فتح الباب لكيل السباب للكاتب الذي هو غير موجود معنا والشتائم واتهام النوايا لا يفيد ولا يخدم قضية. هو فقط يكشف عن ضعفنا الاخلاقي وهزالنا وهشاشة فهمنا للديمقراطية ومعني الحوار وادب الاختلاف.
مع التحايا والاحترام لصاحب البوست وضيوفه الكرام

احمدعبدالله وعبدالله عبدالله ربنا يزيدكم عافيه ويطول في عمركم ويتقبل صيامكم وتحقق امانيكم

ياقرجاج بالله زيد من الدعوات لاخونا مصدق في رمضان

الهرم الرابع ربنا يطول في عمرك ويديك الصحه والعافيه

شايف زولك مركز علي المحاور الشيوعي !!!!

وقيع الله شوفلك درب تاني احسن ...

تحايا القلبيه يامدثر وللاسرة الكريمه

تصوم وتفطر علي خير

Quote: تودد وكسير تلج للخال الرئاسي ليس الا عالم ما بتختشي

المنطق الهش والتوهان الموجوده فى المقال توحى
بأنه كتب من اجل اشياء لاتمت للحقيقة بصله الغريب
انه لايجيد حتى كسير التلج

Quote: ما الكلام بصب في حتتك دي يا مدثر ... عشان ما تجي مداخلات تحرف البوست ... انت فهمت شنو يا حبيبنا ... حيجوا ويقولوا فنان افريقيا ومش عارف شنو ودي ما زاوية نقاشك ... المداخلة عشان الناس تجي تطرح الزبدة يا حبوب ما تشوت اوف بوينت ... مع التأكيد علي فطارة طرح البروف مع احترامنا ليهو ... ؟؟؟؟ تحياتي ]

الامين رمضان كريم

يعنى خلينا نسلم اول شى انو البوست لن يخلو من مداخلات للتحريف
واخونا عماد اول المبتدرين بالتحريف ومسك لى فى البروف وفى امجاد
البروف ولم يكن هذا محور نقاشى من البداية يعنى انا مسكته اجزاء
من المقال عشان نكشف حقيقية انو المقال فيه كثير من التحامل الغير مبرر
على وردى ولم يدور فى خلدى من يكون د:محمد وقيع الله وحتى وردى ادافع عنه
فى البوست مستصحبا معى وطنيته وليس فنه لأن الدكتور لم يتطرق لفنه اصلا
لكن لمن تجيك ناس تشوت ضفارى حانرد عليه حتى لو اخل هذا الرد بالموضوع الاساسى
لان الغرض من الرد هو محاولة وضع المتداخلين فى التراك الصحيح لنقاش هادف

Quote: وبعدين سؤال .. الم تشوب مبادئ وردي هذه اي شائبة ؟؟؟ هل لا زال وردي الذي غني ( هب شعبك يا بلادي ) ]

انا شخصيا اعتبر ان مبادى وردى لم تشوبها شائبة وان كانت هنالك اخطاء حدثت فى فترات سابقة جاء وردى وقدم (نقد ذاتى) وصحح المسار فهل تكون هذه الشوائب الصغيرة بمثابة رصاصة الرحمة التى
نريد ان نطلقها على وردى لنبين للاخرين ان مواقفه كانت متباينة!! اما اذا كنت تقصد علاقته بأهل الانقاذ وتلك الاحاديث التى كانت تخرج من هنا وهناك بعد عودته الى ارض الوطن فهذا لايعدو ان يكون فرقعات اعلامية تحاول ان تربط بين وردى واهل الانقاذ فى محاولة يائسة لاغتيال مبادئه ..لازال وردى هو الذى غنى هب شعبك يابلادى وهو الذى غنى كما غنى الخليل وهو الذى تغنى والهم هذا الشعب حب الوطن.
محبتى

قلتا لي كيف.. لقيت كلمة حصيلة وقمت دخلتها ليك هنا

لا والله.. حلوة

ههههههههههههه

قال شنو..

Quote: واظنه يحاول ان يبنى له مجد عن طريق مهاجمة فرعون الغناء السودانى

لما تطرح ليك قضية زي دي، ابتعد عن اهانة الغير ولا تحط من قدرهم

لو سألت وقلت: من هو/ د. محمد وقيع الله.. كنت حتكون معذور وتقدر تناقش ضيتك

لكن تجي تنزل من قدر الرجل بكلامك الشين ده.. وبصيغة كلامك الكلها استخفافز.. دي مسألة غير مقبولة

يشهد الله...في الأول داير أقول ليك: لن يضره جهلك.. وبعدين مسحتها.. وقلنا نتلطف في العبارة شوية.

وياهو الواحد لقى كلاك المسيخ ده

نهايتو.. هسع خليني أقول ليك عديل:

جهل (النكرات) مثلك بمحمد وقيع الله، ليس بضاره شيئاً

أهـا.. فتك بعافية يا بتاع فرعون الغناء السودانى

Quote: المنطق الهش والتوهان الموجوده فى المقال توحى بأنه كتب من اجل اشياء لاتمت للحقيقة بصله الغريب انه لايجيد حتى كسير التلج زول ما عندو موضوع بأمانة او عندو عمود راتب ما لقى حاجة يكتبا ، وردي مواطن سوداني وله الحق ان يعبر عن رأيه في اي قضية حتى انه لم يأت بكلام غريب او مستهجن او خطأ اذا نظرنا له من كل الزوايا ، مقال مفكك متهالك بدون قضية .. تحياتي

Quote: وقيع الله مريض واعراض مرضه مناصرته اللامحدودة لانقاذ الفساد والقتل والاقصاء الانقاذ الذي طارد ويطارد اخوانه في الله وسجن من ارسل رئيسه الى السجن وقيع الله مريض وممكون ومن احن ومصائب الدنيا عليه ان يرى كادرا امنيا سعي لحرمانه من رئاسة ولاية (بحجة فساد الامنجي وتهديده له ) وزيرا ]

الغريب انو ركز على حكاية عدم انتمائه لحزب سياسى خصوصا منبر السلام الماعادل
يعنى هو ضمنيا اعترف ان هذا المقال موجه لحاجات اخرى ابعد حاجه عنها هى الموضوعية
رغم محاولته اليائسة لانكار ذلك

Quote: عموما لنعمل معا لرفع مستوي الحوار فى هذا المنبر. لنتفق علي ان الحوار حول اي كتاب او مقال او مادة منشورة او مذاعة يؤتي بها الي هذا الموقع الغرض من ورائها الفائدة والمنفعة العامة والنقاش الذي يفيد ويزيد الوعي. مسألة الاتيان بالمقالات ثم فتح الباب لكيل السباب للكاتب الذي هو غير موجود معنا والشتائم واتهام النوايا لا يفيد ولا يخدم قضية. هو فقط يكشف عن ضعفنا الاخلاقي وهزالنا وهشاشة فهمنا للديمقراطية ومعني الحوار وادب الاختلاف. مع التحايا والاحترام لصاحب البوست وضيوفه الكرام

يا ابو القاسم كلامك جميل لكن انا اجد لبعض المتداخلين العذر فى التشكيك فى نوايا الكاتب لان المقال لم يرتقى الى الموضوعية التى تجعل منه مادة دسمة للنقاش وطبعا اتفق معاك ان السباب والشتائم لامكان لها فى البوست ..يمكن المتداخلين الهاجموا الدكتور بخشونة وليس شتائم اوسباب فعلوا ذلك لان الدكتور كان قاسى جدا فى محاولته اليائسة لتشويه صورة وردى وارتكز فى ذلك على اشياء من خياله وعلى حوار صحفى حاول فيه ان يفسر ردود وردى بطريقة اقرب ماتكون الى السذاجة .

انا متفق معاك فى محاولة الابتعاد عن توجيه اى تجريح للكاتب لكن هنالك سؤال يفرض نفسو هل سلم وردى من تجريح الدكتور؟ وهل يستطيع وردى الرد عليه بذات الصحيفة؟ بعدين انا لدى تعليق بسيط على مسألة انو نحن بنهاجم فى ناس ما اعضاء فى البورد ولا اجد فى ذلك غضاضة اذا كان هجوم مبرر فقد هاجم الدكتور الفنان وردى بعنف وبدون مبرر والعملاق وردى ليس كاتب صحفى

Quote: ياقرجاج بالله زيد من الدعوات لاخونا مصدق في رمضان وقيع الله شوفلك درب تاني احسن ... تحايا القلبيه يامدثر وللاسرة الكريمه ]

ياعمد والله مشتاقيين ازيك يافنان ورمضان كريم عليك
والله ياعمده (مصدق) لم يغب عن مخيلتى لحظة وهو دائما حاضر
معى ومتواجد فى احلامى وفى احزانى وفى فرحى الباهت وفى الامانى
التى طال انتظارها .. احزن بشده واسترق الفرح لدقائق معدوده لاعود
الى حزنى مجددا مستصحبا معى مصدق واسأل الله ان يتقبله قبولا حسنا وان
ان ينزله منزلة كريمة.وشكرا على هذه التذكرة الرائعه

وقيع الله ده ياعمده مسك درب طويل وماعندو نهاية وطريق وردى محفوف
بالاشواك والمطبات وايضا بحب الملايين عشان كده الدكتور سيجد نفسه
تايه فى خضم هذا الطريق الصعب
محبتى ومرة تانيه كل سنه وانت طيب

Quote: لما تطرح ليك قضية زي دي، ابتعد عن اهانة الغير ولا تحط من قدرهم لو سألت وقلت: من هو/ د. محمد وقيع الله.. كنت حتكون معذور وتقدر تناقش ضيتك لكن تجي تنزل من قدر الرجل بكلامك الشين ده.. وبصيغة كلامك الكلها استخفافز.. دي مسألة غير مقبولة يشهد الله...في الأول داير أقول ليك: لن يضره جهلك.. وبعدين مسحتها.. وقلنا نتلطف في العبارة شوية. وياهو الواحد لقى كلاك المسيخ ده نهايتو.. هسع خليني أقول ليك عديل: جهل (النكرات) مثلك بمحمد وقيع الله، ليس بضاره شيئاً أهـا.. فتك بعافية يا بتاع فرعون الغناء السودانى ]

ياعماد شكلك بتفهم الكلام بعد تعب وبعد شرح طويل لكن مامشكلة بشرح ليك تانى

اول شى انا ما وجهت اى نوع من التجريح للدكتور بتاعك ده كل الانا قلتو انو انا الزول ده انامابعرفو ولاعايز اعرفو المشكلة وين.؟؟ بعدين عشان نكون موضوعيين جيب لى اقتباس ورينى ان نزلت من قدر دكتورك ده فى يأتو موضع فى البوست واستخفيت بيهو وين ؟؟ بدون ماتحلف ان مصدقك كان تكتب جهلك يعنى المشكلة وين لو اصلا عدم معرفة د: وقيع الله جهل اعتبرنى جاهل وديع مغرور زاتو لو ماعجبك ،،يعنى عليك الله حايضرنى بشنو لو ماعرفتو وحايضيف لى شنو ..انت غايتو دقسته دقست عمرك اصلا ماكان تتلطف بى وطوالى تقول لى ياجاهل لانو هنا مافى تلطف فى كلام بتكتب والزول بيرد من منطلق الكلام المكتوب نصيحتى ليك (اوعك تتلطف فى المرة الجايه)يالطيف انت
بعدين انا اصلا مافاتح البوست عشان اسأل من هو وقيع الله ولا داير اعرف عشان انت تورينى احتفظ بسيرتو الذاتية لنفسك يامثقف انت فرحان يعنى بمعرفتك للدكتور (قوم لف عليك الله)

ياخى انت مالك زعلان ان مش نكرة وجهلى ماحاينقص الدكتور شى من قدره وانا مابنكر ده وانا نفسى الشى لو فى عشرين من دكتورك ده وماعرفتهم برضو مامشكلة ولابنقصنى شى
انا بتاع الفرعون وردى ومعاى الملايين لكن انت بتاع وقيع الله ومعاك منو؟ يازول ربنا يسعدك بالدكتور وانشالله يضوى ليك ..
بس انت لحدى هسه ياسيدى ماناقشتنا فى الموضوع الاساسى رايك شنو فى مقال الدكتور الكتبو فى وردى لو جاوبته انا بعد داك برد عليك الرد المناسب وممكن نستفيض فى النقاش على الاقل ممكن نوريك من هو الدكتور محمد عثمان وردى وصدقنى ده حايكون اكبر مكسب فى حياتك ودكتور ليه قيمة عند الشعب السودانى وقيمة كبيرة فوق ماتتخيل..
الله يعافيك يابتاع وقيع الله وماتنسى تقول للدكتور بتاعك رمضان كريم

Quote: إن كنت تنظر لـ محمد وقيع الله بمقاييس الدنيا فقد عاش 20 سنة في بلاد الغرب ]

نفسى زول يجى يفهمنى الكلام ده معناها شنو وعلاقتو شنو بالموضوع؟؟1!

Quote: زول ما عندو موضوع بأمانة او عندو عمود راتب ما لقى حاجة يكتبا ، وردي مواطن سوداني وله الحق ان يعبر عن رأيه في اي قضية حتى انه لم يأت بكلام غريب او مستهجن او خطأ اذا نظرنا له من كل الزوايا ، مقال مفكك متهالك بدون قضية .. تحياتي

عبد الاله رمضان كريم

هذا بالضبط ماذهبنا اليه مقال متهالك يفتقد عنصر الترابط والموضوعية ليس له هدف محدد
سوى كلام والسلام ..يعنى هجوم من اجل الهجوم دون ان تسنده دوافع واضحة ولنا عودة للمقال
عشان نكتشف عدم الموضوعية اكتر واكتر

Quote: د. محمد وقيع الله

ده منو??

Quote: ده منو??

كوز عمل طوال حياته يبشر بافكار الترابي
بعد انقلابهم كان في هيئة الاعمال الفكرية ضمن مجموعة من ابناء الترابي الخلص نذروا حياتهم للتبشير بالمشروع الحضاري.
بعد المفاصالة انقلب على شيخه واختار مائدة الشيخ علي محمد عثمان .
ايام الترشيح لانتخابات الخجة كتب مقال طويل وعريض وهو جالس في برجه العاجي يوصي ويحذر ولاة الامر في دولة المدينة من سوء اختيار الولاة .
حذرهم من كوز امنجي بعينه قال عنه انه من اولاد الترابي الفاسدين وسط مؤتمرهم ومضى قائلا ان هذا الكوز هدده من قبل بمستندات وزعم انه صفع خده المتورم من اكل مال الفساد او كما قال
ومضى قائلا هذا الكوز يخطط لترشيح نفسة واليا لاحدى الولاية واختتم وصيته تلك بتحذير شديد اللهجة من تحقيق ما يخطط له هذا الكوز

مضية محمد وقيع الله ان هذا الكوز كان ضمن الذين ادوا القسم امام والى المسلمين وزيرا في حكومة الـ77 وزير
واحسب لهذا هو ينكر انتمائه للاسلام السايسي الماسك بتتلاليب بلدنا

الجماعة القالو الزول ده كتب مقالو عشان ... وعشان ...
لو في علم الله الذي يعلم نية صاحب المقال كان كلامهم ده ما صحيح

بيكونوا أدوه من حسناتهم وتعبهم وصيامهم !!!


ــــــــــــــــــــــــــــــــــــــــــــــــــــــــــــــــــــــــــــــــــ
الإخوة المتداخلون ويا صاحب البوست خذوا بنصيحة من قال لكم انقدوا الأفكاااااااااااار
الذي لديه علم لينقد وشرط النقد الصحيح أمران :
1/ العلم ...فيقول هذا خطأ والصواب كذا
2/العدل ... ونحن المسلمون مأمورون بالعدل حتى مع الكافر (ولا يجرمنكم شنئان قوم على أن لا تعدلوا اعدلوا ...)

يبقى العندو علم وعدل ينقد ويفيد القراء
كما جاء في كلام موفق لبعض من تداخلوا بهذا البوست

أما مجرد المشاركة برمي الكلام كما هو في بعض مداخلات هذا الشريط .. فهو مما لن يجدي الكاتب أو القارئ

ورمضانكم متقبل فيه صيامكم وقيامكم

يا له من كاتب بائس

Quote: انا اصلا ماعايز اشوف او اعرف دكتور محمد وقيع الله ولا الاعلامى الكبير بتاعك ده انا يكفينى فخرا اننى اعرف الدكتور محمد عثمان وردى اخصائى امراض المشاعر وقضايا الوطن دكتور وردى الذى علمنا كيف ننتصر بعد الانهزام وعلمنا كيف نقف بعد الانكسار علمنا الجلوس للوطن وردى الذى فتح ابواب الزنازين وحمل الوطن فى حدقات العيون دكتور وردى الذى علمنا كيف يمكن ان يكون الفنان بقامة وطن

العزيز/ مدثر قاج
سلام ورمضان كريم

الأقزام البائسة دائما تحاول التطاول من على أكوام الزبالة..
هذا زمانك يا مهازل..


تحياتي

اخوي مدثر رمضان كريم
كده برد نقسك شوية
ورونا منو الدكتور محمد وقيع الله
لازمني سيرتو الذاتية
عشان نتداخل معاكم في الردود الفنية السياسية الاجتماعية
مع انو الدكتور طلعنا كفنانين من الفكر والفهم في السياسة والاجتماع
فمعرفة سيرته الذاتية مهم جدا
ولك المحبة ولفرعون افريقيامودتي الابدية ولكم محبتي الخالصة
الايام دي في اقصاء لكل عظماء السودان وتبخيس لادوارهم الحكاية دي مقصودة ؟؟
محمد سنى
مقيم في الخليج 15 سنة

Quote: محمد سنى مقيم في الخليج 15 سنة

حـلوووووووووة

محمد السـني
تصوموا وتفطـر على خير وتحياتي للسـهروردي
وفي الاســم دا برضـو في وردي الله يعينك الزول دا ما يقبل عليكم

يا محمد أنت غير مؤهل لهذا البوســت مالم تكمـل 100 سـنة في الخليج
لأن كل ســنة في الغـرب بـ 5 ســنوات في الخليج


تحياتي وســلامي للجميـع

ياجماعة والله اسف شديد لعدم الرد على المتداخلين الاكارم
لفترة طويلة لظروف مرضية قاهرة كل سنة طيبين

ونعود