Post: #1 Title: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 02:30 PM Parent: #0
خمسين عام من العطاء في ثلاثين حلقة وبحضور رفيق دربه الشاعر إسحاق الحلنقي, حبناك من قلوبنا حبيناك يا وردي, جمهورية وردي الرقة و الفن السوداني الاصيل توثيق للحلقات وللفن الذي يتدفق منه الانوار في هذا البوست ونتركم مع الابداع - الحلقة الاولي
Post: #2 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 02:36 PM Parent: #1
برنامج اعز الناس يومي, وعلى قناة الشروق ومن تقديم الانيقة البارعة الشابة سلمى سيد وبحضور الشاعر الحلنقي توثيق الحلقة الثانية كاملة
Post: #3 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: اماني محمد صالح Date: 08-12-2011, 02:42 PM Parent: #2
شكرا لك الاخ احمد فقد كنت ابحث عن باقية الحلقات فهو برنامج يستحق التوثيق و المشاهدة
لك ودي اماني الروح
Post: #4 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: طارق ميرغني Date: 08-12-2011, 03:03 PM Parent: #3
مشكور اخي احمد
علي المجهود والمتابعه
فرصه جيده جدا للتوثيق
Post: #5 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 03:08 PM Parent: #3
Post: #8 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 04:06 PM Parent: #7
الحلقة السادسة - الحديث عن اغنية قطر الندى
كلمات اغنية قطر الندى محمد وردي الريـد جــوة قلـبـي بحـبك بدأ يا طـيـبة حـياتي يا قطـر الندى ما كـان في خـيالي تتنكـر كـدة أيامـنا الجمــيلة لـيه بتنـكـدة جربت هـواهم وقلـيـبي أنكـوى تاريهم جـاروا ما صـانوا الهـوى حاولت أسببك وأتنـاسى المــضى أيامـك معــاي ساعـات الرضى المكــتوب علي أنا قلـبي ارتضى يا ريت الليالي عطـفه يعــوضي
جــربت هـواهم وقلـيبي أنكوى تاريهم جـاروا ما صـانوا الهـوى
Post: #9 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 04:21 PM Parent: #8
لما الخصلة تدور طربانا نبقى حريرفى حرير ** فرحى خلق الله وادنى ياشبه القمرة الحلقة السابعة - مساحة مع الاغاني الرمزية أغنية "وسـط الدايرة" مثالاً
حلقة مدهشة, تابعو الحديث ذو الشجون و الذكريات
Post: #10 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 04:59 PM Parent: #9
الحلقة الثامنة - قصة اغنية فرّحي حلق الله, تلحينها كان عام 1971 في معتقل كوبر
اغنية "الحب و الثورة" من كلمات محجوب شريف وكتبها في السجن كانت نضالية ولم يتغني وردي حينها بالاغنية نسبة لقمع نميري ولكن اضاف اليها اسحاق بعض الكلمات وتم نقل لحنها لـ"يلا وتعال يلا"
ادناه الكلمات الأصلية , للقصيدة الثورية <الحب و الثورة> مشتاق لك كتير و الله للجيران وللحلة كمان قطر النضال ولى وغالي على ادلى محطة محطة بتذكر عيونك ونحنا في المنفي وبتذكر مناديك خيطوه الحمراء ما صدفة وبتذكر سؤالك لي متين جرح البلد يشفي ومتين تضحك سماء الخرطوم حبيبتنا ومتين تصحي سؤالك كان بيعذبنا .. ويقربنا ويزيد ما بينا من الفة
*
Post: #11 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-12-2011, 05:37 PM Parent: #10
كلمات اغنية يا راجياني يا راجياني وما ناسياني ياما الغربة بتتحداني وانا بتحدى الزمن الجاير لو في بعدك .. يتحداني لمّ سحابة تلاقي سحابة وتنزل منها دمعة عشاني لمّ تلاقي مسافر عايد تمشي وتسألي عن عنواني وانا عنواني عيونك انتي وأي مكان تمشيهو مكاني يا راجياني وما ناسياني ياما الغربة بتتحداني وانا بتحدى الزمن الجاير لو في بعدك .. يتحداني ياالفرهدتي فرح جواية أنا جملتك بألواني أنا علمتك تاخدي المعنى من إحساسي وتدي معاني أنا سافرت عشانك انتي وسبت البلد الما ناسياني كم حاولت أصارحك ياما إلا العزة بقت مانعاني يا راجياني وما ناسياني ياما الغربة بتتحداني وانا بتحدى الزمن الجاير لو في بعدك .. يتحداني إستنيني ولو حاولت تصدي حناني إستنيني ولو حاولت تصدي حنيني ياما حتشقي ماظن تلقي حِنيّن زيي يريدك تاني ألأيام وانا قربك انتي مهما تطول محسوبة ثواني إنتي جمالك ياهو جمالي وانتي زهورك من ريحاني الأفراح بعرف ميعادا وأي زمان تلقيهو زماني يا راجياني وما ناسياني ياما الغربة بتتحداني وانا بتحدى الزمن الجاير لو في بعدك .. يتحدانى
Post: #13 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: فيصل محمد خليل Date: 08-12-2011, 06:20 PM Parent: #12
حضور و متابعة
Post: #14 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-12-2011, 07:30 PM Parent: #10
Quote: قصة اغنية فرّحي حلق الله, تلحينها كان عام 1971 في معتقل كوبر
اغنية فرحي خلق الله من كلمات محجوب شريف كانت نضالية ولم يتغني وردي حينها بالاغنية نسبة لقمع نميري اضاف اليها اسحاق بعض الكلمات فاصبحت "فرّحي حلق الله" - ادناه الكلمات الأصلية
Post: #15 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: Elfadil Sabeil Date: 08-12-2011, 08:36 PM Parent: #14
رمضان كريم
يا أعز الناس
وردي الحلنقي و المذيعة
و صاحب البوست كمان
أقول لكم حاجة إنتووووووووووووا كلكم
Post: #16 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: Elfadil Sabeil Date: 08-12-2011, 08:37 PM Parent: #14
مكرر
Post: #17 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 00:44 AM Parent: #16
صاحب الاغنيات و الاشعار الجميلة "الجيلي عبد المنعم" كان له نصيب الاكبر من حلقة اليوم, و تحدث وردي عن التعاون الفني بينه وبين الجيلى صاحب اغنية الهوى الاول المشهورة الحلقة الحادية عشر - الجيلي عبد المنعم اغنيات مقدرة ايامك باسمه يا قلبي وانت بتشكي - و مرحبا يا شوق وغيرها
الفاضل و فيصل , الف تحية لكم و مرحب بكم *وقووووول كما تشاء يا الفاضل
*
Post: #20 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 08:27 AM Parent: #17
Quote: صاحب الاغنيات و الاشعار الجميلة "الجيلي محمود" كان له نصيب الاكبر من حلقة اليوم, و تحدث وردي عن التعاون الفني بينه وبين الجيلى صاحب اغنية الهوى الاول المشهورة الحلقة الحادية عشر - الجيلي محمود اغنيات مقدرة ايامك باسمه يا قلبي وانت بتشكي - و مرحبا يا شوق وغيرها
أحـمد صحصح معانا
الـجّيلـي مـحمود شاعر آخر الشّاعر الذي كتب الأُغنيات الثّلاث لوردي هو الـجّيلـي عبد الـمنعـم عبّاس
مودّتـي
Post: #18 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 01:22 AM Parent: #14
Quote: يا أحـمد مساء الـخيـر أنت تعنـي بالطّبع أُغنية ( الـحُبّ والثّورة ) ( مشتاق ليك كتيـر والله ) والتـي تـمّ استخدام لـحنها للتّغنّـي بأُغنية ( يلاّ وتعال يلاّ )
نعم يا اخي لؤي اقصد اغنية " الحب و الثورة" وكتب ابياتها اعلاه. في الحقيقة لا انتبه كثيرا لاسماء اغاني وردي اعرف الاغنية من خلال الابيات و الالحان. فعلا تم نقل اللحن الى أغنية يلا وتعال نسبة للشمولية في ذلك الوقت. و اشتهرت اغنية داخل سجن كوبر كما ذكر وردي في الحلقة وكما وثقت انت هنا "Re: لــــؤى يــلا وتعــال يـــلا...... " واللحن البديع مازال الي اليوم مع اغنية يلا وتعال وفرحي خلق الله المناسبة لكل الازمة
100% يا عزيزي و خليك قريب للمساعدة :)
Post: #19 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 08:21 AM Parent: #18
Quote: واللحن البديع مازال الي اليوم مع اغنية يلا وتعال وفرحي خلق الله
أحـمد صباح الـخيـر
ياخـي إنت الصّيام تاعبك شديد خلاص تاااااااااااااانـي فرّحـي خلق الله ؟
تـحاياي
Post: #21 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 08:32 AM Parent: #19
Quote: ياخـي إنت الصّيام تاعبك شديد خلاص تاااااااااااااانـي فرّحـي خلق الله ؟
صباح النور يا عزيز يالا وتعال يالا
تعب شديد يومنا طويل لحدي 10 عشان كدة قولتَ ليك خليك قريب
Post: #22 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 08:42 AM Parent: #21
Quote: تعب شديد يومنا طويل لحدي 10 عشان كدة قولتَ ليك خليك قريب
ههههههههههه الله يعينك ياخـي وتصوم وتفطر علـى خيـر
( يلاّ وتعال يلاّ ) و ( الـحُبّ والثّورة ) أو ( مشتاق ليك كتيـر والله ) هـما اللتان تـحملان نفس اللحن أمّا فرّحـي خلق الله فطبعاً هـي أُغنية وسط الدّائرة والتّـي لا علاقة لـها بالأُغنيتيـن أعلاه
تقديـري
Post: #23 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 09:31 AM Parent: #22
Quote: ( يلاّ وتعال يلاّ ) و ( الـحُبّ والثّورة ) أو ( مشتاق ليك كتيـر والله ) هـما اللتان تـحملان نفس اللحن
صحيح في المواقع ما لا قاني تسجيلات ((قديمة)) لهذه الاغاني ان شاء الله لو لقيتا بنوثقها هنا علشان الاخوة قراء البوست يستمعو واهو بالمرة يعرفو الفرق بين كلمات تلك الاغاني و اللحن الواحد
:)
مشكور جدا ويدك العافية
Post: #24 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: محمد عبد الله شريف Date: 08-13-2011, 10:27 AM Parent: #23
شكرا احمد بشير لاتاحة الفرصه لنا لمتابعة الحلقات الورديه
الهرم العظيم يتجلي عزة وشموخ ,, حضور مبالغ فيه منتهي الجمال والعافيه ..
كلما تقدم في العمر تعتق في دواخله الابداع وسمح الكلام .. ذاكره ورديه لا تذبل
تماهي حينما ألقي رائعة صالح سراج نثرآ فقلت ليته زاد ,,
ياسرنا وردي في الحالتين ويشدنا اوتارآ في اروكسترا هيبة جلاله ..
دامت عافيتك يا اعز الناس
تخريمه التحيه للشاعر المرهف اسحق الحلنقي ,, الذي يبدو مرهقا ومشتت تمامآ عكس الاستاذ وردي
الذي كثيرا ما يحاول اعادته لساحة الحوار ,, خايف انو ما يقدر يكمل الحلقات بالنفس المطلوب وكذلك ا مقدمة البرنامج حضورها الانثوي جميل الا عندها حالة توهان وخرمجه احيانا لانها تخاول حشر مفردات في غير مواضعها مثل التلاقي . التداعي , الجمال , القدريه
ويا ريت لو انتبهت ل ان الثرثره تكثر من الاخطاء
يا قريبنا لؤي لماذا لا تتبني سودانيز اونلاين مبادره لقاء القمه بين الاستاذين محجوب شريف و وردي .. فيكون اللقاء بمثابة قرار من الشعب .. و انا ارشحك وتختار من يكون معك في مشروع فاعل خير للوطن وتلم الشمل عشان تتكرر من جديد لوحة بروفايل صاحب البوست احمد بشير
Post: #25 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 12:49 PM Parent: #24
الحديث حول الشاعر ابوقطاطي شاعر عافية الفـن السوداني , شاعر الشعر الاصيل الممتد من الاصالة و التراث و الشعر الايقاعي النابع من الدوبيت, الشاعر ابوقطاطي فصيح بالبساطة واكتسب منه وردي ما جهله من الايقاعات السودانية الحارة الحلقة الثانية عشر - عن ابوقطاطي ومن اشهر اشعاره التي تغني بها وردي "شن بتقولو"
الاخ الكريم محمد شريف , سعيد بمرورك و كتر خيرك
Quote: يا قريبنا لؤي لماذا لا تتبني سودانيز اونلاين مبادره لقاء القمه بين الاستاذين محجوب شريف و وردي ..
اعجبني اقتراحك و اتمني أن نرى لقاء بين هؤلاء العمالقة "وردي + محجوب" ليوثق للاجيال, ونطلب الاخوة اعضاء سودانيزاونلاين العاملين بقناة الشروق طرح الفكرة للقناة و الاهتمام بالامر.
*
Post: #27 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 03:08 PM Parent: #24
Quote: يا قريبنا لؤي لماذا لا تتبني سودانيز اونلاين مبادره لقاء القمه بين الاستاذين محجوب شريف و وردي .. فيكون اللقاء بمثابة قرار من الشعب .. و انا ارشحك وتختار من يكون معك في مشروع فاعل خير للوطن وتلم الشمل عشان تتكرر من جديد لوحة بروفايل صاحب البوست احمد بشير
أُستاذ مـحمّد عبد الله شريف سلامات
إن شاء الله فـي نوفـمبـر وعيد الأضحـى تسـمع كُلّ خيـر
إمتنانـي
Post: #26 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 02:42 PM Parent: #23
Quote: صحيح في المواقع ما لا قاني تسجيلات ((قديمة)) لهذه الاغاني ان شاء الله لو لقيتا بنوثقها هنا علشان الاخوة قراء البوست يستمعو واهو بالمرة يعرفو الفرق بين كلمات تلك الاغاني و اللحن الواحد
:)
مشكور جدا ويدك العافية
يا أحـمد سلامات
أهديك الأُغنيتيـن
الـحُبّ والثّورة
يلاّ وتعال يلاّ
تـحاياي
Post: #28 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 11:33 PM Parent: #26
الحلقة اليوم عن شاعر الجمال و النضال محجوب شريف , قال عنه وردي انه مسكون بالانسانية عمل ويعمل من اجل هذا السودان وشعبه ناضل ومازال يناضل ونقى نقاء الثوري الاصيل وهامس في شعره, لا يتنازل ولا يخاف
الحلقة الثالثة عشر - ذكريات محجوب شريف ووردي في سجن كوبر, و قصة قصيده "اهلا اهلا بالامجاد"
الكريم لؤي , شكرا يا عزيز "لتوثيق هذه التسجيلات النادرة" تحدثنا امس عن محجوب شريف>>> و اليوم الحديث في الحلقة حول القامة محجوب شريف *
Post: #29 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: لؤى Date: 08-13-2011, 11:42 PM Parent: #28
Quote: "انا مجنونك" واحدة من رومانسيات محمود شريف
حالتك جد صعبة ورمضانك كعب شديد
الله يدّيك العافية يا صديقـي
Post: #30 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-13-2011, 11:53 PM Parent: #29
Quote: حالتك جد صعبة ورمضانك كعب شديد
ههههههههههه ملاحظتك صحيحة لكن انتبهت للخطأ قبل مداخلتك ولاحظ لي زمن التعديل
سبب "محمود" دي في واحد من الشباب المعانا مبتهج بالحلقة ومعلي صوت الاستريو وعامل لينا تشويش ههههههه الليلة ما عندها علاقة بالصيام , فطرنا قبيل يا مان :)
Post: #31 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: محمد عبد الله شريف Date: 08-14-2011, 09:25 AM Parent: #30
حلقة محجوب شريف كانت ميته جدآ اكثرت مقدمة البرنامج كعادتها من من الكلام الممجوج الذي لا يمت للموضوع بصله
واستطاع الحلنقي ان يخرج بها خارج الشبكه ,, واستهلاك للزمن في حوار بيزنطي عن تعريف الحنيه .. ويتخيل لي الشابه دي فاقده الذاكره التراكميه الي برتنا بيها الحلقه الماضيه
التي كررت فيها مفردة الذاكره التراكميه اكثر من 15 مره في 5 دقائق ومسكت الليله في كلمة الرسم البياني والانحداري .. لو في زول بعرف الزوله دي يوصل ليها حكمة انها كلما استخدمت كلمات بسيطه معبره يفهمها الجميع
تاسر المشاهدين وتدخل قلوب الناس اما استمرارها في استعراض كم الكلمات والجمل الفلسفيه الما مفهومه علي طريقة المثقفاتيه ( شكل البوح والاندياح ) حيشتت افكار وردي ويقصر من زمن البرنامج
عليها ان تكمل حضورها الانثوي بقليل من العفويه وبساطة السؤال اكثر من اهتمامها باظهار العقد الذي يجمل جيدها للكاميرا بحركة شد الثوب طوال الحلقه ..
ففي حضرة من غني كل الطيوب الحلوه يا مولاتي والجيد الرقيق ينزوي كل شيئ واي جمال نستشفه من جماله ,,
استاذ الحلنقي لسه شايت في وادي اخر ومحلق مع العصفور والنجمه والورده والخنجر .
Post: #32 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-15-2011, 05:54 AM Parent: #31
حلقة ذكريات الراحل الشاعر اسماعيل حسن وبحضور رفقية دربه الحاجة" فتحية " وحديثها عن الراحل..... قال وردي انه وانتاجه الفني مدان للحاجة "فتحية" لانها صاحبة فضل ودور كبير في المحافظة على "اسماعيل ووردي "و يعود اليها الفضل في اشياء كثيرة جدا ادت لاستمرار وردي مع اسماعيل حسن......اسماعيل حسن كاتب "بعد ايه جيت تصاريحني", ومن اشهر اشعاره نور "العين" و "المستحيل" و العديد من الراوئع الحلقة الرابعة عشر - مع اغنية "حنيّة" وقصـة اغـنية "غلـطـة"
الاخ الكريم/ محمد عبد الله شريف فعلا الحلقة 13 كانت فيها الكثير من المغالطات كما تفضل انت بالتعقيب. وللاجابة على سر هذه المغالطات تابع الحلقة 14 , وكما قال وردي في الحلقة ان هذه الاختلافات كانت لها الدور الكبير لنجاح الاغنيات و بالتحديد الاغنيات الحزينة, كا اغنية "غلطة" الذي اقسم وردي انها لم تكتب في فتحية رفقية درب اسماعيل حسن وانما كتبها اسماعيل في وردي شخصياً.
Post: #33 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-15-2011, 07:05 AM Parent: #32
Post: #34 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: حمد عبد الغفار عمر Date: 08-15-2011, 09:39 PM
سلام يا أحمد ومشكور جدا على هذا التوثيق للهرم وردي
Quote: قال وردي انه وانتاجه الفني مدان للحاجة "فتحية" لانها صاحبة فضل ودور كبير في المحافظة على "اسماعيل ووردي "و يعود اليها الفضل في اشياء كثيرة جدا ادت لاستمرار وردي مع اسماعيل حسن
أكثر ما شدني في هذه الحلقة ذلك الحياء التي تدثرت به السيدة الفاضلة فتحية والذي منعها من البوح صراحة بإن ما كتب من شعر بواسطة الشاعر الراحل كان عنها. فلا غرو فهي من جيل النساء العظيمات امهاتنا وخالاتنا وعماتنا وفعلا وراء كل عظيم إمراة عظيمة.
الشكر مجددا
Post: #35 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-16-2011, 02:57 AM Parent: #34
مواصلة للحلقة الـ 14 وهذه المرّة مع احلام اسماعيل حسن ابنة الراحل اسماعيل حسن.... وبين وردي أعز الناس و اسماعيل حسن قصة حب طويله ** شيدناها بالامال والعشره النبيله ** ديمه الناس تفرق تجمعنا التلاقى ** جمر البين يحرق ويزيد فى اشتياقى ** يامسافر مشرق وين أيامكم حليله** كانت فى خيالى ألحان فى شعورى** أسرار المحنه بتعذب ضميرى**حلفتك بربك لو فى الطيف تزور**ان طالت ليالى وان جارت علينا**برضنا نحن احنا روح واحده بقينا**ومن قول العوازل سيبك ما علينا الحلقة الخامسة عشر- لمحة من حياة اسماعيل حسن وحديث الذكريات بشهادة ابنته
سلمك الله اخي حمد عبد الغفار الحلقة 15 اعلاه و في القادمة انشاء الله ستحدثت احلام اسماعيل. احلام اديبة متمكنة كما تابعنا في كتاباتها واطلب من الاخ بكري منحها عضوية في هذا المنبر لتوثق لوالدها رحمه الله
Post: #37 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-16-2011, 03:02 PM Parent: #36
الف مرحب بالاديبة أحـلام إسماعيل , فاتنا الترحيب بها وسعيد بوجودِك في المنبر , و الشكر للاخ لؤي للتعريف
بالعكس يا لؤي وجودك مهم جدا انا شايف انه مداخلاتك دي مهمة في البوست اذا ما جيت حا أفتح فيك بلاغ و التهمة حا تكون "التقصر في التوثيق لوردي"
يديك العافية يا صاحب
:)
Post: #38 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-17-2011, 05:28 AM Parent: #37
على رمل الطريق من بيتنا جابنا الشوق في سكتكم وصح الذكريـات فينا, مواكب الغيم لحارتكم بعد ما قلنا نحن نسينا ايه ذكرنا سيرتكم......حلقة اليوم مخصصة لاشعار الحلنقي و الشجن في السفر...كتب الحلنقي كلمات اغنية دوري يا ايام وهو في طريقه الي كسلا لاحد الاعياد الحلقة السادسة عشر - قصة الاغنية "دوري دوري يا ايام" , الحنين الي مسقط الرأس
دوري يا ايام - إسحاق الحلنقي لحنها وردي بالايقاع الافريقي "الغاني"
دوري دوري يا أيام يا أشواق عدينا نحن الليلة للحبان من سفرا بعيد جينا *** على رمل الطريق من بيتنا جابنا الشوق في سكتكم وصح الذكريـات فينا مواكب الغيم لحارتكم بعد ما قلنا نحن نسينا ايـــه ذكــرنا سيرتــكم *** وحاة عزتكم الفي قلوبنا ياحلوين تطلونا افتحو لينا احضانكم بعد توادنا لمونا قالو الفرقة بتغير خايفين بكرة تنسونا صبح رمل الطريق حزنان علـــيهم متين تلاقـــونا *** طــفنا الحي مشيناهو فوقنا سحابة حزنانة هناك لاقونا ناس سألونا إيه عاملين في دنيانا وجات سيرتكم الحلوة بأحلى عبير كريحانة واخفت بينا ذكراكم ودنيـــاكم مفارقــانا **********
Post: #39 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: Elfadil Sabeil Date: 08-17-2011, 05:55 PM Parent: #38
متابعين اﻹبداع يا أحمد
Post: #40 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-18-2011, 10:46 AM Parent: #39
جاري البحث عن الحلقة 17 -قناة الشرق "منموقع القناة الرسمي لا يمكن التسجيل منها مباشرة ياريت لو في برنامج للتسجيل
Post: #49 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: أحلام إسماعيل حسن Date: 09-23-2011, 08:05 AM Parent: #37
الأخ العزيز احمد محمد بشير
أشكركم على كل ما كتبتموه فى حقى والأسرة وأبى الشاعر إسماعيل حسن (رحمه الله) حقيقة لقد كانت حلقات أعز الناس فرصة لإجترار ذكريات وأيام خلت إسترجعت فيها أيام صبايا وأنا أرتع فى حنان أبى أرقص على رنين كلمات أشعاره وألحان الفنان الكبير محمد وردى وكان أستاذ الحلنقى وأستاذ السر عثمان الطيب خير من عبر عن تلك الفترة النضرة أيام كان الفن أصيلا وكان طعم الأيام حلوا .. لقد قضيت لحظات سعيده سأحملها زاداً فى غربتى أتوسدها كلما حرقنى بعد المسافات عن الوطن وعن الأهل وعن كل جميل ... أكرر شكرى لك أخى احمد محمد بشير
Post: #50 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: أحلام إسماعيل حسن Date: 09-23-2011, 08:07 AM Parent: #37
الأخ العزيز احمد محمد بشير
أشكركم على كل ما كتبتموه فى حقى والأسرة وأبى الشاعر إسماعيل حسن (رحمه الله) حقيقة لقد كانت حلقات أعز الناس فرصة لإجترار ذكريات وأيام خلت إسترجعت فيها أيام صبايا وأنا أرتع فى حنان أبى أرقص على رنين كلمات أشعاره وألحان الفنان الكبير محمد وردى وكان أستاذ الحلنقى وأستاذ السر عثمان الطيب خير من عبر عن تلك الفترة النضرة أيام كان الفن أصيلا وكان طعم الأيام حلوا .. لقد قضيت لحظات سعيده سأحملها زاداً فى غربتى أتوسدها كلما حرقنى بعد المسافات عن الوطن وعن الأهل وعن كل جميل ... أكرر شكرى لك أخى احمد محمد بشير
Post: #51 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: أحلام إسماعيل حسن Date: 09-23-2011, 08:53 AM Parent: #35
_
كلام في الحب
حديقة العشاق
بيني وبينك والايام قصة حب طويل
وفيما انا انظر كدأبى الى السماء رايتها على درجة عالية من الصفاء,بعض النجوم تنتثر هنا وهناك منها الساكن ومنها ما يتلألآ , ليلة قمرية كأن نسيمها يتنزل من عل. هذا هو الليل فى حضنه تتجلى عوالم من الأضواء موحية بحالة من الحلم السماوى .
يوم آخر من أيام حديقة العشاق ارى زوار الحديقة فى هدوء وجمال متميز, اخطف نظرة باتجاه صف الزهور فارى نداوتها وبريقها وكأنها تتشابى بتوق واستحياء الى السماء فى معرض لاثبات الجمال .
لوحة تفصيلية بديعة اخرى ادنو منها , قصيدتين, نقش فى الوجدان زهرتين من غرس اسماعيل يانعتين يبدوا عليهما خليطا من الألوان التعبيرية المدوية , الوان من لغة الطبيعة فى همسها عبر الأصفر والبنفسج حيث يزحف كل منهما نحو الأخر فى ذوبان مبين. هاتان الزهرتان هما سؤال , وبينى وبينك والأيام .
يتناسق كل ذلك الأبداع والجمال بمعية الحضور فالكل تائه والكل آسر ومأسور ثم تسرى فى وجدانى موسيقى بينى وبينك والايام فتتراقص لها طبلات اذنى ثم يبدأ الجسد فى الحراك.
سألت العائد عن بينى وبينك والايام فقلت له :- كانت لنا ايام , قربتنا ايام ثم باعدت بيننا ايام هل كان هذا تصور اسماعيل حسن لبينى وبينك والايام؟
أجابنى قائلا :- انها المسافات, الزمن مسافات, تتغير المسافات ولا يتغير الحب المتعمق فينا , يتأصل يغور عميقا فى داخل المرء.
ثم اردف قائلا :- لا انا وولا انت تغيرنا فى دواخلنا بل كل الذى طرأ فهو غبار السنين العالق فى وجهى ووجهك ولم تغير المسافات ما بدواخلنا.
قلت له :-
اسأل قلبك عن حالى اسألو
أسال كده قلبك عن حالي أسالو
تنبيك عن سوالك أشواقي **** كده اسال عيونك يا اجمل حبيب واسال لي خدودك براها بتجيب في عيونك حياتي وفي لونك بغيب **** قلبي الحباك أسالو ما حب سواك أسالو ما عاش لولاك أسالو طول عمرو فداك أسالو **** في حبك متيم والشوق ليك رسول من قلبي بيجيك وما بيخشى العزول وحولك يا حبيب يطوف وليك يزور
عنك وعني أسالو.. طهرك وفني أسالو وما فجرت لحني وما غنيت نشيد **** انا عايش عشانك يا أملي الوحيد لو ما كان غرامك لحني وما كان صابني ريد وما فجرت لحني وما غنيت نشيد حسنك وفني أسالو عنك وعني أ سالو ***** أنا ضقت السعاده وفا رقني الندم قبلك كنت تايه وحياتي عدم سلواى كان دموعي وسميري الالم لكن يا حبيبي دنياى ابتسم ***** حل ربيعي أسالو قدت شموعي أسالو وراحو دموعي أسالو فرد قائلا ينبيك عن سؤالك اشواقى. عندما ارجع لديوان ابى اسماعيل استصحب محمد وردى بكامل الاوركسترا وتطل صور عمى الفنان التشكيلى احمد عبد العال ومعه ابراهيم العوام , والا ستاذ عبد المطلب الفحل, كان مقامهم يطيب هناك, شعراء , ادباء وفنانون و تشكيليون ومبدعون من فى كل ضروب الحياة .
اذكر عندما كان محمد وردى يغنى بينى وبينك والايام وأسأل قلبك عن حالى كنت دائما ارقص فى هاتين الاغنيتين ومنذ نعومة صغرى.
عندما اذهب للمزرعة دائما يكون بحوزتى جهاز تسجيل يحوى هاتين الاغنيتين وهما من احب الاغانى لقلب ابى و يبدأ الاستماع فى المزرعة ويتواصل بنا المسير باتجاه شاطىء النيل الازرق حيث نجلس على الرمال فنستغرق فى الاستماع.
حكى لى ابى اسماعيل عن الفترة التى كتب فيها هاتين الاغنيتين , حيث كانت فترة الافتراق بين ابى وامى , فكان انتاجا عاطفيا غزيرا تغزى من قصة الحب العنيفة بينهما وتفجر غديرا من الاغانى تماهى فيها كل العاشقين فى السودان , شهدت تلك الفترة قذائف ومشاكل بين الجيران بين اهل امى واهل ابى , فوجد العزال ارضا خصبة
فرد قائلا ينبيك عن سؤالك اشواقى.
يطوفون بين العاشقين بحكاوى بعضا من القيل وبعضها تاجيج لنار الوجدان, اشعل العوازل نيران الاثارة فكانت مساهمة فى تاجيج العاطفة فتتوالى ردود الفعل دررا وابداعات.
بيني وبينك والايام قصة حب طويله
شيدنا ها با لامال والعشره النبياه
****
ديمه الناس تقرق وتمنعنا التلاقي
جمر البين يحرق ويزيد في اشتياقي
يا مسافر مشرق وين ايامكم حليله
*****
كانت في خيالي الحان في شعوري
اسرار المحنه بتعذب ضميري
حلفتك بربك لو في الطيف تزوري
****
ان طالت ليالي وان جارت علينا
برضنا نحن نحن روح واحده بقينا
ومن قول العوازل سيبك ما علينا
Post: #41 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-18-2011, 07:30 PM Parent: #1
للمرة ثانية خصصت هذه الحلقة عن الشاعر الوطن الراحل اسماعيل حسن, وبحضور ابنه وليد اسماعيل, وتحدث وليد عن والده المزارع البسيط والمتواضع حيث عاشو في الريف شمالا, بيته كان مفتوح للجميع الى ان توفاه المولى عز وجل الحلقة السابعة عشر - مع قصة اغنية "غلط" وكيف كانت مناسبة كتابتها وتلحينها
Post: #42 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-18-2011, 09:21 PM Parent: #41
صدفة اللقاء كما قال وردي مع الراحل "اسماعيل حسن" كانت منحنى جديد لمسيرة الفن السوداني وشكلت صدفة اللقاء الواقعية للاغانية السودانية الحديثة لفترة ما بعد أغاني الحقيبة الخلقة 18 - مع احلام اسماعيل حسن وفي النهاية سنعرض مقالاتها لتوثيقها لوالدها ولمناسبات الاغاني.
Post: #43 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-20-2011, 10:31 AM Parent: #42
الحلقة كانت مع / سعد الدين ابراهيم وسيشرف البرنامج في الحلقات القادمة. الحلقة 19 - اغنية "حرمت الحب والريدة" وقصتها في عام 1958 وكانت هذه الاغنية كبداية لنمط الاغاني الخفيفة
Post: #44 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-20-2011, 08:01 PM Parent: #43
حلقة اليوم إمتداد لحلقة الامس,, تاريخ لتجربة جميلة بين وردي و سعد الدين منذ السبعينات والى الآن الحلقة الـ 20 - والحديث عن التعاون الفني بين وردي و سعد الدين ابراهيم
Post: #45 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-21-2011, 08:02 PM Parent: #44
حلقة الناس القيافة عن الشاعر ابوقطاطي صاحب الاسلوب البسيط في المفردة وكاتب "الفينا مشهودة" الحلقة شقية ووثق فيها وردي بإبداع لشاعر وطني عظيم من ابناء الجموعية المشهورين بالفروسية الحلقة الـ21 - عن أبوقطاطي وبحضور سعد الدين و الحلنقي
Post: #46 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-22-2011, 08:51 PM Parent: #1
حلقة اليوم على امتداد انغام الطمبور الساحرة وامتداد لحلقات التوثيق لإسماعيل حسن,, وتحدث وردي عن سر العلاقة بينه وبين اسماعيل وعن البيئة التى تجمع بين ابناء قبائل الشمال وكيف تعلم وردي بدايات الغناء عزف الطنبور على يد حسن عبادي "المنصوري" الذي يعتبره وردي الاول في الموسيقى الحلقة الـ22- بحضور الشاعر السر عثمان الطيب للتوثيق لصديقه واستاذه اسماعيل حسن, مشاهدة ممتعة للجميع
و الشكر والتحية لصديقي العزير الاخ نبيــل نجم الدين لتسجيله الحلقات وتوثيقها يوميا على قناته باليوتيوب
Post: #47 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-23-2011, 11:29 PM Parent: #1
مواصلة للتوثيق لإسماعيل حسن رفيق درب وردي , وفي هذه الحلقة الحديث مخصص لاغنية "حبيناك من قلوبنا", وضيف الحلقة الشاعر "السِر عثمان" ..... بالاضافة الى الحديث عن آلة الطنبور الحلقة الـــ23- امتداد لحلقات إسماعيل حسن الشاعر الوطن
Post: #48 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 08-24-2011, 08:51 PM Parent: #47
سر الغناء المفرح و البهيج بين وردي و اسماعيل , ومراحل تطور الغناء السوداني , وكيف كان ميلاد الاغنيات, وحلقة اليوم مع اغنية "اسأل قلبك" كلمات إسحاق الحلنقي الحلقة الـ 24- إمتداد لحلقات الراحـل اسماعيل حسن وبحضور الشاعر/ السر عثمان
Post: #52 Title: Re: في حضرة الوطن في حضرة وردي أعـز الناس-الحلقات الكاملة-فيدوهات Author: احمد محمد بشير Date: 09-29-2011, 02:27 PM Parent: #48
Quote: أشكركم على كل ما كتبتموه فى حقى والأسرة وأبى الشاعر إسماعيل حسن (رحمه الله) حقيقة لقد كانت حلقات أعز الناس فرصة لإجترار ذكريات وأيام خلت إسترجعت فيها أيام صبايا وأنا أرتع فى حنان أبى أرقص على رنين كلمات أشعاره وألحان الفنان الكبير محمد وردى وكان أستاذ الحلنقى وأستاذ السر عثمان الطيب خير من عبر عن تلك الفترة النضرة أيام كان الفن أصيلا وكان طعم الأيام حلوا .. لقد قضيت لحظات سعيده سأحملها زاداً فى غربتى أتوسدها كلما حرقنى بعد المسافات عن الوطن وعن الأهل وعن كل جميل ... أكرر شكرى لك أخى احمد محمد بشير
الاستاذة الاديبة/ أحـلام إبنة الراحل المقيم إسماعيل حسن ,, خالص الود و الاحترام لا شكر على واجب يا اخت احـلام .. والدك رحمة الله عليه يستحق كل خير ونحمد الله اننا منتمين لوطن انجب إنسان بقامة إسماعيل حسن الانسان .. الحلقات متميزة و اكثر حلقة اعجبتني هي الحلقات التى تحدثت فيها والدتكم حفظها الله عن الراحل سأنقل هذا البوست للربع الجديد , ليشاهد من فاتهم هذا الجمال بقية الحلقات وبما فيها الحلقة الاخيرة سأرفقها لاحقا إن شاء الله .
