Post: #1 Title: ياسلام على جمال الصوت والاداء ... Author: محمد عبدالرحمن Date: 06-17-2010, 08:24 AM
Post: #2 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 08:35 AM Parent: #1
ثمة شبه ما .. شيء مشترك .. يجمعهم جميعا الكاشف و خالدى ومصطفى سيد احمد وعبدالعزيز المبارك وعركى والامين عبدالغفار وعبدالمنعم حسيب وان كنت استثنى محمد الامين من هذا المشترك الذى يجمع هذه الاصوات .. شيء اشبه بالاسى او لنقل الشجن ... هل للتاثيرات الجغرافية علاقة بالاصوات وتشكلاتها؟ حتى ان كانت هناك علاقة للمكان الجغرافى مع تشكلات الصوت ...فينبغى ان يكون شيء غير هذا الشجن الكثيف الذى تشترك فيه هذه الاصوات .. او هكذا خيل لى ..عموما اعرف ان هناك علاقة بين حركة الانسان فى المنطقة المحدده وايقاع تلك المنطقة ...فايقاع المردوم وحركة الابقار فى سيرها ثمة تشابه ..لكن علاقة بين الصوت والمكان هذا مالاافهمه ....
Post: #3 Title: Re: ياسلام على جمال الصوت والاداء ... Author: طارق جبريل Date: 06-17-2010, 09:31 AM Parent: #2
محمد كيفنك ياخي طلعتنا من هم وغم الحكومة
تليشة: صاحبك شايفو خطب في السودان
Post: #4 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 09:40 AM Parent: #3
ياطارق جبريل اخبارك ...
نحن قصدنا نطلع من هم وغم الحكومه بصوت حسيب (الملان حزن) دا ..تعرف الحزن فى اصوات فنانى الشيايقية والشمال البعيد عموما حزن مبرر ومعروف اسبابو ..لكن الشجن فى اصوات فنانى الجزيرة ماعرفنا ليهو سبب ..بالله لاحظ كمية الاسى الفى صوت الامين عبدالغفار دى ..يديك احساس انو حزن الدنيا كلو (اتلم) فى صوتو ..
**
صاحبى من رجع السودان عمل رائح ...وخبر خطوبتو دا جديد لسه ماسمعنا بيهو ...نتصل ونشوف سعيدة الحظ منو ...
Post: #5 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 09:53 AM Parent: #4
خالكم خليل اضاف لقائمة فنانى الجزيرة اصحاب الاصوات المليئة حزن واسى ..اضاف الفنان محمد مسكين .. وخير الاضافة اضافة خليل ..فمحمد مسكين رائعته (من ارض المحنة ) تكفيه للتربع على قائمة الحزانى من فنانى ا لجزيرة بكل جدارة ...
قول لى ياحبيبى شن اعمل وراكا هل احلم وامل فى سرعة لقاكا ولا اسيبا مدنى واجى اسكن حداكا
شكرا لفضل الله محمد شاعر الاغنية والشكر لمحمد مسكين الذى اعطاها كل هذا الشجن بصوته هذا ...
Post: #6 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 10:20 AM Parent: #5
........................... أذكريني يا حمامة كل ما ساجع ترنم بي هواي وحب جمالك أذكريني يا حمامة كلما هطلت غمامة في مساءك أو في صباحك وفي غدوك أو في رواحك وكلما بارق تبسم أو نسيم الصبح نسم عني دايماً يكون سؤالك.. *** فيمَ هجراني وعلام يالهواك صار لي علامة شاهر لي داماً سلاحك وموتي واجب في اصطلاحك طرفي عن رؤياكم يحرم وذنبي ايه غير اني مغرم ولي هواك من بدري مالك..
تعظيم سلام وكثير اعتذار لكروان الحقيبة بادى محمدالطيب ..الذى هو حسب التصنيف اعلاه يعتبر هو الرائد والمعلم ..بادى محمد الطيب القادم من حلة عباس بمنطقة الحلاوين ..فنان (من ارض المحنة) .. وصوته به من الشجن والحزن مايكفى ... ومن لم يطربه بادى محمد الطيب فقد فاته من الطرب الكثير بل (الكثير جدا) ....
Post: #7 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 10:40 AM Parent: #6
الليل داجٍٍٍٍٍ ولكن هل زملته الضفائر والورد نادٍ ولكن هل ذاب لمّ المشاعر وفي الجبين إئتلاق مضوع والبدر عابر يا حزن مليون عامٍ دارت عليك الدوائر بين بدرين يا قلب سافر وخبئ كان التلاشي تلاشٍ والإلتياع ظمئ يارفيق العمر قل لي والليل رحب وضئ فكيف ارتحالك عنا أمراً وكيف المجئ يا عذب أهمي ضياءاً فكلنا مستضيء أو فاصطلينا عذاباً يا رحمةً لا تفيء فأنت طفلٌ مهذبٌ مشاكسٌ وبريءُ..... ***
لم يبقى الا مغنى الكلمات اعلاه خارج ا لتوليفة من ياتينى به ..من يجد لى رابط بين صوته وبين صوت هؤلاء ...نفس الشجن والاسى ولكنه خارج النطاق الجغرافى ..لو استطيع (لحشرته حشرا) حتى تكتمل الصورة كما يقول ذلك البرنامج التلفزيونى الذائع الصيت ...وحتى اثبت فرضيتى كون ان الصوت ذا علاقة بالمكان الجغرافى المحدد ..
هل من فتوى تبيح ضم صالح الضى الى (ارض المحنة ) الجزيرة؟
Post: #8 Title: Re: ياسلام على جمال الصوت والاداء ... Author: khaleel Date: 06-17-2010, 11:28 AM Parent: #7
دعاش الجزيرة ومطرها وبطيخها ولبن اغنامها وعنكوليبها
وطيبة اهلها
كل ذلك معينات تجعل الصوت اكثر طلاوة ونداوة
وانتشار الصوفية والمديح والقباب يساهم ايضا في جعل وجدان انسان الجزيرة اكثر وهجا
Post: #9 Title: Re: ياسلام على جمال الصوت والاداء ... Author: khaleel Date: 06-17-2010, 11:34 AM Parent: #8
سيد الغناء الكاشف
ورقيق الغناء الخير عثمان
واجمل صوت رمضان حسن
وابو اللمين وعركي
واخرون
Post: #10 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 12:14 PM Parent: #9
صبري اين ياوصـلي.. قلبــي بنارالغرام مصـلي ياعـهود امالي أنفصــــــلي.. مابقيـف من النـويح أصلي عقلي يوت كل ساعة ينقص لي.. فيك ضاع ياطـيبة الأصلي أيه ده ليل والبدر واضـح لي.. ام ده دعسـك محيو فاضــح لي يالعيون عاد روقـي وحـلي.. خفي رمشك ده المجـرح لي زاد من نار الصدود وجلي.. يامعاني الشـعر والزجــــــــلي باهي جيدك والخــديد مجلي.. ترى ده الهـلاك في الأعين النجـلي ليك نسايم الشوق دوام رسلي.. في هواك كم ضايع مثــلي
الاستاذ احمد الطيب صوت بحنين اهل طابت ..صوت كصوت مديح السمانية فى ليلة من ليالى طابت الشيخ عبدالمحمود وثمة رابط ايضا بطيب الذكر عند الصوفية وحنينهم وهذه الاصوات ..تعايش التصوف المتسامح مع الغناء الجميل فى الجزيرة لم يعكر صفوه شيء ...ففى تنوب غنى الامين عبدالغفار ومدح حاج التوم من الله ...فطربنا لهما الاثنين ...ورجع الامين مادحا ومغنيا معا ... هؤلاء المتصوفة يعلمون اصل الدنيا وروحه والتى هى المعاملة ...والمعاملة وقودها التسامح .. لذلك تعايشوا مع هذا ا لغناء الجميل ...
Post: #11 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 12:19 PM Parent: #10
سؤال مهم آخر ..
هل تاثر المتصوفة بثقافة اهل الجزيرة ام العكس هو الذى حدث ..؟
اعتقد الاجابة ان اهل الجزيرة وجدوا فى التصوف تسامحهم وطيبتهم وحنيتهم فقبلوه ودخلوا فيه افواجا ....بمعنى ان (شن) التصوف وافق (طبقة) الجزيرة فكان هذا النتاج...
Post: #12 Title: Re: ياسلام على جمال الصوت والاداء ... Author: محمد عبدالرحمن Date: 06-17-2010, 12:23 PM Parent: #11
طوريتك في الطين مرمية ،، كوريتك يابسة ومجدوعة لا غيبتك كانت منسية ولا فوتك كانت مبلوعة وابعتلك شال الحب مرسال تايهين في بحرو مراكبية واكتب علي صدر الموج آمال اطفال عمال و مزارعية كيف حال ياخال كيف حال يابوي بتمسي بيوتنا الكاكية حزنانة بتبكي م اآل الحال والزمن الشالكم عيدية سائلين عنك ويوماتي رحيل لمواني المدن النفطيو و شقيش ما تقبل يا ابوالحيل في قلوبنا مواجعك متكية ......
***
مصطفى ..و(كفى) ...
Post: #13 Title: Re: ياسلام على جمال الصوت والاداء ... Author: khaleel Date: 06-18-2010, 11:13 AM Parent: #12
وعلي ذكر صالح الضي
ضاحك المقلتين اغنية هرم
Post: #14 Title: Re: ياسلام على جمال الصوت والاداء ... Author: اسماء الجنيد Date: 06-18-2010, 12:19 PM Parent: #13
Quote: .بالله لاحظ كمية الاسى الفى صوت الامين عبدالغفار دى ..يديك احساس انو حزن الدنيا كلو (اتلم) فى صوتو ..
مرحبا الاخ محمد عبد الرحمن وشكرا غزيرا للبوست الجميل ويا ريت تكون محظوظ وتستمع للفنان الامين عبد الغفار وهو يمدح يااااااااااه لا استطيع ان اوصف لك خاصة وان كان لايف.... استمعت له كثيراااااااااااا كم ابكانى هذا الامين ربنا يديه قدر نيته البيضاء رجل نقي نقي نقي جدا ربنا يديه الف صحة وعافية ان شاء الله يا رب شكرا من تاني شكرا اردب محنة
Post: #15 Title: Re: ياسلام على جمال الصوت والاداء ... Author: محمد عبدالرحمن Date: 06-19-2010, 06:44 AM Parent: #14
شكرا يا
خليل
واسماء الجنيد ..
ويااسماء سمعت الامين بمدح كثير جدا ...وسمعت مدائح من نظمه والحانه .. جمال المديح عند الامين هذا الامتثال الذى يؤدى به .. وهذا التعايش مع الكلمات الذى يبدو فى ادائه ...
ياسلام على ناس تنوب ...يحبون المدئح والانشاد النبوى حبا لامثيل له ..حتى نسائهم يجدن اداء المدائح ... رحم الله الشيخ التوم من الله الذى كان رائدا فى ادب المديح على نطاق السودان كله وليس تنوب او الجزيرة.. فى البال تسليط الضوء على تجربة حاج التوم من الله فى بوست منفصل ..ان شاء المولى .. ...
Post: #16 Title: Re: ياسلام على جمال الصوت والاداء ... Author: khaleel Date: 06-20-2010, 06:59 PM Parent: #15
Quote: هو الرائد والمعلم ..بادى محمد الطيب القادم من حلة عباس بمنطقة الحلاوين ..فنان (من ارض المحنة) .. وصوته به من الشجن والحزن مايكفى
الله علي بادي محمد طيب
ما بخاف شي الا خابر المقدر لا بد يكون
للعدا معروف ما ببادر
ما بخون الجار ماني غادر
ما بقول للناس طبعي نادر
بس بكون للخالق شكور
ما صعيت مولاي ماني فاجر
لا ولا للعالم بتاجر
نفسي يا احباب ليها زاجر
ما بكون كل يوم لي دور
Post: #17 Title: Re: ياسلام على جمال الصوت والاداء ... Author: محمد عبدالرحمن Date: 06-21-2010, 07:23 AM Parent: #16
ياخليل ..
السهل الممتنع + التطريب العالى + الصوت الجميل = بادى محمد الطيب ... ياسلام على حاج طه ياخ ...