المذيعون في الفضائية السودانية والمحللون السياسيون الجدد والايدي الخفية

زمانك في وادي حلفا وفي المدرسة الاولية جانا واحد حاوي مصري وكانت اشهر لعبة عندو انو يمسك ليهو قزازة كدة قدامو وفيها قلم رصاص ويقول "اطلع يااالم" يقوم طالع .. "ادخل ياالم" يقوم راجع داخل القزازة ونحن برابرة طير ساااااي نعاين ونقول "ايه دي ؟ " ...وبعد كام يوم وبعد ما الحاوي قعد ليهو كام يوم اندنا وقربت المسافات عمل ليلة تانية وفي نهاينتها قال كدة يكرمنا زي ما اكرمه اهلنا فقام بشرح الالعاب التي عملها ومنها بتاعة اطلع ياالم.. وكانت الحكاية انو جايب سبيبة شفافة (الزمن داك لا بلاستيك ولا خيوط فايبر اوبتك وبتاع كدة يعني" وملصق السبيبة بقطعة لبان في اسفل القلم (زمانك ما كان في سوبر قلو ولا بتاع كدة يعني ) والطرف التاني رابطو في واحدة من زرارت قميصو .. اها لما يمسك القزازة ويبعدها والقلم داخلها يقوم الاالم يطلع ولما يقربها يقوم الالم راجع داخل القزازة ..... يعني القصة كلها في السبيبة والللبان وتحرييك اليد ونحن برابرة ساااي مفتكريين انو هناك ايدي خفية" بتطلع وتدخل الاالم ......انا طبعا علي طووووول تحصلت علي سبيبة شفافة من حمار عمي الابيض لانو ما كان عندنا حصين وشلت قزازة كيتي كولا (دي كدة مرحلة ما قبل كوكا كولا للجماعة الديناصورات الكانو عايشين في الزمن داك وموجوديين معانا هنا زي كدة ) واشتغلت في اولاد القرية اطلع يااالم ادخل يااالم وانا مبسوط لما اشوف عيونهم تكاد ان تخرج من محاجرها خوفا من الايدي الخفية ....ما برابرة ساااي ...
اها ناس الفضائيات من مذيعييين ومحلليين سياسيين جدد كلما تجي سيرة الاستفتاء في جنوب السودان ومياه النيل بس يقولو "الايدي الخفية" هي السبب ...ايدي خفية بتاعة ايه ؟؟...خمسة وخمسين سنة بعد الاستقلال وايدي خفية ؟؟.... هي الايدي الخفية دي الحاربت خلق الله في الجنوب وفرضت عليهم انو يشيلو السلاح ويهجرو ارضهم؟؟ ..هي الايدي الخفية دي هي الفرضت تسمية لسكان جنوب السودان بانهم الجنوبييين ومش السودانيين ؟.. هي الايدي الخفية دي القضت الخمس سنوات الماضية بعد نيفاشا تزاول مع السودانيين في جنوب السودان كل الالعاب البهلوانية من دسديس لفلوس البترول وخلق نزاعات داخلية وتهميش سياسي بينما هم شركاء في الحكم وخلق زعامات منافسة تقلق مضجع قادة الشراكة ؟؟؟ هي الايدي الخفية دي التي جعلت السودان دولة مصب وكمان يقف ضد كل جيرانه الثمانية عشان خاطر عيون مصر والتي اعطاها حصة من المياه لم تراعي حالة الجيران في مستقبل الايام ؟؟ هي التي جعلت الثماني جيران ما يساووش نكلة قدام جار واحد في الشمال (مصر) وبذا فقد السودان دورا وسطيا وسيطا جامعا عظيما يمسك بكل الخيوط ويقول اطلع وادخل بحساب ؟؟ السودان هو صاحب اللبانة والسبيبة والقلم والقزازوة ولا توجد ايدي خفية وانما خداع بصري علي مزاج اللعيبة .....

ألأخ أبوبكر!

إيدي خفيه ومؤامرات أجنبيه!! جنس محن!!

يا ود الشيخ


اي ايدي تحتاج لان تكون خفية في بلد فتحت دفاتر امنها لدول غيرها وفتحت البلاد لاكثر من 30الف جندي اممي وفيهااعداد من منظمات دولية وبلد سمائها مكشوف لا تربطه شبكات رادارت متطورة بحيث يعرف من الذي يحوم في سماواتنا 0 ما زال في الخاطر حكاية طائرات مرت من بربر لتضرب مصنع الشغفاء كما افاد خبراؤنا العسكريين وما قراءته قبل ذلك ايام حكاية عنتيبي في مطلع السبعينات حين ذكر قائد الهيركوليز التي طارت من تل ابيب الي عنتبي واخذت اذنا من كل الدول الا السودان حيث ان السودان لا يحتاج لعدم وجود ما يكشف ان هنالك طائرة تقتحم اجواءه من اقصي الشمال الشرقي الي اقصي الجنوب )...ايدي خفية ماذا في بلد يحرج سجناء محكوم عليهم بالاعدام من اكبر سجن مركزي ويركبون سيارة وفي اقل من 24 ساعة تبلغ الانتربول بانهم هربو ويجب القبض عليهم ....

عزيزى ابوبكر..
نعم هى الأيدى الخفية امثال الصهيونية والأمبريالية العالمية والشيوعية والماسونية والمافيا والكوكلوكس كلان والجيش الأحمر اليابانى والجيش الجمهورى الأيرلندى وربما جيفارا واهلنا البرابرة كل هولاء واولئك اجتمعوا وقرروا ان يحيلوا حياة الشعب السودانى الى بؤس وعذاب حسدا منهم على البحبوحة من العيش والنعمةالتى نحياها فى ظل حكوكتنا الرشيدة بقيادة رئيسنا المحبوب من اربعين مليون سودانى واضعافهم من الدول المجاورة .
اها ياأبوبكر..ايدى خفية ولا ماأيدى خفية ؟

يا قريبي

Quote: اها ياأبوبكر..ايدى خفية ولا ماأيدى خفية ؟

طالما عارفنها تبقي خفية وخفية ونص