ميس إبليس

الولد يا كافي المصايب تِبِع إبليس
إبليس وصَلو الميس
هو ميس إبليس ده غير الكفر شنو كمان ؟
الولد كل مالاهو :
.......... ربكـ
.......... ربكـ
عاد لا حولا ولا قوة
ابتسم في غير اهتمام حين تذكر همهمة حبوبتو بت الفضل
وابتسم في فرح طفولي وهو يتذكر (مساسكته) ليهو من صغير
يا ولد الله يقلعكـ إنت شيوعي تبول واقف ؟؟
وتضحكـ الحبوبة بنهاية ثورته !!
هو زقاق (شارع فرنسا) البول ممنوع فيهو كمان يا حبوبة ؟
عجايب !!
حسي زقاقات ( شوارع فرنسا ) ملت البلد
والناس كلها بقت تبول واقفة !!
جوار المطاعم ، في الحدائق ، أزقة الحواري ومكاتب الحكومة
.......... ربكـ
.......... ربكـ


>>

يعني حسي أقوم اطلِع بيان تنديد في حبوبتي دي
على شاكلة :

Quote: منددا بالإجراء واعتبره إجراء يخالف الدستور والقانون، ويشكل انتهاكا صارخا للتحول الديمقراطي وجرحا عميقا للحريات السياسية وصفعة في وجه حرية الصحافة

ههههههههه
تذكر أن هذا التنديد قرأه صباح اليوم في جريدة " خدرا " وأعجبته الصياغة : اعتقال الترابي للمرة الخامسة
ما أسهل صياغة الكلام
ابتسم مرة أخرى وهو يردد كلمة صفعة
حسي عليكـ الله يا حبوبة ميس إبليس ده حلال على وحرام على الشيخ
يجرح ويداوي
إنا لله !!
واصل تأمله وسرحانه في اللاشي وهو ينظر إلى ما تبقى من وجبة المساء الخدرا


>>

الليلة النوم وين راح ؟؟
الليلة سرحاني " كِتِر " مالو ؟؟
شكلها مرَت من جبل لادو دون أن يراها العسكر
إنا لله
مرروهاوبعد أن أخدو الكوته
دخلتو خوفه من لقيط الورق !!
صاحبو كُجُر لي حسي يغني في غنية وااااحدة
أصلو ما غيره
من بهاكـ ، من بهاكـ ، من بهاكـ
ده من كلام عينيكـ وسحركـ



الله يا صلاح ود البادية
متى نبني لألحانكـ تمثالاً ؟؟

>>
تم ايقاف خاصية التشغيل التلقائي للأغنية مؤقتاً

تم تشغيل من بهاكـ مرة أخرى

Quote: يا ولد الله يقلعكـ إنت شيوعي تبول واقف

عمرانو يا صديقي

عندنا مثل سوداني


بول واقف اماننا من (......)

خميسك كيف

صاحبي كٌُجُر ده من يومو مكشِر
لكن (ملامحو مريحة كان للشوف كان للرسم ) *
الراجل بقى غير السـ..ك..لـ..بة ولقيط الورق ما عندو شغله
أنت تسـ..ك..لب إذن فأنت في نشوة .. و النشوة معناها في إنّ . و الإنّ معناها واطاتك أصبحت . *
وصاحبي واطاتو أصبحت
هو الليل حسي سماحتو شنو ؟؟
بقى كلو بعوضه وسموم ..
وضبَان
ضبان حايم بالليل
مركب عدسات ليلية
شوف النهار براهو ما بشبِع
تعرف يا صاحبي : باقي لي جمال حبوبتي دي مااااااااااا من فراغ
ياخي ديل ليلم الظاهر ما كان فيهو بعوضة وسموم
وضُبَان
ينعل أبو جبل لادو زاتو !!
دي ليلة شكلها طويلة
الله يجيبكـ يا النوم
وحبوبتي نضميها لا لامي دنيا لا لامي دين
ياهو زي نضم :

Quote: ( ويشكل انتهاكا صارخا للتحول الديمقراطي )

إبليس زاتو متبِري من ميس الزمن ده








_______________________________________________________
* الإقتباس الأحمر من نقة المطموس عماد عبد الله في ( نقة بوك )
* السـ ك..لـ..بة عبارة محظورة في حوش بكري
يمكن بي سبب كلمة كـ .. لـ .. ب

إبليس حدو عارفو يحميكـ الصلاة والصيام
لكن جِنِس ناس :

Quote: (وجرحا عميقا للحريات السياسية وصفعة في وجه حرية الصحافة )

حقهم براهو !!
إبليس لى حسي ما وصل المرحلة دي !!
ينعل أبو جبل لادو زاتو !!
أو كمان ده إبليس سيوبر
زيو وزي الطفيليات البتعمل upgrade لي قوة تحمله
إبليس شكلو عمل أب قريد لي حاجاتو
يلقنكـ الأساسيات ويفكك في خلقو
لامن هو يجي يحتار منكـ ويهمهم بي فرح ( ياخي دي أنا ما فكرت فيها ) !!


>>

صاحبي كُجُر الله ريحو من جِنِس ده
عافاهو من قراية بيانات التنديد والشجب والإدانة
كمَل وجبتو المسائية الخدرا الأخيرة قبل سنين
وبدأ يلقط في ورق الحلة ويغني : وانت زايد في أنيني
ويذكَر مرة مرة طرحة زينب البمبية الشافة بيها قبال سنين
ويلقط ويغني : حدثوووووووووووني
وزينب كل شويتين عندها غويشة جديدة وتوب بمبي
وشافع لونو أخدر شيكولاتي
وكل ما زاد عدد الشفع كل ما غنَاي زينب الجديد ( أب قرَة تصنيع الصين ) يغيِر في العربيات
عشان تستوعب الشفع الجداد
وزينب كل شهر ضوَها زايد
وجهنمية خشم الباب ساده الحلة باللون البمبي
وصاحبي كُجُر يغني
ينعل أبو جبل لادو زاتو !!



>>

حسي نحب ولا نسجِل للانتخابات ، ولا ندين ونشجب مع الشيخ
الخوف نسجل يجينا الشيخ يطلعنا كُفار
ويشجب تسجيلنا زاتو
والخوف نحب
يااااااااااااه
بقى الحب يخوف
...
...
...
الخوف نحب
نقوم نجي نغني ونردد : لا تثق في القلب إن العشق يؤذي " الصادق الرضي "
..
..
..
..
إنا لله
.
.
.
.
.
خخخخخخخخخخخخخخخخخخخخخخخخخخ



__________________
الرياض
ذات ليل كئيب كقلبي

Quote: خميسك كيف

خميسكـ كيف هو نخن فضل لينا خميس ؟؟
خميساتنا كملت زماااان يا هندسة
انت عايزنا ناكل خريفنا وخريف غيرنا
أم جقرم قالوا اسمه ، البتاكل خريفين
هي شنو ؟ والله نسيت حتى هي شنو !!
خميسنا راحة متواصلة استعداداً لرحلة اسبوع جديد يبدأ السبت ..
نحت فتنا الآلآت بي هناكـ يا هندسة !!
لا تشحيم ولا مكن جديد حا ينفع
الروح ماتت في غربة السجم الرماد

ابحث عن :
حبيب نوره
طارق جبريل

ابحث عن :
حبيب نوره
طارق جبريل


كيفك يا أبو محمد العمران

تم تعديل الخيار و الفقوس إلى عنب الحبيب و بلح ود جبريل

Quote: خميسكـ كيف هو نخن فضل لينا خميس ؟؟ خميساتنا كملت زماااان يا هندسة انت عايزنا ناكل خريفنا وخريف غيرنا أم جقرم قالوا اسمه ، البتاكل خريفين

يا ناصر
الحال من بعضو ولا شنو؟؟

Quote: فأنسحبنا بخضارنا لسوق آخر

يا أبا جهينة يا عزيز
أعذر جهلي عن خطأي
فو الله لا أحب لي من تواجد شخص مثلكـ هنا ، في نص مليان " غبينة " وغضب وسطورو مليانة ( سطور )
ثم أعذرني إن جهلت ( تكنيكـ ) لغة الأسافير الإجتماعية " تكنيكـ دي يكررها تمبس كثيراً وأحب فهمه لها "
_________________________
ود جبرين بكاااااااي وجنس غنا ود البادية ده بخليهو يجوعر
وحبيب نورة يحب الكلام (المجنون)

.

Quote: يا ناصر الحال من بعضو ولا شنو؟؟

لا والله نحن عندنا كل ايام اسبوع خميس

ينفعكم يا ناصر ..
بجيكم وبشوف ما يبقى كلام ساي

عمران يا عزيز..


ده شغل كبير....

وبمزاج ....رسالتك وصلت ..تسلم ياراقى...

تقديرى وأحترامى..

وبعدين زمان كنا بنطلب فى البوست الصور يالرابط..هذه بنطلب المعايير..ومعيارك شنو؟؟فى البوست ده...

Quote: هذه بنطلب المعايير

يا سمعة
انا معياري شغال بيهو من زمان
الفي قلبي على لساني
الأصحاب بعدين بيفهموها طيران

ربنا تعالى اسمه شكَل الناس أنواع وألوان مختلفة
وتباين واختلاف في كل شي
ممكن يكون جعل (السحنة) واحدة ، ومن الدم زي ما بقولو أهلنا بنعرف السوداني من الإرتري
أها إبليس ده (كفانا الله شره ) مسمى الفرد لجماعة الشياطين
أعتقد أن الله برضو جعل لهم سحنات مختلفة وتباين في الأفعال وكيفية فعلها
وأعتقد أن الله إبتلانا في بلادنا بإبليس " الأشطر " خصوصاً في سنواتنا الأخيرة

بعضهم يأخذ إبليسه معه أينما ذهب خارج دياره
ميس إبليس البلدان الأخرى لا يتوافق مع هواه

خلاص ..
Down

يمين يا قريبي من بهاك دي
تخلي الزول لافي زي عمود الجربكس من غير زيت
ياخي اغنية تتور النفس ياخي

Quote: تخلي الزول لافي زي عمود الجربكس من غير زيت

كانت صورة أبوي حسن صالح الشيباء الجميلة تخت الرحمن في القلب ..
أعدها يا رجل ... بلاش كلام فارغ معاك .
هذا واحد .

الشي التاني ..
أنا هنا أنجض عيش ريف الكلام .. سمعاً ..
أنا قليل أدب يا عمران . و لذلك بقي عمك حاج عبدالله الضونقلاوي يعنفني كثيرا بعربية عجمة اللسان - و أنا الإبن نصف النوبي و ابن المدينة -
( بللاهي إنقيناليه !! .. إر مصيبن مينيللي يا ظربون إنت ؟ .. كِتو تيق .. كيتو تيق إنال ابو سيادك ) .
و تعنفني فافا أيضاً كلما هددت منها الحيل بعمايلي .. ( أرب جرب كم تود نولوق .. سوكي جومكن طوروط طوروط ) ..
فأوكاويها ( فافا إساير داجن .. شوقا قوّر داجن ) .
الوحيدة التي كنت إلي ميسها ألتجيء بإبليسي هي يُمه الزلال .. و كان ميساً يسعنا يسعنا جميعاً ، تهون علي هي و تعض شفتها المدقوقة و تخبطني بسبحتها ، ذلك حنو أشتهيه يا عمران :
: ( إنت يا المطموس بلا شقاوتك و قلة أدبك دي شيتاً جايبلك الكلام مافي .. صنقر في واطـاة الله دي و قول بسم اللاه ) ..
فأقول . فأروق .

..........
ما بي رغبة في أيما شي يا عمران ياخ ..
أريد أن أمتص طاقة قدرتي علي امتصاص كلما هو حلو ..
أنت هنا حلو .. و حلو صلاح إبن البادية ..
هل تصدقني .. كل يوم أصطبح بأغنية له .. يقول فيها ( لو نعيم الدنيا عندك أحرميني .. و لو جحيم الآخرة منك عذبيني ) ..
عدي المقطع الزول يا عمران - إن نجحت في ذلك - ثم ادخل إلى :
كان أمل .. كان أمنيات ، حبك ليك . و غدرتي بيه .

أنت تؤذيني في هذا الصباح يا عمران ..
و ما عافي ليك .
........
أعد صورة أبوي حسن ياخي ..
و أعد كل ما عندك من ذاكرة ..
فاخرجها هنا بعنتها و ضيقها و فرحها و الحزن فيها ..
و النوايا و المنى و صغير الأحلام .
يمكن باب السما يكون فاتح .. و ربك يغتي علينا و يستجيب .

قول يا لطيف يا عمران .

تعرف يا عماد دمعتي قريبة بشكل عجيب جداً
الرطانة الفوق دي أنا ما زولة لكن صدقني زي الفهمتها
ما قتا ليكـ دمعتي قريبة ياخي !!
شوقي لي أبوي صاحي طوالي ، عشان كدي عندو شريحة سعودية من موبايلي جنب راسو
أدق ليهو واسمع صوتو بدون النظر للرصيد الطوالي زيرو ده

Quote: فاخرجها هنا بعنتها و ضيقها و فرحها و الحزن فيها .. و النوايا و المنى و صغير الأحلام .

ده ملخصو بالكامل يا عماد .
وعشان معرفتي لي ملخصو ده باب السما صدقني ما انسدا بس نحن باب صبرنا ضيق ...
دمعتي صلاح بن البادية بيولعه نيران جواي يا عماد
شوقي لي حاجات كتيرة بنشف لعابي ويبقى زي الجير ..
وصلت مرحلة ( تفافي ) يبقي جير يا عماد ..
..
..
أنا برضو الأذيتكـ ؟؟؟

______________________________

Quote: كانت صورة أبوي حسن صالح الشيباء الجميلة تخت الرحمن في القلب .. أعدها يا رجل ... بلاش كلام فارغ معاك .

will be

Quote: الوحيدة التي كنت إلي ميسها ألتجيء بإبليسي هي يُمه الزلال .. و كان ميساً يسعنا يسعنا جميعاً ، تهون علي هي و تعض شفتها المدقوقة و تخبطني بسبحتها ، ذلك حنو أشتهيه يا عمران : : ( إنت يا المطموس بلا شقاوتك و قلة أدبك دي شيتاً جايبلك الكلام مافي .. صنقر في واطـاة الله دي و قول بسم اللاه ) .. فأقول . فأروق .

بسم اللاه
يا رب تروقني وتشيل الهم الفي راسي ده قبال القط ورق
يا رب

آمين

آمين