Post: #1
Title: بنيتي حسابك ( برواية أخرى ) ... اهداء الى صديقي ابراهيم بقال
Author: معتصم محمد صالح
Date: 06-01-2010, 11:15 AM
بنيتي حسابك..
نضمي أسمعا.. ونضم راجل اوعى تسمعا
وكان طلقك ما يطلقك هو اصلو ما بينفعا
بنيتي حسابك..
كان قال ولاعندو اوعى تصدقا .. غفليهو و بنطلونو فتشا .. رجال زمن دا جنو يغشغشا
بنيتي حسابك..
راجل كان جرا منك في ضنبو أمسكا.. واي نضم يقولو ليك حكحكا
بنيتي حسابك..
راجل كان نضم في موبايل إتلبدا .. ونضم كلو أسمعا باكر ما يقولو فوقك عرسا
بنيتي حسابك ..
راجل اوعى تدلعا .. وكان عاطت فوقك كورية أم قعار في نص راسو افلعا .. كان زعل واتنفخ اوعى تهببا .. بعد مرات يكون ولا زعلان لكن بيكضبا
بنيتي حسابك..
إنتي اصحي بدري وتوبك الفحا ..وبيوت حلة بيت بيت اتفسحا .. وكيس وسخ في خشم باب اطرحا.. بعد شهر تجي عربية نفايات تلفحا
بنيتي حسابك
راجل كان نزل انتخابات اوعى ترشحا .. وحات الله يفوز فوقك يعرسا وانتي تاكلي نيم ما تشبعا
بنيتي حسابك
|
Post: #2
Title: Re: بنيتي حسابك ( برواية أخرى ) ... اهداء الى صديقي ابراهيم بقال
Author: ابراهيم بقال سراج
Date: 06-01-2010, 04:05 PM
Parent: #1
الله والنبي لـ كلام راجل تسمعا
بنيتي حسابك لـ كلام راجل أسمعا
حسابك يا بنيتي كلامي لا تابا
كلامي كم أبيتيه تكوسيه ما تلقا
* * *
هي لا تخليه ينقنق لـ كلامو تسفها
لا تقوّي راسك ، بكرة يقولوا طلقا
فجر كم ولا عندو لـ عشيّا أمهلا
بلا إذنو لا تمشي لـ محل مآجرا
***
وراجل كم ما ناداك لا تمشي تلحقا
وكم غبّت منك نادي أسألا
قشي بيتك بدري وعيشك أطحنا
الما وساخة ، في خشم بيت لا تكشحا
***
وكم عاطت فوقك لا تدقيه تفلعا
إنتي أشكيه لـ الله لـ حقك يخلسا
انتي بنيتي كم لـ كلامي تسمعا
الله والنبي لـ كلام راجل تسمعا
الله والنبي لـ كلام راجل أسمعا
***
حتّي عجاج بيتك ، عنقريبو فرشيه
وكورة أم قعر تحت سريرو جيبيه ختّيه
توبك المجنقر دا ب إبرة أمسكيه
رجلينك المشقق دا أدرشيه حننيه
***
وشعرك المشمبل دا لميه مشطيه
المدونكت من قعارو فرتقيه
أوطوي أوقاي لـ ألمي أردي جيبيه
عجينة كم تعوسيه لـ دوكي أتّقيه
***
وكسرة كم تلت عقابو لميه شريه
ب طلحاي ب دروتاي حفرتك ولعيه
جيبي مخبرك لـ بطن بيتك بخريه
كم كملتي خدمتك لـ نارك أكتليه
***
كم فتّي بطن حلّه ، لـ بيتك طليه شيفيه
كلام كم تخاف لو من بيت لا تمرقيه
وقالوا وقلنا في لسانك لا تجيبيه
جارتك المهوهوة دا لا بيتك بخربيه
***
نصيحتي كم سمعتيه لـ بيتك أمسكيه
الله والنبي لـ كلام راجل تسمعا
|
Post: #3
Title: Re: بنيتي حسابك ( برواية أخرى ) ... اهداء الى صديقي ابراهيم بقال
Author: اشرف السر
Date: 06-01-2010, 04:16 PM
Parent: #1
ههههههههههههههههههههههههههههههه
الله يجازي محنك.. بالخير
ضحكت لامن دموعي نزلت
بس الخاتمة رهييبة
Quote: بنيتي حسابك
راجل كان نزل انتخابات اوعى ترشحا .. وحات الله يفوز فوقك يعرسا وانتي تاكلي نيم ما تشبعا |
|
Post: #4
Title: Re: بنيتي حسابك ( برواية أخرى ) ... اهداء الى صديقي ابراهيم بقال
Author: عبداللطيف محجوب
Date: 06-01-2010, 04:39 PM
Parent: #1
جميلة يا رائع .. أضحكتنا أضحك الله سِنك
وده أكثر مقطعني ضحكني
Quote: إنتي اصحي بدري وتوبك الفحا ..وبيوت حلة بيت بيت اتفسحا .. وكيس وسخ في خشم باب اطرحا.. بعد شهر تجي عربية نفايات تلفحا
|
|
Post: #5
Title: Re: بنيتي حسابك ( برواية أخرى ) ... اهداء الى صديقي ابراهيم بقال
Author: حمزه بابكر الكوبي
Date: 06-01-2010, 07:28 PM
Parent: #4
| Quote: وكان عاطت فوقك كورية أم قعار في نص راسو افلعا .. كان زعل واتنفخ اوعى تهببا .. بعد مرات يكون ولا زعلان لكن بيكضبا |
الله يجازي محنك يامعتصم .....الفليع الفي نص راس ده ماحبابوا اصله
لكن تعرف من اجمل ماتبثه اذاعة البيت السوداني وصية الاب لابنته دي ......موباااااااااالغه
مشتاقين يامان
|
|