أهلنا المناصير.غمرتنا المياه فضاع نخيلنا ولم تبقى نخلة واحدة( توجد مديدة تمر)

إتصلوا يبكون بالدموع الذوارف
قالوا
إشتهينا( الغمولي)
وإشتهينا( الدفيق)
وإشتهينا( الطياره)
وإشتهينا( المحبشي)
وإشتهينا( الصفوري)
وإشتهينا( أم راس)
وإشتهينا( أم نص)
وإشتهينا( المهرودي)
واشتهينا ودلقاي نشرب بيهو جبنة الضحى
عشان تزرع ليك تمرة نخيل عايزه ليها خمس سنوات عاد
.................
قلنا ليهم عسى أن يبدلكم الله خيراً منه فالصبر طيب
سواء كان في محلية البحيرة أو مشروع الفداء
أو المناصير الجديدة
لكن قالوا التمر من مدينة الكاب وإنت طالع لغاية الشامخية ومشروع العال الزراعي قالوا شايل زي ماهو لم تمسه يد الإنسان وهنالك المناصير الشرفاء والظرفاء قالوا شايلين ويوزعوا للناس بلاش بلا فلوس تمر نضير ..كل بيت ( شطر ) ( شطر)( سبيطة) سبيطة يعني
فلا هطلت على ولا بارضى سحائب ليس تنتظم البلادا
ولو أني حظيت الخلد فرداً لما أحببت بالخلد انفرادا

Quote: وإشتهينا( المهرودي)

الهَرَود

آي هو الهرود يا طارق ود العجايز
.....................
قوريق طه في جابيقة بوني
مجبد سلكو والناموس ينوني
..............
أم بقت ما فاتت المحمودي غادي
بشارتك يا اللبيب ميتين قلادي
..............
القاريق.. هو زراعة الجروف وغالباً نبات اللوبيبا.. يصف به الشاعر المنصوري القديم محبوبته في خضرتها ونضارتها
مجبد سلكو.. أي بدات تنتشر من نبات اللوبيا السلوك والزهرة ويزدهر كناية على أنه مفرهد ومخضر ومورق شديد الاخضرار
طه رجل صاحب جروف واراضي وطين كثير
الجابيقة:- جزء من قرية بوني الكبيرة
بوني قرية من قرى المناصير اقرب للشايقية وبها تداخلات قبلية من العامراب والنعوفاب والنافعاب وبعض أفرع الشايقية
قلادي.. موش قلديبة لا.. القلادي والقلادة حبل صغير أو خيط يربط في زيارة الصالح أو البيان .
يقال أنه يجبر الصالح ليقضى لك أمرك سريعاً
المحمودي... وادي يوازي وادي أبو سباع في محلية البحيرة بالمناصير وبه جبل فيه صالح يزار

من الحامدابى الى المنصورى :
مشروع قالوا قومى وناسنا فاتوا واطاطن وارضن وبلدن وودوهن هناك فى بلدن ماخبروها وماعرفوا جيهتها
والله بقو حالم يحنن الكافر ... صحراء على مد البصر وحر يكتل كتل والموية بعد ماكانت تحت البيوت اصبحت يجودوبها يوم ويقطعوها شهر الخضار عطش ومات والبهيمات محلن ولحقن امات طه والشباب فزوا وراحوا يكوسوا فى اليوميات هنا وهناك والله بالمختصر المفيد الحال يغنى عن السعال ونسعل الله ليل نهار ونقلها يالانقاز الله ينغزك بى سيفا يجز رقاب الحرامية لى حدهم . غايتوا العملوها فينا والله اسرائل فى الفلسطينين ما سوتها .

نور الدين ما عليكم.. كل حاجة بهدوء ممكن تنقضي... مافي شئ بيضر إلا الكلام المر.. الآن هنالك حملة قايمة أهالي يعني قدموا الدعوة لناس أمري والحامداب يجو معاهم محلية البحيرة.. أصلنا جنس واحد التفريعات دي حاجات طفيفة.. هسه الأراضي الطلعت جديدة في أرض المناصير تعادل الأرض الزمان الما بتصلا االبوابير عشرة مرات زمان ما كنا نقدر نسقيها.. اراضي سمحة وبكر.. والريس لما جاء زار المناصير. شيوخ امري والحامداب شاركوا معانا في الإحتفال بكثرة والريس قال ليهم.. اي زول عايز يسكن محل ما يسكن يسكن.. هسه أهلنا بيدعو ناس الحامداب والناصير وفي ناس مشوا فعلاً.. والناس تكاتفوا معاهم وبنوا ليهم بيوت عندنا.. وده غنماية ودي نعجي أدوهم.. والبوابير بدت تشتغل والخضار بدا يطلع بس الحكاية عايزة ليها طولة نفس شوية..
قلت ليك يا الحامدابي...
الحامدابي:- قلت ليك
عندنا دقة طمبور قديمة عندنا نسميها( الحامدابيي) يدقها واحد إسمو عيسى حامد.. سمعت بي دقة الطمبور دي؟ مسجلة في موبايلي بس ما بقدر أنزلها هنا...

صديق (اب حنة)

يا خوي مالك الليلة عاوز تفتح لينا الجراح القديمي..
بعد قريت البوست الليلك ده في الليل، سرحت سرحة طويلة، واتذكرت زمان، زمنا بعيد ،، لمن كنا قاعدين في الكاب، نرعي الغنم، ونسد البوغة، وبالعصر نمشي نلاقي قطر كريمة، وصوت عمك (النجيض) الله يرحمه ويحسن اليه،، يكورك (شاي الكاب يا ركاب) ، ولنش ابوك السح داك لمن يركز في مشرع حجر الحمام ، وناس الجزائر المسافرين والمتبضعين مالينو لي عينو ... وحاتك يا صديق ساهرت لمن الله غفر لي،،، وكان ملازمني البتين ديل:

يا الله الرزق والفاقة
نتلمي وندق القاقة
في ديوانا داك ابطاقة

الــلــــه هــــــوي ليلي انا يا اللـــــه هوي..

سلامي ليك والاسرة الكريمة

عشان وعدنا الناس قلنا ليهم توجد مديدة تمر.. جبنا ليهم مديدة تمر مع إنو ما عندنا تمر
.....................
ياأخوانا المحيرني إنو محلات كبيرة في العاصمة زمان كانت تعمل أكل أفرنجي في شارع الجمهورية هسه لقيتا ليك مكتوب عليها رواد مديدة التمر.. أو محل تاني مكتوب عليهو ( ملك مديدة التمر) أو محل في الثورة الرياض جنب شارع مولانا محمد عثمان الزبير.. المحلات البي تعمل العشاء برة ديك.. مكتوب توجد مديدة تمر..؟
ياخي نحن زمان مديدة التمر دي إلا يعملوها للمرأة النفساء( نفسي يعني) بي لهجة الشايقية والمناصير والحامداب وناس أمري..
حتى الحريم التانيات الما نفسانات ما بياكلوها ولا الرجال.. عيب كدة عندهم؟
حتى لو زمان إنت صغير طفل واحدة من أهلك نفساء أدتك شوية منها أو باقي كورية كدة.. ابوك جاء لقاك تشرب فيها ينهرك يقول ليك( إنت مره نفساء تشرب مديدة التمر؟)
ولها مواصفات غذائية عالية مديدة التمر ولها صفة يقال تعطي البشرة لمعان وبريق.. عشان كدة بيدوها النفساء عشان تدرر اللبن وعشان المرة لمان تقوم من الولادة تقوم مبطبطة وسمينة ورشيقى وفيها لمعة.. حاجات كلها على الطبيعة مافي كريمات مافي أعشاب..
لكن اليوم ينتبهوها الناس وخاصة العاصمة ويعملوا ليها اعلانات شنو الحكاية؟

والله يالمنصورى مابنقدر نقول غير تفألوا بالخير تجدوه ولكنا شبعنا وعودا ونتمناها حقيقة على الارض
وياريت موضوع التوطين حول البحيرة يكون واقع حقيقى لانوا انتا عارف ناسنا ذى السمك مابقدروا يبعدوا من الموية كتير . وذى ماقلت الاصل وحد بس بى مسميات مختلفة واى مشروع يجمع الناس ويكون لى خير حاتلقى الكل واقف معاه . بالنسبة للاغنية ماسمعت بيها بس ياريت اسمعها .
تحياتى وتقديرى لك ياقريبى .

عودي راااااااااااااكب في هذا البوست الظريف




خالص الود

جمال تسلم...
واحدة أختنا بوردابية هنا مثقفة جداً.. شافت الكاب.. وهي لاتخلو طرف عن الكاب قالت..( الكاب كانت جنة الله في الأرض)

انا من اعز ديار اناومنصوري موقد نار انا
انزل علي البابور انا واكلي تمرة بور انا

يا حليل الكاب والمناصير والناس الحنان هسع بقت خراب

يا المناصير ليكم بصيح
جنى عقلي بعد كان نصيح

طله طله علي المناصير يا القمر سلم لي كتير
لي ديار ود قمر البشير
دار اصول ما فيها تزوير
ابداها من العار تباشير
وعمها لي برتي بالخير

يا ود جبريل انت اصلا ماك نصيح من ما الله خلقك

Quote: يا ود جبريل انت اصلا ماك نصيح من ما الله خلقك

السمحة قالو يرقصوها
وامها زعلت قالت فتروها
اتاريها معرسة ومتموم حلوها
ونازلى البلد لى عرس اخوها

فى صفيحة بيتنا قنب
لا تقولو المسكين خرب
داير اضوق سجنك يا صنب
داير انط الحوش اب عتب
والعكاكيز فوقى لبلب
ولا سيفا يقطعنى شب
يا جدية السيح اب سرح
الوثبت وجكت بالمرخ
الرجع صيادك قنح
عودا لوو محلب ولوو طلح
والمحب يا زول منسلخ
ساندو بالكيلو بلا ربح
هجرى كان باقيلك سمح
وفى المثل قال عيب وانصلح
الجدى الفى السيح العفيف
وشق من عتباى على الريف
باقى منعم وبلدو خريف
شنشقك ضارب الرشاشيف
فى نارك سوت الفيف
لا قدرت اقعد ولا قدرت اقيف
العجو المعط الليف
وسيدو بالكرموش ما بحيف
يا حليلو الزول الظريف
فى الرباط مالى التوب هدم
وكب كرب تتوطى الجزم
زايلة يا ام شلاخ ما تتم
خيرا زى الزيق فى الهدم
يوم تاخر ويوم تقدم
وعودا صوتالضابط الردم
ابقى تكرونى اجلب علب
ولو هناك فى السوق انجلب
لى مصاريفك ما حسب

ياسر بيناوي...
ياخي صورتك الفيها ( أم راس دي) عايزة تكتلنا تمر نجيض بس فاقد جبنة شكلو ده تمر( مشرق) ود ختيب... عجوة... تجار الإجمالي في زريبة العيش في أم درمان يقولوا ليهو مشرق
........................
أستاذة هويدا شرف الدين سعادة المديرة جيتى بي جاي بركة الجيتي... جابك بوست أهلك! أنا كنت متستر عليكي لزوم مافي زول قال لى صرح. لزوم الأمانة والأدب. . ولكني أكني.. من كناية..
وكت جيتي براكي ده المقصود

صديق العزيز
مالك تريد تبلييييني
فتحك لي الذكريات .. بالجد
شديد بشقيييييني
اتذكرت البلد
لي سنين عيونها ما شافوني
زدت البي شدددددددددديد
قوم علي شجوني
......
ذكريات زمن الصبا
ومهد الرويس اتهادي
القوز والتمر
القيف والجرف
والموج بيزحف جادي
طالب الرمل والهيالي السادي
يشيل من هني ويردم هناك بي غادي
....
اتذكرت الاهل
ذكري فيها محنة
اتذكر صغار
كنا فاكرين البلد هي الجنة
فيها كل شيء
راحة بال
وعدم انشغال بي باكر
ما شايلين هموم
ناكل ونشرب
تحت الظلال نتفاكر
نعيان في المراكب
تعبر يمين وشمال
والنخل الكثيف يتهادي للشبال
ويظهر من بعيد لنش ابوك ابحنة
قول لي يا صديق
ما كنت بتشوفها الجنة ؟؟

المنصوري

هويدا شرف الدين

عندي ليك سؤال صغيروني كده..

انت بت شرف الدين (العيادي) ولا زولا تاني...

اكان بقيتي بتو سلمي لي علي الناس العندك كلهم،،، من عندكم لي ناس علي محمد حبيب..

Quote: فى صفيحة بيتنا قنب

شرح القصيدة التي أتت بها الأخت هويدا
يعني كناية على أني آتي ذليلاً من أجل الوصول الى دار محبوبتي.. ولا أحتاج لشخص أن يضيفني أو أن أجلس في صالون أو غيره
.........
قريب من البيت قال شاعرنا سليمان ود نصر الدين من جزيرة( شرري)
في ضليل التمرة انتكيت
شفتها وشافتني .. بكيت
قالت لى إتفضل على البيت
نفسي صغرت ودرتا المبيت

جمال المنصوري

حيرتني يا خي اييييييييي اياني هويدا بت شرف الدين العيادي بس ما عرفتك تب

نفسي صغرت ودرتا المبيت


والله يا منصوري دي بالغت فيها شدييييييييييييييد ، تسلم علي البوست الجميل

Quote: داير اضوق سجنك يا صنب

صنب :-
الذي ورد في القصيدة التي أوردتها الأخت هويدا
هي مروي
وكان مركز المديرية الشمالية كلو فيها في العقد الأول للإنجليز.. نا عدا ناس حلفا ودنقلا.. كان مركزهم دنقلا
وما عدا الرباطاب والجعليين كان مركزهم بربر
يعني
أمارة
مناصير
حامداب
بديرية
القبيلة الواسعة الشايقية
كلنا كان مركزنا مروي
والشخص الإنجليزي فاتح الذهن حاضر البصيرة قوي الإدارك هو شعر بحسو إنو الناس ديل واحد وبتشابهو
عشان كدة صار المركز لهم واحد ليساعد في تنمية العلاقات الاجتماعية بين هذه الفصائل
في العقد الثاني من استعمار الانجليز لنا سلموا الإدارات لخريجين كلية غردون الجدد( جامعة الخرطوم) جاء التقطيع بعد كدة الذي نعاني من آثاره حتى اليوم. قطعوا قعر المناصير من تحت بقا يروح على كريمة ومروي
وقطعوا راس المناصير من فوق بقا يروح في حاجياته مركز بربر مشتركاً مع الرباطاب والجعليين.. مع احترامنا لهم لكن نحن لانشبههم لافي لهجة ولافي تراث.. فكان الأمر يجب أن يمشوا عليه كما لاحظه الإنجليز حفاظاً على النسيج الأجتماعي..لكن لابد للأول عودة بإذن الله
الإنجليز كان لمان عايزين يعملوا حاجة يشاوروك مع إنهم مستعمرنك ورايهم فوق راسك. لكن يحترموا رايك
يقال أن العمدة ود قمر عمدة الانجليز أن الإنجليز شاوروهو في خط السكة حديد هل نمرروا مع البحر أم نرفعوا في الخلاء عن ديار منصور.. يعني من كريمة يمشي بالبحر لغاية ابوحمد أم يطلع الخلا..
وجاء منهم وفد لعمودية المناصير في قرية السلمات..
فقال لهم العمدة ود قمر أحسن تمرروه بالخلاء
ومن يومها ارتفع خط السكة حديد من كريمة. بالرغم من إنو حدودنا من الكاسنجر وحتى محطة نمرة عشرة.. أو قرية ابوطين على مشارف مدينة ابوحمد..
عم العمدة ود قمر وهو كان رجلاً حكيما ويحضر مجالس الإستشارات والعمدة دائما يستنير برايه لما طلعوا الإنجليز قال ليهو قلتا كدة ليه؟
قال ليهو خط السكة الحديد معناها راح تبنى محطات وراح يكونوا فيها أغراب يؤثروا على عاداتنا الأصيلة
وربما قد يكون ذكر اسباب أخرى يتداولها الناس ولكنى لم أتأكد من صحتها بعد..

الشاعر المنصوري سليمان ود نصر الدين ايضاً قال هذه الأبيات
والشاعر سليمان شعرو دائماً ظاهر لأنو يتناول البيئة بقوافي سلسلة ومحببة للنفس ولهجة عامية بأشياء فطرية منسابة بدون تحوير في القوافي
وهذه الأبيات التي سوف نذكرها منه يستعملها أحياناً الفنان عبد الرحيم البركل.ز أو عبد الرحيم محمد صالح علي المادح في شكل رميات

يالبينة الصيف الحليب
المنضفة من السبيب
المعلقة في الهمبريب
كان شربتك خاطري بيطيب
شعر تورية بلاغية ولكنه يرمز به الى محبوبته
كان شربتك تأويلها القريب.ز يعني كان تزوجتك على كتاب الله وسنة رسوله
............ز
يستعمل الشاعر البيئة الطبيعية عندما تشيل البنت الكورية وتمشي على كر الغنم أي زريبة الغنم وتحلب أثناء الحليب قد تتقطع سبيبة سبيبتين وتختلط مع اللبن لأنو طازج بعدين تجي مسألة النضيف من السبيب قبل تفوير اللبن
وسبيب كانو لبن ماعز
وصوف يرمز به للضان