الـزمـن غـلـبـنا يـامـا، حـرمـنـا شـآل الإبـتـسآمـة ... يا أميرة الشيخ، ملعون أبوها غُـربـة ...

Quote: طرينا مشوار العصارى.... البلوم فى فرعو غنا طرانا ياالحبان اهلنا.. المسافرين بالسلامة بلغو الحال لاهلنا .. بصوت نسرين هندى ... الاهداء الى...معاوية المدير ....هوارى.... طارق جبريل .. سيف الكامل ولكل الذين عبرو من هنا ولازال الحب هو هو رهانهم الاوحد .. _______________________________________ اصبح الشوق هو النديم والخل الوفى ...

Quote: وعد مني، ونضر فوقي يا بت الشيخ الغنوة دي أفتح لها بوست كامل نسبةً لأنها لاتتحمل تعليق عابر...

Quote: كلام زى الورد .... لانها بتستاهل,, وانا شريكتك فى البوست .. وننزلها بكل الاصوات .... يعنى كم زول غناها .. والايام دى انا بنوم بيها وبصحى بيها

قدم أبان بن سعيد على رسول الله (ص) قال له: يا أبان كيف تركت أهل مكة؟ فقال: تركتهم وقد جيّدوا وتركت الإذخر – كزبرج نبات عريض الأوراق طيب الرائحة- وقد أعذق،
وتركت الثمام وقد خاص، فاغرورقت عينا رسول الله (ص) وصحبه. ولما اشتاق النبي محمد (ص) الى موطنه مكة وهو بالجحفة في مسيره إلى المدينة
لما هاجر إليها، جاءه جبرائيل (ع) فقال له: أتشتاق إلى بلدك ومولدك، فقال (ص) نعم، قال جبرائيل (ع) فان الله يقول: (إن الذي فرض عليك القرآن لرادُّك إلى معاد) القصص: 85، أي مكة.
وصارت الآية الكريمة في صدر كل مسافر يقرأها لسلامة العودة....

بلاد الفناها على كل حالة وقد يؤلف الشيء الذي ليس بالحسن
ونستعذب الارض التى لاهواء بها ولا ماؤها عذب ولكنها وطن

اسكت اتنخج يا الحبيب

وقـــفــــت يــــوم الــــنــــوى مـــنــهـــم عـلى بعد
ولـــــم أودعــــهــــم وجــــداً وإشـــفــــاقــــا
إنــــي خـــشــــيــــت عـــلـــــى الاظعان مــن نــفـــســـي
ومــــن دمــــــوعـــــــي إحــــــراقـــــــاً وإغــــراقـــــا


أتــــى الـــــرحــــيــل فــحـيــن جــد تـرحـلت
مــــهــــج الـــنـــفـــوس لــــه عـــن الاجســـاد
مــــــــــــن لـــــم يــبـــت والـــبـــيــــن يـصـدع قــــلــبـــــــه
لــم يـــــــــــدر كـيـف تــــــفـــــتـــــــــــت الاكــــبــــــــــاد

البلوم في فرعو غنى
طرآنا يا الحِبآن أهلنا

مع دوران عجلة الزمن تمضي سنين العمر سراعاً لتجبرنا الظروف لمغادرة الوطن الحبيب.
هكذا في غفلة من الزمن نصبح وقد إنفصلت أجسادنا عن الوطن الذي نشاءنا وترعرعنا فيه
لنجد أنفسنا ونحن نفترش تراب الغربة ونلتحف سماءها لتظل ارواحنا تدور في فلك حب الوطن،
ويظل عشقنا المهووس به يعربد في دواخلنا كما الخيول الجآمحة فوق الريح تشابي. عندما تصيبنا
معاناة الغربة نصير علي جانب كبير من الحساسيّة، السبب الذي يجعل عواطفنا جيّاشة تثيرها
أبسط الأشياء التي تذكرنا البلد والأهل.
هاهو البلوم في فرعو غنىى فأهاج أشجاننا وجعل قلوبنا تخفق ودموعنا تحتبس في المحآجر ونحن
نردد مع الشاعر.

طائـرٌ يـشـدو عـلـى فـنـن
جدَّد الذكرى لذي شـــجــن
قــام والأكــوانُ صامـتــةٌ
ونسيمُ الصُّبْحِ فـي وَهــــَن
هاج في نفسي وقـد هدأت
لـوعـةً لــولاه لــم تــكــــن ْ
هــزَّه شـــوقٌ إلـى سـكـنٍ
فـبـكـى للأهـل والـسـَّكـــَن
وَيْــكَ لا تـجــزعْ لـنـازلـةٍ
ما لطيرِ الـجـوِّ مـن وطــن

سجع القماري وتغريدها ذكرنا أهلنا وحلّق بنا بأجنحة الشوق في فضاء الوطن الحبيب. كلمة
طرآنا، وطِرينا هذه الكلمة فيها حِنيّة ترسم بريشة الأشواق صورة الأهل أمامنا بسحناتهم المختلفة،
ونفوسهم الصآفية التي تنسآب أنهار الحِنيّة في بيادرها المُتفتحة بِأزهار الطِيّبة والسمآحة، فنحن
نشتاقهم ونتمنى ان نكون جنبهم نعيش معهم الأفرآح والأترآح...

طِرينا مشوار العصآري
ورقشة الورد البِرآري
البريد عاوز يدآري
والقلوب فاقدة المحنّة

هذا التطريب الذي تتغنى به القماري، كنا نسمعها تشدو به فوق النخيل في رحاب البلد الحبيب.
هنا في ديار الغربة، يطرينا العصاري في رحاب الوطن وروعة وقتها عندما يبرد حرّ الشمس،
وتهبهب النسمات من تالآ النيل فتتخلل مسام الأجسام وتنعشها، ساعتها يبدأ الأهل في زيارة
بعضهم البعض، ويخرجن بِنيات الفريق يتهادن في الطُرُقآت وهنّ يرفلن في حُلل الإحتشام والأدب
كما الورود التي تتلألأ فوقها حُبيبات الندى، فتبدأ القلوب في الخفقان وتتدفق حِنيّة وشوق لنظرة
حتى ولو عآبرة من المحبوبة، فالحياء والخجل يمنع ويقف حائل بين تبادل الكلمات.

هاهو المُحِب العاشق الولهان يحاول جاهداً ان يخفي حنانه وتوقه للمحبوبة، لكن أصلها الثابت في
القلب وفرعها الممتد في سماء النفس وموزع في حناياها يجعل كُلّ اماراتها ظاهرة ومنعكسة علي
التصرفات. بل وآضحة لايخفى منها شئ في تعابير وجهه. ما اروع الحياء والخجل عندما يكون
الحب عفيف ونسمات العصآري تجلب رائحة البُن من داخل حيشان بيوت الطيّن.

الغمامة حلآت رحيلآ
فوق روابينا الجميلة
الطيور جات لمقيلآ
كلموها خلآس رحلنا

ما أجمل الغمامة وهي تتهادى في فِجآج السماء! تحجب الشمس حيناً لتلقي بظلها علي المروج
والروابي فيبدو خضارها وأشجارها في حالة إسترخاء وقيلولة يشاركها فيها البشر. حتى الطيور
في ساعات الظهيرة تلجأ للأشجار والبيوت لتقيل في ظلآلها من قيظ حر الشمس.

يا أهلنا، يا من ابعدتنا عنكم صُروف الدهر، عندما تأتي الطيور لمقيلها فوق الأشجار وتحت ظلآل
بيوت الطين وتسأل عنا، أخبروها بأننا قد رحلنا عن الديار. هذه الطيور التي قد الفتنا والفناها،
إستمعت لونستنا، واصغينا لتغريدها، هاهي تفتقدنا وتتفقدنا، تبحث عنا في الأمكنة ونحن قد شطّ
بنا المزار وبعُدت بنا الشُقة عن ديار الطِيّبة والطيبين...

يا دموع لمتين تفارقي
يا دروب لمتين تلآقي
أبكي يا دموع السوآقي
حظنا العاكس حرمنا

تباريح الشوق إلي الوطن في صحآرى الغربة تدمي القلب وتجعل الدمع يلآزم المحاجر والجفون،
فتذوب لوعة وشوقاً إلي المراكب المُشرعة في مجرى النيل وخضرة الجروف علي الضفاف.
نشتاق إلي الأهل والأحباب، نشتاق إلي الجلوس إليهم ومُؤآنستهم. نشتاق إلي مضاحكة القمر وهو
بينات الضفاير. نشتاق ونبكي ونحلم بالعودة، ونتصور لحظات التلآقي التي تتحول فيها دموع
الشوق إلي دموع فرحة بمعانقة الأهل في حضن الوطن الدآفئ.

الظروف دائماً تحيل بيننا وبين اللقاء، فنخال السواقي تبكي حظنا العاثر الذي لم يطاوعنا بتحقيق
مرادنا. السواقي تدور وتئن فتسكب الدموع في الجداول فيخضر الزرع ويدُر الضرع إثر بُكاءها
وندبها حظنا العاثر الذي حرمنا من إستنشاق رائحة الجروف وعبق الأرض علي ضفاف النيل
في رحاب وطننا الغالي...

الزمن غلّبنا ياما
حرمنا شال الإبتسامة
يالمسافرين بالسلآمة
بلغوا الحال لأهلنا...

هاهو الزمن يجور ويتغلّب علينا، وينتزع الإبتسامة منا.
هاهو الزمن يرمى بنا في متاهات الغربة، فنكتوي بنيرانها ونتمرغ فوق اشواكها. نعيش في كنفها
بعيداً عن جلسات الونسة التي تلمنا مع الصحاب، ومجالس الأهل التي تبعث البهجة في نفوسنا.

قفوا يا من أسعفتهم الظروف وهيّأت لهم الفرصة لزيارة البلد والأهل. قفوا قبل الرحيل حتى نوصيكم
ان تغروا أهلنا السلآم وتخبروهم انّ الغربة جلدتنا بسياطها وادمت أجسادنا بحد سيوفها، وأخبروهم
اننا نشتاق اليهم.
نشتاق إلي لقياهم.
نشتاق إلي تنسُم رائحة الدّعاش في البلد.
نشتاق إلي مطر تصب في الليل، يتفقد الناس بعدها بعضهم البعض.
نشتاق للمة جبنة وسط الحوش.
أخبروهم انّ الأشواق قد عصفت بنا، والغربة ما زالت تقسو علينا...



ود المدير...

ابكي يا دموع السواقي
حظنا العاثر حرمنا...

Quote: اسكت اتنخج يا الحبيب

إنت النخجي خليتلنا فيهو شي
يا العشا ابلبن ؟؟؟

معاوية
يالللللللللللللللللللللللللللللللللللللللللللللللللللللللللله
ياخي بالغت
والله كل ما اسمعها او اشوفها قدامي
اتذكرها لما امي اطال الله عمرها الحاجة (عشة) تدندن بها

ود المدير
هل لك اهل في بحري الشعبية
الاستاذ المحامي (حسن المدير )
و(عثمان المدير)

Quote: طِرينا مشوار العصآري ورقشة الورد البِرآري البريد عاوز يدآري والقلوب فاقدة المحنّة

معاوية..
كيفنك آآبوي
انا الكلام غالبني !!

انــا والأشــواق...

انـا والأشـواق في بُعـدك بقينا اكـتر من حبايب
كم سِهِرنا الليل وحاتك وإنـت مـن عيني غايـب
يا حـبيب القلب أصلو الحياة مـحطات عـجايـب
واصلو دنيانا وحاتك زحمة من اغرب غرايـب
فرقـت بينـا الـلـيـالـي وزادت اكـوام الـنوائــب
كم كنا فب أفراحنا دايبين للحبايب يـوّت نطايب
صبحت فـي اشواقـي سآبح لجروفنـا وللزرايـب
لأهلنـا الجـد وحاتـك بلـحقـو المـمكـون وضايـق
لبـيـوت الطيـن والنـخيـل للكـتـاتيـح والـهبـايـب
وبرضو لعصرية حآلمـة وهبهبت نسمـآت تطايب
جايبة ريحتو لبن مقنن وفي الشراب بندورو رايب
بـس وحـاتك مانسيـتك ونحـن اكـتر مـن قرايـب
فرقـت بـينا الليـالي والمـقـدر اصلو صايـب...



ود المدير...

ود المدير

صحى الزمن غلبنا ياما
اها وكان جبنا طارى الباوقه وشى من غنا ود الحورى تعمل شنو ..

أخوك فى الغلب والابتسامه المشيوله والبلد(الباوقه)

أحمد الامين

Quote: معاوية يالللللللللللللللللللللللللللللللللللللللللللللللللللللللللله ياخي بالغت والله كل ما اسمعها او اشوفها قدامي اتذكرها لما امي اطال الله عمرها الحاجة (عشة) تدندن بها ود المدير هل لك اهل في بحري الشعبية الاستاذ المحامي (حسن المدير ) و(عثمان المدير)

يا وليد، ربنا يدي الوالدة طول العُمُر
والصحة والعآفية مع تحياتنا ليها.

يا وليد أيّ زول يحمل إسم المدير لو قابلك أسألوا
إذا طلع من الباوقة معناها قريبي تب، اما أنا:
فالزمن فرقنا يا ما
وحرمنا شال الإبتسامة...

قضيت اجمل ايامي في الشعبية وإستمتعت بطعمية
الجيزآوية وفول حميّدة...

بلاد الفناها على كل حالة وقد يؤلف الشيء الذي ليس بالحسن
ونستعذب الارض التى لاهواء بها ولا ماؤها عذب ولكنها وطن

معاوية المدير ....

الوفاء شيمة ناسنا واهلنا رغم قسوة الايام وجورا
اهو انت نسيت اننا اتلاقينا فى بوست واتفقنا ان تكون هذه الاغنية
فى بوست منفصل لما لها من وقع وزكريات فى نفس كل واحدمننا ....

ولم تكتفى بالاغنية فقط بل سقيتها بمداد روحك وقلمك مفردات انيقة وعبارات صادقة
خلت دموعى القريبة من الله خلقها ما تقيف ..

ومااجمل التصاوير تحس ورا كل صورة مدسى زول بتعرفو او مكان جيت مارى بيهو
او وقفت اتونست مع زول فيهو ..

منعنى الشديد القوى من الاستجابة لهذا الجميل ..

بجيك بزيادة تصاوير واوجاع . .. مش شركاء فى الغربة والحنين والشوق ؟

حدو متين مابعرف ..

ورثت من حبوبة كتيير من المعتقدات والممارسات واعتقد انها ذات صبغة سودانية خالصة
لااهتم كثيرا بمدى صحتها من عدمها اجدها محببة الى نفسى ولا اخجل منها
ولا تثير اى جدل او اسئلة عندها علاقة بجدوى هذه الممارسة..
مثلا:
كنت لما الملم حاجاتى وجاية الجامعة حبوبة تقدمنى وتشيل تراب من محل خطوتى وتربطو
او تشتتو لجوة فى البيت ومصحوب بدعوات بالعودة سالمة غانمة وناجحة
ودا بتعمل مع كل زول مسافر من البيت وحبوبة لابتكل من شيل التراب ولا بتمل من الدعوات,,,,
ولما يجينا ضيف من اهلنا او جيرانا معاهو مولود لاول مرة,,اول حاجة بتعملها حبوبة وامى من بعدها..بشيلو شوية تراب(بطرف الاصبع)ويشممو للطفل حتى يرتبط بالمكان ويخلق معاهوالفة,,

تفتكر الحكمة شنو من اصرار( الحبوبات) على دفن صرة المولود فى نص البيت?

,نواصل..


الكلام دا عندو بقية,


__________________________________
كيبورد بكرى متعبنى,,,ماعندى كيبورد عربى

المسافرين بالسلامة بلغو الحال لاهلنا ..

Quote: معاوية.. كيفنك آآبوي انا الكلام غالبني !!

بخير يا هواري اخوي،
بس الزمن غلبنا ياما وحرمنا
شال الإبتسامة.
تعال أنضم عسى و لعلّ...

معاوية المدير

Quote: قضيت اجمل ايامي في الشعبية وإستمتعت بطعمية الجيزآوية وفول حميّدة...

ياخي بالغت الجيزاوية جارتنا
يظهر انت من الزمن الجميل
سكنت وين ياطيب
شوف ناس المدير ديل اهلهم في الشعبية
ناس عبد الرحيم الحوري
و ناس سليمان الحوري
اولاده على وفيصل واسامه ووليد وزاهر








-----------------
الزمن فرقنا يامه حرمنا شال الابتاسمه

شكيتكم للقدركم
ناقصين نحنا
إنا لله

يا دموع لمتين تفارقي؟
يا دروب لمتين تلآقي؟

يا الحبان ,,, سلام


والله يا معاوية ما قصرت بجيك برواقة , يا داب شفت البوست ,

با قي نتلم في اقرب اجازة علي حسب وعدكم.


مودتي

Quote: ود المدير صحى الزمن غلبنا ياما اها وكان جبنا طارى الباوقه وشى من غنا ود الحورى تعمل شنو .. أخوك فى الغلب والابتسامه المشيوله والبلد(الباوقه) أحمد الامين

قريبي أحمد الأمين،
كدي تعال لنا بجاي:
http://www.albawga.com/forums/
صورة البنطون دي، صورة بنطون الباوقة
من الشرق، اخدتها في آخر زيارة لي باوقتنا
اللذيذ تفاحا.
الزمن غلبنا ياما...

عزيزى معاوية المدير
تحية واحترام
هذا بوست صادق ..
يعبر عن أحاسيسك وروحك الاصيله ..
لقد دفقت كل ما بداخلك بصدق
وهذا هو الفن الصادق .
من الواضح انك شخص
مرهف الاحساس ...
والله الغربة شينه وتعيسه !!
ان تكون غريبا فكرة مرعبة !
بالفعل هناك ظروف كثيرة
تجبر الشخص لفراق ..مكانه ..
مكانه الحقيقى فى هذا الكون..
فيحس اللوعة والفراق ..
عمك قور دا ( اسبوع واحد) فى الغربة
بجيب كثافتو ....حسى

قطيتنا ، والشجرة النيم ، والراكوبه
وعنزتين مربوطات فى قفى البيت
هى الدنيا كلهاعندنا ..وهى السعادة ......
مبروك البوست الجميل
تهانينا....

عمك ابو القاسم قور

والاغنية الكردفانية قالت :
زولا ستر حاله
فى الغربه البطاله.

Quote: بجيك بزيادة تصاوير واوجاع . .. مش شركاء فى الغربة والحنين والشوق ؟ حدو متين مابعرف ..

نعم... الغربة يا بت الشيخ، تثير ملآعج الذكرى وتهيج الحنين والشجن الأليم في داخل النفس
فتفجر ينابيع الأشواق في داخلها، فنطفق نذكر الأشياء الجميلة التي
تركناها خلفنا في ديار الأهل والأحباب. نعيش علي
الذكريات ونمني النفس بالعودة إلي مراتع
الصباء وبراحات الوطن الحبيب...

Quote: با قي نتلم في اقرب اجازة علي حسب وعدكم.

Done

Quote: ياخي بالغت الجيزاوية جارتنا يظهر انت من الزمن الجميل سكنت وين ياطيب

ود الشعبية وليد، ســـــلآم.
أختي اسيا المدير وزوجها خليفة المحجوب عليه رحمة الله،
كانو من سكان الشعبية في فترة السبعينيات، جيران ناس
المرحوم جعفر السيّد، وحاجة شآمة. المرحوم محجوب ميرغني
عمي، وكنت اقضي اجازات المدرسة دوماً في الشعبية، مازلت
اذكر جيداً ناس عمّك عامر وبريقع، وحميّدة صاحب الدكان،
والجيزاوية. كلما اذهب للسودان ازور الشعبية ناس عمي
محجوب ميرغني، ولآزم إشتري اي حآجة من كشك مكتبة
المؤسسة وفاءً لهذه المكتبة التي كنت ارتادها في ذلك الزمن
الجميل كلما أُتيحت لي الفرصة لزيارة الخرتوم...

ود المدير

Quote: ود الشعبية وليد، ســـــلآم. أختي اسيا المدير وزوجها خليفة المحجوب عليه رحمة الله، كانو من سكان الشعبية في فترة السبعينيات، جيران ناس المرحوم جعفر السيّد، وحاجة شآمة. المرحوم محجوب ميرغني عمي، وكنت اقضي اجازات المدرسة دوماً في الشعبية، مازلت اذكر جيداً ناس عمّك عامر وبريقع، وحميّدة صاحب الدكان، والجيزاوية.

يسلالالالالالالالالالالالالالالالالالام يامعاوية
هنا ولدونا وتربينا وترعرعنا واصبحت الشعبية لنا وطن
وليس منطقة او حي ...

ود المدير
مالك علينا
اسع الشجن الهاج دا نوديهو وين آ ؟ قول لي بالله
اييييييييييييييييييييه يا وجع
غايتو بتكتلوا ليكم زول في البوست دا
والله بحاسبكم كلكم

Quote: ورثت من حبوبة كتيير من المعتقدات والممارسات واعتقد انها ذات صبغة سودانية خالصة لااهتم كثيرا بمدى صحتها من عدمها اجدها محببة الى نفسى ولا اخجل منها ولا تثير اى جدل او اسئلة عندها علاقة بجدوى هذه الممارسة.. مثلا: كنت لما الملم حاجاتى وجاية الجامعة حبوبة تقدمنى وتشيل تراب من محل خطوتى وتربطو او تشتتو لجوة فى البيت ومصحوب بدعوات بالعودة سالمة غانمة وناجحة ودا بتعمل مع كل زول مسافر من البيت وحبوبة لابتكل من شيل التراب ولا بتمل من الدعوات,,,, ولما يجينا ضيف من اهلنا او جيرانا معاهو مولود لاول مرة,,اول حاجة بتعملها حبوبة وامى من بعدها..بشيلو شوية تراب(بطرف الاصبع)ويشممو للطفل حتى يرتبط بالمكان ويخلق معاهوالفة,, تفتكر الحكمة شنو من اصرار( الحبوبات) على دفن صرة المولود فى نص البيت? ,نواصل.. الكلام دا عندو بقية,

يا بت الشيخ، خم الأتر في حفنة تراب وكشحها داخل المنزل من العادات ذات الأثر العميق في نفوسنا
نحن السودانيين، ولها مدلولها العميق علي حنيتنا المأصلة في دواخلنا، فهي نوع من التيمُن بالعودة
للحِلة والبيت الكبير. أحببت هذه العادة، فقد كانت امي عليها رحمة الله متمسكة بها حتي نهاية عمرها،
وورثتها لأخواتي فما زالن مداومات عليها حتي اليوم. يستحيل اذهب للسودان واغادر من غير مايخمو
اتري في هِيّن وآطة ويكشحوها في بطن الحوش...

الحبل السري هو ذلك الرابط بين الجنين في داخل الرحم وامه. يستمد من خلآله الطعام وكذلك الحنان
في لحظات تكوينه الأولى. الصُرّة البيدفنوها في البيت هي بقية ذلك الحبل السري. باقي الصُرّة المدفونة،
تمثل الحبل السري الممتد بين الإنسان وأُمه الأرض، يستمد منها الحنان والعطف والحب ويتعلق بها
تعلق الطفل بأُمه، ويذوب في حبها فيتألّم جراء البعد عنها ويحن ويشتاق إلي لقاءها وشم رائحتها والتبرك
بها. فمدفن الصُرّة هو المنبع والأصل، والإرتباط به هو إمتداد للحياة.
حب الوطن ينبع من مكان دفن الصُرّة ويتممد حتي يشمل جميع أرجآءه، فيصبح الوطن هو الحب كلّ الحب
والأُم والأب والأخ والأخت والأبناء.
نتالّم من الغربة فيقتالنا الحنين إلي الوطن في كلّ يوم...

حاولت أجد تسجيل للأُغنية بصوت المرحوم
أحمد الجابري لكني فشلت...


هل من مُعيّن؟؟؟

Quote: المسافرين بالسلامة بلغو الحال لاهلنا ..

هاهو الزمن يجور ويتغلّب علينا، وينتزع الإبتسامة منا.
هاهو الزمن يرمى بنا في متاهات الغربة، فنكتوي بنيرانها ونتمرغ فوق اشواكها. نعيش في كنفها
بعيداً عن جلسات الونسة التي تلمنا مع الصحاب، ومجالس الأهل التي تبعث البهجة في نفوسنا.

قفوا يا من أسعفتهم الظروف وهيّأت لهم الفرصة لزيارة البلد والأهل. قفوا قبل الرحيل حتى نوصيكم
ان تغروا أهلنا السلآم وتخبروهم انّ الغربة جلدتنا بسياطها وادمت أجسادنا بحد سيوفها، وأخبروهم
اننا نشتاق اليهم.
نشتاق إلي لقياهم.
نشتاق إلي تنسُم رائحة الدّعاش في البلد.
نشتاق إلي مطر تصب في الليل، يتفقد الناس بعدها بعضهم البعض.
نشتاق للمة جبنة وسط الحوش.
أخبروهم انّ الأشواق قد عصفت بنا، والغربة ما زالت تقسو علينا...

هارون يا راكب خيول الريح،
قول لأهلنا قطر الرجعة إتاخّر
إلا وحاتم آالزينين
ما ناسين ومشتاقين
والشوق يوّت ملازمنا
فوق ارواحنا إتحكّر
دموع العين ملآزمة الخد
دوام لبلدنا نتذكّر
وقدر حاولنا نتصبّر
لقينا نفسنا مابنقدر...



الســــــــــــــــــلآم اغريهو لكل
الأهل ياصفوة الأصفياء...

Quote: شكيتكم للقدركم ناقصين نحنا إنا لله

الشكيّة لي أبيداً قويّة يا عمران أخوي،
أعصر علي الصبُر...

الأخ الـحـبيـب الـحـبـوب
معاوية المدير،
حياتي ومـودتي-

***- خليك في غربتك احـسن واقرأ الـموضوع دا:

لماذا زادت حالات الجنون في السودان؟
------------------------------------------
الـمصـدر:
http://www.alwatansudan.com/index.php?type=3&id=20251
الـموقع:
©2007 Alwatan News صحيفة الوطن. All rights reserved.
بتاريـخ:
2010-06-07

***- لك تـمنياتي الطيبة.

الأخ معاوية
السلام عليكم ورحمة الله وبركاته
هاك دى والرابط بتاعها
سلامى




http://www.sudanvoice.net/v2/albaloom.mp3

Quote: يا الحبان ,,, سلام والله يا معاوية ما قصرت بجيك برواقة , يا داب شفت البوست , با قي نتلم في اقرب اجازة علي حسب وعدكم. مودتي

السيف يانديد،
إن شاء الله تكون روقّتَ عشان تظهر.
علي وعدنا يا حبيب...

Quote: يسلالالالالالالالالالالالالالالالالالام يامعاوية هنا ولدونا وتربينا وترعرعنا واصبحت الشعبية لنا وطن وليس منطقة او حي ...

يا وليد عبد اللطيف،
إن شاء الله لو جيت السودان
اسجل لك زيارة في الشعبية...

Quote: قطيتنا ، والشجرة النيم ، والراكوبه وعنزتين مربوطات فى قفى البيت هى الدنيا كلهاعندنا ..وهى السعادة ...... مبروك البوست الجميل تهانينا.... عمك ابو القاسم قور والاغنية الكردفانية قالت : زولا ستر حاله فى الغربه البطاله.

الحبيب عمنا أبو القاسم قور،
تتعدد الظروف والغربة طعمها وآحد، وشناتها عيّنة.
إنها خطىً كتبت علينا ومن كُتبت عليه خطىً مشاها.
مشيناها حتى تُخوم القطب المتجمد الشمالي. عركت فيها
الغربة وعركتني. اخذت جزء كبير من شبابي ومازلت
يحدوني الأمل للرجوع لقطيتنا وأشجار النيم وضل الرآكوبة
وغنيماتنا المربوطات في ضراء البيت الكبير.
ورد في الحديث عنه (ص) فيما معناه: من بات أمناً في سِربه،
معافاً في بدنه، يملك قوت يومه، كان كمن حِيّذت له الدنيا بحزافيرها.
لكن الأصل في الإنسان الهلع، فنسأل الله ان يجعلنا من المصلين،
وان يرجعنا للوطن سالمين غانمين...

لك الف تحية، وربنا يديك الصحة والعافية...

Quote: ود المدير مالك علينا اسع الشجن الهاج دا نوديهو وين آ ؟ قول لي بالله اييييييييييييييييييييه يا وجع غايتو بتكتلوا ليكم زول في البوست دا والله بحاسبكم كلكم

والله يا ود البوش أخوي،
نحن اصلنا ميتين من زمن، وشغلنا ده شغل حسادة
بس دايرين الناس الفي الغربة ديل حمى الغربة
تخليهم يكتكتو من زمهريرها، والشجن الهايج
يعربد في داخل نفوسهم، ويطاردهم شبح
العودة ليل نهار...

Quote: الأخ الـحـبيـب الـحـبـوب معاوية المدير، حياتي ومـودتي- ***- خليك في غربتك احـسن واقرأ الـموضوع دا: لماذا زادت حالات الجنون في السودان؟

الأخ الحبيب بكري الصايغ،
لك الف تحية مع كامل مودتي.
إنا لله وإنا إليه رآجعون.
ماذا نفعل أخي بكري؟
الله يجازي الكان السبب، فحب الوطن
أخي بكري ما زال معشعش في أغصان
دوحة النفوس المتعبة من رهق الغربة...

Quote: الأخ معاوية السلام عليكم ورحمة الله وبركاته هاك دى والرابط بتاعها سلامى

عليكم السلآم ورحمة الله أخي يسري.
يأخي لك مني جزيل الشكر، ونسأل
الله ان يرد غربة الجميع.

كامل مودتي وشكري لك...

.

.................................


----------------------------------------------
يقولوا شنو لا في كلام بتكتب ولا بتقال ...

يقولوا شنو لا في كلام بتكتب ولا بتقال ...

أخوي عبد الناصر،
علي مستوى الوطن:
عآزة في هوآك.
على مستوى مسقط الراس،
ما زال عبق عطر زيوت الورش
يعطر انوفنا.
كتّر خيرك كتير وأنت تأتي من قلب
اتبرا الحبيبة لتعطر هذه المساحة...

معاوية الجميل

نستنشق الرحيق ونستلهم شوقا

وانا اطوف بين سطور بوستك الجميل

فمرة ذكري ومرة لحظة تامل ومرة سرحان

بين قضبان المسافة والسفر البعيد

(يادياري الوين اني) علي قول القدال

المهم بعد اهة للبلوم

تلك اوطانا وحبها الخالد يجري في دمانا

شكراً / السيد ود المدير ...
صورك سميحة و مفتشبة
عيلآ لكين الواقع صعب خلاص
وغير الفي الصور المفتشبة دي تماماً..










اللهم أصلح الحال و عجل بذهاب المفسدين في ارض السودان.

Quote: غايتو بتكتلوا ليكم زول في البوست دا

وهوو لسع ما كتل؟

الشكية لى الله

يُمة حموني الإجازي

slaaaaaaaaaaam

بت الشيخ ,,, سلامات

باقي لي الاجازة حنحولها للمغرب .

حبيبنا قال الروب.. واجب نحصله

معاوية المدير ..

ياخي مالكم علينا انت وطارق جبريل ؟؟

والله الفينا مكفينا ..

Quote: كل طائر مرتحل..عبر البحر..قاصد الاهل..حملتو اشواقي الدفيقة

Quote: slaaaaaaaaaaam

.

Quote: بت الشيخ ,,, سلامات باقي لي الاجازة حنحولها للمغرب . حبيبنا قال الروب.. واجب نحصله

يستااااااااهل.

Quote: معاوية الجميل نستنشق الرحيق ونستلهم شوقا وانا اطوف بين سطور بوستك الجميل فمرة ذكري ومرة لحظة تامل ومرة سرحان بين قضبان المسافة والسفر البعيد (يادياري الوين اني) علي قول القدال المهم بعد اهة للبلوم تلك اوطانا وحبها الخالد يجري في دمانا

مجدي يا ظريف،
نعم حبها يجري في دمانا. يؤرقنا ونفضل نحسب الأيام
والساعات، بل الدقائق والثواني ونحن نتلفع ظلآم
الغربة ونحاول جاهدين ان نجد بصيص ضوء في
دهاليزه يقودنا إلي هنآك وما ادراك ما هنآك؟ إتكاءة
في حُضن الوطن الدافئ تنسينا كلّ هموم الغربة.

الغمامة حلآت رحيلا
فوق روابينا الجميلة.

تشكر يا ملك...

Quote: اللهم أصلح الحال و عجل بذهاب المفسدين في ارض السودان.

اللهُمّ آمين.
نسأل الله ان يستجيب دعائك أخي احمد،
ولك الشكر الجزيل علي الطلة الجميلة.




مودتي...

Quote: وهوو لسع ما كتل؟ الشكية لى الله

محمد النيّل، ســــــــــلآمـ،
نحن اصلنا كتلآنين، وقلنا
الموت وسط الجماعة عرس...


تحياتي...

Quote: معاوية المدير .. ياخي مالكم علينا انت وطارق جبريل ؟؟ والله الفينا مكفينا ..

والله يا دكتور أحمد، قلنا نزيد الطين بِلة،
اصلها غربتنا مطينة عشان كده دايرين
نطينها زيادة.


مشكور علي المرور يا دكتور...

الأخ معاوية انك تلعن الغربة التي افقدتك الوطن و الأهل و جعلتك في شوق و حنين اليهم
فما بالك اخي انني اشتكي و العن الغربه لما فعلته بي الفربة
و صلني عن طريق بريدي
يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة

وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله

Quote: الأخ معاوية انك تلعن الغربة التي افقدتك الوطن و الأهل و جعلتك في شوق و حنين اليهم فما بالك اخي انني اشتكي و العن الغربه لما فعلته بي الفربة و صلني عن طريق بريدي يا غربة .. يا غشاشة .. يا بكاية .. يا مستهبلة تغرينا بي درهم قروش وراه قنطار بهدله جيناك سنة .. أو قول سنين بنكمله نبني البيوت في العاصمة وبي كوم أثاث بنجمله وكرولا حاره نرسله أصلو التنقل مشكله ونكمل الدين بي مهل والسمحة جاهزة نحصله غير القروش اللي الأهل عبر الشهور حا نرسلا والباقي يدخل في البنوك ونشوف دباره نشغله ناس فكرت تجني العلم تبدأ الدراسة تواصلا أحلام كتيره وشيقه وآمال كبيرة نأملا لكن حساباتنا الغلط في كل عام بنرحله مرت سنين من العمر بنعزها وبنفضله والحسبة وصلت طاشرات يمكن نعيش وندبلا وتعال نحاسبك يا وهم من غير رقم أو أمثله كان للقروش نجري ونحوش لكن تقول بنشاكلا ما راضية تقعد في الجيوب وتقول حرامي بينشلا لكن بترقد في الضهور بديون تقيله متلتلا ممحوقة ما بتقضي الغرض وأقل حاجة تكملا كملانه سفرة وحق وزن ومجاملات مستفحله ضرائب أبعاج المشي وإلزامي حمدي نحولا وأحلامنا صبحت زي سراب نمشي ونجري ما نحصلا يا ريت يكون هم القروش يا غربة فيك هو المعضله لكن تعال شوف الهموم الما إفتكرنا نقابلا ذلة ومهانة واحتقار خلو النفوس متململة سجنا كبير فيهو الكفيل سجان قيوده مكبله أشغالو شاقة ومؤلمه ودايما تكون مستعجله ما عاد يكفيها النهار تحتاج ليالي مليله أمراض كتيره بدت معاك عايزه الفحوص مستعجله ناس الضغط والسكري ومرض القلب مع الكلى ومصران وقرحة وإكتئاب ونفوسنا ما متحمله وبنينا فيك كيمان لحم تحت الهدوم متندله وأكيد يكون أكل المعلب والمجمد عاملا عدم الرياضة والكونديشن لابد يكون ليهم صــــــلا وكمان تعال لمعادلة ما قدرنا أصلا نعدلا سجن العيال جوه الشقق وفراق الأهل والعائله جيب العيال بي جيبنا مال وجيوبنا غيرو مميله وصغارنا صبحت بالزهج متوحشة ومتجفله لا قادرة تلعب في خلا ولا ضل شديره يضللا لا قادرة تدرس بي نفس من الدروس المترهله تلقي الولد غالبو الكلام والبت كبيرة ومريله كل الضغوط سوا ما قدرنا حتى نقللا في كل طرف تلقي القرف تلقي الخيوط مداخله يا غربة أديناك كتير أدينا خاطرك يسهلا خلينا نرجع بالفضل نلحق حياتنا نعدلا آمالنا فيك بدري إتنست إلاّ الرجول متوحله وبقينا زي أهل القبور لا البره عارف يدخلا لا الجوه يرجع لي ورا يحكي الحقيقة يوصلا لكن خلاص هان الخلاص عندك نزل مهما علا وإن شاء الله نحيا نودعك وتكوني ذكرى نغازلا يا غربة .. يا بكاية .. يا غشاشة .. يا مستهبله

مشكور يا اخ صلاح عثمان علي عرض
الحال الذي يعكس الواقع المرير...

الاخ معاوية المدير

حياك الله


لقد ادمعت مهجتي ،
والغصة تطعن في الحلق ،
وهاج بي الشجن الي ديارنا ،
واهلنا ،
بوست صادق ،،،










عزالدين عباس الفحل
ابوظبي

معاوية المدير .. وضيوف البوست ...سلاااااااااام

انقطاعى من البوست دا لا جفا لا حفا ياقول حبوبة

بس مشاغل دنيا ....لكن وقت ما ادخل هنا اول حاجة

بعملها التمام فى البوست دا يشهد الله ..

مرات لما تكون فرحان بغلبك تعبر وكذلك لما تكون موجوع

ومشتاق ومصاب بداء الحنين ......

بين كثير من السطور والتصاوير الهنا بلقى زول بكون عبر عنى تماما
وبتخيلو بكتب نيابة عنى ...

ولسان حال معاوية المدير فى البوست دا ياهو حال لسان طارق جبريل وهوارى وسيف الدولة

وناس كتار لايكيين الصبر ومر الغربة

Quote: الاخ معاوية المدير حياك الله لقد ادمعت مهجتي ، والغصة تطعن في الحلق ، وهاج بي الشجن الي ديارنا ، واهلنا ، بوست صادق ،،،

نعم أخي عزالدين،
الزمن عذبنا ياما وحرمنا شآل الإبتسآمة.
نتمنى ان تعود الإبتسامة بعودتنا لأرض
الوطن الحبيب.
لك مني عاطر التحايآ، ومشكور
علي المرور...

يا دموع متين تفارقى

يادروب متين تلاقى