من هو نائب الرئيس السوداني عمر البشير!! مجرد سؤال.

يمكن تكون ضاربني فقدان الذاكرة
ولا ذي المصريين بيقولوا: بستعبط، او علي راي السودانيين:
مستهبل. او ذي ما بيقول البعض في البورد(لعب علي الدقون)
او استفزاز ذكاء المثقفاتية.
علي كل حال أنا بعيد من كل المقولات دي واحب اسمع إجابة
اهل المنبر هنا ويزيدونا علم ومعرفة.
وبارك الله فيمن نفع واستنفع.
وراجي مليون جواب حتي لو كان من الشعب السوداني باكمله.
وللجميع الود والاحترام

سؤال متزمزغ

الأخ / البينو

تحية طيبة

السؤال غامض شويتين،، يعني لو وضحت اكثر ممكن تلقي اجابة...

بعديا عن مناصبه الكتيرة ، وكلها فيها رئيس، يعني علي شاكلة، نائب رئيس المؤتمر الوطني ؟؟ ولا نائب القائد العام ؟؟

في اشكالية اخري حقيقية، زي،، مثلا،، نائبوا الفعلي ولا علي الورق ؟؟


سلامي الشديد..

Quote: وراجي مليون جواب حتي لو كان من الشعب السوداني باكمله

واحد من الشعب السودانى





كُلُّو في محلُّ - مرسوماً جُمْهورِيّاً بتعيين علي عُثمان نائباً للرّئيس

الاخ الوليد. شكراً جزيلا.
وبصراحة أنا شايف في إجابتك الأسماء دي:
الرشيد وراق لان معاني الاسماء دي طغت علي
إجابتك .
ولكل كل الود والمحبة والاحترام.

الاخ جمال المنصوري
سلام ومودة.
قصدي نائب رئيس الجمهورية بغض النظر عن انو يكون صوري ولا علي ورق
او اي إشكالية تانية!! بس منو هو نائب الرئيس بدون اي ناصية وركن وملف ولف
ودوران.
ولك السكر.
الاخ ود الباوقة.
مرحبتين.
وياخ وسع مداخل حواراتك شوية، سؤالي لو ما واضح كان حقو تستوضح بدون
ما تصنفو. لكن برضو بتقبل راييك برحابة صدر، ولو عندك لي إجابة اوعدك وعد
الصادقين أني حاشرح ليك لي أنا سألت السؤال دا، وبعدو حاتعرف أني ما بستخف
بعقول الناس وانت او الناس ديل.
بعرف انك بتحب الريس وبتموت فيه هديل كدا. لكن أؤكد ليك أني ما قاصده لا من
قريب ولا من بعيد.
ولكل الود والاحترام ولكل القراء والاعضاء في هذا المنبر

Quote: بس منو هو نائب الرئيس بدون اي ناصية وركن وملف ولف ودوران

انت يا البينو الويك اند حولتو ليلة الجمعة ولا شنو

برضو مجرد سؤال

تحياتي

ود الباوقة.
شكراً ومقدر.
سؤالك مجرد سؤال بس دخلت في حقي في موضوع شخصي
وبالشمال.
ياخ أنا بحاول اطرح موضوع بكل احترام.
وعشان كدا ارجوك خليك في اطار السؤال المطروح بدون تجريح
واساءة لشخصي.
وياخ لو ما عندك صدر رحب لقبول الرأي الاخر فاصمت او قل
خيراً.
وبرضو لك الشكر والود.

Quote: وعشان كدا ارجوك خليك في اطار السؤال المطروح بدون تجريح واساءة لشخصي.

اسف اخي البينو

لم احاول الاساءة اليك ولا يمكنني ذلك

انت اخ كريم

ولكن يشهد الله قدر ( ما قلبت ) سؤالك دا ما عرفت راسو من

قعرو

عموما انا اعتذر لك


مع التقدير

الاخ الكريم ود الباوقة.
في المنبر دا أنا ما بعرف ولا زول واحد معرفة شخصية
ولو حتي حصل وعرفت واحد برضو حايكون الحوار بيني
وبينو ذي ما في( البينو) بكل احترام بعيداً عن الامور الشخصية
وعلي كل حال اعتذارك مقبول.
ودوماً اختلاف الاراء لا يفسد للود قضية.
رغم اختلاف الجميع الا ان الجميع يتفقوا نوعاً ما بأهمية
آراؤهم في دواخلهم وأي مساس او عدم احترام لرأي الشخص
يعني عدم احترام الشخص ذاته.
ولك من الحب والاحترام ما يفوق كل ما نختلف فيها من اراء.

الحبيب / البينو

تحياتي مرة اخري..

عارف يا الحبيب، المشكلة برضو مشكلة ورق وكتابة،، لأنو بعد اتفاقية نيفاشا اصبح هناك نائب اول، ونائب رئيس،، ودي برضو بتعقد الموضوع تعقيد شديد جدا،، فاطلاق سؤال عن من هو نائب الرئيس، بالصورة دي ما بكون واضح،، لأنو هل تقصد النائب الاول، ولا النائب الثاني ؟؟

عموما الاجابة :
- النائب الأول: الفريق : سلفا كير ميارديت.. قبل الانتخابات.
- النائب الثاني، او نائب رئيس الجمهورية: الاستاذ / علي عثمان محمد طه - قبل وبعد الانتخابات..

هذا اذا لم تطرأ اي تعديلات، بعد الانتخابات..

سلامي واحترامي

تحية وحب وتقدير لكل المتداخلين والقراء وأخص بها
الأخوين جمال المنصوري و الوليد الرشيد وراق.
وبصراحة انا قلت الروب!
انا سألت سؤالي دا لأني متحير!!
أولاً :-
أنا عارف انو النائب الاول هو سلفا كيرميارديت، بصفته
رئيس حكومة الجنوب حسب مقتضيات نيفاشا.
لكن برضو النائب الاول رحمه الله وأحسن لروحه الزبير محمد صالح
كان يطلق عليه النائب الاول و كان كلاً من موسس مشار وجورج كنقور
يطلق عليهما في عهد كلاهما النائب الثاني لرئيس الجمهورية.
ولكن بعد نيفاشا حذفت كلمت الثاني ليس من القاموس السياسي فقط
بل حتي من القاموس الاعلامي.
وحققةً هذا هو الساندوتش الذي حشيت به سؤالي الغامض، وقد فعلت ذلك
عن عمد لان في السنوات الخمسة التي مضت لم يزعجني أمراً في الاعلام
السوداني مثلما أزعجني هذه الملاحظة.
ولكي أوضح سؤالي اكثر:
هل كان اطلاق لفظ النائب الاول قبل نيفاشا علي النائب الاول يرفع من
شأنه مقابل النواب النائب الثاني؟!
واذا كان الاجابة لا فلماذا يطلق علي النائب الثاني اليوم مصطلح النائب دون ذكر
الثاني؟!
وماذا استجد علي الساحة السياسية السودانية حتي يتغير المصطلحات بين ليلة وضاحها.
هذا هو السؤال الذي يجيب علي وحدة واحترام وديمقراطية الدولة السودانية!!
فهل حقاً نحترم البعض ونعدل فيما بيننا حتي نصون وحدة تراب هذا الوطن؟!! 
مع اعتذاري للجميع، رغم الألم
عدل لتصحيح ( الزبير محمد صالح) رحمه الله وليس الزبير محمد طه!!
وشكراً الاخ ودالباوقة لتنبيهي للخطأ

عارف يا البينو

والله ما في شيء بحير في الدنيا دي، زي مسميات الانقاذ دي،، ديل ياخوي بسمو الحاجة ويدهنوها بي زيت سمك، عشان ما تتمسك وتتعرف،،، اصلا في كل دساتير العالم هناك نائب واحد للرئيس، ثم يليه في حالة خلو الموقع الاول، رئيس البرلمان،، الا عندنا هني،، كدي عليك الله عد لي كم واحد في منصب مستشار للرئيس،،، عشان تعرف الفولة..

يا خوي كان عديت لي المحيرني في الناس ديل،،، تلقاهو بقي قاموس بحجم القاموس اللغوي..
اشكرك من صميم قلبي

لك مودتي

الاخ العزيز جمال المنصوري.
أنا المحيرني والما لاقي ليهو إجابة احدي هسع
هو:
اذا كان المرحوم الزبير ليطبقوا عليه النائب الاول بدون
ما يطلقوا علي جورج كنقور او موسس مشار مصطلح
فقط بل كان يضاف اليه كلمة الثاني!، واذا كان هذا هو المعيار
كما يسأل الكثيرون هنا عن العايبر، فلماذا لا يطلق علي علي
عثمان؛ النائب الثاني عهدنا ذلك في النواب الذين سبقوه.
وذي ما قلت دا شئ يحير وغير اخلاقي.
بس المشكلة في الناس الاذكياء.
أخوك البينو اكون.
او كما اقتصره ود الباوقة:-
اكينو

Quote: الزبير محمد طه

اخي اكينو

قصدك الشهيد الزبير محمد صالح

شكراً للتنبيه اخي ود الباوقة وحقاً أنا
قصدت النائب الاول للرئيس رحمه الله الزبير محمد صالح.
لانه في قبل أسمائهم الاخيرة محمد وقبل اول أسمائهم مصطلح
النائب بغض النظر عن النائب(سادة) او النائب الاول.
ولك التقدير والود

والله يا اكينو

انت راجل راقي جدا


مودتي

ولسع برضو مجرد سؤال!!

لماذا يتعمد الإعلاميين حذف الثاني
وإطلاق لقب النائب فقط علي علي عثمان!!
هل يعيبون عليه ان يكون نائباً ثاني؟!
أليس هذا تمويه بحيث يبدو للبعض ان علي
عثمان هو النائب الأوحد.
ولماذا لم يتبعوا مثل هذا النهج مع النواب
الثاني الذين حملوا نفس اللقب!!
بس عايز افهم الإشكالية شنو
والعيب وين وفي شنو او منو.