وجــوه غير صالحة للإستخدام ....!

وجــوه غير صالحة للإستخدام ....!


05-19-2010, 01:37 PM


  » http://sudaneseonline.com/cgi-bin/sdb/2bb.cgi?seq=msg&board=290&msg=1274272620&rn=36


Post: #1
Title: وجــوه غير صالحة للإستخدام ....!
Author: خضر حسين خليل
Date: 05-19-2010, 01:37 PM
Parent: #0

مثلاً :



ود(البوكسي) شخصية عجيبة للغاية من النادر أن تجده نصيحاً علي الرغم من كونه خريج إحدي الخلاوي الشهيرة الا أن كل ذلك لم يكن ليشكل لرجل بحجم ودالبوكس شيئاً ـ فالدين عنده لله وأما باقي سيئاته التي يصر علي إرتكابها فلنفسه تماماً كقليل الصالحات التي يقوم بها حسب تعبيره .

سار في دروب الحياة وتمرغ كثيراً في وحلها واجهته مصائب عدة ومصاعب قل أن يخرج منها الإنسان سوياً لكن كل تلك المصائب والمصاعب لم تكـ كذلك لتمثل شيئاً لرجل بحجم ودالبوكس .

لعوب بل في الحقيقة أُلعبان لا يعجبه العجب ويظن أن بمقدوره اللف والدوران الي أن يرث الله الأرض ومن عليها ، يضحك ويغني ويتبول علي قارعة الطريق ولكأن لم يكن ، حتي إذا ما ذهب لتناول الطعام لم يغسل يديه كبقية عبادالله بل يغسل وجه وفمه ثلاث مرات ثم يبدأ فيقضي علي أخدر الملاح ويابس رغيفات أمامه .

يغني بصوت ويضحك بصوت ويمازح بصوت ـ ثلاث أصوات يستخدم كيفما كان الموقف .

تجرأ رجل من رجال الشرطة وسأله

يازول هوي إنت ما شايف اليافطة القدامك دي ؟

فأجاب وهو يزلق مزلقان بنطاله الرث

لا ما شايف ؟

ثم تبول حتي أدخل الشرطي غيبوبة الدهشة

الحق يقال أنه لم تكن هناك يافطة بالمعني المطلوب بل مجرد عبارات بليدة كتبت بخط ما رأت عيناه الخطوط (ممنوع البول ياحمار) . عبارة ركيكة خطها أطفال لم يبلغوا الوعي رغماً عن بلوغ بعضهم سن النبوءة .

يكتبونها ثم يمضون فيتبول عليها المارة والحمير والأغنام حتي غدا ولكأنه حائط المبول علي غرار حوائط المبكي التي تتحدث عنها كتب التاريخ .



غاب بعدها عن الأنظار أسبوعان بكمال التمام ومصير الرجل غير معلوم لكأنه فص ملح وذاب . لم يبق من أمره سوي حكايات عابرات وتكهنات أجملها فألأ العثور علي جثته ممداً في الشوارع الخلفية القريبة من السوق .



حتي أن أصدقائه لم يكلفوا أنفسهم عناء البحث مرد ذلك حكمة ظلوا يتدثرون بها كلما أوقعت الشرطة رجلاً من عامة الناس إذ أن ذلك يعني فيما يعني أن الرجل قد ضاع هكذا هباءاً منثوراً . يستندون في ذلك علي كثير تجاريب فكيف لهم أن ينسوا (أزرق) وكيف لهم أن ينسوا ما كان من أمر (خميس الأحول) بل كيف لهم أن ينسوا حكاية (عثمان) يازول ها : قالولك البقع في ايد الناس ديل إلا يحلو الكريم .



هازول وجملة الإيمان أنا سمعت إنو (الأحول) ده لما جوا يدفنوه لقوه بدون كلاوي .

الكلاوي هينة كعب البتاع داك



ياخ (أزرق) ده قالو دفنوه علي تلات مراحل كل يوم يلقوا ليهم (مرحلة) أقصد (عضو) من أعضاء جسموا .



هكذا تتناقلك الحكاوي لتسري مسري الدم في الوريد والحق يكمن في تفاصيل رواته أو تماماً كما تقول الأسطورة . (مافي راجل بتدفن بي سروا) . قد يغتالونك هكذا غير أن حكايتك أيها البسيط ستخرج وستري النور ذات بلاد منورة . لذلك ولكل ذلك كان الناس مهيئين لاستقبال جثة الرجل في أيتها لحظة كل ماعليهم فعله شراء كفن رخيص يسترون به عورة الرجل الذي إنتهكته السلطات إنتهاكاً عظيماً . هذا بالطبع إن تبقت للرجل عورة للستر . ثم يضيفونه بذات بساطة حياتهم المهملة الي سجلات من فقدوهم في زمن أعوج وماأكثرهم .



تكاثرت الشائعات وتوالدت كجيوش النمتي حول مصير الرجل غير أن (ودالبوكس) الذي ظل وعلي الدوام محتفياً بالحياة علي الرغم من ضيق ذات اليد وذات الجيب وذات الملزات الأخري ـ

غير أنه ظهر مثله مثل فرسان الأساطير كان ولكأنه عائد للتو من غياهب الموت مورماً وعلي رأسه ضربات عنيفات أصلع الرأس والحواجب منه تقول (مولاي كما خلقتني) صفق الناس ما إن رأوه وجاء هو بكبريائه المعهود يحكي – عذابات توسدها الرجل في غيابه هكذا تقول هيئته ونحن نعلم شرطات هذي البلاد جيداً .



ليومين علي التوالي جلسنا نمارضه ساعة فساعة والسويعات تمضي ببطء وهو ما بين الحضور والغياب يصحو ليتمتم بكلمات غير مفهومات ثم يغبي ، تتململ منه الأصابع ـ عيناه تتحركان بيأس غريب ، تيبست الشفاه حتي بدا ولكأنه عائد من صحراء مكث فيها لأيام دون ماء .

قاتل الله الشرطة

فرك عيناه ثم نهض فجأةً مردداً بعض عبارات ومفردات يستحي منها الحياء لعن الشرطة والحكومات وستات المرايس لعن كل ما من شأن أن يلعن . هو منذ سنوات إستهوته حياة الأرصفة يمشي ويأكل ويتبول ويسكر فيها ليتحول لرجل شوارع بحق وحقيقة - ماعاد يهمه شئ في كوكب الأرض سوي إمتاع رأسه الصغير تارةً بلفافات البانقوا وتاراتٍ أخر بقناني الخمر البلاستيكية – يخرجها في منتصف السوق والخطاوي منه تترنح ثم ما يلبث أن يبدأ في شربها الكأس تلو الكأس يفرغها ثم يلعن كل ما حوله .

الخمر يا مولاي ليس لذلك ؟

القاليك منو إنت ؟

أقول مستعرضاً ثقافتي بارزة العضلات في هذا الجانب ان المتنبي لم يكن يشرب ليتبول علي قارعة الطرقات ولم المتنبئ بالتحديد ؟ – ذلك أن الرجل وثيق صلة بالمتنبيْ يحترمه دوناً عن عباد الله الصالحين والغير صالحين يوقره يبكي وهو يقرأ أشعاره – هو الذي لا تبكيه الكتب السماوية لكن المتنبئ وحده الذي يفعل به الأفاعيل .

قالوا إن الشرطي وبعدما غفره سأله عن أوراق ثبوتية فصاح بعالي الصوت :

الخيـل والليـل والبيـداء تعرفني والطعن والضرب والقرطاس والقلم

غريب الأمر أن لا رابط بينه وبين الخيل والطعن والضرب والقرطاس والقلم – أكيد الظن أن حظه من بيت المتنبئ أعلاه لم يكن ليخرج من دائرة الليل والبيداء . فنال جراء ذلك الضرب والتنكيل .

ثلاث ليالٍ أخري جلسنا نطبب الرجل حتي عاد أفضل من عهده الذي سبق بدا وجهه مشرقاً هذا الصباح نهض مباشرة ً الي غرفته الصغيرة حمل ملابسه الرثة وخرج للشارع ونحن خلفه نطالبه بالعودة قال أنه سيأخذ حقه بيديه ممن فعلوا به ذلك ـ هاقد إستوت منه الجراح ليغادر المدينة كلها وفي قلبه ألف غصة حالماً بزمن ينتصر فيه لارادته ولكبريائه ولعزيمته ولأحلامه ولتفاصيله الصغيرة التي لم تكن تتعدي علي الإطلاق قنينة خمر .

Post: #2
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 01:45 PM
Parent: #1

فمن رأي منكم الرجل فليرمه بحجر

ـــــ

وأقول قولي هذا وإستغفر الله العظيم
والسلامو عليكو

Post: #3
Title: Re: وجــوه غير صالحة للإستخدام ....!
Author: الرفاعي عبدالعاطي حجر
Date: 05-19-2010, 01:54 PM
Parent: #2

350_clap.gif Hosting at Sudaneseonline.com
350_clap.gif Hosting at Sudaneseonline.com
350_clap.gif Hosting at Sudaneseonline.com



وبس لا تعبير غير الصفقة دي .

بس ..... بيني وبينك كدا

عنوانك زعلني , ولن اقبل باي رد

غير الاتصال عبر سوداني مباشرة وخليك سوداني .

اوووع يكون لسة ؟؟؟ ا>ا لسة اتصل بصديق وبسرعة!!! ارشح لك الوغد

الشفيع رمزي .
100_Balloons2.gif Hosting at Sudaneseonline.com
100_Balloons2.gif Hosting at Sudaneseonline.com
100_Balloons2.gif Hosting at Sudaneseonline.com









................................................................حجر.

Post: #4
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 02:13 PM
Parent: #3

ياحجر
اريتك طيب ياخينا
الشوق (من حاصف لاقاصف)
أما بعد
أنا بخير ودوام طاريكم بخصوص اللسه (لسع عديل) يعلم الله
دي ما بلد تلاتات ياصديقي





تحالفات ثنائية لامين يفرجا الكريم
مشتاقين يازول وحأضرب ليك لابد لابد

Post: #5
Title: Re: وجــوه غير صالحة للإستخدام ....!
Author: Osman Musa
Date: 05-19-2010, 02:31 PM
Parent: #4

خضر الكاتب المؤسسة .
يا أخى بارك الله فيك وفى صباحاتك

Post: #6
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 02:41 PM
Parent: #5

عثمان ياصديقي الجميل
ازيك يازول
الله يبيض صباحاتك برضو ويبرد نهاراتنا الكالحة دي
يازول اخبارك شنو في الدنيا العجيبة دي

مودتي تبراك

Post: #7
Title: Re: وجــوه غير صالحة للإستخدام ....!
Author: Osman Musa
Date: 05-19-2010, 03:44 PM
Parent: #6

يا خضر
زولك ودالبوكسى ده سيرتو بتذكرنى
قصة فيلم الملاكم روكى .
روكى البطل الجاب حقو من مافى بعد ما تعب وتملطش سنين .
يا خضر والله جد دى كتابة تستحق التقدير والاحترام .

Post: #8
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 04:10 PM
Parent: #7

عثمان العزيز
والله أنا شاكر للغاية تتبعك لهذه السيرة
يازول البلد دي ملانة أبطال غير أنهم مهزومين
ستة صفر ، شقيش يقبلوا مضروبين ياصاحب
الواحد لو إتبعهم صدقني ممكن يقضي باقي العمير
الفضل وما يلحق يكمل نصهم .


ثم نسوي شنو يا صديقي غير نكتب
موش يمكن علي قول أخونا سلمي الشيخ سلامة


مودتي تبراك

Post: #9
Title: Re: وجــوه غير صالحة للإستخدام ....!
Author: Osman Musa
Date: 05-19-2010, 04:41 PM
Parent: #8

يا خضر
قلت للشاعر أبوآمنة حامد :
طعم سال من شعرها الذهب طاعم طعام كتير يا شيخ .
ضحك ديك الضحكة وقال : والمكتوم يا عثمان طعامو يعشرق .
الزول كان شاعر وكاتب وبطل حقيقى .
..
كلامك صاح ياخضر . فى هادى البلاد فى وجوه كتيره صالحة بس مالقت المساحات
البتتمدد فيها .

.. سلامات


Post: #10
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 04:55 PM
Parent: #9

قبل شويتين ياعثمان معاي صاحبي لافين من الصباح
في السوق العربي باحثين عن أمور معيشية (بحتة)
المهم السخانة كانت لافة وإيانا
صحبي قال تعرف ياخضر البلد دي بي سخانتا وعجاجا
ومؤتمراتا وحركاتا وشرطتا ونبقا وقنقليزا
بتجبر الواحد إنو يقعد ويواصل أملاً إنعدال الحال
يقين عجيب ياعثمان .
المهم من ضمن المشاوير كان من المفترض إنو نغشي
(مايو) المهم ونحنا في نص (مايو) صاحبي ده
نبهني لي حاجة عجية
قال : تعرف نحنا شعب أغرب من غريب
يعني لي شنو مثلاً نستصحب معانا تجارب مريرة
زي دي . معقولة ياعثمان مايو دي تسكنا السككان
ده كلو .

موش حاجة تحير ؟

Post: #11
Title: Re: وجــوه غير صالحة للإستخدام ....!
Author: خضر حسين خليل
Date: 05-19-2010, 07:42 PM
Parent: #10

والوتر دايماً بغني
للقوافل الجاية
من وجع الطريق


ـ
شكراً لمصطفي

Post: #12
Title: Re: وجــوه غير صالحة للإستخدام ....!
Author: خضر حسين خليل
Date: 05-20-2010, 07:58 AM
Parent: #11

لكل الذين أنضجت جلودهم شموس الاستواء

Post: #13
Title: Re: وجــوه غير صالحة للإستخدام ....!
Author: فيصل عباس
Date: 05-20-2010, 09:40 AM
Parent: #12

اسمع يا زول
ان قلت لك (قاتلك الله ) واستجاب الله ونفذ احلامي
عندها ساكون انا الخاسر الاكبر
ان قلت لك (صالحتك الامنيات ) واستجابت لدعائي ونفذت فيك احلامي
عندها ساكون انا الخاسر الاكبر ايضا (فقط عند توفرها ستبتعد عن كتابك تخصنا)
ان قلت لك (اي شئ جميل - وتحقق ايضا )
سيكون الخاسر ( انت )
لانة وكما يشاع عنك انك تتبع خيوط ستوصلك الي قمة الرفاهية وتترك الكتابة جانبا
وان فعلت ذلك سنحصبك بما يتوفر من حجارة (ايوا كدا وبالواضح كمان )



خضر ياخ مشتاق لابو اهلك وما عارف اقول ليك
اقطع وشك ياخ (كتابتك مرهقة جدا وسمحة جدا وقصصك ما بعرف ليها )
بالحضن ازيك (مع اني لا اعتقد ان يداي سيلتقيان خلف ظهرك كما كان في السابق )

_____________
عموما يا صديق لن ادعوا لك واو عليك بشئ (لانني لست من الجابي الدعوة - وربما تكون لي كبيضة الديك
ان وقعت فيك ستضيع باقي مشاريعي التي ستورطني فيها دعوة مستجابة)

عاين يا ابو الشباب باقي الشوق بتلقاهو في اقرب سفة من اقرب كيس جنبك .

Post: #14
Title: Re: وجــوه غير صالحة للإستخدام ....!
Author: Osman Musa
Date: 05-20-2010, 08:14 PM
Parent: #13

الخيل والليل والبيداء والأوراق الثبونية .
والله بتبالغ .

Post: #15
Title: Re: وجــوه غير صالحة للإستخدام ....!
Author: محمد عبداللطيف إدريس
Date: 05-20-2010, 08:44 PM
Parent: #14

خضر ياصديقي يا كتاب ( بشدة على النون بس التنوين مابجي معاي )
ذكرتني كلام الحيكومة ومراحلها بي كلامك ه

ياخ (أزرق) ده قالو دفنوه علي تلات مراحل كل يوم يلقوا ليهم (مرحلة) أقصد (عضو) من أعضاء جسموا .





الشوق بحر

تحياتي للبتشوفم

Post: #18
Title: Re: وجــوه غير صالحة للإستخدام ....!
Author: خضر حسين خليل
Date: 05-20-2010, 09:12 PM
Parent: #15

لطيف
ازيك ياخ والله مشتاقينكم كلكم وينكم ياناس
لا تلفون لاهوتاً ميل لا فيساً بوك
والله طبعاً الحكومة دي ماشاء الله عليها في حكاية المراحل
دي ـ نحنا لينا كم سنة يا لطيف في مراحلهم دي
بقينا متعايشين وعادي ياصاحب


ـــــ
بالله تحياتي للاصدقاء بالدمام الخبر
فاقدكم شديد وفاقد لياليكم
وبلغهم اني اعتزلت الامسيات بقيت زي عوض هرون
بتعشي بي صفار البيض وبنوم
وغايتو

Post: #17
Title: Re: وجــوه غير صالحة للإستخدام ....!
Author: خضر حسين خليل
Date: 05-20-2010, 09:06 PM
Parent: #14

البالغ أكتر الزمن ياعثمان
أي والله الزمن ده بالغ بوليغ شديد





عامل شنو يازول شكلك مزرور اليومين ديل
مشتاقين يعلم الله

Post: #16
Title: Re: وجــوه غير صالحة للإستخدام ....!
Author: خضر حسين خليل
Date: 05-20-2010, 08:52 PM
Parent: #13

فيصل عباس
وعن بعدالمسافة وقربها
ياسلام يافيصل وينك يازول والله (أيام يا زمان) طولنا ما قريناك
ياخ أدعوا لنا الله أن يخفف علينا نهاراتنا ياصديقي حر لا اله الا
الله ، غير أننا نمشي يا فيصل ولكأن الأمر لايعنينا .
قبل أيام إفتقدتك في فعالية (معقولة) كان برفقتي ثلاث من أصدقاء
الدرب إلتقينا بعد مرور سنوات طوال جلسنا وإستعدنا ذكرياتنا مع
البلاد السودانية ، تذكرنا الشوارع يافيصل الشوارع التي لطالما
تسكعنا فيها آملين وحالمين بمستقبل أفضل .
ونحن نودع بعضنا البعض تذكرتك ولا أدري لماذا لكن أغلب الظن أن
هناك كثير تفاصيل كانت ستسعدك . القهوة - التمباك - البرنجي
ووووو الباقي عارفك (عريف) والعين مكسورة (لاقدرالله) .


ـــــــ
التمباك فسوا بقي غالي شديد يافيصل ضحكت وبتاع التمباك يرد لي
عملتي الحديدية مع نهرة كاربة وهو يقول : ماعندنا تمباك بي متين جنيه
والله يافيصل الزول مافضل ليهو الا يديني كفين . فإحترمت غضبه ومضيت .






مشيت خرمان يافيصل

Post: #19
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 10:08 AM
Parent: #3

الزعلك شنو ياحجر ياخ ؟

Post: #20
Title: Re: وجــوه غير صالحة للإستخدام ....!
Author: حسبو عكاشة
Date: 05-23-2010, 10:31 AM
Parent: #19

الاستاذ خضر
سلامات
امتعتنا بقدر ادهاش شخصية ود البوكسي, و الشارع السوداني مليان شخصيات زي دي
اسمح لي بعرض احدي الشخصيات بشارع الاربعين

-----------------

حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط ....
- حينها فقط شيل كوعك دا من كتفي يا أم, و عليك دينك اعفيني منك إنت قايل نفسك (مجدي احمد اباظه)؟
- اسمو اسامه انور عكاشه يا لوح, إنت يا معلم راسك بقي خفيييف و بقيت بتعبر سريع ... الاسد لمن يعجز مالو؟
- الغنمايه بتشرب كاسو هاهاهاهاها
- تشرب كاسو برضو حييييييييينا, إنت بي راسك العامل زي اخر الزقاق دا اصلو ماعندك صبر, خليني اتم ليك الخاطره بتاعتي دي ما تنسيني ليها
- هوي يا (كوارع) هوووي ما تشغلا لي انتظر ربيع دااااك شايفو جاي اقعدو اتخاطرو سوا

تطول لحظات انتظارهم لربيع فيتقالدا سوياً صوب دقن الباشا ( شجرة ناس اصطاف) و التي تعد الاكثر ظلاً في الحي, ناهزت عقدين من الزمان و مع ذلك لا تمل من فرد افرعها تحناناً لكل حيران و كل عاطل طالته سياسات الدوله التعسفيه, حتي خالج الناس ظناً انها مسكونه بنبي الله الخضر إختارها لموقعها الرابط ما بين من هم يلوزون بأحزانهم الي اللاوعي و بين (حي فنقر) و ما ادراك ما حي فنقر, المره تدق و الراجل ينقر.
-إنت يا (صامولي) ربيع دا الليله شكلو شرب فنقر كلها و جا, عاين ليهو بخيط في الشارع كيف؟
- يخيط شنو يا كوارع!! الزول دا ما شغال ياخ و مما رفدو من الجيش ليهو عشرة سنه ساكي حقوقو و لسه ما طلعت
- والله كان راجيها دينو ح يطلع, ياخ دي بلد دي... الود كان شاااااطر في المدرسه و فجأه و الزمن قلب عليه: ابوه مات و امو راقده بالشلل و هاك يا دورة البحث عن العلاج ديوان الزكاه ما نفع حتي المحسنين بقو ناشفين, فقال يختصر طريقوو طبق المثل البقول ( إن فشل للطوريه و إن نجح للعسكريه) و خش الجيش و تعال شوف بعد داك شبكو ليك لواء القعقاع المتجه لتحرير توريت و شعارات من نوع: نحن الدنيا الما مسكنا نحن خلودنا هناك في الجنه, الودا إتحمس و مشت فيهو قال اهو برضو نختصر طريقنا للجنه, صاحبك لمن نزل من الطياره في الجنوب قايل نفسو في كولومبيا ريحة البنقو ما تديك الدرب لقي ليك المجاهدين كلهم يد في الزناد و اخري تحمل الكبنقه, قال انا يا دووووب عرفته الناس دي ليه شابكانا لقد شممنا رائحة المسك, و كنا عطاشا فإذا بغيمة ظليله تهطل بالوادي الذي قبالتنا و شربنا حتي بانت نواجزنا, البنقو و احكامو يا معلم ... اها بقي لافيها معاهم 4 سنين تنتهي سجارة لواء ابودجانه يولعو سجارة الميل اربعين .. بعد داك جابوهو راجع – و قالوعليه فوت فوت – لكن هو ما فوت فوت – و كدا كدا يا الترله
و تقول لي ساكي حقوقو, إنت عارف يا صامولي اخوي نحن الكادحين ديل عاملين زي الكبنقه لمن تكون محكومه, اي واحد يجي يشفطنا تماااااام و يدي البعدو, و الغريبه دائماً قعد تكون محكومه لي عساكر و العساكر راسهم ما بجي بسرعه شفطونا طلعو عينا ياخ,,, عشان كدا انا وريت ربيع قولته ليه حقك تحرسو ولا بجيك حقك تقاوي و تقلعو
- يقلع ضرسك يا كوارع ياخ قلبته لينا القعده ( في ساحات الفداء) يقلب بطنك إنشاءالله
- ساحات الفداء شنو!! لسه انا الخاطره بتاعتي القبييييل ما تميتها و ربيع دا شكلو ح يتأخر, اسمعني للنهايه و ما تقاطعني
- اها يا كوارع قول قصتك !!

حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط
حينها فقط اختارت يد المنيه (عصام) و تلقفته في ذات الصباح اثر تسمم احدثه له ذاك السم الهاري الذي ما انفك يشربه ظناً منه انه سينسيه شظف الدنيا... الصبايا و النساء و بائع الصعوط و مناضلات حي فنقر كما كان يحلو له ان يناديهن, جميعهم جزعوا لفراقه الدنيا التي ما لبست تنال منه و تجرده من ابسط حقوقه حتي اسمه الذي هو خاصته جردته منه و اصبح في لمح البصر (كوارع)



----
تحياتي

Post: #21
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 12:18 PM
Parent: #20

عزيزي الأستاذ حسبو
تحياتي الحارة والأكيده
والله تجدني شاكرً لاضافتك الثرة وبقدرما ما أحزنني مصير كوارع الا إنني استمتعت ايما استمتاع بهذه الكتابة المعبرة لما فيها من دلالات عميقة ولما فيها من تفاصيل تتشابك صورها أمامي .
هذا الشعب مليئ بالتحف والأبطال الذي يعيشون علي امش الحياة غير انهم يعطرون هذه الدروب . هم حقاً ملح الأرض بل عصبها الحي . تشكراً عزيزي حسبو وليدم الرب التواصل بيننا .

Post: #22
Title: Re: وجــوه غير صالحة للإستخدام ....!
Author: باسط المكي
Date: 05-23-2010, 01:56 PM
Parent: #21

خضر
ياصاح
ادهشتنا وامتعتنا

Post: #23
Title: Re: وجــوه غير صالحة للإستخدام ....!
Author: سلمى الشيخ سلامة
Date: 05-23-2010, 02:43 PM
Parent: #22

الله ياود البوكس انت
الله حين تتوهط الاحزان وتخرج منك
انا لله
بكيت فذاك
"كان كان "اخر
هل تذكر كان كان العوام الذى مات مرتين ؟
هانى اراه مجددا
الله لكم افتقد تلك الاجواء
الاسى، الحزن المتاصل فينى ناحيتهم
شكرا لك اذ تلامس ارواحنا بفخيم كتابة وبسيط لغة

Post: #24
Title: Re: وجــوه غير صالحة للإستخدام ....!
Author: tmbis
Date: 05-23-2010, 03:00 PM
Parent: #23

والله يا خضر امتعتني بي ود البوكسي دا .. لم كنت هنا كنت بتكتب بالليل خالص حاجات كويسة .. حسع قلبته بقيت تكتب بالنهار ..
دور عليك الله نمطيات زي دي .. البورد دا فوقو حتات كويسة بتطعم المساخة الحايمة دي ..

Post: #28
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 03:46 PM
Parent: #24

تمبس
ازيك يازول والأشواق من هنا لي تالاك
حليل كتابات لأماسي ياخ كانت أيام أجارك الله منها ، لي فترة قالب نهاريات ياتامبا
كان نلقي فرقة في ملعب البورد ده - سعيد بحضورك هنا وتجولك في هذه المساحة
أها بتكون عندك نمازج قريبة من الشاب ده أرميها لينا وينوبك عن الثواب ثواب .



تحياتي لشات ومعتصم ياصديق

Post: #26
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 03:38 PM
Parent: #23

سلوم أخونا
ازيك ياسلمي
غايتو من حاجات هادي البلاد ياسلمي انو الواحد بقراكِ الجمعة من كل أسبوع فكرت منذ أيام في مراسلتك
إثر كتابة أعجبتني ووقفت عندها طويلاً - غير أن الزمن يابت الناس ما أداني فرصة .
ودالبوكس شخصية عجيبة ياسلمي يتواجد منه الكثيرون في أرجاء هذا الوطن العجيب المليئ بالتناقضات يعني في نص الحاجات السجم دي يلم فيكي واحد ودبوكس يغير مجري حياتك .


مودتي يازولة

Post: #25
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 03:34 PM
Parent: #22

يا باسط
الدهشة ياصاح لودالبوكس ورفاقه الغر الميامين
والمتعة في تقفي أثرهم والسير معهم ما أمكن الدرب ياصديقي


ــــ
نحن بإنتظارك في خراطيم الهزيمة والعزيمة

Post: #27
Title: Re: وجــوه غير صالحة للإستخدام ....!
Author: Ahmed Abdallah
Date: 05-23-2010, 03:41 PM
Parent: #25

خضر ..
ليك وحشة يعلم الله
انت عارف في الزمن الاخرق ده ياخضر
تلاتة ارباع خلق الله دي في دواخلها
في ود البوكسي لكن غالب الصبر

خلوا خلق الله تبتهج بطريقتها الخاصة
تحياتي تغشى ودالبوكسي وود البيه و انتو كمان

_____________________
اسمعني الوداك مايو شنو !؟
لي فيها متكأ كل حين و عيشا من حيث لا أحتسب
واشياء أخرى

Post: #29
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 03:56 PM
Parent: #27

والله لمن قربنا ننساك
إزيك يا أحمد
مالك مجافي الناس
وعايش براك في غربة
وأنا أكتابك إنطلقت هذه الأغنية من مطعم صغير يقع أمامي مقرنا (شفت المواكبة دي
عاملة كيف) يعني بقوا يسوقوا للفاصوليا والقرع والبطاطا وأم فتفت بالموسيقي
البلد ماشة في تقدم سئيلي الله يا أحمد .

ــــــــ
بخصوص مايوا أخوك بمشي هناك كتير لي فيها مآرب شتي
ورينا جنبتك عشان نمشي نعمل الواجب ياصديقي
والشوق بحر يعلم الله

Post: #30
Title: Re: وجــوه غير صالحة للإستخدام ....!
Author: خدر
Date: 05-23-2010, 04:30 PM
Parent: #29

يعلم الله صلحت لي مزاجي و ذكرتني السودان و الحكايات

اكشحني بي الحاجات المدكنة زي ده دايما يا فنان

Post: #32
Title: Re: وجــوه غير صالحة للإستخدام ....!
Author: خضر حسين خليل
Date: 05-23-2010, 08:25 PM
Parent: #30

خدر
ازيك يافنان
مشتاقيين يعلم الله وعجبني ليك إنو الشخصية دي عدلت مزاجك (غايتو عالم فقر بشكل)
طولنا ما لاقيناك في السيد الماسنجر ـ أخوك بقي محمول ممكن تقول من أرباب الأسر
عديل ـ والسخانة يا طارق هدت حيلنا هد . يعني الواحد قريب كده حيشبك الناس
الليل والخيل والبيداء وما الي ذلك من متنبئ والله المعين .


مودتي يازول

ــــــــ
لوعندك سكة ماسنجر قول عوك هو زاتو عامل حركات يخش ويمرق علي كيفوا

Post: #31
Title: Re: وجــوه غير صالحة للإستخدام ....!
Author: الصادق سلفاب
Date: 05-23-2010, 04:35 PM
Parent: #27

الأستاذ \ خضر حسين
شكراً لهذا السرد الجميل
كان ود البوكسي قبل أن يسحل يعبر عن غضبه بوسائل سلميه أشدها عنفا هو اللعن أو التبول علي عالم قذر
لكننه الآن وبكل تأكيد سيكون أكثر دمويةً في استرداد حقه في الحياة التي يريد........
تري أين هو الآن؟؟؟؟؟
أتراه يجالدهم بسيفه في الأحراش؟؟
أم تراه قد قال ( مافي غير تلكع تسافر......)
تبا لبلادٍ يسحل فيها الأبطال وتكسر فيها الأحلام البسيطة
مودتي
سلفاب

Post: #33
Title: Re: وجــوه غير صالحة للإستخدام ....!
Author: خضر حسين خليل
Date: 05-24-2010, 10:45 AM
Parent: #31

الصادق سلفاب
إزيك ياخ
والله شاكر لك حضورك السمح الوسيم
واقعنا ده يا صديقي بخلي الواحد يتجه إتجاهات تانية خالص
يعني مسائل الحلول السلمية دي بقت ما بتحل قضية في سودان القضايا
أمثال ودالبوكسي يحلمون بالقليل ليبقوا فقط في هذه الشوارع التي
أحبتهم وأحبوها . لكن شن نسوي ياصديق ونحن الذي لانملك من الله الا الله
غايتو ربك يجيب عواقب هادي البلاد سليمات


شكراً لحضورك

Post: #34
Title: Re: وجــوه غير صالحة للإستخدام ....!
Author: خضر حسين خليل
Date: 05-24-2010, 10:21 PM
Parent: #33

والله بالطريقة دي انا زاتي وشي ده حيكون غير صالح بالاستخدام
دي سخانة شنو دي ؟

Post: #35
Title: Re: وجــوه غير صالحة للإستخدام ....!
Author: خضر حسين خليل
Date: 05-25-2010, 02:52 PM
Parent: #1

(صدّقتُ أُغنيتي وكذّبتُ الخريفَ وليتني كذّبتُ أُغنيتي وصدّقتُ الخريفْ)

Post: #36
Title: Re: وجــوه غير صالحة للإستخدام ....!
Author: خضر حسين خليل
Date: 06-06-2010, 10:52 AM
Parent: #35

دعوته فإستجاب لدعوتي
قال انه سيعود تدريجياً تماماً كما انسل من هذه الدروب تدريجياً
عملاً بحكمته المعهودة (الحاجات لما تجي كلها مع بعض بتبوظ)
الآن صار مدمناً للمراحل


ــــــ
نحنا في يات مرحلة ياناس ؟