Post: #1
Title: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 05:27 PM
Parent: #0
التبرج وإظهار مفاتن المرأة في برنامج أوراق شبابية في قناة الشروق
لقد نبهنا الله تبارك وتعالى في كتابه الكريم أن العذاب الأليم سيحيق بكل من هم بإشاعة الفاحشة في الذين آمنوا حيث قال جل جلاله : ({إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ }النور19) .... ولعمري أن قناة الشروق الفضائية في برنامجها أوراق شبابية إنما تحرق بتلك الأوراق الشباب المسلم حيث أنك تلاحظ أن المضيف والمستضاف من الفتيات ليس عليهن من اللباس إلا ما هو ممنوع ومحظور في الشريعة الإسلامية حيث أن لبس الكارينا المحزقة تلبسه مقدمة البرنامج وتلبسه أيضا الفتياة المستضافات وهو لبس خليع في تبرج افر مظهر لمفاتن المرأة وقد حزرت مرارا من هذا البرنامج الذي هو أداة قوية ليجعل بناتنا ونساءنا ينحرفن عن الجادة عندما يرين هذا اللباس الخليع ؛ فنحن نعمل جاهدين لنخرج الشباب من هوة الضلال التي يقبعون فيها إلى ساحات النور بغرس تعاليم الدين الحنيف فيهم وتأتى أوراق شبابية هذه لتدك كل ما نقوم ببنائه في هذا الشباب
فأقول للدعاة في بلادي إن مجهودكم الذي تبذلونه في شهور تأتي الشروق بأوراقها الشبابية فتحقه في يوم واحد
إلى مدير هذه القناة التي نحسبها تدافع عن الإسلام والمسلمين أرجو منك يا سيدي الكريم إن توقف برنامج أرواق شبابية هذا لأنه ليس له هدف سوى انحراف الشباب المسلم وإدخال الموضة الغربية واللباس الخليع ومساعدة الغرب في بث سمومه في أوساط الشباب المسلم
|
Post: #2
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 05:38 PM
| Quote: ليس عليهن من اللباس إلا ما هو ممنوع ومحظور في الشريعة الإسلامية |
المادة كم لو سمحت يا "مولانا" ....
... المهم ...
|
Post: #3
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: Amira Elsheikh
Date: 05-16-2010, 05:43 PM
Parent: #2
والله البنيات ديل لابسات لبس سوداااااااااااااااااانى
اسكيرتات وبلواز وطرح وحلاة الدنيا عليهن ...
اصلى ما شفت تبرج ولا تحزق ......
يعن البنات ديل كمان ظاهرات على شاشة يعنى اهلن وجيرانهم وكل الناس شايفاهم
يبقى الناس دى كلها غلط .........
النصيحة الناس بقت مابتستحمل تشوف ليها زول سمح.......
|
Post: #4
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 05:55 PM
Parent: #3
| Quote: اصلى ما شفت تبرج ولا تحزق ...... |
ونحن نشوف وين مع عينة "المادة سبعة إجراءات فقهية" دا ....
يشوّفنا الله التبرج والتحزّق ... عشان ما نمشى يوم القيامة نرجّع ليهو العيون ... نقول "والله ما شغّالات" ...
... المهم ....
|
Post: #8
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 06:26 PM
Parent: #3
| Quote: النصيحة الناس بقت مابتستحمل تشوف ليها زول سمح....... |
السماحة في العفة والتقوى يا اميرة
|
Post: #12
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 06:33 PM
Parent: #2
أخوي العزيز تبارك بارك الله فيك
انا اتحدث عن كلمة الحق
وكلمة الحق لابد أن تكون لاصحابي كما هي لأعدائي
|
Post: #5
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: HAIDER ALZAIN
Date: 05-16-2010, 06:05 PM
| Quote: إلى مدير هذه القناة التي نحسبها تدافع عن الإسلام والمسلمين |
الاخ المكاشفي الخضر ...
السلام عليكم ورحمة الله تعالي وبركاته
ولك التحايا صمود
لو سمحت بنيت كلامك دا بانو قناة الشروق تدافع عن الاسلام والمسلمين بياتو منطق يعني ممكن تدينا - معيار - او شئ بنيت عليهو قولك دا في معبر انها بتدافع عن الاسلام والمسلمين ام هو من نافلة القول فقط ،،،
ثم كيف لقناة تقول بانها سودانية لكل السودان وشعارها يحتوي على شعار الوحدة لمجموع اهل السودان بتنوع ثقافاتهم وديناتهم وسحناتهم واثنياتهم تنمطها في حتة واحدة انك بتحسبها منطلقة في توجهها للدفاع عن الاسلام والمسلمين
إلا اذا كان بثها - تكراراً - لبرامج المؤتمر الوطني الانتخابية تعتبر من صميم الدعوة الاسلامية
ولك التحية
|
Post: #6
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 06:13 PM
Parent: #5
يا حيدر يا اخوى ..
| Quote: ثم كيف لقناة تقول بانها سودانية لكل السودان وشعارها يحتوي على شعار الوحدة لمجموع اهل السودان بتنوع ثقافاتهم وديناتهم وسحناتهم واثنياتهم تنمطها في حتة واحدة انك بتحسبها منطلقة في توجهها للدفاع عن الاسلام والمسلمين |
السودان ... دار الإسلام والمسلمين ... والما عاجبو يشد الرحال ويتراوح الفجة الجا منّها ... (يعنى البيقول "انا عربى" يرجع "الجزيرة العربية" ... أصلاً بقى عندهم قناة)
... المهم .....
|
Post: #7
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: Amira Elsheikh
Date: 05-16-2010, 06:26 PM
Parent: #6
برنامج اوراق شبابية على قناة الشروق .. قمة الفشل والرتابة وعدم الموضوع
مشيت اقوقل اجيب ليك جزء من الخلاعة حقت البنات دى يا تبارك
جانى ليك الموضوع زاتو بشحمو ولحمو ونفس الكاتب بس بعنوان مختلف
Quote: برنامج فاشل جدا
بل من افشل البرامج التى تبثها قنوات السودان
رتابة بدون حدود
استعراض ازياء من كل الحضور بما فيهم مقدمة البرنامج
لا هدف لاي حلقة اللهم الا تنطع وشرود في الكلام وعدم موضوع
لا موضوع ابدا تتم مناقشته للخروج بحل
لا حلول لاي مشكلة إجتماعية في الساحة الشبابية
أغلب الضيوف من طبقة واحدة ومعلومة وتوجد عدم عدم عدالة في اختيار المشاركين في البرنامج
الضيوف ليسوا أكفاء بل ليسوا اصحاب دراية وخبرة بما يطرح في البرنامج
تبرج من الفتيات ومجاراة الغرب في الملابس من الفتيان والفتيات
اقترح ايقاف هذا العبث وهذا البرنامج الفاشل جدا
أنا حريص على هذه القناة فينبغى وقف هذا الهراء عاجلا يا إدارة القناة
مع خالص الشكر والتقدير
في النهاية رأي
لكن عليكم الله كلامي دا رأيكم فيهو شنو الكلام دا حاصل ولا لا |
|
Post: #9
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: Amira Elsheikh
Date: 05-16-2010, 06:29 PM
Parent: #7
| Quote: السماحة في العفة والتقوى يا اميرة |
بمقياسك طيب شرح العفة والتقوى ينوبك ثوابك ...
|
Post: #14
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 06:45 PM
Parent: #9
| Quote: بمقياسك طيب شرح العفة والتقوى ينوبك ثوابك ... |
الاستاذة الكريمة اميرة لا اظن أنك لا تعرفين تلك النصوص والادلة التى يجب علي وعليك التقيد والالتزام بها
|
Post: #11
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: HAIDER ALZAIN
Date: 05-16-2010, 06:30 PM
Parent: #6
ما المشكلة يا تبارك شيخ الدين للآن الاسلام دا بتاع العرب بس ...
مُش بالسودان بس في أي فجة بالعالم
العربي مسلم وهو المدافع عن الاسلام ... والعراقي المسيحي او اليهودي او مهما كانت ديانته او وثني بيعبد حجر بيبقي قبطي او مسيحي او مُلحد مرتد فهو غير مسلم وبالتالي طلع من امة محمد - اللي هي امة العرب - وطالما طلع من الاسلام يبقي غيــر عربي وإن تعلق بامجاد معد بن عمرو يكرب .. اما إن اسلم فهو إننا العربي فامة محمد يدخل بها كل من اسلم وقرا القرآن ولو جده كان العم سام بذات نفسه او لو انتسب لساكسون بن زي البريف هارت الانجلويكي
يا تبارك لغاية الآن جماعتنا بتاعين التأصيل ما عارفيــن امة محمد الغر المحاجيل البيردو الحوض ويردهم الرسول بيشملوا منو !!
اها إن طلع منها عرب السودان بتاعيـــن جدي العباس وود عمي حمزة بن عبد المطلب وجينا خاشين السودان مع هجرة صقر قريش او بني جهينة أرسلوا وفودهم يبقي مسلمي باقي قبائل السودان في جبال النوبة والمحس والبجا والجنوب - البيشوفوا دماءهم صافية من العرب شربوا موية ما رووا - لانهم حا يحشروا مع امة تانية غير بتاعت سيدنا محمد ( ص )
ـــــــــ
هسع بالله صديقنا محمد الحسن سليمان الحبشي دا بعد دفاعو المستميت عن السلفية يحشروهو مع بانديكت كراع بكراع 
|
Post: #16
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: د.محمد بابكر
Date: 05-16-2010, 06:57 PM
Parent: #6
سئل الامام الشافعى وهو فى احد مساجد الكوفه:ما هو حكم قتل ذبابه فى الحرم المكى وفى الاشهر الحرم فقال ضاحكا:
عجبت لاهل العراق يقتلون الحسين ويسألون عن قتل ذبابه.
بالجنبه: وسأل اخر ترى لو كنت استحم فى البركه أأستقبل القبله ام استدبرها؟ اجابه الامام :استقبل ملابسك لئلا تسرق.
|
Post: #10
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 06:30 PM
Parent: #5
| Quote: لو سمحت بنيت كلامك دا بانو قناة الشروق تدافع عن الاسلام والمسلمين بياتو منطق يعني ممكن تدينا |
بما أني احسبها فارجو ثم ارجو ثم ارجو منها ان تنظف
|
Post: #15
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 06:50 PM
Parent: #10
لخيت اسم الراجل يا حيدر الزين .... وخوّفتنا على بينيدكت بتاعنا من الحشر فى معية الحبشى الصعيب ... انا غايتو ... دنقلاوى وكان حشرونى مع انجلينا جولى ... انشالله يحشرونا فى قزازة زاتو ... بعد داك خلى العرب يتفسّحوا ...
_____________________________
الأخ المكاشفى (طيب الله ثراه)
| Quote: بما أني احسبها فارجو ثم ارجو ثم ارجو منها ان تنظف |
نحن نحسب هذا المنبر منارة معرفة ووعى ...
وحوارنا معك هنا نحسبه من باب "التنظيف" أيضاً ... فنظّف نفسك ... وقف عن أن تقول على الله ما لا تعلم ... "الذين يجادلون في آيات الله بغير سلطان أتاهم كبر مقتا عند الله وعند الذين آمنوا كذلك يطبع الله على كل قلب متكبر جبار" ....
... المهم ....
__________________________
التعديل فى الآية القرآنية بتنبيه من الحصيف خالد عثمان جعفر مشكوراً ...
|
Post: #17
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: HAIDER ALZAIN
Date: 05-16-2010, 07:06 PM
Parent: #15
Quote: Quote: معد بن عمرو يكرب
لخيت اسم الراجل يا حيدر الزين .... |
يا زول والله عذري يصل لعمرو دا في قبرو .. ولا تاخدو مننا لائمة ان لخينا اسمو .. فليتقبل يسامحنا
المشكلة إنه هل سيُسامح المكاشفي قناة الشروق بإلتزامها بشعارها ام سيحاكمها بما - يحسبه هو -
نرجو ان يمر الامر على خيــر ويُحشر مدير القناة في امة الغر المحاجيل :)
المهم ... يا قولك
|
Post: #18
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 07:13 PM
Parent: #17
المكاشفى ...
Quote: أخوي العزيز تبارك بارك الله فيك
انا اتحدث عن كلمة الحق
وكلمة الحق لابد أن تكون لاصحابي كما هي لأعدائي |
انت فى سنة كم؟ ... ولاّ اتخرّجت؟
وأعداءك ديل منو؟ (يا كافى البلا وحايد المحن)
... المهم ....
|
Post: #21
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 07:40 PM
Parent: #17
| Quote: المشكلة إنه هل سيُسامح المكاشفي قناة الشروق |
ومن أنا؟
|
Post: #19
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-16-2010, 07:28 PM
Parent: #15
تبارك
هذا البوست من باب التنظيف ( من رأى منكم منكرا )
|
Post: #20
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 07:34 PM
Parent: #19
| Quote: هذا البوست من باب التنظيف ( من رأى منكم منكرا ) |
| Quote: ... فنظّف نفسك ... وقف عن أن تقول على الله ما لا تعلم ... |
... المهم ....
|
Post: #22
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: ريهان الريح الشاذلي
Date: 05-16-2010, 08:08 PM
Parent: #20
السيدالمكاشفي...
في اعتصام امام مشرحةامدرمان في مقتل الطالب محمد موسي كان في مجموعة من الشباب البتقال عليهم في اوساط المجتمعالسوداني اسم الحناكيش واقفين معتصمين تحت الشمش شايلين بيانات تشجب مقتل الطالب والبعض منهم يرفع شعارات تنادي بالقصاص وجهاز الامن والنجدة والعمليات بتحاوطهم و المنظر في شكله العام طبيعي لجيلهم المفترض انو يكون جيل الثورات ولكن لانو 21 سنةمن حكم العسكر والمتأسلمين قضت علي وعي هذا الجيل وباستهداف وضح جدا فبقينا لمن نشوف موقف شجاع واحد نحسبه بحر...
سيدي المكاشفي.....
جهاز قياس تحذق (الكارينا) الموجود برؤوسكم ما قاس (ولو بالالتقاط) مدي الوعي والفهم ولا قيمة ان تكون في متل سنها دي وتدير حوارات جادة زي البتديرهاوخاصة انها بتنتمي لجيل فتح عينو لقي البشير رئيسو وهيئة علماء السودان مفتي ديارو ؟؟
الشابة الصغيرة البتتهمها بانهابتستدرج النسوان بعيد عن (الجادة) وبتتهمها بانها بتقدم برنامج
ببث سموم الغرب هي (بت ) فاتت القدرهاوالفي دورها واهتمت بقضايا وبتناقش مواضيع بيعتبرها جيلها boring يا سيدي لعنة البلد دي وجود عقليات زي عقليتك دي افشلت كل محاولات العلم والمعرفة من رفع الوعي عند الشابات والشباب بتخويفهم باسم الدين والترهيب وادخال مصطلحات حادة زي التبرج والفاحشة و(الغرب) !!! وكل ما تظهر قامة طموحة يتم كسرها بهوس اقلامكم دي هي البتستحق الجهاد ضدها لانها بتفسد كل محاولات رفع الوعي (علي قلتها) .
|
Post: #23
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 08:30 PM
Parent: #22
| Quote: وادخال مصطلحات حادة زي التبرج والفاحشة و(الغرب) !! |
سألناهو: المادة كم؟
قلب القصة "تنظيف" ما "قانون" و "تجاوز" ...
.. المهم ....
|
Post: #24
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: محمد حسن العمدة
Date: 05-16-2010, 08:43 PM
Parent: #23
حيدر الزين
اميرة
تبارك
ما هو معيار تواجدكم بهذا البوست ؟؟
حددو حددو
| Quote: جانى ليك الموضوع زاتو بشحمو ولحمو ونفس الكاتب بس بعنوان مختلف |
نفس الكاتب في نفس الموضوع ؟؟
المكاشفي عجبك المحزق وملصق ولا شنو مصنقر في البرنامج دا ؟
|
Post: #25
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-16-2010, 11:20 PM
Parent: #24
| Quote: المكاشفي عجبك المحزق وملصق ولا شنو مصنقر في البرنامج دا ؟ |
نحن قاعدين نحتجّ ... وفاتنا "مولد" اللحمة المكشوفة دا ...
كدايس آخر زمن ...
... المهم ....
|
Post: #26
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: HAIDER ALZAIN
Date: 05-17-2010, 07:20 AM
Parent: #24
يا ود العمدة انا غايتو معياري الجيت بيهو عاوز اعرف بس!!
إلا شايف تبارك دا معيارو بيخضع لمواصفات التايد والكلوركس ..
- تبارك غسالة أوتوماتيك تبيع :)
|
Post: #27
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: أحمد ابن عوف
Date: 05-17-2010, 07:45 AM
Parent: #26
الغريبة انو دي نفس القناة الانتقدتها لانها استضافت
رئيس جمعية دعم الحجاب الداير يلبس بنات الجامعة العبايات الخليجية
(بالقوة)
القناة دي عندها انفصام شخصية وللا شنو
اقترح انو يوقفو القناة كلها، البشير وفاز في الانتخابات، تاني شنو
|
Post: #28
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: شكرى سليمان ماطوس
Date: 05-17-2010, 09:04 AM
Parent: #27
http://www.sudaneseonline.com/news.php?action=show&id=6008
Quote:
مرعب البنات في شوارع الخرطوم: دي غيرة لله بس
الزول البضرب البنات في شوارع الخرطوم بالسوط،
لم يعد مجرد رجل مرعب وغريب الأطوار يمشي بزيه العسكري في الشوارع ،
بل وصلت قصته إلي صفحات الجرائد . في هذا الحوار مع صحيفة حكايات
عرف بنفسه: إسمي (محمد كداس إبراهيم ود عبد الله ود سعد ) ساكن القطاطي ،
اهم حاجة يا ناس (حكايات) لازم تعرفو ، انا ما قاعد ادق البنات عشان (شوفوني يا ناس ) لكن غيرة في الله بس .
من متين بقيت تدق في البنات؟
جيت من الامارات سنة 96 كان عندي إصابة في رأسي بسبب حادث في الجنوب ، ومن ديك وعيك .
عندها خلع لي طاقيته العسكرية الملفوفة بالشريط الأحمر وقال لي : شوف انضربت هنا ،أنا مشيت الجهاد سبع مرات .
منو الأداك الحق تضرب البنات في الشارع؟
مجذوب الخليفة ، الله يرحمه ،
زمان لمّن كان والي الخرطوم بقاني مسؤول الأمر بالمعروف والنهي عن المنكر في الخرطوم ،
والامر بالمعروف والنهي عن المنكر امر رباني برضو.
وجهت سهام نظراتي نحو سوطه العجيب كان خرطوشاً أسود مثل الذي تلهب به ظهور الحمير ،
كأنما عرف أني أريد أن أسأله عنه فبادر بقوله: هسي البنات ديل لو بخافن من الله ،
ما كان بيلبسن زي اللبس ده ،
هن بس بخافن من سوطي ده،
وخرطوش كداس له مآرب اخري غير الزجر والإخافة فهو يستعمله أيضاً كعصا يتكئ عليها حين يريد ان يتحدث معك ،
غافلني وقال : يعني شوف البت الجاية دي لابسة كيف والله لوما إنت معاي كان دقيتها!
وبعدين (إظهار رقم ، خارج عن الخدمة، ومسكول، وأطعني حقنة) دي هدوم شنو دي !!
|
لا تعليق: لأنى لم أجد كلمات أبلغ من هذا السبق الصحفى
و صاحب العقل يميز !!!!
بس يا أميرة الشيخ (بعد السلام و التحية)
خلى بالك على صورة البروفايل، شايفها محزقة و مش حسب المادة بتاعة (تبارك)
اللهم لا نسألك رد القضاء و لكن نسألك اللطف فيه
ش
|
Post: #29
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: celecon
Date: 05-17-2010, 09:17 AM
Parent: #28
| Quote: (إظهار رقم ، خارج عن الخدمة، ومسكول، وأطعني حقنة) |
؟؟؟؟؟؟
مصطلحات جديدة !!!!
|
Post: #30
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: EMU إيمو
Date: 05-17-2010, 09:46 AM
Parent: #29
وماذا عن قناة زول؟؟؟
|
Post: #31
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: doma
Date: 05-17-2010, 09:59 AM
Parent: #30
لو الزول البدق البنوت في الشوارع دا ان مازال موجودا يجب التبليغ عليه حتي يتم حفظه في احدي المصحات بغرض العلاج فالرجل مريض عقليا بلا ادني شك
|
Post: #32
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: Amira Elsheikh
Date: 05-17-2010, 04:33 PM
Parent: #31
ود العمدة ..سلاااام
معيارنا الفطرة السليمة الدخلوها المهوسيين ديل فى جحر ضب ,,,,,
تانى بكرر..
غايتو انا شايفة البنات ديل سميحات وبعرفن يلبسن ويتعاملن مع الميك اب
والالوان وبناقشو فى قضايا حيوية وبتهم شريحة الشباب بنفسهم من غير وسيط
او وصاية ..
..بغض النظر عن اختلافنا اواتفاقنا فى نوعية الحوار
والمواضيع المطروحة لانو دا ما موضوع البوست..
لكن يا مولانا المكاشفى انت القال ليك دى اسمها كارينا منو؟
اها ياجماعة وصلتو وين ؟
|
Post: #33
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-17-2010, 04:35 PM
Parent: #31
Quote: سيدي المكاشفي.....
جهاز قياس تحذق (الكارينا) الموجود برؤوسكم ما قاس (ولو بالالتقاط) مدي الوعي والفهم ولا قيمة ان تكون في متل سنها دي وتدير حوارات جادة زي البتديرهاوخاصة انها بتنتمي لجيل فتح عينو لقي البشير رئيسو وهيئة علماء السودان مفتي ديارو ؟؟
الشابة الصغيرة البتتهمها بانهابتستدرج النسوان بعيد عن (الجادة) وبتتهمها بانها بتقدم برنامج
ببث سموم الغرب هي (بت ) فاتت القدرهاوالفي دورها واهتمت بقضايا وبتناقش مواضيع بيعتبرها جيلها boring يا سيدي لعنة البلد دي وجود عقليات زي عقليتك دي افشلت كل محاولات العلم والمعرفة من رفع الوعي عند الشابات والشباب بتخويفهم باسم الدين والترهيب وادخال مصطلحات حادة زي التبرج والفاحشة و(الغرب) !!! وكل ما تظهر قامة طموحة يتم كسرها بهوس اقلامكم دي هي البتستحق الجهاد ضدها لانها بتفسد كل محاولات رفع الوعي (علي قلتها) . |
ريهان الشازلي
هل هذه دعوة منك للتبرج ؟؟؟
أم دعوة منك لمجتمع الطهر العفاف ؟؟
وما هي معايير العفاف عندك؟؟
|
Post: #34
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: المكاشفي الخضر الطاهر
Date: 05-17-2010, 04:38 PM
Parent: #33
| Quote: المكاشفي عجبك المحزق وملصق ولا شنو مصنقر في البرنامج دا ؟ |
صديقي الحميم ود العمدة
إلا اكان عجبك انت ...........
|
Post: #35
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: rani
Date: 05-17-2010, 08:34 PM
Parent: #34
مولانا المكاشفي
السلام وعليكم ورحمة الله تعال وبركاته
اتصدق اخي الكريم ان احدهم قام بالصاق هذه الصورة في احد البوستات..
لو تكرمت ارفدنا ببعض الفتاوي التي تحرم هذه الاعمال الشيطانية..
حتي يتعلم البعض عن ديننا الحنيف ولو القليل.
وفي ميزان حسناتكم
|
Post: #36
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: Nagi Ahmed
Date: 05-17-2010, 10:19 PM
Parent: #35
الصور عشان نحكم على كلامك دا
|
Post: #37
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: rani
Date: 05-27-2010, 11:06 AM
Parent: #35
انشاء الله المانع خير ياشيخنا
|
Post: #38
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: عمر التاج
Date: 05-27-2010, 11:54 AM
Parent: #37
سلام لصاحب البوست وضيوفه ...
إذا كانت الأوراق الشبابية من عينة صورتك دي يا راني
فلاغبار عليها... ماشاء الله عليها متحزمة ومتلزمة
وبركة الشافوها ناس شيخ تبارك عشان يختو المعيار لنفسهم
بدل ما يقدو المكاشفي بمعاييرهم العايزين يفرضوها عليهو ...
عليك الله ياراني شيل الصورة دي من البوست
بعد ماعيون ناس تبارك وحيدر شبعت شوف
والناس الزارت البوست وماشة تقابل ربها بي عيونها
الرضعت من شطور الصورة دي حقوا تخرم عيونها
قبال ماربنا يسألهم عن نعمة البصر ماذا فعلتم بها..
ونعمة العقل والدين ماذا حددتم بها من معايير للتبرج والمفاتن ..
|
Post: #39
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: شمائل النور
Date: 05-27-2010, 12:51 PM
Parent: #38
المكاشفي
سلام الله عليك يا رجل.
والله العظيم الكلام البتقول فيهو دا في ميلودي مالاقاني.
بالمناسبة كل قناة بتحكمها لوائح محددة واظن ان كل القنوات السودانية مبالغة عديل في مسألة الحشمة واحيانا ممكن تفرضها بالقوة كمان رايك شنو؟
ثم ان:
هو التبرج دا بالضبط تعريفه شنو ؟؟ ومفاتن المرأة دي ذاتها تكمن وين؟؟
وبطريقتك دا معناه كلمة إمراة ذاتها فتنة.
بعدين نظرية الاختزال دي شنو الايام دي ، فكأنما الدين إمرأة
ارحمونا، وأرحمو دينكم
راني:
الصورة أكثر من مستفزة
|
Post: #40
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: rani
Date: 05-27-2010, 04:49 PM
Parent: #39
شمائل النور
صورة بروفايلك دي ذاتها أكثر من مستفزة.
هو التبرج دا بالضبط تعريفه شنو ؟؟ ومفاتن المرأة دي ذاتها تكمن وين؟؟
|
Post: #41
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: الرفاعي عبدالعاطي حجر
Date: 05-27-2010, 05:53 PM
Parent: #40
اعمل حسابك ياحيدر الزين تقوم
تلحق ناس مؤتمر جدة وتتخيلني عبادة
..............................
بالله يا مكاشفي ممكن تجيب لينا صورة
البت المتبرجة دي عشان نشوف متبرجة
وفق المعايير ام لا ؟..
...................................حجر.
|
Post: #42
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: محمد النيل
Date: 05-27-2010, 06:53 PM
Parent: #41
Quote:
انشاء الله المانع خير ياشيخنا |
المشكلة يا رانى ليست فى معايير التبرج شنو
المشكلة تبقى فى معايير النفاق شنو؟
يعنى مثلا الصورة اللى نزلتها دى
الى اى مدى يمكن تتقبل ان تنزل بها امك او اختك او بنتك او اى واحدة تقرب ليك فى معرض عام امام الناس واعلام الصحف والمرئيات؟
اذا ماعندك مانع
يبقى المكاشفى ما ليهو حق فى تعليقه على الشروق ويعتبر شخص متخلف
لكن اذا كان عندك مانع انو قرايبك يظهروا بتلك الصورة تبقى تسكت ساكت وتسمع نصائح الكباشى.
ليه؟
لانو اللى بنرضاه لغيرنا وما بنرضاه لاخواتنا يبقى اسمه نفاق.
انا لم ارى البرنامج الذى يتحدث عنه المكاشفى لاحكم على مدى قياسه للتبرج الذى يقصده
لكن صورتك فاتت التبرج
|
Post: #43
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: هجو الأقرع
Date: 05-27-2010, 07:03 PM
Parent: #41
مولانا المكاشفي
السلام وعليكم ورحمة الله تعال وبركاته
اتصدق اخي الكريم ان احدهم قام بالصاق هذه الصورة في احد البوستات..
لو تكرمت ارفدنا ببعض الفتاوي التي تحرم هذه الاعمال الشيطانية..
حتي يتعلم البعض عن ديننا الحنيف ولو القليل.
وفي ميزان حسناتكم
الاخ الكريم رانى سلام من الله ورحمة ، بداية ارجو شاكرا سحب هذه الصوره المستفزه بحق و حقيقه ، بل و فيها جرأة على الله ورسوله ، اتفق او اختلف مع ود المكاشفى بعيدا عن ما نهى المولى عز وجل اخى كل من يرى ما انزلت و يتم يبحلق فيها يؤثم و انت لك مثله ، ماذا تقول لله لو قبض روحك وانت تعلق هذه الصوره فى هذا المكان العام وكمان معها سخريه . حقو لو فى انسان دعى الى فضيله تكونوا عونا له ، واذا صعب عليكم الامر ، و لم تقولوا خيرا فاحسن السكوت .
صدق المصطفى عليه افضل الصلاة و السلام حين قال((رُُب كلمة لا يُلقي لها بالاً تهوي به في النار سبعين خريفاً ) والمقصود بالحديث الاستخاف بالامور مما نهى عنه الله سبحانه و تعالى . اسحب الصورة مشكورا
|
Post: #44
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: هجو الأقرع
Date: 05-27-2010, 07:13 PM
Parent: #15
لخيت اسم الراجل يا حيدر الزين .... وخوّفتنا على بينيدكت بتاعنا من الحشر فى معية الحبشى الصعيب ... انا غايتو ... دنقلاوى وكان (حشرونى مع انجلينا جولى )... انشالله يحشرونا فى قزازة زاتو ... بعد داك خلى العرب يتفسّحوا ...
_____________________________
الاخ الكريم تبارك ، بحق صورة تبارك اسال الله ان تحشر مع سيد الخلق عليه افضل الصلاة و التسليم ، عليك الله راجع كلامك ده شويه.
|
Post: #45
Title: Re: التبرج وإظهار مفاتن المرأة في برنامج أوراق شبابية في قناة الشروق
Author: تبارك شيخ الدين جبريل
Date: 05-27-2010, 08:32 PM
Parent: #44
هجو الأقرع ..
| Quote: الاخ الكريم تبارك ، بحق صورة تبارك اسال الله ان تحشر مع سيد الخلق عليه افضل الصلاة و التسليم ، عليك الله راجع كلامك ده شويه. |
أشكرك على هذا الدعاء الطيب ... ولكن، هل تعلم أن من أتحدث عنها هى صاحبة صورة بروفايل الزميلة "شمايل النور"؟
والآن وقد علمت ... هل تلومنى؟
ثم دعنى اسألك: من أين أتيت بأن من ينظر الى صورة ملكة الجمال اللبنانية أو انجلينا جولى يؤثم؟
أو أن وجود الصورة فيه عدم احترام لبارئ هذا الجمال ... الخالق البديع؟
... بالله ائتنا مما آتاك الله من علم ...
.. المهم ...
|
|