Post: #1
Title: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 10:19 AM
عندما قرأت بداية عن (سوق المواسير) بالفاشر ظننت – وليس كل الظن إثم- أنه سوق (للحنفيات) وأن المسألة ليها علاقة (بالموية وكده) لكن سرعان ما تيقنت أنى زول (طيره ومبارى السيره) وكما يقول أولادنا (ما ناقش حاجة) ، فقد إتضح لى أن سوق المواسير ما هو إلا سوق للمرابين (ربا عديل كده) !
حيث يقوم فيه (العميل) بتسليم (أصحاب السوق) فلنقل (5 ألأف جنيه) ليتم تسليمه المبلغ مضاعفاً (10 ألف جنيه) بشيك آجل (بعد شهرين مثلاً) !!! وفى الغالب يرتد الشيك عند محاولة الصرف !! كما يتعامل السوق بشراء السلع التي تتراوح ما بين المنازل والسيارات والتلفزيونات والأجهزة والمعدات والأثاثات المنزلية ، حيث يقدم السوق للبائع أضعاف سعر السلعة شرط الدفع الآجل.
قلت فى نفسى لابد أن يكون هذا السوق سوقاً سرياً يعمل فى الخفاء فلا يمكن (لحكومة) تداهم المنازل الى يتم فيها لعب (الكونكان والحريق) أن تسمح بوجود هذا النوع من (القمار) !
لكن لدهشتى علمت أن هذا السوق يمارس عمله ونشاطه في العلن لعدة أشهر خلت تحت أعين وسمع السلطات الحكومية وقد توسعت أنشطتة وافتتحت له عشرات المكاتب الفرعية بالمدينة وكانت الحكاية ماشة عال العال لولا أن (رائحته النتنة) قد فاحت بعد أن تعثر أصحابه (وهم نفرين بس) في سداد الالتزامات المالية أثناء الصرف حلى حملتهما الإنتخابية (مرشحين وكده!) ، ومن ثم ساورت المتعاملين في السوق الشكوك حول مصير أموالهم إلا أن الطمأنينة أتتهم من (والي المسلمين بالولاية) الذي قام بتزكية مديري السوق بقوله أمام الأشهاد بأن (الناس المسؤولين من سوق الرحمة - وهو الاسم الحقيقي للسوق - هم من أبناء حزب (المؤتمر الوطني) الخلص الأتقياء، وأن السوق سيستمر بعد الانتخابات) كما أوضح فى حشد جماهيرى تعهده بإسترداد الأموال وإعطاء كل ذى حق حقه !
بالطبع كانت دهشتى عظيمة بالطبع ليس لأن (المرابيين) أبناء المؤتمر الوطنى فهذه لا تستوجب الدهشة مطلقاً , وليس لأنهما (فازا فى الإنتخابات) فهذه أيضاً لا تستوجب الدهشة ولكن إندهشت لنعت (الوالى) ووصفه لهما (بالتقى والورع) !!
هذه الدهشة التى سرعان ما زالت وحلت بدلاً عنها (دهشة أكبر) بعد أن أوضح نفس الوالى تبرؤه من الناس (الخلص الأتقياء) بعد أن إنتهت الإنتخابات ووصفه لهما بأنهما من المرابين وأنهما قاما بأكل أموال الناس ! مؤكداً حرمة تلك الأموال لأنها جاءت نتاجاً لثراء حرام ومشبوه موضحاً ان ممارسة هذا النوع من التجارة ربا وقام بالقبض عليهما ليودعا السجن وسط ذهول المواطنين (العملاء) الذين سلموا كل ما يمتلكون لهذين (المرابيين) وقعدوا على (الحديده) مما جعل المواطنون (حوالى 20 ألف مواطن) يخرجون فى مسيرة سلمية لتسليم مذكرة للوالى للمطالبة بحقوقهم التى بلغت عشرات المليارات إلا أن الشرطة والأمن تصدت للجماهير بإطلاق الرصاص فمات من مات وعاش من عاش بعد أن دخل الإنعاش !
ما يستفاد من الحكاية :
• ما كان يمارسه هذا السوق حلال وليس ربا لأنه كان يتم تحت بصر وموافقة الحكومة لمدة أحد عشر
شهراً .
• ما كان يمارسه هذا السوق حرام وربا لأن الحكومة أوقفته بعد 11 شهر وقبضت على الشخصين
وأودعتهما السجن .
• الشخصان مرشحان وقد فازا لأنهما خلص وأتقياء وأقوياء وأمناء.
• وعد الوالى المواطنين قبل الإنتخابات بإستمرار السوق ورد أموال المواطنين ، وفاز الوالى
لكنه قام (بعد الإنتخابات) بإغلاق السوق و(فك المواطنين عكس الهواء) !
• أى والى ممكن (يلحس كلامو) مفيش أى مشكله أيه يعنى لمن يكون قوى وأمين وكمان (لحاس) !
• أى مواطن قروشو الدفعا دى تانى لو شافا بى عينو يجى يقابلنى !
كسرة :
حرام لى حرام وبدل المواطن يخسر الملايين دى .. أحسن (توتو كورة) بدل (التوتو ماسورة) دى ، كووولها جنيه جنيهين (الزول) يملأ بيهم كم (عمود) .. يثبت هلال كادوقلى .. والمرغنية كسلا .. والأمل عطبره يلعبهم (راس) ويعوم الباقين وهو وحظو !!
|
Post: #2
Title: Re: ساخر سبيل : توتو ماسورة .... (لم ينشر)
Author: عمر الفاروق عبد الله الشيخ
Date: 05-05-2010, 10:28 AM
Parent: #1
اخ الفاتح تحياتي
ياخي السودان ده كله معوم بس ما عارفين اللاعبينه راس منو؟
|
Post: #4
Title: Re: ساخر سبيل : توتو ماسورة .... (لم ينشر)
Author: عبدالكريم أحمد الامين
Date: 05-05-2010, 11:00 AM
Parent: #2
| Quote: أحسن (توتو كورة) بدل (التوتو ماسورة) |
** البروف ابو ناجى..
** مساءك خير..
** نديك النجيضه :-(على قولة ود الصايم)
**أصلو الناس فهمت موضوع السوق غلط ,, وهو كان محاوله لإمتصاص السيوله الزائده عند الشعب الفضل لدعم الإقتصادى العالمى المُنهار ..
## وبعد ما الجماعه فازوا بالإستفتاء بتاع إبريل حيعملو ليكم نظام أحسن من توتو كوره وهو :-
### اليانصيب الاسلامى للشعب المُتسامى ###
** ودا نظامو السهم بعشره جنيه (10جنيه) واقل مُشاركه للمُضاربه والمُرابحه والمُشاطنه (10) أسهم ,, ورسوم إصدار السهم الواحد /7,77/ جنيه (سبعه جنيه وسبعه وسبعين قرشاً)
*(نظام تيمن بالرقم سبعه"7")
** والسحب كل (7) سبعه يوم ,, بس تاريخ بداية السحب ماتسأل منو ..
** وبعد كده بتدور البليه يالقيت قروشك كسحت ماليزيا أو دبى أو الصين .
## وبذلك يكون الشعب الفضل عرف معنى كلمة مأسوره ومواسير ,, وينتهى العزاء بإنتهاء مراسم الدفن.
(ودام الود بيننا)
(ابو محمد فؤاد) - الماكيكى..
|
Post: #9
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 12:48 PM
Parent: #4
عزيزى أبومحمد فؤاد
تحيااتى
على قولك هسه قروش الجماعة ديل كان قريبه تكون فى كوالا... لامبور !!
|
Post: #5
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 11:18 AM
Parent: #2
| Quote: ياخي السودان ده كله معوم بس ما عارفين اللاعبينه راس منو؟ |
والله يا عمر لو عارفين نقول ع طول .. !
|
Post: #3
Title: Re: ساخر سبيل : توتو ماسورة .... (لم ينشر)
Author: عادل سمير
Date: 05-05-2010, 11:00 AM
Parent: #1
| Quote: • أى مواطن قروشو الدفعا دى تانى لو شافا بى عينو يجى يقابلنى ! |
لاااااا حولاااااا
|
Post: #6
Title: Re: ساخر سبيل : توتو ماسورة .... (لم ينشر)
Author: شكرى سليمان ماطوس
Date: 05-05-2010, 11:29 AM
Parent: #3
كان من أهم الأدعية التى أتضرع فيها و بها و منها للخالق الجبار
"اللهم حسن الخاتمة"
لكن تتابع فنون و أحداث المؤتمر الوطنى تجعلنى أن أغير إستراتيجيتى مع خالقى
و سوف اتضرع من الآن بــ:
"اللهم ثبتنى على دينى و أحفظ لى عقلى "
إنتهت سيناريوهات الإنتخابات و ما زلنا مشدوهين من الصدمات فى:
البراعة
الحبكة
بيع الزمة
نقض العهود
خيانة الأمانة
سلطان الدنيا
و سلطان السلطة
و ما يحمله قطار المؤتمر الوطنى و زبانيته
(بالداخل/الخارج) (محلين /أجانب)
للإستفتاء تملؤه ما هو أعظم و أفظع و أمكر مما رايت عين و سمعت أذن و شاهدت عين
اللهم لا نسألك رد القضاء و لكننا نسألك اللطف فيه
--------
لك التحية الفاتح جبرا و لضيوفكم
ش
|
Post: #7
Title: Re: ساخر سبيل : توتو ماسورة .... (لم ينشر)
Author: nazar hussien
Date: 05-05-2010, 12:37 PM
Parent: #6
لا احسن ينشر يا ابوناجي...
تكتبو علي بياض وعايزو ينشر؟؟؟
|
Post: #15
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 01:04 PM
Parent: #7
الحبيب نزار
سلاااام
والله أنا ما شايف فيهو حاجه .. والموضوع واااااضح وظااااهر وما داسينو!!
|
Post: #8
Title: Re: ساخر سبيل : توتو ماسورة .... (لم ينشر)
Author: عمر التاج
Date: 05-05-2010, 12:40 PM
Parent: #6
تحياتي صاحب السبيل الساخر .. الفاتح جبرا
Quote: كسرة :
حرام لى حرام وبدل المواطن يخسر الملايين دى .. أحسن (توتو كورة) بدل (التوتو ماسورة) دى ، كووولها جنيه جنيهين (الزول) يملأ بيهم كم (عمود) .. يثبت هلال كادوقلى .. والمرغنية كسلا .. والأمل عطبره يلعبهم (راس) ويعوم الباقين وهو وحظو !!
|
عصيدة ..
حرام لي حرام ... وبدل ما الوالي يسجن (جماعتوا) ويفك المواطنين عكس الهواء ...
أكان أخير ليه يفك (الجماعة ) للمواطنين عشان (يعوسوا) عواستهم لحدي ما يسددوا
ديونهم الفوق ضهرهم ديك ، وبعدين يدخلهم ان شاء الله (ماسورة ) ..
ويادار الوالي ما دخلك شر ...
|
Post: #12
Title: Re: ساخر سبيل : توتو ماسورة .... (لم ينشر)
Author: Dr.Saeed Zakarya Saeed
Date: 05-05-2010, 12:56 PM
Parent: #8
الاستاذ الصحفي الساخر جبرة....| Quote: عندما قرأت بداية عن (سوق المواسير) بالفاشر ظننت – وليس كل الظن إثم- أنه سوق (للحنفيات) وأن المسألة ليها علاقة (بالموية وكده)..... |
عندي شك كبير أن بينهما علاقة ....ها ها.....
|
Post: #18
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 01:10 PM
Parent: #12
عزيزى دكتور زكريا
تحياتى
أنا فى الأول كنتا قايل مافى علاقه لكن هسه وقعت ليا ... ها ها ها !
|
Post: #16
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 01:07 PM
Parent: #8
عزيزى الرجل المهذب عمر التاج
والل كلامك فى محلو .. أصلو وكت المسعلة باظت يخلو (الحريق) مدور !!
|
Post: #13
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 12:57 PM
Parent: #6
عزيزى شكرى ..
التحايا والود
لكن هى جنس فنون .. حاجه والله تحير الما بيتحير .. هسه جنس ده فى زول سمع بيهو؟ الناس العملو السوق ده لو ما كانو فى الحزب الحاكم والله أنا شخصياً ما عندى معاهم أى شغلة وممكن نقول ديل مواطنين نصابين .. لكن يكونو فازو فى الإنتخابات وح يدخلو المجلس التشريعى ؟ عشان يشرعرعوا لينا شنو؟ والله مفيش مسخرة أكتر من كده !!
|
Post: #10
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 12:50 PM
Parent: #3
لااااا حولاااا
لكن يا مولانا (عادل) يجيبوها ليهم من وين دى هسه لو قريبه تكون فى حتت ما قال أخونا أبوفؤاد !!
|
Post: #11
Title: Re: ساخر سبيل : توتو ماسورة .... (لم ينشر)
Author: محمد عبد الماجد الصايم
Date: 05-05-2010, 12:54 PM
Parent: #10
لكن يا عمكـ .. الماسورة زاتا نفتشا بالتوتو!
|
Post: #14
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 01:01 PM
Parent: #11
أمانة فى ذمتك دى يا ودالصائم ما أخير توتو كورة .. أقل حاجه الواحد عندو إحتمال إن شاء الله واحد فى الدشليون يكسب ؟ مع جماعت المواسير ديل ما بتطلع بى حاجه لو ناجيت !!
|
Post: #17
Title: Re: ساخر سبيل : توتو ماسورة .... (لم ينشر)
Author: فتحي الصديق
Date: 05-05-2010, 01:08 PM
Parent: #14
| Quote: االناس المسؤولين من سوق الرحمة - وهو الاسم الحقيقي للسوق - هم من أبناء حزب (المؤتمر الوطني) الخلص الأتقياء، وأن السوق سيستمر بعد الانتخابات) |
لعنة الله عليهم جميعا
|
Post: #19
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 01:14 PM
Parent: #17
أخونا فتحى الصديق
إتخيل إنو الوالى كلامو ده كوووولو لحسو .. وقال ده مال حرام والقصة دى ربا !! (بعد ما فاز طبعننن)!
إستدراك :
سقطت كلمة المنتخب التى تسبق الوالى هذه الأيام !!
|
Post: #20
Title: Re: ساخر سبيل : توتو ماسورة .... (لم ينشر)
Author: nazar hussien
Date: 05-05-2010, 01:19 PM
Parent: #17
| Quote: والله أنا ما شايف فيهو حاجه .. والموضوع واااااضح وظااااهر وما داسينو!! |
الوالي زاتو كان شايف سوق الرحمة ما فيه حاجة...
حتي اصر الناس علي تسميته سوق المواسير...
وماسورة فوق ماسورة...وشيك علي بياض...
وبيت بي حصانين وشيك...
والوالي يتفرج...
هسي الفرجة فيها حاجة؟؟؟
|
Post: #23
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 06:20 PM
Parent: #20
Quote: الوالي زاتو كان شايف سوق الرحمة ما فيه حاجة...
حتي اصر الناس علي تسميته سوق المواسير...
وماسورة فوق ماسورة...وشيك علي بياض...
وبيت بي حصانين وشيك...
والوالي يتفرج... |
شايف شنو يا نزار؟ قالو ليكا المعاملات كانت قاعدة تتم فى أقسام البوليس .. يعنى البوليس خلى شغلو ومكاتبو حولوها الجماعة لى صرافات وبيع وشراء وده عشان المواطن طبعن يطمئن وكده .. ده غير إنو الزول بتاع السوق ده إتبرع للدورة المدرسية بى كم مليار وكم عربية هايلوكس .. ياخى خليك من كده : قالوا إمام الجامع ذاااتو وهو نقيب شرطه (إتخيل.. يعنى دين وقانون) قال ليهم فى واحده من خطبو إنو الموضوع حلاااال وما فيهو حاجه !!
كسرة :
أجمل حاجه إنوالوالى سألوهو بعد القضية ما هاصت قالو ليهو (الحكومة ليه كانت عارفه وما إتدخلت؟)
إتخيل ردوا كان شنو ؟ : قال ليهم ديل مواطنين مع بعض وإتراضو على كده !! يعنى يا نزار كل خمسة ممكن يشيلو ليهم (جوز كشاتين) ويمشو يلعبو قمار قدام حديقة (القصر) ... مش متراضين؟
|
Post: #21
Title: Re: ساخر سبيل : توتو ماسورة .... (لم ينشر)
Author: Abd-Elrhman sorkati
Date: 05-05-2010, 01:20 PM
Parent: #17
عزيزي أبو ناجي
والله باين نحن الطلعنا ماسير في أكبر خور في العالم
علي الطلاق نحن لو ما مواسير ذاتنا ما كنا خلينا التاس ديل قاعدين لغاية هسة
كسرة :
بنفكر أنا ومجموعة من الاصدقاء نعمل لينا ماسورة ضخمة جدا وندخل بيها السودان موسوعة جنيس
يعني ماسورة كدة يكون قطرها خمسة كيلو متر وما فوق
|
Post: #22
Title: Re: ساخر سبيل : توتو ماسورة .... (لم ينشر)
Author: الفاضل يسن عثمان
Date: 05-05-2010, 05:37 PM
Parent: #21
استاذنا الفاتح جبرا:
اللورد اشكروفت،زول كسيب،عنده بيزنيس داخل وخارج مملكة اليزابيث
تم اكتشاف بانه زائغ من ناس الضرائب،تبجح وذكر،بان هنالك بعض
الاموال كسبها خارج حدودالمملكة،ولا يحق ان يدفع عليها ضرائب.
تم تجريده من القابه،واخذت ضرائب وغرامات علي امواله
وذكروا له جماعتك،بالذهاب العيش محل،اكتسابه للاموال
وصار في ركن قصي ويعض اصابعه ندما.
|
Post: #25
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 06:26 PM
Parent: #22
Quote: اللورد اشكروفت،زول كسيب،عنده بيزنيس داخل وخارج مملكة اليزابيث
تم اكتشاف بانه زائغ من ناس الضرائب،تبجح وذكر،بان هنالك بعض
الاموال كسبها خارج حدودالمملكة،ولا يحق ان يدفع عليها ضرائب.
تم تجريده من القابه،واخذت ضرائب وغرامات علي امواله
وذكروا له جماعتك،بالذهاب العيش محل،اكتسابه للاموال
وصار في ركن قصي ويعض اصابعه ندما. |
يعنى يا الفاضل ما أدوهو (إستراحة محارب) وبعدين رقوهو !!
|
Post: #24
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 06:23 PM
Parent: #21
| Quote: علي الطلاق نحن لو ما مواسير ذاتنا ما كنا خلينا التاس ديل قاعدين لغاية هسة |
إذيك يا سوركتى وإذاى الأولاد؟
والله لو ما مواسير جنس البحصل ده ما كان بيكون موجود .. والله ده فى (أفلام الخيال الربوى) مافى !!
|
Post: #26
Title: Re: ساخر سبيل : توتو ماسورة .... (لم ينشر)
Author: أحمد الشايقي
Date: 05-05-2010, 06:36 PM
Parent: #24
والله يا الفاتح أخوي
الجماعة ديـل يمحّنوا الـ ما بتمحّـن
أحمد الشايقي
|
Post: #27
Title: Re: ساخر سبيل : توتو ماسورة .... (لم ينشر)
Author: احمد محمد احمد عتيق
Date: 05-05-2010, 06:51 PM
Parent: #26
عارف لقايت قريب ...كنت متخيل كلمة ماسورة دي جابوها ناس الكورة ..
ولكن اظنو خوازيق البلد زادت مواسير ....
كدي كلمو والي المريخ ...
|
Post: #29
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 06:57 PM
Parent: #27
| Quote: عارف لقايت قريب ...كنت متخيل كلمة ماسورة دي جابوها ناس الكورة .. |
أنا ذاااتى كنا زيك يا عتيق !
|
Post: #28
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-05-2010, 06:56 PM
Parent: #26
Quote: والله يا الفاتح أخوي
الجماعة ديـل يمحّنوا الـ ما بتمحّـن |
والله صدقتا يا الشايقى ياخوى !
|
Post: #30
Title: Re: ساخر سبيل : توتو ماسورة .... (لم ينشر)
Author: nazar hussien
Date: 05-06-2010, 07:09 AM
Parent: #28
Quote: أجمل حاجه إنوالوالى سألوهو بعد القضية ما هاصت قالو ليهو (الحكومة ليه كانت عارفه وما إتدخلت؟)
إتخيل ردوا كان شنو ؟ : قال ليهم ديل مواطنين مع بعض وإتراضو على كده !! يعنى يا نزار كل خمسة ممكن يشيلو ليهم (جوز كشاتين) ويمشو يلعبو قمار قدام حديقة (القصر) ... مش متراضين؟ |
ومافي زول قال ليه (أحّا) بتاعة المصريين ديك؟؟؟
|
Post: #31
Title: Re: ساخر سبيل : توتو ماسورة .... (لم ينشر)
Author: ندى عثمان حسن
Date: 05-06-2010, 07:24 AM
Parent: #30
Quote: ما يستفاد من الحكاية :
• ما كان يمارسه هذا السوق حلال وليس ربا لأنه كان يتم تحت بصر وموافقة الحكومة لمدة أحد عشر
شهراً .
• ما كان يمارسه هذا السوق حرام وربا لأن الحكومة أوقفته بعد 11 شهر وقبضت على الشخصين
وأودعتهما السجن .
• الشخصان مرشحان وقد فازا لأنهما خلص وأتقياء وأقوياء وأمناء.
• وعد الوالى المواطنين قبل الإنتخابات بإستمرار السوق ورد أموال المواطنين ، وفاز الوالى
لكنه قام (بعد الإنتخابات) بإغلاق السوق و(فك المواطنين عكس الهواء) !
• أى والى ممكن (يلحس كلامو) مفيش أى مشكله أيه يعنى لمن يكون قوى وأمين وكمان (لحاس) !
• أى مواطن قروشو الدفعا دى تانى لو شافا بى عينو يجى يقابلنى ! |
اها وذنب الحكومة شنو ياخ, اذا نحن ناس مخنا كعب وفهمنا متأخر؟
خالص الود والتقدير استاذ الفاتح.
|
Post: #32
Title: Re: ساخر سبيل : توتو ماسورة .... (لم ينشر)
Author: osama fadlalla
Date: 05-06-2010, 11:45 AM
Parent: #31
خالص التحايا والتقدير استاذ الفاتح
والله السمعناه من وزير العدل اكثر من القلتو انت بكثير.....لكن انت الموديك تتكلم عن الربا والحلال والحرام شنو !!!!
حسع ضيعت على الوليدات التحلية ساكت..!
تسلم ايدك
|
Post: #33
Title: Re: ساخر سبيل : توتو ماسورة .... (لم ينشر)
Author: عمران حسن صالح
Date: 05-07-2010, 11:26 AM
Parent: #32
أستاذ الفاتح
الله يفش غبينتكـ
وغبينتنا
وغبينة كلتوم ست الشاي جارتنا
وغبينة أم مريم البتبيع الويكة في زقاقات حي الهجرة شمبات
وغبينة ود عثمان الخير الشغال في بقالة وسط حي فقير بمدينة الرياض بالمملكة وبيصرف ألف ريال وساكن بي خمسمائة ريال في الشهر
وغبينة تاج السر المعوق وبيغسل سيارات في أم بده ...
وياااااااااااااااااااااارب
فرجكـ وغضبكـ
|
Post: #34
Title: Re: ساخر سبيل : توتو ماسورة .... (لم ينشر)
Author: عبدالكريم أحمد الامين
Date: 05-07-2010, 12:52 PM
Parent: #33
Quote: عزيزى أبومحمد فؤاد
تحيااتى
على قولك هسه قروش الجماعة ديل كان قريبه تكون فى كوالا... لامبور !! |
** البروف ابو ناجى..
** جُمعتك مُباركه..
## قال ليك رهط من الجماعه اللحسو الشعب الفضل فى سوق المواسير بمُباركة الوالى الهُمام ,, ضربو الطشه ووصلو بالسلامه آمنيين بالتاشاتير (بعد أن تم فتلها للون الاخضر ابو صلعه) الى يوغندا وتركيا.
** والوالى الحمد لله إشترى ليهو بيت برياض الخرطوم والاٌسره إستقرت فيهو ,, ومابعيد بعد يومين تلاته تلقى ولدو بيضرع بالهمر فى شوارع الرياض..
** هى لله ....هى لله .... لا للسلطه ولا للجاه ....
** ودقى يامزيكا .... وهاك ياعــــــــــــرضــــــــــــه.. السبابه فوق والعصايات فوق وسودانا تحت.
(ودام الود بيننا)
(ابو محمد فؤاد)
|
Post: #35
Title: Re: ساخر سبيل : توتو ماسورة .... (لم ينشر)
Author: عبدالكريم أحمد الامين
Date: 05-07-2010, 01:11 PM
Parent: #34
** كيفية التعامل فى سوق المواسير:-
## لو عندك عربيه كورولا .. سعرها السوقى :- 20 مليون .. يشتروها منك بـ 40 مليون ويدوك 10 مليون كاش و30 مليون بشيك مؤجل لمدة 45 يوم..
** يبيعو ليك عربيتك ذاتا بـ 10 مليون كاش ,, وشيكك ابو 30 مليون فى يدك ..
** الناس الاوائل الحصلو الكيته دى ضربو التربيزه وأخدو كل العشرات تتو وكبوا الزوغه وكسرو بنكهم وإتخارجو ,, الناس الجات بعد كده سفت التُراب وحقهم ماقدرو يطلعو بيهو من تربيزة القمار دى ..
** وعلى ذلك مُمكن تقيس كافة المعاملات فى مجال البيوت والسيارات والبضائع..
** والله السوق دا لوترى عديل فاتنا وفات الامريكان واليهود كان إغتربوا فى الفاشر..
## غايتو قُــمــار زى دا :- فى لاس فيجاس ,, وبادن بادن ماسمعنا بيهو..
** وعاش الوالى وعاش توجهنا اللاحضارى ,, وكل مأسوره والمواسير بخير..
## ياناس السودان هذا ماسمعناه بالله نورونا وصححو المعلومه لو كان هنالك خطأ..
(وكل تربيزه جديده للمقامره وأنتم بخير)
(ابو محمد فؤاد)
|
Post: #36
Title: Re: ساخر سبيل : توتو ماسورة .... (لم ينشر)
Author: محمد علي شقدي
Date: 05-07-2010, 01:40 PM
Parent: #1
لأن (المرابيين) أبناء المؤتمر الوطنى فهذه لا تستوجب الدهشة مطلقاً
قايطونا بالدهشه مقابل شيكات ذهبيه من الاحباط فوريه السداد
استاذ الفاتح لنا الله ولك التحيه
|
Post: #37
Title: Re: ساخر سبيل : توتو ماسورة .... (لم ينشر)
Author: د.السيد قنات
Date: 05-07-2010, 02:01 PM
Parent: #36
سلامات أستاذ الفاتح جبرا
واحد من الجماعة الكبارات
إشتري همر ودفع كاش 40 مليون
والباقي شيك آجل،
ولسه صاحب الهمر في الفاشر
الماسورة طرشقت
المسعول خاف من التحقيق ،
طوالي رجّع العربية الهمر لي صاحبا
وقال عاوز ال40 مليون عشان يسلم ورق العربية
أها دا يسووا ليهو شنو؟؟
ال40 مليون طارت من صاحبنا وصرفا في الفاشر،
وإستلم عربيتو ،
ولكن ورق العربية عند المسعول الكبير،
وجهة نظر من فضلكم
يديكم دوام الصحة والعافية
|
Post: #38
Title: Re: ساخر سبيل : توتو ماسورة .... (لم ينشر)
Author: الفاتح يوسف جبرا
Date: 05-07-2010, 07:31 PM
Parent: #37
الإخوة المتداخلون ... معليش الصحة ما تمام وكده .. لو الصحة تمام كان رديت ليكم واحد واحد .. والله الواحد ما عارف يقول شنو؟ ده شئ قمئ جداً .. حاجه تعمل للزول طمام مزمن .. أليس فى هؤلاء القوم رجل رشيد ؟؟؟؟؟؟؟؟؟؟؟؟؟؟؟؟؟
|
Post: #39
Title: Re: ساخر سبيل : توتو ماسورة .... (لم ينشر)
Author: عبدالعزيز الفاضلابى
Date: 05-07-2010, 08:46 PM
Parent: #38
يعنى يا استاذ الفاتح ابو ينشروه بيهناك جيت فكيتو ليهن هنا
غايتو شيل شيلتك ,,
نحن كان عارفنك حريف كده كان بعتناك مع فريق الأمل عشان تفك لينا الحصار
الضربوه الجزائريون على الطاهر حماد.
الجماعة اللى اكلوا قروشن ديل لو السوق ده رجع حايسموه سوق البواسير.
|
Post: #40
Title: Re: ساخر سبيل : توتو ماسورة .... (لم ينشر)
Author: طارق ميرغني
Date: 05-07-2010, 10:00 PM
Parent: #39
استاذنا الفاتح
دوما نشتاق الي كتاباتك فلا تنقطع
لكن ما حدثتنا عن دعوة الرئيس للذهاب والاستثمار في سوق المواسير
هل كانت دعوة صادقة ولم يكن يعلم
ام كانت دعوة رسمية من المؤتمر الوطني لدعم السوق
|
Post: #41
Title: Re: ساخر سبيل : توتو ماسورة .... (لم ينشر)
Author: عبدالكريم الامين احمد
Date: 05-08-2010, 04:51 PM
Parent: #40
فوووق
من اجل المتعة والدهشة في عمايل المواسير
وتحياتي
|
|