رد ادروب للاخ معاويه المدير في قصيدته خجيتو ليها ..!

إلي الأخ معاوية المدير والي كل الحادبين علي الوطن والحرية ..
هذا ماجاشت به قريحة ادروب في ما فعله..
وهو الشر الذي كان لابد منه..
أو مايسمي بالانحناء للعاصفة..
في وطن أصبح فيه الإنسان يباع ويشتري..

تسألني بس خجيتو ليه ؟
ما دار بفكرك غير كده
تسأل منو
تسألني أنا
أسأل هناك ناس فوق
من (عمر) لي و(د حمد)
ناساً سمان ومنفخين نهبونا من كم سنه
خلونا نحن مرمدين

يقول ليك بس خجيتو ليه?!
خجيتو شان نحن الحيارة
مقطعين
مابين عطاله وذلتين
ماسمعت يوم بالهندسه
ماقالو فيها مثلثات
اقعد تعال نديك حصص
جهل
ومرض
وافتقار
هذا المثلث من زمان
ما فاتنا يوم
باقي لينا اي
غير الموات
..
لسع تقول خجيتو ليه؟
خجيتو شان جونا السمان
قالونا: هوي
اما الفقر والعكننه
او تقولو كمان انا
أملأ الصناديق حقنا
لو ما كده
ما فيش وظائف عندنا
لا رواتب لاهنا
لاحتي موية الزير هنا
تمشي وتغادر حينا
كداري بالشارع البعيد
صحراء . رمال. ما يهمنا
والموت عليك محتوم عديل
مين قال كده
ديل السمان ومنفخين
بل حتي حاربنا الامين

لسع تقول خجيتو ليه ؟
ما كان قصدي اخجو خج
والله بس لولا المحن
قالونا بس بالدين عديل
الشغله كلها فرض عين
أي ياتو دين؟!
ما نحن ديل حالفين يمين
والله نحن موظفين ...
ايوه انتو موظفين
والدوله كلها لمنو
مانحن ديل حاكمين سنين
....
أدوك كم ؟؟
قلت لي كم ؟؟
مين يدي مين
ديل هم حرامية السنين
سرقونا من عشرين سنه
يدونا شنو
غير الكضب والعكننه
عفت يدينا والسنا
إطرانه ايه نعمل كده
غير الجبر والموت عديل
اصل الحكاية مجننه
قالو الفقيه من عهد هود
الموت هناك لو جاك عديل
(تأكل الفطيسه وتلعنا)
نحن الحكاية الفينا جد
أكل الفطيسه الهينه
والجاي اكثر من كده
....
امشي النيابة
وكلمهم
افتح بلاغ في كل مكان
كل الصحف
والامكنه
وانا بمشي اشهد ليك نهار
انو الحكاية مزورة
جبرونا بس نعمل كده
مين ؟!
كلهم
ناسا سمان ومنفخين..
يادرة الوطن الحزين
العهد بيكم اجمعين
قولتنا حق
لو جاء المبين
ونقولها بالصوت المبين
مين الكانو مزورين
مين اللي قال نعمل كده ؟
غير الحكام المكنكشين
اللي يرقصو مع الشيطان اللعين

فاكرنا نحن مغفلين
ونجدد العهد الدفين
انو الوطن فوق الجبين
ياخائنين يامجرمين ؟

...

خجيتو خج ..
خجيتو بي ايديا ديل
شاهد ملك
احلف يمين
لما العداله تكون يمين
وانا مابراي
عندك هناك
هيا الشمال
لانقيب شرق
كترة خلوق وموظفين
إقطع قطع
ختم ختم
اشخت شجر
واحد فوق راسهم وقف
يقول: اقطع كتير
و(أيلا) يازول منزنق
ماتشيلو هم
نفس الكلام نفس النضم
قالونا دين
لامويه لا كلأ يبين
ياتو دين
يامجرمين ..
...
واحد يطنطن بتحت
ياجبهجية الشوم
يا وجع السنين
تخلونا نحن مزورين
لكنو بس قدر السماء
والوقت والزمن الخطأ
ولمان يحين وقت الصواب
ويذهب الزبد الهباب
تلقانا فوق كل الهضاب
نصدح بصوت الحق عديل
هم الكانو مزورين
هم الكانو مزورين



اخوك ابو محمد
بورتسودان





..............


تم التعديل لتصحيح بعض الاخطاء الاملائية.

وهذه رسالة الاخ معاوية ود المدير لادروب التي تم الرد عليها عبر الرسالة اعلاه:


..............



رسالة إلى ادروب...

قول ليّ يا ادروب
عليك وجع السنين...
خجيتو ليه؟؟؟
خليهو يا ادروب
عشان ناساً غلآبة وكادحين...
خليهو يا ادروب
عشان ناساً بتحلم من سنين
بوطن صحيح من غير جراح
من غير ألم، من غير انين
خاجيهو ليه؟؟؟
خليهو يا ادروب
عشان شجر الأراك
يفرح يعانق ديم عرب
وترب هدل
ووطن السمآح ينسى الجرآح
ينسى الحصل...
قول ليّ بس...
خاجيهو ليّه؟؟؟
وادوّك كم؟؟؟
مبلغ بِسد رمق الصغار؟
والآ الفتات،
من بعد ما نهبوا الديار؟؟؟
خلوها خاوية على عُروشا
كما الصريم وضح النهآر
لا راعو لطفلاً
بيصرخ في الظلآم...
لا احترمو شيخنا بعد وقآر...
بمدخل الدين...
جونا داخلين التتآر...
خجوها خج...
خج السوآد...
خج الرمآد...
ما خلو شِي
ناس لابتحس، لاتختشي...
ما بين مُرآبي ومُرتشي...
وسفآك دماء نام مُنتشي
من بعد ما لعق الدماء
من بعد ما انتهك الحِمى...
جوغة ضِبآع،
وقطيع سباع متوحشة...
اسرآب نسور
تغتات على جُثث الصغآر...
خجوها خج وضح النهار...
قول ليَّ بس...
خجيتو ليه؟؟؟
وشِن دار تجيب
لي ها الوطن!!!
غير المِحن
غير التخلف والفتن...
غير الشتات
غير العذآب...
غير الكلآب
تنبح تهوهِو ليل نهار
شيخها العجوز دقولو طآر
ينقُز يهِز...
ما راعى في نفسو الوقار
ينفخ نفخ!!!
زي الورر
عامل جعيص...
عامل خطر!!!
قول ليَّ بس...
شِن دار تجيب لى ها الوطن؟؟؟
غير الضياع
غير الفِتن؟؟؟
غير ناس بتعترف النفآق...
عشرين سنة!!!
من الضياع، من العناء
من الألم والعكننة
من الوجع ومُر الضنى...
وبرضك تخُج!!!
يا زول اقيّف...
خلي الوطن
ينجمَّ من رهق السنين...
خلي الغلآبة الكادحين
يرتاحو من طول الأنين
يتنسمو الحُريّة
في الزمن الضنين...
إنصرفو، لا صفى، لا انتِبآه...
يا عُصبة الحُكم اللعيّن...
يا ظآلمين...
يا غادرين...
إلى الجحيّم...
إلى الجحيّم...
إلى الجحيّم...
إلى الجحيّمــــــــ...


معاوية المدير...

تحياتنا اخ حامد عبد الله وتحياتنا لكل اهل الشرق وسيأـي يوم نحاسب هؤلاء الدجالين المزوراتية

نعم سوف ياتي يوم يخجون فيهو خجا ويساقون الى جهنم


دولة الظلم الى زوال

التحية لادروب الشريف ولكل اهلنا بالشرق

ويكفيهم شرف انهم هم الوحيدون الذين اثبتو عمليا بطلان هذه الانتخابات دون سائر اهل السودان

Quote: اخوك ابو محمد بورتسودان

اخوي معاوية ود المدير
سلامات..

اشكرك علي مساهمتك..
في قدح زناد ادروب..
وإثارة قريحته..

...

ود العمدة
سلام وتحايا..
شكراً للاضافة وحقاً ان دولة الباطل ساعة.. ودولة الحق الي قيام الساعة..!
..
كما اشكرك علي اشادتك بادروب..
وعلي ايضاحك بان اهل الشرق يكادوا الوحيدين اللي كشفوا عورة اهل المؤتمر الوطني علي الملاء..
فهم قدروا علي الاقل يثبتوا بالدليل المادي زيف بضاعة تجار الحكومة وعفنها..
في حين انه في ناس تانين في اماكن اخري بالسودان مارسوا التزوير بصورة ابشع مما شاهدناه لكن سكتوا عليه.. والسكوت -كما تعلم- رضا..!
وهذا ربما ما لم ينتبه اليه بعض الناس لذا كانت قراءتهم لصورة ادروب -التي خرجت في اليوتوب- سالبة وقاتمة جداً..!

...

الاخ وليد شريف
بعد التحية والتقدير..
اشكرك علي المرور..
وبلا شك سياتي يوم الحساب عاجلاً كان ام اجل..
فان دوام الحال من المحال..
والتاريخ سوف لا يرحم هولاء..

الفاضل حامد عبد الله
بركه الشفناك طيب

وشكرا للمبدع ابو محمدوشكرا للمبدع معاويه المدير.






وربنا يكفينا شر الخجاجين.


كيف انتو مع البرد جليدك ذاب ام لسه؟؟؟
اخوك معاويه المدير ده من جنبكم بهناك في البرتا.
ويا معاويه اخوك حامد ده قاعد في خشم المحيط المتجمد الشمالي.

تراجي بت عمي

دبايوا واكوبام..

مشتاقين والله..
وان شاء الله انتي واولادك بخير..
...
اشكرك علي مرورك وكنت متاءكد انك ستشارك في البوست لانه البيت بيتك..
وربنا يكفي اهلك شر الخجاجين والدجالين..
...
معاوية المدير بعرفه كويس واول مرة التقينا في كالجري قبل ثلاثة سنين..
ولي حسه جلساتنا وقعداتنا الحلوة في مقاهي كالجري عالقة في ذاكرتي..
فهو اخ حبوب وود بلد وما بعيد من الادروبات كمان...
....
لسه عندنا التلج ماذاب..
متوقع يذوب لحد نهاية الشهر ده..

أهدي هذا النص لجميع أهلنا داخل الوطن الحبيب،
وخارج إطاره في مناكب الدنيا.
إهداء إلي كلٍ من عطر هذه المساحة بالمرور
أو المشاركة.
إهداء خاص لأخي أبو محمد...


قـطـعـة أرض...


وطناً متمسح في فِجاج الدنيا
مليون ميل مُربع طول عرض..
وهموم أهلنا
الفيهو يكدحوا ليل نهار
قطعة أرض!
يا أهلنا يا إبل الرحيل..
شايلة السُقى وعطشانة
ما بتقدر تعاند وتعترض..
مدخور عشمكن
إنو في حال السفر..
تتيمموا ترابو الطهور
وتصلوا تدوهو الفرض..
وما بتعدموا الشبر البيستركن
أكان حكم القدر وواحد قِرِض..
وإن شاء الله
ما يبيعوهوا يوم..
شان ما صقور الجو
تنقرنا وتفوت..
وتصبح بطونها قبورنا
وكتين يكملن أيامنا
والأرواح تموت..
يا أهلنا، يا القاعدين
تحت ضل العمارات
والبيوت..
مبنية بطينة الحرام..
وأساسها أوهن
من بيوت العنكبوت..
إنجمعوا قوموا
نشد زواملنا ونفوت..
نرحل نفوت،
ناساً بياكلوا لحوم
بنى الإنسان،
وحاديهم ظلوم..
نرحل نهار
والفأل سحابة تظلنا
تبارينا فوقنا دوام تحوم..
باليل يداعبنا النسيم
تسهر تأنسنا النجوم
يا أهلنا يلاكم نقوم..
نمشي الشمال..
نسكن في رملات الجروف..
الناس هناك عُدال حُنان
وهم السكن ما منو خوف..
نسكن في أعشاش الطيور..
تفرح تغنيلنا الصباح
ما الطير هناك ولوف عطوف..
والناس نفوسها الطاهرة
تخدع إستحالات الظروف..
يا أهلنا يلاكم نقوم..
نمشي الجنوب..
في غابة الأبنوس
بنسكن دون إيجار..
وسُبُل المودّة البينا
بين ملوال وجون
مفتوحة ما بتقبل حِصار..
المنقة والباباي، وحبات المطر،
وزاهى الخدار..
نفرح معاها،
معانا تفرح تذدهر..
ويعم ربوعنا الإذدهار..
يا أهلنا يلاكم نقوم..
نمشي الغرب..
نرقص مع عروس الرمال
نفرح نعانق كردفان..
الناس هناك زي التبلدي..
جواهم الخير والأمان..
نسكن تحت ضل الدليب
ما بالضرورة شقق وبيت..
وحتى السُحُب لو أمطرت
ما تخافوا، بتمطر حنان..
يا أهلنا يلاكم نقوم..
نمشي الشرق..
نسكن مع أدروب خيم
منصوبة في وسط الأراك..
(دبايوا).. كسلا الحلوة..
يا القاش جينا
واقعين في حواك..
ننضم أغاني الشوق اليك
بين الخدار ننساب معاك..
ننجمة من حر الهجير
توتيل نقيل في ضراك..
يا أهلنا يلاكم نقوم..
نسكن بوادينا الحُنان..
في القرية ننعم بالأمان..
الناس هناك عُدال حُنان..
ونفوسهن، إن ضاقت أرض،
تسع اللضاق بيهو المكان..
يا أهلنا يلاكم نقوم
الناس هناك عُدال حُنان...




معاوية المدير...

Quote: اخوك معاويه المدير ده من جنبكم بهناك في البرتا. ويا معاويه اخوك حامد ده قاعد في خشم المحيط المتجمد الشمالي.

أصيّلة وبنت أٌصُوّل،
لك الشكر الجزيل اختي تراجي، وانت تسعى للمقاربة
بين الناس وهذا ما يدل علي حُسن نوايآك وطيّب معدنك.
اعرف الأخ حامد منذ زمن بعيد كما اوضح لك، وسكنت
القطب المتجمد الشمالي قبله، حيث انني من الرعيل الأوّل
الذي ذهب الي تلك المناطق 1993. الآن اسكن في red deer
بمحافظة البرتا، مدينة صغيرة تقع في الوسط بين إدمنتون
وكالقري. يا ريت تجي تزورينا...

شكرا يا حامد

وان شاء الله الاسره كلها بخير.

Quote: تراجي بت عمي دبايوا واكوبام.. مشتاقين والله.. وان شاء الله انتي واولادك بخير.. ... اشكرك علي مرورك وكنت متاءكد انك ستشارك في البوست لانه البيت بيتك.. وربنا يكفي اهلك شر الخجاجين والدجالين.. ... معاوية المدير بعرفه كويس واول مرة التقينا في كالجري قبل ثلاثة سنين.. ولي حسه جلساتنا وقعداتنا الحلوة في مقاهي كالجري عالقة في ذاكرتي.. فهو اخ حبوب وود بلد وما بعيد من الادروبات كمان... .... لسه عندنا التلج ماذاب.. متوقع يذوب لحد نهاية الشهر ده..

كويس انكم طلعتم كلكم من اهل الشمال.
وبتعرفوا بعضكم البعض.

ياخي والله إبداع وقمة المتعة، وتحايا بحجم الوطن لأدروب وللشاعرين المبدعين أبو محمد و ود المدير
وشكراً لأخونا حامد إن جعل هذا ممكناً، تعرف يا حامد شعر المجادلات والردود دي مهووس بيها جداً، ومن مشاهير الردود، القصيدة الشايقية بتاعت "حبي أنا ليك كان زادي وكان جوة الحنايا دفين" والرد بتاعو، وكمية كبيرة من شعراء السودان العظام ينحون هذا النحو اللطيف الجميل، وستصبح قصيدتي الشاعرين ود المدير ورد أبو محمد عليها من القصائد السودانية الخالدة، ومن دواعي فخرنا وسرورنا في هاتين القصدتين بأننا قد عاصرناهما.

تحياتي

Quote: ما بعيد من الادروبات كمان...

صدقت يا حامد، فالإنقرياب والإتمن أولاد اعم
لزم، وكمان جدنا تزوج من الإتمن. يعني انا
ادروب يا ابو محمد. شفت كيف!!!

Quote: تعرف يا حامد شعر المجادلات والردود دي مهووس بيها جداً، ومن مشاهير الردود، القصيدة الشايقية بتاعت "حبي أنا ليك كان زادي وكان جوة الحنايا دفين" والرد بتاع

لك عظيم الشكر اخي النذير،
بعد غياب دام 11 سنة من البلد كانن في خلالها بنات اخوي التومات يغنن اغنية
(يا رمال حِلتنا زولاً كان يانسك يا حليلو) السبب الذي يدعو اختي للبكاء.
بمجرد ان حزمت حقائبي للسفر كتبت مجاراة لهذه القصيدة.
تقديراً لمرورك الجميل، وحبك لهذا الضرب من المجاراة في الشعر،
اهديك ردي علي رمال حِلتنا...


أحلام بالعودة...
.

يا رِمآل حِلتنا زولِك ليكِ عآد هيا ابسميلو
جاي يتبّع دِريبو الفوق بياضِك كان دليلو
صوت قماري الشوق يحآدي لشُدرنا ولضِليلو
لبحرنا ولتمُرنا لعِنقريبو ومقيلو
فوقو ينجمّا ويزحو كلما الرقراق يجيلو
والعِصير يمرق يطايب ناس فريقو الهم يزيلو
يمسح اللوم والعِتاب بالأمارة يتم جميلو
في سلف صالح يعزي بحُزُن في الجوف نزيلو
وبفرح طآمح يبآرك للصبى الإنتم عديلو
والمِغيرِب يمشي ينزل للبحر يكرُف عليلو
لهموم الغربة يغسل نفسو من فيض سلسبيلو
وجاي سآدر فوق دِريبو النِخيلآت تِنتكيلو
يشيلو تمرآت من صبيطا بيها يكتُل نآر غليلو
فوق رِمآل حِلتنا يقعد والقمر سآطع في ليلو
فوق خدود رملتنا عآكس فيض دموع أفرآح يسيلو
تروي أرضك يا بلدنا ونحن كوم الهم نشيلو
ومهما أرض الغُربة جآدت الوطن مافيش مثيلو
وحتى لو نزلو النجوم حآشآ ما دآيرين بديلو
وضُمّة ما بندور بديلو...

ود المدير...

Quote: أهدي هذا النص لجميع أهلنا داخل الوطن الحبيب، وخارج إطاره في مناكب الدنيا. إهداء إلي كلٍ من عطر هذه المساحة بالمرور أو المشاركة. إهداء خاص لأخي أبو محمد... قـطـعـة أرض...

حبيبنامعاوية ود المدير
اشكرك علي اثراءك للبوست بعبق حروفك الرائعة..
التي تتدفق مثل ماء النيل
فتنساب الكلمات من بين اناملك بصورة جميلة وسلسة..
لتسقي جداول ارض المليون ميل مربع..
التي تقطعت انسجته الاجتماعية..
واصيب -للاسف الشديد- بكل عوامل الجفاف والتصحر والتعرية..
بسبب سياسات الجشع والانانية الشمولية وسوء الادارة المركزية وفشلهم في تصريف شئون البلاد والعباد ..!

...
فلك من التحية والتقدير وهديتك وصلت.

الاخ النذير حجازي
شكراً لك علي المرور وفعلا المجادلات الشعرية من الاشياء الجميلة التي وجدناها في مجتمعاتنا السودانية وكانوا يستخدمونها في الافراح وكذلك في الحرب بين القبائل مثل ما هو مشهور في شعر اهلنا في البطانة ومساجلاتهم الشعرية الجميلة بين شعراء قبيلتي الشكرية والبطاحيين ..
فهوسك ياخوي هوس راقي وجميل..

.....
وربنا يعطيك العافية..

اختي الكبيرة تراجي بت ابو طالب

شكراً ليك مرة تانية وانت زي ما قال اخوي معاوية دائماً تسعي لبناء جسور التواصل بين الناس وربط بعضهم ببعض وهذه صفة جميلة يمتاز بها اهل السودان وقلما تجديها عند الشعوب الاخري..
ومعاوية المدير فعلاً من الرعيل الاول الذين وصلوا الي تخوم القطب الشمالي من بعد ناس العم امين الذي يعتبر اول سوداني وصل الي تلك المنطقة في منتصف او نهاية ثمانيات القرن الماضي,
ووجدنا اثار معاوية هنا في شوارع دلتا المكنزي وفي محارب مصليات انوفك وعاصمة المقاطعة (يلو نايف) وبالمناسبة معاوية ده رجل رحالة بمعني الكلمة فهو يحب الترحال والسفر من مكان لمكان وقد شقا كندا حته حته من المحيط الاطلنطي شرقاً الي المحيط الهادي غرباً وصل شمالاً حتي المحيط المتجمد الشمالي ولو كان في مكانه في كندا ابعد من كده افتكر كان سافر ليه فهو يمتاز بخصلة الترحال وحب الاسفار واهلنا البدو يقولوا:(الرحيل عز العرب)..!

جمعة مباركة..!