Post: #1
Title: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 10:37 AM
الإخــــوة والاخـــوات
أحد اكبر هموم المغترب الســــــــوداني هو الحصول على قطعة أرض أو منزل ينيخ فيه رحاله بعد غربه شوق
والهم الثــاني هو استيراد سيارة له وهنا يوجد نوعان من السيارات
الأولي سيارة استثمارية تدر له بعض المال بعد استقراره في الســــــودان وتؤمن له معيشة معقولة بدون المداقشــــــة في الســـوق في ظل عدم معرفته بأمور الســـــوق والاعيبه وجخانينه
والدخـــــول في السوق مباشرة يعد مغامرة غير محســـــوبة المخاطر وربما تقــــــود المغترب الى الرجــــوع للغربة بعد افلاسه
موضوع الأراضي والبيوت دي اتفتح ليها بوست كارب ومفيد جدا وهو :
يا ناس الخرطوم أسعار الأراضى بالخرطوم.......................
كثير من المغتربين أمثالي يفكرون في العودة الى الســــــودان والاستقرار فيه ، ولكن هذه العودة مشروطة ببعض المعينات ومنها البيت والسيارة
موضوع البيت وقطعة الارض امره انتهى في البوست أعــلاه للزميل منصور المفتاح
وتبقى أمـــر السيارة ... ولذلك فتحنا هذا البوست للاستشارة ومعرفة تجارب الآخـــرين في هذا المجال
وما خاب من استشار ... وأخص هنا كل الذين لديهم معلومات بخصوص تصدير السيارات بنوعها السيارات الصغيرة للاستعمال الشخصي أو سيارات النقل لأغراض الاستثمار
|
Post: #2
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 10:46 AM
Parent: #1
ما جعلني أفتح هذا الموضوع اتعرضت على حافلة من موديل من الثمانيات (1980- 1989) على ما أظن وسعرها مقعول وهي بحالة جيدة
ولكنني ترددت في الموضوع حتى أســـأل وأخذ النجيضة على قولة ود الصايم
فماذا تنصحونني ؟
وهل لا زال الاستثمار في الحافلات مجدي ؟
ما هي الضوابط لإستيراد الحافلات من الموديلات القديمة؟
الحاجة التانية هناك خيارات أخـــرى قلاب بحالة جيدة ومعقولة كأحد الخيارات التي أفكر فيها... ماذا عنه
هناك ايضا الدفارات المسماة في الســـودان بالجامبو
ايهما أجدى من الناحية العملية ؟
القلابات أم الدفارات الجامبو؟
كم اسعارها في السودان ... وهل هي استثمارات ناجحة
ما هي افضل انواعها : المتسيوبيشي - الديهاتسو - جاك (صيني) ... غيرها
ننتظر
|
Post: #3
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 10:49 AM
Parent: #2
الحافلة كوستر مربع ديزل......
وهناك حافلة روزا موديل 1996
|
Post: #4
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 10:59 AM
Parent: #3
ننتظر الاستشارات والنصائح والنجيضة
عشـــــان ما نرجـــع الســــــودان ونقعد نقــــــول زي صاحبنا:
يا الله روزا ولا مره كـــــوزة (ههههههههههه)
المرة الكوزة بتكون في البرلمان ....والحافلة الروزا بتكون في الميدان
وكووووولهم بيجيبوا القروش
لوووووووووووب عليهو... وعلينا
|
Post: #5
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد عبد الماجد الصايم
Date: 05-02-2010, 11:02 AM
Parent: #3
ركّز على الروزا!
بعد داكـ شوف ناس الإجراءات
|
Post: #6
Title: Re: ناس الخبرة والكرين: ماهي ضوابط تصدير السيارات للسودان؟
Author: nazar hussien
Date: 05-02-2010, 11:13 AM
Parent: #5
اهم شي انت صوتّ لي منو؟؟
عشان نعرف روزتك دي بتخش والله لا؟؟؟
الاولي بتاعة التمانينات ديك...انا بقول ليك ما بدخلوها
حتي لو دفعت فرق موديل...ويبدو انهم حددو الاستيراد بي
عشرة سنوات علي الاقل بالنسبة لمركبات النقل...والسنين
دي زاتا قاعدين ينقصوها حبة حبة زي التجنيد الاجباري...
ثم ثانيا...ياخ مالك ومال العربات...علا تكون مشتهي ليك مغيص سماسرة...
وكتيح سنون...وشاي سكرو بالكمش...
تجيبا جاز يقولوا ليك والله كان جبتها بنزين؟؟
تجيبا روزا...يقولوا ليك...ياخ كان تجيبا كوستر...
تجيبا كوستر يقولوا ليك...ياخ ما كان تجيب المربعة...
تجيب المربعة يقولوا ليك...ياخ انتو ما عندكم ام فانوس؟؟؟
تجيب ام فانوس يقولوا ليك...ياخ دي مضهبة!!!!
تجيبا كرت من الورقة يقولوا ليك...ياخ دي ما بتنفع هنا دي مواصفات الخليج...
تجيب ليهم عمك متسوبيشي زاتو...يقولوا ليك...ياخ عمك دا شفناه في السد...
نجيب ليك صورتو في اليوتيوب؟؟؟
اسعلني...انا دا...يا مغسة ختوها فيني السماسرة...بقيت
اشوف جلاليبهم طير طير...دا غير اولئك النضاف البيقولوا
ليك عايزين نشتريها لي مدرسة...بس نطلع بيها (تيستا)
يطلعوا بيها (تيستا) الدروشاب..زويكونوا وصلوا اهلهم
وانت مستنيهم في الشارع لا بعد باكر ما يجوك
|
Post: #7
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 11:13 AM
Parent: #5
(شكرن ) يا عمك
أها المره الكوزة نجليها يعني 
غايتو بعدين اي زول بعرفو من الاعضاء يملح طول عمره
وخصوصا ذو اليد سليمان لأنو ساكن قريب مني
_______
يا عمك انت اجازتك الماضية قالو كلها كانت في الكرين ... ما طلعت منها بحاجة؟
الظاهر عليك قضيتها كلها شراب جبنة وشيشة
|
Post: #8
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد عبد الماجد الصايم
Date: 05-02-2010, 11:22 AM
Parent: #7
| Quote: الظاهر عليك قضيتها كلها شراب جبنة وشيشة |
يا عمكـ .. داير أجمركـ قالوا لي 83 مليون جنيه بالقديم!
دي الجماركـ بس .. غير باقي الإجراءات!
مش أخير الجبنة والشيشة؟
|
Post: #9
Title: Re: ناس الخبرة والكرين: ماهي ضوابط تصدير السيارات للسودان؟
Author: nazar hussien
Date: 05-02-2010, 02:04 PM
Parent: #8
Quote: عمكـ .. داير أجمركـ قالوا لي 83 مليون جنيه بالقديم!
دي الجماركـ بس .. غير باقي الإجراءات!
|
مدخل طيارة يا ود الصايم...(اتاريه ضحكك دا فوق رأي)
مــــــــــــــــــــــا شــــــــــــــاء الــله
|
Post: #10
Title: Re: ناس الخبرة والكرين: ماهي ضوابط تصدير السيارات للسودان؟
Author: عبدالله ود البوش
Date: 05-02-2010, 02:31 PM
Parent: #9
نصيحة يا اللمين اخوي
شيل قروشك صرة وخيط واشتري من هناك
|
Post: #11
Title: Re: ناس الخبرة والكرين: ماهي ضوابط تصدير السيارات للسودان؟
Author: Ahmed Kambal
Date: 05-02-2010, 02:54 PM
Parent: #10
Salam ALL,
This is a very good post! I have a question:!
I want to know how to know in advance the $$$CUSTOM value before you ship your car?(personal small car - eg. Toyota Hilux)
The Sudan Custom website have some info but its not clear to me!
http://www.customs.gov.sd/English/customsguide.htm
PLEASE EVERYONE SHARE YOU EXPERIENCE IN BRINGING SMALL CARS TO SUDAN? and if it worth it?
Thanks
Ahmed Kambal
|
Post: #12
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-02-2010, 03:03 PM
Parent: #10
الاخ الامين السلام عليكم اولا الاجراءت اصدار رخصةمن وزارة التجارة الخارجية وتدفع رسوم 800 جنيه رسوم دخول السيارة
الدفار الجامبو مستوبيشي وهو كم نوع فماهي تفاصيل الجامبو العندك وهو افضل من الحافلة والقلاب الثاني الروزاكم نوع اصلية والامعدلة شاسي طويل ولاالقصير المواصفات اهم شي القلاب النوع والموديل الكوستر مابتنفع بعد الرخصة والعربية توصل بورتسودان تكمل اجرات التخليص ودفع الجمارك وللعلم رسوم الموات فقط 2000جنيه بالجديد وكلما تاخر التخليص زادت الارضيات والجمارك تختلف حسب السيارة والموديل واي حاجة عندها قيمة براها
|
Post: #13
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 03:13 PM
Parent: #10
الأخ نزار حسين
ســــلامي واحترامي...
اولا شاكر جدا إنك تدينا عصارة تجربة ممكن الزول يستفيد منها ... انت عارف المغتربين ديل دايشين
والريال والدولار الجمعهو ده يعلم الله جمعهو بالمر والشقا والتعب وقرف من أخونا ذو الكفل "الكفيل"
وعشان غربتهم دي بكون حصل ليهم انقطاع من احوال البلد وكده ... فألف شكر يا حبيب
Quote: ويبدو انهم حددو الاستيراد بي
عشرة سنوات علي الاقل بالنسبة لمركبات النقل |
ديل معلومة مفيدة جدا انهم حددوا مركبات النقل ب 10 سنوات .. بس عايزة تأكيد بصراحة
| Quote: ثم ثانيا...ياخ مالك ومال العربات |
عاد نســــــوي شنو ده اسهل استثمار عند المغتربين ... تبقى جلابي " بلغة الكمسارى صاحب حلال" مش جلابي بتاعة تراجي وبشاشة(ههههههههه)
وبعدين رأيك شنو في اللودرات والقلابات والدفارات الجامبو
اها بنســــوي ديل ونكابس في السوق بشهادتنا دي مع الجماعة في الشبكات والبرمجة والخرمجة وكل ما يخص التكنولوجيا برضو
اديك العافية اخوي ودايرين المزيد...
|
Post: #14
Title: Re: ناس الخبرة والكرين: ماهي ضوابط تصدير السيارات للسودان؟
Author: السيد المسلمي
Date: 05-02-2010, 03:38 PM
Parent: #13
نصيحة يا اللمين اخوي
شيل قروشك صرة وخيط واشتري من هناك
ــــــــــــــــــــــــــــــ
بالعكس ياود البوش الخيارات بتكون متاحة أكتر عندو .. دا غير حالة السيارة وإستعمالها ..
وبعدين ياالأمين أخوي سيبك من حكاية الكوستر دي وأبقي زول روزا بس ..
والخيار البتبقي عليهو ( اللون ، الموديل ، الأُبشن ) أدينا بيهو خبر ..
بس خليك متأكد إنو أفضل مليون مرة من تشتري في السودان .
|
Post: #15
Title: Re: ناس الخبرة والكرين: ماهي ضوابط تصدير السيارات للسودان؟
Author: nazar hussien
Date: 05-02-2010, 03:42 PM
Parent: #14
| Quote: وبعدين رأيك شنو في اللودرات والقلابات والدفارات الجامبو |
ركز علي الدفارات المتسوبيشي...ذوات الشاسيه الطويل...
والتويوتا الكانتر...ديل بهردكوا السماسرة
|
Post: #16
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 03:42 PM
Parent: #13
أخونا محمد المسلمي
حبابك ألف ... ومنور البوست الذي شريحة عريضة من أبناء الســـــوادن
| Quote: الدفار الجامبو مستوبيشي وهو كم نوع فماهي تفاصيل الجامبو العندك |
يا اخوي نحن تور الله في برسيمو... والله ما عارفين أي حاجة
فبالله تشد حيلك معانا وتشرح لينا الانواع المطلوبة والسمحة .. وده غرض البوست الأساسي
الروزا برضـــو نحن ناس دريكسون سااااااااااااكت يا اخوي يقولوا لينا ادفعوا بندفع وبس
وانا سمعت عندكم الدوغـــرية والمقلبن وما عارف شنو... تكرم علينا بالشرح وايهما افضل ، وانا ما عندي واحدة حاضرة إلا 1996 بس شايفة قديمة وكايس لي واحدة اكثر من موديل 2000
أها رأيك في الهايسات شنو برضو؟ نفك الروزا تجيب ليها اثنين هايس مش كده
منتظرين
_________
يا ريت لو ترسل لي رقم هاتفك في الخاص ... مع الوعد بالمواصلة في هذا البوست للفائدة العامة
|
Post: #17
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-02-2010, 04:01 PM
Parent: #16
الاخ الامين الدفار نوعين 8 طنو5 طن اما الهايس افضل نوع المربع الموديل الجديد من 2005الي 2009
امابخصوص الجامبو التاكد من الشاسي صحيح وليس به تعديل لانه الشاسي لوفيه تعديل الاجرات فيها صعوبة
|
Post: #18
Title: Re: ناس الخبرة والكرين: ماهي ضوابط تصدير السيارات للسودان؟
Author: بكري عباس علي
Date: 05-02-2010, 04:26 PM
Parent: #17
ادناه تعريفة جمارك السيارات علي حسب موقع الجمارك السودانية (بدون غرامات الموديل )
** الفئات الجمركية علي السيارات :-
1- مركبات سعة ماكينتها تزيد عن 1500 سي سي تخضع للفئــــة:-
(40%) رسم وارد (40%) رسم إضافي
(10%) قيمة مضافة ( من القيمة المضافة) (5%) أرباح أعمال تجارية
( 1%) علاج (2%) موانئ بحرية .
2- مركبات سعة ماكينتها تقل عن 1500 سي سي وتزيد عن 1000 سي سي تخضع للفئة:-
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
3- مركبات سعة ماكينتها تقل عن 1000 سي سي
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
4- مركبات النقل الجماعي تقل عن 40 راكب وتزيد عن 11 راكب بما فيهم السائــق
تخضع للفئة:-
(10%) رسم وارد (5%) أرباح أعمال تجارية
( 1%) علاج (2%) موانئ بحرية
5- مركبات للنقل الجماعي تزيد عن (40) راكب تخضع للفئة :-
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
6- شاحنات للنقل المواد والبضائع تزيد عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
7- شاحنات للنقل المواد والبضائع تزيد عن (5) وتقل عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
8- شاحنات نصف نقل دفارات تخضع للفئة :
(10%) رسم وارد معفاة من القيمة المضافة وعليها (5%) أرباح أعمال تجارية
من القيمة سيف ( CIF) ( 1%) علاج (2%) موانئ بحرية
|
Post: #20
Title: Re: ناس الخبرة والكرين: ماهي ضوابط تصدير السيارات للسودان؟
Author: بكري عباس علي
Date: 05-02-2010, 04:32 PM
Parent: #19
مما سبق اعلاه وبما انه تعريفة الجمارك تتجاوز ال 98 % من قيمة السيارة وبعد الاضافات ربما تتجاوز ال 120 % فنصيحتي للاخوة المغتربين بالسؤال عن قيمة العربية في السودان قبل الشحن لتفادي التعب في الفاضي
|
Post: #21
Title: Re: ناس الخبرة والكرين: ماهي ضوابط تصدير السيارات للسودان؟
Author: ashraf mukhtar
Date: 05-02-2010, 05:36 PM
Parent: #20
تحية لصاحب البوست
بوست موفق
الاخوة المسلمي
ممكن اعرف جمارك الكورلا 2008
1600 سي سي + الكورلا 2007 1300 سي سي
وتكلفة المواني والشحن من بورتسودان
وبدون ثقالة برضو الهيونداي توكسان 2010
وشكراااااااا
|
Post: #23
Title: Re: ناس الخبرة والكرين: ماهي ضوابط تصدير السيارات للسودان؟
Author: وليد شريف
Date: 05-02-2010, 06:05 PM
Parent: #21
Quote:
ادناه تعريفة جمارك السيارات علي حسب موقع الجمارك السودانية (بدون غرامات الموديل )
** الفئات الجمركية علي السيارات :-
1- مركبات سعة ماكينتها تزيد عن 1500 سي سي تخضع للفئــــة:-
(40%) رسم وارد (40%) رسم إضافي
(10%) قيمة مضافة ( من القيمة المضافة) (5%) أرباح أعمال تجارية
( 1%) علاج (2%) موانئ بحرية .
2- مركبات سعة ماكينتها تقل عن 1500 سي سي وتزيد عن 1000 سي سي تخضع للفئة:-
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
3- مركبات سعة ماكينتها تقل عن 1000 سي سي
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
4- مركبات النقل الجماعي تقل عن 40 راكب وتزيد عن 11 راكب بما فيهم السائــق
تخضع للفئة:-
(10%) رسم وارد (5%) أرباح أعمال تجارية
( 1%) علاج (2%) موانئ بحرية
5- مركبات للنقل الجماعي تزيد عن (40) راكب تخضع للفئة :-
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
6- شاحنات للنقل المواد والبضائع تزيد عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
7- شاحنات للنقل المواد والبضائع تزيد عن (5) وتقل عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
8- شاحنات نصف نقل دفارات تخضع للفئة :
(10%) رسم وارد معفاة من القيمة المضافة وعليها (5%) أرباح أعمال تجارية
من القيمة سيف ( CIF) ( 1%) علاج (2%) موانئ بحرية |
يعني بالفهم ده الزول العندو بوكس من 2000 حتى 2005 يدفع كم معليش ادونا دفرة
اصلوا فهمنا في الحاجات دي قاسي شوية
|
Post: #33
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-02-2010, 11:12 PM
Parent: #21
الاخ اشرف
الكورلا المواصفات اوتماتيك والاعادية وكلها كويسة بس السوق 2007افضل لان الشكل 2008 اتغيرالاكسنت 2008 المواصفات اوتماتيك والا منوال الابواب كهربا والا منول المكنة كبيرة والا اقل من 1500سيسي الدركسون هدروليك ولاعادي
الاجرات اولا خطاب من وزارة التجارة يسمي استسناء بمبلغ 800 جنيه رسوم دولة 1000 اف جنيه رسوم اتعاب المخلص =الاذن =اواي رسوم ادارية تشمل الضرايب والزكاة
ثانيا رسوم المواني مابين 1600=2000
الترحيل من بورتسودان الي الخرطوم في حدود700
الجمارك اخونا السيد بفيدك بيها بكرة
|
Post: #22
Title: Re: ناس الخبرة والكرين: ماهي ضوابط تصدير السيارات للسودان؟
Author: Emam Hassan
Date: 05-02-2010, 05:59 PM
Parent: #20
بوست موفق أخي الأمين موسى و مفيد للكثيرين
معذرة ما عايز أطلع بالموضع لزاوية جانبية
لكن استفزتني رسوم ال
قصدهم معالجة processing.. ولا علاج عديييل treatment ؟
و كان علاج.. علاج منو؟
|
Post: #24
Title: Re: ناس الخبرة والكرين: ماهي ضوابط تصدير السيارات للسودان؟
Author: التيجاني عبد الباقي
Date: 05-02-2010, 06:12 PM
Parent: #22
يا اخوانا فيدونا عربية صالون اكسنت هونداي موديل 2008م كام الجمارك ..والمصاريف الاخري ؟؟؟واصل الخرطوم
سعرها بالريال السعودي 16000 ريال تقريبا
هل الشراء في السودان افضل ؟
مع التحية لصاحب البوست
|
Post: #25
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 07:59 PM
Parent: #24
حبيبنا عبد الله ود البوش
ســـــــلام وتحياتي..
| Quote: شيل قروشك صرة وخيط واشتري من هناك |
القروش ات قايلهن كتااااااااار
لو شلتهن صرة في خيط ما بجيبن ليك شيتاً كده في السودان
اخير الواحد يضمن حق قفة الملاح اليومية.. عشان يقدر يعيش مع ناس السودان ديل
ودي الذي تعرف
|
Post: #26
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 08:24 PM
Parent: #25
الأخ الفاضل محمد المسلمي
ســــــلام وتحايا مرة ثانية.. وشكراً لمنحنا هذا الوقت للرد على استفساراتنا
| Quote: بالعكس ياود البوش الخيارات بتكون متاحة أكتر عندو .. دا غير حالة السيارة وإستعمالها .. |
أتفق معك تماما في هذه النقطة وهذا هو تفكيري بالظبط
الحافلة الروزا إذن هي الخيار المفضل وقد حازت على أكثر الأصوات حتى الآن
اسعارها في الخليج تتراوح بين 60 ألف ريال إلــى 80 ألف ريال ويتراوح موديلاتها بين 2005 وحتى 2009 وهي الروزا الطويلة التي تسمى "المرق"
وبتشيل 30 راكب بس خلونا نقيف هنا شوية:
أها دي جماركها كم جنيه سوداني؟
وهل مسموح بدخولها السودان ولا فيها غرامة موديل والكلام الطويل ده؟
هل فعلا هي مجدية كاستثمار صغير يجعل المغترب يرتاح قليلا من الكد بتاع الغربة؟
لو في مواصفات معينة يا ريت تمدونا بيها؟
بالنسبة للجامبو:
طبعا في أنواع كتيرة ومنها المتسيوبيشي والديهاتسو
في نوع جديد اسمه (JAC) وهو صيني بس الماكينة بتاعتو ديهاتسو زي ما بقولو الناس وأنا زرت الشركة بتاعتو في الرياض هنا واسعاره مناسبة جدا وهي أرخص من النوعين أعلاه
رأيك فيهو شنو؟
الحمولة 5 طن موجودة و8 طن موجودة برضو
معليش استحملنا يا أخوي لكن الموضوع يؤرق الكثيرين .. ولسه ما فتحنا ليك في العربات الصغيرة
كل الود
|
Post: #27
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 08:28 PM
Parent: #26
Quote: ركز علي الدفارات المتسوبيشي...ذوات الشاسيه الطويل...
والتويوتا الكانتر...ديل بهردكوا السماسرة |
نزار حسين تحياتي
ما قصرته معانا تب والله.. الله اديك العافية
|
Post: #28
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 08:33 PM
Parent: #27
الاخ بكري عباس
ســــــلام..
| Quote: فنصيحتي للاخوة المغتربين بالسؤال عن قيمة العربية في السودان قبل الشحن لتفادي التعب في الفاضي |
يا اخـــوي نحن ناس معايش وما عايزين نبيع
عايزين لينا نقاطة يومية كده ... والباقي بنتمو موية بشهادتنا دي.. ومكابسة في سوق الله أكبر ده
ودي... ومشكوووووور على الاضافة
|
Post: #29
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد إبراهيم علي
Date: 05-02-2010, 09:21 PM
Parent: #28
سلام الامين البشاري
موضوعك مهم بس نصيحة اختى الروزا لانو بعد باصات الوالى الجديدة الا تشيل فيها بورداب الخرطوم لقندهار
الشاحنة او ما يعرف في السودان بالجامبو جيد وله زبائن كثر يفضلونه على اللواري عشان حمولته الاكبر وسرعته ولانو اصغر كما من الزد واي وما شابه
السؤال المهم حتسوقو انت ولا حتجيب سواق ؟
|
Post: #30
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-02-2010, 10:07 PM
Parent: #29
شــــركة جاك أو (JAC MOTORS) هي شركة صينية وتصنع العديد من السيارات الصغيرة والكبيرة وعندها تجربة رائدة في مصر والسعودية
زي ما قلت ليكم انا زرت الشركة هنا في الرياض والتي وكيلها الجديعي في السعودية
العايز اقولو هل الجامبوهات دي وصلت السودان من الشركة ونجاحها شنو، لأنو يمكن جونا ودقداقنا الخابره دالك ما ينفع معاها وكذلك قطع الغيار وهي الحاجة المهمة لإستمرارية أية سيارة في السوق
على العموم هذه صور للجامبوهات الموجودة عندها وهي انواع منها 2 طن 3 طن و4 طن و5 طن و6 طن و8 طن و10 طن ودي شوية صور ليها
دا 6 طن
ودا موقع الشركة
http://jacen.jac.com.cn/jac/showCatalogAction.do?method...4currentPageNumber=2
وللمزيد من الصور من هنا
هنا
وكذلك هنا
هنا
اها ادونا خبرها شنو موجودة في السودان ام غير موجودة؟
مع التأكيد انوماكينتها ماكينة ديهاتسو
|
Post: #46
Title: Re: ناس الخبرة والكرين: ماهي ضوابط تصدير السيارات للسودان؟
Author: بكري عباس علي
Date: 05-08-2010, 08:56 PM
Parent: #28
Quote: يا اخـــوي نحن ناس معايش وما عايزين نبيع
عايزين لينا نقاطة يومية كده ... والباقي بنتمو موية بشهادتنا دي.. ومكابسة في سوق الله أكبر ده
|
انا قصدي انه ممكن تلقي العربية العايزها بسعر اقل في السودان نسبة لما يعرف بالكسر ولانه الجماعة عندهم واسطات في الجمارك
بالتوفيق
|
Post: #32
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-02-2010, 11:05 PM
Parent: #26
الاخ الامين الجامبو افضل حاجة المستوبيشي والروزا كويسة لكن انابرشح ليك الجامبو ال5وال8طن افضل من الحافلة من الناحية التجارية ووكل السيارات مسموح دخول السودان بعد دفع الرسوم للوزارة التجارة وفق ضوابط معينة وليس هنالك مشكلة في الاجرات بس العربية جاك مابتنفع بعدين في السوق والمستوبيشي بشتغل وبحافظ علي التكلفةيعني متي ماتجي تبيع انشاءالله مافي خسارة
|
Post: #31
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-02-2010, 10:57 PM
Parent: #24
Quote: يا اخوانا فيدونا عربية صالون اكسنت هونداي موديل 2008م كام الجمارك ..والمصاريف الاخري ؟؟؟واصل الخرطوم
سعرها بالريال السعودي 16000 ريال تقريبا
هل الشراء في السودان افضل ؟
مع التحية لصاحب البوست |
الاخ التجاني االاكسنت 2008 المواصفات اوتماتيك والا منوال الابواب كهربا والا منول المكنة كبيرة والا اقل من 1500سيسي
الاجرات اولا خطاب من وزارة التجارة يسمي استسناء بمبلغ 800 جنيه رسوم دولة 1000 اف جنيه رسوم اتعاب المخلص =الاذن =اواي رسوم ادارية تشمل الضرايب والزكاة
ثانيا رسوم المواني مابين 1600=2000
الترحيل من بورتسودان الي الخرطوم في حدود700
الجمارك اخونا السيد بفيدك بيها بكرة
|
Post: #34
Title: Re: ناس الخبرة والكرين: ماهي ضوابط تصدير السيارات للسودان؟
Author: nazar hussien
Date: 05-03-2010, 06:30 AM
Parent: #31
Quote: الاجرات اولا خطاب من وزارة التجارة يسمي استسناء بمبلغ 800 جنيه رسوم دولة 1000 اف جنيه رسوم اتعاب المخلص =الاذن =اواي رسوم ادارية تشمل الضرايب والزكاة
ثانيا رسوم المواني مابين 1600=2000
الترحيل من بورتسودان الي الخرطوم في حدود700
الجمارك اخونا السيد بفيدك بيها بكرة |
ديل براهن بكونن زي 6 مليون...
وبعد دا نضيف عليهن الجمارك...؟؟؟
كدي بتطلع أغلي من بيع السوق...
يا جماعة والله انا جادي...ما ممكن زول يقترح لينا الاقتراح دا لي ناس
الجمارك...
عايز اشتري عربيتين بنفس المواصفات...اديهم واحدة مقابل جماركهم
ويعفوني من اي حاجة...مقابل اسلمهم مفتاح عربيتهم مؤمنة ومسجلة...
وبعداك هم وكيفهم يبيعوها...يوزعوها للموظفين....
واي موديل عايزنو من بص حتي رقشة...قطر زاتو معانا...
العربات في العالم الاول دا رخيصة واقعة في الارض...بل ممكن يدوك ليها
مجان ...عديل كدي...بس الطريقة البتفكنا من ناس الكشيف دي شنو؟؟؟
|
Post: #35
Title: Re: ناس الخبرة والكرين: ماهي ضوابط تصدير السيارات للسودان؟
Author: Al Sunda
Date: 05-03-2010, 06:52 AM
Parent: #34
| Quote: الاجرات اولا خطاب من وزارة التجارة يسمي استسناء بمبلغ 800 جنيه رسوم دولة |
شكرا م. مسلمي
بس استثناء من شنو ؟؟؟
هل لازالت فترة ال 5 سنوات سارية كحد ادنى لسنة الموديل ؟
|
Post: #36
Title: Re: ناس الخبرة والكرين: ماهي ضوابط تصدير السيارات للسودان؟
Author: التيجاني عبد الباقي
Date: 05-03-2010, 07:26 AM
Parent: #35
شكرا اخوانى الاعزاء وخصوصا نزار والمسلمي
العربية قيرعادي وزجاج عادي 1500 سي سي هونداي 2008م مستعمل
مع التقدير لجهودكم وما خاب من استشار
|
Post: #37
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-03-2010, 07:58 AM
Parent: #36
الأخ محمد ابراهيم علي
ســــــــلامي وتحياتي...
| Quote: موضوعك مهم بس نصيحة اختى الروزا لانو بعد باصات الوالى الجديدة |
الكـــــــلام ده أنا واضعه في اعتباري تماماً .. بالرغم من إنو باصات الســودان الجديدة وليست باصات الوالي"دافعها من جيبوا أصلو"
وخلاص بقينا مركزين على الجامبو...
لغاية هسي ما حددنا ممكن نجيب ســواق ونركب معاهو جلابي
مشكور للاضافة
|
Post: #38
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-03-2010, 08:05 AM
Parent: #37
اخونا محمد المسلمي
صباحاتك خير يا حبيب
| Quote: الاخ الامين الجامبو افضل حاجة المستوبيشي والروزا كويسة لكن انابرشح ليك الجامبو ال5وال8طن افضل من الحافلة |
علم وجاري التفنيـــذ... غلبنا خيار الجامبو ... والمتسوبيشي
بس في حاجة بصراحة ما فهمتها وهي
| Quote: كل السيارات مسموح دخول السودان بعد دفع الرسوم للوزارة التجارة وفق ضوابط معينة |
ما هي هذه الضوابط ويا ريت واحـــد يفيدنا بيها
في ميزان حسانتك اخي وهذا البوست انا متأكد انتفع منه الكثيرين
|
Post: #41
Title: Re: ناس الخبرة والكرين: ماهي ضوابط تصدير السيارات للسودان؟
Author: محمد المسلمي
Date: 05-03-2010, 10:02 AM
Parent: #38
Quote: هي هذه الضوابط ويا ريت واحـــد يفيدنا بيها
في ميزان حسانتك اخي وهذا البوست انا متأكد انتفع منه الكثيرين |
الشروط التي وضعتها الوزارة شروط تشمل جميع السودانين ومافيها مشكلة بعد دفع الرسوم وشرط الموديل لايتعدي خمسة اعوام تم الغاء ومسموح بعد دفع قيمة الاستسناء لجميع انواع السيارات
|
Post: #39
Title: Re: ناس الخبرة والكرين: ماهي ضوابط تصدير السيارات للسودان؟
Author: د.فاروق ابوكساوي
Date: 05-03-2010, 08:30 AM
Parent: #37
اخوي الامين تحياتي
تجربتي الشخصية العام قبل السابق ارسلت كورلا 2006 (على الزيرو)كلفتني الي بورتسودان 48000ريال فقط. المضحك المبكي انه جماركها 25 مليون جنيه. سعر الريال وقتها 500 جنيه، يعني 50000 ريال ولك ان تقيس.
والان ان في طريقي للسودان منهيا خدماتي ساشتري من خرطوم الفيل
|
Post: #40
Title: Re: ناس الخبرة والكرين: ماهي ضوابط تصدير السيارات للسودان؟
Author: عبد اللطيف السيدح
Date: 05-03-2010, 08:51 AM
Parent: #39
ود البشاري
عليك بالروزا السماسرة بسموها ( قبة ) في السودان اي السقف بتاعا
عالي مش مقطوع
وتوكل علي الله بس تسوق براك
يا اخي انا في ركشة بس السواق اكلني 9 ملايين بالقديم
اها اسويليهو شنو ؟ الا اخنقجو افطسو قرش ما لقيتو عندو!!!!
|
Post: #42
Title: Re: ناس الخبرة والكرين: ماهي ضوابط تصدير السيارات للسودان؟
Author: السيد المسلمي
Date: 05-03-2010, 11:44 AM
Parent: #40
بالنسبة لضوابط إستيراد العربات ..
أي سيارة غير موديل العام .. ممنوع دخولها السودان إلا بإستثناء من وزارة التجارة الخارجية !
وتكلفته كاملة حوالي الف ومئتا جنيه 1200 ( بالجديد ) ..
أما بخصوص جمارك الكورولا 1600 سي سي حوالي أربعة وأربعين الف جنيه ( 44000 ) ..
هذا وأنصح الأخوان الإبتعاد قدر الإمكان عن الماكينة الكبيرة .. لزيادة الجمارك .. وعدم رغبة المستهلك السوداني لها .
ـــ
أي سؤال
|
Post: #43
Title: Re: ناس الخبرة والكرين: ماهي ضوابط تصدير السيارات للسودان؟
Author: Al Sunda
Date: 05-03-2010, 12:26 PM
Parent: #42
| Quote: أي سيارة غير موديل العام ممنوع دخولها السودان .. إلا بإستثناء من وزارة التجارة الخارجية ! |
شروط إذعان
حتى الخمس سنوات التي كانت في السابق غير مبررة
ناهيك ان تضع وزارة التجارة الخارجية شرطاً
بان تكون كل سيارات السودان جديدة لنج
لا أعتقد وجود دولة في العالم تطبق هذا الشرط
في دول الخليج التي نعيش فيها تأتينا عربات
(سيارات أو مواتر بلسانهم) من كل انحاء الدنيا بموديلات تعود إلى التسعينات
ولم نجد جهة تعترض على ذلك ؟او تفرض رسوما
استيراد مفتوح بجمارك لا تتعدى في قيمته نسبة ال 4% وبدون غرامة موديل
الشرط الوحيد لتحريك السيارة
يتلخص في فحص السيارة انشاء الله موديل 80
ماعندهم شغلة بيك المهم الفحص
غايتو ؟؟؟؟؟
حاجة كده بتجيب فلوس بالساهل
ناس الحكومة ما بقصروا فيها كلو كلو
|
Post: #44
Title: Re: ناس الخبرة والكرين: ماهي ضوابط تصدير السيارات للسودان؟
Author: الشيخ إبراهيم الشيخ
Date: 05-03-2010, 01:42 PM
Parent: #43
تحياتي للجميع
والله يا اخوانا كلامكم طيب بس والله عندي مشكلة
ما عارف حكاية القديم والجديد ده يحلوها كيف
يعني يا ود المسلمي والله ما عرفت انت بتقصد كم
ب 800 جديد .. باختصار ممكن نعرف الجنيه الجديد
بساوي كم بالقديم.. معليش يا شباب اخوكم دايش
سامحونا.. واظن في ناس كتار معاي في الهوى
بس لابدين راجين الاخر.
|
Post: #45
Title: Re: ناس الخبرة والكرين: ماهي ضوابط تصدير السيارات للسودان؟
Author: ashraf mukhtar
Date: 05-03-2010, 01:50 PM
Parent: #43
شكرا المسلمي
44 مليون قلت لي
|
Post: #47
Title: Re: ناس الخبرة والكرين: ماهي ضوابط تصدير السيارات للسودان؟
Author: بكري عباس علي
Date: 05-14-2010, 07:41 AM
Parent: #45
سمعنا عن اعفاءات لسيارات المغتربين العائدين نهائيا
في واحد عنده تفاصيل اوفي ؟
|
Post: #48
Title: Re: ناس الخبرة والكرين: ماهي ضوابط تصدير السيارات للسودان؟
Author: أبوبكر أبوالقاسم
Date: 05-14-2010, 09:05 AM
Parent: #47
صاحب البوست ( الأمين البشارى) وزواره الكرام ســـــلامات
Quote: ادناه تعريفة جمارك السيارات علي حسب موقع الجمارك السودانية (بدون غرامات الموديل )
** الفئات الجمركية علي السيارات :-
1- مركبات سعة ماكينتها تزيد عن 1500 سي سي تخضع للفئــــة:-
(40%) رسم وارد (40%) رسم إضافي
(10%) قيمة مضافة ( من القيمة المضافة) (5%) أرباح أعمال تجارية
( 1%) علاج (2%) موانئ بحرية .
2- مركبات سعة ماكينتها تقل عن 1500 سي سي وتزيد عن 1000 سي سي تخضع للفئة:-
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
3- مركبات سعة ماكينتها تقل عن 1000 سي سي
(25%) رسم وارد (30%) رسم إضافي
(10%) قيمة مضافة( من القيمة+ الرسوم) (5%) أرباح أعمال تجارية
( 1%) علاج (2%) موانئ بحرية
4- مركبات النقل الجماعي تقل عن 40 راكب وتزيد عن 11 راكب بما فيهم السائــق
تخضع للفئة:-
(10%) رسم وارد (5%) أرباح أعمال تجارية
( 1%) علاج (2%) موانئ بحرية
5- مركبات للنقل الجماعي تزيد عن (40) راكب تخضع للفئة :-
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
6- شاحنات للنقل المواد والبضائع تزيد عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
7- شاحنات للنقل المواد والبضائع تزيد عن (5) وتقل عن (20) طن تخضع للفئة :
(10%) رسم وارد معفاة من القيمة المضافة وعليها (5%) أرباح أعمال
( 1%) علاج (2%) موانئ بحرية
8- شاحنات نصف نقل دفارات تخضع للفئة :
(10%) رسم وارد معفاة من القيمة المضافة وعليها (5%) أرباح أعمال تجارية
من القيمة سيف ( CIF) ( 1%) علاج (2%) موانئ بحرية |
المشكلة التى صادفتنى وعن تجارب شخصية .... أن تقدير ثمن السيارة غير معروف وغير مُعلن عنه.
الجمارك لديها تقدير بالدولار لثمن كل سيارةوهى جديدة كأساس لإحتساب الجمارك المذكورة أعلاه وبدون إستهلاك.
ثالثة الأثافى:
الـــ 10% بتاعت القيمة المضافة يتم إحتسابها بطريقة عجيبة:
يتم إحتساب رسوم الوارد المُقدّرة ..... ثم يضاف إليها الرسم الإضافى ( مثلاً 40% من القيمة + 40% من القيمة) وبعد الحصول على مجموعهما .... نعم بعد حاصل جمعهما يقومون بإحتساب ما يقولون أنه 10% كقيمة مُضافة .... وبإجراء
عملية حسابية بسيطة يتضح أن القيمة المضافة هى فى الواقع 18% من قيمة الجمارك... هذا من جانب
معنى القيمة المضافة هى أن يتم تصنيع المُنتج بزيادة قيمته ... مثلاً يكون عندك سمسم تقوم بتصنيعه زيتاً فعندها
تُستحق القيمة المُضافــــة .... بس لو فى واحد يورينى القيمة المُضافة لسيارة أستلمها من الباخرة ويتم تقدير جماركها ووووووين لبَطَل العجب والتحايل على القوانين لزيادة الجباية.
تقديرى المتواضع فى الرد على موضوع البوست:
أفضل مليون مرّة أن تحضر بسيارتك وتدفع الجمارك إذا كنت تنوى إستعمالها الشخصى ... أما للربح ... مافى ربح
على الأقل فى حالة الإستعمال الشخصى بتكون ضامن لها ولحالتها الميكانيكية طوال فترة إستعمالها.
|
Post: #49
Title: Re: ناس الخبرة والكرين: ماهي ضوابط تصدير السيارات للسودان؟
Author: بكري عباس علي
Date: 05-25-2010, 07:56 PM
Parent: #48
استاذ ابوبكر تحياتي
Quote: المشكلة التى صادفتنى وعن تجارب شخصية .... أن تقدير ثمن السيارة غير معروف وغير مُعلن عنه.
الجمارك لديها تقدير بالدولار لثمن كل سيارةوهى جديدة كأساس لإحتساب الجمارك المذكورة أعلاه وبدون إستهلاك.
ثالثة الأثافى:
الـــ 10% بتاعت القيمة المضافة يتم إحتسابها بطريقة عجيبة:
يتم إحتساب رسوم الوارد المُقدّرة ..... ثم يضاف إليها الرسم الإضافى ( مثلاً 40% من القيمة + 40% من القيمة) وبعد الحصول على مجموعهما .... نعم بعد حاصل جمعهما يقومون بإحتساب ما يقولون أنه 10% كقيمة مُضافة .... وبإجراء
عملية حسابية بسيطة يتضح أن القيمة المضافة هى فى الواقع 18% من قيمة الجمارك... هذا من جانب
معنى القيمة المضافة هى أن يتم تصنيع المُنتج بزيادة قيمته ... مثلاً يكون عندك سمسم تقوم بتصنيعه زيتاً فعندها
تُستحق القيمة المُضافــــة .... بس لو فى واحد يورينى القيمة المُضافة لسيارة أستلمها من الباخرة ويتم تقدير جماركها ووووووين لبَطَل العجب والتحايل على القوانين لزيادة الجباية.
تقديرى المتواضع فى الرد على موضوع البوست:
أفضل مليون مرّة أن تحضر بسيارتك وتدفع الجمارك إذا كنت تنوى إستعمالها الشخصى ... أما للربح ... مافى ربح
على الأقل فى حالة الإستعمال الشخصى بتكون ضامن لها ولحالتها الميكانيكية طوال فترة إستعمالها |
ده كلام سليم 100%
وبعدين في اضافات تانية وتحت مسميات ما انزل الله بها من سلطان المهم تدفع بس
|
Post: #50
Title: Re: ناس الخبرة والكرين: ماهي ضوابط تصدير السيارات للسودان؟
Author: الامين موسى البشاري
Date: 05-25-2010, 09:20 PM
Parent: #49
ســــــلام لكل الإخــــوة الذين عبروا من هنا ..
وأؤلئك الذين أثــروا البوست بمعلوماتهم وتجاربهم الشخصية مع الجمارك ووزارة التجارة
والخـلاصــة أن لا فائدة مرجوة من احضار سيارة من خارج الســـودان بسبب ارتفاع الجمارك والتعقيدات الكثيرة التي سوف تواجهك
إلا إذا كانت هذه السيارة للاستعمال الشخصي والفائدة الوحيدة المرجوة من ذلك هي انك سوف تكون ضامنهاً وعارفها كويس
ولكن عليك مقابل ذلك ان تبل رأسك لحلاقة جبايات الحكومة والجمارك
أكرر تشكراتي للجميع
____
الغريبة ولا واحدة من الأخوات مرت هنا .. لأن الموضوع خارج اهتمامهن
|
|