غايتو يا مورينهو أن خجلت ليك

أمس في مباراة خياليه من جانب برشلونه نسبة استحواذ علي الكرة 95% ومباراة من العصور الغابرة (10 مدافعين) من جانب انتر ميلان ، مبارة قمة الاثارة والمتعه لبرشلونه طبعاً ومبارة قمة الـــــــ (ماعارف اسميها شنو ) من طرف الانتر ، حقق المدرب مورينهو ماهو مطلوب ، ليصرح بعد المباراة بأن هذه المباراة سيحكيها لأحفاده ، هسي عليك الله تقول ليهم شنو ؟ تقول ليهم لعبت بي 10 مدافعين ، النبي كان تقول ليهم كده ، والله هسي أنا خجلان ليك لمن داير أخش جو ضفوري .

والله انا خجلان لقوارديولا اكتر
مورينو عامل راسه زي الدباسة قفل الميدان بعشرة ورمي ليه البايظ في الدقيقة تسعين
والكورة دي بطريقة قوراديولا لو كانت شغالة لحدي هسة ما كان بجيبوا التاني
كرهنا البارسا بيب قوراديولا ده

تحياتي فخر الدين

النصيحة ليك يا الله..

مورينهو سوى المابتسوى وجيه قوارديو وجماعتو..

الانتر ناقص من الدقيقه13 ..وغالب في ارضو والنتيجة صفر صفر وحتى الخسارة بفارق هدف تؤهله..!!

عايزو يعمل شنو؟؟

تهانينا يامورينهو ياعجيب..

يشهد الله الجنى اب رويس ده كان جانا المريخ..لاحولاااااااا

Quote: هسي عليك الله تقول ليهم شنو ؟ تقول ليهم لعبت بي 10 مدافعين ، النبي كان تقول ليهم كده ، والله هسي أنا خجلان ليك لمن داير أخش جو ضفوري .

يقول ليهم انه واجه اقوي هجوم في كوكب الارض حاليا واستطاع انه يطلع منتصر ..
يقول ليهم انه الكوره ما كلها اهداف ..
يقول ليهم انه بيعرف يختار متين وكيف يحرز اهداف ..
يقول ليهم انه مسئول من النتيجه وغير مسئول من انه انت او غيرك يستمتع او خلافه ..


وانا اقول ليك قوم لف شن عرفك بالكوره كمان انت ..

Quote: وانا اقول ليك قوم لف شن عرفك بالكوره كمان انت ..

خلاص قبلت على مساختك يا رباطابي ..

بالله احسن غوارديولا والا مازدا

عارف يا السموك منو ؟؟؟


والله مورينهو ده ينفع رباطي بس غير كده ما نافع بي قرش

عامل راسه الزي ضراب الكيته ده (وش بقرقر)

بس انا شايف انو ابراهيموفتش هو السبب الرئيسي في خروج البارسا

راجل الكوره كلها يتملس ويرجع في شعره وراء

Quote: عارف يا السموك منو ؟؟؟ والله مورينهو ده ينفع رباطي بس غير كده ما نافع بي قرش

كلامك صاح ..
هو انت معقول تقول حاجه غلط ..؟؟!!

يا فخر الدين الله يهدينا ويهديك بالله ركز في التحاويل القدامك دي اخير ليك ..

بالمناسبه دي اجري الكلب والا احلي الطحنية ؟؟

Quote: عارف يا السموك منو ؟؟؟


والله مورينهو ده ينفع رباطي بس غير كده ما نافع بي قرش




كلامك صاح ..
هو انت معقول تقول حاجه غلط ..؟؟!!

يا فخر الدين الله يهدينا ويهديك بالله ركز في التحاويل القدامك دي اخير ليك ..

بالمناسبه دي اجري الكلب والا احلي الطحنية ؟؟

سمحة العافية

هو نحن غير التحاويل دي الخلا الكورة تفك مننا شنو ؟؟؟

Quote: بالله احسن غوارديولا والا مازدا

كلهم بياخدوها تلاتات يا عمك (:

لكن يا حيدر عليك الله ده كلام ..
زي صاحبك ده داير يتكلم في الانتر ومورينهو ..اخر الزمن ..
هو التنظير ده في غيره حاجه مطلعه روحنا ..
قال خجلته ليه قال !!


ـــــــــــــــــــــــــــ
البتاع بتاع امبارح غطس وين يا حيدر ؟؟

Quote: كلهم بياخدوها تلاتات يا عمك (:

دا ما وجه الشبه زااتو يا السموك منو كااااااااااك

لكن اخونا دا ما تلومو الباسوورد الجديد محتاج يعتقوهو
زي الحلّة الجديدة اوّل شئ تغلي فيها سمن لمن يحرق عشان تاني ما تمسك ليك تحميرة البصلة

Quote: البتاع بتاع امبارح غطس وين يا حيدر ؟؟

قاعد يا السموك منو بس انت شكلك جليت الطواقي والشغلة

التاريخ يا فخر الدين يسجل النتائج
والأحفاد لن يهمهم إلا النتنائج
المتعة كانت في الذهاب
أما الإياب فهو للمحافظة على التقدم
فقط

Quote: لكن اخونا دا ما تلومو الباسوورد الجديد محتاج يعتقوهو زي الحلّة الجديدة اوّل شئ تغلي فيها سمن لمن يحرق عشان تاني ما تمسك ليك تحميرة البصلة

وانا من الصباح انده في الله يااااارب الخميس تدينا فيه بتاعه نقضي بيها عقاب اليوم (:
قلته لي زي الحله الجديده ؟؟ والا انت قاصد الطوه الجديده كااااااااااااااااك ..
غايتو شهادة البحث بأسمي بما اني حايم في الشمش من حته لي حته لمن لقيت البتاعه دي ..
عليه فقد قررنا انه نعمله وقف لمدة اسبوعين ..

Quote: قاعد يا السموك منو بس انت شكلك جليت الطواقي والشغلة

ابدا والله يا عمك مالقيته الا هسه ..انا قلته تكونو مشيتو الخور امس بالليل ههههههههههه
ارح هناك نشوف قصة ابو الحسن البيضاني ومورينهو الثعلباني .(:

Quote: ارح هناك نشوف قصة ابو الحسن البيضاني ومورينهو الثعلباني .(:

وررررراك

بس اهم شئ تدينا بعدين نسبة في الاستمتاع بحقوق ملكيتك الجديدة دي


يعني كل نهاية اسبوع اسبوعين تدينا حق تلاتة مداخلات بس ولو زدتها من خيرك وفضلك يا ثعلباني

الاخ صاحب البوست

انا برشلونابى حتى النخاع

لكن يتحمل الهزيمه غارديولا لا غيره ومورينهو مدرب كبير وبيعرف مقدراته جيدا وهو عايز شنو

غارديولا لعب بشخصيه البطل الذى لا يهزم ابدا ...برشلونه اتنفض من ايطاليا يا هذا

حين كان التيم غالب واحد صفر بره ارضو فى تلك اللحظه كانت فى ثغرات واضحه فى الدفاع كان يجب على غارديولا ان يستفيد بدل ان يخرج ابراهيم زفت ده ويدخل ابيدال كان من الاول يقفل املعب حتى لو انتهت المباره تعادل فده مكسب كبير ولو انتهت 2/1 برضو مكسب كان ممكن بهدف تطير الانتر لكن غارديولا غبى وليس بمدرب الا لناشئ برشلونه كما كان ولكن التيم جاهز ويقتله برشلونه اليس كان من الافيد امس ان يدخل بوجان بجانب ابراهيم فتش اليس تغيير خانه ميسى من الطرف الى الوسط غباء تاريخى كلها غلطات ..هنرى بيعرف بطولات اوروبا جيدا فلماذ جلس على \كه الاحتياط اليس كان من الافضل لالبدء بخطه هجوميه كاسحه تعدل بعد ذلك الى خطه متوازنه ..بعد تحقيق الهدف ولكن غارديولا ما عارف هدفه شنو من المكباره فقط عايز يستعرض ويهزم الفريق المنافس تحت اى لحظه وبدون معرفه امكانات الخصم المقابل ...........فريق برشلونه يحتاج الى مدرب كبير وطرف ايسر مثل روبن او روبينهو ومدافع زى ولكووت فى الطرف الايمن ف هذا دانياال الفيس ارعن ليس الا ولا يستاهل ان يكون فى تيم برشلونه .....يحمد لغارديولا حتى لا نتحامل عليه الاستعانه بابناء النادى من فريق الاشبال والناشئين والشباب والزج بهم لمعرفته امكاناتهم وهذهمحمدته الوحيده فليرجع من حيث اتى ويرفد التيم الكبير بلعيبه ويترك امر تدريب الفريق الكبير ......

مورينهو ثعلب وصار يكره برشلونه ومناه فقط هزيمه برشلونه لا غير وبعدها لا يهم لترسبات الماضى حين كان مساعد مدرب صغير جدا فى برشلونه ..لذلك لعب على التقفيل ونجح وهذا قدر المدربين الكبار ان يعرف خصمه ويعرف امكاناته هل تعلم ان فريق الانتر امس لعب ب ثمانيه لاعبين اصلا دفاع فقط والحارس ومهاجم واحد لعب فى خط الدفاع الايسر للانتر فى نهايه الامر وكسب ..فلا تخجل لمورينهو بل اخجل ل غارديولا .....الذى هزم برشلونه ذهابا وايابا

غايتو غير أبراهيموفتش زول جاب خبر البرشا دا مافي


أسعد زول في نهاية اللقاء

صمويل إيتو : عشان تاني تبيعوهو بتراب القروش بالمتعجرف دا

الكوره كلها يصلح في الطوق ويرجع في شعرو لي وراء

لامن رجع البرشا وجماهيرها ونحنا زاتو وراء


قوارديولا أكتر من كدا الا يقلع ويلبس الشعار ويخش يدخلها ليهم !


إنتو سيرة كورة السودان ( الدافوري ) داكـ فكيتوها مالكم ؟؟






هشام

Quote: إنتو سيرة كورة السودان ( الدافوري ) داكـ فكيتوها مالكم ؟؟

والله يا هشام ما فكيناهو لكن لا ايدنا لا كراعنا كنا غاطسين في سجمنا ورمادنا وطارق مختار وسادمبا ..
لحدي ما جانا صاحبك ده الظاهر طقته قزازه في كراعه عملت ليه حمي جانا طاير داير ينظر في الانتر وبرشلونه ..
دي ما ياها زاته قصة الفار السكران ..
والا دي قلة ادب رياضية