من فرط شوقي لـ «ابوعيالي» المغترب تركت مرشحي ووضعت علامة "صاح" لشبيه زوجي..

Quote: على الرغم من الأجواء الجادة والهادئة التي تسود مراكز الاقتراع المختلفة إلا انها لم تخل من المواقف الطريفة التي تصبح مادة دسمة يتداولها المقترعون فيما بينهم.. ففي المدرسة القرآنية الأساسية أحد مراكز الاقتراع بالكلاكلة القبة شمال بعض النساء دخلن في موجة ضحك متواصلة حتى لفتن أنظار الموجودين اليهن.. وذلك لأن رفيقتهن السيدة «نادية» جاءت الى المركز لتنتخب اشخاصاً بعينهم ولكن تغير مسارها من احدهم عندما وجدت في قائمة المرشحين لمنصب الوالي من يحمل ملامح قريبة لزوجها فما كان منها إلا ان وضعت علامة «الصاح» امامه من غير ان تعرف من هو..! وقالت: سبحان الله «نفس الملامح والشبه» ولكني حرمت مرشحي الذى اتيت لاختياره من صوتي واعطيته لشبيه زوجي وهذا يأتي من فرط شوقي واحترامي لـ «ابوعيالي» المغترب منذ «5» سنوات.. واضافت: لكن رزق شخص لا يأخذه آخر والدليل ما حدث اليوم مني..! أما «حنان» فهي الأخرى بما انها اخذت توعية مكثفة في كيفية الاقتراع ولكنها ارتبكت عند التصويت فقامت بوضع علامة «صاح» و«خطأ» امام كل مرشح.. كأنها تحل في امتحان..! وذكرت انها شعرت بالخوف واحتارت ماذا تفعل؟ وعندما علمت ان صوتها قد سقط اخذت تبكي وطالبت ان يعاد لها الاقتراع فقام أحد موظفى الاقتراع بتهدئتها وقال لها انه لا مجال للاقتراع مرة أخرى والفرصة وحيدة..!

http://www.alrakoba.com/news-action-show-id-24115.htm

Quote: صحيفة الرأى العام عدد الأربعاء الموافق 14 أبريل 2010م موقع الكاتب www.alfatihgabra.net لدى يقين لا يتزحزح بأن أى إنتخابات تجرى فى السودان و(الدول المجاورة) لن توضح بجلاء ما يريده المواطن، بمعنى أنها لن تكون معبرة عن الإرادة الحقيقية للمواطنين على الرغم من ذلك الشعار الرنان الذى يتردد فى كافة الوسائط الإعلامية مخاطباً المواطن بأن (صوتك أمانة) ! ولأننى أعلم تمام العلم بأن صوتى (لا أمانة ولا حاجه) فى ظل هذه (الجوطة) الحاصلة والإهمال وعدم الإنضباط فلم أشارك فى عملية التسجيل (من أاساسو) ، فهذا الصوت الأمانة لا يعنى أى شئ إذا ما فقدت الإنتخابات (الضبط والربط) وذهبت بقية (الأصوات الأمانات) إلى أصحابها ، فصوت (المواطن) يصبح أمانة فى حالة أن تكون العملية الإنتخابية كووولها (أمانة) ! فما معنى أن يكون صوتى أمانه فى الوقت الذى تضيع فيه أصوات أخرى كما حدث فى ذلك الخبر الذى وردته صحف الأمس والذى يقول : تفاجأ المرشح المستقل في دائرة نيالا وسط (3) زين العابدين المصري، مع بداية الاقتراع أمس بتغيير رمزه من اللوري إلى الجرس ! أى والله العظيم .. الراجل حملتو الإنتخابية كووولها يكلم فى أهلو وعشيرتو : - يا جماعة ما تنسو .. الرمز بتاعى اللورى ! - رمزى شنو؟ - اللوووورى ! - ح تأشروا قدام شنو؟ - اللووورى ! وبالطبع لم ينس هذا المرشح (المستقل) بأن يقوم بطباعة (بوسترات) عليها صورته وهو يعتلى (لورى 7 طن) رافعاً سبابته بعلامة النصر بينما يرفع بالأخرى (الكريزة) ! وهو ذات اللورى الذى قام بإستئجاره لتدشين حملته الإنتخابية وذلك بالتجوال وسط أحياء وفرقان دائرته الإنتخابية متوقفاً أمام الجماهير وهو يشير بيده إلى اللورى قائلاً : - ده شنو؟ - لوووورى! - الرمز شنو؟ - اللوووورى - ح تدو منو؟ - الللوووورى ! على الرغم من أن (زين العابدين المصرى) مرشح (مستقل) ولا يدعمه حزب إلا أنه لم يبخل بالصرف على حملته الإنتخابية وتعريف جماهير دائرته (باللورى) فهو وسيلته لتحقيق حلمه الإنتخابى ، لذا فقد قام بصرف (الوراهو والقدامو) .. شئ إيجار اللورى وشئ (جاز) اللورى .. وشئ حق السواق .. وشئ حق المساعد .. كلو (دفعو من جيبو) .. بالإضافة لى حق طباعة البوسترات الفيها (صور اللورى) ، بذل المرشح (زين العابدين) كل مجهود ممكن لتعريف الناخبين فى دائرته بأن (اللورى) ده هو شعاره ! وجاء يوم التصويت حيث ذهب (زين العابدين) ليدلو بصوته ... أمسك بورقة الترشيح فلم يجد أثراً (للورى) : - يا جماعة اللورى بتاعى وينو؟ مشى وين! - لورى شنو يا زول؟ إنتا جيت هنا بى لورى ! - ما جيت بيهو .. ما جيت بيهو.. يا جماعة اللورى ده الرمز بتاعى - أيواا ما تقول كده .. إنتا زين العابدين المرشح المستقل؟ - أيوا أنا ذاااتى - طيب ما تقول كده من الصباح .. رمزك بقى (الجرس) ! - معقولة يا جماعة ؟ من لورى لى جرس ! طيب كان تخلوهو لي (قندرانى)! - يا زين العابدين رمزك بقى الجرس وبطل الجرسة ! - ما أتجرس كيفن يا جماعة ؟ هسه البكلم ليا الناس دى يقول ليهم اللورى بقى جرس منو؟ بالطبع ليس هنالك وقت كيما يقوم (زين العابدين) بتأجير (لورى تااانى) وإعتلاءه ليطوف على مواطنى دائرته وهو يحمل (جرس) فى جيبه مخاطباً اياهم : - ده شنو؟ - ده شعارك اللورى يا زين العابدين ! - (يخرج الجرس من جيبه) : وده شنو ؟ - (الجميع) : ده جرس يا زين العابدين ! - (وهو ينزل من اللورى) : اللورى ده خلاااس غيرناهو ! - (فى صوت واااحد) : غيرتو لى شنو ! - (يدق الجرس) : غيرناهو للجرس ده ! غيرناهو لى شنو؟ - (الجميع) : للجرس ده ! - اللورى شنو ؟ - (الجميع) : غيرناهو - (وهو يدق الجرس) : غيرناهو لى شنو؟ - (الجميع) : للجرس ده !! حيوا معى جميعاً المرشح المستقل في دائرة نيالا وسط (3) المواطن زين العابدين المصري والذى لا يزال حتى هذه اللحظة يحتفظ بكامل (عقله) لأنى لو كنتا مكانو لأصبحت أحد معالم مدينة نيالا الرئيسة ولرأيتنى أيها القارئ الكريم هائماً على وجهى فى الطرقات أحمل داخل جيب (جلابيتى) المتسخة (جرساً) ما أن أشاهد أحد اللوارى يسير على الشارع حتى اصرخ فى المارة وأنا أشير نحوه قائلاً : - شفتو اللورى ده ! - شايفنو - هسه أقلبو ليكم جرس ثم أخرج الجرس من جيبى وأديهو كم (رنة) ثم إنخرط فى نوبة من البكاء ! كسرة : بينى وبينكم كده .. معقوله هسه الزول يمشى يصوت (للشجرة) يلقاها بقت (سمكة) !!

علي زوج السيده نادية انو يحس شوية ويبادل هذه السيده الاحترام والاشواق
ويشوف ليهو طريقة اجازة انشاءالله بدون مرتب .



ــــــ
غايتو قصص عجيبة
شكراً سيف اليزل

ثم السيد ده طوال خمسه سنينو دي ما سمع بي جعفر السقيد وهو بقول :
معذرة لومعاك مني الكلام حرا
ومعليش الخطاب كاتباه مضطرة
وراك أنا كم شقيت وعشت في مرة


.....


الي البيت القائل :
وخمسه سنين غياب
تجي فيها فد مرة

كامل تضامني مع نادية والله

ما يكون شبيه زوجها هو أب شجرة


دعوة لزيارتنا في :

دعوة لنقاش موضوعي: لماذا يصوّت كثير من السودانيين والسو... عمر حسن أحمد البشير

Quote: واضافت: لكن رزق شخص لا يأخذه آخر والدليل ما حدث اليوم مني..!

موووووووووبالغة...
الانتخابات بقت رزق
تقول لى ديمقراطية وحزب شيوعى يا خضر حسين ؟؟




اهدى صوتى الانتخابى للاهل بتندلتى وكوستى وجديد وسليمة والباح
واتمنى ان يصلهم صوتى عبر اسير الانتخابات السودانية ويجدهم
قد وضعو علامة ْ غلط اما رمز الاجابة صحيح..

والله صحي الرزق انتخابات يا بت الشيخ




هسي مثلاً أنا أمشي أدي صوتي لي تسابيح ولا الفهم شنو ؟

Quote: كامل تضامني مع نادية والله

وكامل تضامنى مع الاخ خضر حسين فى محنته الانتخابية
وقمر بوبا فى محنته التصويتية
وامين ياسمين فى محنته المعرفية
ولاعزاء لناس السودان الجديد




سؤال جادى ياخضر ..
والله مسالة التصويت دى مسالة معقدة... الناس الخارج نطاق التغطية
ديل صوتو كيف؟

كدي خليك من حكاية الناس البرة الشبكة ديل



موش بتتفقي معاي يا اميرة انو ناس المفوضية ديل
بالغوا بي ختة الصور دي ؟
لكن يحمدليهم انهم مالعبوا في الصور زي الرموز
والا نادية دي كان صوتت للستة كلها

والله ياخضر ...
المسالة لو مسالة شوق وكدا
معناها مغتربين الخليخ ديل كوووووووولهم يكونو صوتو على قدر الشوق
وفى ناس حتكتب جوابات عديييييييييل فى ورقة التصويت
بس ربنا رحمهم بانو التصويت فقط لمرشح الرئاسة,,







انا زاتى ياخضر مشتاقة لناس بيتنا اها اسوى شنو؟

والله ناس بيتكم ديل غايتو الا
تشوفي ليهم خلف الله عديل

خضر ,,,,

بمناسبة اشواق نادية ,,,,

شوفو لينا اى اغنية بتاعة اشواق وختها لينا هنا دا

اسى لى كم سنة ما شفتك؟






غايتو راجل نادية بالغ بوليغ شدييد

لكن بالجد نادية كيفتنى
ويلعن ابو الانتخابات زاتو
يعنى بقت على صوت نادية ؟

قالوا ارملة سودانية مشت لناس قاموا ادوها شكولاتة اسمها"تويكس" بتجي في شكل صباعين اتنين..المهم زولتنا اول ما فتحت الشكولاتة انطلقت في البكا و الجماعة يهدو فيها و يسألوها في شنو؟؟ بتبكي مالك هسه يا بت الحلال؟؟قامت من وسط الدموع اشرت على صباعين الشكولاتة و قالت ليهم:ذكروني كرعين المرحوم.


_______________________________________
الرموز ذاتها يا خضر ممكن تجهجه.

Quote: ذكروني كرعين المرحوم

والله لكن دي بالغت فوقا يا سيف
غايتو الزولة دي رايحة ليها
تويكس ساي



قال كرعين المرحوم
ـــــ
كرعين المرحوم ما بنعرفهم نحنا

Quote: على صباعين الشكولاتة و قالت ليهم:ذكروني كرعين المرحوم.

غايتو يا سيف دى بالغتها فيها ..

يعنى وجه الشبه النعومةولا اللون ولا شنو بالضبط ياسيف؟


ولا دا اسمها يغنى المغنى وكل على ليلاه


_________________________________________________
عاشت نادية ..
وعاش صبر المراة السودانية على الزوج المغترب..

دة بوست ريكومندد خالص خالص

يا زوج نادية .... لو قرأت هذا الخبر

أنزل السودان فوراً أو استقدم زوجتك لتعيش معك حيث كنت


ويا أزواج (أخوات نادية) نفذوا الطلب أعلاه

Quote: يعنى وجه الشبه النعومةولا اللون ولا شنو بالضبط ياسيف؟

الضعفة و اللون يا اميرة..انت ما ملاحظة انو السودانيين كرعينهم رقاق و للا شنو؟

قصة غريبة

اهلنا قالو احر فتره في الغربه العشرين سنه الاولي

ربنا يصبرك ساكت يا بت الناس

لووووووووووول@ نادية



الامريكيات موش قالو بدو الرئيس الوسيم ما يهمهم ياتو حزب


على الاقل نادية ادت شبيه زوجها..


نكتة التوست في السلك

Quote: قالوا ارملة سودانية مشت لناس قاموا ادوها شكولاتة اسمها"تويكس" بتجي في شكل صباعين اتنين..المهم زولتنا اول ما فتحت الشكولاتة انطلقت في البكا و الجماعة يهدو فيها و يسألوها في شنو؟؟ بتبكي مالك هسه يا بت الحلال؟؟قامت من وسط الدموع اشرت على صباعين الشكولاتة و قالت ليهم:ذكروني كرعين المرحوم.

it's fabulous dr saif, my tears fell down

الست نادية عبرت عن قضية مهمة بطريقة مباشره

يعني الاغتراب مشكله للاسر خاصة لمن يطول.. وهنام ملايين من المغتربين
وهم مشكله وايضا لهم مشاكل..الخ

لم يفلح مرشح واحد في التقاط هذا الهم الواسع

بهذا السلوك الصادر وعيا او لا وعي.. كشفت نادية
عن كون هذه الانتخابات بعيدة عن هموم الناس!!

ثانيا:الست نادية صوتت للحب وهو ما قتلته الحكومة واهل السياسة
ياخ ايه المانع يكون الحب بند انتخابي؟

قال مصطفى سعيد: كنت ادعو للاقتصاد القائم على الحب، ليس الارقام



معليش سجارتي كملت..

Quote: الضعفة و اللون يا اميرة..انت ما ملاحظة انو السودانيين كرعينهم رقاق و للا شنو؟

الليلة وووووووووووووووب ياسيف

يعمينى ماشفتهم مما فتحتها البنات لابسات طويل وفى رواية اخرى محجبات
والاولاد لابسين بناطلين او جلاليب..

اها اكون شفتهم وين

Quote: اها اكون شفتهم وين

البنات لابسات طويل نعم، بس ما لدرجة ما تشوفي كرعينهم..و الاولاد و الرجال قدامك واحد من حلين :
تمشي اي ميدان من ميادين الروابط او كمان عليك بالاخوة في انصار السنة .

Quote: تمشي اي ميدان من ميادين الروابط او كمان عليك بالاخوة في انصار السنة

سيف النصر ...سلاااام

انصار السنة لااااااا النبى فيك تبعدنى
كل شئ ولا انصار السنة انا فى وشهم مابقدر اعاين تقول كرعينهم

اسى يعنى يا سيف فى داعى تحرف البوست دا



البوست من فرط اشواق نادية وصل لكرعين راجل الارملة..

قصة تحير والله




________________________________________
موضوع ميادين الروابط دا ينظر ويفاد

look here please

أتمني أن يفوز بهذه الجائزة سوداني...

Quote: انصار السنة لااااااا النبى فيك تبعدنى كل شئ ولا انصار السنة انا فى وشهم مابقدر اعاين تقول كرعينهم

حولااااااااااااااااااااااااااااا
والله دي أقوى من النكتة الأصلية زااااتا
الأخت رباطابية ؟؟؟؟؟
سلام أميرة
وسيف
والجميع

__________________________

في إنتخابات 1986 ترشح الأستاذ يسن عمر الإمام والأستاذ محمد إبراهيم نقد في دائرة السجانة أو الديم على ما أذكر . كان رمز الأستاذ نقد هو ( الغزالة ) . إنبرت أحد الأخوات المسلمات فقط لتحذير نساء تلك المنطقة من خطورة التصويت لـ ( الغزالة )
أوع الغزالة
الغزالة بتجيب الكفار
الغزالة بتوديك النار
الغزالة ..
الغزالة..

حتى كان اليوم الأخير للإنتخابات
دخلت هذه ( الأخت المسلمة ) لتدلي بصوتها
فجأة فوجئ الجميع بها وهى تبكي في حالة بتشنج وهستيريا

" أنا صوت للغزالة .... سجمي أنا صوت للغزالة ... "

___________________

والله يا نادية إنت صااااااح
يحيا الحب
تسقط السياسة

Quote: راجل الارملة

ده غايتو ما في زول بيقدر يقول عليهو حلو حلاة و للا ما حلو حلاة .
كرعين الزملاء في انصار السنة ما دايرت ليهن معاينة يا أميرة..حيفرضن نفسهن عليك حيث انهن من الاعضاء
شديدة الظهور لدى هؤلاء الاخوة...
و بعدين ما اتخيلتك تختاري الروابط لأنو خطر اصابتك بكورة طايشة كبير جدا هناك.

Quote: الست نادية صوتت للحب وهو ما قتلته الحكومة واهل السياسة ياخ ايه المانع يكون الحب بند انتخابي؟

يا خضر سلام

نادية تلفت انتباهنا لمشكلة مهمة وخطيرة

والسودان مشاكلو كثر

كل املنا ان يعم السلام والرخاء

وتعود كل الطيور المهاجرة

مودتي

سيف

عميق شكري لجميع المتداخلين

بدون فرز

ودعونا نواصل النقاش عن هذه المشكلة الخطيرة

مودتي

سيف