بالصورة ... موظفو المفوضية يتتنقلون في ضيافة المؤتمر الوطني

لمحة من عدم النزاهة و الحياد

موظفة المفوضية الدائرة 8 بورتسودان حى هدل تركب مع رئيس اللجنة الشعبية مربع 7 حى هدل المدعو امين بكرى فى عربته التاكسى وهو ايضا وكيل للمؤتمر الوطنى بهذه الدائرة اثناء العمل وجوار المركزالانتخابى

حتى ما أتذكرت تغير مريلة الأصم إياها

Quote: بالصورة ... موظفو المفوضية يتتنقلون في ضيافة المؤتمر الوطني

والمشكلة وين يعني؟ ليس في الامر ادني شبهة


يمكن يكون زوجها ، قريبة ، ود جيرانا ، زميلة في الشغل بعرفا من زمان قبل الانتخابات


فزعة ساكت من باب فضل الظهر


زهرة ابتعدي عن القضايا الانصرافية

Quote: والمشكلة وين يعني؟ ليس في الامر ادني شبهة

صدقت ، المفوضية هي المؤتمر الوطني والعكس .زيتنا في بيتنا.

الأخت زهراء تحياتي
---------------------
احتمال قريبتوا ؟؟ وموصله البيت ؟؟ ما نظن في الناس ساى

زهرة حيدر ..
اتعودنا علي من الاقلام الجادة ..
اول حاجة يا زهرة حيدر .. دا انتهاك لحقوق المواطنة الفي الصورة .. تصويرها بدون اذنها .. وعرض صورها في مكان عام ..
تستطيع ان تقيم عليك دعوى قضائية .. و بتعتبر قضية ساهلة جدا ..
الحاجة التانية لا يعنينا مع من يركب الموظفين في المراكز الانتخابية .. دا عمل مكلفين بيهو امام الله و امام ضميرهم و امام الشعب ..
الموظفة دي لو داير تتلاعب ممكن تلقى ليها طرق تانية كتيرة .. ما يكون متاح ليك انك تصوريها ..
لكن مالو نشوف حقك انتي .. بدل التشهير ببت الناس في الانترنت .. ( لانه يجوز انه عندها زول ما برضى ركوبها مع الشخص دا ) .. بدل التشهير مش كان ممكن تذهبي للاستسفار في المفوضية ..
او تقديم شكوى .. او حتي توكيل محامي و الذهاب الي المحكمة ..
و علي ما اظن انك ما بتقيمي في مدينة بورسودان .. يعني الصورة جاتك عن طريق وسيط علي ما اعتقد .. ليه يا زهرة بتدخلي نفسك في مأزق قانوني ذي دا ..
علي العموم اتمنى تمسحي الصور دي .. و تشيري للحادث بالنص .. و اتخاذ الاجراءات المؤسسية من خلال الحزب لمعرفة مدى الضرر من ركوب احدى المزظفات العاملات في المراكز عربة تاكسي مع شخص ينتمي الي حزب انتي ما بتحبيهو ..

..
..

بالمناسبة لدي صور كمية .. لشيوعيين لاعبين دافوري مع كيزان .. ( ممكن بعد الانتخابات نفتح بيها بوست نسميهو الشيوعيين و الاسلاميين - زواج المتعة )

معقولة يا جمــاعة ... معقولــة ..؟
..

الزولة دي .. شايلة شنطة في ايـده واللا راكبـة ساااي ..؟
لو شايلة شنطة اكيد تكون شايله فيها جردل بتاع حبـر .. من النوع البطمزو فيهو المصابعين البطلع من اليد وبروح بي سرعة ..
لاحظ عزيز بشاشا القارئ .. قلنا جردل عديل كدا ..
عادي جدا زهرة دي تتحرفن وتدخل الجردل جوه الجك ..

ياخ مرات كتيرة بقرا لي كلام .. احس بي راسي عمل زننننن ..

تبا...
لهذا البورد ..
معاً...
لعمل كشف طبي بعد قراءة اي بوست اليومين دي ..
ــــ

فوجئت بالسماحة السودانية الاصيلة في هذا البوست

تخيلوا انكم في هذا المركز وامام اعين المراقبين يدخل ويخرج ممثلوا المفوضية المفترض فيهم الحياد مع منسوبي حزب بعينو ...

حتى لو ادت المفوضية بحياد 100% هذا التصرف معيييييييييب وغير مسئول

ناهيك عن كل هذه الفوضة التامة ...مايثبت كل يوم هو ان موظفوا المفوضية (بافتراض حسن النوايا لا غير)غير مؤهلون وغير مدركين لمسئولياتهم وواجبهم ومتطلبات اداء هذا الواجب

ده بافتراض حسن النوايا وبمنتهى السماحة السودانية اكيد

نجي لمسالة التصوير بدون اذن دي... يا حميدة نحنا في الانتخابات وهذه الصور التقطها مراقبون ..اثبتو بيها عدم المسئولية والاستهتار (بافتراض حسن النية)..يعني دي مهامهم ..وبعداك مسالة اثبات الحالة فالصورة اثبتتها وهي ضمن رصدنا للتجاوزات كحزب وحنقدم بيها الكتاب الاسود(زي ما قال عادل عبد العاطي)) في وقتها

عموما شكرا على رفع البوست

بوست لا يشبه المنتمين للتحالف الوطني السوداني.

Quote: اول حاجة يا زهرة حيدر .. دا انتهاك لحقوق المواطنة الفي الصورة .. تصويرها بدون اذنها .. وعرض صورها في مكان عام .. تستطيع ان تقيم عليك دعوى قضائية .. و بتعتبر قضية ساهلة جدا ..

لا .... لا تستطيع إقامة دعوى.

موظّفة المفوّضية، في هذه اللحظة، هي شخصية عامة، ولم تلتقط صورتها بصفتها (مواطنة) كما ذكرت. وصفتها في هذه اللحظة، لك أن تلتقط صورتها وتنشرها، وتنقل كل ما يصدر عنها من حديث.

Quote: .. دا انتهاك لحقوق المواطنة الفي الصورة .. تصويرها بدون اذنها .. وعرض صورها في مكان عام .

وعملها في المفوضيه لايجعل منها شخصيه عامه..
وحق الخصوصيه لايسقط في (مشوار التوصيل)..
الاخت زهره احتراما مني لك ولتنظيمك المحترم جدا..
اتمني ان تمسحي الصورة التي تظهر فيها هذه الاخت..
فقد وصلت رسالتك..
ومع تعقيدات هذا الوطن اتمني ان تعي انك ربما تقومين بضرر لهذه الاخت..
هذا مع وافر احترامي.

والحديث عن تجاوزات المفوضيه (اصبح ممل جدا)..
تجاوزات مخجله احيانا..
رفض تسليم اورنيك (سبعه ولاثمانيه ماعارف)..
رفض طلب بعض المراقبين في مراجعة هويات البعض (هم مراقبين شنو طيب..؟؟)
اشتهار معظم الموظفين بالاحياء بانهم (كيذان قدام)..ّ!!!!!
والكثير الذ ي يدل علي ان الحكومه افتقدت حكمتها تماما في هذه الانتخابات
ربما ضمان الراي الامريكي (قدس سره) جعل الحكومه غير عابئه بهذه التجاوزات وقوة العين..



_________________
صورة واحده بس الظاهر فيها ملامحها
عليك الله امسحيها

http://www.youtube.com/watch?v=HQ2yO8j50yU

فيديو لقناة الحره يتحدث عن تجاوز خطير
بحضور مدير مركذ

* والله يا زهرة مافي زول شغال بالتجاوزات
بس امسحي صورة المسكينه دي
واعتبري الفيديو هديه مني في موضوع حيادية المفوضيه ده

Quote: يمكن يكون زوجها ، قريبة ، ود جيرانا ، زميلة في الشغل بعرفا من زمان قبل الانتخابات

ياسيدح ..عافاك الله المقصود بعيد عن ظنك صدقني .

على كل حال يازهرة هي من باب التعاون شيلني واشيلك

او الحشاش يملأ شبكتو كما لغة اهل المؤتمر والعنقالة

سلوك يجد الادانة والاستنكار ولا يليق بموظفة عامة في

جهاز يتطلب الحياد والدقة والانضباط ..




شكراً زهرة .



............................................حجر.

Quote: موظّفة المفوّضية، في هذه اللحظة، هي شخصية عامة، ولم تلتقط صورتها بصفتها (مواطنة) كما ذكرت. وصفتها في هذه اللحظة، لك أن تلتقط صورتها وتنشرها، وتنقل كل ما يصدر عنها من حديث.

ابو العزائم ..
حديثك غير صحيح .. لا بالقانون و لا بالمنطق ..
موظفة المفوضية تمثل مؤسسة .. و حقوقها كمواطنة لها حياتها الخاصة لا يدخل ضمن الشأن العام .. ألا بتحقيق قضائي ..
لا يحق للافراد تجريم شخص او ابداء رأي سالب و التشكيك في نزاهته بدون تحقيق رسمي عن طريق القضاء ..
هل تستطيع انت او زهرة حيدر ان يحدد ما هي العلاقة بين موظفة المفوضية و بين سائق التاكسي المجهول الهوية ..
لماذا علينا التصديق بأن صاحب التاكسي هو الشخص المذكور لمجرد تصوير موظفة المفوضية تركب في مركبة تعتبر عامة .. ( رغم وجود رقم لوحة العربية لكن لا يوجد مستند رسمي يوضح لمن تعود ملكية العربية ) ..
هل في القانون نص صريح يمنع موظفي المفوضية من الركوب مع احد المنتمين الي الاحزاب التي تخوض الانتخابات ..

..
..

اسلوب تلفيق الاتهامات بدون دليل واضح اسلوب ظل يعاني منه السودان في الفترة الماضية .. و المعارضة مفروض انها جاءت لتزيل مثل هذا الظلم ..
لمن يكون اسلوب اعضاء الاحزاب المعارضة بنفس الاسلوب دا ..
بقول .. نحن نروح الاسم .. و تضربوا لما يبانلكم صاحب .. سلومة الاقرع ما اعرفش اخوه ..

يازهرة دا بيعنى انها متأمرة معاهو ..؟
يمكن ركبت معاهو مشوار .. مش تاكسى أجرة .؟؟

Quote: سلوك يجد الادانة والاستنكار ولا يليق بموظفة عامة في جهاز يتطلب الحياد والدقة والانضباط .. شكراً زهرة . ............................................حجر.

..
تأمل عزيزي القارئ .. تأمل في هذا الصباح

مسكينة بت الناس .. حقك علينا.. اعصري بطنك باقي ليك يوم واحد .. تميهو كداري المسامح كريم .. (مناضلين الكيبورد) ديل ما تستبعدي يقولو اي حاجة عايزين يقولوها ..

المستفاد من هذا البوست :
إنتهاك للخصوصية و قزف في الاعراض و تشكيك في الذمم





ـــ
بوست غير موفق .

الاخـوه المتداخلين جميعا ..

حرصا على سمعه البنت المسكينه ..
وكراهيه في السياسه ولعبتها القذره ..

الرجــاء عدم التداخل في البوست وتركه (يغطس) ..
نظـرا لانو صاحبه البوست رفضت مسح الصوره .. الصوره فقط يا زهره ..زي ماقال ليكي نعيم ..


يا زهره .. احترم حزبك وتنظيمك جدا جدا ..
لو حريصه على استمراريه النقاش .. رجـاء .. رجـاء امسحي الصوره ..

تحيـاتي ..

ما عارف الذكرني دكين شنو ؟؟
محتاج استلف ( عباراتو الوغده ) هنــا

كان هذا ردي على رسالة ارسلها لي الاخ حميدة في المسانجر:

Quote: يا ود الناس انا ابدا مابعاين للمسالة بالشكل ده...المسالة بالنسبة لي انوالمفوضية مفروض تلزم عضويتها انو يحرصوا على الحياد والتعامل مع الامور دي حساس جدا ...يعني لو كان اخوها مفروض اثناء العمل طالما انو وكيل حزب من الاحزاب المتنافسة تتعامل بحذر معاهو...عدم ادراكها لذلك ووعيها له يعني ضعف تاهيل المفوضية لكوادرها وبس

اعتقد ان البعض قد ذهب بعيد جدا عن المقصود بالوبست ...وهذلا ينفي انني نظرت للامر ايضا بسذاجة ودون عمق عن تبعاته التي يمكن ان يرى بها الموضوع ...اتمنى ان يقبل اعتذاري

تم سحب الصور

Quote: تمنى ان يقبل اعتذاري تم سحب الصور

يا ها المحريه فيكم يا زهرة
عظيم الاحترام




_____________
بكـــــــــــــــــــــــرة أحلي

Quote: تم سحب الصور

.. تم حفظ الصورة في مليون جهاز كمبيوتر حول العالم ..
- في كمبيوترات المعارضين .. كدليل على انتقال موظفو المفوضية في ضيافة المؤتمر الوطني (لاحظ عزيز بشاشا القارئ (موظفو) دي عاملة كيف) ..
- في كمبيوترات الناس السـاي .. كدليل (اندهاش)
- في كمبيوترات أخرى .. كذكــرى .. فإن (الذكري ناقوس يدق في عالم النسيان) ..
في كمبيوتر (كوستــاوي) .. (وتراجي) .. (والمستكاوي) .. عشان يمشو يوم السبت الجاي يودوها لي أوبامـا..

هو الصورة تنزل في البوست بي جاي .. البوست ثانيتين ما يقعد تلقى .. كوستاوي طاااخ طراخ .. حفظه في ماي بكشر .. شايلاها لي شنو يا زهـرة .. والله مني ومنك اخليها في بوستيها.. واشوف الليلة الزولة دي بترجع بيتم كداري واللا بي عجلة ..

tmbis

Quote: تم حفظ الصورة في مليون جهاز كمبيوتر حول العالم .. - في كمبيوترات المعارضين .. كدليل على انتقال موظفو المفوضية في ضيافة المؤتمر الوطني (لاحظ عزيز بشاشا القارئ (موظفو) دي عاملة كيف) .. - في كمبيوترات الناس السـاي .. كدليل (اندهاش) - في كمبيوترات أخرى .. كذكــرى .. فإن (الذكري ناقوس يدق في عالم النسيان) .. في كمبيوتر (كوستــاوي) .. (وتراجي) .. (والمستكاوي) .. عشان يمشو يوم السبت الجاي يودوها لي أوبامـا.. هو الصورة تنزل في البوست بي جاي .. البوست ثانيتين ما يقعد تلقى .. كوستاوي طاااخ طراخ .. حفظه في ماي بكشر .. شايلاها لي شنو يا زهـرة .. والله مني ومنك اخليها في بوستيها.. واشوف الليلة الزولة دي بترجع بيتم كداري واللا بي عجلة ..

المشكلة وين عارفها اني ما شايفة في الصورة غير عدم حياد وضعف تاهيل وعدم ادراك لمتطلبات الدور الذي ارتضت ان تؤديه.. وحقيقي بالنسبة لي ما فارقة ان كانت فتاة او رجل ولا من هو سائق العربة ان لم يكن وكيل للمؤتمر الوطني شخصيا...وما كانت فارقة لو لم تكن اثناء تاديتها عملها وبزي الحياد المفترض يكون

لكني ايضا احترمت الطريقة التي نظر لها المتداخلون للموضوع اتفقت معهم او لا وسحبتها

thats all

واكيد احترم وجهة نظرك واستنكارك ومخاوفك وهواجسك

Quote: موظفة المفوضية الدائرة 8 بورتسودان حى هدل تركب مع رئيس اللجنة الشعبية مربع 7 حى هدل المدعو امين بكرى فى عربته التاكسى وهو ايضا وكيل للمؤتمر الوطنى بهذه الدائرة اثناء العمل وجوار المركزالانتخابى

Quote: المشكلة وين عارفها اني ما شايفة في الصورة غير عدم حياد وضعف تاهيل وعدم ادراك لمتطلبات الدور الذي ارتضت ان تؤديه

.. كنت ببحث في رابط لي كلامك دا يا زهــرة .. في ركبان الزولة دي مع بتاع المؤتمر الوطني .. في التاكسي بتاعو .. وفي عدم الحيادية .. وضعف التاهيل وعدم إدراك المتطلبات للدور ..
ركبت معاهو بعداك البترتب على المسالة دي شنـو؟؟
ركبت معاهو .. ح يعملو شنو بعداك ..؟ ح يلزمه تلزم الناس إنهم يدو المؤتمر الوطني .. لما يجو للتصويت أم انها تأشر لي الناس صاح في مكان الشجرة ..؟
هل المفوضية العليا للانتخابات نزلت في القانون بتاعه إنو الشغالين في المراكز ولابسين المريلة البرتغالية دي موفرة ليهم سبل ترحيل .. من وإلى اماكن عملهم خلال فترة التلاتة أو الخمسة ايام دي ..؟
بعدين السؤال البطرح نفسو يا زهـرة .. أنا الشفت الصورة دي وعلقت عليها .. عرفت إنو الزولة دي شغالة في مركز انتخابات .. وارتضيت بالمسالة دي .. اعرف كيف إنو الزول الفي التاكسي دا مؤتمر وطني وكل ما تفضلتي بيهو ..؟؟

Quote: واكيد احترم وجهة نظرك واستنكارك ومخاوفك وهواجسك

.. احترم احترامك لوجهة نظري .. بس ممكن لو سمحتي تبيني لي مخاوفي وهواجسي دي شنو بالضبط .. ياريت والله ..

Quote: ومخاوفك وهواجسك

انت يا تمبس بتلت وتعجن لي شنو ؟؟؟
ننادي ليك ايمن يترجم برضو؟؟!

زهرة بالواضح بتقصد هواجسك
انو ناس كوستاوي وغيرهم وغيرهم
يكونو حفظو الصورة دي .

قوم لف ياخ بقيت مسطح زيك
زي ود الصايم .

Quote: زهرة بالواضح بتقصد هواجسك انو ناس كوستاوي وغيرهم وغيرهم يكونو حفظو الصورة دي .

كوستاوي وود الصايم وتراجي .. وخدر منو يا سيكــا .. ؟؟
ياخ الواحد اليومين دي بقى قااعد ساااي كدا ..
تمسك محمد عادل يطلع ليك الزيادي ..
يفكوك من حجر..... تطلع ليك زهــرة .. زهرة تلت وتعجن ليك .. تلقى نفسك لاايدك لا كراعك قدام المجلس التشريعي وواحد مقبقبك من فنيلتك ..

إنت يا سيكا الانتخابات دي الغالب فيها منو لحدت الآن .. ؟؟
بي صورة أوضح :
الكورة دي كم .. كم ...؟

Quote: قدام المجلس التشريعي وواحد مقبقبك من فنيلتك ..

طوووووووووووووووالي تكورك لي وليد الشفت يجي يحلك .

Quote: إنت يا سيكا الانتخابات دي الغالب فيها منو لحدت الآن .. ؟؟ بي صورة أوضح : الكورة دي كم .. كم ...؟

أنت قايلني الفقس (الفقس بتاع العباسية)
عشان اعرف اجاوبك ؟؟!!
بس الضامنو ليك انو المغلوب الشعب السوداني .

نظل نسأل كل يوم في هذا المنبر
يا احزاب الغفلة إنتو
لحدي متيييييييييييييييييييييين النضا ل حيكون بأعراض الرجال !!!!!!!!!!!!!!!!!

Quote: الكورة دي كم .. كم ...؟

6 - صفر يا تمبس

ولا عزا للمناضلين

Quote: سلوك يجد الادانة والاستنكار ولا يليق بموظفة عامة في جهاز يتطلب الحياد والدقة والانضباط .. شكراً زهرة . ............................................حجر.

...

عاين زي دا عليك الله ..؟