في لحظات زي دي بتحس تماما بقسوة الغربة

الحاصل علي البلد وقعه ما هين و المتوقع مرعب يضاف لدا كله
جزع الزول لمان يكون بعيد تزداد غتامة الاحداث في نظره
كحال من يبلغ في منفاه باستحضار احد اعزاءه

لو كنت قريب بتاخدك التفاصيل و لا تتركك لتذهب بك الهواجس
كل مذهب، تكون جزء من الحدث
الواحد اعصابه بايظة راقدة واطـــة

بس نسأل الله اللطف
بنا و بالاهل و الوطن
و نتمسك ببصيص امل
و ثقة في عدالة السماء

Quote: لو كنت قريب بتاخدك التفاصيل و لا تتركك لتذهب بك الهواجس كل مذهب، تكون جزء من الحدث الواحد اعصابه بايظة راقدة واطـــة

إحساس مشترك , الله يجيب العواقب سليمة

Quote: إحساس مشترك , الله يجيب العواقب سليمة

نفس الاحساس المر

أي إحساس أصفه لك يا صديق!

الاعزاء سناء، باسط و مؤيد
الحال من بعضه
بس نقول يا لطيف

Quote: لو كنت قريب بتاخدك التفاصيل و لا تتركك لتذهب بك الهواجس كل مذهب، تكون جزء من الحدث الواحد اعصابه بايظة راقدة واطـــة

العكس تماما يا نصار
كمواطن سوداني قاعد ومراقب جوة ومافاهم الحاصل الموضوع بقلق بالزول اكتر،لا لنا في الاحزاب ولا بممارساتها فقط تمنينا ان ينصلح الحال ويتقبل الحزب الحاكم شراكات مع احزاب اخري لها قواعدها في عملية اقرب ما تكون للمنطق انو ده هو المفروض يحصل.
مارسوها جزء اونطة وجزء ترهيب وترغيب وجزء حقارة وما كانوا حريصين اصلا لسلامة البلد ولا صورتهم ولا اي شي تاني.
كمواطن تعاملت مع الموضوع بشئ من عدم الاهتمام يمكن لحسابات انو تغيير الامور صعب ود اصعب احساس ممكن يصل لمواطن في بلده انو انت بصوتك ولا معاك الناس كلهم ممكن تغير حاجة.
في التسجيل مارسوا معانا نفس الاونطة لما جوا خبتوا لي الباب وكنت قاعد براي قالنوا امش سجل اسمك قلت ليهم وين وهو في شنو قالوا للانتخابات ،قلت ليهم انتو عايزني اغير هدومي واركب عشان اسجل اسمي عشان اصوت في انتخابات انا عارف سلفا وانتو عارفين سلفا نتيجتها؟؟
وكنت بضحك علي اصحابي العندهم احزاب وتوجهات سياسية انو لما يقولوا امشوا سجلو
اها في ناس من الاحزاب التانية سجلوا وطلعوهم هم ذاتهم موالين للحزب الحاكم

فيا نصار الاحساس ده بيلازم اي مواطن سوداني واقف في ضفة تانية غير الحزب الحاكم فما تظلم الغربة ساي لانو غربة عديل احسن حضن بلد مجهجه بالطريقة
وروحك ما ترهقها والله في

الواحد اعصابه بايظة راقدة واطـــة

بس نسأل الله اللطف
بنا و بالاهل و الوطن
و نتمسك ببصيص امل
و ثقة في عدالة السماء

الاحساس بالقهر والعجز اشد قسوة واكثر مرارة,,,
كنت بتمنى ولو لومرة واحدة نشارك فى اختيار من سيمثلنا
كنت اتمناها,,,نزيهة,,,عادلة,,,حتى نشارك جميعنا,,,
ويكون الحكم لصناديق الاقتراع وليس لسطوة وبلطجة المؤتمر الوطنى,,

العزيز قمر بوبا
نعم الغربة الداخلية مؤلمة
نعم ان سلب ارادة الانسان و منعه من العمل لخيره و خير وطنه و اهله محزن
نعم ان الاستغفال و الاستهبال موجع
نعم ان ادعاء فئة بانها الآمرة الناهية، القيمة الفاعلة، الواحدة التي لا شريك له يخلي الزول يعضي ايديه
و هنا دعني اشوه بيت الشعر هذا ليعبر عنا
بكل تداوينا فلم يشفي ما بنا على ان قرب الداري خيرا من البعد
على ان قرب الدار ليس بنافع اذا كان (ما) تهواه (من تولاه) ليس بذي عهد

من تغربوا عانوا من الغربة الداخلية اضيفت لها غربة المكان
الهواجس يا صديقي قاتلة
و الله اكتب الان و عيوني مبللة بالدموع
ليه كل دا
و ما هو المصير؟

يا نصار والخلاني اكتب ليك انو حسيت بيك لانواتغربت زيك
لكن يا نصار هون عليك

دي رحلة لازم نمشيها فيها شوك؟؟الليبقي فيها مآسي اي نعم فيها فيها انو نحن شعب كبير وقادر وكان علينا نتم العلينا عشان نبقي في حال افضل من كدة.
دونك سيرة شعوب الآن عظيمة مشت في دروب أوحل من كدة ووصلت مع وجود فرق انو الشعوب اتعلمت من حروبها وحاكمت دكتاتورياتها ، والزمن داك بجي يا نصار بجي،بتجي اللحطة البتخلق جوا اي زول قناعة انو الكان بحصل ولسة ممكن يحصل ما هو الشي المستقيم في اللحظة بجي تغيير ويمكن بعد تعب وارهاق ماكان في ليه داعي.
هي مسيرة مكتوبة علينا ونمشيها والبراهن علي خيبة شعب يوم من الايام بتعلم برضو

ياخي الله يجبر خاطرك يا قمر
انا مؤمن في انه في النهاية المحن دي و خصوصية الشعب السوداني و توفيق الله
ح توصلنا لتجاوز التردي المريع الحاصل
لكن ما هو الثمن؟
مشكلتنا كأجيال معاصرة ان نعايش مراحل احتداد الصراع البيسبق التغيير
في حين انه كما ذكرت انت قد تخطت هذه المرحلة و اجيالها الحالية
تستمتع بالاستقرار و الرخاء و التطور
نحنا نعيش الان في هذه الدول و نحظى باحترام انسانيتنا لكن لن و لم
يكون ذلك بديلا لوطنا
بل توفر عنصر المقارنة بين هنا و هناك يعمق احساسنا بالازمة