Post: #1
Title: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 04-25-2004, 03:47 PM
Parent: #0
أجمل خبر
راجيين سنين
طلّة بهاك
وتجينا يا أجمل خبر
زي الدُعاش
فتَّح مياسم الزهره
في الأرض البكر
و زي الصباح
فارد شـراع النشوه
و الليل إنحسر
و تجينا يا أجمل خبر
يسعد نفوسنا
الهايمه في ريدك
تصارع في القدر
رغم الظروف
رغم الموانع
والدروب الحبلى
بي كل الخطر
تتشابى أرواحنا
وتحلّق في مداك قبل النظر
بنغوص جوّانا
نفتّشك... و نأترك
وبنسأل الشوق العصف
حامل منانا لعلّو
يلقالك أثر ...نتّبعك
ونستف الشوق في الدموع
ملفوفه خاطر منكسر
مرسول غرامنا الما همد
لا إندسّ في الخاطر هجد
لاكن ...كمان
عجز القلم المن سنين
في حسره عدمان الحبر
ونرسّل الآهات تطوف
تحكي الكتير...
طيّاتها حاضنه لى ألف سر
يشرح حزنُّا
الفي مكامن جوفنا
إترعرع ..كبر
وألم الجراح النوسرت
عامّه البدن
في كل شبر
في كل أنّه
رساله ليك تنبهك
تترجى فيك تذكرك
مشدوده بي خيوط الأمل
متكيه فوق تلّة صبر
فرّيتي حزنك ..في غناي
زي أي خاطر منفلت
لا قرب الكان في البعيد
لا شدَّ عزماً في حشاي
ما غطى دمعك وحشتي
وكان صمتك
الجاهر .. أساي
والحسره غطّت للدروب
وبتجري سيلاً منحدر
والكون لبس توب الغروب
مشوارك الكان
في القلوب..
ما كان بعيد
لا كان في يوم سكّة سفر
والجفوه شالت
كم سؤال..
وطلاسم أبداً تنقدر
والحال صبح مابدور سؤال
في شرحه إستعصى المقال
عايشين سـنين ..
في جوفنا بركان منفجر
بس قولي ليه
طول الغياب ..رغم المصاب
والحاله أبداً ما بتسر
عجز القلم
حتى الشفاة في حال سكون
حيرانه ..ما قادره النضم
مرسالناكان ...
سحب الدموع المنهمر
شايلاهو ليك
ريح إشتياقنا
الغطى أعماقنا وغمر
يا بسمة ..
أفواه الحزانا
وحب دفين ..عايش جوانا
ونور أمل حامل منانا
وفرحه لى كل العمر
راجيين
رجوعك بالسنين
نلقاك بي كل الفرح
صاعدين على
درج المنى
ونازلين على خاطراً سرح
ما همّد أشواقنا الأنين
وجَِرحْنا ....
بي حبك صدح
ما تطلي بادلينا الحنين
من سيرتك القلب إنشرح
يا كل عزانا
ويا منانا
ويا حلم
لون غنانا
عشمنا في طلّة صباح
وتجينا يا أجمل خبر
ما تطلّي ...
يا أجمل خبر
|
Post: #2
Title: Re: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 04-25-2004, 09:54 PM
Parent: #1
up
|
Post: #3
Title: Re: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 04-28-2004, 00:34 AM
Parent: #2
UP
|
Post: #4
Title: Re: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 04-29-2004, 02:46 PM
up
|
Post: #5
Title: Re: ( أجمل خبر ) قصيدة لكل من يرتاح على نظرة عيون فيها
Author: abuguta
Date: 04-29-2004, 03:16 PM
Parent: #4
طه
ليك القومة
حلوة ومعبرة
انا كنت غائب و
الناس مشغولة
بساس يسوس
ماهم عارفين المدسوس
وكل واحد فيهم يحوس
انت ابدع ونحن نقرا
لك ودى
|
Post: #6
Title: Re: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 04-29-2004, 08:04 PM
Parent: #5
الرائع العزيز أبو قوتة
شكراً على طّلة بهاك العزيزة
و على روعة تعليقاتك اللزيزة
و لك فائق الشكر و الإحترام
|
Post: #7
Title: Re: ( أجمل خبر ) قصيدة لكل من يرتاح على نظرة عيون فيها
Author: طه حسن عبدالله
Date: 05-04-2004, 02:03 AM
Parent: #6
؟؟
|
|